أنت تقرأ

انت الهوى ، كل الهوى برد ولهيب🤎

Romance

- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...

#الاوطان #بر #حب #دلال #ذياب #روايات #ريم #سعودية #شعر #قصر #قصيد

بارت ٤٧

17.9K 322 44

بواسطة rwaiahh6

بقلم rwaiahh6

« قصـر ذيـاب »
لأول مرة بحياته ، بتاريخه كله يـلازم السرير يوم بأكمله " تعب " ما ودّه يتحرك من محله ، ما يبي أبسط النور وقليله ، ما يبي الحر يبي شديد البرد لأن داخله يحترق للآن مهما حاول يطفيه ، ما يطفي ودخلت الغرفة على أقل من مهلها تقفّل نور جوالها بهمس : بترجع تنام ذياب؟
هز راسه بإيه وهو ساكن تماماً ، يقوم يصليّ من كثر عجزه بجنب سريره ما قدر يروح للمسجد ، ومشيت بالظلام تتحسّس مكانه لين وصلت ليده الممدودة لها : ذياب
هز راسه بالنفي بهدوء يشدّ يدها ، يسحبها تجاهه بتأكيد : ما بي شيء قصيد ، بس برتاح
عضّت شفايفها لثواني تدخل بحضنه : ترتاح ، حاضر
كان منه الإثبات يقبّل كتفها بالظلام فقط ، ياخذ نفس من أعماق قلبه يسألها : ودك بشيء إنتِ ؟ تبين شيء ؟
مدّت يدها ليده اللي تحاوطها : لا ، ما ودي بنام معك
سكن داخله فقط يقرّ صدره ، يقرّ داخله بشكل غريب كل ما جات عنده وهو نام نومة أشبه بالميت بالضبط ، مثل الجثة بالضبط لو ما فقدها يمكن ما صحى من عمق نومه : تنامين معي ؟
هزت راسها بإيه : ناخذ بريك من الدنيا ، ننام يومين ليه لا
إبتسم بهدوء فقط يقبّل راسها ، ياخذ نفس من أعماق قلبه منها : طيب
رفعت حاجبها لثواني لأنه وافقها ، لأنه رجع راسه للخلف تهمس هي : وش تفكر فيه ذياب ؟
هو يفكّر بحاله ، بإنهياره اللي أكثر من يعرفه هو وهالمرة كان على وشك يتكرر بكل أوجاعه لو ما جات تنتشله من داخل الخيام اللي غرق فيها مرة شهر بأكمله ، ما زاره الطيف : ما أفكر بشيء قصيد
رفعت نظرها له ، رفعت راسها كله بإتجاهه تحس بإنحناءه يقبّلها بهدوء لكن يقطع سكونه ، وسكونها من صوت الجرس يهمس : تنتظرين أحد ؟
ما إستوعبت لوهلة ، ونطقت على ذات همسه : لا !
إستوعبت تعدّل نفسها لثواني : بروح أشـوف مين
لأنه مسك يدّها يوّقفها هي نطقت : بشوف من وراء الباب
هز راسه بالنفي : أنا بروّح ، هاتي لي تيشيرت بس
توجهت للدولاب تسحب له تيشيرت ، ومدّته له يلبسه يلف نظره لها : وش ؟ خلّك هنا مالك داعي تنزلين
ما كان منها الجواب من فتح الباب للخارج تتعقّد حواجبه مباشرة من النور رغم إنها طفّت كل الأنوار كان خافت لكن مع ذلك وَهج بعينه تعضّ شفايفها : شكرًا ذياب ، شكرًا على مفهومك للراحة ماشاءالله عليك
هز راسه بإيه ينزل أول الدرج فقط : عفوًا حبيبتي
نزلت خلفه ما وقّفت لأنها تتوقع من الطارق ، الأكيد أسامة ، عمها ، محمد ، أي مصيبة قادمة هي تعرف ولهالسبب هي وقفت بآخر الدرج ، وكمّل ذياب مشيه بإتجاه الباب تحت أنظاره يفتحه ودها تصرخ لأنه حتى ما سأل " مين " وسكنت ملامحها من الأشبال اللي دخلت بدون مقدمات : فهـد !
رفع ذياب حاجبه لأنه شاف الأشبال اللي فزّت تدخل بمجرد ما فتح الباب لكن ما لمح فهد ينطق : إنتبهـي ، فهـد ؟
جهورية صوته أرعبت فهد اللي مسح على حاجبه فقط يتقدم أول خطوة للدرج يرقى : سم
سكنت ملامح ذياب مباشرة من ملامح فهد ، والجرح اللي بشفايفه قبل ينطق هو بالسؤال نطق فهد : طقّني واحد هني يم بيتك بس شنو ؟ لا تشوف شسويت فيه أنا
نطق ذياب مباشرة تتقدم خطوته للخارج : وخلّيته يروّح !
ركضت قصيد مباشرة تمسك ذراع ذياب ، ووقف فهد بوجهه يبتسم بذهول : أتغشمر وياك يامعود شفيك !
ناظرته قصيد لثواني تعضّ شفايفها : تعزمه على هوشة مو غشمرة فهودي !
إبتسم لثواني لأنه يعرف : أعرفه راعي فزعة ، بس تفزع بشورت ذياب ؟
ناظره ذياب فقط لأنه بيتشمّت عليه ، وضحك فهد يبتسم لقصيد : ولهت عليج ، قلتي للبنات ما أقدر قلت أشوفج أنا شدعوه ما تمرينّا
هزت راسها بإيه ينطق ذياب : من لعب بملامحك ما قلت لي
لفت نظرها له لأنه مركّز على ملامح فهد للآن اللي هز راسه بالنفي : صارت هوشة شوي دشيّنا فيها طقينا وإنطقينا وخلصت الحمدلله ، لا تشوف شسوينا فيهم
هز ذياب راسه بإيه يتفحّص ملامحه : إيه واضح ، حيّاك
هز راسه بالنفي وهو يشوف بجامة قصيد ، ويشوف ذياب اللي بشورته وتيشيرته : لا بس جيت أشوف قصيد شفيها لأن البنات محتفلين بالكوفي وهي تقول ما أقدر
لف ذياب نظره لقصيد لثواني ، لأزرار قميصها المفتوحة من الأسفل لنصف بطنها يرجّعه لفهد : اقلط تقهوى ، دامك وصلت الباب ما بتعوّد ومنها تونّس قصيد ، حيّاك
هي توارت خلف ظهره جزئيًا تسكّر أزرارها ودخل فهد أولهم يتبعه ذياب اللي صعد للأعلى يهمس فهد مباشرة : الكلاون فهد
إبتسمت لثواني وهو ما يتخيّل راحتها بإنه هو مو غيره : وش صار لملامحك فهد ؟ بالكوفي تتضاربون مع مين
هز راسه بالنفي : سالفة طويلة ، عندكم برّد ؟
إبتسمت : يا خيبة أمل ذياب بيقلّطك تتقهوى وتبي برّد ؟
سكت لثواني يستوعب ، وإبتسمت قصيد فقط : إرتاح
هز راسه بإيه يتأمل ، وجلس على أول كنبة قابلته يعدل أكتافه وتوجّهت قصيد للمطبخ تدور له آيسكريم وبالفعل ، ورجعت له تمدّه له تنطق له بلُغتها المحببة بمعنى البيت بيتك وإبتسم يهز راسه بإيه فقط من رجعت ترقى للأعلى ولذياب اللي يفتح الدولاب : على وين !
