رفع أنظاره لها لثواني هي تتوارى عنه بأيّ طاري ، وكيف يكون بظنّها إن لها
قدرة تواريّ وهي طلّعت قلبه من وسط ضلوعه تاخذه رهن بيدّها وباطنها وقت دخل يشوفها هي ، يسمع صوتها هي معاهم ويشوف ظهرها يلي كان يقابله من جلوسها لجل توصل لطول البنات وشعرها يلي رفعت يدها تعدله بالأخير وضيّعه مرة قبل وقت كان منه سؤال هي الريح تحرّك شعرها ، أو تحرك قلبه من محلّه ووقت حرّكته هي بيدها عرف إنّ هي تحرك كل شيء فيه بأبسط حركة منها ، وقت وقفت هي ما تعرف إنه خلفها وعدلت أبيض فُستانها تلتفت لشدن وياكبر حظّ شدن هي تقبّلها ، وتلتفت تدّورها وألف تنهيدة ما يوسعها صدره من شعوره هي كانت تتطمّن على يديهم لو صابها الجرح ، لكن ما تطمّنت على قلبه يلي قطّعته بعينها ، وجرح يدّها ، وحلو وقعها لأن هم لو يشوفونها حلوة ، هو عينه تشوف مابه مثلها على وجه الأرض ومستحيل يكون ..
رجف قلبها من إنتبهت إنّ يده مو كما العادة ، إن فيها أثر مستحيل تغفل عنه وهو بمرّة كان أقرب لها من نفسها وتأمّلت يده أكثر من كل شيء بالدنيا وقت جمّع أطراف جاكيتها يقفّله .
ما كانت بوعي الخجل من مدت يدها تلمس أطراف مفاصل كفّه : ما كانت هنا
ما كان منه الرد هو كان ماسك يدّها صح لجل جرحها لكن وقت هي مدت أناملها لأطراف مفاصله هزّت فيه الأرض تحت ماهو بس قلبه ، هزّته وأكثر من رفعت عينها المذهولة لعينه كأن يلي بيده عظيم الآثار والجروح مو بسيطها ومن تبدّلت نظرتها من نظرته هي كانت مليانة خوف عليه ، وصارت مليانة سكون مثل نظرته هي ما تدري وش تسوي ، ولا تدري وش تشعر بهاللحظة لكن لوهلة صار السكون والخجل يلي يقتله هو أطغى المشاعر بنظرتها هي قدامه ، وحلاله ما يمنعه عنّها شيء إلاّ خجلها ورجفة جسدها يلي يشوفها من عُنقها يلي كلّ مافيه يتبدّل هي وقت تاخذ نفس تتشكّل قدامه أعظم لوحة ممكن تشوفها عينه هو وده يتحسسّ كل عنقها ماهو عرقها النابض فقط وما يكتفي بلمسه ، سكن كل قلبها من حسّت بيده تحاوط خصرها هي تجمّعت كل مشاعرها بعنقها ، وبقلبها ، وظهرها العاري يلي وصلت له يدّه يرجف كل مافيها ما بقت مسافة بينهم وتعرف إنه ما بيوقف على لمس خصرها وظهرها عينه سطّرت نوايا تمتلي لهيب لكن هي مالها قلب يتحمّل ، هي تخاف من شدّة نبضها بهاللحظة يوقف قلبها ما تتحمّل ويحرقها الخجل من صار وجهه بجنب راسها ، من حست بحرارة الدنيا كلّها تحاوطها هي من عطره ، ومن صدره ، ومن وجوده بهالقرب هي تعرف بتصير خطوة أكبر من إحتمالها ورجفت يدها تمسك ذراعه لثاني مرة بعد مسكتها لها بالمكتب وقت كانت تثبّت خطوتها لكنها الحين تثبّت قلبها ، وقلبه هو أقرب لها من نفسها ويمتنع عن إنه يضمها أو يحاوطها لكن يده تقربها منّه ، يده أعدمت المسافة بينهم تستقرّ على ظهرها وتترك وجهها يقابل صدره ورجفت يدها على ذراعه هي ما ضمّته بالشكل الصحيح ، ولا هو ضمّها بالشكل الصحيح والغاية من وقوفهم المتقابل بهاللحظة ماهو معانق بالمعنى الحرفي لكنّ وقعه عليها لهيب ورجفت هي أمها تدعي لها بحضن وصل وسطه دفى كيف تفهّمها إن هم عندهم لهيب ، ولا غير اللهيّب من أبسط لمسة وأبسط قرب ..
ما كان هو ، ما كان بوعيه وقت صار قريب منها بهالشكل ياخذ كل تفصيل منّها بأعماقه ، هو مرّة هبت ريح عطرها عليه من فروته صاحبة النصيّب الأوفر يلي حاوطتها والحين هو بنفسه يحاوطها ، بنفسه يقربّ منها لكن تمنّعها يقتله هو لو بيده كان الأكثر ، والأكثر ماهو هالمحاوطة وبس : قـولي
هزت راسها بالنفي من إرتعابها ، من ما نزلت يدها عن ذراعه هي تعرف قصده بـ" قولي " وإنها تمنّعت كثير وقت المكالمة كانت تقول كلمة وتسكت وكان منه جملة وحدة " الحين إختاري السكوت مثل ما تبين لكن حروفك باخذها ، باخذها " ورجفت من رفعت أنظارها له هي لمحت حروب عينه بمجرد ما تلاقت بعينها ، عضّت شفايفها مباشرة من إرتباكها لكنها بتحاول تجمّع جملة صحيحة : ذيـ
شتم تمنّعه ، وخجلها ، وكل صبره ينحني لها هي رفعت وجّهها له بتتكلّم وتقابل وجهه ماهو صدره لكنّها سطّرت هلاكه ، وهلاكها هي معه تعبت المقاومة منّه ، وتعب هو منها يقبّلها يشدّ كل عروق عنقها من المسافة يلي كانت بينهم رجفت يدها على ذراعه بعد دقائق طويلة ما بقى فيها حيل ، ولا بقى لها ثبات وقرار هي ودها تثبت ، ودها تلمس الأرض ورجف قلبها من بعدم شعور منها تركت جبينها على صدره من الخجل ما تبي تشوف عينه أو حتى ترفع وجّهها لوجهه من جديد مالها قلب يتحمّل لكنّها هربت من عينه ، لصدره ما راحت بعيد ورجف كل كيانها من حسّت بيده تحاوط عنقها من الخلف ومن قبل تنطق بكلمة هو قبّل رأسها لثواني طويلة لكن ما كان رعبها من قبلته لرأسها ، كان رعبها والخوف كله من يده يلي فُتحت على مدى نظرها ومن هي بدون شعور منها حاوطّتها لثواني تشد عليها ، إبتسم غصب عنه حتى لو ما لمحت إبتسامته هو كان يبي منّها هالشدة فقط لجل يغنّي موّاله وسكنت ملامحها من ترك يدها وعرفت غايته : لو يجي أحد !
ما كان منه الإهتمام ينزل أنظاره ليدها ، لكمّها يرفعه للأعلى ووجّه عينه لعينها من رفعت وجهها له من جديد : ما جيتك بشرع الله لجل يرّدني أحد
سكن قلبها وما خفى عليه خوفها إنه يقبّلها من جديد وإبتسم بهدوء : ترى ما يرّدني لا نزلتي عينك عني
رجف قلبها من إبتسم بهالطريقة ، من نسيت إنه يرفع كمّها وإن غايته آثار يشوفها لكنها ما نزلت عينه عنّها من ذهولها ، أو من شعورها يلي طغى حتى على خجلها وعض شفايفه هي ما تساعد صبره وتمنّعه إنما تجبره ، رجعت خطوتها معاه للخلف من رجع ينحني من جديد يبقيّ يده على كمّها النصف مرفوع ويغنّي مواله بقرب جديد ..
_
« عنـد الرجـال »
توجه نهيان جنب أبوه : متى نمشي ؟ وذياب معنا وإلا لا
هز حاكم راسه بالنفي : ذياب يجلس عند زوجته ، حنّا بنمشي الحين خلاص إلحق جدك وأنا جاي وراكم ..
هز راسه بزين وهو يمشي لنصّار ، ووقف حاكم لكن قبل يتكلم أو ينطق بكلمة وصلته رسالة من ملاذ تكررّ عليه مطلبها من البيت " لا تنسى تسلم على قصيد قبل تمشون " وظنّه لو ينسى أو يأجّل تزعل منه ثلاث سنين قدام ماهو سنة وحدة ، عدل ثوبه وهو يتوجه لتركي الواقف على الباب يودّعهم : أبوعذبي
لف تركي أنظاره له : سم وترى بتجلس إنت ما بتمشي
تنحنح لثواني ، وضحك تركي من صار له الفهم : تعال ياخوك ، الأهل عندهم ؟
رفع أكتافه بعدم معرفة : يمكن ، بس الحين بدخل أنا هم موجودين أو لا ما ودي أمشي ما سلّمت عليها
إبتسم تركي يشّد على كتفه ، ومشى يتبعه لقريب مجلسهم من وصلت لحاكم رسالة من ورد إن ذياب وقصيد لوحدهم : ما عندهم أحد ، ندخل سوا
هز راسه بزين وقبل تقّرب خطوتهم أكثر لف لعذبي ولده يلي يطلبه يجي : تصرف إنت !
كان من عذبي الرفض بإنه ما يعرف ، ولف تركي أنظاره لحاكم : إدخل إنت البنت بنتك والولد ولدك لفت أنظارها لذياب يلي يده على ظهرها بأقصى مراحل إسترخائه ، ظهره يلاصق للكنبة بكل أريحية وجلوسه يبين هدوء مستحيل بداخله هي جنبه ، يدّه على ظهرها ويتأمّلها ما يبي من دنياه شيء أكثر ولا يطلب ، رفع أنظاره لها لثواني من كانت تناظره : قولي
هزت راسها بالنفي هي تحترق من خجلها من يده ، ومن رفع أنظاره لها الحين هي تخاف من عينه : ما بقول
ما نزل يده نهائياً ، وإبتسمت عينه بدون ثغره هالمرّة هي تقتل داخله بشكل ما توّقعه لو واحد بالميّة شافها كثير ، وكان قريب منها كثير لكن دائماً تحاوطه الحدود واليوم بدون حدّ ، اليوم هي بجنبه بدون حدّ أخذ نصف رضاه بتقبيلها ، وتمنّع عن كامل الرضا من خجلها يلي كان على وشك يقتله ويقتلها من مسكت كتفه بالنهاية تبيّن إنها ما بها حيل ، من حاوطت كتفه وقت رحمها تضمّه بدون فعل آخر وإبتسم وقتها هي تخجل ، وترجف من خجلها وفعله لكنها تضمه ، أو تستند لصدره ما تبعد ..
رجعت تشتت أنظارها بعيد عنه وقبل تتوازن هي خطف نفسها صوت الباب ودقّته يلي قبل يسمح أو هي تسمح بالدخول فُتح وعرف ذياب من خلفه ، من يلي عادته يطرق مرّة ويدخل بدون يسمع إذن أو بأحيان كثيرة يدخل بدون لا يطرقه أصلاً ونطق ذياب : حيّـاك
سكنت ملامح قصيد يلي كانت ترجع أكمام فستانها لوضعها الطبيعي وعلى وشك تتدارك نفسها وجلوسها وحالهم لكنها غصّت بالخجل يلي رجف يدها وإستيعابها من كان عمّها حاكم يلي فتح الباب يرمي سلامه ومن إستيعاب ذياب يلي نطق حيّاك قبل هي تستوعب ، عدل ذياب ثوبه ينهي جلسته ويوقف : وعليكم السلام
تسمّرت خطوتها لثواني بالقوة قاومتها توقف بجنبه مباشرة ، تعدّل فستانها ورجفت كلّها من رفع عمّها حاكم أنظاره لها يتمتم بماشاءالله يلي ما نزلت من على لسانه من أول دخوله : حيّ قصيد الشاعر ماشاءالله ، حيّ بنتنا
ما عرفت وش ترد وما كان منها إلا إنها تصافح يده الممدودة ، وترفع نفسها تقبّل رأسه وتلعثمت ألف مرة قبل ترد على سؤاله عن حالها : بخير الحمدلله وإنت
إبتسم حاكم هو ما غفل عن خجلها ، ولا حالهم أول دخوله : بخير الحمدلله يابوك ، بخير الله يديمه عليك وعلينا
إبتسمت تهلك قلب ذياب كلّه هي تخجل ، تخجل وأكثر من صوت الباب الآخر يلي طرق لمرة وحدة وفُتح بعد ما نطق ذياب يسمح لهم بالدخول وهي ودها تختفي من مكانها هو ما أعطاها مجال تستوعب أفعاله وتترتب منها ، أو تستوعب دخول أبوه والحين بقيتهم ورجفت خطوتها يلي ثبّتها هو بإيده يلي سندت ظهرها من الخلف تحت أنظار حاكم يلي ما غفلت عينه عن خجلها ، عن إحمرارها وتبعثرها ووقف جنب ولده يعدل أكتافه بهمس : خفّ على البنت وطلّع السبحة لف أنظاره لأبوه يلي إنتبه لكل أحوالهم لكن ما إنتبه للسبحة يلي بيدّ ولده من وقت طويل ، وتنحنح حاكم تسكن كل ملامحه من إنتبه إن السبحة تعانق أصابع ولده بذهول وبالقوة خفض نبرته : ما ردّتك !
