أنت تقرأ

انت الهوى ، كل الهوى برد ولهيب🤎

Romance

- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...

#الاوطان #بر #حب #دلال #ذياب #روايات #ريم #سعودية #شعر #قصر #قصيد

بارت ٤٥

12.4K 201 60

بواسطة rwaiahh6

بقلم rwaiahh6

'
إبتسمت تهز راسها بالنفي لأنها ما بتطول ، ومدّت يدها تاخذ الفنجال من عمتها : مرتاحة كذا عمتي ، إرتاحي
تنحنحت ريف تسأل : كلنا أهل قصيد ، وودي أخجل منك بس ما أقدر ذياب ما يستحي كل ما جيت بسأله قلت لا تجيبين الكلام لنفسك ياريف ، ما ودّكم بصاحب لسعود؟
ضحكت ملاذ لأن تورّدت ملامح قصيد بشكل مجنون تنطق هي بدورها عن قصيد : ذياب ما يخجل تجين للبنت وهي خجولة بالحيل كأنك ما تعرفينها يعني ؟
ضحكت ريف ترفع أكتافها بعدم معرفة تتعالى ضحكاتهم ، وشربت قصيد فنجالها تضحك ديم بتعب : تعوّدي قصيد الله يعينك ولا تخجلين بالحيل !
بقيت أحاديثهم على هذا الوضع ، وزادت السوالف بالحمل والولادة كل وحدة فيهم ترمي تجاربها من إتجاه ترك قصيد تهوّن ، تعيد التفكير بشكل أكثر وأكثر وإبتسمت ديم : قالت لي وسن ، كله يهون وقت تشوفين النونو وما صدقتها لآخر لحظة وأنا منهارة خوف ما بولد شوفوا لكم حل بس أول ما شفت سعود ! ما أدري
ضحكت ملاذ تهز راسها بإيه : هو كذا سبحان الله ، وقت تفكرين فيها صعبة لكن سبحان الله أول ما تشوفينه تتغير الموازين ، تقولين يستاهل التعب والله يكتب الأجر
هزت ديم راسها بإيه تتأمل سعود : يستاهل الدنيا والله
إبتسمت قصيد بحب كأن الحديث طمّنها ، لكن وقت رجع للتعمق من جديد هي كشّت كلها بخوف تضحك ريف بجنبها : لا تخوّفون العروس نبيها تفكر بالموضوع إحنا مو تقولون أشياء ثانية قدامها ! سهالات يا أمي
يمكن لو ما كان صوت عمها حاكم هي غرقت بالكنب مباشرة لأنهم جريئين بشكل هي تخجل منه ، بكل المواضيع مو بموضوع محدد وكل شوي يستلمون وحدة فيهم بدون تحديد وحتى هي ونطق حاكم : يا ملاذ ، ريـف
قامت ملاذ تتوجه لعلياء ، وعدّلت قصيد نفسها من رسالة ذياب لها " طيب " : عمتي ، قولي لعمي بسلّم عليه
هزت ملاذ راسها بإيه : حاكم ، قصيد بتسلم عليك بيمشون
لمح ذياب اللي طلع من المجلس خلفه : خليّها تجيب سعود لعمه ، وأمي قولي لها ذياب جاء تبيه من اليوم هي
إنحنت ريف لعلياء تكلّمها ، وجات ملاذ تعاونها ووقفت
_
دخل عند أبوه وهو عصّب اليوم بشكل كافي يزيد غضبه بكل لحظة ، حاول يعدل مزاجه بشتّى الطرق وعجز تمامًا لأن يده ترتعش مو بإرادته ويبي يلقى لها حل ، يبي يوقف هالنفضة بأي ثمن : توصي شيء تبي شيء أبوي ؟
'
هز راسه بالنفي : جدتك تبيك ، بتجي تسلم عليك الحين
هز راسه بإيه ينتظر خروج قصيد فقط ، ونزل نظره للأرض يبتسم حاكم مباشرة يوقف من جلوسه : حيّ بنتي !
إبتسمت بخجل ، بربكة لأن سعود بيدها هي كيف بترفع نفسها بهاللحظة تسلّم على عمها ونطق حاكم يضحك : ماشاءالله تبارك الرحمن ! ماشاءالله
رفع ذياب نظره مباشرة لأن نبرة أبوه بـ" ماشاءالله " هزّت الأرض تحته وما يتخيّل تكون نزلت عبايتها مثلاً لكن سكن داخله ، سكن كونه مباشرة من لمح سعود بيديها يعدّل وقوفه نفس فزّته بالمستشفى بالضبط ، وأشدّ صارت بهاللحظة يتوتر داخل قصيد مباشرة : ما أقدر أسلم !
ضحك حاكم يهز راسه بالنفي : الشوفة تكفي يابوك ، ماشاءالله تبارك الرحمن عساك طيبة يابنتي ؟
إبتسمت تخجل ، وهزت راسها بإيه : الحمدلله كيفك إنت عمي كيف صحتك ؟
هز حاكم راسه بإيه ولاق سعود لحضن قصيد بشكل مستحيل وللآن ما شافه بحضن ذياب ويدري بيتقطّع قلبه وقت يشوفه لأن كل ما سأل ذياب ، قال بدري وهو يدري إن العمر سرّاق ولف نظره لذياب اللي يتأمل قصيد فقط : طيب الحمدلله يابوك ، إجلسوا شوي وين رايحين
إبتسمت تهز راسها بإيه ، وطلع حاكم على نداء ريف وملاذ يتنفّس ذياب بالقوة تلمح هالشيء منه وإبتسمت : ذيابي
هي توجهت له تبتسم لسعود : ما قدرت أشيله أول شيء خفت ، ما أعرف صغير مره ذياب يدخل بجيبك فعلاً !
ما كان قادر يتنفس لأنه يشوفه بحضنها بهالشكل ، يليق بحضنها لدرجة هي ما تتخيلها ورفعت نظرها له : تشيله؟
هز راسه بالنفي ينزّل نظره ليده اللي ترتعش وإنتبهت لها قصيد تبتسم فقط : قرّب مننا ذياب ، سلّم عليه
هي تقابله تماماً ، ومدّ مرتعش يده لأسفل سعود اللي بحضنها تبتسم قصيد من كان ينعس ، يفتح ويغمض وهادي تماماً ياكل قلبها : وش يعني يحبّك عمك لهالدرجة ؟ وش يعني أحبك أنا وتاخذ قلبي على طول ؟
عضّت شفايفها ودها تصرخ : أبغا أعض ما أقدر ذياب !
