أنت تقرأ

انت الهوى ، كل الهوى برد ولهيب🤎

Romance

- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...

#الاوطان #بر #حب #دلال #ذياب #روايات #ريم #سعودية #شعر #قصر #قصيد

بارت ٢

23.1K 385 6

بواسطة rwaiahh6

بقلم rwaiahh6

قام سعود وهو يبتسم : أبوعذبي يطلب وما نلبّي ؟ حشا
‎ميّل ذياب شفايفه وهو يناظر سعود وما حسّ إن كلامه من قلب : وش مسوي لك عمي تركي ؟
‎سكنت ملامح سعود مباشرة : تركي قلت له إنك مرعبني تاركني أصلي الفجر عشر مرات ؟ تركي مالك داعي تتفاخر صح إن كلامي مو من قلب بس ما يعني تقول كذا
‎ضحك تركي وهو يمد إيده لكتف ذيّاب : ما قلت له بس هو ذيب يفهم النوايا، توقّعك بس وإنت فضحت له
‎تعالت ضحكاتهم مباشرة ، وإبتسم تركي وهو يشد على ذياب : إذا ودك تدخل داخل تلعب مع سيف سوني
‎هز راسه بالنفي : بروح للمجلس مع أبوي ، عن إذنكم
‎إبتسم تميم من مشى ذياب وهو يناظره : ماشاءالله صدق وش تربية الفريق هذا ! أنا بهالعمر ما أقول لا على السوني شلون !
‎ضحك تركي وهو يضرب على كتفه وتوجه للداخل يشوف الدرب للعيال لجل ياخذون القهاوي ..
‎عدلّت سلاف جلالها مباشرة : تركي ما قلتلهم حتى أهلهم يجون ؟ حريمهم وبناتهم ؟
‎هز راسه بالنفي بإستيعاب لوهلة ، وعضّت شفايفها مباشرة : روح قول لهم ولزّم عليهم ، البنات عندي وكل شيء جاهز والمجالس مفتوحة لازم يجون لازم
‎هز راسه بزين وهو يناظرها : ياكبر حظي يا أم عذبي
‎إبتسمت فقط وهي تناظره ، وتوجه تركي لمجلس الرجال يلي من هيبته وده يوثّقه ، نهيّان يمينه حاكم وأبوه ، ويساره باقي عياله وعيالهم يلي قاموا مع تميم ومع رياض يقهوون وكأنهم من أهل البيت مو ضيوف ، نطق نهيّان وهو يناظر تركي : ياتركي إن ما جلست معانا مشينا ، جاك العلم حنّا مو ضيوف
‎إبتسم تركي وهو يدور عذبي ولده بعينه ، وجلس بإرتياح من كان بحضن عذبي الكبير وكانت ثواني لحد ما رجع المجلس يضجّ بالأحاديث بين الكل ..
‎إبتسم عناد وهو يناظر تركي : دامنا شفناك الحين ، ما نلوم أبوي فيك ياتركي بس الله يعافيك ذكّره إني أصغر عياله كل ما قدرت ، بالأول حاكم ثم إنت ثم ذيّاب والدور باقي وحنّا الله يعوّض علينا
‎ضحك تركي وهو يناظر نهيّان ، وإبتسم نهيّان : أول أقول لولدك ليت الزمن جاب أبوك لي بدري
‎إبتسم تركي وهو يناظره : لو دريت إنك وراء أبواب الزمن شلت سنيني الماضية كلها وجيتك يانهيّان
‎تعالت أصواتهم مباشرة ، وضحك حاكم غصب عنه : ما تعجّز الشاعر يانهيّان ما تعجّزه ، هو يعجّزنا بهالتعابير
‎تنهّد عناد من أعماقه : وتأخذ أبوي بحلو الكلام بعد ياتركي ! ياوسع وجهي دامي أدور مكان بالأوائل وإنت كذا الله يحفظك ! ياحاكم إمسك مكانك لا يتعداك المحامي
‎عدلّ حاكم أكتافه ، وضحك تركي : لو وصلت الجدي وسهيل ما تعدّيت حاكم بقلب نهيّان خذها مني ..
‎إبتسم حاكم بغرور ، وضحك نهيّان : ما هقيتك تحبّ الغرور ياحاكم ! عز الله الأخو يبدّل الأحوال ويافزاع إنت أخوه بالدم صح ، لكن تركي ما شفت مثله مع حاكم
‎تنحنح عذبي ، وإبتسم نهيّان : وعذبي بن فهد ، ما تهون
‎إبتسم عذبي وهو يناظره : يا طويل العمرّ بس ودي أعقّب على شيءٍ قلته ، ما شفت مثل تركي مع حاكم بس تراه مسميّ ولده عليّ يعني إن كان ما دريّت
‎تعالت ضحكاتهم مباشرة وضحك نهيّان : دريت ياعذبي دريت المهم إنتّ ما تطقّ ، ما يطق لك عرق بدري سمعت إنك تشبّ بسرعة الله يهديك
‎هز راسه بالنفي بإنكار : أفا ! أنا ويني ووين العصبية
‎توجهت أنظار آل نائل كلهم عليه وأولهم تركي ، وتنحنح عذبي : يعني أعصّب ياطويل العمر بس للشيء الليّ يسوى ، أعوذبالله من الغضب وش نبي فيه !
‎إبتسم عناد وهو يناظر عذبي ونظرات تركي له ، وضحك بتعجّب : ياخي الحين يبه إنت تناظر حاكم وتركي وذيّاب بطريقة غريبة ، حاكم يناظرك ويناظر تركي وذّياب بطريقة غريبة ، تركي يناظرك ويناظر حاكم وعذبي بشكل غير بعد ياخي نبي من محبّتكم ذي وش نسوي كيف نسجل ؟
‎تنحنح تميم وهو يناظره : مالنا نصيب ياعناد مالنا
‎تنهّد بحزن : الله يعين بس يجيكم يوم وتعرفون قيمتنا !
