أنت تقرأ

انت الهوى ، كل الهوى برد ولهيب🤎

Romance

- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...

#الاوطان #بر #حب #دلال #ذياب #روايات #ريم #سعودية #شعر #قصر #قصيد

بارت ٣٨

15.1K 220 35

بواسطة rwaiahh6

بقلم rwaiahh6

_
« قصـر ذيـاب »
عدلت لبسها تشوف إنه يتأملها ، أو يتأمل فستانها اللي صارالسرير وسأل بهدوء : متأكدة ما تبين شيء ؟
هزت راسها بإيه تتوجه له ، وإنحنى يقبّلها من وقفت تقابله لأنها لعبت به وقت سألها " ما بتبدّلين ؟ " وكان منها بارد النفي بإن ما يحتاج توّها لبسته ، وما به شيء عشان تغيّره وكل مقاصدها " تلعب به " ونجحت فعلاً لأنها وقت صعدت للغرفة هنا هو تبعها مباشرة " بتبدّلين " توقف له " ما يحتاج ، ليه أبدّل ؟ " ووقت فهم عبطها هو ضحك " ما يحتاج ، بس يصير يحتاج " ويعنيها وهمست بين شفايفه بالنهاية " يكفي لو قلت أغار وبس تدري ؟ " ونطق شخصيته هو " ما أقول ، أعرف أورّيك " ، تُوردت ملامحها من صوت الجرس تبعد عنه : وصلوا
نزل نظره لساعته لأنهم سمحوا له بوقت كافي : ما قصروا
سوّت إنها ما تسمعه لأنه ما يخجل ، مستحيل يخجل وما يعرف للخجل درب ولو كلمته تدري بتفتح الباب لهم وهي تتلوّن خجل وفتحت الباب تبتسم : يا أهلاً
إبتسمت جوانا أولهم تضمّها مباشرة : إشتقت لك !
ضحكت قصيد بذهول : إشتقت لك أكثر !
كشّر فهد مباشرة : راعية محل واقفة قبلنا بعد وتسلم قبلنا ؟ يوم درت إننا بنمرج ركبت السيارة أولنا وما تسمعني يوم أقولها إنزلي ومابتروحين ولا شيء
ضحك تركي يضرب عنق أخوه ، وإبتسمت قصيد تشوف أشبال فهد يلي ماسك حبالهم بيدّه : يا أهلين !
دخل عذبي يلي تمتم " ماشاءالله " أولهم بعد ما ضمّها ، ودخل تركي يتأمل بالمثل : ما سيّر عليكم أحد للحين ؟
هزت راسها بالنفي تنتبه لوقفة جوانا اللي تسأل عن مكان المطبخ وإبتسمت تأشر لها : هناك ، أجيك الحين
دخل فهد اللي ماسك أشباله : ماشاءالله تبارك الله ، ماشاءالله قصيد تبين أعيش عندج ؟ أحرّك لج البيت ؟
نطق ذياب النازل مع الدرج : الله يحييك وين تبي بس
إبتسم فهد مباشرة تسكّر قصيد الباب وتوجهت لجوانا بالمطبخ ركض لأن ذياب يسلم على أخوانها : جوانا
إبتسمت جوانا : إنتِ كنتي تعبـانة ، أنا بسوي عشاء الحين وأسوي قهوة وماما تقول نامي عند بيبي اليوم
ضحكت قصيد تضمّها فقط ، وإبتسمت جوانا تضرب ظهرها بإن " شدّي حيلك " فقط ورجعت قصيد تطلع لأخوانها وإبتسم عذبي أخوها : يقولون الله يحييكم يامرحبا شيء
كشّرت مباشرة توقف بجنب ذياب : ليش واقفين طيب ؟
حسّت بيده إستقرت على ظهرها : راعيين واجب يودّعوني
هز فهد راسه بإيه : قلتله بروح معك قال خلك عند أختك
ضحكت قصيد لأنه قالها بنبرة شكاية ، وناظره ذياب ينتظره يكمّل وإبتسم فهد : قال لي الله يحييك الصدق بس ما ودي من يروح البر هالوقت وما فيه إلا إنت بعد ؟ أنا إنسان زلاتي واجد وأبوي بالبيت ماهو معي يردّك
ضحك ذياب فقط : البيت بيتكم ، الله يحييكم والمعذرة منكم لكن أبطيت على محمد والحلال وإلا ما مشيت
إبتسم تركي مباشرة : أهل يا ذياب ، أهل
هز راسه بإيه ترافقه قصيد لعتبة الباب ، وإبتسمت : بتطول هناك ؟ وإلا بترجع قريب بس بتشوفهم ؟
رفع أكتافه بعدم معرفة : بيمرني أبوي ، إن بغيتي شيء دقي علي لا تقولين بعيد ولا بالخيام ولا شيء قصيد
إبتسمت فقط تهز راسها بإيه : تمام ، إنتبه لنفسك
هز راسه بإيه ينطق " أستودعتك الله " وتوجه لسيارته تقفّل الباب خلفه وقلبها يخفق له لآخر لحظة وتكّى عذبي بهمس : ماشاءالله ، ولي وجه أقول لأبوي وش فرقي عنه
إبتسم تركي تجلس قصيد على طرف الكنبة : توقعت كلكم تجون !
إبتسم فهد أخوها يضم الشبل بحضنه : بيمرون يسلمون عليج بعد شوي ، طولنا القعدة إشتاقت لنا الكويت
سكنت ملامحها بإستيعاب إنهم بيمشون : بتمشون !