لف نظره لها لأنه الأكيد بيلبس ثوب بما إن فهد جاء ، وإبتسمت لثواني بإستغراب : بس ليه يعني فهد مو غريب ولا ضيف عشان تقابله بثوب
هز راسه بالنفي : ليه ما قلتي لي إنهم طالعين يحتفلون ويبونك
رفعت أكتافها بعدم معرفة : مدري
'
لف نظره لها لثواني ، وهزّت راسها بالنفي بجدية : صدق ذياب الحين بتغيّر عشان فهد ؟ يعني حتى بجامة ما تعتبر لابس كلها شورت وتيشيرت ليش التغيير
هز راسه بالنفي : ماني متعوّد ، من ما كان الجاي ببدّل
ناظرته لثواني فقط : جرّب هالمرة طيب ، بتقهوي فهد تدري فهد دخل وش يدّور ؟ يدّور برّد حبيبي آيسكريم
ناظرها لثواني ، وإبتسمت فقط : هيّن فهد وما يسوى عليك تبدّل الحين ، ما يسوى علينا أساساً كلنا
هز راسه بالنفي ينزل نظره لبجامتها ونطقت هي : أعرف فهد ، بيحسّ إنه ثقيل وبيمشي على طول ما بيطول لو عاملته كذا وحسسته إنه ضيف وغريب
إختار الصّمت وكملت هي : وما شاف الأزرار لأنك ماشاءالله يعني تغطّي البيت وراك ، ما بالك أنا ؟
هز راسه بإيه يشتت نظره لثواني لأن بجامتها طبيعية أساساً ، حرير أسود بأزرار كانت مفتوحة لكن وقت تقفّلت صارت عادية تماماً ومع ذلك هي أخذت وشاحها تحاوط أكتافها فيه : ما ودّك تروحين يمهم؟
كان منها النفي لعينه فقط ترجع شعرها للخلف : لا
نزلت يتبعها هو ، وإبتسم فهد لأنه كان متوتر بشكل غير طبيعي لكن وقت كانت ملامحهم طبيعية ، ونزولهم طبيعي ، وتفشّل من مداهمته لهم بهالوقت ببجاماتهم وهو ما يعرف طبع ذياب لكنه تنفّس بهاللحظة : هلا والله
رفع ذياب حاجبه ، وضحكت قصيد تحاول تمسك نفسها : هذا أكثر منظر بائس شفته بحياتي ! فهد شفيك
إبتسم بشبه حزن : أحزّن صح ؟ مكسور خاطري قصيد
ضحكت لأنها ما تصدقه ، وجلس ذيّاب : من كسره
إبتسم فقط يطقطق : أكيد مو اللي طقّني
جلست قصيد بجنب ذياب : ووش سالفة الطق كله أصلاً
عدّل أكتافه فهد يسولف وعينه بالآيسكريم : واحد تافه بالكوفي شاف عذبي يسولف مع خطيبته حسباله يتحرش فيهم من الخبله أسيل قالت يامتحرش وطقّ الصدر هو يعنني فزيّع شنو يتحرش فيكم إنتو حسبة أهلي هذا الشنب مو على ريّال إذا يتحرش فيكم وطقّ عذبي وعذبي طقّه ودشينا طقيناه وفزعوا ربعه طقينا بعض وانحاشوا
ضحكت قصيد تحاول تمسك نفسها عشان تتطمن عليهم لكن ما قدرت تمسك ضحكها يضحك فهد بنفسه : على مهلج لا تغصّين !
ضحك حتى ذياب اللي حاول يمسك ضحكته لكن من إنهيار قصيد ما قدر ، ضحكة وحيدة طلعت منه يمسك نبرته لكن ما قدر ما يطقطق نهائياً : وطقيّتوهم المهم ؟
إنهارت قصيد ضحك لأن حتى ذياب يضحك على سرعة فهد بالكلام بين طقّني وطقيته ، إنهارت تغطّي ملامحها خلف كتف ذياب اللي ضحك : تسلم يمينك فهد
هز راسه بإيه : ذياب سكّت مرتك لا أقوم أطقها الحين
جاء الشبل ينط بحضن ذياب وضحكت قصيد تاخذ نفس : ما كفّاك اللي بوجهك يعني فهد تحارشه علي ؟
هز راسه بالنفي يغيّر الموضوع مباشرة : شنو حيوانج المفضل قصيد
ضحكت قصيد لأنه من العدم ، وإستوعب فهد : محشوم ذياب يعني إنت على الذيب ، وأنا على الفهد بس صج شنو قصيد ولا تغلطين علينا تقولين إنتم احترمي نفسج
هزت راسها بالنفي تضحك : فهد لا تسولف بسرعة طيب
كان مستمتع ، فعلاً مستمتع وإبتسم فهد : ان شاء الله
ضحكت تاخذ نفس من أعماق قلبها ، وسأل : سؤالي انزين
ناظرته لثواني بذهول : يعني منجدك تسأل ما تصرّف ؟
هز راسه بالنفي ، ورفعت أكتافها بعدم معرفة : أحب كل شيء ، الخيول ، الصقور ، أشبالك طبعاً اللي مو حيوانات
لف ذياب نظره لها بتساؤل : والبل ؟ ماهم حيوانات بعد
ضحكت تهز راسها بالنفي : ما أحبها ، يعني ما أحس بحبها بشيء ما أقدر أقرب منها بالنهاية ما أحسها تفهمني وأخاف منها ، يعني اللي قبل كانت لطيفة لونها مريح اللي عندك الحين أحسها كذا
هي غرقت بالسوالف لذياب تعبّر له بملامحها عن " التجهّم " وإن مجاهيمه الحين دائماً غاضبه ، وهز فهد راسه بإيه يوقف : إيه توصون شيء تآمرون على شيء ؟
ضحكت قصيد تستوعب : عن العباطة فهد
جلس بمكانه يبتسم ، وتنحنح ذياب يرجع علومه اللي ضاعت كلها يكمّل فهد : طيب البل ما تحبينها ، غيرها
رفعت أكتافها بعدم معرفة : ما أحس فيه شيء أكثر
ناظرها فهد ، وتذكّرت : لا ، يعجبوني الغزلان إذا ما تدرون
رفع ذياب حاجبه مباشرة : الغزلان ؟
هزت راسها بإيه لكن فهد نطق مباشرة يكّلم جواله : ألو ، محمد ، دوّر لي غزال لو بعشرة مليون الآن وإلا قصيت راسك
ما إستوعبت قصيد ، وما إستوعب ذياب لين ضحكت قصيد بذهول : يا متخلف يافهد !