هز راسه بإيه يسمع أبوه اللي نطق له ينتظرون بإنه بيروح للرجال وإن علياء تبيه لكن ما رضيت تجي للآن ولفت قصيد من توجه للباب يقفّله بالمفتاح : بيجي أحد ؟
هز راسه بالنفي يمسح على ملامحه فقط ولمحت شديد إرتعاشه يسكن داخلها : ذياب
هز راسه بالنفي يجلس ، وجلست بجنبه تركي سعود على حضنها ومدّت يدها ليده تشده : صار شيء ذياب ؟
هز راسه بالنفي ومد يده يبعد طرف عبايتها ينبض عنقها مباشرة بذهول : ذياب يجي أحد الحين !
ما إهتم ، ما كان منه الإهتمام يبي تحترق روحه مرة وحدة وما كانت منها خطوة من طاحت عبايتها عن أكتافها للكنب يبعد طرحتها عن عنقها هي تدري يبي يشوفها فقط ، بس يبي يشوفها ويشوف سعود بحضنها بدون عبايتها يبي يشوف عذابه ونبض عنقها من كانت متوقعة نظراته أساساً وبالفعل حصلت يهز راسه بالنفي يضغط على راسه فقط ينطق كلامه بالقوة : وش تسوين بي قصيـد ؟
رجّف مشاعرها فعلاً ، رجّفها كلها من نظراته وإنه تكى بيدّه على شفايفه وشنبه يسأل بجدية : وش تسوين ؟
نزلت نظرها لسعود وشتت نظره هو يمسح على راسه بشكل تشوف إن أعصابه بتنفجر ونطقت هي كلمة وحدة طلعت من بين شفايفها فقط : لا تخوّفني ذياب
ناظرها بذهول : وش أخوّفك به ! وش أخوّفك قلتلك ما أتحمل أشوفك كذا ما أتحمل وتجيني شايله سعود بعد
عضّت شفايفها لثواني مباشرة : ما تقول لي طيب !
ناظرها بذهول : وش أقول أكثر قصيد ما تشوفين ! متشفّق ! متشفّق عليك ! على ولد منك !
عضّت شفايفها بذهول تهز راسها بالنفي : إنت قلت لي لا
شتت نظره لأنها صادقة ، لأنها بآخر مرة وقت إرتكت على صدره كان منها السؤال بشبه تردد " ما ودك ننتبه ذياب ؟ نبي غير شجاع ؟ " وما جاوب سؤالها لأنها تلف وتدور لين نطقت بالخجل اللي حرقها تماماً تقطّع يده اللي بين يديها من شدتها " يعني ، تبي يصير عندنا بيبي؟ " وعضّ شفايفه وقتها ينطق بالنفي فقط " لا تخجلين مني وإنتِ بحضني قصيد ولا ما ودنا ، ما ودي " لكن ما يدري وش يصير بقلبه ووش صار له أساساً وقت شافها بهالشكل وعضّت شفايفها فقط تفهم ، للأسف هي تفهم حتى ثورات غيرته وناظرته لثواني : لا تسوي كذا قدامي
هز راسه بالنفي يلف نظره لسعود ، لوجوده بحضنها بهالشكل وهي أساساً تثور الدم بعروقه من لبسها الأحمر بدي يُشد على صدرها بدون أكمام تماماً وطوله لو حرّكت ذراعها ، لو تمددت ، يبيّن خصرها وتنورة بنفس لُونه توصل لنصف فخذها فقط : أهلكتيني قسماً بالله !
_
« أحد بيـوت آل نائـل ، بيت أمين »
زُين البيت كله لأنها خطبة رجال صحيح ، ببيت جدّها أبو أبوها لكن بتنتهي خطبة الرجال وتصرخ الأفراح عندهم بإحتفال يُقال إنه بسيط لكن يُجهز له من شهور تعرف إن الضجة بتكون رائعة بالأفراح وما تهدأ وخفق قلبها مباشرة من لمحت عمها تركي اللي يمشي قدام بيض الثياب أولهم يضحك لعذبي يلتفت له : بسم الله
إبتسمت ملاك اللي تدندن على الشباك تشوف تركي وخلفه عذبي ولده ، العريس : جاء العريس جاء العريس
ركضت أسيل تشوف ، توثّق مباشرة لأن دخولهم " رائع " خلفه عذبي الكبير وعياله تركي وفهد ، تميم اللي يضحك يضرب كفّه بكف رياض وراشد ولده مع عدي بالخلف كلهم يضحكون ، كلّهم بالمسرات يمشون وبقيتهم بالمجلس أساساً ينتظرون وإبتسمت ملاك : سُبرايز اليوم غير مستحيل تتوقعونه ، قصيد تقول بالطريق
'
أخذت ود نفس من أعماق قلبها تدخل لتين اللي تضحك مع سوار : العروس بنتي ، يا تبارك الرحمن !
مدّت ودّ يدها لأمها اللي أخذت يدها تدّورها ، يدور زاهي فستانها الأبيض حولها تتعالى " الزغاريط " من دخلت نيّارا ودخلت سلاف معاها : بسم الله على قلب ولدي مقدماً يا ودّ قلنا شوفة بس ما قلنا تخطفين قلبه !
ضحكت نيّارا : دافع أقوى منه مافيه لعذبي ، تلقينه يعجّل تخرجه ووظيفته كله لعيون إنه ياخذها بأسرع وقت !
إنحرجت ودّ تتعالى صرخاتهم لأن لتين - تهاوش - كيف تحرجون بنتي بهالشكل وعدلت أسيل جلستها بحماس مباشر : فتح فهد ! فتح فتح
هزت سلاف راسها بالنفي : على الشاشة أسيل على الشاشة تحت مشينا !
_
« مجـلس الرجـال »
بعد طويل السلام ، وضحكات السؤال عن الحال والإبتسامات لأنها كالعادة جمعة لآل نائل لكن هالمرة بمناسبة - مشوّقة جداً - وتعدل تركي يعدل ظهره : كيف حالك يا سعود كيف صحتك عساك طيب وبخير
إبتسم سعود بحماس شديد يرجع ظهره للخلف : والله الحمدلله بخير علومك إنت أبوعذبي عساك طيب ؟
ضحك تركي ما كمل ، وتعالت ضحكات المجلس كله ياخذ نفس يمسح على ملامحه بهمس لولده عذبي : هذا موقف تحطّني فيه ياعذبي ؟
إبتسم فهد اللي يوّثق كل شيء بجواله ، يفتح بث أساساً لأفراد العائلة فقط لأن تهديد قصيد له كان واضح وصريح وتهديد الكل له " ياويلك ما نشوف مجلس الرجال " وتنّفس تركي يفتح أزرار ثوبه العليا : عذبي ، قم صلّ ١٠ ركعات وقول للرجال ياعمي طالب بنتك إنتهينا !