_
‎مدت إيدها لعذبي تاخذه بحضنها بتوتّر وهي تتأمل جدتها وأمها وحريم عمامها وكل بنات آل نائل وصار موعد وصول حريم آل سليمان يلي إعتذروا عن الغداء لإنشغالهم لكنهم قرروا يجونهم بعد المغرب وصار الوقت الحين ، حكّاها تركي عنهم قليل لكنها تحسّ بالهيبة وكثير ، كثر الحكايا يلي سمعتها عنهم ، عن زوجة الفريق وأم ذيّاب ، عن جدتهم الكبيرة فاطمة زوجة نهيّان وهم أكثر تشوّقها تقريباً ، عدلت نفسها لآخر مره وهي تأخذ نفس من أعماقها وإبتسمت لها جدتها بهية : يمه الطيبين جيّتهم ما توتر ، أهل الخير ما يوترون ..
‎إبتسمت سلاف وهي تناظر جدتها : أدري بهم ما يوترون لكنهمّ راعين الهيبة ، بنصير أهل أدري بهالشيء أو يمكن صرنا من ناحية الرجال باقي حنّا
‎إبتسمت بهية ، وفتحت سوار الباب من صوت الجرس وتعالت الأصوات مباشرة ..
‎نزعت فاطمة نقابها وهي تبتسم بحُب : بسم الله ماشاءالله لا حول ولا قوة إلا بالله ، ماشاءالله !
‎إبتسمت بهيّة وهي تصافحها إبتسمت بهيّة وهي تصافحها : نوّرتي دارنا أم متعب ! نوّرتي دارنا !
‎توسّعت إبتسامة فاطمة وهي ميّزتها : الدار منّورة بأهلها يا أم سلطان ، منورة بأهلها أبرك الساعات يوم صار لقانا
‎إبتسمت سلاف مباشرة من فاطمة يلي نطقت نظراتها حُب بمجرد ما طاحت عليها : وظنيّ إنك زوجة المحامي ؟ هالغرور يليق عليه وهالولد يليق عليه
‎إبتسمت سلاف وهي تهز راسها بإيه ، تصافحها وتقبّل رأسها : سُلاف زوجته ، حنّا متواضعين مالنا بالغرور حاجة
‎إبتسمت ملاذ من خلف جدتها : نعرف حكاويك يا سلاف ويليق فيك الغرور ! ما بغينا نشوفك يابنتنا !
‎ضحكت سلاف وهي تصافحها : صارت الفرصة أخيراً
‎إبتسمت ملاذ وهي تاخذ عذبي بحضنها : وش هالبشت والحركات الحلوة ! وش هالحركات ولد المحامي ؟ ما ودك تبتسم لنا يعني تأخذ غرور أمك وأبوك ؟
‎شهقت سلاف مباشرة من ورد يلي جات يمّها وهي تشيل باقة أكبر منها بكثير : وش هالجمال ماشاءالله !!
‎ضحكت ملاذ وهي تناظرها من تركت إيد أخوها نهيّان يلي لف بيمشي لمجلس الرجال من شاف الثياب البيض : نهيّان تعال هنا ، لاحظي إنها تركت أخوها عشان تجيك ولاحظي أكثر إنها أصّرت علينا كلنا ما يشيل الورد غيري !
‎عضّت سلاف أصباعها مباشرة وهي تنحني لها : ورد يشيل ورد كثير على قلبي ك ث ي ر !
‎تعالت ضحكاتهم من قبّلت ورد خد سلاف تضمها ، وضحكت سلاف وهي تقبّل خدها ويديها الثنتين : تسلم هاليدين الحلوة تسلم ! ياحظي أنا فيك وبالورد تدرين ؟
‎إبتسمت بخجل وهي تعدل فستانها وتتبع أمها ، ووقفت سلاف تكمّل ترحيبها بباقي حريم آل سليمان وبناتهم وما توسّط بصدرها شعور من بشاشتهم وحلو أطباعهم غير إنهم أهلها وأقرب ناسها مو بعاد ولا أغراب لأول مره يتقابلون ، قامت وجد تاخذ عباياتهم وإبتسمت فاطمة لبهية : ماشاءالله تبارك الله يا أم سلطان ، ماشاءالله الله يديم عليكم العز والخير والأدب أحفادكم خير ما ربيتوا وخلفتوا الله يقرّ عيونكم فيهم ويبلغّكم غاية مُناكم
‎إبتسمت بهية وهي تأمّن على دعائها ، وإبتسمت فاطمة وهي تأخذ الفنجال من سلاف يلي مدته لها : والله من يوم ما قالوا لي زوجة المحامي بصحتها وعافيتها وإني أقول لهم ودوني يمّها ، يقولون لي يمه وش هالحب قلتلهم حبيتها من حبّ زوجها ما دريت إني لا شفتك بقول حبيّت زوجها وأهلها من حبي لها ولا فيكم قصور يا أم سلطان
‎تعالت ضحكاتهم وإبتسمت ملاذ وهي تعدل عذبي بحضنها : إلاّ سلاف لقيتي ذياب ؟ ما شفته من الصباح هزت رأسها بالنفي : يخجل منيّ ذياب ، دخل وده يساعد تركي وشوي ويذوب بثيابه لأنه لمحني ! قال لي تركي متهاوش بالمدرسة وقلت له طيب شوف الولد يمكن يبي شيء يمكن فيه شيء يقول لي ذيب ويمشي عني
‎تنهّدت ملاذ وهي تناظر فاطمة يلي ضحكت : وتركي نفس أطباع حاكم اليوم كله نكلّمه ياحاكم الولد كيف يقول ذيب ويقفّل علينا ما يعطينا جواب
‎هزت سلاف رأسها بإيه وهي تشوف عذبي يلعب بإيد ملاذ ومروّق : إستحلّ حضنك حضرته ! لتين هاتيه
‎هزت ملاذ راسها بالنفي مباشرة وهي تضحك : لا والله ما تاخذينه ! دامه مروّق الشيخ وأبيه أنا ليه تاخذينه عني ؟
‎دق ذيّاب الباب وهو ينادي : نهيّـان
‎هز نهيّان رأسه بالنفي وهو يمشي لأمه : ما أبي المجلس
‎ضحكت سلاف بذهول : أفا هذا وإنت أخو ذيّاب يانهيّان
‎مشى لعند سلاف وهو يمد يده لها : تعالي معي وأروح
‎تعالت ضحكاتهم مباشرة ، وقامت ورد وهي تعدل فستانها وهزت ملاذ رأسها بالنفي مباشرة : ماما ورد ما بتروحين عندهم ، بتجلسين عندنا ونهيّان يروح لحاله
‎هزت رأسها بالنفي وهي تمسك إيد نهيّان : بشوف بابا !
