الجده هي تشوف نواف كيف متوتر :يمه عبدالعزيز لاتستعجل خل البنت تستخير
الجد ينتظر بس اشارة من نواف ويتكلم لكن نواف كانت عينه بالارض
عبدالعزيز:ماني مستعجل لكن رايكم يهمني
نواف تشجع خاف البنت تروح منه :صلوا على النبي
كمل بطلاقه وعينه على خاله عبدالعزيز:ماكان ودي اقدم هنا ودي اني في بيتك ياخال واقدرك واتعنى لك وتستاهل من يتعنى لك انا رجال ابي اكمل نص ديني وابي ديم على سنه الله ورسوله
الجد ابتسم لين بانت ضروسه ونوره تتطبب على يد مهدي بفرحه
عبدالعزيز انشرح صدره من الوناسه ولد اخته ياخذ بنته:وديم جتك وانا ولد ابوي
ابو تركي: مافي قصور نواف لكن راي ديم اهم منكم كلكم
الجد:ماضني ديم بترفض ونواف العين يطلب ويتنفذ
عبدالعزيز:اي بالله ماينرفض
الجده تتحلف بنواف بس بضحك وهو يضحك
ويرد على التباريك ويسلم على خاله والعيال ولابد من جده وجدته
.......
في نفس الوقت الحريم مجتمعين
ام ليث: عبدالعزيز راح يعلم عمي
ام تركي:والله بدريه عسل تطمني وعيالها ذهب ودك تاكلينهم من ادبهم
ام ليال:انتي متاكده انه يبي ديم؟
ام ليث:شفيك اميره شككتيني
ام ليال ترددت ونطقت:بدريه كلمتني وسالتني عن رتيل مو عن ديم
ام تركي: مافهمت وش دخل رتيل؟
ام ليال:تبي تخطبها بس ماقالت لمنصور يمكن اخوه وانا تسرعت!
ام ليث:بيني وبينكم عبدالعزيز متردد
ام تركي:يتردد في وش والله الولد امير ومحبوب
ام ليث:والله حسيت من كلامه واقنعته يعلم عمي وعمتي يمكن يغيرون رايه
ليال :سلام
ام ليال:هلا بالزين كله مابغيتي تقومين
ام ليث: عاد الاخت غيم نايمه
ليال هزت كتوفها بانها ماتدري انسدحت عندهم بالكنبه
ام ليال:استحي على وجهك
ليال وهي تتثاوب:جالسه اخذ راحه من النوم
ام تركي:ليول قومي البنات ماصارت
ليال: والله ودي بس مالي حيل اطلع لهم
ام ليث:فهد قام؟
ليال:اييه من زمان
ديم :صباح الخير
ام ليث:اي صباح واحنا ظهر
ليال:الحمدلله خلصوا مني وبيبدون فيك
ام ليال:اقول عدلي نومك تراك متزوجه يعني تقومين بدري
ليال تربعت :لا ياروحي مين قال ان لازم اقوم بدري اقوم متى ماشبعت نوم والله
غيم وهي تدخل على كلامهم:لا والله ياخاله كلامك لا يرضيني
ام ليال: وجعله مايرضيك انتي وهي قومو بدري وش يبي الرجال في وحده تقوم بعده
ام تركي:شوفي اذا الرجال يستاهل اني اقوم قبله ذيك الساعه اوكيه ام رجال وجهه يجيب المرض يقعد على استه
ليال بضحكه:جوي ياشروف بس شوفي وجهه حلو او سيء النوم سلطان يعني جماله يوفره لنفسه
غيم :انا ايد كلامك
ام ليال: ويل قلبي على ولد اختي
ليال تتغنج :والله يتحملني عاد يحق لي اتدلع
ام ليث:اي والله يحق لك تدلعي وانبسطي
غيم:اي ليال تتدلع اما بنتك لا
ام ليث:مسكين وليد يكرف ليل ونهار واخر شي ماتقومين عشانه
ديم:حرام يمه وفهد والله يكرف
ليال تاشر له تسكت وهي تضحك
ام ليال:حرام لوليد وفهد المسكين يكد اقول فهد المسكين وليد ماغير متسدح
ليال:احب لما تقبع
جلسوا يتناقشون وزانت الجلسه بغيم كالعاده
................