ضحك سعود يهز راسه بالنفي : وبهالسهولة يا تركي ؟
ضحك تميم على أخوه اللي يضحك بشكل غير معقول ، وهز سعود راسه بالنفي يتكتّف ، الأرض أرضه والمكان مكانه يمد يده للقهوة : كم سنة أنتظر هاللحظة تركي تعدّها زيي وإلا ما تعدّها ؟ يومك حشرتني بالمسجد ؟
ضحك تركي يهز راسه بالنفي : زمان أول تحوّل ياسعود ، يدك بيدي نتمم للعيال جايينك جماعة نطلب ودّ بنتك لولدنا عذبي على سنة الله ورسوله لا تعقدّها ياسعود
ضحك سعود بذهول يهز راسه بالنفي : تدرون ياعيال ، كم فنجال أكلت ، وكم كلمة سمعت ، وكم ركعة صليت يوم فكّرت أخطب عمتك لتين ياعذبي ؟ وش سوى بي أبوك؟
تعالت الضحكات لأن سعود ما ينسى ، سعود ما نسى نهائياً وهي حكاية قديمة من زمان وقت خطب سعود لتين أُخت تركي وتميم وطفّشوه عليها ، من الموافقة لأبسط تصرّف منه كان يلقى تميم ، أو تركي قدامه ولآخر موقف الأشد ، كان تركي وقت لحقه للمسجد لأنه جاء للتين بدون مقدمات وصلّى سعود الفجر ، ووقت قرب منه تركي هو كبّر يصلي صلاة ثانية عشان ما يكلّمه تركي اللي وقت طالت صلاته ضرب عنقه يهمس له " لا تشوفك عيني " فقط
'
دخل ذياب يسلّم تتعالى الأصوات بمجيئه لأن تركي طلبه ، وكرر عليه بالتشديد " إنت أخو عذبي الكبير شلون ما تشهد خطبته يا ذياب ! " وسلّم يجلس يتعدل سعود : عززّت الدفاعات عندك ياتركي ما أقدر أغلط عليك بس
-
كان الضحك يتفجّر بمجلسهم لدرجة إن سلاف حزنت تصرخ : طيب ولدي أنا وش ذنبه لتين كلّمي زوجك !
ضحكت لتين لأن عذبي إبتلش تمسح على ظهر ودّ بنتها بغرور : بنتي بنت أبوها وش نسوي لازم رضا أبوها أول
صرخت سلاف بذهول : وولدي ولد أبوه ترى يجي ياخذها من يدها ويروح لا يردّه سعود ! قصيد قولي لأبوك يقوم يطقّ سعود خلاص زودها ولدي لا تعذبون قلبه حبيبي
ضحكت ود بذهول : عمـتي !
ناظرتها سلاف : معليش بنتي بس لين نضمنكم لبعض بعدين وعد مني لك ، أنا بمسك تركي ويطقّه سعود
ضحكت قصيد بذهول : مـاما !
ناظرتهم سلاف لثواني بذهول : وإبتلشت بالبنات كل وحدة تدافع عن أبوها ! بضمن ولدي حرام عليكم !
تنحنح تركي يعلن إنه بيتكلّم بجدية بعيداً عن الضحك ، وجلست سلاف تمسك يد قصيد تحس قلبها يُذوب من إبتسم تركي " نعم الرجال اللي عطيناه بنتنا يومها سعود إي بالله ، وأظن نعم الرجال اللي تعطيه بنتك ياسعود هو ولدي عذبي ولا أمدحه ، ولا أزكيّه لكنك تعرفه قبلي "
لمعت عيون سلاف مباشرة تتعالى صرخاتهم لأن المشاعر " فاضت " بما تعنيه الكلمة تحضن قصيد أكتاف أمها لأن حتى تركي مشاعره تفيض ، وضحك تركي ذاته يضرب على ظهر عذبي ولده " وغالي ، أغلى ما عندي وإلا ما جيت لك ياسعود تدور الدنيا علي وأنا تركي " تعالت ضحكاتهم يكشّر سعود اللي يشرب فنجاله " وما نخلّص من الغرور ياتركي ما نخلّص ! عذبي مـ"
نطق عذبي يبتر حروف عمه مباشرة " استهد بالرحمن ياعمي لا تقول شيء الحين ، أبوي تكفى " هو همس الأخيرة لأنهم بيتعاندون على حسابه ، وضحك ذياب من وهقة ملامح عذبي اللي يشدّ على يد أبوه اللي هز راسه بإيه " خلاص ، نعيد من أول وجديد " ، " أنا تركي اللي قبل ٢٠ سنة وحدودها خليّتك تصلي الفجر وتزوّد عليه يا سعـ
تعالت الأصوات يبترون كلامه ، وضحك تركي يتنفّس " وش هالحقد اللي بك ياسعود ! والله لو جايب ناقة من حلال الذيب وأكلمها رضت علي وإنت ما رضيت فكّها "
لف سعود نظره لذياب بتساؤل " وترضى الناقة ذياب ؟ "
هز ذياب راسه بالنفي " لا أزعلتها ما ترضى " وهز سعود راسه بإيه بتأكيد يوشك ينطق " ولا أنا برضى " لكن عذبي نطق بفزع مباشرة " وإنت والناقة مو واحد الله يحفظك ويخليك ياعمي ويعز مقامك ، إنت وهي مو واحد "
ذاب قلب قصيد لأن تأسرها ضحكات فهد اللي لو يشوفونه بداية الزواج ، ما يصدّقون إنه هو نفسه فهد من كثر مايحب ذياب الحين ..
-
إبتسم ذياب يشوف سعود اللي يحلل الكلام بعقله : فكرت بها ؟ ما قصّر عذبي ياعمّه !
تعالت ضحكاتهم من إستيعاب سعود إنه كان على وشك يضرب بنفسه مثل الناقة وما يرضى يأكد كلام ذياب وإن عذبي - بتر الطقطقة -قبل تبدأ يعدل سعود شماغه بذهول : والله ، عشرين سنة وإنت ما إستحيت ياتركي
ضحك تركي يرفع أكتافه بذهول :ووش قلت أنا ياسعود !
تنفّس عذبي يفتح أزرار ثوبه العُليا لأن التوتر وصل أقصاه ، لأنهم يطقطقون على بعض بشكل يدوخه كل ما قال جاء وقت الجد ، زاد الهزل وتنحنح تميم : خلاص يا سعود !