‎نطق ذياب للمرة الثانية : نهيّان أبوي ينتظرك إطلع
‎نادت عليه سلاف : تعال خذه ياذياب وسلم علينا
‎ضحكت ملاذ لثواني : لو يجيك لك الليّ تبينه والله
‎ما كان من ذيّاب رد لثواني ، ونطق آخر شيء : أمي تعالي
‎إبتسمت ملاذ بإرتياح : وأخيراً تذكر أمه ، جيتك يا أمي
‎قامت لتين تأخذ عذبي الصغير من حضن ملاذ يلي قامت لذيّاب وتبعوها ورد ونهيّان لجل يروحون معاه عند أبوهم ..
‎إبتسمت وهي تنحني تعدّل له ياقة ثوبه : ودك تحكيني ؟
‎هز رأسه بالنفي وهو يقبّل خدها : أبوي قال لا تتأخر نادي أخوك وإرجع ..
‎ميّلت شفايفها بهمس : حضرة الفريق وده يسرقك مني
‎إبتسم بخفيف ، ومررت إيدها على جرح بجبينه لكنه مسك إيدها يقبلها : عمي تركي شافها كلها وقال بسيطة ، أبرجع للمجلس الحين عن إذنك
‎إبتسمت وهي تقبّل رأسه وتتأمله بنظراتها لحد ما إختفى لناحية مجلس الرجال ، غصب عنها ضحكت من عدل ثوبه ومن مشيه يلي رغم صغّر سنه إلا إنه يذكرها بأبوه بشكل مستحيل يكون طبيعي لكن ذياب له أطباع أرّق بكثير وتمتمت : الله يحفظك ..
_
‎« عنـد الرجـال »
‎كانت الأصوات تتعالى بكل طرف وبكل زاوية عن كل المواضيع ، مع الساعات يلي قضّوها من الظهر لحد هالوقت نُزعت الأشمغة والعُقل ، تفككت الحواجز أكثر وأكثر وصارت بدل ماهي جلسة تعارف ، جلسة أهل لهم سنين مع بعض ما بينهم حواجز المجالس نهائياً .
‎صفّر عناد بدون مقدمات من دخلت ورد مع نهيّان ، وتعالت ضحكات جدها متعب من توجهت لعمها عناد يلي رفعها للسماء تنحنح حاكم من ولده نهيّان يلي واقف بمحله من تركته ورد : نهيّان ، سلّم ياولد
‎إبتسم نهيّان وهو يناظر حاكم : لا تكلّم سمييّ يا حاكم
‎ناظر حاكم ذياب يلي دخل توه وأنظاره للأسفل : ذيّاب
‎رفع أنظاره لأبوه مباشرة بعدم إستيعاب وإنتباه وهو ما يدري وش يقصد بنداه ويدري إن ما يقدر يقول له سمّ أو يسأله وش يبي وبينهم كل هالمسافة ، كمّل حاكم بهدوء من لمح نظراته : هات لي أخوك
‎مسك ذياب يد أخوه الأصغر وهو يمشي عند أبوه يلي مسك نهيّان وهو يأشر له على جده بهمس : رح سلّم
‎هز نهيّان راسه بالنفي مباشرة ، ولف حاكم أنظاره لذيّاب : وراك طوّلت ما دخلت معاهم !
‎جاوب ذياب بهدوء : كلمتني أمي وسبقوني هم
‎هز رأسه بزين ، وأخذ ذيّاب إيد نهيان لجل يسلم عليهم وتركه يجلس عند سميّه نهيان الكبير ورجع هو بجنب أبوه يلي أشر له ، إبتسم حاكم من ورد يلي نزلت من حضن عمها عناد وهي تمشي لناحية أبوها لكنّها غطت فمها مباشرة من لمحت تركي بالطرف الآخر من المجلس ، تعالت ضحكاتهم كلهم من نظراتها المليانة حُب بشكل غير عادي وصدمتها اللذيذة إن تركي موجود وهي تقرب من إيد أبوها تسحب أصباعه بمعنى " شوف "
‎ضحك حاكم وهو يقبّل إيدها : روحي يَمّ عمك تركي
‎توجهت مباشرة لتركي يلي شالها بحضنه وهو يقبّلها مذهول تماماً لأنها شافته من أشهر : حيّ الليّ مانساني !
‎إبتسم تميم من طريقة جلوسها بحضن تركي وكيف صارت إيدها الصغيرة بين يديه : ياماشاءالله صدق !
‎تنحنح عذبي وهو يهمس لتركي : أنا وإنت نتشابه هاتها وما بيميّز الفريق وإن ميّز إنت محامي وولد عمي على وش ؟
‎هز تركي راسه بالنفي وهو يشد على إيد ورد : متأكد ؟
‎نطق نهيّان وهو يشوف عذبي وده يمد يده لورد لكنه متردد : ياعذبي باكر التردد يمليّ جوفك على بنت تركي
‎هز راسه بالنفي مباشرة : بنت تركي بنتي ياطويل العمر ولا أرضى غير إني أصير أبوها ، أنا بني آدم أعصابه تطقّ ولا يتحمل شيء لتركي ما يصير قريب منه بدون حدود
‎ميًل نهيان شفايفه : هذا الليّ يقول الغضب ماله داعي
‎تعالت ضحكاتهم مباشرة ، ووقفت ورد من على حضن تركي وهي تناظر عذبي ومدّت له إيدها يسلم عليها ، ثم لتميم ثم لسعود ورياض وسيف وضحك نهيّان من لفت أنظارها لأبوها وهي تبتسم بعبط بمعنى تجي يمّه وإلا تبقى عندهم وإبتسم حاكم : يلي تبينه يابوي ، يلي تبينه
‎توجهت لأحضان أبوها ركض وإبتسم تركي : أفا ! قلت أنا وياك صرنا حبايب دامك عرفتيني والحين تتركيني ؟
‎ميلت شفايفها وهي تناظر أبوها الليّ يبتسم ، وإبتسم تركي من رفعت ورد يدها لدقن أبوها ولشيبه بمنظر ما يُستغرب لأنهم شافوا تعامل حاكم مع ذياب الكبير ومع نهيّان يلي أصغر منه ما تجاوز الخمس سنين ، والحين مع ورد يلي الواضح إنه يعاملها بدلال لا مُتناهي من عباطتها وثقتها بنفسها رغم سنها الصغير وإنها أصغر أخوانها ما تجاوز عمرها الثلاث سنين ..
