اخذه وهو يضيف الجيران وعلى جية تركي وقام يساعده ويصب معه
جته رساله من ردينا ناقصها فلوس ولا يقدر يحول لها لان تخطى الحد الادنى للتحويل
شاور تركي:معك فلوس بالبطاقه؟
تركي :ايه كم تبي؟
نواف:قصر صوتك يرحم ابوك ترا اني جنبك
اشر له تركي انه بيطلع ويلحقه
طلع نواف له :ماقدر احول انه لان عديت الحد الادنى ابي احول لردينا
تركي :تبشر هات حسابها
نواف تذكر معه ثلاث ميه بجيبه طلعها وعطها تركي
جا بيحلف تركي
خزه نواف:خذها عشان ما اسدح وجهك بالارض اقولك معي بس ما اقدر احول خذ ولا ماعاد اطلبك
خذها تركي
نواف ارسل حساب ردينا لتركي ودخل يصب لان الجد ناد
تركي حول لها خمس ميه
وحول لاخته وكتب لاخته "خذي اللي تبين واذا نقصك شي علميني"
قفل جواله والابتسامه شاقه وجهه
....
ردينا جالسه تنتظر نواف يحول لها قال لها دقايق
تفأجات مبلغ 500 من تركي بن عزام
طلعت بالاسم بذهول ليه يحول لها
ارسلت لنواف "شسالفه"
زمت شفايفها وهي تدور اسم تركي دخلت وكتبت لها
"؟"
تركي مبتسم شاف نواف عدل نفسه "من اخوك "
ردينا تفكيرها راح بعيد تحسب ان هو نفس اخوها تضايقت انها طلبت نواف عبالها نواف ما معه فلوس
رتيل:شفيك حبوبي
ردينا:مافيني شي بس احس صدعت
رتيل مبتسمه :تبشرين با احلا قهوه على حساب تركي
لفت على بنات بضحكه:بنات وش تبون بطلب لكم احلا قهوه
غيم :من وين جا الكرم؟
رتيل:تركي محول لي طبعا
وهج:ابي قهوه اثنين والحلا بشوف من وين على حسب يعني
غيم:لو تطلبين لنا برقر اوفر
ليال تهفهه بشعرها:انا ابي قهوه
وهج تكح :وش ذا
رتيل:هذي مو مالتنا
لدُن :احيييه يابنت العم طالعه صاروخ ارض جو
غيم:ياحسرتي على قلب اخوي ياحسرتي نجهز اسعاف لازم
ليال:ابي اخذ صوره الحين وارسل له لو سمحتو يعني وحده منكم تتكرم وتصورني
رتيلل :شيينه شييينه واهه صدق حلوه
وهج:الحين ورا ماتصيرين زوجة اخوي ! والله ادلعك بس تعالي غيري شوي من نسلنا العبي بإعداداتنا
ليال ضحكت بخجل:يابنت اهجدي ترا استحي
ردينا:انا بصورك تعالي
صورتها صورة ولعل خلت ردينا تندم من كثر ماتعبت ولا شي عجبها واخيرا اقتنعت ارسلت له
غيم وهي تسوي اظافرها:بشري رد!
ليال:لا شكله مطول انا بروح اسوي لي مساج
ورتيل طلبت للكل قهوه وحلا شعليها من فلوس تركي
ردينا مارضت تسوي شي لين نواف اتصل وقالها انه عطى تركي فلوس لان مايقدر يحول وتطمنت ماتدري ان المتين الزايده منه سوت بس اظافرها
خلصوا وراحو يكملون سهرتهم عند الجد وهج عيت تقعد حاولوا فيها رفضت
الجده:يالله انك تحيي بناتي
سلموا عليها وجلسوا يسولفون ويضحكون ام ديم فاكانت بعالم الموازي
الجده :يابنات بتجي جارتي تسلم علي ابيكم تدخلون وتساعدوني مافيني اتحرك
ديم:بنات ترا كمين لكم
الجده تغمز لديم تسكت:نسيت اقولك نواف يقول غيري صورتك من الجوال لايشوفونها العرب
غيمم :اوه اوه في تطورات
ليال:ماشاءالله نواف وش عرفها بديم
لدُن:الا وانتي صادقه وش جاب جوال ديم لنواف
ردينا:يمكن يحسبها انا
الجده بضحكه:لا مايحسبها انتي الا شالها من المجلس
رتيل شهقت:الله في قصة حب هنديه قاعده تصير
ديم :ترا دموعي على طريف ياجده
الجده:اقول اجهزي انتي وهي الحرمه جايه
رتيل بصوت خافت للدُن:بتدخلين
لدُن تاشر بـ لا
اشرت رتيل👍🏻
غيم:تم تفعيل لغةٍ الإشارة انا عني بدخل
ليال:وانا بعد طز بالرهاب انا قدها
ردينا:عادي بدخل انا بس شوي وبطلع يعني رتيل ولدُن امورك في سليم
......
