قمراي وانا الليل

البارت الحادي عشر

في سياره غيث
كان عنده قدام أمجاد و ورا البنات و غريد ورا أمجاد و كانت حرانه و ما تبي تقول لغيث مدري كيف تحس بمشاعر غريبه فدقت أمجاد و همست لها و قالت : قولي لغيث يرفع للمكيف حر و قالت لها أمجاد بنفس الهمس: ورا ما تقولين له انتي طيب
غريد : يبنت الاودام اخلصي مهب وقت تحقيق بموت حر و كتمه الله يقلعتس
أمجاد بعناد : معصي والله ما أقوله و بعد ازيدتس من الشعر بيت اسمعي شبقول و قالت غيث ابتسم غيث بخفه و قال: لبيه و قالت أمجاد : لبيت في منى ابد والله غريد تكلمك
غريد توسعت عيونها و تورطت و بغت تموت و ناظر غيث بالمرايه الي بالنص يبي يشوفها و قال امريني يا بنت العم؟
و غريد حست بهبوط و ما تدري شفيها كذا تموت و منها و قالت وهي بتموت و بالغصب طلع الحكي وهي ودها تذبح أمجاد : ما يأمر عليك عدو ابد بس حر شوي ينفع ترفع للمكيف شوي او تفك الشباك ولا اي شي لانه كتمه بعد
غيث ابتسم و قال : اي ينفع ليش ما ينفع ( غيث يكون رايق لما يروحون للديره) و قوا للمكيف و قال ان بردتو علموني و اعذريني ما سمعتس لين أمجاد قالت
غريد قالت في نفسها الله ياخذتس يا أمجاد و قالت : لا عادي حصل خير و قرصت أمجاد بأقوى ما عندها من القهر الي فيها من أمجاد و صرخت أمجاد بدون قصد
غيث بحدة : صوتسسس يبنتي بعدين علامتس
أمجاد وهي تتحسب على غريد : مدري في شي قرصني
غيث ضحك و قال : سم الله عليتس وانا اخوتس وش الي بيقرصتس تبين اقرصتس صدق عشان تعرفين تصرخين ثاني مره
أمجاد : لا شكرا الي جت تكفي
غيث : اجل اعقلي
أمجاد : على خشمي
عذوب : يا الغيث ( عذوب كانت تحب تناديه كذا و غيث كان يحب انها تناديه كذا)
غيث : يعيونه
عذوب : انفداها يصلح تشغل عبدالمجيد؟
غيث : يصلح وانا اخوتس يصلح انتي امريني بس اي اغنيه تبين؟
عذوب و كأنها تقرأ افكار غريد قالت وهي تنط و تصفق كأنها بزر : اخذت القلبببب
غيث : عشتو من خذا قلبتسس
عذوب : والله توه ما جا الي خذا قلبي
غيث : صرنا ما نستحي هههههه
عذوب : وذا الصدق اي يلا تكفى شغلها
غيث : ابشري و شغلها وهو يناظر بالمرايا لفتته عيون غريد الي تطالعه و ناظرها شوي و صد
ريمان كانت ورا غريد و طقتها بخفه عشان تلف عليها و قالت : عطيني شاحن جوالي بيطفى
غريد : طيب اصبري ادوره و قعدت تدوره و لمن طلعته جا مطب و طار من يدها لحضن غيث و طارت عيون غريد و قالت بهمس ( شاطره غريد شاطره اجل يلا اخذيه الحين)
غيث كان ساكت وهي يدري انه حق غريد بس يبيها تقوله هاته اشتغل فيه عرق اللعانه لانه لاحظ عليها تتهرب منها
غريد بهمس : ذا شكله ناوي يحنطه بحضنه و دقت أمجاد و قالت : عطيني الشاحن من حضن غيث بالله
أمجاد جت بتمد يدها و مسكها غيث و قال شفيتس؟
قالت : ابي الشاحن الي بحضنك
غيث بهمس ( يعني صامله يا بنت أمير تتهربين مني) و قال ل أمجاد : هو حقتس؟
أمجاد : لا حق غريد
غيث : اجل خلاص كأنها تبيه خل تقولي اعطيها كود اني ما اكل الناس
غريد : يا الغيث
غيث استغرب من الاسم لانه محد يناديه كذا الا عذوب و قال عيونه وهو تعود يسمع الغيث يقول عيونه
غريد بهمس ( عيونه يمه شفيه ذا) و قالت : انفداها ابد عطني الشاحن الي بحضنك لانه حقي و طاح مني قبل شوي يوم جا المطب
غيث : مد يده و قال اخذيه و خذته غريد و قالت بنفسها ( وش انفداها انتي بعد الله يفشلتسس اهخ يراسي)
________
في سياره إيهاب
ابو إيهاب : وقف بالمحطة خل ننزل نصلي اذن الظهر و مره وحده تاخذون أغراض من البقالة