هز تركي راسه بإيه : مشتاقين حيل
كشّر عذبي لأنه يكره هالطاري بدون شيء ، وعدل أكتافه : ما يمدي باللعب أقول بروح معاهم وإلا بروح لي ديرة ، عاهدت الوالد ينتهي هالترم على ما يبي عشان يوافق
ضحكت تشدّ كتفه : لعين ود تكرم مدينة يعني ؟
هز راسه بإيه يبتسم فقط لأن أبوه وافق عالخطبة لكن بنهاية الترم وبشروطه تكون خطبة فقط ومن وقتها ما تشيل عذبي أرضه : الحين إنتم بتروحون الكويت ، وأنا بنشغل بدراستي ، وبعض الناس يعني يومين موجودين وعشر لا .. إيه يالدنيا
وقف فهد من نادت عليه جوانا عشان القهوة ، وضحكت قصيد لأنها تسمع يدندن بكل شيءّ يخص الكويت ويتغنّى بأغانيها : مشتاق الولد هذا مره !
هز عذبي راسه بإيه : اليوم كله وهو يدندن ، أبوي أول يشتغل بالملفات وكان مفعّل وضعية أبونوره يغني شوي تلخبطت إعداداته عاشت لنا الكويت وعاشوا أهلها
ضحك تركي لأنه يتذكر الموقف وكيف إستوعب سميّه ، وإبتسمت قصيد : ما سأل عني طيب ما قال شيء ؟
كشّر فهد يلي جاء وبيده صينية القهوة : ما تدرين كيف رديت هوشته عني ؟ قلتله قصيد تسلم عليك وذاب على طول بالله وش قالت لك طيبة هي الحمدلله ؟
_
« مدريــد »
جلسـت بأحد الكوفيهات تتأمل المارّة مع سحاب ، وبنات خوال نصّار الباقيين ورغم كثير إندماجها معاهم إلا إنها باقي تفقد بنات آل سليمان وإبتسمت سحاب تشوف تأمل ورد : باقي ما تعودتي ؟
ضحكت ورد تهز راسها بالنفي : مو على التعوّد بس يجيني حنين مرة
إبتسمت تأشر لها على نصار اللي واقف ياخذ له قهوة : شوفي مين هنا
لفت ورد نظرها تشوفه ، تليق عليه حياتهم بشكل ما قد تخيلته بحياتها وعلى رغم كثر الإختلاف بين تعوّده وتعودها إلا إنه - يعجبها - وما يضايقها بالشكل اللي تصورتهقلتي لي مكانكم المفضل بس ما تخيّلت الصدف
ضحكت سحاب فقط : روحي الصدفة أحلى من الموعد
إبتسمت ورد تاخذ أغراضها لأن وصلتها رسالة منه أساسًا " طولتي معهم متى بترجعين ؟ " : متى تبيني أرجع ؟
فز لوهلة لأنه ما توقع يسمع ردها صوت ومن جنبه ، وإبتسم مباشرة : هلا والله ، ما شفتك هنا !
إبتسمت ورد لثواني : محترم ما ترفع عينك وتتأمل !
إبتسم نصّار بالغرور مباشرة ، وضحكت ورد : وش ؟
هز راسه بالنفي ياخذ قهوته ، ومدّ يده ياخذ الأكياس اللي بيدها : ولا شيء ، ودك تتمشين معي نرجع القصر مشي؟
إبتسمت لثواني : وش سر حبك للمشي ما عرفت
رفع أكتافه بعدم معرفة وهو فعلاً يعشق المشي : متعة
إبتسمت ورد تلف نظرها له ، وبمجرد ما صار بخالي الممر يلي مافيه أحد ، ولا يشوفه مخلوق هو إنحنى يقبّلها لثواني بسيطة تسكن هي بذهول : نصّار !
إبتسم فقط يسبقها : تعبت ، يجي السواق يشيلنا خلاص
ضحكت بذهول لأنه أخذ يدها يمشي للشارع الرئيسي تشوف السواق يلي وقف بالسيارة يفتح الباب ، ودخلت بجنبه تستوعب : نصار ، ما تحس إنك تتهور
لف نظره لها لثواني بإستغراب : أتهور في وش ؟
رفعت أكتافها بعدم معرفة : مدري ، تنزل تتمشى لحالك تاخذ قهوتك لحالك وتمشي بالشوارع عادي وتسوي حركـ
ضحك يهز راسه بإيه : دام يمديني ما بقيّد نفسي بتجي أوقات بنشغل ، بفقد الروتين العادي ذا يا ورد ما تدرين
إبتسمت لأنها تدري وشافت إنشغال أبوه على أصوله وقالت لها أمه بإن يومًا ما ، بيصير نصّار مثله ومسح على حاجبه : الحين توها البدايات وبديت أنشغل بس ما ودي ، ما ودي يسرقني الشغل من الدنيا لو تبين الصدق أنا إنسان يحب يعيش ، يحب نظام حياته كذا ما يحب طول وقته بالشغل والأوراق وأتوقع لو جاء وقت من غير شر وإنجبرت يكون طول وقتي بالشغل ، بتركه
ضحكت بذهول لأنها ما توقعت يكون هذا جوابه ، وإبتسم : والله ، ما أمزح ترى
أشّرت على عقلها بالجنون فقط ، وإبتسم : ودي ذياب يتعلم ، علميه ياخي جيبيه كلمي زوجته شوفي حل
_
« الخيـام »
جمّع آخر الحطب بيده لمكانه يتأمل الخيام وهو رسل حتى محمد الرياض لأن وده يختلي لو دقائق بسيطة بنفسه يرتب حساباته ، ويرتب وضعه ويفكر بالأيام الجاية وش خطته فيها وش حساباته لكن بقيت عينه على مكان الخيول لوقت يفقد وجود لزام ، فعلاً يفقده وهو ما عاش حزنه عليه لأن كان كل همه قصيد ورعب قصيد وأخذ من العلف يتوجه قريب منهم يبي يشوف من أول خيل يركض له ويجيه وضحك بحزن : يدرون بك ماعاد إنت موجود