شهق سعود بذهول مباشرة : أنا من اليوم أنتظرك تفتح فمك يا تميم ! من اليوم موصيّنك ما تذكرني شكلك
رجع عذبي ظهره بيأس : ما حلت لك الفزعه إلا الحين عمي ؟ ما قلت لي بتلثم ما يشوفني وينسى ؟
إبتسم تميم عمه يشوف الفنجال يلوح بيد سعود : كبرنا ياسعود ! كبرنا خلاص إنسى ترى ما يحقد كذا إلا البعير وترى ولد أخوي ما يرضى علي لو رميت الفنجال يقولك إقعد ما نبي منك القرب هونّا
لف عذبي نظره بذهول لعمّه تتعالى ضحكات أبوه لأن اليأس بملامح ولده مستحيل بهاللحظة ، وإبتسم ذياب يمد يده لكتف عذبي بهمس : ارفع علومك !
أخذ عذبي نفس يمسح على ملامحه ، وسأل سعود بجدية : لو رميت الفنجال على عمك يا عذبي ، تقول مثل ما قال ؟
سكت عذبي لأنه يختبره ، لأن المجلس كله صار يختبره بهاللحظة يُرمى الفنجال على عمه سهالات ؟ أو الأسهل يقول إن مسيّت عمي ترى القرب ما أبيه وضحك ذياب يهمس له : قل اللي جاء بخاطرك ماعليك !
ما تكلّم كل الكلام تبخر من عقله من كثر الضغط ، ونطق سميّه يعطب آخر آماله : شفت الصلاة اللي صليتها قبل عشرين سنة ؟ المفروض تصليها مرة ثانية تحمد ربك سمييّ جاء لك أحد يلقى عذبي نسخة ثانية ويردّه ؟
لأن عذبي رفع ذراعه يستعرض عضلاته ، ضحك سعود بذهول : لا ، لا لا والله طالت
ضحك فهد يشوف اليأس يتخللّ ملامح عذبي بشكل غير طبيعي لأنه نزّل حتى شماغه ماعاد يقدر يتحمّله على راسه ، وضحك تركي أبوه يشوف إن ملامح ولده مالت للإحمرار ينهي الموضوع : عشان تعرف إن بنت الغالي ، غالية ما يقولون أخذها بالساهل وهي بنت سعود ، لازم تذوق المر يابوك ذاقه عمك قبلك وصبر وتجلّد لين أخذ عمتك ما وقّف ، توقّف إنت يا عذبي ؟
ضحك سعود يخفف حتى هو على عذبي : خلّك ذيب
ما كان يستوعب لين ضحك فهد : هو ذيب لا تحاتي وجاب لك ذيب معه بعد وش تبي أكثر ياعمي ؟
-
'
بكت سلاف بالمجلس مباشرة لأن ولدها ماعاد يستوعب ، وضحك تركي يترك فنجاله ينطق بجدية نهائية : نطلب القرب ياسعود ، على سنة الله ورسوله طالبين بنتنا ودّ ، لولدنا عذبي مايختلف عليها شيء ، ولا يتغيّر عليها شيء قدرٍ وقيمة مبطية وهي بحسبة بنتي ، وتزود بالحيل لا صارت زوجة ولدي ياسعود إن وافقت ، ووافقت البنت !
_
تعالت الضحكات ، الصرخات ، الإبتسامات وكثير الأحضان وأصوات البوسات لأن ودّ من زمان أعلنت موافقتها ، وتأكدت منها من يأس عذبي اللي وقت نزّل شماغه ينتظر متى يُقال له " تم " ذوّب لها عظامها لأن تتأكد من صحة إختيارها ، وعدّلت فستانها برجاء : ماما تكفين ، إنتِ معي
عدلت سلاف شعرها : أكيد أمك معاك لأني موجودة ، ما بترك ولدي لتركي ولا لسعود يكفيّه خلاص
ضحكت ودّ تهز راسها بإيه بإرتياح : يكون أريح والله قصيد
إبتسمت قصيد تهز راسها بالنفي ، تسكّر جوالها : بفوّت على نفسي المنظر للأسف بس ماما كفاية ، بروح لذياب
إبتسمت ودّ تمسح راحة يديها من شدّة توترها ، كان ودها قصيد تدخل حتى هي ويخفق قلبها من إنها تدري بهالمجلس ، ينتظرها عذبي مع أبوه لكنها إرتاحت إنّ سلاف بتدخل وتطّلعه وبالفعل دخلت سلاف تبتسم لعذبي الجالس بجنب تركي : مو الشخص المطلوب صح
إبتسم تركي مباشرة : لي ؟ أصحّ الأشخاص
ضحكت يتذمّر عذبي مباشرة : الحمدلله إن كله على عينك وشفتي وش سوّى بي زوجك ، أبوي الشاعر الحنون
ضحكت سلاف تتوجه لتركي تمسك يده وسط شديد إستغرابه : ما يضرّك ، أبوك ما يضرّك لو أيش عادي
رفع عذبي حاجبه لأنها وقّفت أبوه يستغرب : وش ؟
ما إستوعب حتى أبوه لين ضحك بذهول يصحى على نفسه : بتطردني ، هذا وش يابوك !
ضحك عذبي بذهول لأن حتى هو ما إستوعب جيّة أمه لهم : والله بسهولة ، ضيّعت علومك تو تصحى ياحبيبي
ضحك تركي يهز راسه بإيه : تجيك اللي تضيّع علومك الحين ، قصيد وينها ما يحبّني بالدنيا غيرها !
إبتسمت سلاف تهز راسها بالنفي : بياخذها الذيب بنتك !
ضحك تركي يخرج من المجلس يشوف لتين أخته ، وودّ بنتها : راضية على طردي يا ودّ ؟ أعلم قصيد ؟
خجلت ملامحها مباشرة تضحك لتين : بعدين نتفاهم مين اللي راضية بطردك !
ضحك يتوجه لمجلس الرجال ، ورجفت ودّ ما تتخيل إنها بتدخل بهاللحظة له يشوفها " خطيبته " والشوفة كانت بطلب منها مو لأنها ما تعرفه ، ولا لأنه ما يعرفها لكن لأن ودها تتأكد من إنه حقيقة مو خيال ولأن ودها تشوف تعابيره وخَفق قلبها دخلت أمها قبلها ، ودخلت هي يرنّ كعبها بإذنه من أول خطوة كانت منها يوقف قلبه ، ما عرف حتى يتنفس لو ما ضحكت سلاف تمسح على ظهره لأن نظرة ولدها ، نظرة مُحب تحققت أحلامه بأزهى شكل ، بأزهى حلّة بالأبيض اللي تزيّنه ألوان الورود وتوجهت تجلس أمامه ، بجنب أمها تشوف نظراته ما رمشت عينه فعلاً يهمس بالذهول : والله ما أنتِ ؟
ضحكت سلاف ودّها تصرخ ، عرفت وش بتكون إستفتاحية أغاني ليلتهم من همسة ولدها اللي جمّع لسانه ينطق بتساؤل : كيف حالك يا ودّ ؟
رجفت خجل تنطق وودها تصرخ من ضحكات أمها وسلاف المخفية ، نظراتهم المشعّة : الحمدلله !