مرات الأسابيع والايام وافقت ديم على نواف وردينا على تركي
وجاء يوم المنتظر كانت ملكتهم مع بعض
ليال كانت تحط لمساتها الاخيره وبتلبس بالقاعه :تدري وش احلا شي
فهد وهو يبخر ثوبه قبل مايلبسه: وش ياعيني
ليال:ان ملكتهم مع بعض
لفت وهي تتوجهه له:يعني راحه وفكه بنفس الوقت
فهد:ماتلاحظين ان مناسباتنا كلها ورا بعض حتى ما مرت سنه وجدي يطلبهم وهم صاكين الثلاثين ولا احد فكر
ضحكت ليال وهي تتفق معه:احنا فاتحة خير لهم ولا مين يقول تركي يتزوج للحين مادخلت في مخي
ابتسم فهد ونطق من كله قلبه :يلا عقبال عبود وتفك عقدته
تنهدت بضيق وغيرت الموضوع سريع:شرايك بشكلي؟
دورها فهد على نفسها وحضنها له وعيونه غارقه بتفاصيلها : راي خالصين منه من يوم خذيتك على ذمتي واعلنتها للكل انك زوجتي وصرتي ليلي وسُروري
خدودها كل مالها تورد من كلامه زمت شفتها ونطقت بخجل بس لازم تكسر خجلها:فهد
نبرتها هيجت مشاعره :سمّي ياعيون فهد وعروق قلبه تدللي لعنبوه من يردك
طقت أصابعها بتوتر ونطقت :احبك
تقدمت بخطوه وهي تقبله على شفته وبادلها القبله بقبلات
نتركهم لحالهم🌚...
"بغرفة التصوير "
تركي بيدخل على ردينا يصور وبعدها نواف وديم يدخلون مكانهم
ردينا كانت تكلم المصوره:لا تكثرين الصور ولا الوضيعات ابي تكون الصور هاديه ولا اوفر
المصوره:ابشري بللي يرضيك ياعسل بس اهم شي تسحبين عن الخجل عشان تطلع الصور احلا
ردينا تكلم نفسها "على اساس ييدي ابعده"
طق الباب ردينا تحس ام الركب جتها اخذت نفس وهي تهدي نفسها وقدرت تتمالك اعصابها ام تركي مع تركي
تركي برزانه وصوته الجهوري:السلام عليكم
ردينا بصوت خافت:عليكم السلام
تركي وعيونه عليها ولا يدري امه وش تقول يحس حوله ضجيج
ماهو قادر ينكر اعجابه لجمالها وطولها الجذاب استوعب لما سمع ضحكتها عليه ناظر امه المتنرفزه تحنحن:لبيه
ام تركي بنرفزه:ولا شي
طلعت
تركي:شفيها ؟
ردينا وابتسامتها:احرجتها تكلمك ولا ترد
تركي يكلم نفسه "قد بدينا فيها ياتركي من الحين "
قصده انه اخذت عقله >>
عدل البشت وهو يقرب لردينا عشان يبدا التصوير
خلصت التصوير
تركي مسك كتف ردينا:ترا مايعتبر لقاء ان شاءالله لي قعده معك
ابتسمت له باس راسه وشاورها:قولي اذكارك
طلع تركي وهو يجمع ثقله ردينا طلعت من غرفة التصوير على الغرفة اللي جالسين يتجهزون فيها
ردينا باستغراب:وش فيك؟
ديم خانقتها البكيه:عادي ما ادخل؟ كلميه تكفين
ردينا:بكلمه بس عادي اعرف وش فيك اذا خوف بقعد معك ولا بيسوي لك شي بس بيصور ويطلع لان الرجال موجودين مايمديه يطول
ديم وهي تحس باقي مو مقتنعه فزت من سمعت صوت نواف ينادي من عند الباب ياولد
ردينا:جايتك لاتدخل اخاف البنات يدخلون
جسمها كله يرجف متوتره
راحت ردينا تقفل الباب عشان محد يدخل من البنات
وتوجهت لغرفة التصوير وهي تقصر صوتها عشان المصوره ماتسمع :عادي ماتدخل ديم؟ يعني سوا نفسك انها دخلت
نواف وتفكيره ابحر لبعيد جداً:عسى ماشر؟
ردينا:خايفه
نواف بنبره حاده:مني؟
ردينا :اجل مني انا ايه منك بعدين ليه معصب
نواف :في احد معها ولا ادخل؟
ردينا هزت راسها بـ لا
دخل نواف:ديم؟
ديم جالسه بالكنبه وزاد توترها من دخوله
نواف بتنهد:عسى ماخلاف!
