أنت تقرأ

انت الهوى ، كل الهوى برد ولهيب🤎

Romance

- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...

#الاوطان #بر #حب #دلال #ذياب #روايات #ريم #سعودية #شعر #قصر #قصيد

البارت ٥٢ و الاخير🤎

15.8K 317 113

بواسطة rwaiahh6

بقلم rwaiahh6

-
'
مسح حاكم على جبينه لثواني : ويحفظكم يابوك ، ويحفظكم ، تمشي معي شوي ذياب ؟
هز راسه بإيه بإستغراب وهو كان راجع بيجلس بجنب قصيد اللي تنحنحت : بجهز الفطور ، تفطرون عندنا
هزت ملاذ راسها بالنفي : ولا تسوين ولا شيء أمي ، ماشيين حنا بس قلنا يشوف ذياب اللوحة معنا وأبوه ما شافها بعد وجات كثيرة على قلبه ، كثيرة بالحيل
إبتسمت قصيد تشوف ظهره ، وظهر أبوه اللي مشى معاه يبتعدون عنهم : كثيرة لأنه يحب أرضه ذياب ، يحب الخيام ، ويحب أهله أنا ما شفت مثله لنهيّان الله يرحمه ، ولكم كلكم الله يخليكم له ، ولنا
هزت ملاذ راسها بإيه تغرق عيونها بالدموع ، وإستوعبت قصيد بهمس ترجع نظرها لذياب وأبوه : ويحب أبوه
رفعت نظرها تبتر المشاعر التالية اللي صارت تداهم داخلها : تسلم يدك عمتي ، ما شفت بحياتي أحلى وأدق منها تبارك الرحمن نغلّف يديك بالذهب عليها !
ضحكت ملاذ توقف تتدارك دمعها ، تمسك ذراع قصيد بمحبة : الله يسلمك ويحفظك ياحبيبتي ، على اللي صار اليوم قصيد
إبتسمت قصيد تتجاهل ، ولا تبي الطاري حتى : الحفل ؟ تكلّفتوا كثير عمتي ما كنت أبي إلاّ جيتكم ، وشوفتكم وزي ما يقول ذياب تفرحون بنا ، وتفرحون لنا ما نبي أكثر الله يحفظكم ويخليكم
-
كانت الخطوة تتبع الخطوة بالصمت ، ما عرف حاكم يتكلّم ، وسكت ذياب نفسه لأن ما عنده شيء يقوله وهو يحس باللي بداخل أبوه ، الأسى ، الأسف ، الندم ، كلها مشاعر يحسّها لكن ما يبيها ونطق يبتسم بهدوء : أدري إنك بتحب ولدي ، أو بنتي بالحيل أبوي
سكت حاكم يحس داخله يتقطّع وللأسف ، هو يفهم ليه ذياب نطق هالجملة بالذات ، لأنه ما يبيه يتحسّر على ولا شيء : ما أغلى من الولد ، إلا ولد الولد يا ذياب
هز ذياب راسه بإيه ، وإبتسم حاكم يشتت نظره لثواني : سمعتك اليوم تسولف إنت ونصّار تقول له كلهم خير وبركة لكن ودّك بالبنت ، خاطرك يبي البنت بالحيل
هز راسه بإيه يبتسم : البنت بتجي مثل أمها
ضحك حاكم يهز راسه بالنفي : لأن البنت توجب اللين ، والولد يوجب الشدة هذا اللي شفته معك ، ومع ورد
ناظره ذياب لثواني من لمح عيون أبوه ، نظرات أبوه وهز راسه بالنفي بذهول : ولا طرت علي ولا فكرت بها أبوي
ناظره حاكم لثواني ، ونطق ذياب ما يصدّقه : أبوي !
هز راسه بالنفي يسمع صوت ملاذ ونداها : يلا حاكم
توجهت قصيد لهم رغم إنها تتوقعها خطوة خاطئة لكن باقي شيء هي تبيه ، باقي شيء بداخل ذياب هو يبيه وإبتسم حاكم يلّم شتات نفسه لأن ذياب سكت ، ما عاد نطق الحرف : حي بنتي ، راحت عمتك ؟
هزت راسها بإيه تدخل تحت جناح ذياب اللي شرّع يده لها تلقائي : مستعجلين مره ، وش فيها لو جلستوا تفطرون عندنا اليوم عمي ؟ ما نلقاكم كثير
إبتسم حاكم وهو يتماسك شعوره بالقوة : تعبتوا يابوك لازم ترتاحون ، والأيام طوال إن شاء الله الجايات أكثر
إبتسمت تحس نظرات عمها لذياب الساكن تماماً ، الساكت بشكل " فضيع " ومن تنحنح حاكم : نوّدعكم الله
قبّل رأس أبوه تسلّم عليه قصيد بالمثل ، يوّدعونه لكن حاكم ما قدر يمشي كل المسافة هو رجع يلتفت : ذياب
حسّت قصيد بوجود شيء ، بإن شيءّ ما حصل رغم إن ذياب رد مباشرة : سـم
رجع حاكم يمسح على جبينه ، يبتسم بآخر كلامه بالتردد : وإن كان ولد ان شاء الله ، إنت ما تقسى يابوك ولا تحتاج تسميه صقر عشان تذكر وش ليّنك ، إنت من يوم الدنيا دنيا ليّن ياذياب ، وقصيد تشهد وقبل لا تصير أبو لولدك ، أو بنتك ، حنّا شفناك على أخوانك نهيّان وورد
هز راسه بالنفي يبتسم بهدوء : إن كان ولد ، سماوته لك الله يحفظك ويخليك ويطول بعمرك بالليّ تبيه
رفعت قصيد نظرها لذياب لثواني تستوعب لكنها إبتسمت بهدوء : أشهد ، أكثر من يشهد له أنا عمي !