إبتسمت لتين تجبرهم يشتتون النظر : شافت اليأس على أصوله بنتي ، لهالدرجة عذّبوك ؟
ضحكت سلاف من هز عذبي راسه بإيه يبتسم : ما ضرّني
-
طلع من مجلس الرجال لأنه بيمشي ، يشوف أشبال فهد اللي يركضون بالحديقة وصاروا يركضون بإتجاهه يبتسم لهم ، وإنحنى يمسح على رأس واحد منهم : آخذك عند البل ؟ صغيّر المشكلة أخاف على ضلوعك
رنّ جواله برسالة من سكرتير سموه " بالقصر العائلي " ، وتوجه لأنه بيودّع قصيد ويمشي لكن للآن ، ولهاللحظة هو مو هاين عليه لبسها نهائياً ومشى يشوف إنّها واقفة تنتظره ، تعدّل شعرها ولابسة عبايتها : العباية لي يعني ؟
إبتسمت بسخرية : يالله ذياب كيف تحبّ تعقدها ، قلتلك ما بلقى أحد
ما رضى ، ولا بيرضى مستحيل : شلون بتقنعيني قصيد ؟
رفعت أكتافها بعدم معرفة : إجلس عند الرجال وبتقتنع وقت تشوف ، سهلة مرة مافي أسهل منها !
هز راسه بإيه يمسح على شنبه فقط : تبين شيء طيب ؟
ترددّت لثواني تشتت نظرها : أهل الكويت جايين
رفع حاجبه لأن وش أهل الكويت وسرعان ما سكنت ملامحه تماماً يتذكر ، ضحك فقط يهز راسه بإيه : أهل الكويت ، جيران لندن جايين .. قصيد تستهبلين معي ؟
هزت راسها بالنفي : وأنا ما كان عندي خبر ، تو دريت
نطق " إيه " فقط يرنّ جواله مكالمة من أسامة ينطق بكل هدوء لأنه بيثور لا محالة : إنتبهي لنفسك وتحصّني
ردّ على أسامة يشوف إنها ما تحرّكت من مكانها قدامه وجات الأشبال تتبعه ، جاء أبوها اللي يتمشى بالحديقة وإبتسم مباشرة يمشي لها بهمس من إبتعد ذياب بشكل جزئي : يكلّم من ؟
إبتسمت من جاء يسلّم عليها ، يقبّل خدها : أسامة
دخّلها تحت جناحه يبتسم : جاك العلم ؟ طردتني أمك
ضحكت لثواني : ماما اليوم عندها عذبي وما تشوف غيره نهائياً ، لازم تراعيها لو بيدها قبل شوي دخلت هي المجلس وياويل سعود لو يقول لا
ضحك يهز راسه بإيه : أمك ؟ والله تسويها أعرفها ، وكيف حالك إنتِ حبيبتي ؟ كيف أموركم ؟
قصيـد : بأفضل حال الحمدلله
صار يسمع مقدمة موسيقية صدحت بالجو يعرفها ، يستغربها لأن وش جابها عالبال ، ووصلته رسالة من سلاف تلمع عيونه يلفّ الجوال لها " تسمع الصوت ؟ طلع الشاعر بعذبي أول ما شاف ودّ قال والله ما أنتِ ! "
'
يضحك هو : أمك ما تفوّت الله يحفظها ، تعرف لهم
إبتسمت لأنها حتى هي سمعت اللحن ، وصارت تسمع أكثر من رفعوا الصوت جزئياً : يعني إنت زوجها كيف تبيها تفوّت أشياء كذا ؟
هز تركي راسه بإيه يغنّي مع الصوت ، يبتسم " عذبة أنتِ ... كالطفولةِ ، كالأحلامِ ، كاللحنِ ، كالصباحِ الجديدِ " وضحكت قصيد لأنه يغنيّ بالهمس ، وإبتسمت حتى هي تغنّي معاه " أنتِ ، أنتِ ما أنتِ ؟ ، أنتِ رسمٌ جميلٌ عبقريٌ من فن هذا الوجودِ .. " وضحك تركي لقصيد : حلّت عقدة لسانه بنت سعود ، تعّبني هذا الولد
إبتسمت قصيد : بس ذويّق ، بحسد ودّ مقدماً لأن وش يعني تاخذ ولد الشاعر وذوقه رهيب من أول شوفه كذا ؟
ضحك تركي ، وإبتسمت هي : مبسوط عذبي ، مره
هز تركي راسه بإيه يشد على ظهر بنته بإرتياح من جاء ذياب : أدري فيه مبسوط وإنتِ بعد ووش أهم عندي من شوفتكم مبسوطين ؟ الحمدلله
وهمس نهاية كلامه : هو يقولها لزوجته ، أنا أقولها لبنتي
ضحكت تتورد ملامحها خجل ، وضحك تركي يودّعها للداخل ، يسمع ذياب الصوت لكنه ما يميّز ، وما تكلّمت هي يشوف إنها تخجل للأغُنية رغم إن أكتافها تتمايل عليها وإبتسمت تشوف إنه " يثور " بعدم إهتمام تغنيّ له لأن نظراته ما تفارقها : يا لها ، يا لها من وداعةٍ ، وجمالٍ ، وشبابٍ مُنعمٍ أملودِ
_
ضجّت الأفراح تخجل ودّ ، يهلكها الخجل لأنها تسمع بشكل يضجّ العواطف داخلها إلى درجة الإحساس إنها وحدها بهالكون وكيف ما يصيبها هالإحساس وأُهديت لها ، من أول نظرة ، "عذبة أنتِ " على لسان محبوبها ،
من تبدّلت الأغاني يرقصون ، تشوف الكل يرقص وضحكت تصرخ خجل من جات لها سلاف اللي تتمايل أوّلهم تاخذ بيدها ، تسمع تصفير أمها تصرخ بـ " ياعروس " ، تسمع أصواتهم هم بالغناء لأن فعلياً " الحب بالأجواء " من كل الإتجاهات علناً مو سر وتتوقع على حال عذبي ، هو ما بيكتفي بالخطبة فقط هو بيطلب يعقدون لأنه ما بيتحمل بدون شوفتها ..