ديم بصوت هي الوحيده اللي يمكن تسمعه:مافي شي
نواف يحاول يسمع :وش؟
قرب:ماسمعتك عيدي
ديم تبلع ريقها بقمطه:مافي شي بقوم الحين بس روح انت اول
نواف مد يده عشان تقوم
وقفت بدون ماتمسك يده ومشت وراه
اما ردينا طلعت وهي ماتدري وش قال لها عشان تقوم
صورت كم صوره والمصوره بس تقول ابتسمي اضحكي وهي ساكته طفش نواف :وقفي تصوير وخلينا لحالنا لو سمحتوا
فك بشته وهو يرميه على الكنبه متنرفز كانها صنام وجلس جنبها:مغصوبه؟اذا مغصوبه وقسم بالله ماتحليني بس انطقي
ديم دمعت عينها بخوف وصوته يرجف:لا
نواف:اجل! كل حركاتك تدل ان فيك شي
ديم يدها ترجف :خايفه بس
نواف :مني؟
ماردت عليه
نواف بحنيه:ناظريني ! خايفه مني؟
هزت راسها بـايه
نواف ارتاح اهون تكون خايفه ولا تكون مغصوبه:اذا قصدك شكلي ف للي اعرفه دايم مخرفن البنات اول مره بنت تقول اني اخوف جرحتي مشاعري
ديم زمت شفتها ببحه:عادي اقوم!
نواف ما احب يكثر عليها :براحتك
وقفت وهي تستعجل بخطواتها بدون ماتلتفت له
ماتطمن نواف أبدا لحركاتها
......
كانت الملكه عبارة عن فخاامه في كل جهة من القاعه تبهر من الجمال وتفاصيل متعنين فيها
ام سياف: ماشاءالله ولا قوة الا بالله ،ماهي غريبه عليكم يال مهدي الله يجعل افراحكم دايمه يارب
الجده:الله يسعد قلبك امين وعقبال مانفرح في احفادك
ام سياف:امين يارب الا كيف عبدالله ماهو ناوي يتزوج؟
الجده :متى مانوى بتدرين ان شاءالله وترقصين في عرسه
ام سياف:وش فيك قلبتي علي
الجده:وش قلبت عليك فيه بتقوليني كلام ماقلته؟ ان كان وراك تنكيد
واشرت للباب:الباب يوسع جمل الله يستر عليك وعلى اللي يرسلونك تعرفين اخبارنا
وهي قاصده كلمة "اللي يرسلونك تعرفين اخبارنا"
وقفت بزعل وهي تطلع
"ام سياف تصير خالة طليقة عبدالله"
ردينا بتافف:مرت عمي جت
ليال تصغر عيونها تبي تلقطها:وينها؟
اشرت ردينا على جهت مرت عمها
ديم ناظرت بطرف عينها :اللي لابسه اسود؟
ردينا:ايه نفس لون قلبها سبحان الله
ليال :جت جت
ام عوض بغرور:مبروك ياردينا اشوف على طول تزوجتي مامرت سنه على طلاقك استحي على وجهك
ردينا بقهر :مين يتكلم عن السحى؟ انتي اللي استحي على وجهك محد عزمك
استحقرتها وجهت كلامها لديم بحقد :ذي مرت ولدنا الجديده مسكين نواف يفتك من وجه اخته يلقى زوجته
رتيل: مين عزم الهمجيه؟
ردينا:محد هي كذا تقط نفسها كنها بعض الناس
ام عوض:بطلع من زين عزيمتكم ولا من زينكم جيت اشوف قليلين الاصل اللي نسوا وش سوا لولدي
لفت على ديم:وش الكذبه اللي قالها زوجك المصون ولعب عليك وخلاك تكملين الملكه؟
ديم بعدت عنهم ودموعها في عينها توجهت لدورة المياه وهي تهدي من نفسها والخوف اللي رجع عليها وكانها اول مره تتلقى الرساله اللي قلبت نفسيتها رفعت راسها وهي تهف على نفسها ماتبي تبكي وتخرب الميكب