ما قدر يمنع إبتسامته ، وعدل حاكم أكتافه فقط ما عادت عنده حروف يقولها من صدمته وإستيعابه وإن قصيد تخجل ، تخجل بشكل ما يقدر حاكم يستوعبه وإن حتى نسائهم الحين تخجل من وجودهم ويدري إنه هو بنفسه أرعبها مو بس أخجلها والحين صار له رعب مثلها من عرف إن ولده ماهو صاحب تمنّع ولا ردة ..
غرقت ورد بعيد عن ضجتهم وسلامهم من لمحت يد ذياب خلف ظهر قصيد هي ما توّقعت لو واحد بالميّة يكون وقوفه معاها بهالشكل ولا يجي وقعهم عليها بهالشكل ، إبتسمت قصيد من وسط خجلها هي لفّت أنظارها لذياب كأنها تطلبه العون منهم وهنا ضيّعت كل قلب له ، إبتسمت علياء يلي قبّلت خد قصيد فوق الخمس مرّات وشهقت : تخجلين مني كذا شلون ذياب ؟
توّردت ملامحها كلها ، وضحك حاكم لأنها لفت أنظارها لذيّاب بدون وعي منها وكأنّ علياء كانت تنتظر هالإلتفات منها لجل تنسف كامل ثباتها : دام جات هالنظرة لعينه ، أمركم سهل ما تخجلين منه بالحيل إن شاء الله عقبال ما نشوف عيالكم وسطكم بالقريب العاجل بإذنه
ضحك حاكم من ذابت قصيد تماماً وهو يناظر ملاذ بمعنى تسحب أمه عندها ، وإبتسمت جدته نهى يلي مشيت بخطوتها لعند قصيد وعنده تسلم عليهم : الله يهنّيكم يا بنتي ، الله يهنيكم ياحبيبته
ضحكت ورد من خجل قصيد المستحيل وإن حتى ذياب ما تمالك نفسه إنما ضحك لجدته يلي جات تضمّه ، وتوجهت هي بدورها لها تضمّها وهمست : أنا دخت عند كلمة حبيبته ، كيف قلبك إنتِ ؟ ومعليش نترك كلّ الكلام الفاضي وبنقول إيه حبيبته من وقت خطوبتكم حتى لو بدون كلام ، حب من أول مدري أيش بس حب
ضحكت غصب عنها وإبتسمت ورد : نبي هالضحكة إحنا من أوّل أصلاً
توجهت ملاذ لحاكم يلي يناظرهم لثواني وإبتسمت بهمس لأنها تفهم نظرات الإعجاب منه : تفهم بحالهم ؟
هز راسه بالنفي يعلن إستيعابه للخطبة المفاجئة والملكة وكل عجلة كانت من ولده : أفهم يلي قال الذيب ما يهرول عبث ، ولدك عرف لجل من يركض ما يهرول ..
طلع ذياب جواله من جيبه من حس بإهتزازه ، ورجع يسكره يدخله بجيبه من جديد وإنحنى يهمس قريب من أذنها بهدوء : شوي وأرجع
نبض عنقها مباشرة من التوتر هي ما تعرف كيف رفعت عينها له وبالوقت نفسه مستحيل تقدر تبقى مع أهله وأبوه لوحدها وهمست بعدم وعي : تتركني ؟
نزلت عينه مباشرة لعنقها لأنه قريب منه مسافة ، ولأن عرقها هذا بالذات ينبض بعقله وقلبه مو بس عنقها ورجفت لثواني من نظرته تلغي أول خجلها من إنه يروح لأن لو ما راح على هالنظرة بيصير لها أعظم الخجل مو بسيطه : تمام ، لو بتروح يعني
هز راسه بالنفي وهو يعدل وقفته لكن تجمّع الدم بعروقه من صبره الشديد وإداركه إنهم مو لوحدهم وإنه ما يقدر يشتم أو يقول كلمة وينفّذ يلي بخاطره ، لمح بعين أبوه نظرة تبين إستمتاعه الشديد بحاله وفهمه بإن بنت الشاعر بديت دلالها عليه وإنه هو غصباً عنه بتكون كلمته تم ولبيّه وعلى خشمي وأكّد حاكم نظرته من نطق : يحق لبنت الشاعر يلي ما يحقّ لغيرها ياذياب وإلا وش تقول ؟
إبتسمت علياء بتعديل : بنت الشاعر ، وزوجة الذيب ..
ضحكت ورد من ضحك أبوها ، ومن يد ذياب يلي رجعت لمكانها خلف ظهر قصيد يلي رفعت عينها له لثواني ولو كانت ما تشوف أي شيء قبل ، هي مستحيل ما تلاحظ هالتفاصيل البسيطة بينهم هي نظرة عابرة ، أو محاوطة خفيّة عن أنظار الأغلب لكن على نظرها هي ما تغيب ..
_
« بالخـارج »
تكّى تركي بجنب فهد على الباب بعد ما بقى من رجال آل سليمان إلا قليل وإنتهى أغلب إنشغالهم صار وقت الإستيعاب بإن أختهم صارت زوجة لذيّاب ، رفع حواجبه من لمح عذبي الجاي من الجهة الأخرى وثوبه مبلول تماماً : عذبي !
تعدل فهد مباشرة ، وتوجه له : شنو كل هذا دموع ؟
ضربه مباشرة لأنه بيطقطق عليه وهالجملة بداية : ما قلتلك المرّش وراء له صوت غريب وأمي تقول إنتبهوا له من العصر ، قال لي أبوي قفله قلتله ما أعرف يابن الحلال وجاء معي يحاول فيه ووقت إنفجر مسكني أنا يحطني قدامه يقول إنت ثوبك ما يهم تبللّ أنا لا يجيني شيء
ضحك تركي لثواني : معه حق إنت الحين بتبدل ونطلع بس ليش جاي ليش ما دشيّت على طول
هز راسه بالنفي : ناديت لين نشف نصّ ثوبي محد يسمع لا أمي ولا أحد ما قدرت أدخل بعدين تشوف شكلي إنت الحين ؟ شلون بدخل
نزل فهد شماغه من على راسه ، وسكنت ملامح عذبي يضربه من جديد من كان بيربط الشماغ على خصره : شنو أرقص لك يعني وإلا كيف ! أثول إنت !
دخل نهيان يلي رجع يبي من أبوه شغله لكن سكنت ملامحه من لمحهم ، وما مسك جملته : حبيبي متسبّح بالثوب ؟ وإلا عندكم مجلس حتى بالمسبح
تعالت ضحكاتهم مباشرة ، وحتى عذبي نفسه ضحك يغطي وجهه من إستغراب نهيان الشديد وهمسه : يعني عندنا حاكم الطائي حنّا صح ، شكل تركي الطائي متعديه حتى بالمسبح يقلط ضيوف
تنحنح تركي ، ونزل نصّار من طول نهيان عند الباب يشوف ظهره لكن ما دخل للداخل : نهيـ
قطع نداه من شكل عذبي يلي تنهد يسحب شماغ فهد ويبرر له مباشرة : قسماً بالله ما سبحت بالثوب ولا فتح أبوي مجلس بالمسبح
هز نصّار راسه بالنفي : بسم الله عليك ما بقول شيء روّعوك واجد هم إبتسم نهيّان من عرف إن نصار يمسك حروفه ما يبي يتكلم حتى هو : لا تختنق بحروفك تكلم
هز راسه بالنفي ، ولف نهيان أنظاره لعذبي يرجع لموضوعه : شوف لي الدرب بكلم الوالد
قبل يتكلم عذبي كان من نهيان الرفض : خلاص بدخل
لمح نصار إن جات لنهيّان رسالة من ورد إنها تنتظره عند الباب ، ومن رفع عينه تلقائي هو بدون شعور منه وبالفعل كان طرف الباب مفتوح وما يدري هو ليش خاف ورفع يده لخلف عنقه ، لف عذبي أنظاره للخلف من لمح الباب مفتوح : ينتظرونك ؟
هز نهيان راسه بإيه ، وطلع نصّار يلي توتر يكلم نفسه بذهول : هذا وهو طرف باب يانصّار طرف باب !
رفع فهد حواجبه لأن نصار فجأة لف ورجع لناحية السيارات : يالطيب فيك شيء ؟ تبي شيء ؟
هز راسه بالنفي وهو يتنحنح بإستيعاب إنه بس طلع ما قال لهم شيء : لا ياحبيبي سلامتك
_
عدلت ورد نفسها بإنتباه إن نهيان يناديها صار له مدة لكن هي مو مستوعبة : تعال مافي أحد
رفع حواجبه لثواني يدخل ، وسكنت ملامحه من كانت قريبة من المرايا وجوالها بيدها : لي ساعة أنادي وواقفة تتصورين يعني ؟ صح حلوة ويحق لك بس ردي علي
ما إستوعبت لوهلة : مين يتصور ؟
رفع حواجبه لثواني بإستغراب ، وإنتبهت إنها كانت على وشك تفضح نفسها إلا شوي : تعال تصور معي طالع حلو
إبتسم مباشرة يعدل أكتافه ويوقف بجنبها : من زمان حلو أنا بس دوريلي عروس خلاص نروح أنا والذيب سوا
إبتسمت من عدل شماغه ووقفته يوقف بجنبها ، وسكنت ملامحه من جاء أبوها بجنبها لأوّل مرة يصير هو عن يسار ورد ، ونهيان عن يمينها وإبتسمت بدورها تتصّور معاهم الإثنين ورفع نهيّان حواجبه لثواني : راضي علينا اليوم أبوذياب عساه دايم ! جبت لك المفتاح العامل قال لي أعطيه لك ما لقى ذياب
مد يده ياخذ المفتاح منه : نصّار معك ؟
بلعت تعبيراتها كلها مباشرة لأنه وجّه سؤاله لنهيان لكن نظرته كانت لها هي حتى لو حاولت ما ترفع عينها له ، هز نهيان راسه بإيه : معي ، ليه ؟
ميّل حاكم شفايفه لثواني : ووين بيروح الحين ؟
رجفت أطرافها هي تعرف أبوها ما يسأل بهالطريقة إلا لو وده يتأكد من شيء ، ورفع نهيان أكتافه بعدم معرفة : الحين بنروح نتقهوى أنا وهو بعدين مدري عنه
هز راسه بزين لثواني بسيطة ، وتذكر نهيان : إنت قلت تبي نجيب لك السيارة هنا صح ؟ ما بترجع مع ذياب
هز راسه بالنفي : أتصرف أنا ، نصّار وينه تقول لي ؟
نسى سؤاله عن نصّار من لمح ذياب يلي طلع من المجلس يكلّم ، وأخذت ورد نفس من أعماقها من تركها أبوها بعد ما نطق : خلاص روح
ميّلت ورد شفايفها ، وإبتسم نهيان : مروّق حبيبنا عساه دايم بس وش عنده مصيّف عند البنت وزوجها ؟ ضحكت لثواني : بس هو ؟ كلهم مصيفين عندهم
رفع حواجبه لثواني بإستغراب ، وسكنت ملامحه من لمح أخوه : بعذره يعصّب أجل ، بمشي أنا تاخرت على نصار
هزت راسها بإيه ، ومشى نهيّان ورجعت هي تفتح جوالها من جديد قبل دقائق بسيطة فقط وقت فتحت الباب هي كانت نيتها تصّور نهيان وجّيته لكن ما توقعت إنها بتصّور نصار بجنبه وإنها بتفهيّ إنه رفع عينه ناحية الباب لدرجة ما تستوعب فيها نداء نهيّان وما تدري هو لمح جوالها أو لا لكن تتمنّى العدم ، رفع حاكم حواجبه لثواني من وقوفها بنفس المكان : مطولة ؟
سكنت ملامحها مباشرة تسكّر جوالها : لا ، بدخل الحين
هز راسه بإيه فقط يرجع يدخل للمجلس ، ودخل ذياب خلفه وبعد ثواني بسيطة دخلت ورد عندهم ..