-
ما كان عذبي قادر يمسك سروره ، كان يبيّن بملامحه من وقف عذبي سميّه يرقص : قم دام العرس مطوّل قم !
ضحك تركي يعدّل أكتافه من لمح توجه ذياب للبوابة الخارجية يتنهّد فقط لأنه طلبه يجلس ، لكن إعتذارات ذياب كانت صادقة بإن ودّه ، لكن ما يقدر وعذره يهمس : الله يحفظك
-
« القصـر »
دخل يعرف إنها نهايات شغله ، بدايات الوداع لأنه وضّح بشكل كافي إكتفاءه من كل شيء وحتى كرسيه بالوزارة وقت صار له ولرجعته بأي وقت هو ردّه ما يبيه لكن هالمرة الواضح الجمعة ماهي لشيء هيّن نهائياً ، من قل الرجال الموجودين ، ومن نظرات أسامة القلقة ينطق سموّه بنبرة مُقلقة : ذياب ، وش تسوي يا ذياب ؟
رفع حاجبه بإستغراب : أخطيت بشيء طال عمرك ؟
هز راسه بالنفي ياخذ نفس من أعماق قلبه : جاني العلم ، وشفت الورق بعيني يا ذياب وش تسوي إنت ؟
رفع حاجبه لثواني بإستغراب أي علم يقصد ، ووش مقصده وأي ورق بالضبط ما يدري وعدل أسامة أكتافه فقط : بنت صلاح طال عمرك
عصّب سموه مباشرة يرجع ذياب جسده للخلف بهدوء : قصة وإنتهت طال عمرك ، مالها دخل بشيء
ضحك يهز راسه بالنفي : لا ما إنتهت يا ذياب ، ما إنتهت لأن الدنيا ماهي على كيفك ولا عمرها بتكون تدري وإلا ؟
ناظره ذياب لثواني لأن الموضوع ما يهمّ سموه لا من قريب ، ولا من بعيد ، ورجّع سموه جسده للخلف بكل هدوء : إنت من مدة ، تدري إنها بالرياض وكل ما سألتك يا ذياب به شيء مقلقك ؟ به شيء مأذيك تسكت وما ترد
سكت لأنه دفن موضوعها ، ودفنها كلها بعيد عن الرياض والسعودية كلها بوعيد ، بنيران من الغضب ووقت صار يحس وجودها ، كذّب ظنونه لأنها مجنونة لو تخالف غضبه وترجع : وش تقصد طال عمرك ؟
نفض صدر أسامة فقط : طويل العمر ، يوم درى بالسالفة ردّها الرياض وقال لها إنتِ بحمايتي طول ما إنّك ما تعترضين لذياب لا بالخير ، ولا بالشر
دارت به الأرض تحت أقدامه لوهلة لأن مستحيل ، وش مصلحة سموّه حتى من هذا الفعل ووش يدرّيه بالحكاية كلها أصلاً وعدّل سموه كلام أسامة فقط : رديّتها للرياض يوم تواصلوا معاها الرجال ، وقالت كلام له أوّل ماله تالي عنك يا ذياب ، تسولف كأنها تشوفك قدام عينها
إرتعشت يدّه فعلاً ، ونطق سموّه بقلق " أبوي " بحت : لأن تصرّفاتك يا ذياب تصرّفات اللي ماله كبير
سكت فقط يحس صدره يحترق بهاللحظة ، يشد قبضة يده فقط ونطق سموه بهدوء : كلّمت أبوك اليوم ، قبل لا أقول لك تجي ونفتح الموضوع معك إنت ما عاد لك بها ، أبوك خبرة ويعرف شرّها وخيرها ويشوف باللي يصدّها عنك لأن يوم كلمتها ، هي حقدها دفين يابوك
ما تكلّم يشوف أسامة إن ذياب يشتعل ، ويشتعل أسامة نفسه لأن من شهور ذياب يتوجّس من أبسط طيف وكل ما سأل عن العجوز ، قالوا له إنها بمكانها ما تحرّكت لكن هو يحس أحد يراقبه ، يحس أحد يشوفه ومسح على شنبه يستوضح الأمور فقط : يعني طال عمرك ، إنت رديّتها تبي شرّها على عينك وعلى عين أبوي ؟ ومن شهور يوم اسأل ويقولون لي بمحلّها هم يكذبّون علي ويدرون ؟
نطق أسامة يشتت نظره لبعيد فقط : وعليّ طال عمرك
هز سموّه راسه بإيه يزيد خَفق قلبه بشكل مجنون وهذا أكثر ما يجننّه ، هذا أكثر شيء يكرهه ونطق سموه بهدوء : نعرف مصلحتك ، والموضوع حنّا بنحله ياذياب بالرضا ماهو بالتهديد وماهو موضوع جمعتنا اليوم ، يوم تقابلنا أنا والوالد قلت له ذياب بيترك مكتبي ، وما يبي الوزارة وين بيروح بعمره وتواصل معي أبونصّار قال ما وده حتى عندنا ؟
مو منطقي ، الكلام اللي يسمعه بهاللحظة من سموّه مو منطقي : إنت قابلت أبوي طال عمرك ، وتناقشتوا عني ؟
هز سموّه راسه بإيه : وأبوك ماهو راضي ياذياب
نُفض صدره فعلاً ليه يسمع هذا الكلام من سموّه ، أبوه كان يقتله بكلامه بكل مرة عن الوزارة والبشوت ليه بهاللحظة قرر العكس وما يرضى : طال عمرك
إنتبه أسامة إن يد ذياب ترتعش لأنه يعصّب ، لأنه جداً يعصب ويحاول قد ما يقدر ما يفلت لسانه ، يحاول يتفهّم : متى قابلته ؟ أبوي ؟
ناظره سموّه لثواني يشتت نظره بعيد فقط ، يبيّن إنه من وقت بعيد ورجفت ملامح ذياب فقط يحاول يتماسك ، ومسح على ملامحه يرفع نظره لسموّه ، لعينه : أذكر إنها حياتي وأنا أولى بها طال عمرك وبمشاكلها كلها
نطق سموه بهدوء وهو يعرف شخصية ذياب : حياتك ، لكن لك كبير وأبوك الله يطول بعمره إنسان ماشفت مثله
سكت ذياب ، فعلاً سكت يهز راسه بإيه : الله يطول بعمره
وقف بيمشي ، ونطق سموّه بهدوء : ولا تخاف ياذياب ، ولا تشيل الهم يا أسامة رجالنا حولك طول الوقت .. بعّد صاحبك وقرّب عدوك من عينك ياذياب ماهو العكس
_
« مكـان آخـر »
رسل رسالة وحيدة لذياب ، رسالة يعرف إن موعدها بهاللحظة لأنه يدري وصل الخبر لمسمعه من سموّه وجلس بهالمكان بالذات لأنه ما عاد يبي الأسرار ، يبي يكمّل الوضوح اللي يبداه سموّه ويبي يرجع حياة ولده لمسارها ، يحاول عالأقل وأخذ نفس يشتت نظره فقط : يالله العون
شتتّ نظره لمكانهم اللي يُلقب بالسر المفضوح ، يرجع أكتافه للخلف وعينه على البوابة ينتظر متى يدخل ذياب لكن سكنت ملامحه من دخلت هيئة حُرمه ، تحرّك عكازها قبلها تنفر ضلوع حاكم مباشرة : وش جابك !
