أنت تقرأ

انت الهوى ، كل الهوى برد ولهيب🤎

Romance

- للكاتبة : ريم الاوطان🇸🇦 " عندما تصبح القيُود حناناً وتمرّ السُنون مثل الثواني .. عندها ، تصبح القيود إنعتاقاً وإنطلاقاً ، إلى عزيز الأماني .." يُقال إن للجديد دائماً وقعه ، وأقول إن كل الحكايا والسنين معاكم لها وقعها ورغم كثر النوايا...

#الاوطان #بر #حب #دلال #ذياب #روايات #ريم #سعودية #شعر #قصر #قصيد

بارت ٤٤

12.1K 215 42

بواسطة rwaiahh6

بقلم rwaiahh6

-
'
هز راسه بالنفي ينزل نظره لها : كم باقي وتتخرجين قصيد
رفعت حاجبها لأنه يعرف ولأن هذا السؤال مو وقته : ماباقي شيء وإنت تعرف متى ، ليه تسأل؟
هز راسه بالنفي فقط يمسح على أنفه : أدري ،بس اسأل
هو يتوهها وصارت تكشف هالشيء ، كل ما سألته يرجع يسأل سؤال يخصها هي ويضيّعها وهزت راسها بإيه فقط تتركه ، توجهت لعبايتها ترجعها بالدولاب وتحسّ إنه ما تحرك من مكانه لوقت طويل يتأملها لين طاعته الخطوة وخرج من الغرفة تاخذ نفس من أعماقها : آخر شيء بنجنّ ، أعرف هالشيء بنجنّ وما أقدر أقول ولا كلمة ولا تروح وترى أعرف كل شيء ولا تمثل إنك مرتاح وإنت مو كذا !
عضّت يدها لأنها تُقهر ، يحترق قلبها وهي كل مافكّرت بحاله تتوقع الأسياب لكنه والجدار واحد مستحيل ينطق وأخذت نفس فقط لأنها تلاحظ عليه ، وبأطباعه كل ما كان حولها يحاول - يرتوي - فعلياً ، وينطق لها بالصريح إنه بحياته ما صار طمّاع بشيء كثرها تشتت نظرها فقط : مستحيل إنت ، مستحيل ذياب
توجهت للشباك تشوف أسامة اللي حوله : يارب أفهم
_
لف نظره لأسامة اللي عند السيارة يأشر له بالنفي : بروّح لحالي ، بك شدة تقعد هنا لين أعوّد ؟ ماني مطول
ناظره أسامة لثواني يطلع جواله : تم السواق يروح معك
هز راسه بالنفي تتحول نظرة أسامة للرجاء مباشرة لكن كان من ذياب شديد النفي : ماني ورع يا أسامة لا تخاف
ركب السيارة فعلاً ينطق أسامة بهمس : أستودعك الله
تنفّس بمجرد ركوبه للسيارة ، بمجرد إبتعاده يمسح على جبينه فقط بهمس لأنه يجامل أيامه : يارب
ما حسّ المسافة بين بيته وبيت أبوه نهائياً من وصل ، من لمح أمه وأبوه الجالسين بالحديقة يرتاح أكثر إنهم بمكان خارجي : السلام عليكم
رُد السلام من أمه وأبوه ، ومن نهيّان الخارج من الداخل يبتسم من لمحه : يا هلا !
إبتسم ذياب يصافحه بهدوء ، بهمس : أبوحاكم
ضحك نهيّان : ويمكن أبوزهر ، وش يدريك ياولد !
إبتسم ذياب : كلهم خير وبركة ، عساك طيب ؟
هز راسه بإيه : طيّب وبخير الحمدلله ، جاي للوالد ؟ اليوم كله يهوجس ولا هو معانا قلت الحب حقه ما جاء
ضحك ذياب : بتروّح مكان وإلا بتقعد معنا ؟
هز راسه بإيه : بروح أشتري كم شيء للأهل وأجيكم
هز ذياب راسه بإيه يضرب على كتفه ، وتوجه لجلسة أمه وأبوه تبتسم ملاذ : يا أهلين ! يا هلا !
لأنها وقفت ، قبّل ذياب راسها يسلم عليها وتوجه لحاكم اللي من أول دخول ذياب ، ومن الأمس والأفكار تاكله أكل بخصوص ولده وحتى بهاللحظة وهو يسلّم على أخوه ما سكت عقله ، وإنحنى ذياب يقبل راس أبوه اللي يلاحظ يدّه دائماً خلف ظهره وقت يقرّب منهم ونطق حاكم بهدوء : جيت لحالك ماشاءالله أسامة وينه ؟
'
جلس يلمح نظرة أمه لأبوه كأنها تطلبه ما يفتح الموضوع ، ولف نظره لأبوه بإستغراب تام : وليه يجي
سكت حاكم يشتت نظره فقط وهو بالأمس مرّته لحظة إدراك دكّت خاطره وقت صار يستوعب تعب ذياب وحاله مو تعب يوم ، ولا تعب ليلة هو تعب شهور متواصلة من مداراة خاطر أبوه نفسه وباقي الخواطر ، على حساب خاطره ومشاعره وما سمح له حاكم يعيش لحظة وحدة يستوعب فيها شعوره من بعد وفاة متعب كان شايل همه هو فقط وشتت حاكم نظره يشد نبرته : أبوي توفى الله يرحمه ، وأبوك لا زال حي ودّه يشوفك طيب وما عليك خلاف
سكنت ملامحه فقط يهز راسه بإيه : والله يطول بعمره أنا طيّب وماعلي خلاف من يقول غيرها ؟
هز حاكم راسه بالنفي بغضب : أنا من يا ذياب ؟
لأنه يعرف متى يكون حاكم أبوه ، ومتى يكون الفريق حاكم هو نطق بكل هدوء العالمين : الفريق حاكم
هز حاكم راسه بإيه بقهر شديد : وتكذب علي تقول طيّب وماعلي خلاف يوم سألت المستشفى قال صحيح ذياب له ملف عندنا لكن السرية تتطلب ما أطلعه حتى لأبوه ، وين صارت ذي إذا مو إنت ملزّم عليهم وإلا من يرد أبو بيتطمن على ولده ؟
ناظره ذياب بهدوء يشتت نظره فقط : والله ، والله لو كان بي شيء يسوى جيت وقلت لك لكن ما بي شيء ! الملف من وقت الحادث ما تغيّر به شيء وش بيستجد يعني
شتت حاكم نظره ينطق فقط : أشقيتني ، أشقيتني يابوك كل ما قلت بان رجعت تخفى إلى متى ؟
سكتت ملاذ تشتت نظرها فقط ، وسكت ذياب اللي إرتعشت يده بشدّة يدخلها بجيبه : الأمور طيبة أبوي
إبتسمت ملاذ اللي تفكّر بشيء آخر تماماً وتصدّق ذياب بقوله : أمي ذياب ، للحين ما تفكّرون بالولد ؟
لف حاكم نظره لذياب اللي هز راسه بالنفي بهدوء : لا
رفع حاكم حاجبه لثواني ونطقت ملاذ بتشفّق : لا تبطون يا أمي ترى بالدنيا كلها مافيه ولا شعور أحلى من شعور الولد ، وقصيد قربت تتخرج ما عندك عذر تقول صغيرة
هز حاكم راسه بالنفي يفهم ولده مباشرة : هو ما يبي
كان من ذياب نظرة وحيدة لأبوه ، وسكنت ملامح ملاذ تخجل السؤال لكن حاكم نطق يتأكد : ما تبي وإلا ما
لف ذياب نظره لأبوه فقط : ما ودي ولا قصيد ودها
إبتسمت ملاذ تفض الموضوع : بدري ، توّ العمر
لمح إبتسامة خفيفة فقط بثغر أبوه يعرف معانيها ووقفت ملاذ : بروح أشوف ديم ما ردت على ورد للحين
توجهت ملاذ يلف حاكم نظره لذياب اللي مد يده للفنجال يتقهوى فقط ، يتأمله ويعرف حاكم إن كل الخلل "منه " لأن وقت كان ولده بعيد ويعرف أخباره من غيره ما كان راضي ، والحين وهو ملازمه مثل ظله ما يسمع منه إلا أبشر وتم ماهو راضي وشتت نظره للبعيد فقط تطلع ملاذ : حـاكـم !