ضحك حاكم : أسميه إسم ما يعجب قصيد ياذياب
إبتسمت قصيد : كلك خير وبركة عمي ما تسمي إلا الطيب هذا الأكيد
نزل ذياب نظره لها لأن وش هالرد " الرائع " والمباشر ، وضحك حاكم تبتسم قصيد : لحالك سياسي وتعرف ترد ؟ معليش حتى أنا أعرف أرد
تعالت ضحكات حاكم يضحك ذياب بالمثل ، من أعماقه يضحك ولو ما كان أبوه قدامه وقدامها يمكن أكلها على هالرد دون غيره وضحك حاكم يمسح على وجهه : الله يحفظك له يابوك ، ذياب من صحراء لصحراء ما مرّه الربيع إلا معك ولا ينلام ، الله يبلغنا فيكم إن شاء الله
إبتسمت ، ونطقت تعمداً : آمين يارب ، كلمت أبونايف ذياب ؟ قبل شوي شفت رسالة منه أو مكالمة أعتقد
حاكم : يسأل عنك صح ؟ كل فترة يدق علي
، ذياب : دايم يسأل الله يحفظه ماشاءالله
نطقت قصيد " تعمداً " للمرة الثانية : دايماً نفس السؤال ؟ إن وين بتروح ذياب كيف ناوي تسوي وناوي ترجع وإلا لا ؟
هز ذياب راسه بإيه ، يسأل حاكم : نسولف اليوم بالمجلس ، وين ناوي تروح يا ذياب ؟ الأكيد ما بتقعد فاضي أعرفك ما تحب لا تقول لي البل والحلال ماهي حياة يابوك
وصلت لغايتها ، من فتحها للموضوع كله هي وصلت لغايتها ونطق ذياب بهدوء : يحلّها ربي إن شاء الله
ناظرت قصيد عمها لثواني ترحع نظرها لذياب : كانت تليق عليك الوزارة ، مرة تليق عليك وللآن أشوفها تليق عليك ومكانك ذياب إذا مفتوح لك المجال فيها ، ليش لا ؟ صح عمي ؟
'
هز حاكم راسه يبتسم : تليق لك ، معاها حق قصيد
ما كان منه حتى الرد لأن هالموضوع منتهي بالنسبة له ، هو ما يبي حرب من جديد مع أبوه نهائياً رغم إنها أطباع أبوه تجاهه ، يفهم هالشيء لكن تكفيه المشاعر اللي تشبّع منها : يجيب الله مطر
رفعت نظرها له لأنه " متحفظ " وتتمنى عمها يصرّ عليه ويشوفه لكن حاكم رجع نظره للخلف : تأخرت على أمك ، ودّعناكم الله تبي شيء توصي شيء يا ذياب ؟
هز راسه بالنفي يبتسم لأمه اللي جالسة بالسيارة وتتأمل النخيل ، والساحة : مروقة أم ذياب شكلها ما حسّت ، أبد ما تقصر على مهلكم أستودعناكم الله
توجه حاكم للسيارة يركب ، يودّعهم بالتلويح اللي ردّه ذياب ، وردته قصيد تبتسم ملاذ بهدوء : عرف يختار له نهيّان ، عرف يختار لنا كلنا
لف نظره لها : قصيد ؟
هزت راسها بإيه : شفت الحوار بينك وبين ذياب كيف كان ، وكيف إنتهى يوم جات هي ، تكسر التوتر بينكم
أخذ نفس من أعماق قلبه : تكسره ليت نهيّان حي ويشوف
ملاذ : كان يشوف ، قبل يموت الله يرحمه كان يشوف وشاف كل شيء ، شاف إني ما بردكم يوم قال أحسّ ما بترّدينهم عن بعضهم ، ولا بتمسكينهم عن بعضهم لكنّي أحاول بحياتي وبعد عيني إني أرتجي عطف ذياب مو أعصاب حاكم .. شاف كل شيء وليته شاف قصيد لذياب الحين
لف حاكم نظره لها لأنها " متأثرة " تمسح دموعها ، وأخذت نفس ينطق هو : خفيّ علي
هزت راسها بالنفي : ما عاتبتك حاكم ، ولا عاتبك ذياب إنت تشوفه بعينك .. إنت تحس به بس
إبتعد عن قصر ذياب " يسكن " فقط ، يسكت تماماً
وضحكت ملاذ بشعور غريب : قالت لي قصيد ، تعجبه حكاية الذيب ذياب ، يحب إن سالفة تعارفكم كانت بهالشكل وإن إسمه على شيءّ جمعكم وبكيت ، بكيت الحين يوم فكّرت هو ليه دايم ما يبيني أتدخل بينكم ، يوم تعمّقت بالتفكير مرّني شعور ليتني ما ولدته ولا
حاكم بذهول يغضب : مـلاذ ! استغفرالله العظيم
رفعت نظرها للأعلى : هذا مرّني أنا ، تتوقع ما مرّه هو بكل مرة تـ
سكت تماماً تبتر ملاذ جملتها لأن مشاعرها للآن تنهار على وقوف نظرة ذياب تجاه رسمته أمام أبوه وما كان من حاكم ، ومنها إلا السكوت لوقت طويل ، جداً طويل ..
-
هزت راسها بالنفي : لا جوانا شكرًا ، نامي ما نبي فطور ولا شيء
طلع يسكّر باب المكتب : تبي ماهو بكيفها
لفت نظرها له لأن جوانا توجهت للمطبخ مباشرة : وش يعني ؟ مين بياكل أنا وإلا إنت عشان تعارضني وتقولها إلا سوي ؟دخلت اللوحة ؟
هز راسه بإيه يمّد يده لها ، يشيلها لأنهم بيطلعون للأعلى ونطق بهدوء : شفتي أبو نايف مكلمني أجل ، جوالاتي كلها مافيها إشعار منه
شتت نظرها للبيت : يتهيأ لي ؟ معقولة تعبت لهالدرجة ؟
'
هز راسه بإيه يقلد نبرتها : يالله مره تعبتي ، سلامتك من التعب حبيبتي
إبتسمت لثواني لأنه طقطق عليها بأول نبرته ، وبسلامتك رجع لنبرته الطبيعية : عيب ، بس الله يسلمك حبيبي
نزل نظره لها : لا عاد تعيدينها
مدّت يدها تفتح باب غرفتهم لهم ، ونزّلها للأرض على أقل من مهله تبتسم : أعيد وش بالضبط
نزع ثوبه ياخذ شورته : حركاتك وتعرفين تردين قدام أبوي
ميّلت شفايفها من توجه يغسّل يديه ، ويبدّل : حركاتي ؟ ما سويت شيء .. أكيد بعرف أرد ليه ما أعرف
ناظرها ، وإبتسمت : مين أثقل أنا وإلا اللوحة ؟
نزل ساعته يتركها عالطاولة : إنتِ ، خفيّفة اللوحة
تنهّدت تلف نظرها له : ما عاد تحبني ذياب ؟
لف نظره لها , كانت نظرتها " صادقة " يهز راسه بإيه : إيه
توجهت تتمدد على السرير ، وناظرها لثواني : بدّلي
هزت راسها بالنفي : مابنام عشان أبدل ، مافيني نوم بنزل أفطر مع جوانا أبيها تسولف لي عن الجمعة اليوم
هز راسه بإيه يفتح الباب من دقّت جوانا دقة وحدة عليه ، وطلع ياخذ صينية الفطور المتروكة : إيه ، ما تبيك جوانا بعد سلّمت الفطور وهجت
ناظرته بذهول ، ونزل نظره للصينية : بس حطت لك وردة ، ما قصّرت تراضيك
كشّرت توقف من توجه للكنبة يترك الصينية على الطاولة ، ومدّت يدها تاخذ العصير منها فقط : إنتِ تعيشين على العصير ، عيالي ما يعيشون مدّي يدك زين
ناظرته لثواني بذهول ، وإبتسم لبطنها : صح أبوي ؟
ضحكت بذهول تضرب ذراعه من إستوعبت إنه يكلّم طفله بداخلها : عيب ! قدامي وعلى عيني كمان عيب !
إبتسم يمدّ لها الأكل من يده : شايله هم قصيد ؟
أكلت تناظره : ما غسّلت يدي مابقوم ، هم وش ذياب
رفع أكتافه بعدم معرفة : لا تقومين محد قال لك قومي ، هم الشغل ، شغلي أنا
إبتسمت لثواني : جلف ، لا ، إذا مره نبيع غزيّل ونعيش
ضحك لأنها تطقطق ما تاخذه بجدية : غالية علي غزيّل قصيد لا تغلطين عليها
كشّرت مباشرةوإبتسم هو يتأملها : ليه فتحتي الموضوع مع أبوي؟ طاري أبو نايف والوزارة ؟
ناظرته لثواني ، ونطقت تبتسم : شفت أوراقك بالمكتب اليوم ، وقبله شفتك تتأمل المؤتمرات اللي كنت فيها ، صورك بالديوان ، لما فتحت دولاب بشوتك
هو كمّل أكله ، ونطقت بجدية هي :أعرف كيف تعبت بمكتب أبونايف وأعرف كيف كانت الوزارة تتعبك بس بنفس الوقت أفكر ليه ما تعطيها فرصة ؟ الكل صار يعرفك أكثر ومحد بعقله بيتعرّض لك والماضي كله إنتهى ، ليه ما ترجع ؟
هز راسه بالنفي ، ونطقت هي تشتت نظرها :أحب جوانا على قد ما إن الفطاير مرة خفيفة وما ينشبع منها !
هز راسه بإيه يمدّ لها ووقت أكلت هي نطقت بالهمس :أعرف ليه تركتها من الأساس ذياب
'
هز راسه بإيه يشرب من الشاهي حقه : ما سولفتي لي عن اليوم ، ما قال لك فهد شيء ؟
هزت راسها بالنفي ، وضحك ذياب يستغفر : يقول إني أخونك فهد ، إن به بحياتي غيـ
هي غصت بأكلها مباشرة يضحك بذهول ووقت رفع يده بيضرب ظهرها هي ضربته قبله يضحك : بسم الله عليك
مدّ له المويا تشرب ، وناظرته بذهول : كيف تخونني !