جت الجاره وغيم اللي استقبلتها
دخلت ليال وهي شايله الحلا :سلام عليكم
الجاره وهي تتامل باعجاب :وعليكم السلام ماشاءالله يانوره والجمال اللي في حفيداتك
سلمت ليال وهي تبتسم بحياء
الجده وهي توها تنتبه للقصه توعدت ليال بيدها
تجاهلتها ليال وهي تصب للجاره
الجاره:عسى ماراحت يانوره نفس اختها
الجده:اي والله
ليال هي تقدم الحلا وغيم تضحك مصوره فيديو وارسلت لفهد ولوليد "جالسين ننخطب رغم احنا متزوجات شكل الخواتم ماتتشاف😂"
فهد حفظ الفيديو بدون مايعلق
وليد"اقول جهزي نفسك بمر اخذك بشتري اكبر خاتم في السوق ودخليه في عينها"
ارسلت"😭😭😭😭"
اما ليال مو فاهمه شي
الجاره وهي تناظر عيون ليال:اجل حامل !
ليال :لا وين
الجاره:الا والله ان في بطنك طفل انا اعرف
ليال ردت بعدوانيه:لا ان شاءالله ماني بحامل ما انتي ادرى مني
الجاره:ريحتك ريحة حمل انا اعرف
دخلت ردينا عاقد حواجبها من الطاري وسلمت بهدوء
ليال ماتدري تصفق الحرمه ذي بنعال قهرتها
غيم ميته ضحك والجده انبسطت :ذي بنت بنتي ماهي متزوجه لاتخافين
الجاره انبسطت تتلفت :الله يبشرك زين لقينا وحده نمسكها باقي بنت عبدالعزيز الكبيره اعرفها الحلوه وينها وصديقتها ذيك هتون مدري شسمها
الجده:بيجون بيجون ماعليك
الجاره:تعرفين عندي ثلاثه ابي افرح فيهم كلهم
لفت على ردينا:شخبارك يالمزيونه وش تدرسين
ردينا وهي تسمع ردّت بنرفزه:انا منفصله
ضحكت ليال على ملامح الجاره غيم عضت شفتها وهي تكتم ضحكتها
الجاره بحده:وش يعني منفصله ! من الشغل من وش
ردينا :مطلقه يعني تطلقت
الجاره:عادي يابنتي نصيب والله يرزقك بنصيب الزين
ردينا :ايه الحمدلله نصيب امين
الجاره:حلو اجل باخذك لولدي الكبير منفصل على قولتك
ردينا ردت بتسرع:باقي بالعده انا ماطلعت ولا افكر بزواج حالياً
غيم طلعت ماقدرت تمسك نفسها من الضحك
والجده بضحكه ترقع:النصيب الله يرزق الكل والجميع
الجاره:امين
جلسوا يسولفون ردينا استاذنتهم وطلعت
غيم تسولف مع ليال :وش قال عن شعرك؟
ليال مافتحت جوالها توها تتذكر فتحت وهي تبتسم بخفه
حفظ الصوره بالمحادثه وحفظها بالبوم الكاميره
"كذا تلعبين فيني وتزيدني شوق لكن مو من صالحك لان لو شفتك بتصير علوم يحبها قلبي😉"
غيم :ياخفيفه وريني
ورتها غيم استحت:مو هين والله فهيد اقول شكلها سهره صباحي
ليال:مع نفسها بنام
غيم بطقطقه:معليه نامي لا طفى شوقها
قرصتها ليال
غيم بالم :ماودي ادعي عليك والله
استاذنت الجاره واضح زعلت بس مابيدهم شي وكان الشباب جالسين بالحوش مع الجد كلهم ماعدا ليث
نادهم الجد لما عرف انهم مجتمعين دخلوا يسلمون حتى ديم انسحبت معهم بس ماسلمت لان قالت انها تعبانه ماتبي تعديه
الجد:الله واكبر محد فكر فيني وجا يسلم علي !
غيم:عفوا ياجد انت الا طالع
الجد:ديم من متى وانتي هنا؟
ديم بصوت خافت وهي مستحيه من نواف :مدري
ليال وهي تتجاهل نظرات فهد لها اللي مبتسم ويناظر تحركاتها وترها بشكل
الجد:ايوه علومكم نبدا من الكبير
لدُن:الحمدلله اني اصغر وحده فيكم يمديه ينسى سوالها قبل مايجي دوري
ليال ضحكت بخفوت وهي تسب لدُن
غيم تشاورهم :احس اني داخله اختبار
رتيل وهي تصور اظافرها مع القهوه
وعم الهدوء استغربت من هدوئهم رفعت عينها شافتهم يناظرونها :بسم الله وش فيكم!