-
'
كان صوتها غريب ، كان ندائها مُفزع بشكل غير طبيعي يفز أبوه من عضّت شفايفها تحاول ما تصرخ لأن ديم - مخطوفة ملامحها - رعب وتأشر : دق على نهيّان ياذياب
سكنت ملامح حاكم مباشرة يفز : شفيها !
هي رجعت تركض للداخل وتوجه حاكم يركض لها مباشرة يوقف ذياب بالخلف يحاول يثبّت رعاش يده بغضب : ماهو وقتك ! ماهو وقتك
-
تسمّرت بمكانها تتغيّر ملامحها لأن الألم اللي تحس فيه مو طبيعي وبعّدت يد ملاذ عنها : ما بولد ! لا
دخل عمها حاكم مع الباب - مرعوب - فعلاً : بنتي ديم
هزّت راسها بالنفي وهي تنهار وجع ، وألم قلب لون ملامحها تماماً تبعد يد ملاذ للمرة الثانية : بروح أتمدد بـ
صرخت من الوجع تمسك يد عمها بدون مقدمات ما تدري تركز بالألم ، وإلا تركز بالخجل عجزت تعرف تركض ملاذ لعباية ديم وعبايتها : مشينا يا أمي مشينا !
سكنت ملامح ذياب من لمح خروج أبوه يسند ديم على يده ، وبجنبه ملاذ اللي تمسك يدها وتسميّ ينزلون الدرج بسرعة خيالية وردّ نهيان : ولد ذياب ! وينك
نطق مايعرف كيف يصيغ الحروف : نهيان ، تعال البيت
سكت نهيان لثواني بشبه تردد ينطق : ديم صح ؟
هز راسه بإيه يشوف أبوه اللي يأشّر له وما يفهمه : إيه أخلص رايحين هم أبوي وأمي معها روّح وراهم نهيان !
-
« المسـتشـفى »
ركـض يشوف أبوه وأمه الجالسين على الكراسي بإنتظار وهو من رعبه يحس إنه يسمع نبض قلبه بأذنه : وين ديم ! أمي ما دخلتي معها ! ليه خليتيها لحالها !
هزت ملاذ راسها بالنفي : ما رضيت يا أمي ما رضيت
لف نظره للباب اللي فُتح يسمع صراخها تبرد أطرافه مباشرة ، ووقف حاكم ياخذ بيده فقط : تعال
هز نهيّان راسه بالنفي برعب : أبوي وش ليه تاخذني !
ناظره حاكم بذهول يشد ذراعه : عشان تقرّ ، إمسك نفسك جايك ولد الخوف هذا وش له ! قل لا إله إلا الله
ناظر أبوه لثواني ، وإبتسم حاكم يضرب على ظهره فقط : بتقوم بالسلامة هي والصغيّر ، لا تشيل هم يابوك
توجهت ملاذ لنهيّان يجلس حاكم ، وسكت لثواني لكنه رجع ينطق من رعبه لأمه برجاء : أمي تكفين ، طول الأيام وهي تهوجس ما ودها تولد روحي عندها أمي تكفين
ضحكت ملاذ بذهول : وش ماودها تولد وين يروح الولد يعني ! الله معها يا أمي ما يخليها بس إنت تنفس
دخل فزّاع اللي يركض ، ونادين ودرة معاه كلهم على نفس اللهفة يسألون ونطق حاكم : ننتظر ، إن شاء الله خير
عضّت نادين شفايفها برعب تتأمل الغرفة بإنتظار من لمحت إن ملاذ بالخارج : عنيدة بنتي ، عنيدة أعرفها
_
صرخت ملامحها كلّها لأنها ما كانت مستعدة لهاللحظة اللي تبعدها عن بالها بكل الطرق وجاتها تشد عليها بأبشع الطرق لأنها كابرت على نفسها بإن مستحيل تصرخ وتعرف إنهم يسمعون صراخها ، تسمع صوت الدكتورة ، تسمع صوت الممرضات وتعرف إنها تضرب اللي حولها لكن ما تحسّ إلا بالألم اللي سكن كله ، إنتهى كله يتبدّل صراخها هي لصُراخ رضيع خَفق له قلبها مباشرة تحس بحارق دموعها على خدها وإبتسمت الدكتورة تضحك : شيخ الشباب ماشاءالله ! مبروك !
ضحكت ديم لأنها طول الشهور هي ما ودها تعرف جنس الجنين من سالفة الإسم وعنادهم عليه ، وذاب قلبها بلحظة من جات الممرضة تشيله بين يديها لها : بسم الله
رجفت شفايفها تحتضنه من الممرضة لحضنه ، قطعة من روحها بحجم ما تصدّقه من صغره ، بسكون ما تصدّقه من صغره وما وقّفت دموعها لو لحظة وحدة بدون إدراك منها ترجف : يا أهليـن !
_
إنقطع نفس نهيّان من صار ما يسمع لها صوت رغم إنه سمع بُكاء صغير رجّف قلبه من ضحكت ملاذ تضرب على ظهره مباشرة : مبروك يا أمي ! مبروك ما جاك !