_
« بالداخـل »
توجهت شدن وأخيراً لأمها يلي بتموت من فضولها : شدن ! وش هالحركات ما جلستي عندهم ليش وبعدين ترجعين ما تقولين لنا سلام وش صار لك إنتِ ؟
ميّلت شدن شفايفها لثواني وهي تشوف كلهم ينتظرون كلامها ، وناظرتهم : ما ألعب يعني ؟
ضحكت درة من عصبيتها : لا طبعا بكيفك تلعبين بس تقولين لنا شوي ، نموت من الفضول هنا يعني ؟
إبتسمت جود من تمنّعها : بس قولي لنا وش شفتي ، الحين بما إن كلهم هناك أكيد ذياب من أول موجود
هزت راسها بإيه : من أول موجود وأنا ما شفت شيء لأن الشوكة عورت يدها وعصّب مرة إحنا بس خرجنا ما شفنا
إبتسمت ديم يلي كانت تحرك السكر بفنجالها : دخلت الشوكة بيدها ؟ وش هالصدف !
ناظرتها توق لثواني بعدم فهم ، وإبتسمت ديم أكثر : لما دخلت الشوكة بيدها وسن تذكرين ؟ وقت ضمدتيها إنتِ وعصب هو مدري كيف قال لا يجيها الشوك أكثر
إبتسمت جود لثواني : ياساتر يالصدف ! شدن
ناظرتها وسن لثواني : لا تكلمون بنتي ! هي لو ما إنخرشت منه ما طلعت بس شكله بالحيل خوفها
هزت راسها بإيه ، وتنهّدت درة : تكفون هذا ما يمسك نفسه يعني ؟ هي قصيد مننا إحنا تنخرش ياعزتي لها وجاها هالبدويّ الجلف إذا الصغار خرشهم هي شلون
هزت جود راسها بإيه : عاد الصدق ، ذياب من يومه يخرشنا إحنا أحسّه ما يعرف يتعامل مع أحد إلا أمه بس
ناظرتها وسن لثواني : تحسين ؟ لا تأكدي حبيبتي عشان كذا أقولكم ودي أشوف وأعرف أحس فوضى لامتناهية هي البنت فيها دلع العالمين وهو حدّه نياقه والبر الله المستعان
هزت توق راسها بالنفي : سلامات ترى مو لهالدرجة بدوي بحت ! يعني صح برّ وغرابة تخصه لكنه مثقف
ناظرتها جود لثواني : محد تكلم عن الجهل طيب ما قلنا جاهل ! قلنا مثقف صح بس بالنهاية حياته بر هو يجي الرياض هنا شغله وأهله شوي ويرجع ماله إختلاط كثير يعني اللهم هالفترة صار وقته بالرياض أطول من المعتاد ميّلت توق شفايفها بعدم رضا ، وناظرتها جود : بس بسأل سؤال يعني الحين وقت تتفلسفين إنه مو بدوي بحت ، قد شفتي صوره يلي بجوال ورد ؟
هزت راسها بالنفي ، وضحكت وسن : أجل لا تتكلمين ، ذياب لذة عمره وحياته مثل ما تقول ورد يكون متكي وتجيه ناقة عنده تنحني له ويبوسها
إبتسمت دُرة وهي تتأمل بنات آل نائل يلي بالجهة الأخرى بهمس : بنات تصدقون مو بس ذياب وقصيد بينهم فرق ، حتى إحنا مع بناتهم بيننا فرق حيل بس الحين ما علينا من فروقنا ، هو ذيّاب بيطول عندها ؟
هزت وسن راسها بالنفي : مستحيل ما أحس من أول لقاء يكشت عند البنت ، أكيد الحين يمشي مع الرجال ولو جلس بعد معذور يعني ما ألومه
إبتسمت ديم وهي تشوف ورد والبقية راجعين من عندهم ، ومن سألتها وسن بهمس : مين بقى بالمجلس ؟
جلست ورد بجنبها : أبوي وذياب وعمي تركي وقصيد
_
« المجـلس »
كانت تحس بتوتره ، وتوتر العالمين أجمع صار بقلبها من جواله يلي ما سكت وإنها لمحت تعكّره وهي طلبته يطلع يرد لجل يرتاح باله حتى لو كان بيتركها معاهم لكن كان الموضوع أهون عليها بحكم إن أبوه طلع قبله وتبقى هي معاهم ..
إبتسم تركي يلي رقّت نظرته بدون مقدمات من جلوس ذياب بجنبها ، وحاكم يلي جالس بالكنبة الأخرى يقابلهم والحين هو بدخوله طغت كل مشاعره على نفسه وقلبه من إبتسمت عينها لعينه حتى والخجل حرقها تماماً : تستفرد ببنتي يا ذيّاب ؟ ما هقيتها
رقّ قلبها كله من كان يمشي لعندها ومن إبتسامته المتزامنة مع نطقه لجملته ، وقفت هي مثل وقوفهم لكن هالمرة ضمّته من أعماقها وضحك يهمس لها هو أدرى العالمين ببنته ومشاعرها ، طُرق تعبيرها وكيف تحضنه : لا تبكين يابابا مسّكيني حيلي وقلبي إضحكي
إبتسم حاكم من لمح يدها يلي رفعتها لعيونها وخدّها يلي قبّله أبوها : الله يديمها لك ، ويديمك لها ياتركي
كانت منه الآمين من قلبه : ويديم لك ذياب وأخوانه
عدل ذياب جلسته من رجعت تجلس بجنبه ، وبجنبها أبوها يلي خطف من ذيّاب كل نبض قلبه من مد يده يرجّع شعرها خلف أذنها حتى وهو يسولف مع حاكم ، كانت حركة بسيطة من تركي لبنته لكن ما كانت بسيطة لذيّاب يلي عرف إنتباه تركي لها كيف يكون أو عرف جزء منه فقط هو حتى عينه تنطق إن قصيد أغلى شيءّ بحياته ، حتى عينه تنطق إنه يحبها بشكل ما يحبّها شخص بعده وسكن من إنتباهه لكلامهم وإنه عن طفولة قصيد من ضحك تركي : إي والله كان الغرور ، أقول لهم هي مدى نظرها ممتليّ بالشاعر ما يمليه أحد بعدي وجاء من يزاحمني بعينها وقلبها الحين بس يا ذيّاب تراني أبوها
إبتسمت عينها هي لأبوها قبل ينطق ذياب ، ونطق يصمّت جواله : نظرتها هي تكفيّ عن كلامي ياعمي ضحك تركي من تّوردت ملامحها تلف أنظارها له ، وإبتسم ذياب رغم إنه يُضغط من الإتصالات يلي توصله مهما حاول يصمّت جواله هو يهتز بيده ، وتنّور شاشته كل ثانية ووقف حاكم يلي حس بمدى توتر ولده : ما نطّول عليكم حنّا ، ذياب تعال معي
هز راسه بإيه وهو يعدل ثوبه ، ووقف مع قصيد يلي وقفت بجنبه تودّع عمها تمد يدها له تصافحه من جديد ، تقبّل رأسه وإبتسم تركي هي تهز أركان قلبه وقت تبتسم بهالشكل وما يذكر من سلامها على حاكم بهاللحظة إلا طفولتها ولمح من عين حاكم شيء آخر تماماً ، هو يدري إن حاكم يحبّ بنته من وقت هي بالمهد لكن الحين عرف هو كيف يحبّها من عينه وكيف هو لأوّل مرة يطول بجلوسه بهالشكل عند أحد وحتى الحين ما ودّه يمشي ، هو يميّز إبتسامات صاحبه ويعرف إنه من طفولتها كان يخصّها بإبتسامة ما تجي لغيرها ورجعت هالإبتسامة تطلع من جديد وقت صارت حرم ولده ، وتحلّ لعينه ..
طلع ذياب مع أبوه للخارج ، ووقفت قصيد بجنب أبوها يلي حاوطها يبتسم : عرفتي قدرك عندهم ؟ من الحين ؟
ناظرته لثواني ، وإبتسم يمنع تنهيدة طويلة من أعماقه : فيك من العز ، والدلال ، والأدب شيءّ ما يستاهله وما يقدّره إلا واحد مثل الذيب ، وهو فيه من الرجولة شيءّ يطمني أعطيه قصيدتي وأضمنها معه لكن
رقّت نظرتها مباشرة هي تعرف إنه بيوصيها ، وعضّت شفايفها بهمس : لكن لو قلت لي كلام أكثر بتبكّيني
إبتسم بخفيف وهو يهز راسه بالنفي : ما تحتاجين الوصاة يابنت سلاف ، ما تحتاجينها ما بقول شيء ..
،
سكر جواله يدخله بجيبه ، ورفع أنظاره لأبوه يلي ما يعرف شيء لكن يطلبه الهدوء ، والسكون : طيب
تنهّد حاكم لأنه يوصيه حتى وهو ما يدري عن شيء لأن ذياب ما يشاركه بشيء نهائياً ولا بيّن له أسباب الإتصالات أصلاً قال شغل ، وإنتهى عند هالكلمة وتنحنح حاكم بهدوء : إن كان شيء مهم روح وهي تلقاها وقت ثاني ، لا تجلس عندها وعقلك ماهو يمّك
هز راسه بإيه يرد على جواله من جديد وهو يناظر أبوه بدون رد على جلوسه أو العدم : إيه ذياب ، سم
طلعت مع أبوها من المجلس تشوف عمها حاكم الواقف ، وظهر ذياب يلي دخل المجلس الآخر وما تدري ليه حسّت شعورها يتجمع وسط بطنها منه هو بداية من نطقه لـ" ذيّاب ، سم " يلي تأثّر فيها ما تدري ليه ، ومن عمها حاكم يلي عدل شماغه يكلم أبوها : مشينا ؟
هز راسه بإيه : مشينا ، عذبي ببيت الشعر ينتظر
قبّل خدها لثواني بسيطة ، وضحك من لمح الخجل رجع يشتعل بملامحها هو يدري إنها تخجل كونه بيمشي ويعرف إنها بتروح عنده : ماهو زوجك ؟ ما صرتي حَرمه ؟ ماله داعي الخجل الحين وقولي لأمّك تعلمك شوي وميّل شفايفه يهمس لنفسه إن سلاف نفسها تخجل من ذّياب من وقت صغره : ولو إنها هي تخجل من الذيب ، الله يفكّ هالخجل عنها قريب وتستوعب إنه زوجك
إبتسمت هي ما سمعت تمتماته الأخيرة ، وتوجه هو للباب يخرج وتوجهت هي للمرايا لثواني بسيطة تعدل شكلها وتمشي للباب تدقه مرة وسمعت صوته يسمح لها بالدخول لكن بـ " تعال " ، ما قال تعالي وهنا وقفت خطوتها لثواني يمكن هو يقصد أبوه ، أو يقصد أبوها ما يقصدها هي وقبل تكمّل بهواجيسها أكثر هو فتح الباب من جهته يناظرها لثواني سكن فيها كل قلبها هو يقصدها هي لكن لأنه يكلّم ما نطق تعالي ، مشيت لجنبه من جلس وسكنت ملامحها مباشرة لأنها بمجرد جلوسها المتقدم عن ظهر الكنب بشوي هو رجع يمد يده لظهرها ويكمل مكالمته يلي رجّفتها هي من هدوئه فيها لكنها تشوف عينه ولو إنها ما تفهم وش يقول بالتحديد لكنها تعرف كيف يمسك أعصابه : إرسله لي
لفت أنظارها له رغم إنها كانت تحاول الوقت كله ما تلتفت ، ولا تجي عينها بعينه بالشكل الصريح هي باقي عندها جزء ما تعرف توصفه تتوجه مشاعره دائماً لعينه ، لرمش عينه بالأصح وتّوردت كل ملامحها من لف أنظاره لها لكن ما كان منها البعد ، أو إزاحة النظر عنه لثانية ..
