Ang Mutya Ng Section E

Chapter 3

Cleaners

Jay-jay's POV

Nagsipasok na sila sa loob matapos nilang ubusin ang pagkain ko dapat at kami na lang ni Felix ang nasa labas. Pati pala si Keifer kumag nandito rin pero nasa malayo siya.

"Wala na sila... Pwede ka nang maglabas ng chibog," sabi nung Felix.

Ginawa ko naman at kinuha ko yung Nova. Kaya lang, hindi ko pa nabubuksan nang hablutin naman ni Felix 'yon. Ano ba?! Snatcher lang?

"Hoy! Aba naman!"

"Sorry... Favorite ko 'to, eh!" sabi nung Felix at naglakad palayo habang kumakain.

Nag-iisa na lang ako. Wala nang kukuha ng ilalabas kong pagkain. Hehe! Finally!

Nilabas ko na yung Chippy. Kaya lang ang lintik... hawak ko pa lang ang Tear Here, may humablot na naman sa kamay ko.

Aaarrrgggghhhhh.... Ano ba?

Tiningnan ko nang masama yung animal na nanguha ng pagkain ko.

Si Keifer?

"Ano ba?! Hindi ba uso dito manghingi?! Kung nagugutom pala kayo, magsibili kayo!"

Tiningnan din niya ko nang masama. "Hindi kami makakabili..." halos pabulong niyang sabi.

"Ano?!"

Hindi niya ko pinansin. Pumasok lang siya sa room habang kinakain yung sitsirya ko. Kaasar naman!

Binalik ko sa dati yung table at chair na kinuha ko. Inayos ko na rin ang sarili ko.

Pagpasok sa loob, parang bumaha ng paper balls. Sobrang punong-puno yung sahig at sa bawat hakbang ko, hindi pwedeng walang masipa or tumalsik.

Hindi man lang nila nilinis. Ibang klase!

Naupo na ko sa pwesto ko kung saan ako ang tuldok sa gitna ng U. Gitnang-gitna naman kasi ako.

Masyadong tahimik ang paligid. Masama ang kutob ko kapag gano'n. Lumingon ako sa likod para tingnan sila.

Sa awa ng langit, wala namang milagro sa likod ko. Kumakain lang sina Felix at Keifer ng sitsiryang binili KO!

KAPAL!

Ninanamnam pa nila yung bawat subo nila ng pagkain. Ang weird lang dito ay yung mga classmate kong takam na takam sa nakikita nila. Nakasunod ang mga mata nila sa kinakain nung dalawa.

Hindi ba sila pinapakain?

Pati ako ay napatitig sa pagkain nila. Nang-iinggit kasi yung hayop, with sarap na sarap expression pa ang mga gunggong.

Kapal muks!

Binalik ko ang tingin sa harap. Lalo lang ako naiimbyerna sa ginagawa nila. Akin 'yon, eh! Akin dapat 'yon!

Sa wakas, tumunog ang bell at dumating ang teacher namin. Sa itsura ng room namin, expected ko nang magagalit siya pero parang wala lang sa kaniya yung mga kalat na nasipa niya.

"Ang room niyo bagay na bagay talaga sa inyo," bored na sambit nung teacher.

Mag-uumpisa na sana siyang magturo nang makita niya ko. "Bakit may babae dito?"

"T-transferee po..." sagot ko.

"Ahh... Yung Jasper Jean Mariano?"

Nag-smile naman ako. "Opo."

Binigyan niya ko ng ah reaction bago harapin ang libro niya. Kagaya ng mga naunang teacher, binigyan din niya ko ng mga lesson na hindi ko naabutan.