‎لفت أنظارها لأبوها يلي مجلّسها على حضنه ويسولف مع الرجال ، وإبتسمت لذياب بهمس : بروح عنده
‎رفع ذياب حواجبه لثواني وهو يدور بالمجلس مين تقصد ، وعرف إن مقصدها تركي يلي مو موجود بالمجلس وقبل لا يتكلم لفت أنظارها لأبوها : نزلني يابابا
‎حاوطها حاكم وهو ينزلها عن حضنه ، وما سمحت لذياب يرّد بالموافقة أو النفي وهي تمد له إيدها وحقّ ورد السمع والطاعة هذا شيء مفروغ منه ..
‎وقف وهو ياخذها بإيده وإنضمّ لهم نهيان مباشرة يلي توجه لإيد ورد مو لإيد ذياب ..
‎إبتسم ذيّاب وهو يسمعها تحكي أخوها نهيّان عن تركي : ورد تحبينه ؟
‎هزت رأسها بإيه مباشرة وهي تستغرب سؤاله ، وضحك وهو يناظر نهيان من تركتهم ورد ركض لتركي يلي شالها فوق كتفه يرحبّ ويهلي فيها وسط عيال آل نائل يلي إنهلوا عليها بالقُبلات والسوالف مستغلين غياب الفريق لكن ما كان تركي أهون منه وهو يمنعهم عنها ، يدللها وتتعالى ضحكاتها وهي تشوف نظرات الحزن منهم : أحسن بابا يخاصمكم بعدين ! أنا ورد حاكم بس !
‎ورغم براءة نُطقها ونبرتها الصغيرة مقارنة بكلامها ، تعالت أصواتهم كلها من نُطقها لورد حاكم والغرور بنبرتها وكأنها تهدد قربهم منها بإنها بنت حاكم ولا يحق لهم يقربونها ، ضحك تركي بذهول وهو يمسك خدها ويمشي للمجلس : قولي عمي تركي يخاصمكم الحين !
‎جلس تركي وهي باقي بحضنه ، وتنحنح عناد وهو يسمع أذان العشاء : حق ياولد ، ورد إرجعي لأمك تكفين هو أخذ قلب أبوي لا ياخذ قلبك !
‎تنحنح نهيّان وهو يوقف ، ووقف المجلس معاه مباشرة : نتجهّز نمشي للمسجد ، المتوضي يسبقنا لا نمشي جميع
‎إبتسم حاكم وهو يمشي لناحيته يساعده : متوضيّ ؟
‎هز نهيان راسه بإيه وهو يناظر حاكم بهمس : خذ بخاطر ذيّاب وإسأله وش أسباب هوشته اليوم بالمدرسة
‎ناظره حاكم لثواني بهدوء : ما يقول لي يا نهيّان وإن سألته ، ذياب به طبع عصي يكابر لكن ما يقول لي شيء فيه ضرر له وعليه ، يتضارب بنفسه لكن ما يشتكي لي
‎ناظره نهيّان لثواني بعدم رضا : يقول لأمه ؟ لبِكر فارس ؟
‎هز راسه بالنفي : يقول لها شيء يريحّ بالها بس
‎تنهّد نهيان من أعماقه لأن ذياب يشبه أبوه وكثير مهما إختلف : من يشابه ياحاكم ؟ من يشابه
‎شتت حاكم أنظاره بعيد لأنه فعلاً يشبهه بطفولته وكثير لكن الفرق إن حاكم حالياً يعصّب مباشرة من تمنّع ذياب إنه يقول له عن هوشاته وعن شيء يتعرّض له بمدرسته رغم إنه يدري بكثير المضايقات يلي تحصل له بسبب رتبته ومكانه لكنه ما يقول الحرف ..
‎ميّل نهيان شفايفه وهو يشد على إيده : والرجال يلي بالمدرسة عرفته من يكون ؟
‎هز حاكم راسه بإيه : شفت الرجال الأول يلي جاء عند المسجد وقال لذياب هالظرف توصّله لأبوك ؟ يلي قلتلك له بدرب التعاطي ووده أتوسّط له
‎هز نهيّان راسه بإيه : عرفته ، وش يصير لهم ؟
‎نطق بهدوء : يصير عمّ الولد وشكله زعلان ليش إنّي بكّيت عمه ولقى فرصة يتطاول على ذياب
‎إبتسم نهيّان : دامه كذا الله يسلّم يمينك ويمين ذياب ..
‎طلع حاكم من المجلس مع جده ، وتوجّه نهيان يركض مع ورد لأمه وجاء ذياب لجنب أبوه وجده وهو يعدل أكمام ثوبه : أجيب نهيّان الصغير ؟
‎هز حاكم رأسه بالنفي : لا ، عند أمك هم ؟
‎نطق بإيه وهو يشوف عمه : وداهم عمي عناد لها عشانه كان بيتوضى
‎ميّل حاكم شفايفه بعدم إعجاب ، وإبتسم نهيّان وهو يتأمل بيت الشعر والجلسة يلي قدامه : المحامي ، بعد الصلاة مقعدنا هنا يابوك
‎أشر له تركي على خشمه : ما طلبت شيء إبشر
‎كان البيت خالي من الرجال يلي توجهوا للمسجد مشي ورغم إنهم كانوا يمشون بعيد كل ثلاث أو أربع مع بعض إلا إن كان لوجودهم هيبة وحضور يُحسب ، سهل جمع العوائل من الصغر لكن صعب وكثير وقت الكُبر ، وقت إن الأطفال هم الأحفاد ولا هم بأعمار بعض لجل يكبرون سوا ويزيد القرب أكثر وأكثر بينهم ..
‎كان ذياب يتأمل بيض الثياب والشارع قدامه يمتلي بالرجال يلي توّ كان يضمهم مجلس تركي وتو يستوعب عددهم وهيئاتهم أكثر ، كان يتأمل وقطع تأمله ينطق لجده : تجمع حضارتين ؟
‎لف نهيّان أنظاره له ، ووقفت خُطى حاكم رغم إنه ما سمع وش يقول وإبتسم نهيّان بفضول : كمّل للمسجد ياحاكم
‎هز راسه بزين وهو يرد على جواله ويمشي ، وشد نهيّان على إيد ذياب بهمس : حضارتين ؟ يابوك أطباعنا وحدة وأصولنا وحدة !
