أنت تقرأ

انت الهوى ، كل الهوى برد ولهيب🤎

Romantizm

- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...

#الاوطان #بر #حب #دلال #ذياب #روايات #ريم #سعودية #شعر #قصر #قصيد

بارت ٣٩

14.5K 238 38

بواسطة rwaiahh6

بقلم rwaiahh6

« بيـت حـاكـم »
جلسـت تتقهوى وعلى مسامعها سوالف ديم ونهيّان ، شرود حاكم ، وسكونها هي وإبتسم نهيّان يرد على جواله : هلا حبيبتي ، هلا يا كل الورد ياورد
ضحكت ورد : يا أهلين ! كل هذا الترحيب لي لحالي ؟
إبتسمت ديم لأن نهيّان قرب الكام لها : وحشتينا !
إبتسمت ورد مباشرة بحب ، بشوق لامُتناهي وبسرور أكثر لأن جلسة نهيّان بهالشكل وديم جنبه ، توضح على ملامحها الإرتياح ، وتوضح على حركتهم الراحة أساسًا ما بينهم كثير المسافة تغرق عيونها وضحك نهيّان : بدري ! بدري ما شفتي شيء ما شفتي إلا أنا وديم الحين نبكيك
لف الكام على أمه تحتقن ملامح ورد مباشرة ، وضحك لأن ملاذ إبتسمت بحب : وحشتيني يا أمي !
ضحك نهيّان لأن أمه " بتبكي لو بعّد الكام عنها " : ورد
كانت مركزة بالكام وهي تمسك دموعها بالقوة ، كانت تمسكها بالأصح من لفها لكل زوايا البيت وصُولا لأبوه الجالس على الكرسي المفرد ويده على دقنه يسمع لها لكن وقت لفّ نهيان الكام بإتجاهه هو عدل كل جلوسه يتقدّم ، تتكي يدينه على ركبه وإبتسم : هلا بنتي !
بكت مباشرة تبعد الكام عن ملامحها ، وضحك نهيّان : والله يفز لها حاكم حتى جلسته عدلها عشانك !
إبتسم حاكم : كيف حالك يا ورد
أخذت نفس من أعماق قلبها تمسح دموعها بعشوائية ، ترجع للكام : الحمدلله تمام ، كيف حالك إنت كيفكم
إبتسم يهز راسه بإيه : بخير الحمدلله يابوك ، بخير بس إنتِ كل ما دقيتي علينا بتبكين يا ورد ؟ كل ما شفتينا ؟
إبتسمت تاخذ نفس من أعماق قلبها : توحشوني ما أقدر
ضحك يهز راسه بإيه : وكيف حاله نصار ؟
إبتسمت ورد بإرتياح : الحمدلله بخير يسلم عليكم
إبتسم حاكم : الحمدلله ، الحمدلله سلمي لنا عليه
_
« قصـر ذيـاب »
حضنت جوانا لآخر مرة لأنها ما قصّرت معاها ، لأنها رتبت كل شيء فعلاً وبنزول ذياب للقهوة والغداء هي صعدت غرفتهم بالأعلى تجهّز لها ملابسها وتحط ملابس ذياب بالشنطة لأن قصيد جهزتها : شكرًا جوانا
إبتسمت جوانا تضمها ، تنطق لها بلقبها المفضل " بيبي " تضحك قصيد خلفه : كبرت جوانا ، كبرت خلاص !
ضحكت تضرب كتفها تودّعها لأن السواق بإنتظارها ، وأخذت قصيد نفس من أعماقها عينها تنتظر ذياب اللي هز لها قلبها كله من طلع بيده شنطتهم ، وشنطة يدّها اللي عليها لكن سكن قلبها كله من الكاب اللي بيده تُذهل لأنه كابها ، لأن بعد الحادث كان معاها لكن تركته بالدولاب وما توقعته يدري بمكانه ولا يدوّره : ما نسيته ؟
هز راسه بالنفي يقفّل الباب : أدري به ، ما نسيتي شيء ؟
إبتسمت لهدوئه لثواني ،
لأنه بثوبه لكن بدون شماغ وبديله أسود الكاب اللي بيلبسه : هادي أكثر من اللازم
رفع طرف حاجبه تناظره لثواني : وما قلت لي لا
إبتسم بإستغراب : وإنتِ تبيني أقول لا قصيد ؟
ما تدري ، لكن تدري بإن حيرتها منه كثيرة وتزيد كل شوي لأنه هادي ، هادي لدرجة الجنون وتوجهت تركب لمكانها يركب بجنبها : ما قلت لي شيء بشكل غريب مره يعني
رفع حاجبه لثواني : ما صحيت قلتي طيارتنا بعد ساعتين؟
هزت راسها بإيه : قلت بس إنت بس قلت تمام وبس
ضحك يناظرها بذهول : وش أقول قصيد ؟
رفعت أكتافها بعدم معرفة : يعني إنت ودك ؟ عادي ؟
حرّك عن بيتهم يستودعه ربه ، ونطق : لا ما ودي من قال
كشّرت مباشرة لأنه ما يرد عليها بجدية لكن ما بتعلق تبي تشوفه ، بس تشوفه وفعلاً ما بعدت عينها عنه طول الطريق اللي مرّ بالسكوت منها لأنها هي ودها تشوفه ، ودها تعرف شعوره للرياض قبل كل شيء بما إنهم يودّعونها ولو كان لمدة بسيطة ، ولو كان لوقت بسيط لكن بالنسبة لها ولشخصية ذياب هذا وداع - ما يليق بالرياض - ، ما يليق بشخصيته " نهائيًا " لأن الوقت ما يسمح يمرّون أهلها ، ولا أهله وطول الطريق من بيتهم للمطار يدّها بيده ، ما تفارقه لكن بالسكون الرهيب منها تسمع مكالماته لمحمد ، لأسامة ، توصياته وفعلاً تبي تعرف شخصيته ، تبي تعرف أطباعه بالسفر لأنها حاولت تتوقع لكن ما تلاقي الإجابة إلا بمواضيع تخصها : ذيـاب
لف نظره لها وهو ساكن ، فيه سكون غير طبيعي من وقت قالت له للآن لدرجة إنه ما تكلم بشيء : عونك
قصـيد : فيك شيء ؟ لأن من البيت للآن ما قلت شيء
إبتسم يهز راسه بالنفي فقط : ما بي شيء ياحبيبتي
عضّت شفايفها لثواني ترفع أكتافها بعدم معرفة وتكلّم هو قبلها : تراقبين كل حركة مني ، إنتِ بك شيء ؟
رفعت قصيد أكتافها بعدم معرفة : مدري ، أحس غريب
ما علّق لأنهم وصلوا المطار ، لأنه وقف سيارته بالمواقف ينزل ، ياخذ شنطتهم من الخلف ونزلت هي تحس " خفق قلبها " ما يخفّ من جاء بجنبها يمسك يدها : غريب ؟
لأن يدها ترجف ، هو لف نظره لها : وش فيك قصيد !
ناظرته لثواني لأنها ما تعرف ، فعلاً ما تعرف وما تخيّلت وقت يصير الجد ، وإنهم بالمطار فعلاً يكون شعورها بهالشكل : خفت ذياب !
