Catharsis II: An Army of Words (AUDITIONS)

Applicant #56: Sh*tBrix: When You Realize What You're For

"Propesor 'di ka ba nagtataka, mabagal ang progress ng ancient human civilization pero biglang nag-boost ang technology nito," puna ng kan'yang assistant.

"Saka na 'yan, may mas importante akong inaalala," sagot ng Propesor.

S'ya ay isang siyentista na pinag-aaralan kung tunay nga ang existence ng alien. Ilang araw na s'yang binabagabag ng mga nasasagap na radio signal na pinaniniwalaan n'yang galing sa kalawakan.

Totoo ngang malayo na ang naabot ng teknolohiya ng tao, patunay niyon ang kan'yang pinakabagong imbensyon. Ang i-convert ang radiowaves patungo sa human language.

Binuksan n'ya ang kan'yang device at naghintay na may masagap ulit.

"Shk-- Shhhk--- Zzzz." Static mula sa kan'yang imbensyon matapos ang ilang minutong paghihintay.

Halos manlaki ang kanilang mga mata sa pagkabigla at antisipasyon. Nagpipigil ng hininga.

"Bzzt- Bzzzt--Ma-bzzt-daya." Nagsimula na ang pagtranslate.

"Bzt-Madaya ka tala-bzt-ga Zurdik."

Sa pagkakataong 'yon alam ng Propesor na nakikinig na nga sila sa boses ng alien mula sa malayong kalawakan.

"Wala akong ginagawang pandaraya, Ekkinuv. Bzt," sagot ng mas mababang tinig.

"'Di mo ako malilinlang Zurdik. Alam ko ang ginawa mong pakikialam sa planetang Earth!" tumaas bigla ang boses ni Ekkinuv.

"Patunayan mo!" bulyaw ni Zurdik.

"Palibhasa'y ilang galaxy na ang naipatatalo mo sa pustahan kaya ka nandaraya!" sagot ni Ekkinuv.

"Pagbintangan mo pa ako hangga't gusto mo. Magkita na lang tayo sa colliseum," huminahon ang tinig ni Zurdik.

"'Di pa tayo tapos! Aminin mo ang ginawa mong paglabag sa batas!" mas malakas na sigaw ni Ekkinuv.

"Sige, sabihin mo na sa akin lahat ngayon," hamon ni Zurdik.

"Ilang daang taon na ang nakakaraan bumisita ka sa Earth at ibinigay mo sa kanila ang karunungan sa teknolohiya!"

Katahimikan mula sa device. Pati ang Propesor at ang kan'yang assistant ay natulala sa naririnig.

"'Di ka makasagot? Nakasaad sa batas na bawal makialam ang Kapitan sa progreso ng planetang kan'yang isasali sa digmaan!" tuloy-tuloy na wika ni Ekkinuv.

"Kabalbalan! Mahinang klase ang lahi ng mga tao, malulugi ako sa limampung galaxy na pusta ko kung 'di ko ginawa 'yon!" muling sigaw ni Zurdik.

"Hangal ka! Madaya! Makikita mo! Lilipulin ng Kepplerians ko 'yang mga basura mo!" banta ni Ekkinuv.

"Sampung taon na lang magaganap na muli ang digmaan sa Colliseum, do'n tayo magkita! Kepplerians laban sa Earthlings. Sisiguraduhin kong ang mga gladyator ko ang magwawagi. Bzzt-- bzt."

Nabalot ng katahimikan ang laboratoryo ng Propesor. Nanginginig s'ya sa katotohanang narinig. Basang-basa ang kan'yang pantalon dahil sa ibayong takot.

Nasagot ang katanungang kanina lang ay narinig n'ya sa kanyang assistant. Sagot na sana'y 'di n'ya na lamang hinagilap sapagkat panibagong tanong ang nabuo.

Pa'no nila paghahandaan ang paparating na digmaan?