هز راسه بالنفي : جاء يمّنا أنا وأسامه والغزلان بالغرفة ، نسولف عنها أقول لأسامة دامك جبتها وهي طيبة مابها شيء ما قصرّت روح المجلس ، وأسامة يقول ما شفت مثل زينها طال عمرك وإنت تحبها بعد وفهد سمع نص السالفة
ضحكت بذهول : وفهم إنه شيء ثاني يعني ؟
هز راسه بإيه : ساقها عليه أسامة ، خايف ومتحفظ وطال عمرك وبغيت شيء فهد يعني روّح الله يستر عليك وكمّلت عليه يوم قلتله مالك بها روّح المجلس قال أنا اللي لي بها ويدفّ ويضارب وشاش لين فتح الباب يشوفها
ضحكت بذهول : فهد ؟ يدفك إنت ؟
هز راسه بإيه يبتسم بهدوء : يطقّني عشانك فهيدان ، كبر
ضحكت لأنه يطقطق عليه : يعشقك موت فهد ، مجنون كيف يحبك مبسوط عالبيبي ، ومبسوط عالغزلان ، كلهم مبسوطين أصلاً تركي كل شوي يسألني تعبتي ؟ كيف وضعك حتى بعد ما مشيوا الضيوف رسل لي قال كيفك
هز راسه بإيه : كلهم ماشاءالله عليهم ، ذيابه ، ورجال
إبتسمت تتكي على كتفه ، تسولف عن اليوم عندها ، ويسولف لها عن اليوم عنده ، بكل التفاصيل ، بدون ما تغفل عن تفصيل واحد سرقتهم السوالف لوقت طويل ، سرقها الضحك اللي تغصّ منه كل شوي ويضحك لأنه يخاف يضرب ظهرها ويده ترتفع ، لكنها توقف وضحكت تحسّ إن النوم يتمكنّ منها بشدة : كل شيء مجنون أساساً ، وسن تقول ذياب ما يتعامل إلا بالحيوانات قلت بليز ، إتركونا إحنا نعرف نتعامل مع بعض
ضحك لأنها بدّلت لغتها بالأخير وما إنتبهت ، وإبتسمت تحاوط أكتافه : باقي أُمنية وحدة ، متى تحققها ؟
رفع نظره له ، وإبتسمت لثواني : أُمنيات ، مو وحدة معليش الأولى أبي أشوفك بالبشت مرة ثانية ، مرّات
هز راسه بإيه : بنزوج أسامة وبلبس له البشت تم
ناظرته لثواني تكشّر : ما بقول لك ولا نص أمنية زيادة
قامت من جنبه يضحك ، يرجع جسده للخلف لأنها " تعجبه " وقت تعصب : بنـت !
كشّرت تلف نظرها له يضحك ، وتوجّهت تغسل يديها ، تجهز نفسها للنوم وطلعت تتمددّ على السرير تشوف إن ذياب مو موجود بالغرفة ورجع بعد دقائق بسيطة يشوف تمددّها على السرير ، ظهرها يستند على ظهر السرير ودخل هو بمكانه يبعد لها مكان تستند على صدره بدل السرير وبالفعل ، بدّلت مكانها لعاري صدره ينتبه إن بيدها صورة بحجم كفّها ونطقت هي : نهيّان إختار لك السياسة ، والوزارة ، وإختارني لك يمكن لأن هالصورة من خزنته
هي رفعت صورتها بصغرها ، بفُستان أبيض تضحك للكام بإبتسامة تشعّ منها طفولتها ، حياتها بلندن ، الصورة اللي كانت مع ذياب بزواجهم وبقيت بجيب ثوبه من وقتها لكنه عاش شعورها وعاشت هي شعورها معه بالوصال ، بالحُب الطاغي ومرر يده على خصرها ، على بطنها بهدوء : ما ودي بها ، إختار لي نهيان أشياء كثير من وقت لكن ما ودي بها لا تفتحين الموضوع معي كثير قصيد
هزت راسها بالنفي ترفع نظرها له : لو ما ودك بها ما تهرّبت مني قبل شوي ذياب ، أعرف ليه تركتها
نزل نظره لها بهدوء ، وعضّت شفايفها لثواني : ولأني أعرف ما أرضى ، أعرف ليه وبنفس الوقت أعرف إنك تبيها لا تقول ما ودي بها ، قول ما ودي بالخصام
هز راسه بإيه ينطق ذات جملتها : ما ودي بالخصام
هي جلست مباشرة ينطق هو بشبه حدة : على مهلك !
عضّت شفايفها لثواني : مابيجي خصام طيب ! بينك وبين أبوك ما بيجي لأن إنت ما تغتر وهو صار يعرف والله العظيم !
ناظرها لثواني يشوف عيونها اللي تسولف " بفيض " غريب كأنها تعرف الحكاية كلها ولهالسبب هي تناقشه ، وشتت نظره لثواني يتنهّد لكنها نطقت : عشاني ذياب
ضحك يناظرها : ليه قصيد ؟ وش له ؟
ناظرته لثواني يرقّ قلبها من ضحكته ، من إنه يسألها وعضّت شفايفها لثواني : معقول مو واضح ليه ؟
رجعت تستند على صدره ، ومدّت يدها تاخذ جوالها بتذكر : عذبي رسل لي الصور ، مفتونة فيهم ذياب
فتحت جوالها توريه صورهم مع بعض ، والغزال بحضن ذياب ، إبتسامتها هي ونطق هو : تذكرين الكويت قصيد
هزت راسها بإيه ، وكمّل هو : يوم فتحتي الجوال تورّيني حلالي يوم يقطع الخط ، يوم صورتيه وإنتم ماشيين
إبتسمت تتورد ملامحها خجل : ومرر أصباعك بالغلط ، لصورتي أنا
هز راسه بإيه : كانت أول مرة تسولفين معي وما تخجلين
ضحكت تهز راسها بالنفي : روّعتني وقتها ، خوفتني لأنك جلست تتأملني وخفت قلتلك ما شفت الحلال ، قلت شفت حلالي ، وإنتِ حلالي وأشوفك الحين
ضحك لأنها قلدت جدية نبرته بقولها " وإنتِ حلالي وأشوفك " وتعجبه قصيد ، تهلكه بالإعجاب لأن شخصيتها " تتلّون وتلّونه " عادي تتكلم بأكثر المواضيع حزناً له بس ما تسمح لحزنه يسرقه عليها ، تخليه يشوفها من منظور آخر تماماً ، تتكلّم بأكثر موضوع جدي بالدنيا بطريقتها هي ، بشخصيتها هي وما توقف الدنيا عندها على موضوع واحد ، مستحيل توقف وقبّل راسها : الحمدلله إنك حلالي ، وأم عيالي
-
'
« مدريـد »
ضحك يتأمل ذياب : ذياب ، بالله ما وحشتك ما إشتقت ؟
هز راسه بالنفي : لا ، نصار ما عندك إلا هالموضوع ؟ مقروشني من اليوم بكلمك بكلمك آخر شيء ذي علومك؟
كشّر نصار : ما تبي أحد يشتاق لك إنت ؟ الله يرحم أيام كنت الوحيد اللي أشتاق لك وأدورك من لقى أحبابه نسى أصحابه سبحان الله هذا وما بعد شرّف ولي العهد
نزل ذياب نظره للكام ، وإبتسم نصار : فهمتني صح ؟
ضحك ينطق " الحمدلله والشكر " جدياً ، وضحكت ورد من الخلف لكنها تسمع أصوات السيارات بإستغراب : ما تنلام ذياب هذا كلام واحد صاحي ؟ تكلمه وهو يسوق !
