#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
دخلو لبيتها و سدو عليهم الباب، جلس تزدح فوق فراشها و هي بقات واقفة كاتشوف فيه، عينيها منفوخين بالبكا و نيفها و خدودها مزنكين ... بلعات ريقها و تنهدات ...
جويرية : ايمن خاصنا نحطو النقاط على الحروف .
ايمن : ياك موافقة نرجعو ... واخا داكشي لي فات !
جويرية : لي فات مات .. و لكن ايلا مشينا حتى تحطينا فموقف اخور ؟
ايمن : (تنهد و جلس مقابل معاها مقاطعها) جويرية ... اجي حداي (طبطب على الفراش بجنبو) اجي ..
جلسات حداه و هي كاتلعب بصباعها بين يديها، شد فيديها و نطق برزانة .
ايمن : داكشي لي وقع قبل ربع سنين غادي نساوه فمرة، ما تخليهش يأثر علينا دابا و لا من بعد، صافي تعذبنا بما فيه الكفاية بسبب قراراتنا و تخمامنا العوج . نتي ذكرتي الفراق واخا كنا متعاهدين ما نجيبو سيرتو وانا ..
جويرية : (قاطعاتو) صافي بلا ما تقول .
ايمن : تمام (هز راسو) مدة طويلة دازت و تبدلو فيها شحال ديال الحوايج، كبرنا و نضجنا ما بقينا ديال هاد التخربيق و الحكامات الخاوية . نتي عارفة فاش كانقول شي حاجة كانعنيها، و انا دابا ناوي الزواج ، المعقول، لحلال و الدوام، و باغي غير نتافقو على شي حاجات و نصارحك بشي حاجات اخرين و صافي ، غا نكونو حطينا النقاط على الحروف .
جويرية : (بخوف) باش غادي تصارحني ...
ايمن : (دوز يديه على شعرها) كنتي اول وحدة نقيسها ، عارفة !
جويرية : (هزهزات راسها بعدم فهم) عارفة ..
ايمن : و الوحيدة
تبسم و هو كايشوف ملامح وجهها تبدلو و الصدمة كاسياهم ..
جويرية : ك كيفاش !
ايمن : زݣلتها فاش قلت ليك غا نجرب وحدة وجوج و ثلاتة ، ما درت حتى حاجة من داكشي ، حتى نهار جيتي لتماك ما كان واقع والو، و ديك البنت ماشي انا لي جبتها
جويرية : ها .
🎞️#𝚏𝚕𝚊𝚜𝚑_𝚋𝚊𝚌𝚔🎞️
⚫🎥⚪
متكي على ظهرو فوق الفراش ديال واحد البيت فدار صاحبو كايلعب بالݣيتار حتى كايصوني تلفونو ، طلل عليه لقاها يماه لي كاتعيط عليه ، ناض جلس و جاوبها .
مريم : اولدي مالك ما كاتجاوبش جويرية ؟
ايمن : (مقلق) شنو ! عيطات تشكات ليك ؟
مريم: جات حتى للهنا
ايمن : كيفاش ؟ و عرفات ؟
مريم : والله ايلا راها شادة الطريق باش تجي لعندك، ماشي حشومة عليك مرمد البنت على الخوا الخاوي ، غادي نلقاها شي حاجة حامضة غا نصبنك عليها
ايمن : ايمتا جات ؟
مريم : خرجات هادي ساعة من الدار .
ايمن : (تنهد) صافي تمام عندي
مريم : و الله يرضي على ولدي وسع خاطرك ، نزل كواريك شوية .. تبقا تعفر على البنت حتى يضربوك الحيوط و جلس تخنن من الليل الليل، والله يا السخط و نشوف الݣارو ففمك نكوي ليك شواربك .
ايمن : ماما راه فتت 23 ..
مريم : و تولي حتى ف 100 . و حربش
ايمن : يكون خير ، ياله تهلاي .
أنت تقرأ
LET IT SNOW (بالدارجة المغربية)
Любовные романы#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