ضحك فهد يهز راسه بالنفي : يعني إحساس بس ، ذياب
نطق ذياب مباشرة : من كسر خاطرك فهد
سكت فهد لأنه ما نسى رغم كل التهريج اللي سوّاه ، وإبتسم يهز راسه بالنفي : هذا كله ويقولون ما تعشقني
رنّ الجرس مرة ثانية يوقف ذياب اللي كانت منه نظرة لفهد اللي ضحك : الله يسلمك حبيبي بس واضح عليك
توجه ذياب للباب ، وإنتبهت قصيد رغم قلقها على ذياب لسكون فهد المباشر تسأله : فهد صدق وش زعّلك؟
نطق بهدوء : لأنها شبّتها زعلت هي وقعدت لحالها
رفعت حاجبها لثواني تحاول تفهم : أسيل ؟
هز راسه بإيه ، ورفعت حاجبها بإستغراب : و ؟
رفع أكتافه بعدم معرفة : سألتها ، بتبكي هي أصلاً قلتلها شفيج وخرّبتها معي ويوم خرّبتها
نطقت قصيد تقاطعه مباشرة : عصّبت عليها وخربتها ؟
هز راسه بالنفي يعدل أكتافه : ما سويت لها شيء
سكتت مباشرة تستوعب لأنها تعرف إنفعالات فهد وقت أحد يخرّبها معه ، سكوته مع أسيل غريب ورفع أكتافه بعدم معرفة فقط يرجع ذياب الهادي تماماً يجاوب نظرة قصيد فقط : أسامة
'
هزت راسها بإيه وتنحنح فهد يوقف : كثّر الله خيركم
رفع ذياب حاجبه مباشرة : وين عشاك عندنا !
إبتسم فهد يهز راسه بالنفي : لا والله بروح للعيال الديوانية ، بس قلت أسيّر عليكم إشتقتوا لي أكيد
إبتسم ذياب فقط : إذا عرفت دربه دلّني عليه
ضحك فهد بإعجاب مباشر لأنه يقصد اللي جرّح له وجهه : راعي فزعة ؟ أزهلك يعني ؟
إبتسم ذياب بهدوء يهز راسه بإيه : عطني صوت بس
كشّرت قصيد مباشرة : شكرًا لا تعطيه ولا يعطيك ولا تكلّمون بعض أساساً هوشات ما نبي لا إنت ولا إنت ، بليز
إبتسم فهد فقط يصفّر لأشباله ، وأخذ ذياب واحد منهم يرفعه للأعلى لأن فهد ما عجبه : تحبينهم تقولين ؟
شهق فهد مباشرة : شنو وإذا تحبهم بتاخذهم مني ؟ لها سوابق البنت معي والله أطقها وأطقك ما أتغشمر إنتبه
رفع ذياب حاجبه ، وهز فهد راسه بإيه : يوم كنّا صغار ، إذا معي شيء تبيه ياخذونه مني عشان قصيد تبيه وتقول لي ، فهودي نلعب مع بعض ؟ وهو حقي أصلاً بس هي
ناظرته لأنه إنتثر بدون مقدمات ، وضحكت : فهد !
هز ذياب راسه بإيه يحلل الجملة : يوم كنتوا صغار
لفت قصيد نظرها له لأنها تعرف نبرته ، ونطق فهد مباشرة : بسوي نفسي ما سمعت لأنك بتفزع لي تقول
ضحك ذياب فقط ينزّل الشبل عن حضنه بعد ما مسحت عليه قصيد ، يودّع فهد معاها وإبتسمت يسكّرون الباب خلفه : ما قلت لك حسّاس أكثر من كل شيء فهد ؟
هز راسه بإيه : صغيّر توه ، لكن يعجبني هالولد
إبتسمت تهز راسها بإيه ، وتذكّرت : وش يبي أسامة ؟
هز راسه بالنفي : يتطمّن ، ما رديت عليه من البارح ..
وافقت بدون سؤال أكثر تتوجه للأعلى معاه ، من رجع يرمي نفسه على السرير مباشرة ولف نظره لها من كانت تنزّل الوشاح عنها ، من توجّهت له تجلس على طرف السرير بجنب راسه : تفكّر بشيء أشوفك
هز راسه بالنفي فقط وأسامة جاء معاه أخبار كثيرة ، أخبار أعطاه موجزها لكن ما ودّه حتى يطريها بباله ومدّ يده لأزرار بلوزتها ، أسفل واحد فيها : أفكر بأشياء كثيرة قصيد
هزت راسها بإيه من فتح أول زرّ : قول لي وش طيب
نطق بكل هدوء : أفكر بالبارح ، وقبل سنين ، وبالجاي
ما تكلّمت لأنها تعرفه وقت يجمّع كلامه ، وهز راسه بإيه بإثبات بهدوء : أفكر بالحدود ، والقيود .. وبك
فتح آخر زر بالأعلى تزامنًا مع نطقه " وبـك " ينبض عنقها مباشرة بالخجل ، بالإستغراب لأنها ما كانت تستوعب كانت مركزة بكلامه : بي أنا ؟
هز راسه بإيه بهدوء ينطق لعينها بالذات : وبي ، معك
شتت نظرها لثواني تستوعب ، تحس حرارة الجو - أكثر - لكن ما ودها يختار الطريق الأسهل وقت تداهمه أفكاره ويختار قربها ، ودّها يختار الكلام ولهالسبب هي همست مباشرة : ل
'
مدّت يدها ليده تمسكها بإصرار رغم إنها تعرفه ، تعرف أطباعه وتعرف إن كل تمنّع سابق منه بسبب الحدود تلاشى من بعد ما صارت حلاله : لا ، ما أمزح أول نتكلم
كان يتأملها بطريقة تخلّي ملامحها تشعّ خجل ، تشعّ فعلاً ويدري وقت تخجل هي تختار الصمت لكنها نطقت بإصرار : يعني ؟
هز راسه بالنفي هو يفكر بشيء آخر تماماً : تحبين الغزلان
عضّت شفايفها : ذياب والله العظيم بعضّك آخر شيء ! لا نركّز علي لا نركز نبي نركز عليك ممكن ؟ نشوفك إنت بس
إبتسم فقط يتأملها ، يتأملها بطريقة " تجننّها " لأنه غريب بهالحال معها وإستسلمت تماماً تتأمله بالمثل ، تمدّ يدها لصدره لثواني وإنحنت تقرب من شفايفه فقط : ذياب
ما ردّ عليها لأنه ينتظر متى تقبّله وتنهي الكلام هو بيكمّل بعدها ، ونطقت تهمس بهدوء تعرف إنها توتّر روحه وقت تقرب منه بهالشكل : ما بتقرّبني تعرف ؟
