ركب وهو يحرك قبل ماتجي الشرطه
نواف بغيره:كلمتك!! "يقصد اخته كلمت تركي"
تركي يطقطق :هد وانا اخوك توك ذابح واحد لا تذبحني بعد خلك بجريمه وحده
نواف:وقف لو سمحت
تركي:اذا ما انت ملاحظ اني مركبك معي وانت توك طالع من جريمة قتل! ف اسكت الله يرحم والدينك
نواف يفك الحزام:ودني قسم الشرطه ماابي بيتنا
تركي التفت عليه:صاحي انت!
نواف:تراك محامي لا تنسى!
تركي:ولاني محامي ابتلشت اسكت لين اوصل بيتكم وطيب خاطر اختك مابقى بالحياه غيرك تتمسك فيك وخل الموضوع علي
سكت نواف لان تركي معه حق
وصلوا نزل نواف قبل تركي ولحقه تركي وهو يكلم معارفه اذا وصل لهم احد بالمستشفى يتواصلون معه
نواف يفتح باب المجلس:اقلط المجلس ببدل واجيك
دخل تركي وده يدق على عبدالله بس يدري ان عبدالله ييلعن خيره جلس ينتظر نواف عشان يتفق معه
نواف بروقان دخل الصاله :ياولد مع ضيف
فزت ردينا اول ما سمعت صوته وهي تضمه بخوف:وين كنت!!
نواف يضحك:قضيت لي بعض الامور جهزي شي للضيف ببدل واجي
ردينا مسكة يده تتاكد من وجهه :فيك شي؟
نواف بنكر:لا
طلع وهو يحاول يستعجل مايبي يقولها ويخوفها اكثر من الخوف اللي هي فيه يبي يتاكد وش بصير فيه بعدها بيقولها
......
غيم جالسه بصاله وتراسل وليد من يوم صحت ومندمجه بسوالف معه وخاصة انه يشبه شخصيتها جدا
ليث يدور امه :غيم وين امي
غيم مو حوله ابد بعالم الاحباب
ليث يرفع صوته ؛بنت اكلمك انا !
لدُن وهي تتقهوى وناقده على اختها:مو فاضيه لك بعالم ثاني اختك
ليث رفع حاجبه بشك:غيم ليش تبتسمين! مين تكلمين؟
غيم بوهقه:يووهه اكلم الأحياء والاموات شعليكم
وقفت بنرفزه من اسالتهم ابوه واهلها كلهم اليوم يسألونها اكثر شخص حن عليها وعرف طبعا المسيطره لدُن
ليث كشر بوجهه :وجع وشفيها ذي؟
لدُن:جتها الحاله معليك منها وين بتروح ليه كاشخ؟
ليث:وانتي وش دخلك اذلفي ساهر البيت انتي!
طلع يدور امه
لدُن تتحلطم:وش العايله النفسيه الكل معصب حشى جايتهم الدوره كلهم!
ام ليث هي تكلم أختها بالصاله اللي تحت وتسمع ليث يناديها ومطنشته :يا ذا ليث مادري متى يفهم ويقصر حسه تقول غول يصارخ
ليث بتعب وهو يدورها فر البيت كامل وينادي ماترد:وينك فيه ادورك ساعه يمه!
ام ليث:اكلم وش تبي؟
ليث:بس ابي اقولك بتغدا عند جدي لا تحسبون لي غداء
ام ليث:وابوك معك؟
ليث :مدري غازي عزم بالقروب ابوي مارد عليه
ام ليث:طيب
طلع ليث
وام ليث كملت سوالف لأختها وتخطيط للملكه
............