اما ردينا تنرفزت منها دفت ام عوض وهي ترفع إصبعها السبابة وتهددها:قسم بالله لو ماتذلفين الان اني لا ارتكب فيك جريمه ابعدي عني وعن اخوي ولا والله لا اخلي القانون بينا
ام عوض:خفي علينا يازوجة المحامي
دفتها بكتفها وهي تطلع بانتصار بعد مازعزعة ديم وردينا
غيم :شفيكم واقفين كذا
ليال:ابد كلبة الشرعان واحنا تمر مناسبه بدون الكلبات يتنوع لك بعد كبار وصغار
رتيل:بس حلوه زوجة المحامي تعجبني بردت خاطري
ردينا:وين بردت خاطرك اف تقهر بروح اشوف ديم
غيم:طيب نترك الموضوع السلبي ونبتسم اذا أنتم ناسين وجهيكم انها تروع وهي معصبه
جلسوا وهم يحاولون يدركون الوضع ويبتسمون عشان محد يلاحظ
مرت دقايق كفيله انها تهدي من خوف ديم
لدُن تدور بعيونها على اختها :وين ديم ابيها ترقص تكفون
رتيل:شوفيها يعنني مع اخت زوجي
ليال:اشم ريحة غيره هنا
رتيل:مو غيره بس يعني مو من الحين تسحب
غيم:شوفي انا نفسك كنت اغار بس الحين I don't care
قرصتها ليال بفخذها: تعرفين وين تحطين معلومتك؟
غيم:اه يابجيحه وبعدين هذا الصدق صرتي تحبين فهد اكثر وتهتمين فيه وسحبتي علي
ليال:اكيد احبه واهتم له زوجي ذا بعدين ياكذابه ماسحبت
رتيل:خلاص اسكتوا يالمراهقين صدق وش ذي السوالف
لدُن بانتصار:حرفياً مراهقات
غيم:اقول لا تخلوني اقلب عليك وعليها
ديم جلست جنب رتيل
رتيل بغيره:ماودي اعلق لكن بديتي تتغيرين حاولي تعدلين بيني وبينهم ولا بقطع علاقتي فيك
ديم ضحكت بخفوت:ابشري بيبي
غيم:وع وعوه صدق
ليال تذكر كلام فهد:غيم بتنقلين خلاص ببيتك؟
غيم بضيقه:ايه والله مالي خلق ماعرف ننقل الا وقت الاختبارات
ليال:عادي انا بجيك واساعدك وناخذ عاملات يساعدونك
غيم:هو اكيد بجيب عاملات بس ياخي مااحب القروشه
رتيل:متى ماتبين مساعده دقي
هزت راسها غيم بتمام
...........
انتهى اليوم بسلام لكن نواف ذبحه التفكير وكلام ردينا عن مرت عمه خله يتأكد انه في شي استغفر ربه وهو يصلي الوتر
خلص صلاته وهو يرسل ليث"سلام عليكم اليوم العصر اذا فيه مجال بمر ابي اشوف ديم"
رمى نفسه على السرير وبعد ما ابحر بتفكيره فيها وفي حياته الجديده غفى
......
وليد :ترا بكره بننقل
غيم شهقت:لا لا وليد مايمديني بكره والله لو ايش
وليد:وش عندك ! العاملات حجزتهم بس تورينهم وين بحطون فقط والبيت جاهز وبعدين بينك وبين خويتك باب فقط تروحين لها متى ماودك
غيم:ماقصد شي بس الوقت جداً غلط
وليد:تحسبيني مرتاح واحنا هنا؟ على الاقل هناك اقرب لاهلي واهلك لو ابي اسهر اتطمن هنا بقلعه وادرين محد بحولك
غيم حست بتأنيب الضمير:ادري فاهمه والله خلاص اللي ودك
وليد ابتسم واشر لها تجي له:تعالي وسولفي لي وش من مصيبه صارت اليوم
تربعت بحماس وهي تحكي له كل شي صار ومين عجبها ومين ماعجبها وليد كان يقاوم النوم ولانه الفتره الاخيره اهملها ولا وده تزعل منه بسبب اهماله
..................