هز نصّار راسه بالنفي : الشارع واقف ماعليك ، لا تغلطين
توجهت ورد تقرّب من الكام ، وإبتسم ذياب مباشرة : حيّها ، علومك ورد عساك طيبة ؟ طيبين إن شاء الله ؟
هزت راسها بإيه تبتسم ، تمسح على بطنها البارز لأنها بشهرها الخامس : بخير وأفضل حال الحمدلله طيبين ومشتاقين لكم بس
ضحك نصّار : قرب التشريف ذياب شلون إستعداداتك
ضحكت ورد : الله يبلّغنا بالسلامة يارب أول ما تولد قصيد على أول طيارة جايينكم ، جاك العلم من الحين
إبتسم ذياب : آمين ، لا تجون ولا شيء استريحوا
شهقت ورد بذهول : ما تبينا ؟
هز راسه بالنفي : بتجون الشهر الجاي إن شاء الله مرة وحدة أريح لك ياخوك المسافة ماهي هينة ، نصّار
هز نصّار راسه بإيه : بنصبر الله يعيننا ، الشهر الجاي مرة وحدة إن شاء الله نجي لكم بس عندنا شروط ، ورد عندها
هزت ورد راسها بإيه : زي ما يشوفون بالواقع بشوف أنا ، وصيّت قصيد بس بعد نوصيك إنت عشان تكبر شرهتنا لو تنسون
ناظره نصّار من تحرك الخط يتنحنح : على مهلك ذياب وش معجلك ؟
ضحك ذياب ينزل نظره للكام : ما نحب الشرهات ياخوك ولا نبيها ، تشوفين إن شاء الله على ماتبين بعد أبشري .. على مهلي يانصّار علومك إنت
ناظره نصّار ، وإبتسم : وش شعورك وإنت بتصير أبو ؟
ضحك ذياب لأن هذا سؤال نصار له طول الشهور : وش شعورك إنت يا نصّار ما علمتني ؟
ضحك نصّار يضحك ذياب بالمثل لأن صرخة نصّار وقت دق عليه يفجر بإذنه " بصيـر أبو " ومن وقتها للآن ونصّار ما يصدق إن ورد زفّت له خبر حملها وهو نايم فعلياً وأول شيء سوّاه ، كان الصراخ عليها هي بالذهول ، والصراخ لذياب يزفّ له الخبر مباشرة ، كانت الفرحة عن بُعد لأن الكل عرف وهي بنفسها عرفت وهم بأسبانيا ، بمدريد لكن كانت فرحة أهل نصّار وافية تحسسهم بالديار لأنهم عندهم ومن حمل ورد ، هي إكتشفت شيء لأول مره تعرفه بشخصية نصّار وقت سأل " ما بنكتفي بواحد ورد .. صح ؟ " ووقت ضحكت بالسؤال هي إستوعبت إنه يبي أكثر لأنه وحيد ، لأنه ضحك لها "
'
" أنا معتبر ذياب ونهيان أخواني بس ولدي أبي له أخوان ، وأخوات بنفس البيت معه " وضحكت هي بإن لو ربي كتب ، أكيد ما بيكتفون بالواحد ..
رفع حاجبه يلف نظره لشرودها : وين وصلتي ؟
إستوعبت : قفّل ذياب ؟ وصل بيته طيب عشان تقفل ؟
هز راسه بإيه : لا ما وصل بس قفلنا وينك ما سمعتي !
جلست بجنبه وإبتسم نصّار يمد يده لبطنها : ما تحرّك اليوم ؟
بمجرد ما نطق هو حس بحركة ولده داخلها يضحك مباشرة : إثبات وجود ولا أقوى ، تسمع أبوك إنت ؟
ضحكت لأنه إنحنى لبطنها يسمع ، وكشّرت مباشرة : تسمع صوت بطني ما تسمعه هو لعلمك ، مسافة شوي
كشّر من قامت عنه : أنا متأكد ولدي بيطلع نسخة مني على هالكره كله ، شفيك علي ورد ؟
ورد : بس أنا من زمان كذا أبوفارس ، مو شيء جديد
هو ما علّق إنها " تقطّ " عليه وتنطق بكرهه ، هو ذاب كله على أبوفارس يبتسم : تمونين يا أم فارس ، تمونين ..
ضحكت تمشي للمطبخ ، وإبتسم نصّار من أعماق قلبه يدندن وضحك : أخوك نهيان ، منتهي
ناظرته لثواني ، ولفّ لها جواله : مصّور الكورة مع سعود ، يلعبون هو وأبوك وسعود وعمك فزاع الله يعين سعود عليهم
ضحكت تهز راسها بإيه :أكيد ، فرحة نهيّان بسعود مرة عشانه ولده وألف مرة عشان يدرّبه عالكورة من وهو باللفة يتوعد فيه إذا ما خلّيتك أحسن لاعب على وجه الكرة الأرضية ما أكون نهيان وأبوي يعزز له وراه
هزت راسها بإيه تبتسم : تدري كانوا بيجون عندنا ، ينتظرون قصيد تولد بالسلامة بعدها قالت لي أمي بنحجز أنا وأبوك نجي عندك بس بما إننا إحنا بنروح الرياض قالت خلاص أجل شهر نصبر عادي لين تجون
إبتسم نصّار : والله ودي من الحين ، ودي ما يشيل ذياب ولده إلا أنا وعنده ودي أشوفه
ضحكت ورد : يمكن بنت طيب ! ما ندري كلنا للحين
هز راسه بإيه يبتسم : قلتله إنت تبي البنت يارب ماهي بنت ، دام فارس ولدي بيجي أصغر منها يارب ماهي بنت يارب ولد
ضحكت بذهول تناظره ، وناظرها بنفس الذهول : أجل لو بنت نخليّها لسعود ولد عمها ؟ يخسي
ضحكت بذهول : إنتم كلكم نفس التفكير ؟ كلكم نفس المخ يعني طيب بنفرح فيهم أول بنت وإلا ولد ليه الخطف على طول
نصّار : ما عندنا نعشق الصيد حنّا ، تحسبين لو فارس بنت وذياب بيجيه سليمان مثل ما يبي بيقول مبروك تترى بعزكم ؟ بيقول تراها لولدنا بس عطبنا أبو الفوارس
ضحكت بذهول تمسح على بطنها : مريض نصّار
إبتسم بتذكّر : قلت لأبوي بنسميه فارس ، قال وين خيله قلت له صح فارس بس للدبابات
_
« قصـر ذيـاب »
دخـل القصر يشوف عصيرها بمكانها ، كتبها ، وترك شنطة أوراقه ومفاتيحه على الطاولة ينطق : قصـيـد
طلعت جوانا من المطبخ : تمشي بالحديقة قصيد
-
'
هز راسه بإيه يخرج للخارج ، للحديقة الأمامية وما لمحها يكمّل مشيه للخلف لكنه ما نادى ، وما كان منه الصوت يسكن داخله من لمح إنها بعالم آخر تماماً ، رغم شديد البرد هي تلبس فستان أسود خفيف يُربط من على أكتافها فقط ، تمشي على أقل من مهلها ويدّها أسفل بطنها اللي وصل لأشد مراحل برُوزه لأن ولادتها قربت وإبتسم يتأملها فقط ، لثواني طويلة يتأملها تمشي بخُطى خفيفة ، يحرّك الريح بني شعرها المموج على عاري ظهرها ومن مشهدها الواضح ما تصدّق كيف وصلت فيها الأيام لهاللحظة وهو مثلها ، ما يصدّق كيف مرت شهور حملها أشبه بالنسمة من خفّتها ، من إستقرارهم ولفّت تتأمل المدى تنظّم نَفسها ، هَلعها لكنها إبتسمت من لمحته : أهليـن !
إبتسم يمشي لها ، ينزل شماغه من على راسه : هلا بك ، كيف حالك ؟
إبتسمت تلتفت لمجيئه لها ، من ترك شماغه وعقاله على الكراسي قريب مشيه وكمّل لها يحاوط بطنها بيدّه ، يقبّل خدها : طيبين ؟
هزت راسها بإيه وهي للآن مع كل الشهور الماضية تُهلك من فكرة إنه دائماً يحاوط ثقل بطنها بهالشكل : الحمدلله
رفع حاجبه من حرارتها : مصيّفة والجو برد وشفيك ؟ تروشتي وطلعتي ؟
هو مد يده لشعرها الجاف تهز راسها بالنفي : من صحيت أحس حر ، ما كأننا بالشتاء نهائياً ، كيف يومك
ضحكت لأنه مدّ يده لعنقها : مافي شيء والله ، طلعت أمشي شوي حسيت تعبت من الجلسة وحر مو راضي يبرد الجو حتى يدك مو باردة !