الجد:اتركي البليه اللي معك وتعرفين وش فيني
رتيل:لبيه وش بغيت
الجد :عطيني علمك
رتيل تناظر البنات:انا اكبر وحده فيكم؟
لدُن:سلو موشن وربي
غيم:تتكلم ببرود ماتدري ان بيجيها فنجال قهوه من جدي يسرعها
الجد:نعفي ديم لانها تعبانه ولا راحت بنعفيك لان واضح بالك مو معنا
رتيل تحنحنت
ليال:امسكوها لاتجيب العيد
رتيل:وش تبي اقول ياجدي
الكل ضحك على فهاوتها توقعوا بتتكلم
الجد يضحك باسف وهز راسه بخيبه:ماابي ازعلك قدامهم بس لو ماتصيرين حرمه مع الحريم ان تصير علوم
تركي:ترا رتيل سنعه بس تستحي
سعود:لا ترقع لاختك
عبدالله:سعيدان ياحبيبي مالك دخل
سعود:ابشر
الجد غير الموضوع مايحب يكسر البنات ولا بعد قدام العيال ماهن عليه :وش تبغى ام ماجد!
غيم ضحكت وهي تتذكر:اه ياجد لو تشوف بس وش صار بالمجلس ان تضحك سنه قدام
وليد باستهزاء:ايه وش اللي ضحكك ياقلبي ؟ قولي لهم
غيم:والله ان الجاره توسع الصدر
ردينا:تجيب التكاك وانتي صادقه
ديم :اتفق معك
الجد:وش سوت الجاره يوم خلت ردينا تنطق
ليال تضحك بس على الصامت
وغيم ميته ضحك :شوف ياجد اول شي خطبتني انتهت مني حولت على ليال خلصت من ليال حولي على ردينا خلصت من ردينا حولت على ديم ورتيل
ليال بضحكه:هتون هتون
صفقت كف ليال وهي تضحك
الجده:والله إنهم فشلوني تقول اول مره يدخلون ليال لو يجي لها تضربها وردينا ماهي اقل منها
فهد بتسرع:تستاهل اجل تخطب وحده متزوجه
الجد بحده:اسكت يابابا ترا باقي في حسابات ماصفيتها معك
كمل الجد ويكلم ليال:وش سوت لك
الجده: ام ماجد الله يصلحها عيت الا ليال حامل ومصره لا نشبت بشيء تنشبه فيه لين تطلع عيونك
وليد:ماشاءالله وش عرفها ذي؟
نواف:ليكون دجاله اللي جتكم
الجد خزه
نواف بقمطه:دعابه والله تبي اسكت من عيوني
ليال ببراءه:تقول ريحتي ريحة حمل
غيم وهي تشم ليال:تخيلي انه من يوم قالت ريحة حمل انا اشمك بشوف وش ريحته
ليال:انقلعي
الجد ماجاز له كلامهم:ايوه من تبغى ؟
الجده:ديم مادخلت بس جيتها عشان تشوف ديم فاجاتني تبي تزوج عيالها الثلاثه وقالت تبي رتيل بس مادخلت اما ردينا الله يسعدها قالت انها باقي في العده
الجد:كان قلتي ماعندنا بنات للزواج وانتهى
الجده:لا والله كيف اقولها
تركي:اصلا دخلوا ولا مادخلوا ولا وحده فيهم راح تتزوج منهم مامنهم رجال صاحي عشان نوافق
الجد:لا ياتركي ماتقول كذا
عبدالله:الا والله صادق احنا نعرفهم
سعود:ا اذا تقصدون عيال بن سليمان اي بالله مامنهم رجال صاحي
الجد بصدمه :في ذمتكم!