"العصر اليوم الثاني"
نواف بالمجلس ينتظر ديم تجيه وجايب معه باقة ورد وقهوة وحلا وعطر هديه لها لان اول مره يدخل عليها ويشوفها غير الشوفة وامس ماتعتبر له جلسه لان ماطول
ديم بعد صراعات داخليه قررت تدخل وتطمنت لانها في بيتها لو بياذيها
ديم:السلام عليكم
رد السلام نواف وهو يوقف والابتسامه على وجهها من شوفته لها
مدت يدها تسلم سحب يدها له بحيث يضمها له
انحرجت بعد بتوتر وهي تجلس بمسافة عنه
بعد ما سالوا عن اخبار بعض
نواف بنبره هاديه :اسمعي مني ولا تسمعين من غيري وش تعني الجمله ذي ؟
ديم تحنحنت وهي تلتفت جهتها عليه: يعني اسمع منك ولا اسمع من غيرك!
نواف :حلو انتي من امس تعتبرين زوجتي رسمي وعشان تنجح حياتنا الزوجيه مهماً انقال عني لا تصدقين لين اجيك انا يانواف وانطق بكل شيء انا ما ادري وش قايله مرت عمي لك ولا ادري وش هم مسوين لكن كحياتي الخاصه ما احب احد يتدخل فيها ان شفتي شي مني تعالي واجهيني لو تسفلين فيني ولا يقعد بخاطرك ويتراكم لان لو تراكم النتيجه مابترضي احد فينا
ديم :وش عرفك بمرت عمك ؟
نواف زفر :ردينا قالت لي انها مرسله لك شي بس ماتدري وش
ديم اعجبت بطريقة فكره بس اللي شافته ماكانه هو اللي يتكلم
نواف انزعج من سكوتها بعد ماتعب وتكلم ماقالت له شي: أنتي تدرين علاقتي فيهم كيف هي خرا
ديم :احلف بالله انك بتقول الصدق؟
نواف:قسم بالله يابنت عبدالعزيز اني ماراح اقول الا صدق بس انطقي وش هي مسويه
فتحت جوالها وهي تدخل محادثات مرت عمه وهي توريه الرسايل
"السلام عليكم
مبروك مقدما لزواجك من المجرم 😂"
وبعدها فيديو لنواف مصور من كاميرات لدخوله والخروجه وكيف تركي يمسكه
"هذي فيديوهات توضح لك كيف هو مجرم "
ومرسله تقرير لعوض وصوره له
"وهذا ولد عمه اللي انغدر فيه منه "
"مدري كيف بتضمنينه وهو سوا كذا لأقرب الناس له انتبهي لنفسك😉"
نواف ضحك من القهر كلامها استفز كل خليه في دماغه تمنى انها رجال ويدقها ويبرد خاطره:صح انا رميت ولد عمي بثلاث رصاصات لانه ابن كلب ولانه غدر وخان في اختي ولانه هان اختي ولانه مد يده على اختي ولانه قهر اختي وغبنها وهو يدري انها يتيمه وتبين الصدق يابنت عبدالعزيز لو ينعاد الزمن اني لا ارجع وارميه ولا همني شي ولا هز فيني الموضوع كمثقال ذره
ديم وهي تلاحظ ملامحه الغضبانه وكيف يتكلم مغبون ولا تنكر ان الخوف استوطنها
نواف بنرفزه:الحين تاكدتي من محتوى الرساله صدق وش بتسوين؟ تبين نتطلق!