هز راسه بالنفي يشوفها تمشي بإتجاه مكان الغزلان : طيّب يومي مابه خلاف ولا جديد الحمدلله ، كلموني أبوي ونهيّان قالوا تعال حنا نلعب مع سعود قلت ما يمديني والله يستر على الولد منكم تشوتونه بدل الكورة الحين
إبتسمت ، وضحكت من تخيّلت إنهم يشوتون سعود يضحك ذياب بإستغراب : وش ؟
هزت راسها بالنفي : تخيّلتهم يشوتون سعود بدل الكورة ، هو صغير لهالقد أساساً يعني يجي عليهم شوي
ضحك يهز راسه بإيه ، وبقيت بوقوفها تبقى يدّه على بطنها تاخذ نفس من أعماق قلبها ولمح غريب نظراتها للمدى : تحسين بشيء قصيد ؟
رفعت أكتافها بعدم معرفة : بخوف ، حسيت مدري بس وقت جيت أمشي هدّيت شوي ، كلّمتني ماما تقول لي لو حسيتي كذا وكذا وكذا كلميني لأنها بوادر ولادة قلت أنا ما أعرف وش أحس أصلاً
هز راسه بإيه : طيب ليه ما كلمتيني ؟ جوانا وينها عنك
تعقّدت حواجبها بألم بدون مقدمات تشد ذراعه ، وسكنت ملامحه كلها لأنها نزلت يدّها لبطنها : وش !
رفعت أكتافها بعدم معرفة : من أول ، أحس بالألم يجي ويروح بس هالمـ
هي كتمت صرختها تشدّ على يده بقوة - فضيعة - من إنحنت على نفسها من الألم ينادي مباشرة : جـوانـا !
-
'
هي نطقت مبـاشرة : لا ! مو اليـوم
ناظرها بذهول وهو يحس الألم من عيونها : وش لا !
لأنه نطق ينادي جوانا مرة ثانية بصوت أعلى هي إرتعبت تصرخ بذهول : لا تناديها ذياب مو اليـوم !
ناظرها لثواني هو وده يضحك من " خوفه " بهاللحظة لأن وش يعني مو اليوم لكنه إستوعب إنه بمجرد ما بيضحك هي بتبكي ، وطلعت جوانا من الداخل تشوف ، ويأشر لها ترجع للداخل ركض : أبشري ، مو اليوم !
هي حاولت توقف بإعتدال لكنها صرخت بألم تهز راسها بالنفي : ذياب لا ! لا يعني لا مو اليوم بيروح بعد شوي
هز راسه بإيه من جات جوانا تركض بعبايتها : طيب بنروّح أنا وإنتِ الحين ماهو اليوم بتولدين بس بنروّح نشوف
هزت راسها بالنفي تمسك نفسها من الألم بهدوء ولفت نظرها له بشبه غضب من حاول يمسكها : لا ! ، بشوف الغزلان
ناظرها لثواني من شدّت يده تمشي خطوة لكنها صرخت بألم تشدّ ذراعه اللي كانت تردّ مشيها وما قدرت ، من قو الألم اللي بتر خطوتها بلحظة هي ما قدرت إلا إنها تعضّ ذراعه تنطق جوانا بهلع مباشر : ماما ما ترد ، بيبي إنتِ تولدين خلاص مافي وقت !
هز ذياب راسه بالنفي ما عاد يستوعب ، حتى الألم من شدّ عضتها ما حسّه ينطق بجوانا بتوتر : إيه ثّوريها إنتِ علّميها ! وتّريها ! قصيد أبوي
ما عاد تنفّس ، وما عاد حاول يمسكها حتى من تكررّت فيه نفس الحركة بوقت نزيفها وكيف حاولت تدخل بصدره من الألم ينتهي نَفسه من لبّستها جوانا عبايتها ينطق مباشرة : إفتحي باب السيـارة
توجهت جوانا تركض لكن قصيد هزت راسها بالنفي تغرق عيونها بالدموع من الهلع ، قبل الألم : ذياب لا مالك دخل
هز راسه بإيه ينحني من توتره مباشرة : لا مالي دخل ، أبشري
-
« المسـتشفـى »
متّرت الممر روحة رجعة من التوتر تمسك هي بطنها ، متّرت المكان كله تهز راسها بالنفي : لا ما أقدر والله ما أقدر بدخل عندها تركي خلاص ما أتحمـ
هز راسه بالنفي يمسكها : هواين ، إن شاء الله هواين
هي يلوع داخلها ، يرتعب داخلها وأكثر : تركي طوّلت بنتي ، والله طوّلت بنتي الولادة ماهي هينة قصيد مـ
هز راسه بالنفي يبتر كلامها مباشرة : برد وسلام إن شاء الله ربي معها ، لا توسوسين سلاف قولي لا إله إلا الله !
جات ملاذ ركض ومعاها حاكم اللي سأل مباشرة : بشّر
هز تركي راسه بالنفي بمعنى إنها ما طلعت للآن تشوف ملاذ توتر سلاف الغير طبيعي ، شدّتها على يد تركي وعلى وشك تغرس أظافرها بيده : سلاف !
تركها تركي لملاذ ، ومسكت سلاف يدّ ملاذ بتوتر : بتطلع روحي من التوتر ما أرتاح لين يقولون لي طيبة ، والبيبي طيب الله يتمم على خير ، الله يبشرني بسلامتهم يارب !
-
'
ناظرها تركي يعدل أكتافه وهو يحمد ربه إن سلاف ما دخلت معاها لأن على هالرعب ، هالتوتر اللي يشوفه لو سمعت صرخات قصيد أكثر ممكن تتمنى تولد عنها ، توتّر قصيد هي بنفسها وتزيد عليها الخوف وتمتم بهمس يدعي : يارب ، أستودعتك إياهم ..
لف حاكم نظره للممرات ما يشوف فيها ذياب ، لكن يشوف العيال اللي دخلوا يركضون ، نيّارا ، وعذبي اللي نطق برعب مباشر : بشّر تركي !
تركـي : ما طلع لنا أحد للحين إن شاء الله خير وتقوم بالسلامة ، رحت البيت تاخذ الأغراض عذبي ؟
هز عذبي راسه بإيه : جبتها كلها مع جوانا بعد ، تقول هي رجعت تاخذ عبايتها لقت ذياب مشى عنها
ناظرته سلاف برعب : وش قالت ؟ وينها
ضحك عذبي من الخوف : تقول ذياب فصل عليها ليه تقول لقصيد إنها بتولد وليه تقول لها إنك ما تردين بعد
هزت سلاف راسها بإيه بهلع : ما رديت أنا ، ما رديت جوانا
توجهت ركض لجوانا اللي دخلت معاها الأغراض ، وسأل حاكم بإستغراب شديد يلف نظره للممر : وين ذياب ؟
-
صرخت تضرب ذياب من الألم اللي تحسه يقطع روحها وروحه بالمثل من بقى عند راسها يشدّها له يكرر بهمس ، برعب ما تصّوره حتى هو : آسف ، آسف آسف
كانت يدها تقطّع يده بالشدة يحس أظافرها تغرس بيده ، إنحنى عند راسها لأنها تصرخ بالألم اللي ما تطيقه ويحس جسدها كله يصرخه يشدّها له لكن قلبه يوقف لأنها تصرخ من وقت يشوف عروق عُنقها من صراخها بالوجع ، يحس ملامحها تشبّ من الإحمرار ودموعها اللي تنزل من الألم تحرقه بالإعتذارات ما يدري وش يسوي غير إنه يحاول يكلّمها ، يحاول يهوّن : بتقضي ، هانت أبوي
هو يحاول يهوّن ، بنفس الوقت تسمعه يتهاوش مع الدكتورة والممرضات وما توعي شيء من صراخها ولفّ نظره لها من صرخت تعقّد ملامحه كلها لأن حتى قلبه ماعاد يتحمل ، ما عاد يشيله من بكت " فعلاً " غير بكاء الصراخ ، بكاء الألم يسمع صوت الدكتورة اللي صرخت عليها " ما ينـفع كذا يا بنـتي ! " ينطق هو بغضب : لا تصـرخين عليها ! هانت ما بقى شيء
صرخت بوجع تلفّ نظرها له : أكـرهك ! أكـرهك
كان صوت الدكتورة ، صوته ، أصوات الممرضات حولهم يحاولونها لكن صار كل الصوت بإذنه وعقله وكل إنصاته لبُكاها بهاللحظة ولمنظرها من لمع جبينها من شد جُهدها وهُدّ حيلها تماماً تعرّق ملامحه هو ، تغرق عيونه يقبّل يدها وسكن كونه ، وكون قصيد من صوت بكاء قطع سيل شتائمها له ، شتائمه هو على كل شيء صوت صدح يفز له خفّاقه ، وخفّاقها يقبّل يدها عن البكاء بالإرتجاف مباشرة : قضت أبوي قضت
ما إستوعبت لوهلة ، وما كان من ذياب ذاته الإستيعاب من تعالت أصواتهم بالتصفيق ، الضحك ، ومن جات الممرضة بإتجاههم
'
بحضنها غزال ، قمر ، وأجمل بلفّة بيضاء تمدّها لحضن قصيد بالإبتسام : الحمدلله على السلامة ! ماشاءالله تتربى بعزكم
أخذتها قصيد بحضنها ما تستوعب لوهلة ، ما إستوعبت غير إنها ضحكت تحسّ سكون ذياب وغرقت عيونها بالدموع ما تصدّق ، ترجف يديها : ذيـاب تشوف ؟
ضحك هو يسكن بذهول ما يصدق ، منظر قصيد اللي شعّت ملامحها من ضحكت بدموعها لطفلتها ، أوُل مولودة له ، ولها ، من رجفت يدّها تبعد اللفة عن وجه بنتهم اللي أصغر من كل صغير شافه بحياته ونطق بالذهول : ماشاءالله تبارك الرحمن ! لا إله إلا الله يابـوي
بكت قصيد لأنه مدّ يده ليدها ، للفّة بنتهم اللي بحضنها يمسك طرفها مع يدّها وقبّل راسها مباشرة من نطقّت تهلك روحه كلها " أهليـن ياماما ! "..