عضّ شفايفه بهدوء هي تتأمّله ، ومرر يده على ظهرها : كلّم نصار يعطيك الباقي
شتت أنظارها مباشرة من قفل بدون مقدمات ، وعرفت إنها جنيت على نفسها بنظرتها : نطلع شوي ؟
هز راسه بالنفي وهو يرفع يده يلي كانت على ظهرها لجبينه : لا
ناظرته لثواني من رجع ينزلها لكن ما صارت على ظهرها وسكنت من إستنكارها ليش ما رجع يده لمكانها ، تّوردت ملامحها هي متى تعودت على مكانها بهالسرعة وبعد ترددّ طويل ، هي غيرت الخجل كله من مدت يدها ليده ، لآثارها : متى صارت ؟ ما جاوبتني كيف صارت
ناظرها بهدوء لثواني هو يعرف بترفع عينها له : اليوم
سكنت ملامحها مباشرة ترفع عينها له ، وتغيرت نظرته من صوت الباب هو يجزم إنهم اليوم يحلفون ما يتركونه لوحده معاها ، ناظرته لثواني تترك يده وتتوجه للباب : مين
إبتسمت أسيل بهمس : خلاص عاد طولتوا ! من متى ينتظرون البنات يسألون عنك قولي له يمشي وتعالي
توردت ملامحها من الخجل إنهم يحسبون وقتهم وهي ما تحب هالوضع ولا يعجبها نهائياً وكمّلت أسيل : ولا تطيحين عند الولد مرة خليك ثقيلة ، وإخلصي يلا سكّرت الباب خلفها ، ورجعت لذياب يلي كان واقف أساساً وبيده جواله يسكره : ذياب
رفع عينه لها هو يحترق كلّه ما يصدق إنه وقت لقاها ، هو بيضطر يمشي بهالسرعة ولا يُسمى اللقاء لقاء هو لقاها وسطهم كلهم ولا لحق يبقى معاها لوحده وقت طويل وسكنت ملامحها : بتمشي لأول مرة ينربط لسانه هو كيف يقولها إيه بيمشي بعد هالنظرة وهالنطق ، كيف يقول لأنه مشغول هو بيمشي وهي ما تدري كيف نطقت سؤالها بلفظ مصدوم ، بلفظ رافض لأنه يمشي حتى لو بدون إدراك منها هي توّردت كل ملامحها لثواني ، تغيّرت كلها : لجلهم ؟
هز راسه بالنفي هي تعذّب كل خلية بقلبه ترفض مشيه ، وتسأل عن أسبابه وبالوقت ذاته هي تخجل ! تخجل ما يقدر يردّ على رفضها بألف قبلة ، ما يقدر يجاوب أسئلتها بإجابات ترضيه هو : لجلي ، ولجلك إنتِ ..
ما كان منها الإقتناع لكن كان منها شبه الرضا هي حسّت إنه ما وده يمشي ، وإنه مُجبر وبهاللحظة فقط هي رجع يحاوطها لهيب ما يبرّده شيء هي الحين تستوعب كل لمسة صارت منه ، حتى ظهرها رجع يشتعل لهيبه ما يطفي ، حرقت جوفه كلّه يكلّمها بهدوء: كلّميني
قطع كل شرودها من هالكلمة وطلبه ، ورجعت تناظره لثواني بسيطة تعدل فيها نفسها : تمام
كتم تنهيدته بجوفه وهو يسمع أصوات الصراخ داخل ، وما قال كلمة عن إنه يدري بخاطرها : شوفي الدرب
ما تكلمت نهائياً هي توجهت للباب تفتحه ، وطلع هو خلفها بعد ثواني بسيطة لكنه إنتبه لشيء آخر هي جمعت يديها خلف ظهرها وحتى وهو حاول يمشي بخطوته ما كانت له القدرة يمشي مسافة بعيدة ورجع يناديها من جديد يبيها تقرب جنبه : بـنت
مشيت لناحيته خطوة بسيطة لكنّها ما قرّبت منه نهائياً هي رجع فيها الخجل بشكل ما تتحمله هي ، ولا يتحمله ذيّاب نفسه يلي لمح ترددّ خطوتها عنه : قربي مني
هزت راسها بالنفي بتمنّع يكرهه : بيجي أحد
وقبل تكمل دخلت شدن يلي تسحب ضيّ خلفها ، سكنت ملامحها هي من لمحت ملامحه يلي تبدّلت بدون مقدمات ما ينطق الكلمة أكثر إنما خرج بدون أبسط شيء يقوله وعضّت شفايفها لثواني تفرك باطن يدها وما تدري ليه هي يحزّ بخاطرها أبسط شيء منه وعضت شفايفها لثواني بهمس تبيّن إنه عادي : عند تركي وعذبي ما يخرجون كذا ، بس مو عند ذيّاب هو ما يفهمك باقي
ناظرتها شدن لثواني من همسها لنفسها : زعلتي مننّا ؟
هزت راسها بالنفي ، وإبتسمت لثواني : لا ، بجي عندكم
إبتسمت ضي يلي لمحت الباب رجع يُفتح من جديد ، ولمحته هو : بتروحين وياه ؟
هزت راسها بالنفي من التوتر يلي حسته بأعماقها من صوته يلي وصلها مع الباب يلي رجع ينفتح من جديد يرجّف عينها هي هي تعرف إنه خلفه ، تسمع صوته هو يكلم بجواله وما تدري وش تتصرف لكن سكنت ملامحها من كان هو بنفسه رجع يفتحه ، ويفتح باب المجلس خلفها هي ما إستوعبت رجوعه ولا إستوعبت كيف رجع ياخذها معاه للمجلس من جديد وإبتسمت شدن حتى والباب تسكر ما يسمح لهم بالرؤية : ما مشى ما مشى -
'
« عند نهيّـان ونصار »
ترك نهيان كوب قهوته وهو يناظر نصّار يلي يتأمل بالناس والواضح إنه بعالم آخر بعيد عنه : قلنا وحشك ذياب بس ما قلنا تفهّي بكل بني آدم يمر ، خلاص ياحبيبي الحين نطلع متحرشين ونبتلش نزل عينك تكفى وكلمني
تنهّد نصار بحزن عميق لثواني : تدري الدباب بالفحص ؟
سكنت ملامح نهيان بعدم إستيعاب لجديته بالحزن : الحين مفهي بالناس لك ساعة وتهوجس بالدباب ؟ الإنسان يفهي يفكر بأحد يحبه يفكر بسفرة قريبة يتخيل نفسه تحت الشمس عند البحر يفكر بشيء يحرّك مشاعره وإنت تفكر بدباب ؟
ناظره لثواني من إستهانته بمشاعره ، وتنهّد من أعماق قلبه بهمس : الله يردك لحضني سالم ياحبيبي
قبّل نهيان ظهر يده : الله يشفيك ياسخيف ، صاحبك وينه بس إنتم تفهمون بعضكم
مد يده لجواله وهو يرفعه من على الطاولة : مدري عنـ
سكنت ملامحه بذهول ما كمّل جملته من كمية الإشعارات يلي واصله له من وقت لكن ما يدري عنها : يخرب بيتك يانصّار هذا وش !
ناظره نهيان لثواني : وش يخرب بيتك ليش وش صار !
ما كان يقدر يستوعب كمية الإشعارات يلي واصلته وإن كلها ملفات شغل ومستندات عرف إنها تخص ذياب وقبل يستوعب نّورت شاشته " الراعي محمد " : لا تكفى
ناظره نهيان يلي تلقائياً قام يجلس بجنبه لأنه فعلاً مصدوم : هذا محمد حقنا !
هز راسه بإيه يرجع ظهره للخلف ويرد : سم يا محمد
نطق محمد المفجوع مباشرة : العمّ ما يرد على جواله ليش
رفع حواجبه لثواني : مشغول العم ، إنت فيك شيء ؟ صار شيء ؟
هز راسه بالنفي يستحلفه بالله من قلقه : العم حاكم ما يرد والعم ذياب ما يرد حتى الصغير ما يرد ليش ما يردون بالله عليك ليش ما أحد يرد فيه شيء صار لهم صح أنا قـ
إبتسم نصار يقاطعه بذهول : مافيهم شيء والله العظيم شفيك ! يجيك ذياب ويقول لك بس الحين إنت وش فيك ناقص شيء صار شيء ؟
إبتسم بإرتياح لثواني ، وطغى السرور على لسانه : لا لا مو ناقص شيء الحمدلله ما يقصر العم ، الحمدلله ربنا زوجتي ولدت الآن جابت الولد وعمي ذياب قال إذا ولدت زوجتك روح عندها لا ترجع لكن
إبتسم نصّار وهو يتكي : مبروك ماشاءالله مبروك ، لو سميت الولد نصّار بجي الحين وإنت تروح وش تقول ؟
ضحك يضيّع موضوع التسمية ، وإبتسم نصّار : أجي الحين وتروح إنت إبشر ، مبروك ما جاك يامحمد
إبتسم نهيّان مباشرة : مبروك يا محمد سمّه نهيان
ضحك نصّار يسكر منه ، وعدل نفسه : وش تنتظر ؟
ناظره نهيّان لثواني بإستغراب : وش ! لا يكون أنا بروح
هز راسه بإيه : ما تشوف الشغل يلي عندي الحين ؟
هز راسه بالنفي هز راسه بالنفي : إنت دقيت صدرك توّ تقوله أجي الحين وراك إختلفت ! إنت تعرف إني إنسان أرقى من البر وعلوم ذياب لا رحت هناك بيمسكوني ورح يانهيان حط العلف ورح يانهيان سرّح الإبل ورح يانهيان إفعل وتبي الصدق ؟ توي مغسل سيارتي ما بروح
ناظره لثواني بطرف عينه : خلاص ياطفل بروح أنا
ناظره نهيّان لثواني : تتوقع بزعل من كلمة طفل وأقولك خلاص بروح أنا ؟ دربك خضر ياعيني روح الله يحفظك
كشّر وهو يناظره لثواني ، وإبتسم نهيان : لا تزعل يجيك ذياب ، متى ما طلع يعني
هز راسه بالنفي بهمس : هو رمى كل شيءّ علي وشكله ما بيطلع بس يمون حبيبنا يمون ، قم رجعني لسيارتي
تذكر نهيان : سيارتك عند بيتنا صح ؟ يارب إيه
هز راسه بإيه ، وطلع نصّار خلفه بعد ما رسل لذياب رسالة بإنه هو بيروح للخيام ، وبإنه بيشوف المستندات كلها وما قدر يمنع ضحكته من كانت الرسائل ما توصله : تهنّى جعل كل أيامك هنيّة ..
_
« بيـت تركـي »
مرّت ساعة على رجوعه ودخولها معاه للمجلس ، ساعة شعورها وحسبتها أكثر من الستين دقيقة بكثير كانت بالنسبة لها وله بتفاصيلها أكثر من ستين ساعة مجتمعة وكله لأنها ساعة صفاء ، ما طُرق فيها الباب ولا دخل أحد ولا حصل النداء لها أو له هو قفّل من مكالمته وقت قفل الباب خلفهم ، وقفّل جواله بأكمله لو تحترق الدنيا بالخارج ما يدري عنها ولا وده يدري وحتى هي تسمع أصوات الصخب بالداخل وتعرف إنهم يحتفلون لكن هي أساس إحتفالهم ومع ذلك مو موجودة عندهم وما يهمها وريّحت خاطرها أمها يلي رسلت لها " خذي راحتك ، كلّميه ويكلمك وإفهميه ويفهمك ولا تسمعي للبنات إنتم تتعرّفون على بعض الحين هم لاحقة عليهم " ، لأوّل مرة ما تفكر بهالشيء لأن مصيرها تطلع لهم وهو مصير جلوسه وقت قصير ما بيطوّل فيه والهيّن عليها ، إن كلهم يتوقعون جلوسهم مع بعض هو جلوس تعارف ومعرفة لكن ما يدرون عن خجلها ، ومواويله يلي أبعد ما تكون عن التعرف هو طول جلوسه ما نزلت يده عن ظهرها حتى وقت يسولف ، أو يطلبها تسولف ..