ما صدّق يشوف نادين اللي تحضن درة ويبكون ، أمه اللي صارت تبكي مباشرة وأبوه وعمه المبُتسمين يصافحون بعض ولا يدري هو وش موقعه من الإعراب تخرج أحد الممرضات بإبتسامة : مبروك ماشاءالله ولد أحلى من القمر ! البيبي والأم كلهم بخير الحمدلله ننقلهم لجناحهم وتقدرون تتفضّلون عندهم ، مبروك مرة ثانية
ضحك نهيّان يلف نظره لأبوه مباشرة : ولد ! أبوي ولد !
ضحك حاكم يهز راسه بإيه يشوف إن ولده عيونه تغرق بدموعه : مبروك ما جاك يابوك ، مبروك ما جاك قرّت عينك بسلامتهم ويتربى بعزكم
تعالت ضحكات حاكم من توجه له نهيّان يضمه - بعدم تصديق - تضحك ملاذ اللي تمسح دموعها تضم نادين ، ودرّة تحت جناح أبوها المبتسم تصوّر الأوضاع وضحك حاكم يمسح دموع نهيّان بتوصية - حنونة - : صار عندك ولد تجمد عشانه ، قوّ نفسك أشوف لا جيت بتسولف له قل آخر عهدي بالدموع دمعة طاحت من فرحتي بك
ضحك نهيّان يضم أبوه للمرة الثانية : الحمدلله
-
عدلت نفسها وهي تنتظر متى يجيبونه لأنهم أخذوه عنها لكن قلبها متشفّق له بشكل غير طبيعي ، بشكل غير عادي رغم كل التعب إلا إن داخلها خفّاق له تعدل جلوسها بالقوة من فُتح باب جناحها : جبتيـه ؟
كان نهيّان يمشي أولهم يشيله بيديه ، خلفه حاكم وفزاع ونادين وملاذ ، وآخرهم درة اللي تصور تغرق عيون ديم بالدموع مباشرة من إبتسامة نهيّان وأحمر ملامحه لليّ باللفة بيده ، ولده : جبناه يا أمـه
ضحك فزاع من بكت مباشرة يتوجه لها يقبّل راسها : الحمدلله على سلامتك ياحبيبتي ، يتربى بعزكم وعزنا
سلّم عليها حاكم ، وملاذ ، وبقيت أمها بجنبها تضمّها ودرة تمسك يدها ما توقف دموعها وبقى الولد بيدين نهيّان اللي يتأمله بكل حنان العالمين : إنت ولدي
'
ضحك فزّاع : وحفيدي ، حفيد فزاع وحفيد حاكم بعد
إبتسم حاكم من توجه له نهيّان يمده له ، ولفت نادين لديم : ما قررتوا الإسم للحين ؟
هزت راسها بالنفي ، ولف نهيّان نظره لأبوه اللي يتأمل الصغيّر يلي صار بين كفوفه ، أول أحفاده من أوسط عياله ، من نهيّان اللي بين كثير الجنون ، والعقل بمواقف قليلة فقط ، بين المسؤولية واللامسؤولية ، وبين الحياة ، والحياة لا خيار ثالث يعيش أيامه وغُمر قلب حاكم بشعوره تجاه الولد ، وولد الولد اللي بحضنه الحين : لا تسمّونه على أحد ، لا علي أنا ، ولا على أبوي الله يرحمه
نطق فزّاع يسند موقف أخوه بإبتسامة : ولا علي ، ولا على عمامي عيال نهيّان الله يرحمه نبيه الأول من اسمه
تنهّد نهيان لأنه كان يدري : ما بيصير حاكم الثاني يعني ؟
ضحك حاكم يهز راسه بالنفي بهمس ، يكتمه شعوره بالسرور وإبتسم نهيّان من رسالة ذياب له : جاء عمك
ضحك فزاع لأن حاكم مو مستوعب ووقت نطق نهيّان " جاء عمك " يقصد فيها ذياب ما إستوعب : إيه كبرنا ياحاكم ، نهيان أبُو ، وأنا ويّاك جدانه ، وذياب عمه
غرقت ملامح درّة بالدموع مباشرة من ضحك فزاع : وديم أمه ، وجدّاته حوله ، ودرّة خالته وورد عمته ياحاكم
ضحك حاكم يهز راسه بإيه تغُرق عيونه للي بين يديه فعلاً : وورد عمته ، يا هلا بك يا أبوي .. يا هلا بك
إبتسم نهيّان : ناخذه لذياب يشوفه ؟ ونجي لكم
هزت ديم راسها بإيه لأن ودها تتخفف من مشاعرها الكثيرة بهاللحظة وشديد تعبها ، وطلع نهيّان يفتح الباب لأبوه اللي يشيل الصغير بيدينه وإبتسم لذياب الواقف بالممر بسرور مباشر : الذيـب
إبتسم ذياب يشوف فرحة نهيّان من عيونه لكن تحرّك قلبه من مكانه من لمح أبوه خارج من الغرفة يشيل بيده ملاك صغير ، وأكثر من الملاك بصغير حجمه المستحيل يضحك نهيّان من نظرة ذياب مباشرة : هذا ولدي ذياب
ضحك ذياب بذهول : لا إله الاّ الله ، ماشاءالله !