لأن ما كان يقرب له أحد إلا لزام ، والحين كلهم يقربون له بمجرد نداه والأكل يلي بيده ومسح على ناصية أحدها : تشبهه ؟ لا ماله شبيهلأن كلها مسرّجة ، وبقى سرج لزام الوحيد على السياج لأن صاحبه غير موجود ما يدري ذياب وش صار بصدره لوهلة تمره ألف ذكرى لزام ما يشابه شيء ، ما يشابه أحد وما له بالدنيا كلها إلا ذياب " يعشقه " ، يتبعه من مكان لمكان وقت يكون خارج السياج ، ينتبه له ، وما يخاف من الحلال بدون لا يعوّده هو ، يجي له وهو يتقهوى ، يجي له وهو يصلي ، وبكل وقت يجي له ولا بغى يطير بأرضه ويشدّ التراب خلفه من ركضه ، يطيّره لزام على ما يحب وما يبي ولا ينافسه خيل بقوته وما يدري كيف لقى نفسه قدام سرجه ، ما يدري كيف بقيت يده تتحسسّ سرجه ينتفض صدره : أذكر يوم سرّجك لي نهيان ، أول مرة بعد ما جابك
سكت لوهلة ، ونفض صدره مرة ثانية : يوم طلعت على ظهرك ، كنت أشوف إنيّ عالي على الدنيا كلها من قدّي وجاء نهيان يقودك ، يشدّك وأنا على ظهرك وصار ما ودي أصير عالي ، ولا أشوف أنا وين والأرض وين صرت أشوف ظهر شايبي ، وحيل شايبي ، ويدّ شايبي اللي تشدك
سكت لوهلة ينتفض صدره لأنه يذكر للآن طفولته ، وكيف كان يركب على ظهر لزام لكن ما يتركه نهيّان كان بنفسه يمسك حبل الرسن ويمشي قدام لزام يسحبه ما يترك اللجام بيد ذياب نهائيًا ولا يرضى أحد يمشيه غيره وضحك : يوم ، زعلت على نهيان يوم جاء لك وأنا على ظهرك قال لي عصب علي خلاص يقول ولدي وأدري به وبعدها قال شفت ؟ يدري بك لزام ما يطيّحك ، ما يغدرك ، يمتثل لك باللي تبيه سمعٍ وطاعة يدري بظهره ذيب وإن كان صغيّر لكنه ذيب
ضحك يشد على عيونه لوهلة من صارت الذكرى توجعه : وراح شايبي وبقيت إنت ، كبرت معي إنت وشيّبت معي إنت ، ورحت عشاني إنت ..
شتت نظره من حس إنه بينهد يتوجه للخيل يطلّعه من مكانه : تعال
هو طلعه ونيّته يصعد على ظهره لكن ما طاوعه قلبه ، ما طاوعته قدمه يمسح على ناصيته : ما بك عيب ، لكن عمري ما ركبت غيره إلا لا جيت أردّه عن ثورته ولا حدّتني الدنيا ..
لأن الخيل حرك راسه ، ضحك ذياب يهز راسه بإيه : تقول حدتني اليوم يعني ؟ ذكي بس من إنت ما عرفتك
مسح على ناصيته لأنه ما يعرف إسمه ، وضرب على عنقه يعدل لجامه لأنه بيركبه وبالفعل إستقر على ظهره بعد ما مشاه مسافة بسيطة : تعرفني إنت ؟ أنا بعرفك الحين
ضحك لأنه حرك راسه ، وشدّ ذياب اللجام يلفه يمين ، لفة كاملة ، ويرجع يلفه يسار لفة كاملة وسكن حاكم من كان المشهد تحت عينه من تركه يفز كله يرفع نفسه على خلفي أقدامه فقط وذياب على ظهره وإبتسم ذياب يضرب على عنق الخيل : تفهم ، تفهم وحش
كان يشوف حاكم حزنه حتى من إبتسامته ، لأن ذياب مع لزام " نشيط " بشكل مجنون والحين الخيل يمتثل له لكن هو به شيء ناقص ، هو فرحته ناقصة ومشى بإتجاهه : السلام عليكم
رد السلام مباشرة كان على وشك ينزل لكن حاكم أشّر له بالجلوس : خلّك ، مبطي ما ركبت أنا
إبتسم ذياب فقط من توجه أبوه يفتح البوابة يطلع أول خيل منها ولوهلة مرّته أمنياته بطفولته ، كلهم جرّبوا يركبون بحضن أبوه لكن هو لأنه كان يعرف ، ولأن لزام يخصه من طفولته كان يركبه لوحده بدون ما يكون أبوه معاه ونزل نظره للخيل الليّ ماهو لزام يمسح على طرف حاجبه من صعد أبوه على صهوة الخيل يشد لجامه : وين ناوي تروح ؟
أشّر ذياب على الحلال : بروّح لهم ، مبطي عنهم كم لي
حرك حاكم خيله بإتجاه الحلال مثل ولده ، وسكن داخل ذياب لأن ما يدري وش الشعور اللي خالج صدره بهاللحظة لكنه " مريح " ، وفيه من الهدوء شيء كثير هو وأبوه وبينهم سكون ، بينهم هدوء بدون تجريح ويتمشى معه بأرضه على ظهر الخيل وبين حلاله ، منظر يسّره فعلاً ونطق حاكم لأنه خاف وقت شاف ذياب وكيف شنّع الخيل " يرفعه على أقدامه الخلفية فقط" : لا تشنّع بخيل ما تعرفه يا ذياب
لف نظره لأبوه كان على وشك يجاوبه لكن حاكم أشّر له على خيله بشبه قلق : متحمس إمسكه
إبتسم ذياب فقط : العهدة على الخيّال ماهو الخيل
هز حاكم راسه بإيه وهو يشوف حماس الخيل الشديد لكن ذياب مو حوله ، ذياب يمسح على الناقة اللي جات قريب منه : يا ذياب إمسك لجامه لا يهج بك !