عند فهد كان عند جده وجدته متكي معهم وعشان كذا عزم غازي الشباب بما ان فهد عندهم
مجتمعين حوالين الجد وكآنو مستعمين لسوالف الجد عن الماضي وكيف جدهم بدا من الصفر او بالاصح تحت الصفر
الجد بحنين للايامه قبل صدق انها كانت عسره عليه الا انه يشوفها اجمل ايام له: الله يرحمها جدتكم مهره قبل وفاتها عيت الا نروح نحج وهي حامل وماكان علي وقتها الا عزام
الجده :لا بالله انك خرفت كلهم عيالي قد جبتهم
الجد يحاول يتذكر:لا والله ماصدقتي مافي الا عزام
ابو ليث :الا يبه انا ومحمد قد جينا حتى انكم خليتونا عند عمي فهد الله يرحمه
الجده :ها شفت انه يحب يعيى على رايه
الجد برفض وعناد اكثر:لا والله محد صدق فيكم
ابو عبدالله يهدي ابوه المنفعل: عمتي الله يرحمها كانت حامل وعيت الا تروحون تحجون انا قد جيت حتى قعدنا عند عمي فهد
ابو ليث بحزن يتنهد:ايوه وجيت انت وعمتي بدون امي وبعدها باسبوع علمتني انها ماتت هي والجنين اللي ببطنها
فهد باستغراب:يعني جدتي مهره ما انقبرت هنا؟
الجده:لا انقبرت بطايف كنا في فقر مايعلم به الا ربي
الجد بتذكر :اي والله انكم صادقين الله يرحمها ويرحم موتنا وموت المسلمين يارب تعبت علينا واحنا رايحين وقفنا بطايف وحلفتني بالله وتحطين بوجه الله نكمل طريقنا ونحج وانا ما اعرف هناك وكانت حالتنا الماديه بالبلاء ولا يمدي نرجع
ياخذ نفس وكمل :وانا احاول فيها وكانت جدتكم عنيده الله يرحمها ويوسع عليها جاني واحد اسمه منصور الله يذكره بالخير هو زوجته اخذوا جدتكم وكانت زوجته هي اللي تولد الحريم وتعرف بعد ماتطمنت عليها ولا ني مرتاح اني اخليها وخاصة انها قدهي بشهور الاخيره ونمشي انا وجدتكم نوره ونحج وتيسرت امورنا اول ما اقبلنا عليهم الا والله يستقبلني الرجال وجهه اسود من الضيق وحالته حاله الا نوره تدخل علي وتصارخ
الجده اول مابدا يجيب طاريها بكت بحزن وشوق لها وزادت بالبكي
ابو ليث وقف يبوس راس عمته واستئذن ماقدر من الحزن اللي استوطن صدره وخاصة انه فقدها هو صغير وكذوب عليه بعدها كشف انه يكذبون واضطروا يقولون له كان حاقد عليهم لين كبر وفهم وبدا يتعلق فيهم
الجده وهي تمسح دموعها بشيلتها:الله يصلح بالك من شايب سكت طول الجلسه مالقيت تختار الا ذي السالفه!
الجد يطقطق عشان ماتبكي:والله انتي اللي صايره رهيفه تبكين على كل شي ولا نسيتي يوم طلعتي عيوني يوم تزوجتها
فهد:الحين ياجد يوم دريت انه جدتي ماتت وش سويت
الجد:انا يوم دريت قد دفنوها وصلوا عليها هي والورع اللي ببطنها الله يرحمهم
ليث يبتسم لفهد بخرشه ويتمسك في غازي :والله مادري والله
فهد يتوعد فيه:يالخسيس القبر اللي اصلي عليه حق مين ياحيوان؟
ليث:انت كنت تبكي ومزعجني وكذبت عليك
فهد خزه بقهر كان يصلي على قبر يحسبه لجدته
ابو تركي :انت صادق ؟ ماتدري ان قبر جدتك بالطايف؟
فهد انحرج:والله مادري
عبدالله بكذب لان فهد انحرج :ترا حتى انا توني ادري
الجد يتكي على التكايه:والله اني ابطيت ما اعتمرت ان كان ودكم تروحون معي نعتمر ومنها نوري بعض الناس قبر جدتهم
ابو عبدالله:انا معك بس متى تبي
الجد يناظر غازي اللي ساكت: ها ياغازي متى ودك !
غازي تنحنح:متى مابغيت انت معك انا
ابو تركي:اجل خلوها على الاجازه البنات عليهم اختبارات
الجد:خلاص احجز يامحمد ويانوره بلغي حريم عيالك
الجده بفرحه لان خاطرها تروح مكه :ابشر اي والله نبي نعتمر ابطينا
كملوا سوالف وتخطيط للسفره
