ترك بصماته على جسدي

بارت ١٧

انا .. تجاوزت حدودي
انا.. تجاوزت المبادئي
تخليت عن الكثير من اجلك ...
وتاتي وتسالني ماذا فعلت من اجلك ؟
انا فعلت .. الكثير من اجلك ياسيدي
انا .. جعلتك امير احلامي
انا .. جعلتك ملك قلبي
انا .. جعلتك سلطاني
انا.. تخليت عن احلامي لكي ابني احلامك
انا .. تجاوزت حدودي من اجل الوصول الى حدودك
انا .. تخليت عن كرامتي
انا... تنازلت عن حقوقي
انا .. من كانت تستمع لك وقت فرحك وحزنك
وفعلت الكثير والكثير ....
وكيف تقابلني ياحبيبي ؟
بالجرح ...
بالخيانه ...
بالغدر ...
بكسر كبريائي ...

وثاب / اتفاجئت معقوله زينه مطلقه زين ليش ماكلت لاهلي حتى اني سألت امي كلت البنيه مامزوجه ظليت حاير وضجت اي ضجت هواي حسيت شي ملكي واحد اخذه ظليت كاعد وادخن وافكر بيها افكر بيني وبين نفسي اكول اي اكيد السبب بزوجها اصلا شلون يعوف واحده مثلها مثل الحوريه نازله من السماء معقوله شايف عليها شي لو اخلاقها مو حلوة افففففف..
حاولت اطلعها من بالي واركز بشغلي حاولت انساها بس افففف على كلبي احسه مثل النار عليها ظليت اراقبها واتبع خطواتها وين ماتروح اشوفها قمه بالاخلاق حتى من تمشي ماترفع راسها ...
مر اكثر من شهر واني حال الظيم من وراها كل مااشوفها احس جسمي يشتعل نار حبيتها اي حبيت كولش بيها اريدها اليه ردت اتملكها اخليها من ممتلكاتي الخاصه ...
حجيت وياه سمر وكتلها اريد ازوج هي صح ماحجت شي بس حسيت بيها انكسرت مرات امر من يم غرفتها اسمعها تبجي اني نكسر كلبي عليها مهما يكون هي زوجتي وام بنتي مااريدن اكسرها سديت السالفه بس يابويه على كلبي ماجاي ينساها
كنت كاعد بالصاله ونور كاعده تقرء يمي اجتي سمر
سمر/ ماما نور روحي لغرفتج
نور/ ماما جاي اقرء
سمر / ماما سمعي كلامي وروحي لغرفتج اريد احجب وياه ابوج
نور / اافففف ماشي
راحت نور وسمر باوعتلي كلتلي ابو نور تريد تزوج ازوج اني مامنعتك اني من زمان اكلك ازوج علمود يجوك جهال كتله بويه انسي سديتها هذا السالفه كلتلي وثاب اني احبك واحترمك بس والله طول هذا السنوات واني اعيش بتانيب الضمير اكول شنو ذنبه ماعنده ولد يشيل اسمه حتى نور ماعده بعد الله وانت ماعدها سند وتكول هذا اخويه وثاب اني ادري ماتريد تزوج حتى لا تكسر بخاطري بس اني اترجاك ازوج حتى ارتاح واني من رضات نفسي اكول الك هذا الحجي باوعتلها وحضنها كتله سمر انتي ام بنيتي واعز من روح وحك العباس اذا ماتريدني ازوج ماازوج يكفي انتي يمي وام بنتي كلتلي لا ازوج بس عندي شرط كتلها اطلبي كلتلي من تزوج مااريدها تجي يمي واريدها تقترب من بيتي يعني بيتها وحد واريد تعدل بينا كتلها هذا البيت تدرين بي مسجله باسم نور اول ماجبتيها وهو بيتج ماله داعي هذا الحجي .......
راحت حجيت والحجي والحجيه وفرحولي والحجيه كالت خوش بنيه والنعم بيها من اجتي لهسه ماشايفين العيبه منها واني احبنها عبن فقيرة ودوم اروح يمها طبعا اني فهمت الحجيه وكتبها البنيه مطلقه هي بالبدايه انصدمت وظلت تحجي بس اني قنعتها كتلها شكو بيها بنيه مستورة وحبابه واذا مطلقه مو العتب عليها العتب على الجلب لزوجته اقتنعت امي وراحت هي واختي الجبيرة سمر كالت مااروح وتعبانه اني مااضغطت عليها ما كتلها اي شي اعرف هذا الشي صعب على كل مرة بس اني كلبي هواها مااكدر بدونها والله احسنها مثل روحي ماادري شلون بشهرين هيج اتعلقت بيها وحبيتها ..
ظليت كاعد ومنتظر رجعه امي اووويلي كلبي مثل النار ومتوتر تقريبا ساعه رجعت امي كالبه خلقتها كتله ها يمه بشري كلتلي شبشر طلعت البت حبله جا انت غير اكلنا قبل مانروح ونتفشل ماقبل واصلا اول ماكلنا الها جاين نحطبج طفت البت عبالك مخروعه خلي تولي يمه شوفلك بنت خالك اتخبل بالجمال واخلاق وادب كتلها يمه اوكفي دقيقه يعني زينه حامل كلتلي اي يمه ...
