#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
....
ايمن : و دابا نتي تخلصي 12 المليون واخا خدمتي غير ثلت اشهر صافي ..
هادية : نخلص حتى عشرين غير نخرج من ديك الخدمة ...
بقا غير كايشوف فيها و هي ما باغاش تشوف فيه ... حيت دموعها فطرف عينيها، ما راضياش تتسلف و لكن كيما درتي ايدي تودي هي خدمات مكلخة، قالت زعما ما عندو شنو يوقع فالمستقبل و مستحيل نتخلى على شي حاجة كاتعجبني و كانت حلم بالنسبة ليا فصغري ... يعني غير نسني ولكن حتى حد ما ضامن شنو غادي يوقع من هنا للغذا، و التهور طريقو مسدود بحيط عالي، فاللخر ديالو كاين سلوكة مشوكين و الزاج مشتت ... ربي سبحانه و تعالى قال : *اعقلها و توكل* لسبب ... و الواحد هو لي يخمم فالعواقب و السلبيات قبل من الايجابيات ...
كاتشوف الوحيد لي تقدر تسلف منو هو ايمن ... داكشي علاش وافقات ... حيت ساندية باركة غير الرهين ديال الدار مثقلها و بهاء من سابع المستحيلات يبغي يسلفها، غادي يعطيهم ليها و هي ما غاديش تبغي ...
ايمن : صافي غذا يكونو عندك فالكونط ...
هادية : (تبسمات و شفتها كاترعد شادة الدموع بالزز) ش شكرا ...
ايمن : ما تزيريش راسك .. تقدري ترديهم وقتما بغيتي !
هادية : (علات حجبانها) توء، نطرق هاد الحريرة و ندوز للبنك ناقدو الشي لاخور ...
ايمن : على الاقل خلي غير بينما داز عرس ريا ..
هادية : لا درت حسابي ، (تبسمات) شكرا ا ايمن على المساعدة
وقفات و هزات القهوة ديالها فيد و فاليد الثانية عكازها ....
ايمن : (تنهد) ماشي ديالك هاد التمرميدة ا هادية ...
هادية : مكاتيب (هزات كتافها كاتحاول تصنع لا مبالاة و هي بقوة ما حابسة البكية نيفها حمار و عينيها حتى هوما) ياله نمشي بقات قسم و نبداو
ايمن : الله يعاونك .. غذا مع العشرة تلقاي كلشي تقاد ... كاتعرفي شي محامي ؟
هادية : (هزهزات راسها) اه و غادي نهضر معاه باش يوجد ليا الوراق و كلشي
ايمن : الله يدير ليك شي مسلك ديال الخير
هادية : امين ، وقفتك معاي عمري نساها
ايمن : و لو هذا واجب ، ما تخمميش فهادشي و ما تخليهش يثقل كتافك ...
هادية : ان شاء الله ..
خرجات من المكتب بانت ليها اسية، رسلات معاها القهوة و مشات للحمام ... وقفات عند المغسل كاتغسل وجهها و الشهقة مزيراها ... نزلو دموعها بلا هواها واخا عيات حابساهم، الاستقالة كانت كاتفكر فيها من نهار عرفات زيرا شكون و لكن ورا الهضرة ديال اليوم ما تستحملش تزيد معاها مزال .. .
خرجات بحال ايلا ما كاين والو، واخا باين عينيها باكيين و وجها صفر بلا قياس ، كاتحاول تمثل بلي كلشي تمام ...
دورات عينيها فالارجاء و غير عطاوها الاوك باش تبدا رمات كلشي وراها و بدات حلقتها ...
**
أنت تقرأ
LET IT SNOW (بالدارجة المغربية)
Romance#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
