ترك بصماته على جسدي

البارت العاشر من الجزء الثاني

عشق ... فزيت على شخص يضربني على خدي ويذب ماي عليه  فتحت عيوني شفت غرام ونور كاعده يمي يحاولون يصحني ..
حاولت اكوم جسمي متكسر اصلا راسي مااكدر احركه شفت غرام تشهك وتبجي بحركه خفت هواي خاف صاير بماما شي ....
بلكوه كعدت وكتلها امي بيها شي ....نور هزت راسها وكالت لا تخافين مابيها شي...
راحت غرام ركض جابتلي ماي واكل مااكدرت اكل واني اشوف غرام تبجي ياربي شبيها هذي ...
باوعت على غرام وكتلها شبيج..
هي كامت تبجي بالزايد ونور رزلتها كالت الها كافي سكتي لا يسمعج احد ....
كتلها نور شكو ليش اني اهنا وليش قاسم ضربني وين امي ؟
نور رادت تحجي غرام كالت الها تسكت كتلها غرام انت سكتي احجوا اني مااذكر شي غير من خطفني هذا الحقير وصلت اهنا بس ليش محبوسه اهنا احجووا
كالت نور شوفي عشق تر انتي صار يومين فاقدة الوعي من الضرب وماتدرين شكو بالدنيا وهسه بلكوه  حصلنا المفتاح واجينا فمن احجي الج على  كيفج خاف أحد يسمع افتهمتي ...
اني عقدت حواجبي مستغربه من حجيها يعني معقوله صار اليه يومين نايمه....
كتلها احجي شكو ؟
كالت شوفي قاسم والولد عرفوا هذا الجلب الخطفج وراحوا اله وصارت كعدة عشائر بس هذا الحقير كال انو انتي اجيتي وياه بكيفج وبيناتكم علاقه وانتي وحده كح****** ومطلع صورج مشوفهم على ساس نايمين وياج لمن الله كال الهم بس....
نفضحتي بين العشيرة كلها والمنطقه كلها درت بهذي الفضيحه ولد عمج رادوا يهجمون عليج ويذبحون بس كال الشيخ لا خلي انزوجها من هذا الجلب لان انفضحنا وروسنا صارت بالطين رجعوا لعائله هذا الحقير وكالوا الهم لازم ابنكم يزوج بنتنا لان انفضحت بس هو واهله مااقبلوا وكالوا احنا عائله معروفه ماانقبل انجيب كحب***** لبيتنا ...
وصارت عركه شكبرها وشكدها بس مااقبل هذا الجلب يزوجج ....
عشق ...
اني ظليت مصدومه وفاتحه عيوني على حجيها شنو  الصور شنو زواج معقوله كل هذا صاير واني ماادري ...
باوعتلها وكمت ابجي كتلها نور هذا الحقير خطفني وراد يعتدي عليه مااعرفه والله ماااعرفه اني شمرت نفسي من البلكونه حتى احافظ على شرفي ردت اشمر نفسي كدام السيارات وانتحر ولا يلزمني هذا الجلب هسه طعنوا بشرفي ....
ردت اكوم اطلع من الغرفه واني ابجي ومنهارة مااجاي اصدك هذا السمعته مستحيل اكيد اني هسه بكابوس وهسه اكعد ....
لزمتني حيل نور ومنعتني من الطلعه كالت اذا طلعتي محد يرحمج ....
دقائق وطلعت نور وغرام من المخزن واني مصدومه شلون يصير وياي هيج زين يمت مصورني  ....
اي اكيد من كنت غايبه عن الوعي من كعدت ماالكيت لا عباتي ولا حجابي حتى قميصي شفته مفتوح من صدري ....
زين ليش ليش هيج يسوي وياي ...
ليش هيج ياربي اني مظلومه مو لهذي الدرجه اتحمل اختبارك مااكدر بعد مااكدر تعبت من حياتي ليش اني بالذات جاي يصير بيه هيج ليش هيج حياتي ليش كل مااحاول افتح باب واكول هاهيه راح تفرج راح اعيش راح اشوف حياتي فجئه تنسد بوجهي ....
اني شنو مسويه تحت رحمتك ياربي حتى يصير بيه هيج شو طول عمري مااسويت شي يغضبك طول عمري امشي بصف الحايط ...
كعدت ابجي واندب حظي حسيت هذني لحظاتي الاخيرة من حياتي  وهاهيه راح ينتهي كل وجعي وحزني لان تعبت وتحملت هواي لا عشت طفوله ولا عشت مراهقه ولا حتى شبابي تعبت الحياة تعبتني مااجاي تنطيني مجال حتى اتنفس ......