اني من كلتلي هيج كبالك طلقه وثقبت كلبي حسيت افترت الدنيا بيه عفت امي تحجي وطلعت اخذت سيارت وافتر بيها امشي ومااعرف وين اروح مثل الصدمه صارت بيه حامل اخخخخ ياربي ليش الدنيا وكفت ضدي واني اول مرة احب واتعلق بواحده
ظليت ادخن وكاعد بالسيارة وهموم الدنيا على راسي اول مرة احسه بهيج الالم بصدري احسه نفسي مخنوك اوويلي ياربي احبها والله احبها ...
مر اكثر من سنه موضوع الزواج ابدا مافتحته ظليت اراقبها من بعيد واتحصر عليها اتمنيتها اليه طول هذا المدة هي كدام عيون اووويلي تدرون احساسي واني اخذها بيدي لمستشفى وانتظر على احر من النار حتى تولد تعرفون شعوري واني الزم ابنها واذن باذانه واني اختاريت اسمه محمد وسويت المستحيل وجبت جنسيه ابو الانكس حتى اكمل الاجرائات والله حسيت بذيج الحظه ابني وزعت لمستشفى كلها البشارة وكلها تكول يتربى بعزك حسيت روحي تطلع من جسمي حتى بعد ولدتها قنعت اهلي وراحت الحجيه وخطبتها بس رافضت واني ماتدرون شنو صار بيه ظليت مهموم وصرت عصبي على اقل كلمه اصيح ادري مو ذنبهم بس اني احبها واني شناقصني حتى ترفضني شبيه حتى ترفضني مليت من هذا الوضع قررت انساها وكل يوم اكول لازم اكعد بعد ماافكر بيها ويصير اليل واني اتخيلها بحضني اخخخخ ياكلبي عبالك الله زرع حبها بكلبي وعيوني انعمت مااشوف بس هي بس ليش هيج تجاهلني حتى من اشوفها اعيونها ماتخليهن بعيوني كولش ضعفت وتغيرت خلال هذا السنه كمت اشوفها تروح وتجي من الشغل واني اعيوني تركض وراها وين مااتروح مرة راحت لمستشفى لتشتغل بيها واشوفها واكفه وياه دكتور وتضحك وتسولف اني كولش ضجت ونقهرت اني حتى ماتباوع بعيوني وغيري واكفه واسولف اجيت جريتها من ايدها وعصرتها حيل ودخلتها لغرفه مال مرضى بس فارغه لزكتها بالباب واني اباوعلها وهي فاتحه عيونها مصدومه كلتلي ابو نور خير كتلها واني افور من الاعصاب وهي تحجي بهدوء وعيونها سطرتني سطر كتلها شعندج وياه هذا واكفه كلتلي كنت اشتغل على الملفات مال المرضى مالته وكملت وسلمتهن اله باوعتها كتلها ليش تجاهليني ليش اصديني كلما اقترب منج كليلي هي كلتلي ابو نور عيب هذا الحجي مايصير وهسه اذا دخل احد وشافنا بهيج وضع شنو موقفي كدام الموظفين رجائا لا تحرجني وتكطع باب رزقي كتلها زينه اني احبج وحبج نبت بكلبي ليش ماتنطيني فرصه اليه والج والله اعيشج اميرة وابنج اعتبره ابني بس انطيني فرصه ولا اصديني هي كتلي ابو نور عيب هذا الحجي انت رجال مزوج وعندك بنيه بعد شكو هذا الحجي كتلها شنو العيب بالموضوع الشرع حلل الزواج عادي تريدين بيت وحدج هم عادي كولشي تريدي يصير بس قبلي وريحي هذا وياشر على صدره كتلي وثاب كتله روحه وعيونه كولي ياروح وثاب كتله اذا صدك تحبني عوفني ولا تلح عليه اني اريد حياتي بس لابني مااريد ازوج بعد اني شفت الويل بزواج الاول مااتحمل بعد ازوج لو ادخل رجال لحياتي كانت تحجي وتبجي عفتها وطلعت كتلها لتريدي يصير طلعت واني كره الدنيا كلها اريدها بس مااكدر اجبرها على شي من اشوف ادموعها احسه روحي تطلع مني اريدها اليه بس هي اصدني حاولت كل الطرق بس هي تبتعد عندي ماتريدني بقيت اراقبها من بعيد والاسابيع تمر والاشهر واني عندي امل كلبها يحن عليه ..
السلام عليكم ورحمة الله وبركاته اسفه عن التاخير وان شاء الله يعجبكم هذا البارت وهم حبايبي ماكو داعي يدخلون ولد لخاص واريد اتعرف ماادري شنو تر عيب وان نزلت هذا التطبيق علمود كتابه القصص مو علمود اتعرف فماكو داعي لها هذا الحركات ..
المهم اشكركم على تعليقاتكم الحلوة وشكرا تصبحون على خير