‎هز ذياب راسه بالنفي : لكننا نختلف ، إنت تختلف
‎ناظره نهيّان ، وهز ذياب راسه بإيه : حنّا عندنا إنت ، أطباعك ، البر وديرتنا ، هم طول حياتهم بالرياض ولهالسبب حنّا حضارتين ، بس إنت جمعتنا
‎ضحك نهيّان وهو يهز راسه بإيه : وإنت كيف تدري إن حنّا راعين البر وهم ما قد جربوا حياته ؟
‎إبتسم ذياب : حسيّت ، حكايات البرّ توضح علينا
‎شد نهيّان بإيده عليه : نكمل هالكلام بعد المسجد
‎دخل وهو يساعد جده يترك جزمته - الله يكرمكم عند الباب ، يشد على إيده لجل يرقى العتبة ، ويتبعه لحد ما وصله لمكانه بالصف وتوجّه هو يترك عكاز جده على أحد العواميد ثم يرجع له لكن سرعان ما تغيّرت ملامحه من إحتقان ملامح نهيّان بالأحمر وإرتعاش يده ، سكنت ملامحه مباشرة وهو يركض يمسك جده : جدي !
‎إلتفت حاكم يلي كان بأول الصفوف من صوت ذياب مباشرة وهو يرجع للخلف وكانت ثواني لحد ما إلتفوا آل سليمان وآل نائل جميع ناحية نهيّان يلي يشد على إيد ذياب بكل قوته ، حاول حاكم يخفف الضغط على إيد ذياب ويمسك هو إيد جده لكن ما قدر وتغيّرت ملامحه مباشرة : نهيّان!
‎كبّر الأمام ، وأشر حاكم عليهم : صلّوا مع الإمام ترتبّوا !
‎ترتبّت الصفوف لكن القلوب تبعثرت أكثر واكثر من نطق حاكم الشديد يلي ترك حتى عمامه يلي بأول الصفوف وسط الرجال ما يقدرون يرجعون للخلف ويشوفون أبوهم ، تبعثرت من الخوف على نهيّان وحاله الغريب والمفاجئ وتبعثرت من ركض تركي يلي راح ياخذ مويا يفتحها ويشرّب نهيان بنفسه لحد ما أخذ نفس وهو يخفف قبضته على إيد ذيّاب وإحمّرت ملامحه : الله أكبـر
‎سكنت ملامح حاكم بإرتياح ، وبالمثل تركي يلي حس الدنيا تدور فيه لوهلة ورجع كل شيء بمحله من رجع نهيان لوعيه وهو ما يدري وش الشيء يلي مرّ فيه لكن إرتعش جسده بدون مقدمات ، لف أنظاره لإيد ذياب يلي ما كان يحس كيف ضغط عليه وكيف تبدّلت للون الأحمر وجمّع حروفه وده يتطمن عليه : ذياب يابـوي ا
‎ما قدر يكمّل كلمته من قبّل ذياب إيد جده مباشرة وما كانت ملامحه أقل إحمرار من أبوه ولا عمه تركي من خوفه على جده مو من ألم يده ، كانت قبلة ذياب لإيد جده سبب برسم إبتسامة مرتعشة بثغر نهيّان يتبعها نطقه بالتوحيد رغم إن نبرته باقي تهتز : لا إله الا الله ، نصلي يا حاكم نصلي
‎تعدّل صف تركي ونهيان وحاكم وإرتاحت قلوب باقي رجال آل سليمان ورجال آل نائل يكملون صلاتهم لأنهم سمعوا صوت نهيّان حتى لو ماكان واضح لهم كلامه ..
‎إنتهت الصلاة ، وما قام شخص منهم إنما لُفت الصفوف تجاه نهيان يناظرونه وسكنت ملامح حاكم يلي كان بجنبه من رفع نهيّان إيده يحاوط ذيّاب ويقبل رأسه ..
‎إبتسم نهيّان بهدوء : عذبي بن فهد ، إنت ترافقني الحين
‎هز تركي راسه بالنفي : خلّنا نجيب السيارات ، ما تمشي المسافة للبيت
‎ضحك نهيان وهو يناظره : ياتركي تراي ما شيّبت باقي فيني حيل الحمدلله الله يمدّ بعمري على طاعته ، بمشي للبيت وقلت لك ياعذبي بيني وبينك كلمة رأس تعال
‎وقف عذبي وهو يمد إيده لنهيّان ، وقام ذياب يعطي عذبي عكاز جده وإبتسم نهيّان غصب عنه لأن كلهم راعين طبع واحد ، لا صاروا بجنبه هم يسندونه وعكازه يكون بيديهم وكلهم أخذوا هالطبع من حاكم ، سنده الأول رغم عياله ..
‎طلعوا الرجال من المسجد ، وتبعوهم عذبي ونهيّان يلي يمشي على مهله لحد ما نطق بهدوء نهيّان يلي يمشي على مهله لحد ما نطق بهدوء : يوم إن حاكم يسولف لي عن تركي ياعذبي ، كان يقول لي عنك معاه ..
‎قال لي مرة عنده ولد عمّ ، شبّة نار من الغضب يتطاول ولا يهديّ لجل تركي ، سمعت بالحكايات الأوله والمشاكل الأوّله وإنك كنت بصف تركي طول الوقت وأدري بكل شيء ياعذبي وكلمة الرأس يلي بيني وبينك إنت ما تحتاج إني أقولها لك ، كنت مستعد ترمي نفسك بالنار لجل تركي مره يومك قلت أنا فعلت وخذوني أنا بداله ، وأقولك تركي يستاهلك وإنت تستاهله وإن تبي مني كلمة ؟ الزمن لا يغيركم على بعض ياعذبي وأنا داري إنت وياه أقوى من الزمن ياولدي ، الله يحفظكم لبعضكم
‎إبتسم عذبي غصب عنه وهو يعجز يرد عليه ، وقبّل رأس نهيان من عجز شعوره : تبي مني كلمة ؟ والله لو إجتمعت الدنيا إنس وجن يغيروني على تركي ما يقدرون بإذنه ياطويل العمر ، الله يديمك لأحفادك وعيالك ولتركي ولنا
‎إبتسم نهيّان وهو يشد على إيده ، ولمح ذياب وتركي وحاكم يلي يمشون قدامه وتنهّد من أعماقه يسطّر أُمنياته على هيئة تنهيد يصعد للسماء ويفهمه ربّ العالمين ..
