《Poyun》ဖော့ယွင် (မြန်မာဘာသာပြန်)

အပိုင်း(၆၇)-အဓိပ္ပာယ်ပါသော အပြုံး

သူမ​၏ ပုပ်သိုးနေသော လက်ချောင်းများဖြင့် မှဲ့နီလေးကို ထိကာ ယန်ရှယ်အား အဓိပ္ပာယ်ပါပါ ပြုံးပြလိုက်တော့​၏။
---------------------------------------------

ရုတ်ခြည်းဆိုသလို ယန်ရှယ်​၏ မျက်နှာမှာ ခံစားချက်တို့ဗလာဖြစ်သွားလေသည်။ မည်သို့မည်ပုံ တုံ့ပြန်ရမှန်းမသိ၊ တောင့်တောင့်ကြီးဖြစ်နေလျက် လပ်တော့screenကိုသာ ပြူးကြောင်ကြောင်စိုက်ကြည့်နေမိ​၏။ လပ်တော့မှ ထွက်လာသော ညည်းသံများမှာလည်း ကြည်လင်ပြတ်သားစွာဖြင့် နားထဲသို့ ပြောင်ပြောင်တင်းတင်းဝင်ရောက်လာသည်။

ကျန်းထင်သည် သူ​၏မှင်သေသွားသော အမူအရာကိုကြည့်ပြီး တိတ်ဆိတ်စွာ အသက်ရှူထုတ်လိုက်လေ​၏။

အနှီထွက်လေသည် စိတ်အေးသွားခြင်းပေလား၊ တိုးတိုးတိတ်တိတ် သက်ပြင်းချလိုက်ခြင်းပေလား မသဲကွဲပါချေ။ လျှာရင်းတွင် အနည်းနည်းခါးသက်သက်ဖြစ်လာသဖြင့် ခုနက ကိုက်ပြီးကျန်သော ဖက်ထုပ်တစ်ဝက်ကို ပါးစပ်ထဲထည့်လိုက်လေသည်။ ထို့နောက် ရှုပ်ထွေးပွေလီလှသော အမည်မသိခံစားချက်များကို ဖက်ထုပ်နှင့်အတူ ဝါးမျိုလိုက်ကာ ပန်းကန်လုံးနှင့် တူတို့အား အသာအယာ ပြန်ချထားလိုက်​၏။

ကျစ်--သူ့စိတ်ထဲ ရုတ်တရက် အတွေးတစ်ခု ဝင်လာ​၏။

ထို့နောက် ယန်ရှယ်ထံမှ အသံထွက်လာသည်။

"ဒီတစ်ယောက်ရဲ့ ဘော်ဒီကမိုက်သားပဲ။"

ကျန်းထင် : " ? "

ယန်ရှယ်က မေးကိုပွတ်လျက် ပြုံးတုံ့တုံ့နှင့်

"ဒါပေမဲ့ အောက်ကတစ်ယောက်က သရုပ်ဆောင်သိပ်မကောင်းဘူး။ အသားအရေလဲ သိပ်မကောင်းတဲ့အပြင် အမူအရာကလဲ နည်းနည်း အတင်းလုပ်ယူထားသလိုပုံစံကြီးနဲ့။ ရုပ်ကလဲ မင်းနဲ့ယှဉ်ရင် အဝေးကြီး။ ခြုံပြောရရင် ရိုက်ချက်တွေနဲ့ ထုတ်လုပ်ရေးကတော့မဆိုးပါဘူး။ တစ်ရာမှာ ခုနစ်ဆယ့်ငါးလောက်တော့ ပေးလို့ဖြစ်ပါတယ်။ ဒီအမှတ်ပေးတာကလဲ ဒီလိုဖုန်မှုန့်မျိုးကို ဘယ်သူ့ဆီကိုမှ လွင့်ထွက်မသွားအောင် သေချာထိန်းသိမ်းထားနိုင်တဲ့ ကိုယ်တို့ မြို့တော်ရုံးချုပ်က ညစ်ညမ်းဗီဒီယိုတိုက်ဖျက်ရေးအဖွဲ့ရဲ့ စွမ်းဆောင်ရည်ကြောင့်ပဲ။"