مسكه بيده يلف نظره لأبوه : ما يهج ، لو تركته ما يهج
هز حاكم راسه بالنفي : هذا ماهو لزام يا ذياب ، امسكه
لف ذياب نظره لأبوه لثواني يهز راسه بإيه فقط وهو يدري إنه ماهو لزام لكن وقت جات بهالطريقة من أبوه ما يدري ليه جات غريبة : ما قد قلت لي إمسك خيل
هز حاكم راسه بإيه : ما عمرك ركبت إلا على لزام يابوك ولزام هو يمسكك بدون لا تمسكه
لف نظره لأبوه لثواني يشد لجام الخيل اللي معاه ، وإبتسم حاكم : تبي تشوف أبوك كبر وضاعت مهارته وإلا باقي له خبرة ؟
لف ذياب بالخيل يبتسم : ودي لكن هاللي معي متحمس وإنت تشوفه لكن خفت عليك ، مبطي ما ركبت تقول
هز حاكم راسه بالنفي : أنا حاكم يا ذياب ، حاكم
إبتسم ذياب فقط يشوف نية أبوه بالسباق : والنعم
هو ما سمح له يستوعب أساسًا من نطق واحد ، إثنين ، ثلاثة وطار يسمع ضرب اللجام على الخيل وبعده كان الصهيل يلي ضحك له ذياب بالذهول : عطني علم طيب !
هو لف خيله مباشرة يفزّ لجل يلحق أبوه اللي طار بالمدى - حرفيًا - يشوف غبار خيله ، ولف حاكم نظره لذياب اللي خلفه بمسافة بسيطة : ما يمديك يابوك ، ما يمديك !
ضحك ذياب لأن يمديه ، يمديه لأن خيله متحمس بشكل مجنون لكنه هو يهديه : إن كان يمديني تحسبه عقوق ؟
ضحك حاكم بالإستحالةيرخي ذياب لجام الخيل يسمح له هو يطير ما يهدي ، ورجع حاكم يضحك من أعماق قلبه من تعدّاه ذياب يسبقه : إيه هذا عقوق يا ذياب !
إبتسم ذياب فقط يهدي خيله ، يلف نظره لأبوه وهو مليان إستغراب يمكن هاللحظة حتى بأحلامه ما تخيلّها وما تصّورها ولا توقعها وإنتبه حاكم على يد ذياب اللي تمسح على عنق خيله : تعرف تعاملها يا ذياب ، تعرف
هز راسه بإيه : يقول نهيّان تجي باللين ، ما تجي بالقسوة
سكت حاكم لأن طفولة ذياب ، أطباع ذياب ، تربية ذياب كلها إكتسبها من نهيّان مو منه وشتت نظره يبتسم : فرق السن يابوك ، فرق السن هو اللي خلاّك تفوز علي الحين
إبتسم ذياب يمسح على عنق خيله : ما فزت الله يطول لي بعمرك ، إنت روّحت المسافة كلها الخيل هج آخر شيء
ضحك حاكم وإبتسم ذياب لأنه مستحيل يفاخر أبوه بشيء ، من وهو صغير مستحيل يجرب يتكلم معه مثل ورد ونهيان حتى لو باللعب بإن " أنا أفضل منك ، أو فزت عليك " أو أي شيء من هالكلام وسأل حاكم : كيف حالها قصيد ؟ تركتها لحالها وإلا عندها أحد ؟
إبتسم ذياب يخضّع خيله اللي يلعب ، يلعب بشكل مجنون تحت يده وللآن متحمس : طيبة الحمدلله تسلم عليك ، عندها أخوانها
قلق داخل حاكم مباشرة من لمح ولده اللي يلفّ الخيل يمين ، ويسار ، وما قرّ بمحله يخضعه وحتى وهو يدري إن ذياب " خيّال " ماعليه غبار إلا إنه يقلق بهاللحظة : وش فيه هو
هز ذياب راسه بالنفي : متحمس ، به طاقة ما فرّغها
ناظره حاكم لدقائق طويلة يتأمله ، يتأمل إنسجامه معه ويمكن لأول مرة يترك خوفه على جنب ويشوف ولده فقط بدون لا يعصب عليه مباشرة بسبب خوفه وإبتسم لأن ذياب يفصل إذا صار بعالمه ، فعلاً يفصل كأن ما على الأرض إلا هو ولزام سابقًا ، وهو وحلاله ، وهو وصقوره وشنّع الخيل يخضعه ذياب مباشرة : نعوّد ؟
هز حاكم راسه بإيه وهو إنتبه إن ذياب - عشانه - خضّعه بهالسرعة وعشانه شد لجامه بهالقوة : نعوّد بس لا تشد
إبتسم ذياب يأشر على خشمه فقط لأن بالخفي - لا تشد - يعني ما بي حيل لكن ما يعترف حاكم ولفت إنتباه حاكم نور السيارة عند الخيام : كأن فيه أحد جاء ؟
هز ذياب راسه بإيه : محمد ، معه سيارتي أكيد هو
نزل حاكم نظره للخيل يكلمه : شد بس لا تشد
إبتسم ذياب من فهم إن ما وده يطير بالسرعة لكن وده يسرع وتيرة مشيه يسرّع هو خيله بالمثل ..