عدلت جلوسها من أبعد يده عن ظهرها يتركها على فخذه لثواني بسيطة ، وتنحنحت لثواني بإستيعاب إنها طول جلوسها ما قامت : ما تقهويت
رفع عينه لها لثواني ما إستوعب هي وش تقول ، وما قدر يمنع إبتسامته : ما قهويتيني ، ما قلت أنا لا
ناظرته لثواني هي إحترقت ملامحها من الخجل ما يتكرر بعقلها إلا قولهم إنه يقدّر الأصول وإنه يهتم لأبسط تفاصيل الضيافة والأصل فيها وعدل كتفه من لمح خجلها : لا صرت ضيف قهويني ، أنا راعي محلّ هنا ولو بغيت الفنجال أخذته من يمينك
وقف عقلها لثواني وأكثر من وقف يعدل ثوبه صار وقته مشيته ، ووقفت هي معاه لكنه هز راسه بالنفي : إجلسي
هزت راسها بالنفي لثواني من إرتباكها : بشوف الطريق
أشّر لها تتقدمه ورجعت شعرها كله لظهرها يغطيه تتقدمه ، وتمشي قبله تشوف الممرّ والباب يلي بينهم وبين باقي البيت والبنات تتأكد إنه مسكّر ورجعت تقرب من باب المجلس : تعال
دخل جواله بجيبه وهو يمشي لجنبها ، وسكنت ملامحها من مد يده لظهرها هي تحس إنه يمدها تلقائي لأنه يمدها حتى لو كان مشغول بشماغه ، أو يكلم مثل أول ويمكن عادته يمد يده على أي شيء لكن ما يدرك الشعور يلي يتركه بقلبها : تبين شيء ؟
هزت راسها بالنفي لثواني هي كانت تعاهد نفسها ما ترفع عينها لعينه لكن ضاعت معاهدتها كلها هي لو ما رفعت عينها الحين ما بتاخذ آخر نظرة منه قبل يمشي ولهالسبب بالذات هي رفعتها تترك بقلبه وصدره تعجّب هي تخجل لكنها ما تبعد عنه ومن حركتها بهاللحظة هو تذكر شيء واحد : تحدّيني ، وبعدها تستحين
هزت راسها بالنفي بإرتباك ما حسبت حسابه : ما أحدّك أنا ، إنت تبي
بعد نُطقها لهالجملة هي أيقنت إن عدم كلامها فيه المنفعة أكثر ، وتلعثمت تبرر أوّل كلامها بغير العربية لكنها إستوعبت إنها قدامه وهنا بس رجفت يدها هي ترتبك ، ترتبك إنها تغلط وهي تغلط ولمح منها إرتباكها ، وخوفها المباشر يلغيه أو يزوّده هو ما يدري : إيه أكذب لو قلت ما أبي وما أبيك وباخذك ، مثل ما أخذت الحروف باخذك لبيتي مابكتفي بمجالس أبوك
هزت راسها بالنفي بإرتعاب : بس إحنا إتفقـ
قطع كل جملتها بنظرة وحيدة منه ، وما عاد لها حروف كلام هي رجفت يدها لكن هو كان باسط يدّه لها وبعدم إنتباه منها هي حاوطت باطن كفّه من جديد : ذيـاب
ما كان منه كلام هي ما بترفع عينها له أكثر وبدون تفكير هو لاقى نفسه يقبّل جبينها لوقت طويل تذكر فيه قبلاته لخد أمّه يلي بكل مرة تشعل لهيبه بتمنيّها إن قصيد تكون مكانها لكن هو جرّب يقبلها ويدري إنه ما يكتفي يزيد لهيب نفسه فقط ولولا خجلها هو ما ينتهي ولهالسبب بالذات هو ما بيجرّب يقبّل خدها الحين لأنه ما يقدر يرجع المجلس مرة ثانية ويهز نفسه مرّتين بإنه يوصل للباب ويرجع من جديد ..
أخذت نفس من أعماق قلبها هي تعرف إن القرب مثل ما وصفته أمها حضن دافي لكن هي وهو بدون أيّ حضن يحاوطهم لهيب ماله حد وما يحاوطهم وبس هو بوسط مشاعرهم ، قبل جبينها للمرة الثانية يعلن نهاية لقاهم : لو تبين شيء قولي لي إبتسمت لثواني وقبل تطلع منها الحروف إنها تطلبه سلامته فُتح الباب يدخل من خلفه عذبي أخوها يلي صابه الإحراج مباشرة وإبتسمت قصيد : أهلين
عدل وقفته بوهقة : حيّها وحي الذيب ، ماشي الحين !
هز ذياب راسه بإيه : ماشي ، توصي شيء تبي شيء ؟
هز راسه بالنفي : أبد ما تقصر ، ما دريت إنكم هنا وإلا دشيت مع الباب الثاني ما قطعت عليكم
إبتسمت ، ورقّت نظرتها لأنه فعلاً حس بالإحراج من دخوله بهالشكل ولأول مرة هي ما تخجل حتى وذياب كان قريب منها مسافة مستحيلة ، وحتى ونظرته كانت مستحيلة وقررت تقطع إحراجها : تبي شيء إنت ؟
هز راسه بالنفي : لا ياحبيبتي خلاص ما بقى أحد وبمشي الحين ينتظروني بالسيارة ، خالي سيف جاء عندك ؟ سمعته بالمجلس يسألهم وينها قصيد
هزت راسها بالنفي ، وميّل شفايفه بإستغراب : مدري عنه ، المغاسل هنا ما عندها أحد صح ؟
هزت راسها بإيه : مافي أحد هالقسم كله ، روح عادي
توجه للداخل ، ونزل ذياب أنظاره لها لثواني بسيطة يمشي بخطوته للباب وهي معه : إرجعي داخل
هزت راسها بالنفي ، وحرّكت الريح فستانها لثواني وبلحظة وحدة تبدّلت ملامح ذياب كلها من لمح ثوب قريب منهم وشخص قريب منهم هو لو ما لفّ ، وإنتبه إنه سيف خالها ما يدري وش ممكن يصير بأعصابه وقلبه وما يدري وش التصرف يلي بيطلع منه لكن الأكيد ما يسرّها ولا يسره هو خطف قلبه عذبي وقت نطق " ياحبيبتي " ، وإن تمرّ عليها عين غريب اليوم هو ما يتحمّل ومستحيل يتحمل ..
سكنت ملامحها من إلتفاته لخالها ، والرعب يلي حسته بداية من حركته وأكتافه وهمست لثواني من فهمت سبب حركته : مافي أحد هنا ، عذبي قال مابقى أحد
إبتسم سيف يدخّل جواله بجيبه ويمد يده له : الله محييّه ، جالسين ببيت الشعر لو بتروح لهم
مد يده يصافحه : الله يبقيك ، إيه بسلم وأمشي
صعد سيف الدرجة الأولى يقرب من قصيد بهمس : أجني على نفسي لو بستك قدامه ؟ تهقين ؟
ناظرته لثواني ، وإبتسم : بس أنا خالك ، يحقّ لي
توردت ملامحها خجل من قبلّ خدها يكمل صعوده و ودخوله للداخل ، وشبّت نار جوفه : لو تبين شيء كلميني
هزت راسها بإيه وهي تمسك طرف الباب : تمام
توجه لبيت الشعر ، وما نزلت خطوتها هي لمحت غضبه وإنه من البداية أصلاً ما يبيها تطلع معاه يمكن تصادف أحد وما لها نية تشبّ نار جوفه أكثر حتى وهي تعرف كلّهم يكشفون عليها وتكشف عليهم ما باقي أحد غريب إلا إنها ما بتنزل ، أخذت نفس من أعماقها تسكر الباب خلفها ولف أنظاره للباب قبل يدخل لبيت الشعر ، لمح طرف فستانها ورجوع خطوتها للداخل وإنها سكّرت الباب وعضّ شفايفه فقط : كان دربها الجمر ، صار الجمر بجوفي أخو وخال وقف على طرف باب الشعر يرمي سلامه ويبيّن إن ماله نية بالدخول من وقوفه : توصون شيء تبون شيء ؟
ناظره تركي بذهول : العشاء جاي وين تروح ما تعشيت !
هز راسه بالنفي : خيرك سابق ياعمي ما تقصر ، الجايات بإذنه
ما كان من تركي الضغط عليه هو يعرف طبعه ، ويعرفه هو بنفسه ما يردّ أحد إلا وقت عنده شيء : يلي يريحك يابوك يلي يريّحك
كان بيوقف يودعه للباب لكن مد ذياب يده بمنع مباشر : والله ما تقوم ياعمي ماني غريب ، ماني غريب
إبتسم تركي : إي والله ولدنا مو غريب ، على مهلك يابوك
لف ذياب أنظاره لأبوه يلي كان يتأمله يسأله بنظرته لو كان يبي شيء ، وجاوب حاكم بعينه إنه ما يبي شيء ولا ينقصه شيءّ ونطق بهمس من لفّ ذياب يعطيهم ظهره بعد ما ودّعهم : استودعتك الله ..
طلع وهو يحمد ربه إنها ما طلعت معاه لأنّ أهل الكويت مثل ما يسميهم هو موجودين بالمجلس ، ولأنه من وصل البوابة الخارجية لمح تركي وفهد بالسيارة ورفع يدّه يرد سلامهم ويتوجه لسيارته : تبي تدفننّي بأرضي لو تطلع معي
-
« بالداخـل »
إبتسمت سلاف من دخلت بنتها يلي تتأمّل خاتم يدها والواضح إنّ كل الضجة والصخب الحاصل هنا ما يعنيها حتى إن إحتفالاتهم ما وقفت بالخارج هي ما تهتم لهالشي ، ما قاومت حروفها تسكّر الستارة وتبتسم : بس ممكن ترضين فضولي بموضوع واحد ؟ هو الذيب متى صار صاحب حظّ كثير تقومين معاه للباب تودّعينه ؟
ناظرت أمها لثواني وتغيّرت لغتها تلقائياً بهمس : ما أدري ، بس ممكن ما تسأليني عنه الحين عندهم ؟
إبتسمت سلاف وهي تهز راسها بإيه : طبعاً ، أكيد بس هذا يعني إنّك راح تجاوبيني لما نصير لوحدنا ، ما تتركي قلب الماما يبقى مليان فضول صح ؟
ميّلت شفايفها لثواني بتفكير : بفكّر ! ممكن بس مو أكيد
ضحكت سلاف وهي تعضّ أصباعها : لذيذة لذيذة ياماما ! كيف ما أكلك الذيب ممكن أفهم
إبتسمت لثواني ، وضحكت سلاف بذهول : قصيـد
ناظرت أمها لثواني : يعني ما أبتسم ؟ ما ينفع ؟
ضحكت بذهول من عدلت شعرها هي لمست رضاها من عينها بشكل أوضح لها من كل شيء تشوفه وهالشيء الوحيد يلي ما توقّعته يحصل بأول لقاء ، توقّعت تطلع من عنده مليانة تساؤل وودها تفهم عنه أكثر أو ودها تستفسر أكثر لكن من ملامحها ، ومن وهجها يلي ما خفّ هي عرفت إن الذيب أخذ بنتها بالهون وماجاها بالثقيل يلي يبيّن إختلافها وإختلافه عنها ..
توجهت قصيد للمرايا تعدل نفسها ، وشعرها وإبتسمت نيّارا يلي طلعت من المطبخ : تعرف إنها حلوة ، وتغترّ
إبتسمت قصيد وهي تلف أنظارها لأمها : بنت سلاف
ضحكت نيّارا : سلاف يلي ما كسر شوكة غرورها إلا ذيبك ، سلاف ليش ما دخلتي تسلّمين عليه ؟ تنحنحت سلاف لثواني : بسلم عليه مستقبلاً ليش مستعجلين ؟ أكيد بسلم عليه بالنهاية زوج بنتي يعني
دخلت ود يلي سكّرت جوالها ، وإبتسمت مباشرة : أخيراً ! تعالي بسرعة يلا ننتظرك من أوّل أنا والبنات
إبتسمت سلاف من حاوطت كفّ ودّ يخرجون للخارج من الجهة الخلفية ، وتجمّعت دموعها بمحاجرها هي حلفت ما تبكي : حلفت ما أبكي وعاهدتكم كلكم بدون دموع يمرّ اليوم بس ممكن أفهم شيء واحد ، بنتنا متى كبرت وصارت عروس ؟ متى صار قلبها لصحراء الرياض ماهو للكويت ولا لبرد لندن
إبتسمت نيّارا لثواني ، وضحكت سلاف يلي أخذت نفس من أعماقها : نطلع خلاص بدون بكي نيّارا بدون بكي
مشيت معاها يتبعون خطوات قصيد يلي وقف عقلها وخطوتها لثواني هي من ضيق الوقت ما توقّعت يحصل إحتفال بهالشكل ، ما توقّعت يتزين المكان كله بشكل هي تعرف يكون لمسات مين وتعرف حركات مين ولفّت مباشرة تدور أمها بينهم وبالفعل إبتسمت سلاف يلي طلعت من الجهة الأخرى بتتوجه لمكان الحريم وقبل يرقّ قلبها أو حتى يرجع يتملّكها الخجل وتبكي هي حست بشيء يُترك على رأسها من الأعلى وتعالت الأصوات بالثانية نفسها ما كان الشيء يلي ثُبت على رأسها إلا طرحة عروس حسّت فيها على أكتافها ، هم يستبقون الأحداث حتى بإحتفالهم وهي تخجل الحين ، تخجل ضيّعت كل عربيّة لسانها : لا تسوون كذا !