رفع حاجبه يوقف وسط مشيه ، يلف نظره لها : نعوّد ؟
ضحكت لأنها ما تعرف ، فعلاً ما تعرف لكن الخوف اللي تحسه بهاللحظة مو طبيعي : لا ، لا تشوفني كذا ذياب
إبتسم فقط لأنه يفهمها ، يهز راسه بإيه يكمّلون مشيهم للداخل ولصالة الإنتظار المخصصة لهم تاخذ نفس من أعماق قلبها لأن باقي وقت : نرسل رسالة ؟
هز راسه بإيه يتأمل الصالات بهدوء : اللي تبينه قصيد
عضّت شفايفها تناظره ، وطلّع جواله من جيبه لأنه ما يقدر ويدري بأبوه بشكل كافي : بدق على أبوي
هزت راسها بإيه يسكن داخلها : بكلمه معاك
ناظرها يجلس بجنبها ، ودق على أبوه يشتت نظره لأنه حتى الرد ما يضمنه حاليًا ونطق من رد : السلام عليكم
رد حاكم السلام بكل هدوء الأرض يرفع ذياب يده لجبينه لأنه يعرف حتى نبرات أبوه ، وتكلّمت قصيد : كيفك عمي
رفع حاكم حاجبه بإستغراب : قصيـد ؟ هلا بنتي الحمدلله كيف حالكم إنتم يابوك عساكم طيبين
إبتسمت بهدوء تراقب ملامحه : الحمدلله طيبين وبخير
نزل ذياب يده عن جبينه يسأل : أمي حولك أبوي ؟
كان من حاكم النفي : لا ، راحت مع ديم لبيت عمك
هز راسه بإيه : حنّا بالمطار قلنا نسلم عليك وعلى أمي دام الوقت ما سمح نمرّكم ، تبون شيء توصون شيء ؟
سكت حاكم تمامًا يسكن داخل ذياب لأنه يعرف أبوه ورجع حاكم ينطق : ماشاءالله ، أستودعكم الله يابوك سلامتكم وتروحون وترجعون بالسلامة إن شاء الله
إبتسمت قصيد فقط : الله يسلمك عمي ، تفهمنا صح ؟
إبتسم حاكم بهدوء : معذورين يابوك ، معذورين الله يحفظكم ويستر عليكم وإن وصلتوا عطونا خبر
لف ذياب نظره لها لأنها سلسة ، لأنها تتعامل مع الموضوع بسلاسة مستحيلة وتكلم أبوه بطريقة هو ما يتخيّلها ولا يتوقعها ونطق حاكم : أستودعكم الله ياذياب
هز راسه بإيه : الله يحفظك ويخليك ، مع السلامة
سكر من أبوه يلف نظره لقصيد : تدقين على أبوك إنتِ؟
هزت راسها بالنفي تبتسم : من جوالك مافي فرق
نزل بالأسماء لعمه تركي تبتسم ، فعلاً تبتسم لأنه مسميه " عمي تركي " بشكل حرّك شعورها ما تدري ليه وإبتسم تركي يرد : يا هلا ، جانا العلم يا ذياب قصيد جنبك ؟
ضحكت قصيد مباشرة يبتسم ذياب : من قال لكم
إبتسمت سلاف : جوانا ، ما تحمّلت وقالت مسافرين
إبتسمت قصيد : كل شيء صار فجأة بدون مقدمات
هز تركي أبوها راسه بإيه : دامكم طيبين وبخير الحمدلله وتوصلون بالسلامة إن شاء الله يا بابا ، إنتبه لبنتي ذياب
ضحك ذياب : لا توصي حريص ياعمي ، لا توصي
سلاف : ما قلتي لنا المكان للآن يا قصيد لعلمك
إبتسم ذياب لأن حتى هو ما يدري وضحكت قصيد : إذا وصلنا ان شاء الله أرسل لكم
إبتسمت سلاف يتدخل عذبي بالمكالمة : ما تتوبين من حركاتك اللي فجأة ؟ أمس كنا عندج يبه قولي ترى بسافر وبسحب عليكم ، شكلنا مشينا من عندج قررتي ، صح ؟
ضحك ذياب تبتسم قصيد : الإنسان يحتاج يغيّر جو عذبي
إبتسم عذبي : توصلون بالسلامة يبه !
قفّل بعد ما ودعهم يلف نظره لها : إنتِ شلون ؟
إبتسمت بإستغراب لأنها ما فهمته ، ولأن النداء صار لرحلتهم تسكن ملامحه لأنه ما توقع تكون وجهتهم
ما جات بباله " دبـي " نهائيًا وما صدقها لو ما عدلت جلوسها تمسك شنطتها بتوقف : تبين دبي إنتِ ؟
إبتسمت لأنها مو وجهتها ، ولا توجهها لكنها فعلاً وقت فتحت دوّرت أقرب حجز ، أقرب مكان بس يبعدون عن هذا الضغط كله وبعدها هي تبي شيء آخر لكن تطول إجراءاته بطريقة ما : دبـي ، وأبي مكان ثاني غير دبـي
هو وقف معاها يتوجّهون للطيارة ، لمقاعدهم تجلس ، ويجلس بجنبها وهو وقت نطقت " دبـي " ما يدري وش صار فيه : وين تبين غيـر دبي ؟
مدّت يدها ليده : مدريـد ، حاولتها أمس وما قدرت بس
أشّر على خشمه فقط ، وإبتسمت تاخذ نفس من أعماق قلبها : ما كانت دبي بالحسبان ، ما كانت لدرجة أفكر ما ودي نجلس بالرياض بس بنفس الوقت ما ودي مكان إلا مدريد
ناظرها لثواني لأنها رهيبة ، لأنها فعلاً " رهيبة " ويقولها بيقين تام إن مثلها مستحيل يتكرر وإبتسمت : وفكرت ، تحب دبي إنت غالبًا وتنبسط فيها ما نسيت لما كنا نلعب بادل ، رسل لي عذبي مقطع لك تلعب سلة والأبراج وراكم
إبتسم لأنه يتذكر ، وهز راسه بإيه : كانت مع نصّار
إبتسمت قصيـد : يغيّر جوك نصار ، ومن هنا تركت الموضوع بيدك بما إنها دبي ، وتعرف لدبي وتحبها خلاص
ضحك لأنها لهالسبب بالذات كانت تتأكد منه كل شوي : عندي ، لا تشيلين هم
_
« مدريــد ، الليـل »
وقف على البلكونة يتأمل ، يفكر بالرياض بدون غيرها وما يدري وش الحنين اللي مرّ صدره بهالشكل الطاغي يدق على ذياب لكن مقفّل جواله يتنهد : والله إشتقت
طلعت ورد له تستغرب وقوفه : نصار ؟