توجه نهيّان تحت جناح ذياب اللي إبتسم بذهول : مبروك ماجاك ويتربّى بعزك ياخوك ، الحمدلله على سلامتهم
ضحك حاكم اللي يشوف الصغير فتّح عيونه : شكله يدري الذيب جاء له ، فتح عيونه عشان عمه والله ونعم القدر
ضحك نهيّان يصرخ : وإنت عمه ذياب ، يقولك عمي ذياب
ما صدّقت عينه لوهلة يتأمله بحضن أبوه بحجم كفّه ، أحمر الملامح تماماً ويُلف بلفة زرقاء تعبرّ عن جنسه وحتى راسه يُغطى بقبعة صغيرة بنفس اللون ، يبتسم وما عرف يصيغ الحروف بلسانه يكرر " ماشاءالله " وإبتسم نهيّان اللي يتأثر بشكل غير طبيعي للآن ويحاول يشد نبرته : يقول أبوي ، قول له آخر عهدي بالدموع دمعة طاحت من فرحتي بك ذياب ، لأنه ولدي وأنا أبوه
-
لف ذياب نظره لأخوه اللي تأثر بمشاعره مباشرة يضحك ، يضمّه : الله يقرّ عينك به ويبلغك فيه تشوفه ذيب يشبهك
سكت حاكم لأن جملة ذياب بهاللحظة رجعته لـ٣٠ سنة وراء ، ليوم ولادة ذياب نفسه واليد اللي شدّت عليه تضحك له " الله يقرّ عينك به ويبلّغك لين تشوفه ذيبٍ يساوي الدنيا " ولمح ذياب نظرة أبوه له لكنه ما دققّ فيها بالحيل يضرب على كتف أخوه : أبوحاكم؟
هز حاكم نفسه راسه بالنفي : يكفي حاكم واحد يابوك
حس ذياب بشيء آخر خلفها يتأمل أبوه ، ومسح نهيّان دموعه يحس يد ذياب اللي تشد على كتفه للحين : ما يبون يسموّنه عليهم كلهم ، نسميه ذياب على عمه ؟
إبتسم حاكم فقط ، وهزّ راسه بالنفي : وذياب واحد
إبتسم ذياب يشد على كتف نهيّان : تشاور إنت وأمه ، وحق السماوة مننا كلنا لو تسميه وش ما تسميه
ضحك نهيّان يهز راسه بإيه : لا تعرف النوايا ياذياب ، لو سميّته حاكم بيصير حاكم بن نهيان بن حاكم بن متعب بن نهيّان ، ثقيلة حاكم ونهيّان مرتين
هز ذياب راسه بإيه ، وإبتسم نهيّان مباشرة : لكن شكل السماوة لك ،حاكم بن ذياب بن حاكم بن متعب بن نهيان
_
تلاشت الضجة من الكل وما تلاشت فرحة نهيّان الجالس بالسرير بجنبها ، ولا فرحتها هي وهي تشيله بين يديها بحضنها رغم إنها مهلوكة ومنهارة تعب إلا إن فرحتها فيه أكثر ، فرحتها فيه أكبر وإبتسمت لأنه نايم ما يحس فيهم وبقى الإسم ما إختارته ، ولا نهيّان إختاره : وش نسميه؟
إبتسمت تتأمله بحب ، ومد نهيّان يده بين يد ديم اللي عليه وبين لفّته يبتسم : ديم
رفعت أكتافها بعدم معرفة لثواني لكنها قررّت ، وإختارت : سعود ، نسميه سعود ؟
هز راسه بإيه تضحك ديم ، تغرق عيونها بالدموع للمرة الألف بهاليوم فقط : يا أهلين يا سعود ، يا أهلين أمك ديم ، وأبوك نهيان ، وإنت سعود بن نهيّان آل سليمان !
ضحك نهيّان غصباً عنه لأن الوقع جاء رائع لمسمعه وأخذه بيدّه عن ديم : ودك أمك ترتاح صح ؟ وبتجي جدتك وخالتك عندكم وأنا قالوا لي توكل
ضحكت ديم تريّح ظهرها : لأن مالك داعي تجلس هنا
هز راسه بإيه : إرتاحي إنتِ المهم ، عندك أمك ودرة
إبتسمت فقط ، وترك سعود بسريره بجنبها على أقل من مهله يبتسم له ، يمسك أطراف سريره ورجع يتوجه لديم يمسك يدها : وإذا تبين شيء دقي علي
هزت راسها بإيه يقبّل راسها ، ووقف يسمع دخول نادين ودرة لها : عمتي إذا تبون شيء أنا قريب ، كلموني بس
إبتسمت نادين تهز راسها بالنفي : ما نبي إلا سلامتك يا أمي الله يحفظك ، ولا تشيل هم
-
'
« أسبانيـا »
دخل يحس كل عظامه تألمه من طول جلوسه بالمكتب وسكنت ملامحه من لمح جوالها بيدها لكن دموعها تجري على خدها نهر ، من شهقت بمجرد ما لمحته يوقف قلبه لأن ملّ البكاء ، وملّته دنيته من كثير بكاء الشوق اللي هو أصعب شيء يمرّ فيه من ورد لكنها نطقت : نهيّان ، جاه ولد !
إبتسم مباشرة يرتاح إنه بكاء سرور وفرح : ماشاءالله !
توجه يمشي لها من لفّت جوالها له توريه ، وما عرف وش يبكيّها للآن لأن منظره بلفّته رهيب ورائع يضحك نصار مباشرة : ماشاءالله تبارك الله ! الحمدلله على سلامتهم بس وش يبكيك ما عرفت حنان العمومة يعني ؟
ورد : هنا كنت أبكي فرح ، بس هنا مدري وش صار
لفت له الجوال يفتح مقطع مصور من زاوية لغرفة لظهر عمه حاكم ، وظهر نهيّان يمشون للواقف بالممر يرق قلب نصّار مباشرة يضحك : يا حـبيبي !
شهدت عينه كامل الموقف ، ضحكات حاكم ، دموع نهيّان ، حضن ذياب لنهيان وإنه يشد ظهره وإنبهاره الشديد بالصغيّر بحضن حاكم يتأثر حتى نصار وتكّت ورد على كتفه : غرقت بدموعي غرقت ما قدرت ، متخيّل ؟ أبوي شايل أول أحفاده ويمشي له لأول عياله ونهيّان ! نهيّان حبيبي بيطير من فرحته حتى الأرض مو شايلته
ضحك نصّار يعيد المقطع لمرة ، ومرّتين ، وثلاث وأربع ورجع حتى لصور سعود يشوفها : الله لا يلومه ! ماشاءالله .. هذا حاكم الصغير ؟
ورد تبتسم : لا ، سموّه سعود ما وافق أبوي يسمونه حاكم ولا على أي أحد يقول الأول من إسمه
إبتسم نصّار يهز راسه بإيه : أسعدهم سعود إي والله ، يتربى بعزهم إن شاء الله وعقبال عندنا
ضحكت تغرق مشاعرها مباشرة فقط ، وإبتسم إنها ما عارضت بإستغراب : وش ؟ ما قلتي لا
نطقت يذوب قلبها من منظر سعود : آمين !
ضحك بذهول ، وأخذت نفس من أعماق قلبها : يعني تخيّل هذا المنظر كان ممكن يفوتني لو درّة ما صورت ، يفوتني كيف بابا يشيله كذا وكيف نهيّان مبسوط وكيف ذياب مبهور ! ما أتحمل
ضحك يهز راسه بإيه بإرتياح : الله يجزاها ألف خير والله
هزت راسها بإيه : تقول ماما ، أبوي مبسوط كل شوي يتأمل الصور ويبتسم يقول ما أغلى من الولد إلا ولد الولد
إبتسم نصّار : عقبال عيالنا وعيال ذياب !