_
‎« بالداخـل »
‎إبتسمت سلاف برضا تامّ عن كل الحوارات وعن جلستهم بشكل عام ، زال منها التوتر وأكثر من لُطف أطباعهم والأدب المتوارث فيهم كلهم .. تقديسهم لفاطمة جدتهم لا يُصدّق وحتى ورد وقت دخلت مجلسهم ، جلست بحضن جدتها فاطمة ، ثم قبّلت جداتها أم أبوها وأم أمها وتوجهت لجنب سلاف وأمها تسولف لهم عن مجلس الرجال وعن عمها تركي ، إبتسمت ملاذ بذهول : قال لي حاكم توسّدت حضن المحامي حضرتها ببيت الشعر يوم تلاقوا ما توقعت للحين تتذكر ماشاءالله وتحبّ !
‎هزت سلاف رأسها بإيه : ولا أنا توقعت صدقيني رغم إنه شوّقني ألاقيها بشكل ما تتصورينه ويقول لي إنها حبّته ، ما توقعت حبّته لدرجة إنها تشوفه بعد أشهر وتذكره بعد
‎ضحكت ملاذ وهي تأشر على سلاف لورد ثم لعذبي يلي يلعب بحضن جدته جهيّر أم أبوه : شفتي عمو تركي ؟ سلاف زوجته وهذا ولده الصغير عذبي شفتيه ؟
‎إبتسمت بذهول وهي ترجع أنظارها لأمها بخجل وهمس : حبيتهم كلهم !
‎تعالت ضحكاتهم من إحمرار ملامح سلاف ، ومن قامت ورد تناظر أمها : تجين معايا عند البيبي ؟
‎إبتسمت ملاذ وهي تناظرها : ناخذ البيبي معانا للبيت ؟
‎هزت ورد رأسها بإيه مباشرة ، وضحكت سلاف وهي تمثّل الحزن : بعدين يبكي يقول أبغا مامتي ! لازم تأخذيني معاه عشان ما يبكي صح ؟
‎ميّلت شفايفها بتفكير وهي تناظر أمها : ناخذهم كلهم ؟
‎تعالت ضحكاتهم مباشرة وإنحنت سلاف تقبّلها : أموت عليك أموت لو تأخذين قلبي عادي
‎قامت ملاذ وهي تشيل عذبي بحضنها من جهيّر ، وقبل لا تجلس دخل نهيّان ولدها يلي كان قامت ملاذ وهي تشيل عذبي بحضنها من جهيّر ، وقبل لا تجلس دخل نهيّان يلي كان يلعب بالخارج وهو يعدل ثوبه : ماما بابا يبيك عند المجلس !
‎إبتسمت ورد مباشرة : نأخذ البيبي لبابا كمان ؟
‎لفت ملاذ أنظارها لسلاف يلي إبتسمت من نظرات ورد لها : صار ولدكم مالي كلمة أنا الحين ، المجالس هالجهة فاضية خذوا راحتكم وإجلسي عنده لا تستحين
‎توجّهت ملاذ مع ورد ونهيّان لناحية المجالس ، وركضوا نهيّان وورد قبلها لأبوهم وإبتسمت بخفيف : ليه جاي
‎ميّل شفايفه لثواني بعدم إعجاب : وش هالأطباع يابكر فارس ؟ من طلعت من عندك الصبح ما شفتك وتنادين ذيّاب تدورينه ما تدورين أبوه ؟
‎ضحك نهيّان وهو يناظر أمه : يقول بكر فارس زعلان منك
‎ضحكت بذهول : ياسلام ! ما يقول بِكر فارس إلا وقت يزعل ؟ توك ما عرفت حكايتنا يانهيان توّك ما تفهمنا ..
‎إبتسمت من عذبي يلي يلعب بشعرها وهي تقبله : وش رايك بهالشيخ إنت ؟
‎إبتسم حاكم غصب عنه ، وزادت إبتسامة ملاذ : تلاحظ إن أطباعك تغيّرت وكثير من بعد ما لاقيت تركي ؟ صاير تبتسم لنا ، وتضحك لنا أكثر من قبل الله يديم هالتركي
‎ميّل شفايفه بهدوء وهو لو رجع بالزمن قبل سنين ، ماكانت أطباعه مثل أطباعه اليوم نهائياً ولكل شخص بحياته دور بتغيّره ، نهيان وأبوه وأمه وملاذه وعياله وخصيصاً ورد بنته هم سبب كل إبتساماته يلي ما يداريها ولا يخبيها ، تركي السبب الكبير بإنه وسط المجالس يحس بنفسه خفيف ماهو مُجبر يتولّى زمام شيء ويجلس على أعصابه وهالشعور ما قد حسه حاكم مع أحد أبداً ، تنهّد من أعماقه : سروري من سرور نهيّان أنا
‎لف نهيان تجاه أبوه ، وميّل حاكم شفايفه : ماهو إنت الله يرضى عليك نهيّان جدك
‎ضحكت ورد وهي تشوف نهيّان كشر بدون مقدمات يوقف بجنب أمه ، ونادى حاكم على ذياب يلي مرّ من الخلف : ذياب ، تعال خذ أخوانك وولد تركي
‎عضّت ملاذ شفايفها بهمس وهي تركّز أنظارها على حاكم : قل له تعال إجلس ثم خلّه يتولى مسؤوليات وياخذ أخوانه وش هالتصرف حاكم !
‎هز حاكم راسه بالنفي بهدوء : ويترك نهيّان لحاله ؟ لا
‎تنهّدت من أعماقها وهي تعكّر مزاجها كله لأن فعلاً ذياب أخذ أخوانه ومشى لكنها رفضت ياخذ عذبي ولد تركي !
‎ميّل شفايفه بهدوء : لا يصير موضوعنا ذيّاب الحين
‎هزت راسها بالنفي وهي تجلس : تدري وش يقولون لي داخل ؟ يقولون لي نعم الرجل ذيّاب إنت متخيّل ؟ تراه طفل طفل ياحاكم ليه كل هالتصرفات معاه ليه !