إبتسم يلف نظره لها ، وتوجهت تدخل تحت ذراعه لأنه مكانها المعتاد بكل وقوف : إشتقت لوش بالضبط ؟
إبتسم يرفع أكتافه بعدم معرفة لأنه فعلاً ما يدري وش بالضبط من كثر شعور الشوق بصدره : لك ، الظاهر
ضحكت لأنه يستعبط ، وإبتسمت : كلنا ندري إنك نصاب
ضحك يشد أكتافها ونطقت هي : تعال ، ساعدني بالعشاء
هز راسه بإيه يشمر أكمامه : جاهز ، وين المطبخ بس
ضحكت تمشي قبله للمطبخ ، يدخل خلفها لأنها مشتهيه " بيتـزا " ومن البيت : متأكدة تعرفين ورد ؟
ضحكت تطلع الأغراض : متأكدة ، البيتزا بسيطة أساسًا
هز راسه بإيه : اليوم بيتزا ، بكرة كبسة وحشنا هالأكل
كشّرت تمشي له ، وقبّل كتفها يسمع رنين جواله : كنت بساعدك ، بس شفتي زوجك كيف مشغول يعني ؟
ناظرته لثواني بذهول : تتهرب يعني ؟
توجه ياخذ جواله ، ورجع عندها تسمع إنها مكالمة لدوامه لكن إبتسم قلبها بطريقة ما لأنه واقف قدامها ، واقف بعادية تترك يده تلعب بالطحين قدامها ، يرسم عليه ، ويسولف بكل جدية العالمين بخصوص شغله لكن من جات قدامه هو مسح أصباعه على أنفها بدون مقدمات وما قدرت تشهق '
لأنه يكلم لكنه ضحك مباشرة يتنحنح بتدارك : مثل ما قلنا طال عمرك
ضحكت لأن فعلاً الطحين صار على أنفها من يده اللي يتأملها ، وقفّل يضحك مباشرة : لا تجين قدامي والله مدري وش جاني حسيت ودي أحطه بوجهك
ضحكت تهز راسها بالنفي : مروقة ما بتهاوش معك
ضحك نصّار يهز راسه بإيه : بعد الدموع يوم كلمتيهم ؟ الأكيد تروقين حبيبي ما قصرتي
ضحكت لأن هذا سبب ، لكن الأساس بروقانها هو شعورها بالإستقرار من كل النواحي ، شعورها باللّذة اللي ما تقدر توصفها لكن هذا المشهد حنون ، وجودها معاه بالمطبخ ، عينه تتأملها بشكل تعرف إنه يفتنه لأنها لابسه فستان أحمر يوصل طوله لأعلى ركبتها وأعلاه حبال رفيعه فقط على أكتافها ، تترك شعرها بحريّته وهو بدوره " أسباني " تماماً بأبيض قميصه ، وشورته السماوي وإبتسم نصار : وش تفكرين فيه ؟
هزت راسها بالنفي تتأمل البيتزا : خلصت ، وما ساعدتني
ضحك يهز راسه بإيه يتوجه لها : لا جات من يدك بتصير حلوة ، الخطوة مني تخربها ما ودك تجربين
ضحكت تغسل يديها ، وأخذها نصار يدخلها بالفرن ترجع ورد لجنبه لكن سكن كونها كله لأنه إنحنى يقبّلها ، يكمّل حنون المشهد بعقلها بدون لا تقوله تبتسم ، يبتسم قلبها فعلاً لأنها دائمًا تتأكد بإن هذا مكانها الصح ، وهذا كل الصح بحياتها رغم ماضي الصعوبات كلها ..
_
« دُبــي »
ما خفّ ذهولها بالطيارة ، وما خفّ وقت وصولهم المطار ووصول سيارتهم وما خفّ الآن بدخولها للفندق يدّها بيدّه لجناحهم ولو تحكّي أحد عن ذياب ، ذات الشخص اللي يُقال عنه " بدوي " بشكل قاسي وكل علمه بر وإبل يمكن ما يصدقها أحد لأن من وقت وصولهم ، للآن وهي تنبهر بكل تفصيل وكل ما حسّت بالإنبهار تذكرت إنه بدوي فعلاً ولا يخفي بداوته ولا يستحي منها ويفخر بها ، يفخر لأنها ما تنقصه ولا تحطّ منه وهذا أصله وضحكت من وصلوا لجناحهم تشوف رقمـه " 222 " : كثير ومو معقول
لف نظره لها لثواني يفتح الباب : وش اللي مو معقول ؟
هزت راسها بالنفي فقط تدخل معاه ، تنزّل عبايتها ورغم إن الرحلة قصيرة ، بسيطة ما حسّتها أو هي من كثر حماسها ما حسّت شيء ما تدري ومسح على أنفه : قريّب أنا بس بروّح أخلص كم شغله وأجيك ، تبين شيء أجيبه ؟
هزت راسها بالنفي تنزل عبايتها ، تسمع صوت خروجه وعضّت شفايفها مباشرة : خيالي إنت خيـالي
ما تدري وش كانت توقعاتها لكن تدري إنه جاء يفوقها وهذا الأكيد ، وأخذت جوالها تصّور صورة وحيدة للأبراج اللي أمامها ، تخصّ الصورة بقلب بُني فقط وعينها تتأمل بهمس : يارب تكمل
عدلت شكلها لثواني تفتح شعرها ، تتأمل المكان وأخذت نفس تنتظر رجوعه اللي
اللي حصل فعلاً بعد ربع ساعة يدخل : يا أهلاً ، ما طولت
هز راسه بإيه وهو نزل يرتب وضعه فقط ، يكلّم أسامة وتوجه يغسل يديه على ما ترتب هي مكان لجلستهم يبلّغها : شوي ويوصل العشاء
لف نظره يشوف إنها عند البلكونة تعدل ستايرها ، يشوف إنها تتأمّل وجففّ يديه ما تصدق اللهفة اللي بداخله لها لكن صار ممُكن تخمينها من جاء لها تبتسم : ذياب
هو حاوطها من الخلف يقبّل كتفها ، يضم يديها تحت يدّه وإبتسمت لثواني : من أول شوارع دبي للحين وأنا جالسة أتذكر أشياء كثيرة مره ومدري تتذكر زيي أو لا
سكت لأنه يتذكر ، لأنه يدري هي وش تتذكر لكن يبي يسمع منها ، يبي سوالفها : وش تتذكرين ؟
لأن الباب طُرق يقطع حديثهم ، إبتسمت هي : ما بقول
رفع حاجبه فقط يتوجه للباب ، ياخذ العشاء منه ورتبت قصيد مكان لجلوسهم على الكنبة : وعلى ذوقك يعني !