وقف إيهاب و وقفت كل السيارات وراه و نزل و نزلو معه الي يسوقون و قال : ابد خل ننزل نصلي اذن الظهر و راح كل واحد لسيارته يقول للي فيها ينزلون
عند ريمان نزلت مستعجله و ما انتبهت لعبايتها انها انفتحت من تحت و كانت ماشيه و شافها عبدالرحمن و قال : يبنت
لفت عليه ريمان و هي منخرشه و قالت بهمس تسمعه سحاب وهي جمبها : يمه شيبي ذا
سحاب ماسكه ضحكتها غصبببب
عبدالرحمن بحدة : عبايتسس قفليها يبنت الاودام
ريمان قامت تناظر فيه يعني كأنه مو مصدقته
عبدالرحمن : اخلصي من تحت مفتوحهه قفليها!
ريمان ناظرت و شهقت و قفلتها بسرعه و قالت : ما انتبهت لها والله ولا حسيت
عبدالرحمن : معليه بس انتبهي ثاني مره يا كود احد يشوفتس
ريمان هزت رأسها بمعنى طيب و مشت و قالت : يمه يا صوته اول مره ادقق فيه تكفين و وجهه حاددددد اهخ شلع قلبي
سحاب : طحنا طحنااااا بشباكك عبدالرحمن
ريمان : لا يا الخايسه بيني و بينه ٨ سنوات وش ابي به!
سحاب : ههاي يعيوني العمرر ما يهمم في قوانين الحب بعدين اكبر دليل عائلتنا
ريمان : اقول انطمي بس خل نصلي لا اخليهم يصلون عليتس
سحاب ضحكت و أشرت على خشمها : على هالخشم
ريمان : اي اعقلي و دخلو المسجد و صلو خلصو و راحو ل السيارات على نفس التقسيم و غيث فتح باب سيارته : بنات تبون شي من البقالة؟
أمجاد فزت من ورا (وهم غيرو الأماكن و ورطو غريد الي جت اخر وحده وما بقى مكان فاضي الا قدام و اضطرت تجلس غصبن عنها وهي للحين تتحسب على البنات) أمجاد : اي اكيد نبي تستهبل ميتين جوع حتى فطور ما خليتونا نفطر كله عشان ذا النجد الي بتموتون عليها
غيث : اول شي وينتس يا الملسونه كان قلتي ذا الحتسي وانتي قدام عشان اعلمتس من الي يموت على نجد
أمجاد ضحكت : هجيت منك و قعدت ورا و خليت لك غريد
غريد : حسبي الله عليتس صدق كنت ابي ورا عند الشباك
عذوب : وهنا عندتس شباك بعد و قدام حلو ترا
غريد تركبت على رجوالها و هي نست عن غيث الي واقف و فاتح الباب و قالت وهي يدينها على ظهر المرتبه : و دامه حلو يا المخيسه وراه تورطوني انا وانتو تدرون ان غيث يوترني اخوتس يوتر يختي الله يقلعكم صدق
عذوب توسعت عيونها و قعدت تأشر لعلى وعسى غريد تفهم بس غريد كانت مفهيه و قالت : شفيتس انتي انحولتي يا امي؟
و غيث كان متكتف و خلاص معد قدر يمسك ضحكته و ابتسم بقوه و قال : ايوه قررتو وش تبون؟
هنا غريد حست كان أحد كاب عليها مويه حاره حست بدوخه و كلشي حتى من الصدمه صنمت بمكانها معد تحركت ولا شي و توسعت عيونها و غمضت و قالت بهمس ( لاااا يربي لاااا)
و البنات كل وحده قالت شتبي و سجلهم غيث و غريد ما نطقت بحرف بس عدلت جلستها و فكت الشباك و قعدت تناظر وهي بتموت ودها الأرض تنشق و تبلعها و انخرشت من غيث الي جا من عند شباكها و حط يدينه على الشباك و قال : يحلوه انتي ما ودتس بشي من البقاله ما بقى الا انتي فقالت : ابي فطيرة و عصير
غيث ضحك بصوت عالي و قال : شوفي يا أمجاد الناس المتواضعه مب انتي طلبتي كلشي وش بقى ما طلبتيه بس
أمجاد من ورا : اشدعوه عليك حاسدني
غيث مشى وهو يضحك و غريد تنفست براحه و قالت : اهخ ما بغى يروح كأنه فلها ذا قام بس يلزق عمى بعينه
جمان قدمت شوي عشان توصل لغريد و قالت وهي تضحك : بغيتي تموتين علينا يوم سمعتي صوته لو تشوفين كيف كان يضحك قسم بالله ان تموتين اول مره اشوف غيث يضحك كذا تكفين شمسويه به انتي خافي ربتس
غريد : اقول اذلفي بس وش بسوي به انا مثلا!