مرت ايام واني بنفس مكاني مثل الحيوانه محبوسه بالمخزن كل يوم يجون يتفلون عليه لو يضربوني بدون ذنب بس لان اني بنيه مايهم مظلومه لو شي المهم لازم احد يتعاقب واكيد البنيه يطلعون كل حقدهم عليها حتى لو الغلط مو من يمها ....
بقيت تقريبا فوك الاسبوع بالمخزن لو احصل اشرب ماي لو لا ...
امي مااعرف عنها شي وكل مااسأل غرام عنها تتهرب مني .....
حالتي النفسيه تعبت كولش هذي الفترة كضيتها بجي اتمنيت بس اموت واخلص اريد ارتاح جسمي يوجعني ايدي مااكدر احركها رجلي عبارة عن قطعه زركه واكو دم براسي لزك ...
وضعي كان يبكي الكافر ايام سوده مااتمنى اي شخص يمر بيها ...
باليوم الثامن دخل قاسم مثل الغضب المستعجل كلت اكيد راح يضربني اتعودت بس جسمي بعد مايتحمل ضرب زيادة ...لزمني من ايدي حيل وجرني مثل الحيوانه وراه ...
وكفني وراء باب الصاله ولبسني عبايه لزمني من زندي حيل وكلي اذا الشيخ سألج على الزواج وكلج انتي موافقه لو لا كولي اله اي افتهمتي لو لااااا ...
اني فتحت عيوني على كبرهن وكتله زواج شن شجاي تحجي انت من كل عقلك !!
هو صك على سنونه وضغط على ايدي حيل وكال بنت الجلب نصي صوتج لا اركعج بالقندة على راسج ..
كتله قاسم انت شبيك بس فهمني يازواج تحجي عليه ازوج منو ؟ زين اني شنو سويت حتى هيج اتعاملني هي فوك مااتوكف وياي لان خطفوني ...
كال خطفوج لو راحتي اكود**** وتنزلين راسي ولج صارت سيرتي على كل السان ماابقى احد مااحجى عليه يكولون مربي كح**** سمعي لج هسه اتوفقين لو اركع راسج بالحايط ...
دفعته وحاولت اوخر ايده عني وكتله تحلم ازوج اني مااغلطانه لا بحقك ولا بحق احد لو هسه اتموتني هم ماازوج افتهمتتت
هو اني هيج حجيت وهو سحلني لمخزن ودك ضرب مااعرفت مين احمي نفسي  من ضربه عبالك يضرب رجال ويدفر بيه بظهري وبوجهي منا لمن استسلمت لضربه وصار كولشي كدام عيوني اسود مااحسه بشي ....
حسيت على احد يضرب بوجهي ويذب عليه ماي فتحت عيوني بالكوه شفت نور كاعده فوك راسي كعدتني بالكوه وكالتلي شي لهسه متفاجئه منه....
اني كعدت ابجي ماادري من وجع جسمي لو من قهري وظلم الناس اليه  ....
هي حظنتني وانطتني جنطه ....
باوعتلها وكتلها شنو هذي؟؟
كالت عشق تر راح يظلموج ويريدون يزوجج لواحد ظالم ومايخاف الله واذا ماازوجتي يموتوج ترهذولي مايخافون الله اخذي هذي الجنطه بيها ذهبي وشكم مليون من الحصه مالت زوجي وملابس وشردي ماطول نايمين روحي لبغداد او لاربيل اهناك كملي دراسه اشتغلي وعيشي وانسي عندج اهل واني كل فترة ادزلج فلوس ....
اني عدلت كعدتي وكتلها نور شنو تحجين انتي شلون اشرد انتي شبيج وامي وغرام شلون اعوفكم؟؟
باوعتلي بحزن وكالت عشق اكلج شي بس على كيفج  لان هسه اذا صيحتي لو سمعونا نروح بيها اني وياج اولا امي مريضه كولش وين الحياة والموت ...
كتلها يخوف شبيها امي احجييي ...
كالت امي ضربتها جلطه وهسه بالمستشفى وضعها خطر ...
كتلها من يمت هي هيج ووليش محد كلي وليش صار بيها هيج؟؟
كالت امي من زمان مريضه وانتي تدرين من وفاة محمد صار بيها كومه امراض وهسه زادن عدها ...
كعدت ابجي واحسه حياتي كلها متوقفه اسوده عليه ياماما ياريت بيه ولا بيج يايمه عمت عيني عليج كله من ورايه عسايه بالموت ....