-
وقف محمد المذهول من المنظر اللي يشوفه من إقترابهم ، حاكم ؟ وذياب على خيول والواضح إنهم كانوا يتسابقون وإبتسم مباشرة يوقّف خيل حاكم : يامرحبا ياعم ! يامرحبا
إبتسم حاكم ينزل عن خيله : يا هلا يا محمد
نزل ذياب بالمثل لكنه بقى يمسح عليه ، على ناصيته : هذا من يامحمد؟رفع محمد أكتافه بعدم معرفة : ما له ينادونه البني
هز ذياب راسه بإيه يتأمله لثواني بمحاولة للتذكر : هذا اللي شريته أنا يوم كان صغيّر توه ؟ اللي يناشب لزام ؟
هز محمد راسه بإيه : هذا هو اللي قلت شيلوه عنه
ضحك ذياب فقط لأنه نسى موضوعه أساسًا ولا يطري بباله لأن لزام كان يتضايق منه وما يخليه جنبه نهائيًا وشاله ذياب عن لزام ينسى موضوعه تمامًا، وإبتسم حاكم لأنه يشم ريحة الحطب والقهوة : سمّه عزّام يا ذياب
إبتسم ذياب للخيل يضرب على عنقه : عزّام راعي العزم
نفض يديه يراقب عزام إلى وقت رجوعه للسياج ، وتوجه يغسل يديه خلف أبوه لأن محمد يجهز القهوة لهم وجلس بالإرتياح مثل أبوه اللي سأل : وش تقول عنه ؟
إبتسم ذياب وعينه على عزّام اللي يدور بمكانه : صغيّر توه ، ومتحمس بالحيل لكنه يطيع ، وبسرعة يطيع
هز حاكم راسه بإيه : بديل للزام يا ذياب ؟
سكنت ملامحه لثواني يهز راسه بالنفي : ماله بديل لزام ، هذا يوم جبته حتى لزام ما رضى به وشلته عنه ونسيته
ناظره حاكم لثواني من إنتبه إنه يتأمل باطن يده ، وجاء محمد المبتسم يقهوي حاكم ، ويقهوي ذياب اللي نطق : قرّب الحلال يامحمد لا تبعده بالحيل والعمال وينهم
هز محمد راسه بالنفي : أنا قلت لهم يمشون ياعم
رفع حاكم حاجبه ، وضحك ذياب : ودك تختلي لحالك ؟
إبتسم محمد فقط يمد التمر لحاكم ، ولف ذياب نظره له : شجاع وينه ما جاء ؟ مبرقعه ؟
هز محمد راسه بإيه : مزعج شجاع مزعج ياعم
إبتسم ذياب فقط : فكّه خله يسير علي ، لا تجيبه فكه
هز محمد راسه بإيه يتوجه لمكان شجاع يفتح عنه برقعه ، يفكّه لكنه ما تحرّك من مكانه يرجع محمد عندهم : شلته ، بروح أقرب الحلال تبي شيء ياعم ؟
إبتسم ذياب : ما قصرت يامحمد مشكور روّح
كان حاكم فعليًا يتأمله فقط ، يتأمله ويتقهوى فقط وصفّر ذياب يشوف حاكم بعد تصفيره شجاع اللي شدّت جنحانه بالسماء بهيمنة ، بغرور مستحيل يحوم حولهم لثواني لين نزل لمقرّه ومحله على ذراع ذياب المبتسم فقط وإبتسم حاكم : مطوّل الغيبة عنهم أشوفك مشتاق وهم مشتاقين
مسح على جناح شجاع يلف نظره لابوه : أول طول وقتي يمهم ، الحين بين اليومين والثلاث مرة وما أطوّل بالحيل
إبتسم حاكم فقط ، ورفع نظره من صوت السيارات يلي قربت منهم يسأل حاكم : تنتظر أحد ؟
هز راسه بالنفي يرفع حاجبه ، وسكنت ملامحه من كانت سيارات القصر ، سموّه وخلفه أسامة يسكت حاكم تمامًا من فُتحت الأبواب ينزلون بثيابهم ، بهيبتهم ، بشُمغهم ووقف ذياب مباشرة لأنه ما توقع : عن إذنك دقيقة
توجه مباشرة لسموه بهدوء رغم ذهوله : طال عمرك ؟
مد سموّه يده يصافحه : الله يبقيك يا ذياب !سكنت ملامح ذياب يقرأ ملامح أسامة وشدّ يد سموه بالمثل بذهول : الله يحييك ما قلت لي جاي
-
كانت عين حاكم تراقب سلام ذياب على سموه ، حارّ السلام اللي يشوفه بينهم من تمسّك سموه الشديد بذياب وذراعه وإنه يهمس له بإذنه بطريقة ما " كان يستفزه " ، ونوّر جواله بالإشعار من الفريق أول سعد " ماشاءالله تبارك الله يا حاكم ، تو يوصلني العلم رجع ذياب للوزارة ألف مبروك " تسكن ملامحه مباشرة ولف نظره لشجاع يوقف فقط ، يوقف عشان يسلّم على سموه اللي إبتسم له مباشرة : شكلنا جينا بوقتٍ غلط دامها جلسة أبو وولده لكن يشهد الله إن ذياب بمقام نايـف عندي ، ولا أصبر عنه ويوم دريت إنه هنا لحاله جيت بنفسي له
إبتسم حاكم فقط يهز راسه بإيه : الله يحييكم يابونايف ، الله يحييكم ويخلي لك نايف ويحفظه حياك
إنتبه ذياب إن أخلاق أبوه - قفلت - بشكل غير طبيعي ، ووقف أسامة قريب منهم : طال عمرك بكلمك شـ
هز ذياب راسه بالنفي : دقيقة يا أسامة ، قّلطهم بس