_
أخذت سلاف نفس من أعماق قلبها بين تركي وعذبي الواقفين مع حاكم يسولفون ، فهد وتركي وعذبي الصغار ينتظرون بترّقب مخيف ، نيّارا اللي تكلّم بجوالها وملاذ الجالسة بجنبها تدعي بالهمس ، تتمنى السلامة ..
خرج يعدل أكتافه ، يتماسك نفسه بعد اللي حصل كلّه بداخله ألف شعور وأكثر لكن فزّتهم جماعة أمامه بدون مقدمات تركت خطوته توقف ، نطق تركي مباشرة : بشّر !
بكت سلاف مباشرة ما قدرت توقف تضمّها ملاذ ، ولف عذبي لأمه بذهول : ما قال شيء أمي أصبري !
كانت نظراتهم " كارثية " بين ترقب ، وخوف ، ولهفة مستحيلة وقت إبتسم هو لمح عيون فهد اللي لمعت مباشرة يدخل بحضن تركي أخوه ، وقت إبتسم هو لمح أبوه اللي حسّ ببارد الماء يطفي نار توتره ووقت إبتسم ، إرتخت أكتاف تركي ترجف نبرته بالذهول : ذيـاب
هز راسه بإيه يبتسم : بنتك ، وحفيدتك بنت بنتك ، طيبين الحمدلله
صرخ عذبي الكبير يشيل تركي من على الأرض فعلياً ، ضحك ذياب يضمّ أبوه اللي شرّع له كل يديه من كثر ما جفّ دمه : الحمدلله على سلامتهم ، الحمدلله !
ضحك ذياب اللي توّه يلقى النفس فعلاً بس ما بعد تنفّس بالحيل لأنهم أجبروه يخرج من عندها ، بينقلونها لجناحها وشدّ حاكم على كتفه : مبروك ما جاك يابوك ! تتربى بعزّك
إبتسم يهز راسه بإيه : يبارك فيك ويخليك ، وعزّك ياجدّها .. عمي تركي
مسح على ملامحه يتوجه لذياب يضمّه ، يضرب على كتفه يضحك حاكم نفسه اللي جاء وقع " جدّها " غير عادي عليه ينطق : ما حسّبت يا تركي
هز راسه بإيه ياخذ نفس : مبروك ما جاكم ، والحمدلله على سلامة بنتي وبنتها وتتربى بعزّكم يابوك ، تتربى بعزّكم
إبتسم ذياب : وعزّك الله يحفظك ويخليك ، الله يبارك فيك
'
أخذت نفس من أعماق قلبها تجهّز نفسها لمجيئهم ، من دخلت أمها أوّلهم تصرخ عيونها قبلها ، تبكي عيونها قبلها من لمحت تعب بنتها لكن ملامحها " تشعّ " من فرحها : وش يعني كبرنا وتصير عندنا بنوته !
ضمّت أمها اللي بكت تقبّل عنقها ، تحس حرارة جسدها من التعب والإرهاق وأكثر من يعرف شعورها الحين سلاف : الحمدلله على السلامة حبيبتي ، الحمدلله على السلامة ياقمري
ضحكت قصيد تهز راسها بالنفي : شفتيها ماما ؟ هالقد
كانت تأشّر بصغر حجمها ،وهزت سلاف راسها بالنفي تمسح دموعها : لا ، أبوها راح يجيبها الحين من عندهم ..
رقّ قلب قصيد من نطق سلاف لـ" أبوها " ، وضحكت سلاف تتأمل بنتها لثواني : بيدخلون الحين عندك ، يسلّمون عليك ويتحمدون لك بالسلامة لا تتعبين نفسك أمي تمددي ، كلهم مقدّرين ويعرفون التعب كيف
هزت راسها بإيه : مين موجود ؟
إبتسمت سلاف : أبوك ، عذبي ، أخوانك ، عمك وعمتك
هزت راسها بإيه تاخذ نفس من أعماق قلبها ، ومدّت سلاف يدها لشعر قصيد اللي ترفعه للأعلى كله تلفّه ، تنزّل منه خصل صغيرة من الأمام فقط وإبتسمت قصيد تقبّل يد أمها اللي تتأمل ملامحها ، تمسح على خدها : ماما
هزت سلاف راسها بالنفي تغرق بدموعها : يالله ما تتخيّلين يا قصيد ، ما تتخيّلين قلبي ما أحس فيه وما حسّيت فيه إلا يوم جاء ذياب قال لأبوك بنتك ، وحفيدتك بنت بنتك ، طيبّين ياعمي ، الحمدلله ،الحمدلله
ضحكت قصيد رغم الألم ، رغم التعب لكن برودة تمسح على قلبها من فيض مشاعرها ، وعضّت سلاف شفايفها : شال عذبي أبوك يطيّح شماغه وعقاله ، وحاكم أخذ ذياب كله يضمّه من فرحته ، وش يعني نرقّص الدنيا فرح قصيد ؟
إبتسمت قصيد : بنتي تسوي كذا .. بنت قصيد ، وذياب
صرخت سلاف مباشرة وسط دموعها تضحك قصيد اللي نزّلت يدها لبطنها ، ورقّ قلبها كله من دخول أبوها ، ونيّارا اللي إبتسمت : ونبي سلاف تتحمل شوفي الغرور ياسلاف
هزت راسها بإيه : بعضّها ! والله بعضّها ما كبرت ياتركي
هز تركي راسه بالنفي تلمع عيونه : كبرت .. جابت بنت
رقّ قلب قصيد كله من توجه لها أبوها ، من إن أمها تمسك يدّها تجلس بجنبها وأبوها جاء يمشي لها يقبّل راسها ، ينطق بأرقّ ما عنده : الحمدلله على سلامتكم يا بابا ، الحمدلله على السلامة يا دنيتي
قبّلت يده بالمثل يرق قلبه ، وإبتسمت نيّارا تقبل خدها : تتربى بعزّكم ياحبيبي ، شفناها بالحضانة تعرفين وش يعني تقول للقمر حرّك بجلس محلّك أنا ؟
ضحكت قصيد ، يدخل عذبي أبوها اللي يلف نظره للخلف لأخوانها اللي جو يركضون : على مهلكم !
دخل تركي أخوها أولهم ، وعذبي ، وفهد اللي كان على وشك يتعثّر تضحك قصيد : أهلين !
'
توجه تركي أخوها لها مباشرة، عذبي ، وفهد كلّهم يقبلون راسها بذات الجملة : الحمدلله على السلامة !