هو قيدّ يدها ، وقيّدها كلها على نفس إنحناءها لأنها كانت على وشك توقف وتبعد وضحك ، فعلاً من أعماقه ضحك : صادقة بها يعني ؟
هزت راسها بإيه : وإترك يدي لو سمحت هذا إعلان للحرب وبيني وبينك حدّ ياويلك تجرب تتعداه
هز راسه بالنفي : فيه مجال للتفاوض طال عمرك ؟
كتمت إبتسامتها لأنه يهلكها وقت يسولف بهالطريقة ، وهزت راسها بالنفي : مافي مجال للنقاش حتى ، أبداً
ذياب : وإن فاوضتك بالليّ تبينه ؟
قصيد : لا ، لو سمحت تترك يدي الآن لأن هذا حد بعد
هز راسه بالنفي لأنه ما بيتركها ، لأنه مستحيل يبعدّ عنها وإبتسمت لأنها تشوف من عينه : مافي لا تحاول حتى
أخذ يدها يقبّلها لثواني طويلة ، يجمّع كلامه براسه ونطق بهدوء : والله بالليّ تبينه ، واللي تسألين عنه ، واللي تحسينه خافي ، والباقي كله بيصير براحة يدينك قصيد
ناظرته لثواني تاخذ نفس : لكن ؟ لأن أكيد بعدها لكن
هز راسه بإيه : لكن أبي وقت ، وقت بس أثبّت به الدنيا وأدري ما يزعل خاطرك بعده ثم ذياب ، ودنيا ذياب ، وخافي ذياب كله لك باللي تبينه قصيد ، باللي تبينه
عضّت شفايفها لثواني : ليه أحس بخوف من كلامك ؟
هو حاول يغلّف كلامه بالطمأنينة ، بالوعود المستقبلية ويلغي حاضر الأيام لأنها ترعبه حتى هو لكنها فهمته ، عرفته ، وحسّته : قصيد أنا
هزّت راسها بالنفي تقاطعه مباشرة : لا ذياب ، ما أبي وقت وما بعطيك وقت أبي الحين تقول لي كل شيء ، تسولف لي عن كل شيء لأن
ما تدري كيف مسكت حروفها عن الإعتراف بلحظة لأنها تدري هو كل حيله هي ، لو قالت له إنها تعرف بكل شيءّ يمكن يتوه ، يمكن يضيع وعضّت شفايفها لثواني ودّها تصرخ بإنها سمعت أسامة وكل كلامه ونطق بهدوء من حسّ بشيء مريب : به شيء بعينه تبين تسمعينه مني
'
هزّت راسها بالنفي تشد يده بإثبات : لأنك تهمني ذياب ، يهمني كل شيء عنك كل شيء يخصّك كل سالفة كل حكاية كل جرح ذياب
شتت نظره : والظاهر إني مليان جروح لكن كانت طيّبة ، كانت مستورة ماتعرّت إلا معك
عضّت شفايفها لأنها تفهمه هو حتى على إرهاقه ساخط : تدري وش يخوّفني ذياب ؟ أخاف من إنك تداريني لا أعرف بشيء ، لا أسمع بشيء ، لا أحس بشيء وأخاف من إني أداريك بنفس القدر ، يمكن أكثر وأخاف من السكوت ، أخاف وقت تسكت ذياب
رفع حاجبه لثواني : ليه تخافين ؟ ماهي محبة ذي يوم تنتهي الظروف كلها قبل لا تاخذ من خاطرك شيء ؟
إبتسمت تلمع عيونها : محبة ، محبّة ما شفت مثلها بس تخوّفني يمكن لو زلة ، لو غلطة ، لو سالفة مخفية ثانية تهدم محبتي ومحبتك علينا ذياب ما أدري لكن شوف إنت كيف تحبّني ، شوف أنا كيف أحبك
ما كان يستوعب لثواني إلى أن خرست حروفه تماماً يفهم ، ونطقت هي : أخاف لأن لو كثرت الأسرار ، كثرت الجروح ولو دخل بيننا شيء حنّا ما نتحمله لأن ما
هز راسه بالنفي بذهول يعدل جلسته مباشرة : قصيد !
أخذت نفس لثواني وهي كانت متماسكة طول وقت تعبه لكن وقت لمحت إنه رجع يصحصح ، هي ما عاد قدرت تمسك نفسها ودّها تتخفف من شعورها معه وتعترف له وضمّته مباشرة من جلس يقابلها : أخاف ذياب
هز راسه بالنفي بهدوء : يخسى الخوف قصيد ، يخسى
عدّلت نفسها لثواني تشتت نظرها فقط ، تعلّقت نظرتها بعينه من مدّ يده لخدها تحس الدفء كله بيدّه اللي تحاوط ملامحها لكنها هزّت راسها بالنفي : لا ، للآن على كلمتي ما تغيّر شيء مو لأني قرّبتك يعني بتقربني
لأنه كان يتأملها ، ولأن يدّه من خدها لامست طرف شفايفها مثل إرتكاز نظراته عليها تنطق بالتهديد : ذياب ! ما بتقّربني لا تتحلم حتى بهالشيء لأن ما قلنا ترتاح ؟
ضحك بذهول مباشرة : على كيفك متى وقت الراحة ومتى وقت العذاب ؟ يوم تبين السوالف إيه ريّحت يا ذياب بنسولف غصب يوم قضيتي صار وقت الراحة ؟
إبتسمت تهز راسها بإيه بذهول : يعني بس ليه المعارضة لهالدرجة سلامات ؟ هديّ شوي طلباتك مرفوضة بس
إبتسم يهز راسه بإيه : أنا طلباتي مرفوضة قصيد ؟
هي تعرف تحرق دمه ، تعرف تهلكه لآخر نفس وإبتسمت : مرفوضة جدًا غير قابلة للنقاش ، سألتني قبل شوي تحبين الغزلان نرجع للموضوع ممكن ؟ أحس ودي بابا دايماً يقول مثل الغزال الفازع ودي أشوف كيف
لأنه يعرفها هو ما كان قادر يخفي إبتسامته نهائياً : أجيب لك على ودّك بس تدرين وش ودي أنا
رفعت حاجبها لثواني : وش ودّك ؟ بغار أكثر لو ودك بـ
هز راسه بالنفي يقطع كلامها ، ينطق اللي بخاطره مباشرة : ودي أجيب لي منك غزال صغيّرة قصيد
'
سكنت ملامحها لوهلة لأنها ما استوعبت : مو شجاع ؟ يعني مو ولد ليه صارت بنـ
ضحك لأن ملامحها شعّت بذهول على كلامه ، وعلى إنها تستفسر ليه وصرخت بذهول تمسك يدّه : ذياب !