‎تعكّر مزاجه مباشرة وهو ما وده يرد عليها نهائياً ، وتنهّدت من أعماقها لأن خلافاتهم كثيرة بخصوص ذياب ومو وقت خلاف حالياً : خفّ عليه شوي ، بس شوي
‎ناظرها لثواني وهو يشوف عذبي يبتسم له ناظرها لثواني وهو يشوف عذبي يبتسم له وشبه إحتدّت نبرته : وأنا لو خفيّت عليه هو يشابهني وش لي حيلة أنا ؟
‎عضّت شفايفها فقط بدون كلام : يشابهك ، يعني إنت لو تبي تصير أقرب له من نفسه وتفهمه لكنك تعصّب !
‎دخل ذياب وهو يناظرهم لثواني وسمع حدة الحوار قبل لا يدخل ، وشتت أبوه أنظاره لكن نطق ذياب بهدوء : جدي يقول لك تعال ينتظرك !
‎وقف حاكم بهدوء وهو يناظر ملاذ يلي تلعب بإيد عذبي الصغير بدون ما تناظره وما كان منه كلمة إنما خرج من المجلس مباشرة وكان يتوضّح غضبه بملامحه بدون لا يتكلم ، تقدم ذياب لأمه وهو يناظرها بتردد : عشاني ؟
‎هزت راسها بالنفي ، وإبتسم بخفيف يراضي خاطرها :
‎لا تزعلين من أبوي عشاني
‎عضّت شفايفها وهي تمنع تنهيدتها لأن حاكم رقّت أطباعه مع الكل إلا مع ذياب ولا تدري وش السبب ، جلس بجنبها وهو يناظرها لأنها ما تناظر عيونه : أمي
‎أخذت نفس بخفيف وهي تناظر كل مكان بوجهه إلا عيونه: تدري إنك مو مجبور تكون مع الرجال طول الوقت ومو مجبور تشيل مسؤوليات أحد صح ؟
‎إبتسم بخفيف وهو يناظرها : ليش ما تناظرين عيوني
‎نطقت بشبه غضب : ذيّاب !
‎إبتسم وهو يدري إن أمه مستحيل تغضب منه ، تمثّل الغضب لكن ملامحها ونبرتها تفضحها : سميّ
‎تنهدت من أعماقها وجبرتها إبتسامته إنها تفضح نفسها وشعورها وتضحك له بدل ما تحاول تحاوره ، وقف وهو يقبّل رأسها : لا تزعلين إنتِ ولا تقولين لأبوي شيء ..
‎رجع حاكم يدخل ، ومد ذياب إيده لعذبي ياخذه من أمه ويخرج فقط وعدلت ملاذ نفسها وجلستها : ليش رجعت
‎سكر باب المجلس خلفه وهو يجلس : إنتِ وش رايك ؟
‎أخذ نفس من أعماقه بهدوء وهي تستعمل معاه قسوة غير طبيعية لجل ذيّاب وما ترد عليها نهائياً وهو ما يتحمل هالطبع ، تطقّ أعصابه أكثر وأكثر : تدرين وش صار بالمدرسة اليوم ؟ تضارب مع ولد أكبر منه ولا بكى ولدك تدرين ؟ يأخذ الحمل عنه ويقول أنا بديت ووقت قال له تركي ردّ عليه بالحقيقة إنه بدأ لأن هالولد تكلم عليه ! لو قال لي إن هالولد تكلّم عليه وش بيضّره ؟ لهالدرجة ولدك ما يدري إني بمحيه وأمحي أبوه من الدنيا لو جاء وقال يا أبوي صار كذا وكذا وكذا ؟ رغم إنه ما قال لي تدرين بطريقة ثانية أنا فعلاً محيته ومحيت أبوه ولا يتجرأ يرجع يناظره من جديد ؟ إنتِ تدرين وش أسوي عشانه أنا ؟ وش تبين أسوي أكثر لجل تشوفين إني مو قاسي عليه هو قسوته عليّ أنا ما يقول لي الحرف ! هلكتيني ياحاكم التربية توازن التربية توازن أنا لو تركتهم عليك ضيعتيهم بالحنان لا تقولين لي الغلط مني أنا
‎ناظرته بذهول وهي تشوف ملامحه كلها إحمّرت بدون مقدمات ورغم محاولاته إنه يهذّب نبرته وما تعتلي إلا إنه تمتم بالإستغفار يشد على قبضة إيده فقط ..
‎مدت إيدها لكتفه بهدوء : ما قلت إنك سيء كأبو ، ولا قلت إنك مو متوازن ، قلتلك ذيّاب يشبهك ، عامله على إنه يشبهك وبتفهمه ، بتصير أقرب مني له
‎عضّ شفايفه بهدوء وهو ما وده يتكلم أكثر ، ومررت إيدها على كتفه : أدري إنه يشوفك الدنيا ، وأدري إن هو شخصيته تشبهك وأحسن ما يشابه لو تبي رأيي وبيصير شيء عظيم وكثير لكن الحين عامله بعمره ياحاكم بس
‎هز راسه بزين فقط ينهي النقاش ، وإبتسمت وهي تشد على كتفه ، ومدت إيدها الأخرى لقبضة إيده تفكها وتترك يدها بوسطها : لا ترجع لهم وإنت معصب وفيه تركي يقرأ ملامحك ، وحاكيني بموضوع ثاني ما يعصّبنا
‎ميّل شفايفه لثواني وهو يرفع أنظاره لها : الحكي لأهل الحكي وللي لهم ساعات حول بعض ماهو للمشتاقين
_
‎« بالخـارج ، أمام بيت الشعـر »
‎كانت الأحاديث ما توقف نهائياً ، ضجة أصواتهم تفوق كل ضجة وما كفتهم الساعات يلي قضوها مع بعض ودّهم بالأكثر ولو بيدهم ، قضوا العمر كله مع بعض من تشابه الأرواح والمواضيع يلي مستحيل تنتهي بينهم ، كبارهم يسولفون بمواضيع تهمهم ، شبابهم يسولفون بمواضيع تشّدهم يخيّم الصمت على نهيّان ، ومحسن يلي يتبادلون النظرات وكلٍ بجوفه كلام للآخر وده يقوله ، حرك نهيّان عكازه يأخذ زمام الحوار بهدوء : سبحان الله ياحال الدنيا يا محسن ، ما تعرفّنا أنا وياك رغم إني أجزم إنك تدري بي ، وأنا أدري بك لكن ما كان مكتوب لنا تقاطع الدروب ، ولا تعرّفوا عيالنا ، جات لنا المعرفة وشرفها من حاكم وتركي والصدف يلي جمعتهم وجاء لي أنا شرف معرفة هالذيب يلي مخبيّه يامحسن ، الذيّابة لو صح قولي من أكبرهم لأصغرهم ما أعدّهم إلا أحفادي مثل ماهم أحفادك ، وتركي أعده ولدي ماهو واحد من أحفادي لأني عرفت داخله ، عرفت روحه مثل ما عرفت عيالي وإن غاب تركي عن الرياض جعله ما يغيب إلا بالخير ، إنتم لكم إختياركم بالوصل وإلا القطاعة ، إن وصلتونا قلنا معدنهم ذهب مثل محاميهم ، وإن قطعتونا قلنا أهل العزيز الغالي ما منهم ولا عليهم
‎هز محسن رأسه بالنفي يرد عليه بهدوء : محد يحصل له وصلكم يانهيّان ويرده ، نعم الجد ونعم الأبو ونعم العيال والأحفاد يلي من صلبك ، عزيّتنا لجل تركي وأنا أشهد إن تركي يستاهل المعزّة ، يستاهل الغالين والطيبين مثلكم
‎جلس حاكم بهدوء وهو ما سمع شيء من الحوار لكن الصمت حسسه بإن شيء كبير يلي إنحكى ولهالسبب فضّل الصمت والمعرفة لاحقاً ولو إنه يتوقع ونطق بهدوء : قريب ماشي ياتركي ؟
‎هز تركي راسه بإيه وهو يبتسم:ولو إنّ غلا الرياض زاد من بعدكم ناظره نهيّان لثواني بتنهيدة : ولو إنّ ما ودنا تغيب يابوك إلا إن الدنيا عندك أهم منّا ، حطها بعينك وحطّ ولدك بعينك وإسعى لين توصل لكل شيء تبيه ، ما يعجّزك شيء يابوك ولايغرّك بعد المسافة لا مشيت ، إن طلبتنا جيناك سعي ملبيّن ..