إبتسمت بحب : الله يسلمكم ، شفتوا بنتي ؟
نطق فهد : لا تقولين بنتي ! شنو بنتي قصيد
ضحك عذبي : طيب بنتها صج فهد ، بنت قصيد
رقّت نظرته مباشرة تضحك قصيد ، وإبتسم تركي أخوها : إرتاحي ، نطلع عمتج تاخذ راحتها ؟
هز تركي أبوها راسه بإيه : إطلعوا ، بيسلّمون ويمشون قال حاكم
طلعوا أخوانها يبقى أبوها تركي ، أبوها عذبي ، نيّارا ، وسلاف أمها وذاب قلبها ، خفق قلبها كله من دخل ذيـاب يشيل ملاكها بيديه ، خفق قلبها تغرق عيونها بالدموع مباشرة من تعالت أصواتهم ، من نطق أبوها تركي بصارخ المحبة يهلّي : مرحبا بك يا هلا .. يا هلا يا مسهلا .. جامعٍ زين وحلا يا حبيب الله عطاك !
بكت قصيد تضحك سلاف ، ودخل حاكم مع ملاذ اللي تشيل بيدها فازة ورد ، ويمسك حاكم سعود اللي بيدّه وردة صغيرة على قده وتسمع ضحكات أخوانها ، تشوف ضحكات سعود لهم لأنه يلتفت للخلف ويمشي على مهله وتوجهت ملاذ تترك الورد ، تسلّم عليها وإبتسمت قصيد : كلّفتي على نفسك عمتي ، الله يبارك فيك ويخليك !
إبتسمت ملاذ ، وإنحنى حاكم يسلّم على قصيد بالإبتسام : مبروك ما جاكم يابنتي ، الحمدلله على السلامة وتتربى بعزكم إن شاء الله !
إبتسمت تخجل ، تولّع من خجلها وشال حاكم سعود اللي قبّل خدها مباشرة ينطق ذياب : ورع !
تعالت ضحكاتهم تدري إنه نطقها بيشتت خجلها ، وإنحنى يترك بنتها بحضنها يبتسم تركي اللي كل هالمشهد فوق تصّوره ، فوق خياله : قبل كم شهر نقول يا شايل الظبي بين إيديه ، يستاهل الظبي من شاله على الغزلان والحين
إبتسم ذياب ينزّل نظره لغزاله ، لبنته بحضن أُمها وللآن محد يدري إن إسمها على الغزلان ، من الغزلان وإبتسم عذبي الكبير يكتفّ ذراعه : يستاهل الظبي من شاله يا أم
إبتسمت قصيد يرقّ قلبها بالإنهيار لأنه تساؤلهم ، أبوها يتوقعّ الإسم من وقت ، وسلاف تعرفه ورفعت نظرها تحس نبض قلبها طبول داخلها : ريـم
ضحك تركي أبوها مباشرة يغطّي ملامحه ، وإبتسم حاكم على ملامح ولده : مبـروك يا أبو الريـم ، الله يحفظها لكم
إبتسم ذياب وقلبه خفّاق تجاه الإسم ، طريقة إختيار الإسم اللي جات وسط جلسة الإقتراحات منه ومنها لكن بلحظة ، نطقت هي ، ونطق هو بذات الإسم " ريـم " ومن وقتها صار هو ، من وقتها وهي أم ريم ، وهو أبو ريـم : الله يبارك فيك ويحفظك ..
إبتسم تركيّ يقرب منهم من توجهت ملاذ لسلاف ونيّارا : عطوها جدها ، رددت الآذان بإذنها ياحاكم ؟
هز راسه بالنفي يرقّ قلبه مباشرة ما بيتحمل : ذياب يأذّن
ذياب : وجدّانها موجودين ؟
-
'
إبتسم لأبوه فقط ياخذها من حضن أمها ، يمدّها لحضن أبوه اللي يحس حصونه كلها تنهار بالحنان يردد " ماشاءالله " بكل لفظ وصيغة ورقّ قلبه يتذكر ولادة ذياب يكرر لها ، يكلّمها بنبرة سكّنت دواخلهم جميعاً بدون إستثناء : وإنتِ ريم ، بنت ذياب ، أمك قصيد ، جدك تركي ، وجدك حاكم نسل الكرام ،
نطق عذبي الكبير يقطع مشاعرهم الفياضة بملاحظة بسيطة : وجدّك عذبي
ضحك حاكم يمسك دموعه اللي لمعت بعينه لأن شعوره لها ، وهي بنت ذياب مختلف تماماً : وجدّك عذبي ، نسل الكرام ، وبنت الكرام ، وحفيدة الكريمات ، أستودع الله قلبك ، ودينك ، وحياتك الله يقر بك عين أمك ، وأبوك ، وجدّانك ياريـم
ما تمالكت قصيد نفسها تغرق بالدموع مثل ما غرقت سلاف اللي تصّور المشهد لأن تجمّع الثياب ، حول لفّة وقُبعة صغيرة بالوردي يهلك قلبها ويذكّرها بولادة قصيد، وغرقت ملاذ وذياب اللي ذاب قلبه يسمع إرتجاف صوت أبوه بالآذان بأذُن بنته ، صغيرته وضحك حاكم ياخذ نفس يرد فيّاض شعوره : يوم أخذتك بيدي يا ذياب ، قلت نفس السيرة لك وإنت ذياب ، ولد حاكم ، أمك ملاذ .. يقولها نهيّان من قبلنا كلنا
قبّل رأس أبوه مباشرة : الله يحفظك ويخليك لنا أبوي
إبتسمت ملاذ تمسح دموعها من توجه تركي لبنته تلف نظرها لسلاف : ريّحوها ياسلاف ، الحمدلله على السلامة مرة ثانية بس قلنا نشوفكم ونتطمن عليكم .. الحمدلله
هزت سلاف راسها بإيه : الله يسلمك ويحفظك يا أم ذياب
إبتسمت قصيد من جاء عمها حاكم يودّعها ، يرفع سعود بحضنه : جايب الوردة لبنت عمه من بدري بس ما يمديها تاخذها منه الحين ، تاخذها أمها
ضحكت قصيد تاخذها من سعود وإستحت تقبّله لأنه بحضن عمها حاكم لكن ذياب قبّل يد سعود يبتسم له : حركات أبوك نعرفها ، جعلها يمنى خير يالسَعد
ضحك حاكم : الحمدلله على سلامتك يابنتي ، نستودعكم الله
إبتسمت تودّع عمها وعمتها لكنها همست تلف نظرها لذياب : وش اللي بيدك ذياب؟
هز راسه بالنفي يبتسم : جاء نهيّان يبارك ، وجاب سعود بالوردة وصوّر ريم لنصار وورد بعد ، ورد تبكي بمدريد
إبتسمت تاخذ نفس من أعماق قلبها من تعدّى أبوها سريرها لسرير بنتها ، من إبتسم يوقف عند أقدامها يتأملّ وجودها وإبتسم من فتحت عيونها له يشعر بها مباشرة : ياخشيف الريم نجدٍ روضتك .. كم لنا ننتظر وأنا جدك ؟
رقّ قلب قصيد مباشرة : بابـا !
ضحك عذبي يتأمل بنتها : بابا ، تسمعين اللي تقول بابا ؟ أمك الله يخلف علينا صارت أُم وللحين تنادي بابا
إبتسم تركي يتأملها ،يتأملها يفيض قلبه : ماشاءالله
-
'
دخلوا أخوانها يصدح الصُوت إحتفالاً ببنتها ، صراعاً بينهم على كل ما فيها ، على نظراتها ، فتحها لعيونها ، حتى هي تضحك معاهم من الإرهاق بدون وعي وتشوف نظرات ذياب عليها ، تأمله الكثير لها وما تدري هي متى غفيت ، لكنّها غفيت وسط ضجيجهم يسكن الصوت ، وإبتسم أبوها تركي بهمس : بتقول أشعار لها قصيد ، بنتي وأعرفها
هز ذياب راسه بالنفي بهمس : إن ما سبقتها أنا
_
« الصبـاح ، قصـر ذيـاب »
هي أخذتها بحضنها تمشي بجنب ذياب ، على أقلّ من مهلها تمشي وتسمع ضجيج أمها ، ونيّارا ، وجوانا بالأسفل لكن مشاعرها " كثيفة " لدرجة إنها ودّها تبكي من فيض شعورها وشتت نظرها لثواني : لازم نرسل ورد للمستشفى ، للدكتورة والممرضات نعتذر لهم ذياب
هز راسه بالنفي : كلّمت الدكتورة ، قالت ما بخاطرها شيء بس لا بغيتي تحملين وتولدين لا تشوفنا عندهم الأمور طيبة
ضحكت تلف نظرها له بذهول ، وإبتسم لأنها تدري إنه يطقطق وأخذ ريم من حضنها تجلس هي على الكرسي الهزّاز بطرف الغرفة ، الغرفة اللي بأكملها بالأبيض ، من جُدرانها ، لستائرها ، لسرير بنتها ، لدولابها وكل الألوان لألعاب تنتظر لشهور قبل ما تبدأ تلعب فيها ، لوردي لحافها ، دُمى الأرانب ، الخيول ، الغزلان ، الشمس اللي تنّور الغرفة من شبابيكها الطويلة كانت كافية لأن كل الأنوار مُغلقة وأخذت نفس من أعماق قلبها تسأل : وش صار بغرفة الولادة ذياب ؟
ضحك لأنه حتى هو ما يدري ، هو آخر عهده بنفسه كان يشدّ بطنها معاها بالسيارة من الألم ويقرأ بكل شيء يعرفه ، يحصّن بكل شيء يعرفه وما سمح لأحد يرفضه هو دخل معاها غرفة الولادة لأنه يعرف شدّاتها على ثوبه ، يعرف عضّاتها له وإنحنى يترك ريم بحضنها ، يكمّل إنحناءه لين صار يقابل رُكبها يكشف يديه لها : هذا اللي صار
كانت آثار عضّاتها كدمات ، ورق قلبها مباشرة : وبذراعك فوق بعد ليه كنت تطاوعني وما تبعّد نفسك ذياب !