توجه أسامة للداخل يقلطهم ، وسكنت ملامح ذياب من تعدّاه أبوه يمشي للجلسة بدون ولا كلمة وهو كان يناوي يتكلّم معه ، كان ناوي يفهمه وما يدري ليه صار بموقف التبرير مباشرة لكنه مسح على طرف حاجبه : يا محمد
كانت عين سموه تتأمل المكان ، تتأمل الصقر اللي بوسط جلستهم من وسّع ذياب الجلسة بدل لا تكون محفوفة له ولأبوه رجّع المركى للطرف يصير هو جالس بالطرف مثل أبوه مو مثل ما كان مقابله وقريب منه : الله يحييكم
جاء محمد اللي أخذ الدلة بيده يقهويهم تتعالى الأصوات بالضجة بين سموه ورجاله وحاكم اللي يرد على سؤالهم بكيف الحال ، وكانت إشارة ذياب لمحمد تفيد بإنه يجيب باقي العمال فقط وإبتسم سموه من الصقر اللي توجه لذياب : وش إسمه يا ذياب ؟
نطق ذياب بهدوء : هذا شجاع طال عمرك
نطق مساعد سموه يبتسم : تبي تشريه طال عمرك ؟
ضحك سموّه : لك نية تبيعه يا ذياب ؟ إن كنت ناوي
إبتسم ذياب فقط : والله ماهو للبيع ، يخصّني هالصقر
ضحك سموه يهز راسه بإيه : دامه يخصك مانقربه يا طويل العمر ، ماشاءالله تبارك الرحمن ، ماشاءالله
كان يلف نظره للمدى يتأمل الخيام ، الحلال اللي صار قريب منهم ورغم إنها شبه مُظلمة لأن مافيه ضيوف لكن يقدر يتصّورها بمجيء الضيوف وما بقى على التصور من شعّت أنوارها تصير واقع ينتبه لمحمد اللي نوّرها : ما عندك إلا هالعامل ياذياب
هز ذياب راسه بالنفي : لا معه ، محمد أقدمهم عندي
كان سموه يتأمل فعليًا على عين حاكم ، يتأمل الإبل ، ويتأمل الجلسات ، والخيول ، ومكان الصقر ومسح حاكم على يده : ما عطيتنا علم يابونايـف ، إبتسم سموه بإعجاب : هذا وماهي جاهزة ياحاكم ، الله يعزه ولا يعز عليه ماشاءالله يوم يقولون لي خيام ذياب أقول يبي لنا زيارة لها والنصيب لليوم ، لو دريت كل إجتماعاتنا الأوله قلت لك بالخيام يا ذياب
ضحك مساعده : الخوف لا جينا هنا ننشغل بشبة النار والقهوة وينشغل ذياب بحلاله ويروح الإجتماع
ضحك سموه يهز راسه بإيه : صادق من يفوّت مثل هالجو ومثل هالدنيا ويقابل الورق ، ما تنلام يا ذياب
تعالت ضحكاتهم يبتسم ذياب فقط لأن همس سموّه له بسلامه ، شدته على ذراعه بالإعتذار ونطقه له بالنهاية " جاي لك أبو ، وصاحب وما جيت بالشغل وعلومه يا ذياب إنت ولدي قبل لا تصير بمكتبي وقبل لا تصير هالعلوم بينّا وأدري بالعلم كله إنت راعي حق ، ومرتك راعية حق وإن كان باقي بالخاطر شيء من هالشنب تاخذه " كان بمحله ونطقه : الله يحييك بكل وقت طال عمرك محلّك ومكانك
لأن كم التقدير واضح ، ولأن السوالف ضجّت عن الحلال والخيول والصقور والمكان فقط بدون أي سالفة خارجية أو تخص الشغل كان من حاكم السكون والإندماج معاهم لكنه يشوف نظرات أسامة لذياب ، أسامة بجنب سموه صحيح لكن نظراته لذياب مريبة ويشوف حاكم إن السوالف مختلطة ، متداخلة لكن إلتفات سموه لذياب بين كل موضوع والآخر يقوله " وش يا ذياب ، وش العلم يا ذياب ؟ وش يقول ذياب ؟ " وضحكاته صحيح بالسرور ويبين إهتمامه بولده لكن يغصّه وما يدري ليه ووقف سموّه ينطق من كانوا بيوقفون رجاله خلفه : لا إرتاحوا ، باخذ لي لفة مع ذياب حول الخيام بس
سكنت ملامح ذياب يلف نظره لأبوه اللي نطق : لا ينتظر أبونايف
ناظره ذياب يوقف مع سموّه ، ونزل على نظر حاكم اللي شاف توجههم للخيول أول شيء ومن عزّام اللي جاء ركض لذياب يضحك له سموه ، يقدر حاكم يسمع حوارهم لكنه إختار يشد تركيزه لسوالف الرجال قدامه ويشاركهم
-
ضحك سموّه من جاه بكل هاللهفة : هذا إنت راعيه ؟
هز ذياب راسه بإيه يبتسم لعزّام : توّي وتوّنا نسميه ، عزام
إبتسم سموه بإستغراب : عزّام ؟ سمي لأحد حولكم وإلا
كان من ذياب النفـي يبتسم : سمّاه أبوي عقب ما شافه
ضحك سموه يمسح على ناصيته : راعي عزم شكله ؟
إبتسم ذياب يهز راسه بإيه فقط ، ووقف حاكم يدخل جواله بجيبه وهو ما عاد يطيق الجلسة : يا ذيـاب
نطق لسموه عن إذنك يتوجه لأبوه اللي واضح نيّته يمشي من نزوله عن جلستهم : بتروّح ! على وين !
هز حاكم راسه بإيه : دقت علي أمك ، بروح لها أرجعها البيت
نطق ذياب مباشرة : أروّح لها أنا وينها عند من
ناظره حاكم لثواني نظرة غريبة ينطق خلفها بشبه حدة : وتترك ضيوفك !