إبتسمت بهدوء تشتت نظرها فقط : تهابني ياحاكم
رصّ على أسنانه فقط لأنه ما يهابها وهي نفيت قبله أساسًا : ما تهابني ، ما تشابه نهيّان ، ولا تشابه ذياب
ما فهم لوهلة ، وكمّلت هي : نهيان قبل سنين ، يوم قررّ يكفّني عنه رماني للإمارات يخطط دنيتي وحياتي بكيفه ، وحفيده قبل شهور ، رجع يكررّ فعلته نفسها يكفّني عنه
هز حاكم راسه بإيه بهدوء يضمّ أكتافه خلف ظهره فقط : نهيّان وذياب قلوبهم طيبة ، أنا حاكم
إبتسمت تهز راسها بإيه ، تبتسم بخُبث العالمين : وأنا ما جيت للشر ، أعرف إنك حاكم
رفع حاجبه لثواني يناظرها ، وإبتسمت بهدوء : جاكم ولد
توجّس داخل حاكم لوهلة يغضب مباشرة : إخلصي علي
إبتسمت تهز راسها بالنفي : الذيب جاي ، كلامي معاه !
ضحك حاكم بسخرية يهز راسه بالنفي : وبخليك تشوفين ولدي أنا ؟
'
إبتسمت هي لثواني فقط تتأمله : ولدك ؟
نطقتها بطريقة " مشككة " ، بطريقة ما حسّ فيها حاكم إعتيادية نهائياً وإبتسمت هي تتأمله لثواني فقط ، ما تنوي الشر ؟ ، لا هي ما تنوي حاكم فقط واللي سأل بإستغراب شديد : وش يدريك عنه لو كان جاي ؟
ما جاوبت سؤاله تتأمل المكان حولها ، أفضح أسرارهم ولفّت لحاكم اللي كان يدرس خطواتها ، يدرس ملامحها ، يدرس تحركاتها ودّه يفهم وعدل أكتافه بهدوء : وش تبين من ذياب ؟ ردّك مثل ما ردّك نهيان قبله وتدرين به
هزت راسها بإيه ، ونطق حاكم بهدوء : ولا نسيت يومك تقولين بتبكي عليه تـ
قاطعته هي تلمس جذع النخلة جنبها ، تتحسه : ردّها لي ، ثار يقول من إنتِ تهددين أبوي بي تبينها .... ؟ لك اللي تبينه ودريت إنه يقصد بنيتي ، يقصد ضحى
-
ما تركه أسامة لو لحظة لأنه ما عاد صار يحسّ فيه يشوف هالشيء ، من وقت طلع من قصر سموّه ما عاد حتى يسمع نداء أسامة لأنه يحس الحرارة تتفجر بعروق راسه وركض أسامة يوقفه بصرخة : ذيـاب وقف !
لأنه وقف قدامه ، لأنه نفض صدره يدفّه للخلف يبيه يستوعبه هو ما عاد يشوف على الأرض مخلوق هو رفع يدّه ، رفع قبضته لو كمّلت طريقها لملامح أسامة هشّمت وجهه لكنه صرخ بغضب يشدّ ياقته بيده الأخرى ، يتمالك نفسه : لا تقرّبني !
ما رمش أسامة رغم إنه توقّع اللكمة بتهد فكه ، ما رمش من مسكه ذياب مع ياقته بهالشكل يهز راسه بالنفي بإصرار رغم صرخة ذياب : ماني مجنون أخليك والله !
دفّه ذياب لأنه بيجنّ ، بيجنّ بمحله هو له شهور يتأمل أبوه ، وأبوه يتأمله ، يلمس قلقه ، ويعرف مخاوفه ، ويعرف تخبطّه كله لكن ما حذّره ، ما قال له شيء وبالشهور الماضية كلها فَنت روحه فعلاً بمحاولات ، بس بمحاولات لأن أبوه ما يُهلك بالتفكير بإنه ضيّع العمر عليهم وإن الموت حسرات ورجف صدره من الألم يغمّض عيونه وفز أسامة مباشرة : ذياب ، هدّ نفسك !
هز راسه بالنفي فقط عينه تتأمل السر المفضوح اللي بنهاية الشارع ، وش يجمع من بأسه عشان يشوف أبوه ويلقاه ما يدري ووقف أسامة قدامه مباشرة : تكفى ، تكفى لا تروح الحين وهدّ نفهم الموضوع أنا ويّاك ، نحله
وقفت ملامح ذياب كلها من لمح هيئتها ، من لمح خروجها مع بوابة السر المفضوح تبرد عظامه وما حسّ أسامة اللي تعثّر من بعّده ذياب بالقوة يمشي بإتجاه البوابة ينطق بالذهول : تبين موتك إنتِ تبينه !
ركض أسامة مباشرة لأن خطوات ذياب كانت تسرع لها ، لأنه يعرف إنه بيقتلها لامحالة ومدّ ذراعه يحاول يمسكه لكن ما قدر ، ما قدر لكن بوجه ذياب كان حاكم الخارج من البوابة واللي مدّ يديه لصدر ولده يوقف إندفاعه بالقوة : ذيـاب !
هي إبتسمت لذياب من خلف حاكم المذهول ، إبتسمت لملامحه المخطوفة : سلّمت على أبوك
هدّت حيله بجملة وحدة فقط لأنه يشوف عيونها ، يعرف هو كيف بثّ الرعب بقلبها من قبل لأن ماله نية يوصخ يديه فيها لكنها شافت أنيابه وقت كشّر عنها يهددها ولف نظره لأبوه اللي يمسك صدره ، يقيدّ ذراعه وهمس يرصّ على أسنانه : أبـوي
هز حاكم راسه بالنفي يشد على ذراعه بقوة تكسر ذراع ذياب مو بس تصدّه لو شدها أكثر ونطق : ماهي صاحية يابوك وأغلب الظّن تتعامل معهم لا تقرّب منها عنـ
صرخ ذياب بذهول يقاطعه : ما عندها إلا الضعوي ماعندها !
