من نهل الانوار المحمديه(ج١)

ابوذيات

على الونات قلبي ارد اعلمه
وادك صدري على ابو اليمه وعلمه
لون ساعات ارد يمه واعلمه
شلون من اليسر شفت الاذيه
٠٠٠٠٠٠٠٠٠٠٠٠٠٠٠٠٠
مي العين ويه الدمع منزال
جبل همك يبو اليمه ابد منزال
انه بارض الاحزان بنيت منزل
واضل انعه ودمعاتي هميه
٠٠٠٠٠٠٠٠٠٠٠٠٠٠٠٠
دمع العين شبه السيل وانهار
انه المالي هواده بليل وانهار
جبل صبري تضعضع مال وانهار
من شفتك صريع الغاضريه
٠٠٠٠٠٠٠٠٠٠٠٠٠٠٠٠
انه وسط الحرب انضر علم دار
احس قلبي بوداعك جن علم دار
ادور وين عباس العلمدار
كالو عالنهر واكع رميه
٠٠٠٠٠٠٠٠٠٠٠٠٠٠٠٠
دليلي من لهيب الوجد هالشاب
من قبل المشيب الراس هالشاب
انه وباقي الشبان هالشاب
شبيه المصطفى بخلق وسجيه
٠٠٠٠٠٠٠٠٠٠٠
شب باقصى الضمير العطش والماي
شفاتي واللسان ايبسن والماي
يمنعوني مباح الورد والماي
مهر المرتضى لامي الزجيه
٠٠٠٠٠٠٠٠٠٠٠٠
واي ولايهون الحزن بالواي
ولا اشكي الغير رب العرش بالواي
يبو فاضل صرت محتار بالواي
تنكس وانهجم بيتي عليه
٠٠٠٠٠٠٠٠٠٠٠
بين زينب والعباس
٠٠٠٠٠٠٠
الومك لانحاك اللوم وعداك
لجن ياخويه انشدك وين وعداك
عالمسنات نايم ليش وعداك
تفرهد واليتامه تلوذ بيه
٠٠جواب٠٠
تركتي من العتاب القلب يوماي
عليج اسود يزينب صار يوماي
كلت يختي العمر فدواج يو ماي
العمر والماي صار يعز عليه
٠٠٠٠٠٠٠٠٠جوابه ٠٠٠٠
عجيبه شلون طاب النوم وهناك
وهن قلبي ينور العين وهناك
رضيت نروح للشامات وهناك
عداك معيده وتشتمت بيه
٠٠٠٠٠٠٠٠٠٠
همومي لاتضن يوجد وسه الها
على حسين الشعب روحي وسلها
يراكب عرج الهاشم وسلها
درو زينب مشت لبن الدعيه
٠٠٠٠٠
اجت زينب على الوالي ترابي
مات حسين لو روحه ترا بي
على الوليان اريد احفر ترابي
واندفن بالكاع ويه اهل الحميه
******
للخادمه ام عباس الخفاجي