تركي:اي والله خلني ساكت الله يستر عليهم
الجد:الله يستر عليهم
شاف ساعته وتاخر الوقت بنسبه له:انا استاذنكم بنام وانتم اقعدوا متى ماودكم معليه اسهروا تعرفوا على بعض
تعذر منهم هو والجده وطلعوا ينامون
البنات والشباب بس جالسين وكانوا على شكل دائره والاي يفصل بينهم الجد والجده
سعود:شرايكم اشب لنا نار وشاهي
عبدالله:ترا في حطب بالونيت
قام سعود يشغل لهم ونواف يجهز الاغراض له
رتيل تشاورهم:تبون نقوم؟
لدُن:لا تكفون بيشغل حطب وحركات نجلس شوي بعدها اصلا بنروح
ليال تسولف مع غيم كل وحده لها مود
غيم بصوت خافت :ليال بطلب طلب ولا ترديني
ليال خطفت انظارها سريع لفهد وناظرتها:وش فيك؟
غيم برجاء وماسكه جوالها:قولي تم اول
ليال :تم بدون نفس
غيم قربت لها عشان محد يسمع :بحجز لك عند دكتوره نساء ولاده بكره
كملت بسرعه بقمطه من عيونها المبققه:اسمعيني اول نروح نشيك ونتطمن مااحنا خسرانين شي ولا نعلم احد
ليال:من الاساس ليه اروح؟
غيم:شوفي انا اخذ حبوب منع بس ابي اتاكد تناسبني او لا وانتي تروحين تشوفين لان صدق احس انك حامل
شردت بتفكيرها متخوفه من الحمل حطت يدها على بطنها تتحسسه بروعه
سعود مكفف اكمام ثوبه ويعدل بالحطب :ابي ولاعه
تحسس ثوبه فهد وطلعها من جيبه رمها على سعود :ياويلك تضيع
تركي:لا ضاعت جبت لك اللي اطلق منها
نواف اخذ نفس :يازين ريحة الحطب تطربني الريحه
تحمس فهد من منظر سعود رفع جزء من اسفل ثوبه صفق كتف سعود:الشاهي انا اللي بسويه
عبدالله:محد يضبطه غير سعود اركد
سعود:انا اللي ولاعته وتعنيت وبنهايه تاخذ اسهل شي
وليد متكي على فخذ تركي رفس سعود وفهد برجله :رؤيه غير مستقر ابي اهوجس
لدُن :فهد تلثم وسو نفسك تعدل الحطب وخل سعود يسوي الشاهي ابي اصور
سعود:السالفه فيها تصوير اصبري اتعدل اجل
فهد عصب راسه وثابت بمكانه
سعود:كلكم شاهي؟ اسوي براد الكبير!
الشباب :اييه
سعود التفت على البنات كل ثنتين مع بعض يسولفون :عالم الموازي تبون؟ ولا لا
لدُن ضحكت:ذباتك متطوره والله
غيم:سو انت واحنا بنشرب ماعليك
لدُن وقفت وقربت منهم عشان تصور
نواف :جيب بلوت ياولد طفشت اتاملكم
تركي وتر ردينا يناظرها لين تحط عينها بعينه وهي توخر عيونها بصدمه من نظراته الجريئه بداخله ميت ضحك على توترها ماعرفت تجلس ولا سولفت مع البنات
ليال أشرت لردينا تقرب منهم هزت براسها لا والسبب تركي وعيونه
وليد :تركي
تركي :لبيه
وليد عقد حاجبه :لبيه!
عبدالله قافط تركي ومتنرفز لان ماخلا البنت ترتاح:مو لك ياوليد لاتفرح لوحده خذت باله
سعود من صدمه كب على نفسها المويه الحاره بلغلط :يلعن امك استغفرالله اح
وليد تعدل بجلسته :يالخبيث ليكون تطبق أفكارك علي؟
تركي تحنحن بإحراج لان صار قدام البنات:استريح وانسدح لبيه لك مو لحد ثاني
عبدالله بلعانه:احلف انه له؟
تركي ضحك :في احد نادني غيره؟ عشان اقول لبيه
وليد:يع ما ارتحت لكم
تركي:والله لك ارجع انسدح
وليد:لا الله ياخذك والله ما انسدح
ردينا واضح الكلام مقصود وانحرجت اكثر من نظراته
رغم الأجواء بارده الا انها بتموت من الحر تحسها مفضوحه
غيم جلست بالوسط بين ليال وردينا :شكل الاخ وقع بالغرام
ليال :واضح دام عبدالله تكلم
انمغصت من كلامهم :نقوم؟احس حر
ليال بردانه:قصدك برد
ردينا هزت راسها اي شي تسلك لهم تبي تقوم بس
غيم :ابي اصور شاهي وبعدين بقوم
ليال:اجل بندخل وانتم لاخلصتو الحقونا
وقفت ليال مجرد ماوقفت اسفل ظهرها الم وبطنها تمسكت بردينا بقوه وغمضت عيونها
ردينا :شفيك؟
تنهدت بالم: دخلني برد شكلي
مشت بهدوء اما ردينا اخذت جوالها وقفت تلبس سلبر حقها
نواف التفت عليهم :على وين ياحلو؟
ردينا مجرد من الانظار جت عليهم دعت عليه بداخلها صوتها يالله يطلع من الاحراج وخاصه عبدالله وتركي جنب بعض ويناظرون وتركي مبتسم :برد بدخل
نواف ياشر على فروته:خذي فروتي واجلسي
رتيل لا إرادياً ضحكت
نواف لف عليهم لان ضحكت رتيل عاليه
تكلمت بخفوت لديم:فروته اللي كنتي لابستها
ديم :ايه اسكتي فهد يناظر
ردينا تجاهلته ودخلت