_
« قصـر ذيـاب »
دخل يشـوف إنها على الكنبة تذاكر بكل هدوء لكن إما يسرقها التركيز ، أو تسرقها الأفكار لأنها ما حسّت دخوله وظهرها بإتجاه الباب يمشي لها ولوهلة ، حسّت برعشة جسدها من بعّد شعرها بطرف يده عن عنقها وظهرها تحس البرد ، واللهيب بلحظة من إنحنى يقبّل عنقها من الخلف لثواني طويلة بهدوء : ما فزّيتي
شتت نظرها بهدوء تنطق : مين بيقرّبني غيرك
نطق بشبه حدة مباشرة : بـنت ! ماهي كلمة تقولينها
عضّت شفايفها تعدلها : مين بيدخل البيت غيرك مع وجود طويل العمر أسامة يحوم بالأطراف ، تمّت ؟
توجه يغسل يدّه فقط وهو يعرفها وقت تعصّب عليه ، يعرفها وقت تزعل عليه ولف نظره لها لثواني تتجنب حتى تلف نظرها له تركز بالآيباد قدامها وبقى هو يتأملها فقط ، يتأمل وما يكف التأمل وشتت نظره بهدوء : لو تتأمل طول عمرك ما تكتفي ذياب ، والله ما تكتفي ولا يكفيّك
توجه يجلس بجنبها يلاحظ إنها بعدت لأنه جلس ملاصق لها بالضبط ينطق بهدوء : زعلانة مني يعني ؟
لفت نظرها له لثواني فقط : لا تعودت ، ليه الزعل ؟
ما تكلّم تضرب صدره مباشرة بايبادها : مو طبيعي ! أكـ
لأنها كانت بتوقف وتبعد هو مسك يدها يبتر كلمتها : أحبك
رجّعها لذات جلوسها ، ولذات وجودها يكمّل : تقصدين
ناظرته لثواني بذهول : ليه تسوي كذا ذياب ؟ وش يعني ؟
عضّ شفايفه لثواني يعترف : أخاف عليك قصيد
ضحكت لأنها ما تصدقه : لأن على رقبتي سكين أو باقي شهر وأموت !
نطق بغضب مباشر : قصيـد !
أخذت نفس فقط لأنها ما تصدّقه وتعرف إنه يكره تتكلم بهالطريقة : تخاف علي من وش حبيبي من وش !
لأنه سكت ، وتشوف إن أعصابه فصلت بمجرد ما جابت الطاري هي عضّت شفايفها برجاء : مو قلتلي ما نعيش بالخوف ؟ مو قلتلي لا تخافين ؟ ولا تخافيني ؟ كيف تـ
عضّ شفايفه يهز راسه بإيه : لا تخافين ، أنا اللي خايف وبي شيءّ هنا ماهو راضي يقرّ قصيد ، والله ماهو راضي
أشر على صدره ماتقدر تمنع كلمتها نهائياً لأنها حست بجديته وحسّت إنه يصدع : حتى بعد الايباد ؟
ناظرها لثواني لأنها تقصد ضربتها له توّها يهز راسه بالنفي : لو بالطاولة ما يقرّ
لفت نظرها تقيس الطاولة اللي قدامها لثواني ، وعضّت شفايفها فقط لأن حتى لو ودها تضربه بالطاولة مثلاً ما يمديها : طيب أنا هنا ، وطول الوقت معاك وحولك وتمام وبخير الحمدلله ومافيني شيء والأمور طيبة ما أعـ
هز راسه بالنفي مباشرة : لا تقولين لي الأمور طيبة
شتت نظرها بهدوء فقط : حلال عليك حرام علي طال عمرك صح ، نسيت
سكت لأنها تزعل منه ، لأنها صدت عنه بتكمل مذاكرتها لكنه عمداً قرب كتفه منها عشان ترجع ظهرها عليه ، وعمداً مد يده لخصرها يقيدها ونطق يحاول يشرح : والله ، والله ما هو بيدي قصيد والله
ما تكلّمت ، ونزّل ينحني بدقنه على أعلى راسها ياخذ عطرها لأعماقه من خصلات شعرها : ماهو بيدي وبي شيء مو طبيعي عليك إنتِ بالذات قصيد وتشوفيني !
هزت راسها بإيه لأنها من وقت وفاة متعب هي تشوف أحواله ، تشوف إن لو تنهشه الدنيا نهش هو كل إنتباهه لها خايف تضرّها الريح ولا يحس شيء إلا هي ، تشوف إنه صار - خوف - أقرب للهوس لكن ما لقيت مبرراته وما تكلّمت تكمل مذاكرتها فقط تحت أنظاره ، بوجودها بحضنه يشوفها تمرر الكلام كأنها تقرأ قراءة فقط : على وقتي ما أذكر كذا يذاكرون ويمررون
قصيد بهدوء : كلها أفهمها مافي ولا شيء جديد
نزل نظره لها وهي لو تفهم وش بصدره ، ووش بداخله ووش ينهشه من وقت وفاة متعب بتعذره ألف مرة مو مرة وحدة هو مشاعره ؟ ما يستوعبها للآن لكن الأحداث هو يدركها تماماً وكلها رجوعاً من أوّل مرة جرح فيها شجاع معصمها ، لأقسى مرة وقت زارت الخيام وحدها ، ولأبشع مرة وقت ثار لزام وثارت خيامه قدامها ، ولأمّر مرة وقت تواجهت مع حفيدة سموه تحرقها بالكلام وهي تحرق خدّها بالكف بالنسبة لذياب نفسه ،ولين آخر موقف وقت شهدت قصيد بنفسها بشاعة الموت كيف يضرب بقسوة وأكثر من يعرف بشاعة الموت ، وتغيّرات الموت وما يطيقها هو ذياب نفسه ، كيف قصيد تطيقها ؟ قصيد ما تستاهل ولا حدث من هالأحداث ، هي بنفسها ما تستاهل إلا الليّ يمهد لها الدنيا فجوج فضية مثل ما قال شاعرها وشتت نظره فقط : إعذريني قصيد
عضّت شفايفها فقط تقفل آيبادها ترميه بعيد عنها وتكتّفت ، تكتّفت يعرف إنها تحرق قلبها بهاللحظة لكنها ما تبعد عنه ودها تستجمع حروفها ونطق يحاول : ما رميتيه على صدري ؟
نطقت بهدوء تام : أخاف ينكسر ، ما يفرق معاك إنت
هز راسه بإيه بعدم إهتمام يستفزها : أجيب لك بداله
لفت عليه بهدوء : من وش تخاف علي ذياب ؟
جاوبها ، وشتت نظره : كل شيء قصيد ، كل شيء ما أقدره