ضحك من أعماق قلبه يسحبها لإتجاهه لأنها خجلت ، لأنها إنتهت من خجلها : أموت بك قصيد ، أموت بك
-
« بيـت حـاكـم »
جلس يتأمل ساعة جواله ، بين الصواب والخطأ ، بين الإعتدال والطغيان كثيرة أحواله لكن الخلل ، وين الخلل للآن عجز يعرف موطنه الفعلي ، موطنه الحقيقي وأساسه وجلست ملاذ بقهوتها تبتسم لسعود ، ولديم ونهيّان الجالسين من رنّ الجرس : هذا أكيد ذياب
هز حاكم راسه بإيه يوقف ، وأخذت ديم سعود يأشر لها حاكم بالجلوس : إرتاحي ما بيدخل يابوك ، إرتاحي
توجه للخارج فعلاً يفتح الباب لذياب الواقف بكل هدوء ونظره للحديقة فقط : يعجبك بعدك يا ذياب
رفع حاجبه لثواني يمد يده لأبوه ، يقبّل رأسه : سم ؟
هز حاكم راسه بإيه يسكر الباب خلفه : يعجبك إن هالبيت مو بيتك ، توقف على بابه مثل الغريب
نطق ذياب بهدوء مباشر : من غرّبني عنه أبوي
لف حاكم نظره له مباشرة لأن ذياب دايماً يختار الصمت هالمرة نطق بكل هدوء ، وسكت حاكم فقط يرجع ذياب يديه للخلف : كيف حاله سعود وأبوه وأهله ، طيبيّن ؟
هز حاكم راسه بإيه : طيبين ، الحمدلله طيبين
توجه يمشي مع أبوه لسيارته ودخل حاكم مكان المعاون يدخل ذياب بمكانه هو لكنه نطق : لي طلب منك أبوي
رفع حاكم حاجبه لثواني يلف نظره له ، ومسح ذياب على حاجبه فقط : إكتفيت ، من الوزارة ، من البشوت ، من الدنيا كلها وقد قلت الهرج لأبونايف ولاصدّقني به لكن أدري بك إنت تصدقّني ، إكتفيت منها كلها
ناظره حاكم لثواني ، وهز راسه بإيه بإثبات : وإكتفيت عن الغضب ، عن الظنون كلها أبوي لكن لي طلب ، رجاء ، اللي ودّك تسميه أبوي
سكت حاكم ، وكمّل ذياب : بنت صلاح ، وغير بنت صلاح اللي يحاول يقرّبني ، يحاول يضّرني ، يحاول ما يحاول لا تردّني عنه إنت أبوي ، والفريق حاكم والنعم على عيني وراسي لكن به أمور ، به أشياء خلّني أشيلها أنا أبوي ، أنا أدرى بها والله ولاني هيّن ، ولاني طاغي بالوقت نفسه
حاكم : وأشوفك تحرق نفسك ؟
هز ذياب راسه بالنفي بهدوء : ماني ضعيّف أبوي ، ولاني مستغني ولا بايعٍ عمري
عضّ حاكم شفايفه : ولا إنت بايع عمرك لكن الغضب اللي شفته منك يا ذياب ؟ وش كان الغضب لو ما ردّيتك عنها ما كنت بتقتلها ؟ ما كنت بتقبرها ما أعرف يمينك أنا ؟
شتت نظره بهمس : مابها حيل يميني ، الورق هنا
ما سمع أول نطقه لكن سمع قوله بالورق ، وفتح ذياب الباب ينزل يمد حاكم يده للدرج يطلّع الورق من داخله ، أكوام الورق الكثيرة كلها بذات المحتوى اللي نفض صدر حاكم بلحظة ، نفضه بشكل بيّن لو ما نزل ذياب من السيارة يمكن ما غاب عنه ولهالسبب هو نزل أساساً وسكنت ملامح حاكم اللي يشوف صور لكل عمره ، أغلى غالي عنده ، سبب حياته ، ورغبة الحياة عنده من وقت كان أقسى قاسي لين دخّل بحياته ملاذ ، ورد ، لون ، ورجف صدره مباشرة لأنها صور فقيده اللي تركت لسانه يهتّز مباشرة : لا إله إلا الله يانهيّان ، لا إله إلا الله
مسح ذياب على جبينه يتزايد الضيق بصدره لكن لابُد ، من هالوضع لابُد لأن أبوه يشره عليه ، ويعتب عليه ، ويتدخلّ بشكل يحرق أبوه بنفسه هو تعوّد الإحتراق من مدة ، تعود سوء الظن به من مدة طويلة وشتت نظره فقط يشوف إرتجاف يدّ أبوه الثابتة طول عمره على ملامح نهيّان اللي بالصور ، تأمله الطويل له ونزل حاكم بعد وقت طويل يسأل فقط : من حطّها لك ؟
ناظره ذياب لثواني ينتفض داخل حاكم فقط لأنه شاف الجواب من عينه ، من قبل لا ينطق ومع ذلك نطق ذياب بهدوء : هي ، بنت صلاح اللي على عينك أبوي هي عاثت بي وبقصيد بأرضي ، بخيامي ، على عينك وقفت تحّداني ، وعلى عينك يومها روّح لزام بسببها هي وعلى عينك هي قالت السالفة ومن وراك ، من وراك ما قصّرت بي لا من ناحية نهيّان وطاريّه ، ولا من ناحية إنها تقرّبني بقصيد وماهو مرة ، ولا مرّتين
كان حاكم يتأمله ، وكمّل ذياب بهدوء : وتهددني بشيء أنا ما أرضاه لو على موتي وقطعت دربها ، قطعت جيّتها على الرياض كلها ولويت ذراعها مثل ما كانت تبي تلوي ذراعي لكن عوّدت ، عودّت وإنت وأبونايف لمصلحتي أنا سهّلتوا دربها ، وجبتوها لين بابي أبوي
نطق حاكم مباشرة يقاطعه : لأن البلاء اللي بك منها يا ذيـ
رفع يدّه اللي ترجف فقط يشوفها أبوه : ماهو منها ، منّي أنا الظاهر
لأنه أشّر على عقله ، على راسه فقط سكتت ملامح حاكم كلها وشتت ذياب نظره : وإن كان منها ، بيطيب بموتها
عصّب حاكم مباشرة بذهول : وعادي لا سوّت لك شيء بيطيب بموتها ! بيروّح بموتها !