هز راسه بإيه : ما أحسّ بها كلها ، تشوفين أمك وش سوّت بي يا ريم ؟ ما بقّت شتيمه ما قالتها لي ، وما عادها هيّنة لينة عضّتني ولا عضّ الذيب نفسه ، يرضيك يابوك ؟
ضحكت قصيد مباشرة بذهول : ذياب !
إبتسم يقبّل يدها اللي تحاوط بنتهم بحضنها : ولو سويتي الأكثر حلالك وفداك ، فدا عينك يديني ، وذراعي ، وكتفي ، ولو تبين راسي قصيد المهم إنك طيبة ، وبنتي طيبة
لمعت عيونها بالدموع مباشرة ، وضحك يمسح على عيونه : أمي تسألني ، قالت عشر يا ذياب ؟ قلت أنا ودي من قصيد عشر بس بعد ما شفت العوق .. ريم تكفي
خجلت ملامحها مباشرة : عيب، تقول لي بيننا بس
ضحك يتأملها وإبتسمت قصيد تنزّل نظرها لبنتها : وقت شفتها نسيت كل الألم ما كأنه صار أصلاً .. غزالي
إبتسم يوقف ، ياخذها من حضنها ووقفت قصيد تتأمل القصص المصورة "الكثيرة " اللي تُرتب الأرفف لها ، عن حكايا الأميرات والغابات وأخذت منها كتاب تقرأ صفحة النهاية : عاشوا بسعادة للأبـد ، تدري وقت كنت صغيرة كنت أكره مثل هالنهايات ؟ وش يعني عاشوا بسعادة للأبد مافي شيء كذا بس الحين ، أفهم
رفع حاجبه لأنه يبيها تسولف له يبي يسمع ، يبي يتأكد إنها بخير للمرة الألف وإبتسمت : وش ؟
ضحك : وقت كنتي صغيرة ، يعني كبرتي الحين قصيد ؟ أنا للحين أشوفك قصيد اللي دخل بيدّها الشوك وجات تشكي لي ، قصيد اللي جات من لندن ما تنزل من السيارة إلا لو مسكت يدّي يا ذياب وقصيد الليّ ، جلست بحضني وهي صغيرة تشوف بيديها رمش عيني
إبتسمت وكمّل : وكررّتها ، يوم صارت حلالي كررتها وكل ما قرّبت منها كررتها كأن ما بي إلا رموش
هزت راسها بالنفي تخجل : أحبها ، بكيفي شوي يعني !
إبتسم يتأملها ، وعضّت شفايفها من فتحت بنتها عيونها : نعرف إننا بحضن بابا ونسمع السوالف وما نشارك ، بابا مبسوط على إسمها يقول السر الغزلان
هز راسه بإيه ، وإبتسمت : وقال لي بتصير شاعر لها
هز راسه بالنفي : بيني وبينها
ميّلت شفايفها ، وإبتسم من نظرتها : تعالي
توجه يمشي بإتجاه الشباك اللي يكشف الحديقة : مسّكت معك يوم إنك بتولدين بشوف الغزلان ووشفيك تردّني ذياب ، أخلي بخاطرك شيء أنا ؟
ضحكت من طلّع محمد الغزلان من مكانها تلعب بحديقة القصر ، على أنظارهم : ما تخلّي شيء ، ذيابي
لف نظره لها ، وإبتسم لبنته يكشف سرّه ، شعره لها : أمك تبي شوف الغزلان يومها ما درت إن غزالي بتجي ، ريم على غزلان الريم
إبتسمت يخَفق قلبها مباشرة تعرف اللي بينطقه ذياب اللي جات غزاله فارقه ما تشبه أحد : ما صادفت عيني على شكلها ريم ؟
ضحك يهز راسه بإيه ، ورقّ داخل قصيد كله يذوب وأكثر من إنحنى يقبّلها هي ، تمدّ يدها لخده تحس داخلها " يُفجر " من شعورها لهاللحظة بالذات ، كل دنياهم على ما يبون ، الكل بخير ، ذياب بخير بعد طول اللهايب لقى برده ، لبس بشته ، ورجع لشغله ، ويعانق غزاله ، ويعانقها هي وإبتسم بهدوء من إستندت على كتفه فقط تتأمل حديقتهم والمدى يحضن بنته بحضنه ، ويضمّ أمها بيده الأخرى ولو تصّور حياته ألف مرة بعد حارق النار وعزّ القيظ ما توقع لو مرة وحدة ، يكون هذا ربيعه ، هذا نعيمه اللي ما يبدّله بألف نعيم كل أموره مستتبة من أكبرها علاقته مع أبوه ، لأصغرها بحضنه بنته يقبّل رأس قصيد فقط : الحمدلله .

من أمس بعد ما شفت فيض مشاعركم ، حبكم ، إحترت كيف أعبّر لكم عن قيمة الهوى ، حبي أنا للهوى ، لكن إنتهينا أمس على خير ، وبخير ، وبفضل من الله الحمدلله وهذا المهم أعرف إن الهوى باقية في قلوبكم وهذا الأكيد ، حكاية عمرها أعوام من عمري وعمركم ، حكاية بديناها بإنطلاقاً إلى عزيز الأماني على وصف غازي القصيبي - رحمه الله - وختمناها بإننا وصلنا لعزيز الأماني ، وصلت لغايتي ، وغاياتي ، ووصل الهوى لأعماقكم لأنه من أعماقي وهذا المهم ..

ومثل ما بديناها ، إنتهى الهوى وصلنا للفصل الأخير - كتابة - ، لكن ما للشعور آخر ، ما للهوى آخر لأن كلّ الغرام الهوى ، كل الصور الهوى ، كل البراءة في عالمي وعوالمكم الهوى اللي يجي في كل عشر الآف عام من الشبه مرّة ، فارق ، ماله وصيف ، ولا له مثيل 🤎

الهوى إستنزفت مشاعري ، وطاقتي ، وجهدي ، وعشتوها معي بشكل مايحتاج أشرحه رسمنا أحلام ، وعشنا أيام ، وغنينا للهوى أغاني وتغنيّنا بأشعار كثيرة لذلك ، إذكروا الهوى كل ما جاء الطاري ، وإذكروني بالخير وإدعوا لي كل ما جاء لي طاري وجيت عالبال ..
كم سنة مرّت ؟ وكم حكاية سُطرت ؟ خُتمت بفضل الله وبإتقان بتوفيق من الله ، خُتمت بحب لأن كل حكاياتي ورواياتي كانت لكم ، معكم ، وبينكم يا أعزّ الأوطان لكن هنا كفايتي ، ما عندي قلب يقدر على عشق الربيع مرة أخرى والهوى ما بعده عندي .. أستودعكم الله 🤎

-
مثل ما تكتبوني .. ريم الأوطـان