لأن عينه كانت تسولف بشكل يرعبها ، عينه كانت تسولف أكثر من شفايفه بهاللحظة هي شتتّ نظرها فقط يكمّل : وأدري ماهو مبرر ، ولا هو شيء تطيقينه ولا أطيقه أنا لكن
هزت راسها بإيه تبعد نظرها فقط : لكن مو بيدك
عرف إنها بتبتر روحه ، بتقطع عنه نفسه وبالفعل هي حاولت بكل الطرق ما تفتح الموضوع لكنها ما قدرت : بس أنا أعرف الخوف ذياب ، أكثر من يعرفه أنا حبيبي
هي تقصد أبوها ، وخوف أبوها اللي تشوف إن خوف ذياب عليها بيتخطّاه بمراحل ونطقت تحاوله : وأعرف أعيش معاه وأتعايش معاه بس
صدّع راسه ترتعش يده يخبيّها ، يحاول يخبيّها لأن عيونها غرقت بدموعها ويشوف كيف تبعدها عنه عشان تحاوره بشكل طبيعي : بس ما أعرف أسكت ولا أشوف الخوف كأنه شيء عادي ، الإرتياب عادي ما أبـ
رنّ الجرس تشوف إن أعصابه شُدت ، وأخذت نفس من أعماق قلبها فقط توقف ، تتنفس : هذا محمد ، جاء يدّورك وأسامة كان بيصرّفه بس قلت له يدخل وطلبته يجيب شجاع أبيه وللآن ما جابه ما أعرف إنت ، ولا أسامة طلبتوه يتأخر لهالقد وما يجيبه إلا وقت ترجع
هو يحس رعشة يده ما تخفّ : وبتفتحين لمحمد إنتِ يعني ؟
'
وقف تشوف إرتعاش يده ، تشوف أعصابه اللي يشدّها وتشده بشكل يجننها بهمس : يموت محمد لو بفتح له ، ما يستاهل
هزت راسها بالنفي تسمح له يتوجه هو للباب يفتحه ، ياخذ شجاع من يدّ محمد لكنه مسكه بنفس اللحظة اللي نفض جنحانه فيها : قصيد
ما تكلّمت تزعل ، يزعل خاطرها فعلاً وهُلك قلبه يترك الدّس على يدها ، وترك شجاع على يدّها ببُرقعه للآن وتوجه يجلس فقط ، يجبر نفسه يجلس وما يهتم وتوجهت تجلس بجنبه تنطق بهدوء : بنجلس جنبك لو سمحت
ما تكلّم ، ولا رفع نظره لها لأنه يدري الخلل منه ، ويدري البلاء كله منه بشكل يحرق صدره وما تُلام هي ويعرفها وقت تحاول تداريه مثل ما يشوف جلستها بجنبه بهاللحظة إنها تلاصقه بالضبط ، ومدّت يدها تمسح على جناح شجاع بحب : وحشتني ، أكثر من كل شيء بالدنيا
لفت نظرها لذياب بتذكر : إشتهيت قهوة قبل شوي ، وسوّيت بس كنت أنتظرك ترجع عشان تتقهوى معي
هز راسه بإيه فقط تحاول تنزّل شجاع عن يدها عشان تروح للمطبخ هي وعجزت ، عجزت تشوف إنه يتامّلها ومد يده بعد دقائق حاولت فيها هي لوحدها ينزّله ، ونزّلت الدس عن يدها تمشي للمطبخ لكنها وقفت على بابه تشوف إن ذياب يمد يده يمسح على شجاع اللي بجنبه على الدسّ وما شاله من محله ، من نزّل برقعه عن عينه وما تحرك شجاع من محله تعضّ شفايفها لثواني : يعني حتى شجاع العنيد يخافك وتقول لي خايف ؟
-
فصل عقله فعلاً من كثر ما يفكر ، من كثر ما ينهش بنفسه بهاللحظة على زعلها وعلى دنيته وحاله يدري إن آثار الحادث كل إرتباطها بنفسيته والضغوط وأعصابه ، وهو ما يحسّ بنفسيته من أي إتجاه لكنه يتعب ، ما يحسّ لكنه " يتعب " بشكل ينهشه ولا يُرد بشيء ومن شهور وهو يتعب ويتدهور ووش بلاه ؟ ما يدري غير إنه يُهد ، ويشيب وترتعش يدينه ضعف وهو كل علمه بنفسه ، شديد ما يعرف الضعف وشتت نظره فقط على مجيئها من المطبخ تشيل القهوة بيديها ياخذ شجاع بيساره ، وجلست هي تبتسم لشجاع : تتقهوى معانا؟
صبّت لذياب تمده له يشربه ، وصبّت لنفسها تشوف نظرات ذياب لشجاع لكنها تعرف متى ما يكون بكامل وعيه : طوّلت ما رجعت البيت بدري
هز راسه بإيه يتذكر : نهيّان جاه ولد اليوم ، ما دريتي ؟
إبتسمت بذهول مباشر : لا ما شفت جوالي من وقت ! ماشاءالله !
هي ركزت على الخبر ، وركّزت على إنحناء شجاع لفنجال ذياب اللي بيدّه يشرب منه : راعي كيف يعني؟
ترك ذياب الفنجال على الطاولة يمد يده لجيبه يطلع جواله ، ومدّه لها يسكن قلبها مباشرة من كانت محادثة نهيّان اللي مرسل له صُور ، ومقاطع كثيرة إبتسم لأنها أخذت الجوال منه يذُوب قلبها ولا كأن الزعل كان ، ولا كأن الخصام موجود تتأمل بالإنبهار وصرخت من مقطع يصوّر لسعود المتمدد بسريره بإنه يفتح عيونه ويغمض تلتفت لذياب مباشرة : يفتح ويغمض ذياب ! وشو هذا يعني وشو ماشاءالله !
ضحك لأنها إنبسطت بشكل غير معقول وكان منها السؤال مباشرة : سموّه على عمي حاكم ؟
هز راسه بالنفي : سموّه سعود
إبتسمت بحب ، بإنهيار : بيبي سعود ، نوّرت الدنيا !
ما كان يتوقع لهفتها بهالشكل ، وما كان يتوقع " محبتها " بهالشكل تصرخ له عينها بعدم تصديق : ذياب ليش ما أخذته بجيبك ! ما أقدر ايش هذا يعني ماشاءالله !
إبتسم يهز راسه بالنفي يأشر على جيب ثوبه العلوي : يدخل هنا ، أجيبه لك
إبتسمت بحب تشوف مقطع آخر يرسله نهيّان وصرخت مباشرة : وش يعني نصوّر لعمو ذياب وش يعني !