سكنت ملامحه لأن وش يعني يتركهم : أبوي موجود ولاولاني مطوّل لا رحت ! خلّك أروّح لها أنا خلّك ، محمـد
لأنه نادى محمد ، وترك أبوه مباشرة يتوجه لمحمد يبي مفتاح السيارة وتحت أنظار حاكم توجه أسامة مباشرة يمسك ذراع ذياب يشوف الحوار اللي دار بينهم وتأكد له بإن " إستحالة " ما يدري ذياب وما عنده خبر ولهالسبب بقى حاكم بوقوفه يبي يشوف آخرها ولمح ملامح التعجب تُرسم على ملامح ذياب اللي نطق له أسامة بشيء وسط مشيه يوقفه ، فعلاً يوقفه يلتفت له ولهالسبب نطق حاكم يستعجله فقط لأنه ما عاد يبي يجلس : ذيـاب
أشّر ذياب لأسامة بإن وقت آخر ، وتوجه لأبوه مباشرة : روّح إرتاح أروّح لها أنا وينها ؟
سكت حاكم لوهلة وهو ما كان ودّه يتكلم ، ما كان ودّه لكن يحده ذياب بهاللحظة بعد ما نطق " أبوي موجود " وبعد ما راح للمفتاح ويحاور أسامة اللي أكيد بلّغه : به شيء ودك تقوله لي يا ذياب ؟
ناظر أبوه بذهول لأنه جالس يتوتر داخله بشكل ما عهده ، بشكل آخر عهده به طفولته لأنه يحس بأبوه ويحس إنه بيمشي ما بيطيعه : وش أقول لك ؟
سكت حاكم يناظره لثواني مرّت على ذياب " دهر " فعلاً وأكثر من تبدّلت نظرته ، من نطق حاكم بيأس منه فقط : أبوك موجود ، بس بك خافي أبوك ما يعرفه دايم يا ذياب ولا تعتدل ، ما تعتدل يابوك خلّك على اللي تودّه وإقعد مع ضيوفك
سكنت ملامح ذياب لوهلة لأن وش يعني هالكلام بهاللحظة ، ونطق حاكم يرفع صوته يودّعهم بدون لا يلتفت لذياب اللي وقف عقله لوهلة يتبع أبوه لسيارته مباشرة : وش الخافي بي ؟
هز حاكم راسه بالنفي فقط يسكن داخل ذياب بذهول لأن أبوه ينظر له نظرة غريبة ، نظرة مؤلمة من الإجحاف اللي فيها ونطق مرة ثانية بذهول لأن ما قد تعرّى بعالمه عند أبوه مثل هالمرة : وش صار بي خافي !
هز حاكم راسه بالنفي يأشر له على سموه اللي رجع للجلسة : روّح له ، وتمسك به دامه يحبك وشاد حيله عشانك ومبروك الوزارة يا ذياب ، مبروك تقول وتطول
سكنت ملامحه لثواني بإستغراب : وش وزارته ؟
رد حاكم على جواله يكتم ذياب اللي كان وده يتكلم ، كان وده يسأل لكن إن أبوه حرك بهالشكل ، وإبتعد عنه بهالشكل بينهم ويدري ما بيرجع له " نفضت صدره " أكثر من إنها تحز وتنتهي ، نفضت صدره لأنه ما حسّب تطيب جروحه بضحكة من أبوه له ، ضحكة تعرف مكانها لصدره وإنه يحسه فعلاً أبوه وحتى الكف ، ماضي الكف ما عاد يعرفه ولا يحسبه بعد ضحكة أبوه لكن بهاللحظة ؟ صار وقع الكلام أشدّ من وقع الكف ومن ضرب السيف لو حصل " ما تعتدل " لأن ما يذكر به خافي أبوه ما يدري به ووقت نطق الوزارة بهالشكل هو رجّف صدره يلتفت لأسامة اللي جاء يقابله : وش وزارته ؟ أبوي يقول مبروك الوزارة وش وزارته ؟رفع أسامة أكتافه بعدم معرفة بهمس : هذا اللي بسألك عنه طال عمرك ، اللي أعرفه قلته لك ما عندي غيره لكنّ من ضمن الهواش أنا سمعت كلمة وزارة منها طال عمرك لكن ما أدري ، ما أدري وما قال لي شيء طال عمرك
ما عاد فيه بعقله تركيز حتى للكلام اللي نطقه له أسامة قبل شوي ، وقت بلّغه إنه بالصدفة سمع شجار عالي الصوت بين سموّه وحفيدته ومحتواه يخصّ قصيد يوقفه وراء هالشيء لكنه كان مستعجل لأبوه ويضمن سموّه تجاه حفيدته والحين ما عاد يدري بشيء ، فعليًا ما عاد يدري ونطق أسامة : طال عمرك ؟ ذياب ؟
هز راسه بالنفي فقط : استريح يا أسامة ، استريح جاي
ناظره أسامة من توجه ذياب لمحمد يكلمه ، ورجع يجلس بمكانه فقط للآن الضحكات تصدح ، وللآن السوالف ما وقفت لكن ملامح ذياب إختلفت تمامًا من جاء يجلس ينطق له سموه : أبوك وين راح يا ذياب ؟
مسح على طرف حاجبه فقط : للأهل
_
« بيـت حـاكـم »
تركت عبايتها بمكانها تلف نظرها له : ما دقيت على نهيان قلت أكيد نايم ولو دريت إنك معصب كذا ما دقيت ، وش صاير حاكم ؟
هز راسه بالنفي فقط يناظرها لثواني ، ورفعت حاجبها بإستغراب : وين كنت ؟ وش اللي معصبك هالكثر ؟
نطق " عند ذيـاب "يسكت بعدها ، وسكن داخل ملاذ كله مباشرة : تهاوشت معاه حاكم ؟ وش سويت له ؟