هز راسه بإيه فقط يناظر أبوه ، وسكت حاكم اللي يتأمل ملامح ولده لثواني خطفته بطريقة ما من البرود اللي بملامحه ، السكون ، الإنتفاخات تحت عينه ، بدايات الشيب فيه وإنه يشوف نفسه قبل 30 سنة بالضبط وشتت نظره بهدوء يهز ذياب راسه بإيه : تم أبوي ؟
طلعت ملاذ من الداخل تبتسم : كنت بزعل لو جيت للباب ولخاطر أبوك وتعدّيتني يا ذياب !
قيّد حاكم ذراع ذياب قبل يتعدّاه ، قبل يكمّل دربه لأمه ينطق لعينه : أبوي اللي تقولها وتكررها ، تذكّر بها نفسك إنك ولدي ، وإلا تذكرني بها أني أبوك يا ذياب ؟
قبّل رأس أبوه يتوجه لأمه ، يبتسم لها : ماعاش من يتعدّاك ولا كان ، أم ذياب
طلع نهيّان من الداخل يشيل سعود : تراي راعي شرهة وش يعني تجي للباب وما تمرّني ياعمي ؟ وش تقصد ؟
ضحك ذياب ياخذ بدقن سعود الصغير : ماشاءالله الله يحفظه ، نمرّه طال عمره ما نصبر عنه ، ماشاءالله
إبتسم نهيّان : وين مستعجل ؟ ماودك تدخل القهوة ؟
هز راسه بالنفي ، وإبتسمت ملاذ فقط : الله يحفظك
توجه لسيارته يشوف نظرات أبوه له فقط ومع ذلك هو حنى راسه إحتراماً له يركب سيارته وإنتبهت ملاذ على وقوف حاكم بمحلّه تنزل للأسفل ، له بإستغراب : حاكم ؟
ما تكلّم ، كان منه السكوت اللي تشوف ملاذ معه إختلاف ملامحه الشديد ونزّل يدها من على صدره فقط : خلاص
لمح ذياب المشهد كله وسط المرايا من إبتعاده ينتفض صدره كله ، ينتفض داخله كله يدري إن كل الدنيا ما تجبر حطام قلبه ، وداخله ، وحتى أبوه لو رجعت المياه لمجاريها ما بيقدر يجبره لأن داخل صدر ذياب ، داخله بأعماقه كُسر شيء بشع ، بشع مايتخيّل أحد بشاعته ولو ماكانت إبتسامتها ، ملامحها اللي شعّت لوداعه قبل ساعات رغم نومها يمكن ما إختار الا طريق الخيام لكنه غيّر لقصره ، لبيته ياخذ نفس من أعماق قلبه : يارب
-
بدّلت ملابسها تنتظر رجوعه ، تفكّر بكلامه ، بأفعاله ويخجل قلبها بشكل طاغي كل ما تذكّرت الأمس تاخذ نفس من أعماقها : يارب
رجعت شعرها للخلف تمسك نصفه ، وتترك الباقي بحريته تعدل فستانها تنتظر رجوعه وبالفعل وصلتها رسالة منه " أنا تحت " تستغرب لأنها ما سمعت صوت الباب ونزلت للأسفل : جوانا ، ذياب جاء ؟
هزت جوانا راسها بإيه تسكر الستائر بالأسفل : بالحديقة
رفعت قصيد حاجبها لثواني بإستغراب ، وهزت راسها بإيه تأخذ الأوراق اللي جابتها لها جوانا من أبوها : تمام
توجهت للخارج بيدها الأوراق تشوف جلوسه الساكن بالجلسة تماماً وكان منها السؤال : بنجلس هنا ذياب ؟
هز راسه بإيه تلف نظرها لجوانا تأشّر لها بإيه ، إن القهوة هنا وتوجّهت من خلفه تقبّل راسه لثواني : فيك شيء؟
كان منه النفي تمشي لداخل الجلسة ، تجلس جنبه ومدّت له الأوراق تعض شفايفها لثواني : رسلها بابا مع جوانا ، وإتصل يسأل وقت عرف إني نايمة قال إذا صحصحتي شوفيها وقولي لذياب يشوفها معك وبجيكم
فتح الأوراق يشوف سيرة قصيد الذاتية كاملة ، عمرها ، مؤهلاتها ، شهاداتها ، دوراتها ، لُغاتها ولف للورقة الأخرى ينتبه على إسم المكتب ونطقت قصيد : يقول ، الأفضل تتقيّدين عند أحد غيري بالتدريب ، سوالف سمعة وعشان ما أحد يقول لأن أبوها ، وبسبب أبوها بس هي كذا
ذياب بهدوء : معه حق بس الدنيا تعرف ذياب يعني من قبل أتخرج حتى أغلبهم يرسلون لي لو لي رغبة بالتقييد عندهم أو التدريب أو أي شيء يعني مين بيخاطر يطلب أحد لمكتبه وهو يدري إنه مايعرف شيء وبس بسبب أبوه
هز راسه بالنفي يرجع أكتافه للخلف : يحنّك الشاعر ، ما يبي توصلك الكلمة ومعه حق لكن إنتِ وش تقولين
جات جوانا تترك القهوة أمامهم ، وتقدّمت قصيد تصب له فنجال ، ولها ترجع لجلوسها : ما أعرف ، منها معاه حق ومنها وش علينا من الناس طيب وش يسوي كلامهم
إنتبهت إن ملامحه تغيّرت عن قبل خروجه كثير ، إن فيه أشياء كثيرة تبدّلت ونطقت : ذياب صار شيء ؟
هز راسه بالنفي ياخذ نفس من أعماق قلبه ، بداخله شعور - فراغ - تامّ ما يدري حتى وش يحس تجاهه : صار شيءّ شين ؟ لا ما صار الا الخير الحمدلله
كانت تنتظره يكمّل ، وشرب فنجاله ينطق بكل هدوء بعده : أنهيت كل شيء قصيد
شهقت من حرارة الفنجال : حار طيب ! مليون مرة أقول
