အိုမီဂါအဖြစ်ပြောင်းလဲသွားပြီးနောက်ပွဲဆူသွားပြီ

Chapter 25

သို့ရာတွင် ယွမ်ရှင်းကျဲက ထူးဆန်းသည့်ထောင့်အနေအထားမှ ဓားရှည်ကြီးကို ရှောင်လိုက်သည်။ နောက်သို့အမြန်ဆုတ်ပြီး လေပေါ်တစ်ဖန် ပြန်တက်သွားသည်။ ဤတစ်ကြိမ်တွင် အပေါ်မြင့်မြင့်ဆီသို့ ရောက်သွားသဖြင့် ဆွဲငင်အားမဲ့စက်၏အသံများက်ုပါ ကွင်းအပြင်မှ ကြားနေရသည်။

ထို့နောက်တွင် ယွမ်ရှင်းကျဲက သူ၏ အလင်းဓားရှည်နှစ်ချောင်းကိုထုတ်ကာ အောက်သို့ လျင်မြန်စွာ ခုန်ဆင်းလာသည်။

" ချီးပဲ ... ပဏာမပြိင်ပွဲတုန်းက လှည့်စားချက်ပဲလားဟ ..."

" အမြင့်ကို အသုံးချ အောက်ကိုခုန်ဆင်းပြီး ပြိုင်ဘက်ရဲ့ ဒူးနေရာကို တိုက်ခိုက်မယ်ပေါ့ ... ဒီတစ်ခါရော ဘယ်နေရာကို ထိသွားဦးမှာလဲ ..."

" သူ အောင်မြင်ပါ့မလား ..."

ပြိုင်ဘက်ကလည်း အသင့်ပြင်ဆင်ထားခဲ့သည်။ သူက ယွမ်ရှင်းကျဲကို အခွင့်အရေး အနည်းငယ်မျှပင် မပေးပဲ လေထဲသို့ ခုန်တက်လိုက်ပြီး နေရာတစ်ခုရှာပြီးနောက် ရပ်တန့်လိုက်သည်။

ထို့နောက်တွင် ငွေရောင်မက်ခါ၏ ပခုံးထက်မှ လျှို့ဝှက်ကိရိယာတစ်ခု ပွင့်လာသည်။ မြောက်များစွာသော ငွေရောင်မြှားတံများ ချက်ချင်းပေါ်ထွက်လာပြီး မလှမ်းမကမ်းမှ ယွမ်ရှင်းကျဲထံသို့ ဦးတည်သွားသည်။

ငွေရောင်မက်ခါမှ မြှားတံများထွက်ပေါ်လာသည်ကို မြင်လိုက်သည့်အခါ ယွမ်ရှင်းကျဲက နှုတ်ခမ်းများ တွန့်ကွေးလိုက်ပြီး သူ၏လမ်းကြောင်းကို‌ ချက်ချင်းပြောင်းလိုက်ပြီး ၎င်းတို့ကိုရှောင်ရှားလိုက်သည်။

ယခုချိန်တွင် မက်ခါကိုလေ့လာနေခြင်း ပြီးဆုံးသွားပြီဖြစ်သည်။

မက်ခါ၏ အခြေခံဒေတာများအရ ခုန်လိုက်သည့်အချိန်ဖြစ်သွားသည့် ‌ဂျက်ပါဝါမှအစ အသေးစိတ်လိုအပ်ချက်များအထိ မက်ခါတစ်ခုလုံးကို မောင်းနှင်သူ၏ ဦးနှောက်မှ ခွဲခြမ်းစိတ်ဖြာပေးခြင်းဖြစ်သည်။ ၎င်း၏ ခွန်အားနှင့် အားနည်းချက်များကိုလည်း သိရှိသွားပြီဖြစ်သည်။

မက်ခါ၏ ဒေတာများကို တိုက်ပွဲအတွင်းစုဆောင်းရခြင်းက ယွမ်ရှင်းကျဲ၏ ဝါသနာဖြစ်ပြီး ဤပြိုင်ပွဲတွင် ဝင်ပြိုင်ရသည့် အဓိကအကြောင်းအရင်းလည်းဖြစ်သည်။