كانت منه نظرة غضب ترجّفها ، فعلاً ترجفها ينطق بالغضب : وش سويت له ؟ وش بسوي له قولي لي يعني
رفعت أكتافها بعدم معرفة تنطق بذهول : ما أدري حاكم ما تشوف وجهك ؟ وش صار طيب وش حصل
هز راسه بالنفي يجلس: أنا تعبت ، تعبت وعلوم ولدك توصلني من غيره وهو ساكت وأنا قدام وجهه ، تعبت من طبعه ومن دنيته وتعبت من كل شيء يا ملاذ ، كل شيء
ناظرته لثواني بذهول : وش صار طيب ما فهمت ! وش
رفع حاكم أكتافه بعدم معرفة : أنا معه ، رايح له والأمور طيبة شوي إلا وربعه أهل القصور جايين له وشوي سعد راسل لي مبروك لولدك رجع الوزارة وقلت ما يدري ، مشّيتها قلت ما يدري ما جاه علم بس ماني غبي يا ملاذ ، ماني غبي يوم أسامة يشدّه يعلمه وأقوله به شيء بتقوله لي يا ذياب يقول وش
ناظرته ملاذ لوهلة لأنها ما فهمت ولا حرف من اللي قاله : وأهل القصور عنده الحين ؟ بالخيام عنده ؟
هز راسه بإيه تسكت ملاذ لثانية فقط : وتركت ولدك ؟
ضحك بذهول يناظرها ، ضحك يوقف كله على حيله بذهول : محتاجني ولدك ؟ محتاجني ؟ ما يحتاج
ناظرته لثواني لأنها تفهم شخصية حاكم بطريقة ما ، تفهمه وتفهم حتى أسباب غضبه بهاللحظة إنه ما يحس بمكانه عند ولده نهائيًا وشتت نظرها : مو شرط يحتاجك إنت أبوه حاكم ، إنت أبوه يكفي مكانك بقلبه وعنده ما يجيه أحد ولا يساويه أحد ما تعرفصرخ بغضب مباشرة يسكتها : ما أعـرفه ! ما أعـرفه !
سكتت لأنها صارت تفهم أكثر ، بطريقة ما صارت تفهم أكثر وهزت راسها بإيه فقط : تبي مكانك عند ولدك ؟ تروح ترجع له الحين يا حاكم ما تبعد عنه وقدام ضيوف ثم تقول وينه مكاني عند ولدي ، تعوذ من الشيطان
ناظرها بذهول ، وهزت راسها بإيه بتأكيد فقط يطلع خارج الغرفة ، خارج جناحهم وخارج البيت كله وهو ما يدري فعليًا وش جاه ، وش صار به يتمتم : استغفرالله العظيم وأتوب اليه ، استغفرالله ..
_
« الخيـام »
فضت عليه الخيام لآخر مرة من توجه محمد ينام ، وبقى أسامة اللي قرر يرجع معاه لكنه هو بهاللحظة إختار يترك أسامة ، ويترك محمد يمشي بعاري أقدامه على الرمل وتمدد يسند ظهره على أحد نياقه بالأرض ، وده يفكر ، بس وده يفكّر لكن من كثر ما ينفض صدره بهاللحظة هو مو قادر حتى يستوعب إن رجع تكرر فيه ذات الموقف وقت طلع من الدعوى يدور أبوه ، وهالمرة كان موجود لكنه مشى عنه ومو هنا ألمه ، ألمه إنه حاول ، وحاول بكل جهده لدرجة رجعت له أحاسيس طفولته كلها وهو يحاول يرضي أبوه وما رضى ، ما بقى معه : لا إله إلا الله رنّ جواله بإسمها يسكت تمامًا ، يسكن كله لأنه يدري بقلبها زي ما يدري بدمه هو بهاللحظة ولو تكلّم ، لو رد هي بتعرف وتدري به ومشى له أسامة : طال عمرك
قلب جواله يرفع نظره له ، وأشّر أسامة على الناقة اللي جالسة مقابل ذياب : لو جلست على ظهرها تقوم ؟
ناظره ذياب لثواني لأنه ما يبي يجلس مثله على الأرض ويسند ظهره على الناقة : خايف على ثوبك من التراب ؟
إبتسم أسامة يهز راسه بالنفي : لا طال عمرك بس بجرب
أشّر له ذياب بمعنى إجلس يجلس أسامة عليها فعلاً ، ولفت بإتجاهه يبتسم برعب لحظي : أنا أسامة
ضحك ذياب من تعبه ، من إرهاقه وحرقته فقط ومن جات الناقة تسند راسها على ضلوع ذياب وصدره يسكن أسامة : هي تضمك ؟
هز راسه بإيه لأن حلاله يلتفّ حوله بطريقة تواسيه ، بطريقة هو يحسّها يرتكي على وحدة وترتكي عليه أخرى ومسح أسامة على جبينه : وش بتسوي ذياب ؟ بترجع ؟
هز راسه بالنفي فقط وهو ما درى بالصريح للآن وما نطق له سموه بإنه رجّع أوراقه للوزارة وطلب يُلغى عنه طي قيده الأول لكن صار واضح له من جات السوالف مخفية من سموه يجسّ نبضه وهو ولا نطق بحرف : مشينا
ناظره أسامة لثواني من وقف يشدّ حيله ، ياخذ أغراضه وتوجه لسيارته يركب أسامة بجنبه : وش بتسوي بالموضوع اللي قلت لك عنه ؟ ما كان جدال عادي طال عمرك والصدق أخاف تسوي شيء لأنها وصلتها للكرامة طال عمرك حسب ما سمعت
ناظره ذياب لثواني بهدوء لأنه يقصد لجين : دامك بلّغتني ما يمديها حتى لو ودها ، ما قصرت

انت الهوى ، كل الهوى برد ولهيب🤎

بارت ٣٨

قصص مُروَّجة

قد يعجبك أيضاً