هز راسه بالنفي : مايحرق شيء ، سمعتي وش قلت ؟
قصيد بعدم إستيعاب : أنهيت كل شيء ، وش يعني كل شيء ذياب ما فهمت
رفع يده لطرف حاجبه فقط ما يقدر يتعمّق بالشرح لها ، ما قدر يعبّر بالشكل الكامل : الظروف ، يوم قلتلك القيود والحدود والوقت اللي أبيه ، كله قضى اليوم خلاص
ضحكت تاخذ نفس من أعماق قلبها : نلعب الأسئلة يعني
رفع حاجبه لثواني ، ونطقت بهدوء تام : قضى الخوف اللي كان من شهور بدون أي سبب ؟ أو بسبب تخبيّه عني ؟
هز راسه بإيه يكتفي لكن نظراتها أجبرته يتكلّم ، أجبرته ينطق بهدوء : قضى ، لأن كان به حدٍ ناقص اليوم حطيته ولا تشغلين بالك بالتفاصيل قصيد ، لا تفكّرين بها أبوي
هزت راسها بالنفي تثبّت رأيها إن ودها تعرف ، وأخذ نفس من أعماق قلبه : تذكرين بنت صلاح ؟
سكن خاطرها مباشرة قبل يكمّل حتى تستوعب : اللي جـ
قاطعها مباشرة قبل تحرق قلبه وتتذكر أفعالها : هي ، بعينها من مدّة قد لعنت سابعها وعوّدت ولا كان لي علم بها لكن اليوم إنتهت ، قضت ماعاد هي حولنا
هزت راسها بالنفي برجاء : بالقلم نشرح حبيبي ، أرجوك
مسح على راسه لثواني تشوف إن هذا أصعب حوار ممكن يمرّ فيه بحياته وودّها تحنه ، تتراجع عن السؤال بس بنفس الوقت ماودها تبي له الراحة كلها وأخذ نفس من أعماق قلبه يسولف لها ، يراقب عينها بكل الحكاية وهو يسولف وتسمع له بكل حوّاسها لكن فصل عقلها ، علّق عقلها بالنهاية : يعني لحظة ، إنت ما كنت تعرف إنها موجودة هنا ورجعت بس كنت خايف طول الوقـ
عضّت شفايفها من نظرته لثواني حتى هي ما تحسّ حرارة القهوة بهاللحظة : أقصد القلق ، وقصيد ماتجلسين بالبيت لحالك وكل الحال اللي قبل كان بسبب إنك حتى مو متأكد إنها موجودة وهي فعلاً موجودة يعني !
مد يده ينزّل الفنجال من يدها لأنه حار جداً وهي تمسكه غلط : لكن قضت ، هذا المهم قصيد
هزّت راسها بالنفي تعض شفايفها : ما يهمني ! يهمني وش أخذت منك ذياب وش صار فيك لا تقول قضت !
لأنه كان يعرف إن هذا بيكون ردّها هو هُز داخله مباشرة : قصيد
هزت راسها بالنفي داخلها يضجّ ، يضجّ وتدري باقي خافي ما قاله لها حكاية وحدة نطقها لها شيّبت راسها ، شيّبت عقلها كله وحاولت تمسك دموعها لثواني تستفسر : يعني هي ضرّتك ، وضرّتني بهالشكل وحتى عمي حاكم يعرف لكن لأن هم حريصين ماشاءالله وفكّروا بدون سؤال إنها هي تكون سوّت لك شيء مثلاً ، يجيبونها للرياض مرة ثانية عشان تكون قريبة منهم لكن ما يصير عندك خبر بسبب إنّ !
سكتت تحاول تهضم السالفة بعقلها عجزت ، عجزت ونطقت من جديد : قريبة لدرجة تقدر تسوي شيء مرة ثانية لكن إنت ما عندك خبر لأن هم عندهم خبر وكفاية
عدل جلسته ينطق بنبرة شبه أحدّ يوقّف عقلها : قصيد !
سكتت ، إختارت السكوت فقط تشتت نظرها لثواني وتعرف لو طوّل سكوتها بينهلك ، بيموت بمحلّه ولهالسبب هي مدّت يدها تبعد ذراعه ، تدخل بحضنه وإنحنى يقبل راسها مباشرة : آسف ، وقضت هذا المهم
قصيد بهدوء : هي السبب باللي صار بالخيام ؟ هي اللي حطّت الصور بسيارتك وهي طبعاً ، تحت مراقبتهم
كانت تصرخ اللي فخاطره من مدّة تساؤل ، تنطقه بدون ما تفكّر فيه حتى ولا تهمسه ورجعت تحاول تركّز : يعني بعد كل شيء ، وإنت عارف نيتها أساساً بعّدتها عننا وعنك بالحُسنى وإنتهت السالفة صح ؟ كيف إنتهت ذياب كيف وقّفتها عند حدها أساساً هي وش كانت تبي منـ
سكتت بذهول تبعدّ يده ، ترجع السالفة كلها لعقلها بلحظة وحدة بدايات حكي ذياب كان يشرح لها عنها ، عن إنها من حريم البدو وكانت تبي نهيّان يتزوجها ، ياخذها لو بالإسم بس ورجف صدرها بدون مقدمات : هي كانت تبيك تاخذ بنتـ
مدّ يده يقاطعها مباشرة لأنها تستوعب من كل النواحي بشكل صعب عليها هي وإلا هو تخطى من مدّة ، من وقت طويل ونطق تركي اللي دخل الحديقة : وش تسوي ببنتي يا ذياب ؟
سكنت ملامح قصيد مباشرة ، سكنت تشعّ لأن يد ذياب على شفايفها يسكتها ويدّه الأخرى تمسكها وتركها ذياب يبتسم تركي : قصيد ، غلط عليك شيء أكسّر راسه ؟
-
'
إبتسمت لأن أبوها يضحك أساساً لكنها تذوب خجل ، وإبتسم ذياب يوقف يسلّم عليه لكن تركي ضحك يشدّ يده بشبه تهديد : لا عاد أشوفك تسكّت بنتي يا ذياب !
