#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
دور عينيه كايقلب عليها كانت جالسة فالجنب الثاني .. مشا قاصدها وهي غير لمحاتو ترسمات ابتسامة على وجهها ... و وقفات ... تقابل معاها و مد يديه مصافحها ...
ميسان : فرحت لي جيتي ...
حبيب : (وساعت تبسميتو) فرحت حيت فرحتي !
جلسو حدا بعضياتهم مقابلين مع منظر الشتا لي كاتضرب فالزاج و تنزل معاه نقطة ورا الثانية .... جا النادل طلب ليه كابتشينو و ميسان طلبات شوكولا الشو مرة ثانية ... بقاو ساكتين حتى تحطات طلبيتهم و خدات ميسان رشفة من كاسها .
ميسان : الله ! المنظر زوين من هنا ياك !
حبيب : (هزهز راسو) زوين ...
ميسان : ديما منين كاطيح الشتا كانبغي نجي للهنا ... ولكن ايلا كانو مساليين ليا !
حبيب : ما كانوش كايخليوك تجي بوحدك ؟
ميسان : (علات حجبانها كاتنفي) لا ... و ما كانوش كايثيقو فاختياري لصحابي ... داكشي علاش ما يمكنش نبقا معاهم الراس فالراس .. ايلا بغيت نخرج خاصني نتسنا يا عثمان يا بهاء يا بابا ، خلاص ماما ما كاتخرجش وايلا زعما تنازلات كانت كاتمشي لواحد الجردة ما فيها و تعاود ترجع ! فالاول ما كنتش فاهمة علاش .
حبيب : من بعد عرفتي بلي بسبابنا كانت عايشة مخبية !
ميسان : (هزهزات راسها) داكشي ! و سبحان الله واخا كنتو قراب عمركم تلاقيتو !
حبيب : تلاقيتك، هادية تلاقات بهاء، ريا تلاقات عثمان ، و ما تلاقيناهاش !
ميسان : ههههههه الزهر ديال والو !
حبيب : من الخير !
ميسان : هي لاباس ؟ لبارح خلات علينا الدار خاوية ... و ما بغيتش نعيط ليا باش ما نبرزطكمش ...
حبيب : بيخير ، و تقدري تعيطي ليها وقتما بغيتي .. كاتبقا ماماك حتى هي و عندم الحق فيها !
ميسان : (تبسمات) شكرا .
حبيب : (شاف فيها) عفوا ...
دار ثاني مركز مع الشتا .. حتى نطقات ..
ميسان: ما كانش قصدي نضيع عليك خرجتك والله !
حبيب : و شكون قالك ضيعتيها ! الشتا لي ما خلاتنيش ندير داكشي لي مخطط ليه !
ميسان : و ما كنتش معولة عليك تجلس معاي ... غا جابتها الوجيبة
حبيب : نوض !
ميسان : لا غا خليك ... اويلي على نوض !
حبيب : (هز كتافو) و ما نعرف تمشي تخرج ليا ميسان ديال ديك النهار
ميسان : و علاين نكملو عام و نتا كل شوية فكرني فيها، ما قصدتش .
حبيب : (تبسم و شاف فيها) و عمري نساها ! (قلد لكنتها) وليني راك واحد الهمجي ما منكش جوج (ضحك) ديك العرق التركي لي فيك هو لي هضر ياك !
ميسان : (تزنكو خدودها) و حبــــيب ، عفاك !
حبيب : (شد ضحكتو) تمام غا نسكت !
ميسان : و ما كنتش كانعرفك ، و زيد عليها كنت مقلقة ! ندورو حتى نعياو و نرجعو لنفس النقطة ، كنت قنطانة باغا غير نخرج، عزيزي مسافر و عثمان خدام و بابا مفقوص حيت مدابز مع خويا .. صافي كنت غادي نطرطق و زدتي كملتي عليا ..
حبيب : و المرة الثانية !
ميسان :(خرجات فيه عينيها) لا سمحلي فالثانية قلبتي عليا ! عاونتينا شكرا بلا قوة الفهامات .
حبيب : ولكن هضرت معاك عادي ...
ميسان : (حنحنات) فديك الوقت باش يهضر معاي واحد ما كانعرفوش هكاك حاتمي فشكل ... خصوصا انو انا ما مولفاش بالغاشي ! (تبسمات) ولكن دابا خود راحتك ... مرحبا، قول لي بغيتي ...
حبيب : عطيتيني الحق !
ميسان : (هزهزات راسها) وايلي السي اثير كولو و ما نعطيوهش الحق !
حبيب : هههه شكرا .
أنت تقرأ
LET IT SNOW (بالدارجة المغربية)
Любовные романы#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