إبتسمت وسن تلقائي تقلد لغتها : بنات تهبّل ! هي تقول لا تسووّن كذا وذياب بالبر وينك ياناقتي تكفون وش هالإختلاف الحلو
ضحكت ورد وهي تشوف جدتّها علياء يلي تركت جلسة الحريم ولفّت تتأمل قصيد : أمي علياء دايخة عندها الله يستر لا تجذبها الطرحة وتقول خلاص زواج
إبتسمت توق لثواني بسيطة ، وناظرتها درة : توق كأنهم مو عاجبينك شوي ، ليه ما أعطيتي رد أو تقييم
ناظرتها ورد لثواني بذهول : وش رد وتقييم ؟ سلامات ؟
إبتسمت ديم تتنحنح : ما ترضى على زوجة أخوها يعني
هزت توق راسها بالنفي : أكيد ما بترضى ولا أنا برضى أقول شيء طبعاً ، درة قصدها تعبير يمكن بس
ناظرتها ورد لثواني بسخرية : ووش التعبير يعني ؟
ميّلت جود شفايفها لثواني بهمس : التعبير يقول إنها دلوعة ، وإنهم يحبونها كلّهم حب لو يجمع ذياب سنين عمره كلها ما يعطيها نصّه
ما كان من ورد يلي وقفت تبتعد عنهم لقصيد كلام أكثر ، وكشّرت وسن بغضب : ما أفهم يعني وش تبون بالدنيا بس تدرون ، حقّكم البيت إنتم مو وجه جيّة للناس هنا وقسماً بالله لو وحدة فيكم تنطق الحرف عنها أو عنه
ناظرتها جود لثواني : إيوه وش بتسوين حياتي ؟
عضّت شفايفها بغيض لحظي : بقول لعمي حاكم عنكم
هزت ديم راسها بإيه بجدية هزت ديم راسها بإيه بجدية : صح ، الحين إما تقولون خير أو تسكتون بالنهاية مالكم فيهم هي وهو يتفاهمون وحياتهم هم أدرى بها وإن كان هالإختلاف الشاسع يلي صادمكم بينهم مالكم دخل أبداً ولا حق الكلام أصلاً
شهقت درة لثواني : بسم الله نمزح والله شفيكم خلاص
هزت وسن راسها بالنفي : مافيها مزح ، مره مافيها حتى ورد أخذت بخاطرها بدون إستهبال خلاص
قامت توق تتوجه لورد ، وبالمثل وسن وديم يلي قامت معاهم لقصيد وبنات آل نائل وتنحنحت درة : يعني ما نقول رأينا ؟ طيب مو قصدنا إنتقاد ولا شيء إحنا فينا إستغراب كيف ذيّاب ممكن يحب ويتزوج بس كذا
إبتسمت ورد وهي تشوف بنات آل نائل يلي يرقصون ، ويغنّون حول قصيد ويتصّورون تبيّن الفرحة من ملامحهم وهمست ما تمالكت زعلها الشديد : كذا ، كذا المفروض يكون وضعهم مو كلام فاضي يقولونه
إبتسمت وسن لثواني : ووش عليك من كلامهم ما يوديّ ولا يجيب ، المهم هي وذياب وفرحتنا إحنا بس
_
« الخيـام »
نزل نصّار يسكر الباب خلفه لكن إستغرابه كان إن محمد ما حسّ بمجيئه ولا طلع من بين الخيام ، رفع حواجبه : محمـد ؟
كان سكون المكان غريب بالنسبة له ، أغرب من دائماً أو هو يهوجس بهالشيء ووقت ما وصلّ رد من محمد على نداه هو توجّس يكرر بصوت أعلى ويمشي بخطوته لبين الخيام : يا محمـد ، محمّد !
طلع محمد ركض من بين الخيام : الله يحييه !
إبتسم نصّار : أرعبتني وينك ما ترد ! تأخّرت عليك أنا بس والله ماهو بيدي كله من نهيّان
إبتسم محمد يهز راسه بالنفي : مو مشكلة ماعليه
إبتسم نصّار وهو يطلع مفتاحه يمده : لا تكلم أحد يجيك ولا شيء رح بسيارتي وخلّها عندك تأخّرت
إبتسم يتمتم له بدعوات الرّضا ، ودخل نصّار يده بجيبه لكن تغيّرت ملامح محمد يلي مد يده يقفّل جيب ثوبه العلوي من طلّع نصار يده من جيبه وعرف نيّته : لا ! والله لا ما قصّر العم ذياب الحمدللـ
قاطع كلمته نصّار وهو يبعد يده يدخل الفلوس بجيب محمد العلوي غصب وإبتسم : هدية الولد من عمه نصّار ، أدري ما تحتاج شيء بس تردّ الهدايا ؟ ما تردها
هز راسه بالنفي وهو يحني راسه لأنه لمح المبلغ يلي حطّه نصار ولو كان لفّه ببعضه يخفيه هو يتوقعه ، ويتوقع ما يجي منهم القليل : لا هذا كثيـ
هز راسه بالنفي : إنت غالي على ذيّاب وعلى عمي حاكم وعليّ أنا بعد ! وولدك الحين غالي علينا بعد وتبي ترضى ؟ عقبال ما تحط على ولدي بعد
ضحك محمد وهو يهز راسه بإيه : الله يحفظك
إبتسم نصّار يودعه ويجلس بجلسة ذياب المعتادة بالخارج أمام الخيام ، وأخذ نفس من أعماقه يتأمّل الخيام ، والمدى الواسع أمامه : إيه ومن يلوم ذيّاب بمثل هالريح وهالجلسة ؟ من يلومه
'
« بيـت حـاكم »
نزلت ورد من السيارة وبجنبها ديم يلي بتنام عندها اليوم ، وتتقدمهم ملاذ يلي تمشي مع حاكم بعد ما وصل الوقت لآخر الليّل وإنتهى وقت جلوسهم ببيت تركي ..
نزلت ديم كعبها تنحني له ، وضحكت ورد : لهالدرجة ؟
هزت راسها بإيه بعدم إحتمال لإنها تمشي فيه أكثر تمسكه بيدها : جداً ، مالي حيل شيء ودي أغمّض وأنام
إبتسمت بخفيف وهي تدخل للبيت بإستغراب من هدوئه : شكل نهيان مو موجود وإلا مستحيل الهدوء
نزلت ديم طرحتها على أكتافها : بكرة عندك دوام ؟
هزت راسها بالنفي : لا ، المشرفة قالت لي وقت أبيك بتصل عليك تجين لكن المهم جوالك لا يقفل
ميّلت شفايفها : يارب ما تتصّل عليك ونطلع الصباح لو صحينا ودي بحياة هادية بدون الباقين
ناظرتها ورد لثواني : نطلع الصباح ؟ حبيبي باقي شوي ويأذن الفجر وإنتِ ما تشوفين خطوتك من النوم
دخلت الغرفة تسبق ورد ، ودخلت ورد خلفها بإستغراب : معقول حتى ذياب ما رجع البيت ؟ وش هالتسيّب
نزلت عبايتها وهي تبدل ملابسها بأسرع ما يمكن ، وتمددت مباشرة على السرير وضحكت ورد بذهول : ياساتر كل هذا نوم ؟ مو معقول طيب تقهوي معي
هزت راسها بالنفي ، وكشّرت ورد : بنزل لأمي أصلاً
عدلت ديم مخدتها وهي تأشر لها بمعنى بكيفك ، وضحكت ورد يلي توجهت للدولاب تبدّل ملابسها وإبتسمت وهي تسمع صوت ذياب : جاء ذياب !
عدلت ديم اللحاف تغطي حتى وجهها : سكري الباب
كشّرت ورد لثواني طويلة : ديم مو منجدك جاية معي وتبين تنامين على طول ؟ ليش كذا طيب بس شوي
رفعت وجهها لها لثواني : شوفي عيوني بس دقيقة
ميّلت شفايفها بتنهيدة : نامي يا مُملة نامي
ناظرتها لثواني بتوسّع : ورد وش تبين أكثر رقص ورقصنا ضحك وضحكنا صراخ وصارخنا وكل شيء سويناه
أشّرت بيدها بإستعطاف : كوب قهوة واحد ؟ بس واحد
تنهّدت ترجع اللحاف على وجهها : سوي وتعالي ، بتقهوى معاك وبعدين نوم كلنا بدون سهر أكثر
إبتسمت وهي تطلع من عند ديم ، وتوجّهت لغرفة ذياب المتمدد على سريره لكن باقي بثوبه : بتروح مكان ؟
عدل جلسته لثواني بسيطة : تعالي ، بمشي الحين
إبتسمت بخفيف : ليش أحس تعالي ما تعنيني شخصاً إنما عشان شيء ثاني ؟ بس بالمناسبة جيت بعطيك رقم قصيد بما إنك ما كلفت نفسك تطلب رقم البنت يعني
رفع حواجبه لثواني ، وإبتسمت : ما قاومت نفسي وسألتها ذياب أخذ رقمك وإلا لا وقالت لا ، بالقوة طلعت منها لا لو تدري خجلت خجل مو عادي هذا وأنا ورد
كتم إبتسامة داخله بهدوء ، وهز راسه بإيه من طلعت جوالها تعطيه رقمها لكن هو داخله يرددّ رقمها قبل تنطقه من حفظه لها ، ناظرته لثواني بإستغراب : سجّلته ؟
هز راسه بإيه بهدوء ، وكان منها الشك لأنه بثانية فتح جواله وقفلّه : وريني
عدل كتفه بهدوء ينطقه لها ، وسكنت ملامحها لثواني : بسم الله ماشاءالله كيف حفظته بهالسرعة ؟
إبتسم بهدوء : ورد جوفك فيه شيء ، قولي لأني بمشي
إبتسمت بخفيف وهي تجلس بجنبه : قلت ما بوريك شوي بس بما إني عرفت ما أخذت رقمها ، بوريّك يمكن تصحصح وتعرف تتصّرف بما إنها صارت زوجتك يعني
ناظرها لثواني ودخلت على سناب قصيد يلي كانت أوّل صورة لها ، صورة خاتمها بجنبه كرت يُكتب به " تستاهلين الدنيا ياحلوتنا " وتحت إسم أمها وأبوها وإبتسمت ورد : تذكر وقت رحت دبي ؟ وكنت بقولك على شيء هي تبيه ؟ كانت تبي هالخاتم وشوف الحين
سكن قلبه لثواني لأن هو فكّر هي وش تبي وقتلته الحيرة بدبي هو كيف يعرف وش بخاطرها بدون لا يسأل ورد وبدون لا يبيّن لأحد وآخر حلّ توصل له هو إنّها وقت تصير له ، ياخذها هي بنفسها لدبيّ ولأي مكان بالدنيا تاخذ كلّ شيء تبيه ولا يقول لا ، ولا تطلع منّه ..
لعبت بأعصابه من مررت لصورة أخرى يدّها هي تحاوط يد أبوها وملاحظته كانت على القلب الأبيض يلي تحطّه بكل صورة وإبتسمت ورد : تعرف إنها تسميّ كل شيء بلون ؟ أمها وأبوها أبيض دايماً مستحيل تصّور عنهم وما يرافقهم هالقلب بالتحديد
ما كان منه كلام أكثر يعدّل أكتافه ، وإبتسمت : بغيّر مكان قلبك شوي ، ممكن تتأمل معي ؟
كمّلت للصورة الأخرى ، وسكنت ملامح ذيّاب كلها كان طرف وجهها ، رموشها ونصف عينها يلي تبيّن نظرها للجهة الأخرى ، خدّها ، شعرها ، والطرحة يلي ماسكتها هي وتغيّرت ملامحه حتى لو يبي ينطق ما يقدر ..