إبتسم فقط يترك الأكل على الطاولة : على مستوى
إبتسمت لأن هالراحة منه رهيبة ، فعلاً رهيبة من جلس يقابلها وذياب بالأكل خصوصاً " يعجبها " لأنه هو يمد كل شيء لها ، هو يعدّل كل شيء لها وهو يهتم بطريقة تحسّها " تخصه وحده " وحنونة بشكل ما يصدقه أحد : ريحة الأكل تشهي أساسًا ، جربته هنا قبل ؟
ضحك يهز راسه بإيه : عرفناه أنا ونصّار مرة ومن يومها وحنّا غداء وعشاء ولو يفتح فطور بعد أخذنا منه
إبتسمت من مد لها شوكتها ، وضحكت : بتراقبني ؟
هز راسه بإيه بجدية : يمكن ما يعجبك أجيب لك غيره
ضحكت تتلذذ ، يبيّن على ملامحها إن الأكل لذيذ فعلاً يبتسم هو فقط : وش كنتي تتذكرين تقولين لي ؟
قصيـد : لا ياحبيبي ، إنت تقول لي الحين
إبتسم بهدوء لأنه فعلاً يتذكر ، ومسح على جبينه : آخر مرة جيت بها دبي ، جيت عشان السيارة طيران وأخذتها برجع بها بنفس الليلة
هزت راسها بإيه لأنها تذكر ، وتتذكر بشكل مو عادي كمان : أتذكر ! أشغلتني وقتها لأنهم كانوا عندنا وكنت أسمعهم كيف شايلين همك ويقولون لك نام ما نمت إلا ساعتين وإنت مصر على رايك ، من وقتها عرفت كيف تحب تتعب نفسك بشكل مو طبيعي
إبتسم فقط لأنها ما تدري كيف كانت كل تفكيره بوقتها ، ما تدري كيف إن رغبته برجوعه عشانها مو عشان الرياض ولا همه إرهاق نفسه : إنتِ السبب طال عمرك ، أتعبتيني
رفعت حاجبها بذهول ، وهز راسه بإيه : صدق قصيد ، ما أطيق الإنتظار وما قصرتي بي أبد
خجلت لوهلة لأنه لأول مرة يتكلم بهالشكل ، لأول مرة بيعبّر لها وتشوف هالشيء : وقتها سألتك ، قلتلك كم باقي لك وتوصل وكنت بس أبي أتطمن عليك على طول قلتلي كم باقي وتوافقين بدون مقدمات ، ومن العدم
هز راسه بإيه يعترف : كنت متشفّق عليك ، كنت ملهوف أبيك لأنها وقت حسّت إنها بتخسره ، وإن الضغط عالي عليه بشكل ما يتصّوره أحد هي ما ترددت ، ما رفّ لها جفن بإنها تستغّل محبته لها بشيء بصالحه مو ضدّه ، ما ترددت تاخذ بيدّه وتقرر إن صار وقت لهم لوحدهم ولهالسبب ذياب ما يستوعبها ، وكل ما حاول يستوعب حبها له يوقف مذهول عندها وإبتسم فقط من كانت تخجل ، من كانت تتلون ملامحها وتغرق بالأكل لأنها ما تبيه يسولف ومسح على طرف حاجبه : وقتها قالت لي ورد ، قصيد كان ودّها بشيء موجود بدبي وتدرين وش سوّت بي يوم قالت وإلا ما تدرين قصيد ؟
ما خفّ تورد ملامحها لثواني ورجع يكمّل بشعوره وقتها : وشلون أدري باللي بخاطرك بدون لا اسأل حتى ورد هذا اللي سوّته بي وديّتها يمين عيّت ، وديتها يسار عيّت لين آخرها قلت ذياب ، لا صارت حلالك تاخذها بيدها وتجيبها لليّ تبيه بدبي وغير دبي تاخذه
ضحكت تغص بأكلها فعلاً ، ضحكت يضحك هو ببسم الله عليك يضرب على ظهرها " بخفّة " بسيطة وتُوردت ملامحها تغرق بالذهول : يعني كيف ؟ كنت تفكر كذا ؟
هز راسه بإيه بتأكيد : بخاطرك شيء وما أدري به شلون تبيني أفكر ؟ ما ودي يقعد بخاطرك شيء وأنا موجود
إبتسمت لأنها ما تدري ليه تشوف المواضيع منه دائماً بمنظور الشاعر ويصرخ عقلها بأغنية وحيدة وسط كلامه : متى ناخذ فرة ؟
_
« بيـت تركـي »
طلع من بيـن فوضى كتبه دفتر وحيد غلافه من الجلد البُني والأكيد إنه من أحد سفراته ، تركه على مكتبه يجلس ، يعدل سماعته بأذنه من رنّ جواله قدامه بإسمها يبتسم مباشرة : على الموعد ، ما تأخرتي ماشاءالله إبتسمت لأنه فتح كام مباشرة ، فتح تشوف فوضى شعره ، نظارته اللي على ملامحه وجلوسه على المكتب وخافت نور الغرفة : تذاكر ؟
ضحك يهز راسه بالنفي : لا ، تذكرين هالدفتر ود ؟
رفعت حاجبها لأنه رفعه يوريّها لكن ما تذكره ، ما يطري ببالها ولا تتصّور له وجود : شفته بغرفتك قبل لكن لا
إبتسم لثواني يهز راسه بإيه : جلست مع أبوي اليوم ، جلس يسولف لي عن أشياء كثير ، عنهم أول ، عن عمي حاكم ، عن أيامهم قبل وعن دنيتهم ودّ متخيلة من العصر للعشاء وحنّا نسولف ؟ نصلي ونرجع نسولف
إبتسمت لأنه يتحمس : واضح وإلا ما فتحت الدفتر
هز عذبي راسه بإيه يمسح على جبينه : مليان أفكار ، مليان كلام أبي أنثره ، أبي أكتبه ومدري كيف بكتبه لكن
إبتسمت ود لثواني : أول ما تكتب كلمة ، بيجي الباقي
قفله لأنه ما يبي يكتب وقت جات هي ، ما يبي وضحكت لأنه تكى يعدل أكتافه : وش عذبي ؟
إبتسم لأنه صح ما يشوفها ، وصح هو اللي فاتح كام فقط لكنه ما يتخيّل متى ينتهي الترم ويخطبها : سلامتك ، وش طيّحنا ببعض ودّ ذكريني ؟ غير إنك بنت عمتي
ضحكت لأن قواسمهم المشتركة كثير ، كثير لدرجة ما يحصيها أحد ونادر يجتمعون المتشابهين لكن هي وعذبي ، بطريقة ما صارت علاقتهم أعمق من كونهم عيال عم وقرابة عادية لأنها كانت تهتم له بصمت ، ويهتم لها بصمت ، تجمعهم الصدف بنفس المكتبات ، بنفس الذوق حتى بأبسط الأشياء ، وبنفس الكلمات وقت يسولفون لدرجة " مضحكة " : جمعتنا الصدف
إبتسم يهز راسه بإيه : ما قصّرت إي والله ، ما قصّرت
ضحكت لأنه متحمس لدرجة تبيّن على ملامحه : وش
ضحك يهز راسه بالنفي : ود تعرفين شعور اللي يوم توصلين لنهاية شيء ؟ يعني مثل المسلسل يوم يقولون يوم الحلقة الأخيرة وتتحمسين ، الكتاب وقت توصلين لآخر جزء فيه لآخر صفحة عرفتي الشعور ؟
ضحكت ودّ بذهول : عرفته ، بس وش طاريه ما عرفت
إبتسم لثواني : مدري ، بس بعد ما سولفت مع أبوي وإنتهت السوالف يقول والحمدلله هذا أنا ، وهذا حاكم ، وهذا إنتم بخير ونعمة ومستقرّين حسيت كنا نركض وصار وقت الراحة ، وقت السكون ويوم جلس أبوي يشرب شاهيه على الكنب وهادي ما وراه شيء