ضحكت بنبرة رنّانة يلف حاكم نظره لها بغضب : تحرّكـي !
ما تحرّكت من مكانها يشوف ذياب بعيونها بس أبشع أيامه ، هبّت عليه الريح بأبشع أحداثه منها ، من عذبة اللي ثارت لقصيد بالبر وحدّها يقتلها هو ولألف حدث وحدث آخرها موت لزام اللي يكذب ، هو ما تخطّاه وما تخطى فجعته فيه للآن وكله ونطقت هي تبتسم له : اللي يخلّف ما يموت يا ذياب ، ما مات نهيّان
صرخ بغضب إنها للآن تسولف وأبوه يردّه ، وأسامة يردّه أو يحاول يردّه من إحكام قبضة حاكم عليه ونطق حاكم يصرخ فيها : تحـركي لا أكفـر فيك تحركي !
إبتسمت لثواني تكمّل بهدوء : وما مات متعب ، ولا بيموت حاكم يوم قالوا آل سليمان جاهم ولـ
ما قدرت تكمّل كلمتها من مُدت يده تخنقها أبوه يقيّد يد ، لكنه فلت الأخرى وما قصّر ، حاول حاكم يثنيها ويعرف إنه يألمه لكن يدّه مُدت تشدّ عنقها يصرخ أسامة يحاول يفكّ يده عن عنقها لأنها بتطيح " جثة " لو كمّل يخنقها بهالشكل : أنا أقيدها ، أنا أمسكها ذياب تكفى ذيـ
ما تحمّل حاكم يغضب ، يلوي ذراع ذياب خلف ظهره يردّه للجدار بغضب : إهجد ! إهجد يابوك إهجد سم بالرحمن !
ما تكلّم ، ما عاد تكلّم من الشعور اللي يحسّه ومشت العجوز بعدم إنتباه حتى من أسامة اللي هَلع داخله من تقييد حاكم لذياب بهالشكل ، إنه يردّه ضد الجدار وطلّع شخصية " الفريق " جدياً عليه : طال عمرك !
نفض يديه من أبوه ، نفض نفسه كله من أبوه كانت منه نظرة وحدة لعين حاكم ، نظرة سمّرت خطوته بالأرض وما عاد تكلّم حتى لأسامة نفسه يمشي للخلف ، يمشي لسيارته وقرّب أسامة يركض خلفه لكن حاكم مسكه بمحلّه : إنت بتقعـد هنـا !
-
ركب سيـارته يشوف الاوراق اللي ما كانت موجودة ، اوراق ما يعرف محتواها وما أعطاه بال لأن وده يمشي عن هالمكان بأسرع ما يكون ومدّ مرتعش يده من إبتعد كفاية ينزّل عينه لأول ورقة يشوفها ، يقلبها بيدّه عجز يرجع عينه للخط لو لحظة من اللي تشوفه عينه بالورقة ، صورة على كبر الورقة كلّها لملامحه ، لإبتسامته ، آثار السنين القاسية والطويلة بتجاعيد وجهه أكثرها حول عيونه من إبتسامته مع هيبته اللي ما كسرها الزمن بنظرته ، أحمر شماغه ، أسود عقاله ، وبُني فروته مع ثوبه الشتوي هلكته ما قدر يرفع عينه ، ما قدر حتى يستوعب كونه مبطي ما شاف لنهيّان صورة ، من مدة ما شاف لفقيده ، وظهره ، وسنده ، وشمسه وظلّه من مدة لأن قلبه ما يطيق وبهاللحظة يشوف صورته كأنه قدامه من كُبرها ، من دقّتها .
_
« عنـد آل نائـل »
كانت " سهرة " على أصولها فعلاً وبهاللحظة يجلسون حول بعض يسولفون لأن الرقص ، الأغاني ، الصرخات ، والضحكات والألعاب والتصوير ؟ خلّصت كل هالفقرات وإبتسمت ودّ تنزل كعبها : قصيد معانا وإلا بعالم ثاني؟
إبتسمت قصيد تهز راسها بالنفي : معاكم أكيد
سلاف مدّت لها كوب قهوة : ما رجع ذياب عند الرجال ؟
كان منها الرفض فقط وهي قلبها " ينبض " بشكل غريب لأنها رسلت له من وقت ، لأنه طوّل وهو قال لها بيرجع وما بيطوّل ولأن هالوقت ، وعده لمشيتهم تنتبه إن ساعة رسالتها تأشر على " 2:22 " يخفق لها قلبها ، وإبتسمت ودّ من دخلت أشبال فهد : يعني إحنا اليوم سوينا حظر على الرجال جميعاً والعيال ، أشبال فهد وش تصنيفهم؟
إبتسمت أسيل : حيوانات
ضحكت قصيد تهز راسها بالنفي بتحذير : لا يسمعج
إبتسمت سلاف : ياحلوها أم ناصر جايين متعنيين وآخر شيء ما جلسوا ، أقول لها خليّك تقول والله مرهقة برتاح بس قلنا ولدنا شلون ما نشهد خطبته ؟ حتى على عذبي سلّمت ياود تبارك له تقول له زينة البنات عروسك
تعالت الضحكات على خجل ودّ ترفع ملاك حاجبها: شنو يعني المفروض ودّ تغار من خالتي أم ناصر ؟ حسبة أمه
لفت نيّارا نظرها لقصيد لثواني : قصيد ما بيتغيّر شيء وش فيك كل شوي تفتحين الجوال وتقفلينه ؟
داخلها يقلق ، داخلها " خائف " بشكل ما تلقى له مبررات وإبتسمت تهز راسها بالنفي من وصلتها رسالة عذبي " بنمشي الحين ، تمشين معنا ياويلك تقولين لا " تلف نظرها لأمها : عذبي يقول هم بالسيارة
هزت سلاف راسها بإيه تعدل عبايتها : معانا قصيد ؟
كان منها الإيجاب تتعالى الأصوات لأن بدري ، لكن ودّهم يرتاحون بعد وسلاف ودها تلقى عذبي وتركي تاخذ الأخبار ورفعت قصيد طرحتها لأعلى راسها تجاوب سؤال أمها : لا بالسيارة بس ، برجع البيت
هزت سلاف راسها بإيه تضحك : أقول ما يخليّك الذيب
إبتسمت وتوجهت تركب أمها قدام يسوق تركي أبوها ، وهي وعذبي بالخلف وإبتسم من أول دخولها : ممنوع دخول الرجال أجل ؟ حتى علينا ؟
رفع تركي أبوه حاجبه بإستغراب : وإنت مو رجال ؟
_