إبتسمت ورد هو حتى حروفه ما عاد تطلع منّه : لبّسوها الطرحة ، وراقصوها ، ودللّوها بشكل ما تتخيله لدرجة أمي عجزت تتكلّم تدري وش تسوي ؟ وقفت بزاوية تحصّنها وأمي علياء قالت الطرحة ولبستوها هاتوها يروحون بيتهم
ما كان منه كلام أكثر وهو يرفع يده لحاجبه ، وضحكت ورد تقفّل جوالها : ودي أوريك أكثر بس بعدين ، بتمشي
هز راسه بإيه وهو يوقف : بمشي ، وش الأكثر ؟
_
صعد نهيّان من الأسفل ركض من حسّ بوجود ورد بالبيت ، فتح باب الغرفة وهو يتنهّد : من غيرك عليّ إنتِ ؟ متى صرتي تدخلين الغرفة وتنامين ما تجيني ؟
فتحت عيونها بذهول هي تسمع صوت نهيّان ما يتهيأ لها ، ما تحركت الحركة يمكن يهّون ويطلع من الغرفة لو شاف نومها لكن سكن قلبها من سمعت صوته قريب : لا تسوين لي نايمة ما بتنامين والله
ما تكلّمت هي حتى نفسها إختنقت فيه من التوتر ، وبردت ملامحها من قرب يتمدد بالسرير جنبها ، إبتسم : زوّجيني والعروس علي ما يحتاج تدورين
مد يده من تحت اللحاف يدور يدها وحركت ديم جسدها برعب للجهة الأخرى هي مو قادرة تقول كلمة وبالوقت ذاته ما تقدر تسوي شيء من التوتر هي تسمع صوت عمتها ملاذ وما تدري مكانها وين هي قريبة منهم أو بعيدة ، كتمت شهقتها بذهول من قدر يمسك يدها يجذبها بقوة حتى وهي كانت تبعد عنه ونطق بشبه حدّة : يعني عادي تطيحين من السرير بس يدي ما توصلك تستهبلين ؟
ما نطقت الحرف من الرعب يلي تحسّه ومن النّار يلي أُضرمت بيدّها من يده يلي تحاوطها ، مستحيل يطلع منها حرف هي ترتعب بشكل ما يتصّوره حتى هو ومستحيل تفضح نفسها إنها ديم لكن ما خطر ببالها تقول مو ورد وتنتهي وهو ما سمح لها مجال أصلاً صار يسولف : رفعت صوتي واجد يارب أبوك ما سمعني يهدّ حيلي الحين ليش ترفع صوتك على أختك
رفع حواجبه من عدم ردّها لكنه بيحثّها على الكلام حتى لو كانت تمثّل نومها وإبتسم لثواني وهو يتمدد : ماعليه إسمعيني الحين ، ترى العروس عندي وأبيها
ما كان منها رد لكنّها حركت جسدها هي ودها تبعد ، لكن نهيان أخذّ هالحركة إشارة إنصات منها وكمّل : دربها إنتِ بتورينه أمي ما بقول لها شيء أنا بتقول من وين تعرفها وكيف تبيها وليه ما بيننا وبينهم علاقة وشلون
سكنت ملامحها لثواني هي تتمنى يمزح ، يقول كلام غير وحاولت تفكّ يدها لكنه شد يكمّل : صاملة ما بتردين يعني نايمة بس بعطيك العلم وإنت تتصرفين
سكن قلبها من حسّت إبتسامته بحروفه ، بكلامه عنّها : دربها إنتِ بتورينه أمي ، لو قلت لها أنا بتقول من وين تعرفها وكيف تبيها وليه ما بيننا وبينهم علاقة وشلون جات ببالك بس هي إخت خوييّ وأعرفها
ما كان من ديم يلي سكن كونها كلّه كلام ، ولا حتى حروف بسيطة وإبتسم نهيّان يترك يدها وحسّت بثقله يُزاح من على السرير يبيّن وقوفه ، أخذت نفس من أعماقها الأكيد إنه بيمشي ما بيقول كلام أكثر لكن نهيّان كان له رأي آخر ، رفع يده لشعره يعدّله ولأنها ما تردّ عليه بيكمّل حتى لو يرمي جمرة بجوفها من الفضول : دايم موجودة بالمباريات ، ما كنت أدري إنها أخته بس لها مكانها بالمدرّجات ودايم عيني ما تجي إلا عليها ، والإحتفاليات ما تجي إلا قدامها ويمكن ، يمكن إنيّ طحت ومحد سمّى علي بمباراة وقت توسّدت الأرض من الألم وضاع كله لأنها وقفت بأولّ ما طحت تتوقعيني ما شفتها ؟ لا شفتها وياحظّها وإلا من متى نهيّان يميّز أحد إنكتمت ، من حبسها لنفَسها ومن كلامه يلي مهما حاولت تقول إنه يستهبل هي تعرف أحوال إستهباله وتعرف جدّيته ، أخذ نفس يتنحنح بخفيف : ما هقيتيها صح ؟ما هقيتها من نفسي أنا بعد يطيّحني الملعب وتطيحني إنبراشات لكن ما تطيّحني عين بنت ، لكنّها طيّحتني والله يعزّ دمك ياحاكم ولدك يطيح واقف تجيبها له ليه ما تجيبها ، وإنتِ لا عاد تكلميني دامك ما ترديّن
طلع يسكر الباب خلفه بدون مقدمات ، ورفعت اللحاف عن وجهها مباشرة هي ترتجي النفس ، وكثير البرد بعد الحرّ يلي صابها هي حتى ملامحها تغيّر لونها ، ما تدري وش صار بقلبها وصدرها وعقلها يلي قررّ يزوّد وما يرحمها " وتعرفين إنيّ نهيان ولد عمك وما تناديني " رجّع لها هالذكرى ، وسكن كونها وخيالها كلّه لوهلة " من متى نهيّان يميّز أحد " وبالفعل هي بنت عمه ، وكانت وراء ظهره لكنه ما ميّزها ولا عرف من تكون وهي وراء ظهره لو ماكان جوالها ، وما كانت صورة أبوها هو ما خطر على باله من تكون هي أصلاً وللآن هو ما يعرف هي ديم أو درّة هو ما يميّز ، ما يميّز لكنه ميّز بنت المدرجات ..
رجفت يدها تتوجه للحمام مباشرة - الله يكرمكم - هي حتى لو رمت أبرد الماء على ملامحها بهاللحظة ما يخفّ إحتراقها ، ما تخفّ حرارتها وسكنت ملامحها من يدّها يلي قبل دقائق بسيطة كانت بوسطّ كفه حتى لو هو ما يدري إنها ديم هي تدري ، تدري إنها يدّها وتدري إنه يدّه والأدهى هي تدري إن عينه وقلبه عند وحدة أخرى وأخذت نفس من أعماقها هي تردّ دموعها لوسط عيونها مو منه ، إنما من الشعور المقرف يلي إرتمى بصدرها هي ودها تقطع يدّها كلها بهاللحظة ما تغسلها وبس وعضّت شفايفها بغضب تحاكي دموعها يلي صارت أثقل من حجر بعيونها : لا تنزلين ! لا تنزلين ياويلك مني لو تنزلين ياويلك
_
رجّفت كل قلبه من كل شيء هو ورّته له ، أكدّت له مقولة أمها إن بنت الشاعر ما ينشبع منها شوف هو كان عندها ، وقبّلها ، لمس معصمها ، وما فارقت يدّه ظهرها لكن الحين وقت ورّته ورد من جديد هي رجعت أوقدت به لهيبه ما هدّته ولا طفّته ووقف بعدم إدراك يجهّز أغراضه من تكت ورد على سريره تدور شيء آخر توريّه وإبتسمت من كان مقطع جديد وصورة جديدة من ودّ ما تحمّله قلب ورد نفسها وما تدري وش بيصير بقلب أخوها : تعال شوف مستحيل ذيّاب مستحيل !
رفع أنظاره لها لثواني من وقفت هي بنفسها تتوجه له بجنب دولابه ، وتغيّرت حتى نظرته من كانت صورة لقصيد وبجنبها أحد يحاوطها ، وقف قلبه من الثوب يلي بجنبها : هذا من !
رفعت أكتافها بعدم معرفة وإبتسمت : أكيد عذبي أخوها ، الصورة مو مهمة لكن هنا المهم شوف
مررّت للمقطع الثاني وسكنت حواسّه كلها هو الواضح إنه فيديو عفوي وبينهم لكن هو ما مرّ عليه عادي ، هو ما مرّ عليه عادي نهائياً هو لمح الثوب ، ولمح يُد تُمدّ لها وجمرة رُميت بصدره مباشرة من هي مدّت يدها تمسك هاليد هو يدري بنعومة لمستها وسكن قلبه يشد على ثوبه يلي بيدّه من دارت هي ودار فستانها حولها وكونه كلّه دار معاها هو يعرف دلالها حتى من خطوة كعبها ووقت إنتهى دورانها هذا بحضن مع راعيّ الثوب هو ما عادت له قدرة تحمّل حتى لو هو أبوها ، إبتسمت ورد يلي إمتلى داخلها حب : أحبها هالبنت والله أحبها ، هذا عذبي صدقني حركاته ولو إن قصيد دايم تقول ما يحبّ كذا بس شكله صار يحبّ لجل عينها ، وكيف ما يحب ؟
عدل أكتافه هو لو ركّز شوي بالشخص يلي معاها مو فيها بيعرف من يكون لكنّه يغلي الحين ما بيركّز بشيء : من يشوف معك ؟ يعني من يشوفها هي
ضحكت وهي تهز راسها بالنفي : بنت عمّتها مصورته ، وأتوقع رسلته لي أنا ولقصيد نفسها بس مو عام
هز راسه بإيه ، ولمحت إن ردة فعله مو مثل ما كانت تبي إنه يعرف دلالها ويدللّها معاهم بنفس هالمستوى وإنها تُعامل مثل الأميرات ما تعامل بشكل عادي ، ما يقربها لكن من صدّه وإحمرار ملامحه وحتى آذانه يكمّل تجميع أغراضه هي عرفت إن ردة فعله عكسية مو مثل ظنّها ، تنحنح لثواني وهو يسمع صوت جواله يرّن ، وتوجهت ورد للسرير لكن وقفت خطوتها لثواني : نصّار
هز راسه بإيه وهو يوقف : إفتحي
سكنت ملامحها لوهلة بعدم إستيعاب لكن تداركت وضعها تفتح ، وتتركه على السبيكر وتوجهت للباب لكن وقفت خطوتها من صوته المتغيّر : ذيـاب
سكر شنطته وهو يوقف للدولاب لكنّه وقف بإستغراب : سـم شفيك
رفع يده لجبينه لثواني : جاي إنت ؟ وإلا باقي بالبيت
توجه للجوال مباشرة يلغي السبيكر ويرفعه لأذنه ، وأشّر لورد تكمل تجهيز أغراضه : ما بعد طلعت وش هالصوت ؟ الهواء قوي
رفع أكتافه بعدم معرفة : مدري يمكن ، إنت جاي وإلا وينك الحين بس عادي لا تخاف مافيه شيء
رفع حواجبه لثواني هو يلمس بصاحبه قلق ماله حد ومن محاولاته للإنكار : نصّار وش صار !
رفع أكتافه بعدم معرفة كأنه يشوفه ، وتغيّرت ملامح ذياب كلها من الضربة يلي من أقوى ما يكون وصله صوتها ونطق بذهول : ولـد ! وش هالصوت ولـد !
سكنت ملامح ورد بذهول من أخذ مفتاحه وحتى أغراضه ما عاد يبيها وما نطق إلا بكلمة جايّ يكررها بقلق أرعبها هي يجبرها عالسؤال : وش صار !
ما لحقت تاخذ منه حق ، ولا باطل من قال ولا شيءّ لكنه نزل يركض للأسفل وبقت أغراضه بيديها مستحيل ما صار شيء على هالرّعب يلي حصل ، على ملامحه يلي تبدّلت بهالشكل ومن نبرة نصّار الأولى مستحيل ما صار شيء مستحيل ركب سيارته ركض وهو يسمع صوت نصّار يقطع كل شوي وما يفهمه وش يقول لأن الإرسال مستحيل يثبت عند الخيام يزين ساعة ، ويشين عشر : نصّار !
سكنت ملامحه بذهول من هياج الخيول يلي يشوفه قدام عينه ، والإبل يلي ما يحسب حسابه ولا يعرف يتصرّف معاه نهائياً ويتوتر هو ، يتوتر ما يعرف حتى يقفّل البوابات عليهم ورجع يستوعب نفسه : ذيـاب تسمعني ؟
حرّك بأسرع ما يكون من عند البيت وهو يتوقّع من صوت الضربة إنها من الخيول ماهي من بشر : أسمعك عندك أحد سيارتك عندك ؟
رفع كتفه يثبّت جواله لأذنه ، ويحاول بكل ما أعطاه الله من قوة يسكر البوابات يلي جرّحت يدينه برعب : ذيّاب ما تهدأ ذياب ! ترفس ما تهجد ولا أدري وش ثوّرها بتطلع
قبل يلعن ، وقبل يشتم رفست البوابة يلي هو أمامها بكل قوة رجّعت خطوته هو للخلف تطيّح جواله منه ، وإنحنى ياخذه لكنه إبتعد مباشرة عن مسارها هو مصدوم ما عاد يترتبّ حتى كلامه من صار الغُبار بالجو بثانية وحدة من كُسرت البوابة كلها ما عاد يحبس الخيول شيء ، ولا عاد يحبس الإبل نفسها شيء هو ما يدري وش يقول وتغيّرت ملامح ذياب هو يسمع شتائمه ، ويسمع سخطه وصوته المرعوب ينطق " أخو ذيّـاب " وهنا وقّف كل عقله هو ما طلعت منه هالجملة بنبرة الذهول إلا وهو ما يقدر أكثر : نصّار إبعد عن مداها لا توقف بينهم بس إبعد
_
« بيـت حاكم »
طلعت ورد مخطوفة الملامح من غرفة ذيّاب هو ترك كل أغراضه لجل يلحقّ نصار ، وسمعت صوت سيارته يلي طلّع أبوها نفسه من غرفته : ذياب مشى !
هزت راسها بإيه ، وطلعت ملاذ خلفه من المكتب لكن حاكم عضّ شفايفه من غضبه : ما قلت لك محدّ يبكي سيارته مثل ما يبكيّ السيارات ولدك ؟ ما قلت لك هالصوت ما يجي إلا من وراء ذياب وتقولين لي نهيّان !