سحاب بمكر : والله مدري عنتس شكلتس خذيتي عقله
غريد وهي تشوفه لعاب : اي اي ما لقيتي الا انا اخذ عقله جعله بلا عقل
أمجاد فزت : هيه ترا عاده اخوي!
غريد : اصه بس ازعجتينا ترا
أمجاد : انا اوريتس ياللي ما تستحين خل نوصل بس
غريد : خفتتت تكفين
نجد وهي كانت نايمه و صحت على اصواتهم : اف يخي الواحد ما ينام معكم انتو اسكتو شوي حشى مب اودام!
ريمان : اص اص و اشكريني وصيت لتس بأغراض عشان تاكلين لانتس كنتي نايمه
نجد وهي سادحه على ياسمين : الله اخيرا احد ذكرني
ياسمين طقتها و قالت : الي يشوفتس يقول جاحدينتس!
نجد : اي والله لكن الشكوى لله
سحاب شهقت : شف الكذابه ارجعي نامي تكفين لا أكفر فيتس و سكتو على صوت غيث وهو يفتح الباب : وذي اغراضكن جت شتبون بعد؟
أمجاد : ابد اقعد دايم مروق بس تكفى
غيث : على حسب والله ان ما رفعتي ضغطي ابشري
أمجاد شهقت : اجل انا الي ارفع ضغطك طيب طيب
غيث رمى عليها كيستها و قال : اص بس صرفت عليتس خمسين ريال لحالتس
أمجاد : بس استاهل صح
غيث : لا والله لكن الشكوى لله
غريد هنا انهارت ضحك و قالت : عطاتسس وحده يا أمجادد احسن محد قالتس من دق الباب لقى جواب و كمل الطريق وهم شوي يسكتون شوي يسولفون
_________
في سياره سيف
سعود : يا الليل صدق متى بنوصل
سيف : خلاص قدنا قريبين بقى نص ساعه كذا و حنا بالبيت ان شاء الله
هيثم : يا سعود اسكت تراك ابلشتني ابي انوم زي الاوادم يخوي
سعود : الحين صرت انا مزعجك ولا انت ما تعرف تنام
خالد : بس بس كأنكم بزرانن
فهد وهو مغمض عيونه و سادح على فراس : الله ياخذني ان ركبت معكم مره ثانيه
سيف : خلاص شبلاكم يوم قربنا نوصل قامت الشياطين
أمجد : الله يعين بس خلاص انطمو بقى نص ساعه اصبرو
بلال وهو ياكل : صدق انكم مب حقين سفر
سعود ضحك : ابد انت الي تصلح للسفر والله نص الطريق نايم و تصحى تاكل و ترجع تنام
الكل : هههههههههههههههههههههههههه
هههههههههههههههههههه
و قضى الوقت و وصلو و و نزل ابو إيهاب وهو رافع رأسه للسماء و قال :
نجد يا نجد ما فقدتي
غاليتس؟ كود انه فقدتس
اهخ يا ريحة نجد و شمس
نجد و لييل نجد يا حبي لنجددد

ابو عبدالله : صح لسانك يا راشد صح لسانك و لفو على صوت ابو فيصل ( واحد من شياب الديره و كان صديق ابو إيهاب و صديق ابو عبدالله بالحيلللللل و خاصه ابو إيهاب و كان بيته مقابل بيتهم)
ابو فيصل : تو ما نورت الديره
ابو إيهاب : منوره بأهلها يا ابو صالح
ابو عبدالله : ارحببب يا ابو صالح أرحب يا حي الصوتتت