‎لامس جوف تركي كيف نهيّان يفهمه بطريقة مُستحيلة وما يشير لسُلاف إلا بـ" الدنيا " عنده ، نهيّان رغم قصر وقت معرفتهم إلا إنه يفهم كثير ، يفهم كثير كيف سلاف كل شيء عند تركي وأول شيء والدنيا كلها عنده ، إبتسم حاكم وهو يشوف ملامح تركي تميل للإحمرار : عجّزت الشاعر يانهيان ، عجّزته !
‎إبتسم نهيّان وهو يناظر عياله وتوسّعت إبتسامته وهو يشد على عكازه من عذبي يلي تعلّقت نظراته بتركي وضحك : عنده عذبي ، ما أقدر أعجزه يهد حيلي لجله
‎تنحنح حاكم لثواني ، وإبتسم نهيّان : بس ياعذبي ترى عندي حاكم إن كأنك ما تدري
‎إبتسم عذبي وهو يناظره : الله يحفظه لك ويحفظك لنا نهدّ كل حيل بس حيلك ما نقواه وإن عجّزت الشاعر ، مصيره ينطق وإن ما نطق له أفعال ترضيك وإنت تدري
‎خففّ نهيان من أمواج المشاعر يلي طغت على تركي ، وكل آل نائل وسليمان من الشعور العظيم يلي إعتراهم من قو العلاقة بين نهيان وتركي وتوصياته كأنها توصيات أب ، طغت عليهم المشاعر من نظرات تركي يلي تعلّقت بنهيان بشكل وضّح كل شعوره وخفيّ حروفه بدون لا ينطق ولا يقول الكلمة لكنه همس : ياعوض الله يانهيّان
‎كملت السواليف أكثر ، وكملت المحبّة أكثر وأكثر لحد ما توسّط القمر صدر السماء وزادت برودة الجو وإنتهت طاقاتهم من سواليف اليوم وجمعة اليوم يلي كانت بالساعات الطويلة من الظُهر لآخر الليل وسط سرور مُستحيل بين الكل ، أولّهم ذياب يلي طول الجلسة وهو مع الرجال ويعجبه هالشيء لأنه يتعرّف على شخصياتهم أكثر ، يعرف معادنهم أكثر وهالشيء يرضيه كثير الرضا لأنه يشكّل شخصيته أكثر وأكثر ..
‎صار وقت الوداع بينهم ومثل ما كان أول الحضور لبيت تركي نهيّان وحاكم وذياب ، آخر الخارجين كانوا هالثلاث نفسهم ، وقف تركي بسلامه على نهيّان لدرجة مُستحيلة ، قبّل رأسه لوقت طويل هز داخل نهيان يلي ترك عكازه لجل يحاوط تركي ويضمّه ..
‎لمح حاكم تأثر ذياب يلي مسك عكازه جده قبل يطيح ومد إيده لكتفه يشد عليه ويترك أنظاره بدل ماهي مذهولة من حضن تركي وجده المؤلم من كثر صدقه وكثر المشاعر والحنان والإفتخار فيه تتبدل لأنظار على إيد أبوه يلي على كتفه ، رجفت نبرته وهو يشد على وجه تركي : أستودع الله دينك ، وأمانتك ، وخواتيم أعمالك ياتركي ، أستودعك الله الذي لا تضيع ودائعه ترجع بأقرب وقت وأول ديار تطبّها دياري بإذنه ، لا تقطعني يابوك ما كان من تركي الرد من كثر تأثره ، وإبتسم نهيّان من رجع تركي يقبّل رأسه للمرة الثانية : الله يحفظك يابوي
‎مد ذياب إيده لجده يساعده ، ومشى نهيّان لكن بقى حاكم يناظره : سمعت كلام نهيّان ما بقول غيره
‎إبتسم تركي وهو يهز رأسه بإيه : وإن قلت غيره ما بعد كلام نهيّان كلام وإنت تدري يابوذياب
‎ضحك حاكم وهو يسلّم عليه ، يضمه ويضرب على كتفه : ترجع لنا قريب بإذن الله لا تطوّل علينا !
‎إبتسم تركي وهو يشد على كتف حاكم ، ومشى حاكم مع جده وذياب يلي ينتظرونه بالسيارة وبقى تركي عند بابه لحد ما غابت سيارات آل سليمان عن مدى نظره ورجع يدخل للداخل يسكر أبوابه وليت للمشاعر باب ويسكّره من عظمها بداخله ..

- للكاتبة : ريم الاوطان🇸🇦