صرخت لأنها فهمت ، لأن وصلتها المعلومة تماماً وإبتسم عذبي : الحمدلله يعني ، حتى والحكاية مو لي الحمدلله
_
« بيـت حـاكـم ، العشاء »
جلس حاكم بالمقلط يبتسم ، يرحّب من أعماق قلبه لأن من العدم تركي دق عليه يسأله لو فاضي ، ولو أم ذياب موجودة يجي هو لحاكم ، وتدخل سلاف لملاذ وإبتسم لتركي : مبطي ما سيّرت علينا بدون موعد وبدون حجز
ضحك تركي : والله طلعنا أنا وأم عذبي ناخذ لنا فرة شوي يوم جيت جهتكم قلت مالك خاطر تمريّن على أم ذياب ؟ قالت إنت لك خاطر تمر على حاكم الحين وفهمتني
ضحك حاكم يهز راسه بإيه : أعز من يجي ويمرّ ياتركي بيتك ومكانك ياخوي متى ما بغيت اكسر الباب وادخل
إبتسم تركي وهو مرتاح بشكل ما يتصّوره أحد على وجه الأرض : لا ما بكسره إنت بتفتح لي ياحاكم
ضحك حاكم لأن هذا غرور : ما كبرت إنت ياتركي ؟
ضحك تركي يهز راسه بالنفي ، وإبتسم حاكم من إرتياحه : ماشاءالله ، جايّك علم يسرك الظاهر شاركنا عطنا
ضحك تركي يهز راسه بالنفي : يوم صحيت اليوم ، كلّمت قصيد حبيبتي أقول لها كيف دبي تقول لي عسل يابابا
ضحك حاكم مباشرة لأنه يعرف كيف يحب قصيد ، وإبتسم تركي بإرتياح : والله يا حاكم ، وماهو عشانه ولدك ولا أمدحه عندك لكن ذياب ، ذياب ماشاءالله عليه
إبتسم حاكم يهز راسه بإيه فقط ، وهز تركي راسه بإيه بتأكيد : ونعم الرجل ياحاكم ونعم الولد لكن إذا إنت أبوه
ضحك حاكم لأنه بيمدحه : إذا إنت عمه لا تدوّر غيره _
« بالداخـل »
إبتسمت ملاذ تمد لسلاف قهوتها : والله حيّ الله من جانا
إبتسمت سلاف بحب : الله يبقيك حبيبتي ، تركي يوم جينا جاه الحنين لحاكم كأن صار له عمر ما شافه قلت ما بقوله رجعني البيت وتعال لحالك أنا ما شفتك بعد
ضحكت ملاذ بذهول : أزعل منك لو تسوينها أهل ياسلاف
إبتسمت سلاف لأن حاكم وتركي بالمجلس القريب منهم وتسمع ضحكاتهم ، وضحكت ملاذ : لا ماشاءالله رايقين
هزت سلاف راسها بإيه : رايقين وبس ؟ تركي مروّق لدرجة لو تبينه يروّق لك الرياض كلها اليوم مو بس حاكم يروّقها
ضحكت ملاذ تهز راسها بإيه : إيه يسوي خير ما يقصر
نزلت ديم المبتسمة تسلم على سلاف يلي إبتسمت مباشرة : يا أهلاً ، كيفك ديم كيف صحتك ؟
إبتسمت ديم : الحمدلله تمام كيفك إنت خالتي ؟
هزت سلاف راسها بإيه ترد عليها ، وإبتسمت ملاذ بحب لأن صار الحمل يوضح على ديم أكثر وأكثر : نهيّان عنده مباراة ؟
هزت راسها بإيه : إيه طلع من العصر أكيد ساعة ويخلص
هزت ملاذ راسها بإيه تستودعه ربه ، ورنّ الجرس تتنحنح ديم بشبه إحراج : أكيد البنات ، بدخلهم فوق تمام ؟
هزت سلاف راسها بالنفي مباشرة : تعب عليك أمي أنا مو غريبة ولا حنّا مطولين ، لا تستحين مني
إبتسمت ديم بإحراج مباشر تضحك ملاذ لسلاف : تحشّم ديم مره ، خجولة لدرجة تحسين ما بالدنيا أحد يفكر كذا إلا هي حبيبتي تشيل همي وتشيل هم عمها وهم نفسها
إبتسمت سلاف : الله يحفظها ويخليها ماشاءالله
دخلت وسن اللي شهقت من منظر ديم مباشرة بفستانها الشبه واسع باللون الوردي ، يبيّن بطنها ببروز خفيف وضحكت درة مباشرة تصرخ : فديت الوردي !
ضربتها ديم مباشرة تسكتها : عيب ! عيب سلاف موجودة
سكنت ملامح توق مباشرة لأن آخر مرة قابلتها كان وقت زواج ورد ، وسكتت جود لثواني : سلاف ؟ وقصيد
هزت ديم راسها بالنفي : قصيد مسافرين مو موجودة
إبتسمت درة لثواني : حركات ماشاءالله جود ما شفتي من سناباتها ؟
كشّرت جود مباشرة : ما تنزل شكلها تخاف من العين !
ضربتها ديم بذهول لأن حتى والكلام عفوي وعادي ما صار بمحلّه ، ونزلت توق طرحتها : ما بدخل عندكم ، بطلع
ناظرتها وسن لثواني : توق ، عن الدلع وسلّمي وإنتهى
دخلت وسن تسلّم أولهم ، ودخلت جود ، ودخلت درّة خلفها توق الساكنة تماماً حتى سلامها على سلاف ما حسّته لأنها ما رفعت عينها لها ، سلّمت حتى سلاف عليها بعادية تامة تكمّل حوارها مع ملاذ على ذات إبتسامتها ، وذات ضحكتها وإبتسمت درة تقرصها بهمس : تنفّسي ، إنتهى الموضوع من زمان تنفّسي خلاص وإعقلي
_
« دبــي »
كانت عينها تتأمل الأبراج ، يدها بيدّه وتسمع معاه " الود ودي أجيب لك .. روحي روحي على يدّي .. وأغزل لك نجوم الليل .. وأخلّي لونها وردي " بإختيارها يبتسم هو لأنها تشرح حُبه لها فعلاً ، لأنها تريحه من جزء الشاعر وهي تشوفه بنفسها : هذا أنا قصيد ؟
إبتسمت تهز راسها بالنفي لأنها تخجل ومستحيل تقول بالصريح إنها تشوف جزء من حبه فيها ، وضحك لأنها تخجل ، لأنها فعلاً بهالأغنية بالذات صرخ بها عقلها ألف مرة بهالسفرة بكل أيامها من وقت كان يسطّر إعترافاته هو كيف يحبها ، كيف يعشقها لليوم ولقبل ساعات من وقت تسوّقهم كيف يمشي معاها بكل هدوء ، يبتسم لذوقها بكل شيءّ ويوافق على كل شيء تبيه له ، أو لها ويضحك لو مثّلت هاللبس وين يكون مثل قميص بالأسود إبتسمت له فيه " صار ودي أشوفك فيه ، بأسبانيا طبعًا مو هنا لأنك تستغل إننا بدبي وما تغيّر عن الثوب " ، ووقت كانت تتأمل الشورتات تلتفت له " ما تلبس شورت إلا بالبيت عندي ، تلبس هناك ؟ " ولفت نظرها له تسولف : بكرة بنودّع دبي من غير شر ، تصدق ماودي ؟
لف نظره لها تضحك مباشرة : يعني ودي ، بس أقصد ما توقعت أحبها كذا ، أو يمكن حبيتها لهالدرجة لأني شفتها من منظورك إنت زي ما شفت الكويت لما جيتني
هز راسه بإيه يمد يده لعبايتها : لبسك خفيف إنتِ ؟
ما توقعت تشهق لأنه مد يده بدون مقدمات : اسألني !