ضحك يشوف إنّها ذابت تماماً من كل الصور ، كل المقاطع ، وسكنت ملامحها تماماً من لمحت إنه سعود بحضن عمّها حاكم ، ونهيان بجنبه يمشون بإتجاه ذياب نفسه الواقف بالممر فزّ قلبها ، هُلك قلبها تماماً لأن إنبهار ذياب وفزته كيف عدل حتى وقفته يطلع إيديه من خلف ظهره ما كانت عادية نهائياً ووقفت المقطع من أوله مباشرة تلف نظرها لذياب اللي إستغرب ، توجّه حوارها لشجاع : شجاع ممكن تبعد شوي حبيبي
إستوعب إنها تبي تضمّه يسكن خاطره مباشرة : وشفيك؟
هزت راسها بالنفي ترجع لجلوسها المعتاد وقت يكون جنبها ، يلاصق ظهرها صدره ومدّ يده يحاوطها ترجع تفتح الفيديو من جديد لكنها مسكت الجوال بيسارها ، ونزّلت يمينها لذراعه اللي تحاوط خصرها يشوف ملامحها اللي تنهار من حبها تهمس : ما أقدر !
خَفق قلبها من لمحت يد ذياب اللي تلمسه بحضن أبوه ، من لمحت إبتساماته ودموع نهيّان وكيف أخذ أخوه لحضنه يضحك له تغرق عيونها هي لأن ذياب غير عادي ، غير عادي تحبّ إنه حنون ، إنه إنسان ، وإنه كل طبعٍ يسرها تلاقيه فيه لكنّها تميّز ، وتشوف نظراته لعمه حاكم بكل لحظة حوار : أقدر أتخيّل مشاعرك وأشوفها كلها بس عادي توصف لي ؟ يعني أشوف كل شيء قدام عيني بس
يفهمها ، ولأنه يفهمها هو نطق : فزيّت له قصيد
عضّت شفايفها لأنها شافت ، وهز راسه بإيه بصدق : أقبل أبوي شايله يمشي لي ، وأخوي الصغيّر صار أبوه ومن فرحته به ما يردّ دموعه وأبوي يوصّيه عليه ، كثيرة
ما يدري كيف تكلّم لكن جملة أبوه للآن ترن بأذنه ينزّل نظره لشجاع اللي جنبه : أبوي يقول له ، لنهيّان قل لولدك آخر عهدي بالدموع دمعة طاحت من فرحتي بك
حسّت بشيء غريب فيها ، بإن ذياب نطقها يشتت نظره لشجاع لكنها إنتبهت ، ومع ذلك غيّرت الموضوع تبتسم بهدوء : كيف باركت له طيب ؟
ذياب : قلت له الله يقرّ عينك به ، ويبلّغك فيه تشوفه ذيبٍ يساوي الدنيا
لفت عينها له تبتسم لثواني : كيف جات ببالك ؟ أحس المفروض الناس يقولوها لنا ، يقولوها لك يعني بعدين
نزل نظره لها يبيها تلتفت له وبالفعل : شلون ؟
قصيد : يعني لو جاء لنا إحنا ولد ، لأنك ذياب يقولون لك الله يبلغك فيه تشوفه ذيب يساوي الدنيا وأكثر
هي بديت تشرح له ، وخجلت بنصّ الشرح يبيّن إنه ما إنتبه عشان تنتهي من شرحها : شلون ؟
رفعت نظرها له لثواني تحاول تفهم ، وضربت صدره مباشرة من إستوعبت : فاهم من الأول ذياب !
إبتسم فقط ، ونزّلت قصيد نظرها لشجاع اللي ساكن تماماً تمسح على ريشه : حبيبي شجاع ، جاء لك ولد عم
رفع حاجبه : كثّرتي علي قصيد ، كثرتي ترى أنتف ريشه
ناظرته لثواني بذهول : عيب أبوشجاع ! عيب
لف نظره لها لأنها إبتسمت لشجاع تمسح عليه ، تهمس له بإنه حبيبها وإن " أبوه " ما يقصد ينزل نظره لها فقط : ولدي صقر قصيد ؟
نبض عنقها لأنه نطقها بطريقة " غريبة " ، وهزت راسها بالنفي : أحبه محبة الولد ، ما تحبه ؟
هز راسه بالنفي ، وعضّت شفايفها لثواني لأنه يتأملها بطريقة غريبة وقفّلت جواله بيدها : وش ذياب ؟
كان منه النفي ينفض شجاع اللي توجه يطير لبعيد ، ومسح على شنبه فقط ينهي الحوار : خلصتي مذاكرة ؟
_
« بيـت تركـي »
جلس عذبي اللي يحس دقات قلبه مستحيلة لأن خطبته بعد بكرة ، فعلياً خطبته ، وشوفته ، بعد بكرة بدون جدال وبدون ما تتغيّر المواعيد وأخيرًا يعزّم ، وتعزّم ويقبل أبوه بإنه بيتوجّه لسعود يطلب بنته ودّ على سنة الله ورسوله وتنحنح يعدّل أكتافه للكتاب اللي بين يديه : نهاية الكتب ، نبي نسطّر عرض الرواية خلاص نبي الناس تقرأ مو أنا
لف نظره لدفتر بجنبه ، دفتر عنوان أول صفحاته كلمة وحدة " شاعـر " يبتسم له بهدوء لأن الحكاية بداخله ، حكاية شاعر فعلاً ، حكاية شاعر خُتمت بأبهى حُلة شافتها عينه واقعاً قبل ما يخصّبها خياله ويسطّر سطورها ، حكاية شاعر سارت به الأيام في غربة حياة ، سارت به على دروب شوك تجرّحه وما يودّها توصله للهلاك ، والجنون الوشيك ، حكاية شاعر كافح بأشعار يكررّها يأمّل نفسه ، وبأشخاص لاشدّت عليه دنياه لقى من بينهم حبيبته وسنده ، وعضيده ولد عمه ، وأخوه وكل قريب منه يجددّ به الأمل ما يوقف عند كثير المصائب وما وقف فعلاً ، ما وقف لين عانق غرّة الشمس ، ولثم خدها وضحك يقلب صفحاته بيديه : عزّتي للي بيقرأ حروفها خيال ما يدري إنك واقع أعيشه أنا وسمعته على لسان محبوبتك كلّه
-
'
كان يقصد أمه ، وإبتسم فقط لأنه يذكر إن الأُمنيات له كانت بكونه كاتب يميّزه أسلوبه ، يُعرف من بين ألف نصّ ونص إن هنا بهالسطور إسمه وعلى ما يشوف هو يتأكد إنه فارق تماماً عن الكل ويُميّز متى يكتب عذبي ، ومتى يكتب غيره ولف نظره للدفتر الآخر بعنوان " قصيـدة " وإبتسم : قصيدة فعلاً !