ابو فيصل ابتسم : حي نباكك و خذتهم السوالف و حلف عليهم ابو فيصل انهم يدخلون يتقهون عنده ببيته و عجزو يقنعونه فدخلو معه و الباقين كان ينزلون أغراضهم و يرتبون و كذا بحكم انه لهم كم شهر من الديره و بنص الحوسة دخل عليهم ابو إيهاب و قال : اجلسو اجلسو بغيت احتسي معكم كلكم الكل لف عليه مستغرب و جلسو و كمل كلامه و قال : انا انسان كبرت خلاص قدني ٧٧ سنة عايش و لله الحمد المهم ماني مطولها و بقول لكم انا ما عادني طالعن من ديرتي ان بغيتو انتو روحو الرياض لكن انا محد بيطلعني من نجدي لين اموت فيها و وصلكم العلم و وقف و عصاته بيده و هو ما يمشي الا بها و قال انا داخل اقيل شوي صحوني لصلاة المغرب و راح و خل الكل قاعد بصمت و قال أبو غيث : طبيعي وش متوقعين من ابوي خلاص كره الرياض و كبر و ما يبي الا ديرته معليه معليه يا زينها الديره و حنا بعد نحبهاا و كمل كلامه و قال انا بعد بدخل اقيل و دخلو الشياب و الحريم و ما بقى الا البنات و العيال يرتبون و ينظفون و يحوسون لان يدرون لو قامو وهم ما سو شي جدهم رح يذبحهم من الاخر ههههههه و غريد اللي خلقة كانت مقهوره من غيث و كانت تمسح و المويه كلها ارض كانو يغسلون الحوش و ابتسمت بخبث على الفكره الي جت ببالها و شافت غيث قدامها و على طول رشت عليه المويه بحكم انها تنظف و ما انتبهت و لف عليها غيث بكل قوته : شبلاتس انتي انهبلتي و قعدتي!
غريد وهي ماسكه الضحكه غصب و واضح على وجهها و الي خلاها ما تقدر تمسك نفسها وجه الغيث الي شوي و يدفنها بأرضها
غيث : وش الي يضحك ضحكينا معتس
غريد وهي ماسكه المساحه بيدينها الثنتين و حطت فكها على يدها يارب فهمتو الحركه 😭) قالت وهي تضحك : اسفه شفيك عصبت بالغلط
غيث مسك ثوبه و رفع حاجبه قال : ذا كله بالغلط!
غريد قالت بهمس ( ذا شفيه بسم الله كأنه يسمع أفكاري) و قالت : ايه اجل برشك بالمويه عمد اشدعوه ما انهبلت توي
غيث ضحك بنص عصبيته : لا يعيوني قد انهبلتي و خلصتي بس شكلتس ما تدرين
غريد وهي ما تفكر بكلامها : وش قد شفت مني!
غيث وهو يضحك بمكر : وش قد شفت منتس!!
غريد حست بورطه و قالت اقول نظف نظف بس لا ارشك مره ثانيه
غيث ضحك ضحكة انتصار : يعني تعترفين انها عمد!
غريد لفت عليه وهي ما تدري وش تقول ما فكرت بكلامها و قالت : وانت بذا الحلاوه من بيرشك بالماء عمد بالله
غيث اختفت ضحكته و وقف يناظرها بذهولللل واضح على وجهه و قال بهمس ( شفيها ذي مب صاحيه!)
ريمان دقت غريد الي واقفه بصدمه من نفسها : هيه انتي وش قاعده تخثردزين به!
غريد راحت بدون ما تنطق حرف و دخلت أقرب غرفه شافتها و نزلت جلالها و وقفت تهوي نفسها و كانت غرفة العيال وهي مو منتبهه ابد و لفت على صوت الباب و شافت فهد قدامها و هنا غريد صرخت بأقوى من عندها هي اصلا مصدومه و انصدمت اكثر لمن شافها فهد و مدري ليه بكت و جو كلهم يركضون على صراخها و فهد من الصدمه واقف ما تحرك و اخوانها دخلو يغطونها