هز راسه بالنفي : وليه اسألك دام يدي قريبة ؟ نرجع تبدّلين ، وأبدل أنا باخذك لمكان ثاني دامها وداعية
هزت راسها بإيه : وش المكان عشان أعرف وش ألبس
ضحك لأنه عشانها ، لأنه يعرف أطباعها ويعرف دلالها اللي يتركها تبدّل لكل شيء بلبسٍ يخصه : تعرفين ، تعرفين
هزت راسها بإيه من وقف سيارته يتركها للعامل ، من أخذ الأكياس بيدّه من الخلف ومد ياخذ يدها : لاحظت إنك هنا بالذات ، ما تترك يدي لو شوي ؟
رفع حاجبه لثواني : وأنا وإنتِ بالرياض وين نطلع ؟
ضحكت تهز راسها بإيه لأنه منطقي ، وتوجه لجناحهم يفتح الباب ، يترك الأكياس ونزّلت عبايتها : وين ؟
توجه لشنطة ملابسهم ياخذ لبسه اللي هي مجهزته بين الملابس ، وضحكت مباشرة تغرق ملامحها بالخجل لأنها توقعت ما إنتبه له : قلت ما راح أقول لك إذا فهمت من نفسك تمام ، وإذا لا يعني
هز راسه بإيه يقاطعها : إذا لا ، بتزعلين مني وما بتقولين ليه لأن وش عندك ما يجيك الوحي يا ذياب وتفهم إن ودي أشوفك تلعب سلة قدامي ، تلعب سلة معي
ضحكت لأنه يعرف إسلوبها بشكل مضحك ، يعرف يقلّدها حتى بالكلام وإبتسمت من قرب منها : لأن فعلاً ليه ما تفهم من نفسك ؟ ليه ما تقول بسوي لك كذا ؟ لأنها العادة ، وكل ما قرّب منها وقابلها يدها تتوجه دائماً لأزرار ثوبه ونزل نظره لها : تعرفين تلعبين إنتِ ؟
ضحكت تهز راسها بإيه : جهّزت لنفسي لبس ، هذا المهم
ضحك فقط لأنها " رهيبة " ينحني يقبّل خدها ، فكها ، بجوار أذنها وضحكت تشدّ ثوبه : مشينا لا نتأخر
هز راسه بإيه يتوجه يبدل لشورته الأسود ، والتيشيرت الواسع بنفس اللون يعدل أكتافه ودخلت هي بعد ثواني تعدل شعرها فقط : حلوة ؟
لف نظره لها لأنها خيالية مو بس حلوة ، خيالية حتى ولبسها رياضي بحت يرسم جسدها باللون الرمادي ، ينساب شعرها وعدلت أكمامها تعدل أكتافها لأنها تشوف من نظراته وش ممكن يقول أساسًا وضحكت : خفيف
ضحك بذهول لأنها طلعت عنه للصالة تلبس عبايتها ، وطلع بعد ثواني يمد يده للجاكيت اللي تاركته له على ذراع الكنب : تلعبين بالنار إنتِ إنتبهي لنفسك
إبتسمت تعدل طرحتها لأنه ترك الجاكيت على ذراعه فقط تبتسم ، ينهار قلبها لأنها ما تشبع من منظره بالثوب ، ولا من منظره بالشورت ، ولا من منظره بهاللحظة كيف هو يختلف ، يتبدّل ، يليق ومثل ما إنهارت وقت شافت الفيديو هي تنهار أضعاف بالواقع وإبتسم من نظراتها فقط : ما ودك نمشي صح ؟
ضحكت تهز راسها بالنفي : لا بنمشي ، بنمشي مشينا
لأنها توجهت للباب قبله هو إبتسم مباشرة يمشي خلفها ، ينزل معاها للسيارة ورجف قلبها لأنها تعيش نعيم بشكل ما يتصّوره أحد ولا حتى هي نفسها من شخصيته ، رهيبة شخصيته بعيد عن الضغوط وركب بمكانه تركب بجنبه كلها حماس ، كلها لهفة للمكان وإستوعبت : بيكون فاضي ؟ لأن يعني ما باخذ راحتي لو فيه أحـ
ضحك لثواني يهز راسه بالنفي : قصيد ، أنا ذياب حبيبتي
إبتسمت بذهول : وغرور كمان ! وش يعني أنا ذياب
هز راسه بالنفي فقط لأنه يحسب حساب لراحتها ، ويحسب حساب لغيرته من قريب وبعيد لدرجة هي ما تتصورها ولا تتخيلها وسكن داخلها من دخلت السيارة لمكان يمتلي بالأشجار اللي تغطي الطريق الهادي بخفيف الإنارة ، مكان " رائع " يفوق الوصف وخيالها يسكن قلبها من لمحت ملعب وحيد فيه : كيف طحت بهالمكان !