ما تكلمت ملاذ نهائياً لأنها سمعت الصوت وأرعبها هي لكن ما ودها ترجع تشتعل شرارة الغضب بينهم ، أشّرت لورد بالسكوت ولف حاكم أنظاره لها : ما تدرين وين راح
هزت راسها بالنفي مباشرة ولو إنها تنحرق من التوتر هي ودها تقول إن صوت نصّار ما كان عادي ، وإن خوف ذياب ما كان عادي وطلع جواله من جيبه مباشرة يتصل عليه ويرجع للمكتب ، مسكت ملاذ بنتها مباشرة تدخل للمطبخ تسكر الباب خلفهم : وش صار ليش طلع كذا
رفعت أكتافها بعدم معرفة : نصّار إتصل عليه ، مدري لكن صوته ما كان عادي لازم تقولين لأبوي عشان يشوف
دخل نهيّان المطبخ ، وقبل يتكلم سكنت ملامحه من رعب ورد وملامح أمه : وش صار ذياب وين راح
رفعت ورد أكتافها بعدم معرفة : مدري
هزت ملاذ راسها بالنفي ما تبي القلق يسري بينهم : أكيد عنده شغلة يحلها ويرجع ، ورد سوي قهوة بجي عندك بس بشوف أبوك أول وطلع نهيّان خلفها لكن ما أبعدت خطوته من وقف بإستيعاب إن ورد بالمطبخ : بنت ! الحين لك ساعة مسوية نايمة وما تردين عليّ والحين بتسوين قهوة ؟
ناظرته لثواني بذهول هو متى جاها ومتى مثلّت النوم ، وسكنت ملامحها مباشرة : ما رحت غرفتي إنت صح !
هز راسه بإيه إنه راح : رحت وأكلمك وش العباطة يلي فيـ
ما كمّل جملته بإستيعاب من لمح خواتم يدها ، وإنه هو كان مستغرب أساساً إن اليد يلي مسكها كانت أصغر وغير عن يد أخته يلي تعوّد مسكها لكن ما كان منه الشك وقتها هو توقع بسبب إنه شد على يدّها وضغطها يغيّر حجمها بيده لكن ما طرى بباله لو واحد بالمية تكون يد غير عن يدّ إخته ، لفت من سكون أخوها وما تدري ليه حسّت إن عالمه وقف : نهيّان ؟ ردت عليك هي وإلا
هز راسه بالنفي ، وإبتسمت تريّحه وتريّح نفسها : نايمة أجل ، لأنها رجعت تعبانة ما تدور إلا النوم وإذا نامت
وهي تعبانة ما تعرف يمينها من يسارها لا تخاف أكيد ما حسّت عليك
ناظرها لثواني ، وقبل يطلع من المطبخ هي لفت أنظارها له : تجلس عندنا ؟ بتجي ماما الحين
هز راسه بإيه وهو يسحب الكرسي ويجلس ، ولفت أنظارها له من كان يناظر يده لثواني طويلة ونزّلها بطريقة غريبة يتركها تحت الطاولة على فخذه من توتره : يدك توجعك ؟
هز راسه بالنفي وهو يعدل أكتافه ، وردّ كل حروفه الأكيد إنها نايمة ما سمعت كلامه ولا سمعت من يكون لكن ما كانت ردّته لحروفه طويلة : مين
ناظرته لثواني بإستغراب : مين مين ؟
تنحنح ، وإستوعبت إنه يقصد ديم لكنها ما بتجاوبه لكن نرفزته كانت أسرع من صمتها : من يلي بالغرفة إخلصي !
ناظرته بذهول : لا أعطيني كف ؟ نهيان سلامات ؟
ما تكلّم هو يضغط على أعصابه قد ما يقدر ، وما حسّت بضرورة معرفته إنها ديم : بنت عمي فزاع
طلع من المطبخ مباشرة لغرفته ، ورفعت حواجبها بإستغراب تترك كل شيء من يدها وتتوجه لغرفتها يمكن ديم مو مثل ظنها نايمة ويمكن روّعها نهيان لأنه يتوقعها هي لكن المريح إنه ما شافها وإلا ما كان صُدم هالقد إنها صاحية وهنا قدامه ، فتحت طرف الباب وهي تشوفها نايمة ما يظهر منها شيءّ وهذا الظاهر كان لورد لكن تحت اللحّاف ، كانت نار ما تُطفى من ألف شعور بصدرها هي وافقت ترجع مع ورد لأن البنات يبونها تجي معاها وأجبروها ، يبون ياخذون بخاطر ورد ، ويحتفلون بتطبيقها وإن ديم تكون معاها لجل تعرف وضعها من داخل البيت وتجهّز معاهم لكن الحاصل إن صارت لها كسرة بوسط خاطرها ما تُجبر ، ما تتوقع إنها تُجبر ولا يزول أثرها ..
نادتها ورد لثواني للإطمئنان : ديم صاحية ؟
ما كان منها حراك ، ولا كلمة ورجعت ورد تسكّر الباب وتنزل للأسفل من جديد نزلت للأسفل لغرفة نهيّان يلي شغل السوني وأخذ اليد له وما تكلّمت لأنه مد يده للسماعات يشبكها وهي لو تعرف شيء واحد عن أخوها هو إنه وقت يتهرّب من شيء ما يكون إلا بغرفته ، يقفّل كل أنوارها وما يُرى منها ضوء إلا ضوء السوني وشاشاته ورفعت حواجبها لثواني لأنه ما حسّ حتى بدخولها لكن قبل تقفّل الباب هو نزل سماعته عن إذنه وراسه يتركها على عنقه يلتفت لها : هي نفسها يلي بكت بالشارع ؟
ناظرته لثواني ، وما يدري ليه يحس بجمر بقلبه إنه مسكها وإنه إستوعب حركتها هي كانت تبي تبعد عنه وكانت الطيحة أهون لها من يده : ليه تبي تعرف
ما كان منه كلام ، ومد يده للسماعة بيرجعها لإذنه لكنها رميت " إيه " ، وطلعت تسكّر الباب خلفها هي ما بتتجادل معه وهو غريب عليها لهالقد ، وهو ما بيقول لها كلمه حتى لو حاولت ورجع جسده للخلف يكلّم صاحبه ويبدأ لعبته : إدخل
_
« الخيـام »
جحظت عينه من هول المنظر يلي حصل قدامه ، من الثوران يلي ما قد شاف مثله ثّور حتى تراب الأرض حوله كانت الخيول تصهل ، تركض وتتشابك بينها يسمع صوت تضارب حوافرها قبل ما تُكسر البوابة نفسها ، الإبل صار هديرها يرعبه بين إثنين طرح أحدهم الآخر وما يدري هو قتيل أو لا لكن يلي يدري به كانت دقائق عصف ما يستوعبها عقله وما عاد يستوعبه من صارت الأرض حوله جثث ، جثث كل الإبل وكل الخيول ترتمي على طول المدى قدامه ما كأنها كانت تركض توّها بكل جموحها ، ما كأنها جمحت توّها كلها تكسّر كل البوابات ما يردّها حتى هو ، هو يفزّ داخله مع ركضها ويحاول ، يحاول يفهم كيف يمسكها ويردّها عن البعد الأكثر وإنتهى كله من صار وقوفهم تهاويّ ، من صار جموحهم خمود تامّ هو ما يستوعب عقله ثورانها بالبداية ومستحيل يستوعب تهاويها واحد وراء الآخر على طول المدى أمامه ، تناحرت الإبل قدامه ، وطاحت كل الخيول قدام عيّنه بشكل مرعب لو سمع عنه ما يصدّقه والحين عينه ما تستوعبه ولا حتى عقله ..
نزل ذيّاب من سيارته مباشرة هو حرق سيارته بالسرعة وحرق قلبه وعقله كلّه من رعبه على صاحبه مو على شيء آخر : نصّـار ! نصّـار
رجف قلبه وهو يشوف كلّ حلال صاحبه ميّت قدامه لكن ذيّاب ما كان إهتمامه هنا بهاللحظة هو برد قلبه من منظرها ما إستوعبه لكنه يركض بينهم مثل المجنون يدور صاحبه : نصّـار !
لمحه بالطرف الآخر ومباشرة ركض عنده يمسكه ، يتأكد إنه بخير لكن عينه الجاحظة كانت تبيّن العكس هو قبّل رأسه مباشرة من رعبه ومن إنه لمحه بخير هو ما يهمّه كل شيء باقي : كلها فدا رأسك ! كلها فدا راسك تكفى هز راسه بالنفي ، برفض قاسي مرتعب : كلّها راحت ! ذياب كلها راحت ما مسكت منها شيء ما ردّيت عنها شيء كلّها ماتت !
هز ذياب راسه بالنفي يشد على كتفه : يجي بدالها ألف ! بدالها ألف إنت بخير والباقي ما عليه حسوفة تكفى
كان يعنيها ، حلاله يتعوّض وكل شيء يتعوّض ولو راح نصّ عمره الحين ما يهمه كثر مايهمه إن صاحبه بخير ، شدّ على كتفه لثواني طويلة وهو يرجع أنظاره للخلف لثانية وحدة ويردّها لصاحبه أمامه ، ما وده يبقى نظره وراء ، ما وده يستوعب ولا وده يعقل شيء من المنظر خلفه هو ودّه يتطمن على صاحب عمره أول ، ثم الباقي كلّه تباعاً حتى ولو كان شديد الجرح توسّد قلبه الحين من قليل الإستيعاب وظنّه تتجرح كل عروقه لو حصل له كامل الوعي ..
طلّع مفتاح سيارته من جيبه وهو يفتح باطن يدّ نصار : هاك ، إرجع الرياض الحيـ
سكنت ملامحه بمقاطعة ما شدّ على المفتاح : وش إرجع ! وش إرجع مجنون إنت والله ما رجعت ما تحركت مكان إلا ورجلي على رجلك ما بتجلس هنا والله ما بتـ
ناظره ذيّاب لثواني يقاطع حروفه بنظرته وبالوقت ذاته هو ما وده يشدّ عليه ، ما وده يقول شيء لكن رعب صاحبه أكبر من إنه يتركه يرجع يتفقّد حلاله قدام عينه ، لو بقى نصّار جنبه هو بيقيدّه ما بيطلع منه التصرف لأنه لو لمح ذرة حزن ، ذرّة من حزن بعينه بينتهي كون نصّار كله لأنه يعرف وش يعني له حلاله ولأن عين نصّار للآن جامدة ما ترمش من قو ذهوله وصدمته والشعور الفضيع يلي يسكن ضلوعه لكنّه عدل وقفته : الله أكبر وقت الحقّ ، صلّينا
هز نصّار راسه بإيه وهو يتوجه للمواضئ ، يزيل رهبة الشعور عنه والموقف يلي حرق عينه من قوته ببرودة الماء هو وده يغسل ذاكرته ماهو عينه وملامحه بس ..
رفع ذيّاب صوته بالآذان بطول المدى كله يعدل وقوفه ، ما رمشت عينه يتأمّل حلاله على مد نظره لكن ما يهمه الحين ، مدّ شماغ لنصّار بهدوء : تلثم به عن الهواء
ما كان من نصّار نظر ، ولا كلمة إلا إنه مدّ يده ياخذ الشماغ يتلثّم به مثل ذياب يلي بدأ يقيم الصلاة ، ويكبّر " الله أكبر " للصلاة ، والله أكبر من حرقة جوفه يلي تمكّنت منه على أرضه وماله وحلاله بدون مقدّمات هو إن قدر يداري قهره ويخبيّه عن صاحبه ، وإن قدر يبني حصون منيعة حول مشاعره تتركها تبقى بقلبه ما تُرسم على ملامحه أو تصرّفاته ، وإن عزز حصّونه بلثام شماغه يلي لفّه حول راسه بعشوائيه وكل ملامحه ما يطلع منه إلا عيونه أصل اللثام عن الهبوب والتراب ، وعن عين صاحبه إلا إنه وقت نطق بالله أكبر وتوارى عن كلّ شيء هو ما يخفي نفسه عن ربّه ، نطق الله أكبر وإن توارى عن عين كلّ مخلوق هو ما يتوارى عن عزّته وجلاله وإن بنى أشدّ الحصون وأمنعها ..
سلم ، بعد ركعتين طال سجوده بآخر ركعة وطالت دعوته " السلامة ، يارب السلامة " ، أخذ نفس من أعماق قلبه وتمتم نصّار : يجي بدالها ألف ، والله لا أجيبها لك لو الراس بمليون
إبتسم ذيّاب يفك لثامه : معك مليون ؟
ناظره نصّار لثواني ، وضحك يغطي وجهه ويتنهّد من أعماقه ذياب ما إبتسم بهالطريقة إلا يخفف من وطأة الموقف عليه ، وقف يشد على كتفه وقبل ينطق بكلمة سكنت ملامحه بذهول : لـزام !..
- للكاتبة : ريم الاوطان🇸🇦
أنت تقرأ
انت الهوى ، كل الهوى برد ولهيب🤎
Romance- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...