ديم ماردت وهي بتموت من الخوف
نواف وقف:متى جاء في بالك تردين ارسلي رقمي عندك اتوقع بس ياليت تستعجلين بردك لا اخسر
طلع وهو معصب مفروض انه تكون اسعد ايامه الا ان بلا مرت عمه مايروح منه تفل وهو يسب ويلعن ويدعي عليها
دخلت ديم وهي ماسكه دموعها ومتجاهله نداء امها لها
انهارت بكى وهي بين حيره انها تكمل معه ولا تتركه رغم انه كان دفاع عن اخته
ليث انخرش لما راح المجلس ولا لقى نواف واخته طلعت من قدامه تبكي يدق الباب بخوف:ديمممم افتحي الباب
:ياديم افتحيه قبل ما اكسره عليك وعليه
فتحت الباب وعيونها بالارض ماتبي تشوفهم
ليث:وش صار؟ ضربك ! سوا لك شي
ديم تهز راسها بنفي
ام ليث:اجل وشفيك طلعتي زي المجنونه
ديم تبلع غصتها :كنت تدري انه رمى ولد عمه ؟
ليث بوهقه :ايه بس مو يعني انه شرير ومو كويس
ديم ببكاء: اجل رجال كفو ! مسدس مسدس مو ضربه بوكس نتكلم عن سلاح!!!
ام ليث:يايمه لو ادري انه خطير في حياتك كان قومت الدنيا عشانك بس والله انه رجال وكفو والكل يشهد على ذلك
ديم انهارت :ما ابييه مااابييه كيف اضمن حياتي معه وش ابي برجولته وهي بيذبح خلق ربي
ليث:وش ماتبين ماهو طلبيه تكنسلين بعد ما تملكتي
ديم:ليث لا تستفزني
ام ليث: بنادي ابوك يتفاهم معك
طلعت وليث يقنع ديم ان نواف مافي خطر على حياتها
ابو ليث جاء وهو منفجع من الخبر :ديم
ديم وهي ضامه مخدتها ومنهار بكي
ابو ليث:اوله ودموع
ديم بانهيار:ماابيه ماابييه
ابو ليث بحنيه :ولك مابغيتي لكن بعد ما اقول اللي في خاطري
ديم وهي تنتظر منه يكمل
ابو ليث : شوفي تصرف نواف ما اقول انه صح واعزز له بالعكس اشوف انه خطا لكن مافي اصعب ان الانسان ان ينخذل من اقرب الناس له انتي مستوعبه انك تكونين بدون ام واب وتدرين ان اختك كانت تتعنف وتنهان وتتعرض لجميع أنواع القذاره من قبل اقرب الناس لك ولها الناس اللي مفروض تكون امانك وامنك وتعزك وترزك وتكون درع الحمايه لك انتي تدرين لو مالله ثم احنا كان عوض ذابح ردينا فـ لاتلومين نواف عن شيء طلع من سيطرته والله لو نواف بيضرك بشي اني ما اوافق لكن نواف رجال وعن سبعين رجال وادري مابيسمح لدمعتك تنزل منه
ديم وهي تشهق مع كل كلمه الكل يطبطب لها وهذا اللي زاد فيها ان الكل يدري وهي اخر من يعلم:طيب لييه ماقلت من البدايه انه مرتكب ذي الجريمه وخليتني اوافق عليه
ابو ليث: وانتي وش عليك من ماضيه؟
ديم:انت تحسب ان الموضوع تاففه الا علي من ماضيه وكل شي يخصه دام حياتي بترتبط بحياته
ابو ليث:الله يصلح حالك ويدلك على الصح اللي تبينه وضحته لك ان كان لك رايي ثاني عن الموضوع ف بلغيني
طلع وهو زعلان منها صح معها حق بس خلاص وضح لها وش عاد تبي وخايف انها ماتبي نواف بعد ماتملك
ديم قفلت الباب بعد ماطلع ليث وهو يقنعها لاخر لحظه توجهت لسجده وهي تصلي وتدعي وكل ما دعت زادت دموعها الموضوع ابداً مو هين من وجهة نظرها كيف بتفتح قلبها لواحد مسك سلاح ورمى شخص ثاني عن قصد كيف بتجيب طفل ويرعى هالطفل كيف بتكون معه حياه بكت وهي تستعين بالله وتستخير
..........