إبتسم لأن موقعه خورافي ، خلفه الأبراج بإطلالة خيالية لكنه معزول بين الشجر ونطقت : مكان أحلامي على كذا
ضحك فعلاً يوقف ، ينزل ونزلت هي يلف نظره لها : خلّي عباتك هنا ، ما به أحد ولا حولنا أحد لا تشيلين هم
تركت عبايتها فعلاً تشوف كورة السلة اللي بنص الملعب ، وإبتسمت تعدل نفسها : المكان والملعب وكل شيء يحمّس مرة ! ، لما لعبنا بادل ما تتخيّل كيف كان ودي تكون موجود
إبتسم ذياب ينحني للكورة : الحين أنا موجود ولعبة تسوى مو اللي تقولينها ، تبين الأولى لك ؟
إبتسمت قصيد لثواني بذهول : لا تغلط على البادل هذا أولاً ، وثانيًا بس كذا ؟ بدون قواعد بدون شيء خذي وإرمي وإذا دخلت تمام ؟
هز راسه بإيه : القواعد عندي ، والنظام عندي إنتِ بس حاولي تجيبينها والأمور طيبة بعدين
ضحكت تاخذ الكورة من يده بإعجاب : وما تغشّني يعني ؟
ذيـاب : بي قلّ صح أغشك إنتِ ؟ حاولي وماعليك
ناظرته بعدم إعجاب لثواني : ذياب مغرور على كذا سهلة بدخلها وبس والفوز لي يعني وين المتعة ؟
إبتسم يهز راسه بإيه : دخليها طيب بشوفك
ناظرته لثواني من ثقته تعدل الكورة بيدها بكل غرور : سهلة طيب مستحيل ما بتدخل يعنـ
لأنها رميتها ، ولأنها مالت ما دخلت تضرب بطرف السلة وترجع هي سكنت ملامحها تسمع ضحك ذياب اللي مد يده ياخذ الكورة مباشرة قبل تهدأ ، ويرجع يرميها تدخل : مستحيل ما بتدخل إيه أكيد ، دخلت ما تشوفين ؟
كشّرت مباشرة لأنها ما توقعتها فعلاً ما تدخل تمسك الكورة من جديد : الأولى حظ ، دايمًا كذا أساسًا
هز راسه بإيه يتكي وعينه تتأملها من دوّرت الكورة بيدها تتأمل السلة ، ولفت نظرها له : غمض عينك أول
ضحك يهز راسه بإيه يغمض ، ورميتها تدخل بالذهول مباشرة : لأنك ما تشوف ! لأنك ما تشوف دخلت ذياب
هز راسه بالنفي ياخذها : والمفروض أصدقك الحين ؟
كشّرت لأنها حتى هي ما توقعت تدخل ، وإبتسمت مباشرة من دخّلها هو للمرة الثانية ، الثالثة ، والرابعة ما يترك الكورة تبتعد إلا وياخذها مباشرة يدخلها : يوم لعبت مع نصار ، الأخيرة قال والله مو منك من البل
كانت على وشك تسأل ليه ، لكن تمثّل لها الجواب كله من نط يرتفع يدخّلها ، ويده تمسك طرف السلة نفسها يرجع للأرض : ولك وجه تلومه يعني ؟
رمى الكورة بإتجاهها تمسكها مباشرة : كم صاروا الحين ؟
ضحكت تهز راسها بالنفي : وياخذ اللعب بجدية بعني !
هز راسه بإيه : نافسيني مافي منافسة للآن
ميّلت شفايفها : ما علّمتني جالسة أرميها بالحظ والحظ يخسّر أحيان ، ما أحب أعتمد عليه
ضحك يهز راسه بالنفي : ووش تحبين تعتمدين عليه طال عمرك ؟
إبتسمت قصيد مباشرة : على نفسي وقت أعرف ، وعليك
ضحك لأنها تلعب به بالكلام بشكل مو طبيعي : ماشاءالله شلون فزتي علي ؟
ضحكت مباشرة لأنها توقعت تعدل وقوفها : سهالات ، يالله كيف لو مسكتها كذا تمام ؟
هز راسه بإيه يوقف خلفها ، يعدل الكورة بيدها ويده على خصرها : لأنك واقفه هنا وبعيد ولا بترتقين لها ، إمسكيها من هنا ما تميل وركزي بس
إبتسمت لأن تركيزها كله مع يده ، مع وقفته معاها بهالشكل ولأنه متحمس يشرح لها لكن هي ما سمعت كلمة وحدة وشدّ على خصرها يهمس : وأدري ما سمعتي كلمة وأدري وش تفكرين به ، إنتبهي
رميت الكورة بدون مقدمات ما تدخل لكن من توترها وإنها بتبيّن له العكس ، ولفت نظرها له وهي تحس نبض عنقها الشديد : تعليماتك فاشلة مره مره !
ضحك يهز راسه بإيه ينحني للكورة : فاشلة ، إيه لأنك سمعتيني أكيد !
كشّرت مباشرة لأنه رماها بسرعة ودخلت ، ولأن واضح إن المنافسة جدًا شديدة تعدل وقوفها لأنه على وشك يرميها مرة ثانية من أخذها بيده : ذياب إذا ماودي أنتبه ؟
رماها يخطي لأنه لف نظره لها ، وإبتسمت تاخذها مباشرة تسبقه يضحك هو : كذا نظامك يعني !
إبتسمت ترميها هي ، تدخل فعلاً وصرخت بإعجاب تناظره يضحك لأنها تنافسه ، وتضحك له وقت دخلت عشان يفرح لها : وش تسوين إنتِ قصيد ؟
_
« بيـت حـاكـم »
عضّت شفايفها من الألم تمسك ظهرها ، طوّلت بجلوسها اليوم لكن ما توقعت تحس بكل هالألم بدون مقدمات وعجزت تجلس منه ، عجزت تعرف للجلوس طريقة لأنه يشد عليها بطريقة غير منطقية ويدّها تدور جوالها فقط ما رجع نهيان للآن ، وعمها تعرف إنه مو موجود ، وما تدري ملاذ وين أرضها لكن ودها تصرخ من الألم وما تقوى الصراخ : يارب .. يارب
رجفت يدها من الألم اللي داهمها بشكل تركها تصرخ بالغلط على دخول نهيّان اللي سكنت ملامحه من وقوفها بجنب الطاولة ، من صرختها ومن يدها اللي تمسك بطنها يطيح اللي بيده مباشرة : ديـم ! ديـم
شدّت يده بألم ما قدرت حتى توصفه ترفع نظرها له : نهيّـان
لأنها رجفت بإسمه بهالشكل هو ما يدري وش يسوي ، ما يدري وش يتصرف بالضبط شُلّت أقدامه : وش ! وش وش يوجعك وش ديـ
صرخت للمرة الثانية من الوجع اللي تحسه وإن بدون مقدمات صار يشد هالألم تحتقن ملامحها بالإحمرار وما قدر ، ما عرف يفكر غير إنه ياخذ عبايتها بأسرع ما يكون بيطير للمستشفى وهذا اللي حصل يركض بها للسيارة وسط وقوف حاكم المذهول اللي توه نزل من سيارته : نهيـان !
لأن ملامح ولده مخطوفة ، ولأنه شافه كيف ترك ديم بمكانها ما بقى بحاكم عقل يرجع لسيارته مباشرة يتبع ولده برعب : على مهلك لا حول ولا قوة إلا بالله !
ما تكلّم نهيان لأنها تتألم ، تتألم وعينه عليها من ذهوله يحس الطريق ما ينتهي وما عاد ينتهي من لمح دموعها برعب : وش ديم ؟ وش ديم
ما تدري ، ما تدري وبعقلها ألف فكرة من رعبها تمسك بطنها : بيروح ؟ بيروح نهيّان صح ؟
هز راسه بالنفي بذهول يصرخ : وش يروح ما بيروح ! ما بيروح وصلنا وصلنا ، وصلنا ديم !