إبتسم ذياب بهدوء : لو تدري ليه أسكتها بتعذرني ياعمي
ضحك يضرب على كتفه بذهول : يعني مستحقة تقيّدها كذا ؟ معقول يا قصيد ؟
شعّت ملامحها خجل مباشرة يضحك ، يمد يده لقصيد اللي رفعت نفسها تقبّل راس أبوها اللي نطق بهمس : خفّي على الولد صدعتي راسه ! أول مرة أشوفه يسكّت أحد وش سويتي له وبالدموع بعد ! ، كايدة صدق
لأن ذياب سمع ، وكتم ضحكته هي ضحكت بذهول تتلاشى الدموع اللي كانت تغرّق عيونها : إنت معاه عنده ومعاي عندي ؟ ليه كذا يعني مافهمت ؟
إبتسم تركي : أكسبكم الإثنين ، سياسة يسمونها والذيب أدرى بها
إبتسم ذياب فقط ، وجلس تركي يشوف الأوراق : وش تتجادلون عليه لأن قصيد ما تكشّر أنيابها إلا لا كان بالموضوع كلمة لا ، وش قايل لها لا عليه يا ذياب ؟
نطقت هي كالعادة ، تنسى نفسها : بس ذياب ما يقولي لا
إبتسم أبوها اللي لمح نظرة ذياب لها يضحك ، ياخذ الفنجال من يدّها : الله يديمه لك ، ويديمك له ويديمكم لنا .. كيف حالكم أبوي عساكم طيبين ؟
ذياب : بخير وأفضل حال الحمدلله ياعمي ، إنت علومك عساك طيب ؟ عمتي وعذبي طيبين ؟
إبتسم يهز راسه بإيه : طيّبين يسلمون عليك ، الوالد والوالدة علومهم ؟
إبتسم ذياب بهدوء : الحمدلله ، الله يسلمك ويسلمهم
إبتسمت قصيد ترجع جسدها للخلف فقط ، تحس بأبوها شيء مختلف تماماً : عندك موضوع بعيونك أقدر أشوف
ضحك تركي يقفّل الأوراق اللي بيده : إي والله ، بس قبلها وش قلتي ؟ خلاص نعتمد التدريب بهالمكتب ماهو عندي
هزت راسها بالنفي : بعدين بابا ، بعد العيد نشوف ان شاء الله ونقرر ينفع ؟ لأن ما أحس منطقي عشان إسمك بس وأحس ظلم بنفس الوقت ، يمكن رغبتي الخاصة أتدرب عند أفضل محامي فيك يادنيا ليه تحرمني ؟
ناظرها لثواني تفجّرت ملامحه حب تشوف هالشيء وبالفعل ضحك ، ضحك من أعماقه يبتسم ذياب لأن طريقتها بالكلام " تحوف محبة " دائماً ونطق تركي : ياليتك هنا يا سلاف وإلا هالحكي شلون نردّ عليه ؟
ضحكت تعرف قصده بعضّ أمها لأصباعها ، وهز راسه بإيه بكمّل : أكيد ينفع بس وش عندك إلى بعد العيد ؟
هزت راسها بالنفي : برتاح
ضحك تركي بذهول أكبر ، بذهول أكثر : ترتاحين ؟
حتى ذياب كان مصدوم : وش متعبك ؟
هزت راسها بالنفي : لا أقصد برتاح شوي بعد التخرج يعني
ناظرها أبوها لثواني يمد فنجاله : إيه ، ماشاءالله تعبتي معك حق .. تدري من مرّني المكتب اليوم يا ذياب ؟
'
هز راسه بالنفي يكمّل تركي : المستشار عبدالرحمن وأخوه عبدالرحيم ، أبوبندر اللي رسلته لي بدايات شغلك
تذكّر ذياب يهز راسه بإيه فقط ، وكانت قصيد تسمع بإنصات من كمّل أبوها يسولف : كيف الحال وش العلوم وش الأخبار والدنيا ومن هنا ومن هنا لين وصلت السالفة عندك ، قال نسيبك ذياب كيف حاله قلت طيب ماعليه قال تخيّل ياتركي ، هذا المستشار عبدالرحمن يقول جاتني الأوراق لذياب من جديد وفرحت ، قلت عرف إن مكانه هنا والحمدلله بيرجع وترجع الأمور طيبة وشوي يومين إلاّ يجيني العلم من أبونايف قال اصرف نظر ترى ذياب ماوده
قبل يتكّلم حتى ذياب نطقت قصيد : مين كلهم أصلاً ؟
إبتسم تركي فقط لكنه رجّع نظره لذياب : أرّقني الموضوع ياذياب إن كنت تبي الصدق ، يوم دريت والله ماهان علي أول ، وشغلك أول بالمكتب إيه ماكنت راضي عنه لكن الوزارة دامها رجعت لك ليه تردّها ياذياب ؟ مارجعت لك بالواسطات وإلا كلامهم الفاضي إنت دخلتها تستاهلها وبعرق جبينك ، واللي صار ظلم والحين بترجع لها لأنهم يدرون بإنه ظلم ورفعوه عنك ، ليه ترفض يابوك ؟
هز راسه بالنفي ياخذ نفس من أعماق قلبه : إكتفيت ياعمي ، إكتفيت من الوزارة ومن مكتب سموه ومن كل الدنيا ذي ماعاد لي فيها شيء
سكتت قصيد لأنه يتكلّم بالصريح ، وسكت حتى تركي يهز راسه بإيه : أذكر وصايا نهيّان لك أول ، بس دامك مرتاح يابوك ألزم ماعليك راحتك أجل
يكذب لو يقول إنه مرتاح لكنه إكتفى ، فعلاً إكتفى ووقت قُطع من الوزارة تماماً وقطع الأمل برجوعه ، ووقطع الوجود مع سموّه وبإختصار - عاطل - تماماً بدون شغل هو شدّه حنين رهيب لشغله بالوزارة ، لأول تعيينه ، لأيام كثيرة يتذكّرها بحنين صارخ لكن بنفس الوقت ماعنده قدرة ، ولا طاقة ، ولا إحتمال : الحمدلله
لمح تركي إنه مو هاين عليه ، ولمحت حتى قصيد ولهالسبب هو تكلّم : وين بتروح الحين يا ذياب ؟ وش بتسوي إن كنت ما تبي مكتب سموه ، ولا الوزارة ؟ وش بتسوي
رفع أكتافه بعدم معرفة يمسح على جبينه ، وتنهّد تركي فقط يعرف هالحال : الله يزينها يابوك ، الله يزينها
سكتت قصيد فقط تشتت نظرها : أسوي لكم شاهي ؟
هز تركي راسه بإيه يكح : جوانا ، تسوي شاهي
إبتسم ذياب اللي يتأمل باطن يدّه فقط ، وتنحنحت قصيد : ليه يعني الشاهي حقي ماينفع ؟ ما تبي ؟
هز راسه بالنفي يفكّر : لا بس الدرب من هنا للمطبخ ماشاءالله سفر ، يمديك تفكّرين فيه وش الشيء اللي تعّبك بترتاحين ، يمكن من الغياب
ضحك ذياب اللي شتت نظره وهز تركي راسه بالنفي بعتاب : ولك جزء من العتاب يا ذياب ، أجي أشدّ عليها من هنا ترخي إنت وراك ما تصحيها من نومها تخلّيها تداوم ؟