كانت غيم متقروشه بالاغراض وتحس شوي وبتبكي ماهي عارفه من وين تبدا ومستحيه من وليد
ليال ترفع صوتها:كاني اشوف شخص يحتاج مساعده؟
غيم:ايه تكفيييين ادق على ماما ماترد تعالي انقذيني وش اسوي
ليال بوهقه:شوفي ترا مو مره اعرف بس خلينا ننقسم قسمين انتي الدور اللي فوق وانا الدور ذا بمسكهم واخليهم يحطون الأغراض وينظفون وانتي نفس الحكايه بس وزعي كل ثنتين في غرفه
غيم :والله؟ قولك بتضبط ماابي اتفشل قدام وليد
ليال:والله بتضبط ان شاءالله بعلمهم واطلع عندك انتي خليك اهم شي بغرفتك على الاقل تنامين في مكان نظيف
غيم تحمست وهي تطلع وتشرف عليهم وليال تساعدها تحت تعلمهم وتحاول تساعد اذا احتاج الامر
بعد مدة طويله وانجزوا تقريباً البيت كامل بس باقي غرفة الملابس
ليال وهي تبعد الملابس من حضنها :اوووف لا مقدر
غيم باستغراب:وشفيك؟ بسم الله
ليال وهي تمسك بطنها:جوعانه ترا جيتك مو ماكله شي قمت غسلت وجهي وجيتك
غيم بضحكه:وانا ماغير اعبي فمك قهوه
ليال تدق على فهد :اقيم ضيافتك صفر
رد فهد وهو يسوق:سمّي ياعيني؟
ليال بدلع:فهود حبي يمديك تمر مطعم وتجيب لنا اكل
غيم عقدت حواجبها من الصوت اللي تغير فجاءه:عفواً من وين طلع ذا الصوت لان اذكر قبل ثواني كان جعفر اللي يتكلم
فهد يضحك وهو يسمع غيم :لو تبين اجيب المطعم لك اجيبه تتدللي من وين تبين ياعيوني؟
ليال تشد شعر غيم لما سمعته ضحك عرفت انه سمع جت بتتكلم غيم كتمتها ليال بيدها :ياعمري يافهودي شوف من اي مكان قريب منك ناكل وترا في العاملات لاتنسى
فهد:ابشري شويات وانا عندك
فكتها ليال وهي تقفل من فهد: وش الحركات البايخه مفروض تعززين لي جالسه اسوي اشياء غريبه علي
غيم وهي تمسك شعرها بالم :اي والله غريبه يبي لك مستشفى شهاب ياملعونه الخير قطعتي شعري وانتي تتغزلين فيه
ليال تكتفت:تستاهلين هذا واحد اثنين ماني مشتغله زينن
غيم:وبعد لك وجه تضربين عن العمل بزيد راتبك بس ساعديني
ليال بغبنه :شمي استي ياكلبه وهذا انا تاركه بيتي وزوجي وجايه أساعدك
غيم وهي تقوم وماسكه السلبر:وش الكلام الوصخ ذا؟ مين معلمك؟
ليال:اول شي نزلي النعال يانعال لا تخليني اصرخ
وليد وهو ينادي عليهم :يابناتت وينكم
ركضت له ليال وهي تحتمي فيه:ياوليد ابعدني من زوجتك جالسه تعنفني
غيم من فوق تتكلم :اقول عن الكذب
شافت الأكياس اللي معه:جبت اكل؟
وليد:ايه ادري مافي شي ينأكل واكيد انكم جوعانين
ليال:قلت لفهد ! لأني طلبته اكل
وليد:ايه كلمته جاي
اخذت الاكياس منه وهي تحطها بطاوله الطعام وتقسم الاكل للعاملات نزلت غيم بعد ماغيرت لبسها عشان اخوها جاي
دخل فهد وهو يسمي بالله :جعله منزل مبارك وعامر بوجودكم
وليد:امين
غيم رحبت فيه ودخلته
اما وليد دخل يغير لبسه وراحت له غيم
وليال بدت تنفس ميته جوع وريحة الاكل تخليها تتنرفز اكثر
فهد ينتظر منها تسلم:اهلاا بزوجتي