لأنها تحس ألم غير طبيعي هي ما تصّورت ، ما جاء ببالها خيال إلا إن طفلها اللي متهلّفة تعرف جنسه بيضيع من يديها قبل تعرف حتى ، قبل تكتمل مشاعرها بشكل يرجّفها رعب يناظرها نهيّان : لا تخافين إنت ، لا تخافين
وقف حتى كلام أبوه ما يسمعه لأنه عاش رعب بلحظات ما عاشه بحياته ، عاش رعب ما حسّه بحياته لأنه جاء مشتاق لها بشكل غير طبيعي ووقت شافها تتألم ، وقت لمح هي كيف تتألم ما عاد يدري أرضه من سماه ووقف فزّاع مع حاكم بممر المستشفى : ووش قالت الدكتورة ؟
هز حاكم راسه بالنفي يشد كتف أخوه اللي جاء بعد مكالمة منه هو : قالت طيبة وقالت إرهاق وتعب الظاهر ، طيبة الحمدلله ماعليك
هز راسه بإيه يلف نظره لنهيّان مخطوف الملامح : نهيّان؟
رفع نظره لعمه يستوعب ، يحاول يستوعب بالأصح : سم
ناظره فزّاع لثواني يصحصح نهيّان ، يضغط على عيونه بسؤال لأبوه : هي وش قالت الدكتورة ؟
ناظره حاكم بذهول لأنه للآن هو عاد له كلام الدكتورة سبع مرات لكن الواضح ما يستوعب ولده : قالت طيبة ، الحمدلله طيبة والجنين طيب فيك شيء إنت بك شيء ؟
هز نهيّان راسه بالنفي تطلع الممرضة : تقدرون تدخلون
دخل فزّاع أبوها أولهم تسكن ملامحه من لمحها بهالشكل ، من كانت ممددّة يبين على ملامحها شديد الشحوب والتعب ويدّها على بطنها فقط : ديم ؟
سكنت ملامحها لثواني تحاول تعدل جلوسها لكنها ما قدرت حرفيًا ، ما قدرت لأن ما أخذ منها الألم قد ما أخذ منها رعبها : مين قال لـ
جلس أبوها بجنبها مباشرة : دق علي عمك حاكم وطلعت ، ما لقيت نفسي إلا هنا ولا قلت لا لأمك ولا لأختك وش جاك يبه ؟ توها درة كانت عندك وتو سألتها عنك قالت طيبة ومبسوطة وبخير وش جاك ؟
غرقت عيونها لأنها حتى هي ما تدري : ما أدري ، ما كان فيني شيء كل شيء كان تمام فجأة صار كل شيء وتـ
هز حاكم راسه بإيه : إرتاحي يابوك ، إرتاحي المهم إنك طيبة الحمدلله ومرّت سلامات بس المهم لا تخافين
هز فزاع راسه بإيه لأنه يشوف إن اللي فيها خوف مو غيره ، ووقف يقبّل راسها : إرتاحي ، إرتاحي يابوك !
طلع فزاع ، وطلع يتبعه حاكم للخارج وبقى نهيّان بوقوفه لأنه للآن ما إستوعب هي كيف تعبت ، كيف صار هذا كله وتوجه بجنبها يشوف إن بصدرها كلام : ديم
هزت راسها بالنفي تشتت نظرها لثواني ، وإنتبه ليدها اللي على بطنها يمدّ يده فوقها ، يجلس بجنبها على السرير وغرقت عيونها بالدموع لثواني : خفت ، أول مرة بحياتي أخاف كذا نهيان ما قدرت أسوي ولا شيء ! ولا شيء لو ما دخلت إنت يمكـ
هز راسه بالنفي يضمها مباشرة ، يضمّها لأنها بكت فعلاً رهبة الموقف وتألمها لوحدها بعد ضجيج الناس كان مرعب لها فعلاً ، مرعب لأن ما حولها أحد ولا قدرت حتى تصرخ وشدّ على ظهرها لثواني : موجود أنا ، موجود ومرّت سلامات ومافيه شيء إنتم طيبين هذا أهم شيء
أخذت نفس تهز راسها بإيه وهي ما تدري وش أسباب التعب المفاجئ لأنها كانت بخير ، كانت جالسة مع البنات طول الوقت وما كان فيها شيء نهائياً ووقت تعبت بهالشكل تحس الألم بظهرها وببطنها ما توقعت إلا إنها بتخسره لأنه لأول مرة يجيها بهالشكل ولأول مرة تحسه : الحمدلله
قبّل يدها من رعبه يتمتم بالحمدلله مثلها ومسح على ملامحه يشوف إنها غمضت عيونها تتمدد ، يشوف إن مافيها حيل ورجع يطلع لأبوه بمجرد مانامت وغفت بدون مقدمات من قلقه : وين الدكتورة ؟
ناظره حاكم لثواني : وش تبي فيها يابوك ؟ ديم وطيبة الحمدلله أنا سألتها وأنا تطمنت عليها وإنت معي
هز راسه بالنفي يمد حاكم يده لكتفه : التعب وارد لكن لا تخاف إنت وتخوّفها ، ما شد عليها التعب إلا من الخوف لا تزيدها
عض نهيان شفايفه يمسح على ملامحه : ما كان حولها أحد ، ما كنت موجود إنت ولا أمي ولا ورد ولا أحد ولا أنا أنا لو ما جيت يمكن هـ
ناظره حاكم بذهول لأنه يزيد خوفه بتفكيره : نهيّان ! خلاص يابوك خلاص صرت يمّها وجبتها وتطمنا عليها لا تفكر بالشين وتحطه ببالك ! الحمدلله على سلامتهم
لأنه أكثر من يعرف جانب نهيان الهَلِع ، لأنه أكثر من يعرف كيف نهيان يخاف بشكل جنوني تجاه أي شيء يمس أحد حوله ويخاف فعلاً مو خوف يتبعه قوة ، يخاف بشكل يشلّه لهالسبب هو يحاول دايمًا يبعد مخاوفه : خلّها ترتاح الحين على ما قالت الدكتورة ، وشويات وتطلعون
هز راسه بإيه يمسح على ملامحه : أمي كسرت جوالي إتصالات ما قدرت أرد عليها ، كلمتها إنت ؟
هز راسه بإيه : كلمتها وطمنتها وبرجع لها الحين وإنت شد حيلك لا خلصت أموركم تعال البيت وعلى مهلك
هز راسه بإيه يضرب حاكم على كتفه ، وتوجه للخارج يشوف بين الأرقام رقم ذياب يشتت نظره فقط ودخل جواله بجيبه ما توقع مرّة بشبابه ، ولا مرة تخيّل وتصور هالأحداث يتنهّد : الله يحفظكم ويخليكم ولايوريني بكم مكروه ولا شيءّ يضركم .
_
« دبــي »
جلست بنصف الملعب تضم أقدامها لحضنها ، تتأمل ذياب اللي يلعب بالكورة بيده وصّورته كثير ، صوّرت لعبه كثير بدون ما ينتبه لها أو ممكن إنتبه لكن يتركها براحتها وأخذ الكورة بحضنه يتوجه لها : تعبتي ؟
هزت راسها بالنفي تبتسم من جلس بجنبها : لا ، بس جلست شوي حسيت الجو رهيب ، وودي أشوفك بس
هز راسه بإيه يجلس بجنبها ، ياخذ نفس من أعماق قلبه يتكي يده للخلف ، خلفها يميل بإتجاهها : وش تشوفين
إبتسمت لأنه صار يقابلها ، لأن وجهه صار مقابل لها تماماً تمد يدها لوجهه لثواني تسكن ملامحه مباشرة ، يسكن داخله لأن حنان لمستها دائماً غير عادي وعضّت شفايفها لثواني تبتسم : مبسوطة ، مبسوطة بشكل ما تتخيله ذياب مبسوطة معك ، وفيك