لزمت ايدي نور وكالت مو وكت البجي هسه لا تخافين راح يطلعون امي بره البلد اصلا جاي يسون بالجوازات وخلال هذا الاسبوع يطلعوها بره وان شاء الله مابيها شي  ....
مسحت دموعي وكتلها يعني اطيب مابيها شي ...
كالت ان شاء الله شوفي هسه راح اصير الساعه بال٤ ونص الصبح والكراج مفتوح اخذي سيارة منا لبغداد ومنا لاربيل وخلصي واكو شقق مالت طلاب بااربيل اخذي شقه وكملي دراسي وانسي كولشي وعيشي حياتج تر هذي فرصتج اذا ازوجتي راح تنظلمين طول عمرج افتهمتي اني اكثر وحدة اعرف هذا الشخص انسان ظالم ماعنده رحمه افتهمتني
كتلها نور مااكدر شلون اطلع اخاف هو اني لمعهد اروح ركض وارجع ركض من كل عقلج اروح واسافر وحدي واصلا بغداد ولا مرة بحياتي شايفتها نوب اروح الها ...
باوعتلي بنفذ صبر وكالت اني نصحتج لان اختي الصغيرة وسويت لعليه بس خلي يكون بعلمج انتي مو صغيرة واسوين روحج تخافين اني شداخل بجيبي بس امي وصتني عليج قبل لا تتخربط وكانت خايفه عليج اني اكولج سافري تر والله تموتين وتتندمين بكد شعر راسج لان ماسمعتي كلامي وبعدين يعني اذا مقتنعه بالزواج معليه بيج ..
رديت عليها بسرعه وكتلها لا يازواج يمعوده مااريد ...
كالت لعد هاهيه اخذي الجنطه وروحي قبل لا يكعدون ...
اني كمت ابجي واحسه نفسي حايرة وخايفه خوف مو طبيعي اتمنيت هسه ماما يمي وانام بحظنها وتاخذ عني كل الخوف والقلق وتحميني من هذولي والوحوش ...
لبست عباتي واخذت الجنطه واني خايفه وجسمي يرجف يمكن هذا اغبى شي سويته بحياتي ....
طلعت من البيت تقريبا الساعه بال٥ ...
اول مااطلعت باوعت النور رجعت شبكتها انطتني موبايل وكالت ديري بالج على نفسج .....
كمت امشي سريع لراس الشارع امشي والتفت ظليت واكفه هواي منا لمن حصلت سيارة رجال جبير يوصلني لكراج......
صعدت وياه وهو ظل يباوعلي لان وجهي كله كدمات وازرك من كثر الضرب ...
نزلت راسي وفتحت الجنطه كان دك الفون شفت اسم نور ...
فتحت الخط اطمنت عليه وكالت اكو نقاب بالجنطه لبسي ...
نهيت الاتصال منها وطلعت النقاب لبسته عبالك حست بيه واتصلت علمود النقاب لبسته حسيت براحه انو محد راح يشوف وجهي ...
وراء دقائق وصلت لكراج انطيت الفلوس  لرجال ونزلت واني قلبي مليان خوف وقلق كل خطوة اخطيها يزداد خوفي ...
باوعت الكراج كله زلم وقليل نسوان وكلهم يصيحون يجلبون بالعالم حتى تصعد وياهم ...
سمعت واحد يصيح بغداد بغداد ...
راحت صعدت وياه شفت مريه وبحظنها طفله راحت كعدت بصفها كان كالت يااااا شنهي كعدتي اهنا هذا محجوز اخيتي نزلت اجيب اكل وهسه تجي ...
كتلها العفو خاله ..
كالت خاله تخلل عظامج شنهي شفتي سنوني واكعه والشيب طالع من راسي وصيحلي خاله ...
اني رتبكت وخفت وهو اصلا اني خايفه ومتوترة وهذي تريد تتعارك ...
اعتذرت منها وراحت كعدت وحدي ...
بدأت الناس تجي والشمس تطلع واني حلكي يبس من كثر الدعاء مااعفت ايه مااقريتها ولا دعاء مااكلته تقريبا فوك الساعه يله تحركت الكيه تقريبا صارت الساعه بال٦ ونص ...
كامت تمشي الكيه وهذني النسوان بس حجي احسه راسي يريد يطك على كثر مااحجن ...
الطريق طويل والجوء بارد كولش واني يادوب بالدشداشه والعبايه ...
وجسمي كام يوجعني من كثر البرد ...
لفيت روحي بالعبايه وماادري شلون غفيت