منغومات فنية ، ومقتطفات بسيطة عن حياة أخته المليانة " دلال " فعلي لكن على ما يشوف ، الدلال ما أثّر بكون شخصية أخته قوية جدًا ووقفت الفصول فارغة تماماً لأن ما عاد ودّه يشيد الحكاية لقصيد وحدها : أعرف إن الأسرار كثيرة وأعرف إنه مجنون بالعظمة لكن كيف تسولفين لي قصيد ؟ وكيف تجي لي التفاصيل كلها أو على الأقل بس بسيط الأحداث والتفاصيل لخيالي أعرف لها لكن شلون ؟ شلون بدون لا أصير مجنون لا سألت
قلّب فارغ الصفحات بيده يضحك : الخافي البيّن ، ما قالها عمي حاكم عبث أدري إي والله لكنه يجذبني
-
« بيـت حـاكـم ، العصـر »
ترقص جدران البيت " طرباً " بمجيء أول أحفاد حاكم بهاليوم ، بإنه جاء بيت جدّه ، بيت أبوه ، بيته هو عن المستشفى والكل يجتمع على شرفه وإبتسمت ملاذ ترد على هتان : إيه اليوم خطبة أخوها عذبي بس قالت بتجي تتحمد لديم بالسلامة وتسلم على سعود بعدين تروح !
درة : ماشاءالله عليهم ما عندهم وقت على طول خطبة
هزت جود راسها بإيه : خطبة بس ، الزواج مو قبل ثلاث أربع سنوات تقريباً حسب مافهمت يعني
توق : أجل ليه مستعجلين لو بس خطبة يعني مو زواج ؟
إبتسمت نادين تتوجه لسعود اللي بحضن ملاذ : نصيب
إبتسمت ديم اللي تشوف أمها ، وملاذ يلاعبون سعود بينهم وجات وسن بإتجاهها : ريّحي ظهرك ديم
هزت راسها بإيه : مرتاحة ، كيف الشيخ ؟
إبتسمت وسن تتأمل جابر اللي بحضنها : مبسوط ، جاء له صاحب ماشاءالله يكيّف الحين
ضحكت ديم تعدل جلستها ، بصالة البيت الكل يجتمع سرور هالمرّة بسعود مو مثل آخر جمعاتهم وخفق قلبها من طلعت جدّتها علياء من الغرفة ترتكي على يد عمها حاكم اللي تنحنح يطلب الدرب ولفّت ملاذ : تعال حاكم
غطّوا كلهم عنه ، ومشى يجلّس أمه على الكنبة : عندك ملاذ يمه ، وعندك ريف بعد تبين شيء توصين شيء ؟
هزت راسها بالنفي فقط ، وإبتسمت ملاذ تاخذ سعود بإتجاهها من بعّد حاكم يتوجه لمجلس الرجال فقط : يمه ، شوفي سعود ولد نهيّان
ناظرته علياء لثواني ما تستوعبه ، وإبتسمت من تركته ملاذ بحضنها : ولد نهيّان وديم ، أحفادك يمه حفيد حاكم وحفيد فزاع
'
سكتت علياء لثواني طويلة تبتسم ، تغرق عيونها بالدموع ومسحت على جبين سعود تقبّل يدها بعد مسحتها فقط وإنحنت ملاذ تاخذه ، تشوف قلب ديم اللي رقّ كله على حال جدتها تنطق لهم : لقاها نهيان أول ما جينا ، أخذ لها سعود بس ما إستوعبته قالت له وزوجتك طيبة ؟ بس
تنهّدت ملاذ تبتسم لسعود : تروح عند ماما خلاص ؟
-
عدلت عبايتها تشوف نظراته وطويل الجدال اللي حصل بينهم بالبيت ومشى قدامها ينطق : درب يا ولـد
نزل نظره للأرض فقط يفتح لها الباب لكن باقي بصدره لهايب يبيها تمرّ قدامه ونطق بهدوء : تحصني
هزت راسها بإيه تتوجه للمغاسل ، تشوف إنه باقي عند باب البيت ما تحرّك ، وما دخل المجلس لكنه يبي يشوفها إلى دخُولها عندهم وتلمح إن صدره يشب ، وأكثر من عدلت نفسها تترك شعرها على أكتافها وما نزّلت عبايتها تضمّ أطرافها فقط : أكرهك
هز راسه بإيه فقط لأنه يعرف ، وبقيت خطوتها ما تحرّكت تسأل : ما بتدخل عند الرجال ؟
هز راسه بالنفي يعضّ شفايفه فقط : روّحي قصيد روّحي
كشرت له مباشرة تتوجه للداخل ، تسمع بُكاء سعود وتخالط أصواتهم وإبتسمت تعدّل الورد بيدها من صار كل النظر لدخُولها لأنها نطقت بالسلام يُرد من الكل ، ووقفت ملاذ ترحّب مباشرة : يا أهلاً بنتي ! يا هلا !
إبتسمت قصيد تسلم عليها : كيفك عمتي كيف صحتك؟
هزت ملاذ راسها بإيه : بخير الحمدلله كيف حالكم أمي عساكم طيبين ؟ كيف الوالد والوالدة مبروك لعذبي مقدماً
إبتسمت قصيد بحب : الحمدلله كلنا بخير ، الله يبارك فيك ويحفظك يارب ، يتربى بعزكم الله يحفظه ويحميه
إبتسمت ملاذ وهي ودها تقول شيء لكنها إستحت بهاللحظة ، وتوجهت قصيد تسلم عليهم تباعاً وإنحنت تاخذ راس علياء اللي ساكنة تماماً لأول مرة ، ما ترحّب فيها حتى ردت السلام فقط وتوجهت لديم تبتسم ، تنحني لها بالمثل تسلّم عليها : وش هذا الجمال يعني ماشاءالله ! الحمدلله على سلامتك ديم قرّت عينك الله يحفظه ويحميه لكم ويبلّغكم فيه يارب
إبتسمت ديم بحب للورد المُنعش اللي بيد قصيد ، لأن بيدها كيس آخر يبيّن إنه هدية لسعود : الله يسلمك ! آمين وعقبال عندك يارب لا تخلّون سعود لحاله يبي صاحب أو يبي صاحبة ما يفرق معاه بس يبي أحد !
ضحكت قصيد لسعود اللي بحضنها تمد يدّها له : حبيبي ماشاءالله بس وين راح جابر يعني يا ديم ؟
ضحكت ديم ، وكمّلت قصيد تسلم عليهم كلهم ، وتوجهت تجلس بجنب وسن وريف اللي تبتسم لها لأنها مدّت يدها تلاعب جابر ، تردّ على أسئلة الحال منهم كلهم ، مباركاتهم لعذبي وخطبته وتقدّمت ملاذ بإتجاهها : نزلي العباية أمي قصيد !