ترك بصماته على جسدي

بارت ٣١

غرام ... رجعنا لبيت وطول الطريق قاسم ساكت ويدخن واني خفت من هدوء يمكن هذا الهدوء ماقبل العاصفه طول الطريق واني اباوع لوجه منو هيج ضربه زين ليش تعارك ظلن هذني لاسأله تدور بالي صحيت من تفكري على صوت قاسم وهو يكولي يله وصلنا نزلت لبيتهم فتح الباب البيت هدوء اتوقع نايمين طبعا نايمين اصلا الساعه بال١ ونص حتى من طلعنا من الفندق ظل عامل الاستقبال صافن وظل يسأل قاسم اذا شي مضوجنا او لا ..
طبينا لبيت وكلي صعدي فوك بالغرفه اني راسن صعدت لطابق الثاني بس كان اكو ثلاث غرف مااعرف اي وحدة اليه ظليت واكفه محتارة ومستحيه احسه اني غريبه وداخله لبيت مو اليه هو صح بيت عمي بس احنا علاقتنا مو قويه بيهم حتى اخوات قاسم بس بالمناسبات يجن ومن يجن قليل نختلط بيهن لذالك مامتعودة عليهم شفت قاسم صعد وشافني واكفه بالممر مال الغرف ..
رفع حاجبه وكال شكو واكفه اهنا كتله بتوتر وحذر من رد فعله مو مو مااعرف اي غرفه ادخل ..
سكت ومشى كدامي دخل لغرفه بنهايه الممر وبيده الجنط دخلت وراء تفاجئت بجمال الغرفه كولششش نازكه وكولش جبيرة الوانها بين الذهبي والاسود بس الون الاسود اكثر شي طاغي على الالوان البقيه ....
كعد قاسم على السرير وباوعلي كلي روحي بدلي وتعالي احجي وياج ..
اني كتله اي...
واخذت دشداشه طويله ومستورة وراحت لبستها بالحمام موجود بالغرفه على السريع لبست واني خايفه من شنو راح يحجي توكلت على الله وطلعت شفته متمدد على الجربايه ويدخن من شافني عدل كعدته وكلي تعالي كعدي راحت كعدت يمه بس خليت مسافه بينا خاف اي شي يصير يعني عبالك اذا عفت هذي المسافه مايكدر يتقربلي اذا راد ههه والله مرات اضحك على عقلي على افكاري ...
باوعلي بجديه وكلي يله كوليلي شتريدين هسه
كتله شنو مااريد شي
كال شوفي يابنت عمي مااريدج تخافين مني اجوز انتي بعدج ماتعرفيني ولا تعرفين طباعي لانج مامعاشرتني شوفي انتي صغيرة وهواي فرق بينا فوك ١٥ سنه بس خلي بالج اني ماجبرت ابوج حتى اخذج اصلا اني مااقتنعت ازوج وحدة طفله مثلج وكنت متاكد انو علاقتنا ماتنجح بس الله يسلم ابوج حرجني هواي فنجبرت اخذج المهم هذا مو حجينا هسه انتي كولي اليه شنو تريدين مااريد اظلمج يمكن لو مزوج كان صار عندي بنيه بكدج ..
جر نفس قوي وكمل كملامه كال هسه كولي شنو تريدين حتى اذا باجر اجوي اهلج مااريد اظلمج بقراري احجي
جاوبته واني متفاجئه بكلامه ماتوقعته هلكد متفاهم وحقاني يعني عكس وصف نور ...
اجتي الفرصه اليه لازم استغلها حتى اطالب بحقوقي بلكت تستجاب كتله اني اريد اكمل دراستي بس مااريد ارجع وياه اهلي لان ابويه يموتني ويظلموني خليني هنا يمك منا لمن اسند نفسي واكمل دراستي وعتبرني وحدة من اخواتك واني اشتغل كل شغل البيت بس خليني اهنا منا لمن اكمل دراستي
جر نفس قوي ومسح وجه وكال واني .. يعني اقصد اني رجال جبير مو صغير اريد جهال يسندوني قبل لا اكبر يعني انتظرج منا لمن اكملين دراسه ..
جاوبتله راسن لا لا تنتظرني انت ازوج ومعليك بيه
باوعلي كال يعني ازوج عليج تقبليها
كتلها برتباك اي اقبل هذا حقك
كال لعد هاهيه بس راح اكول الج هذا الحجي وبعد مااعيده قسما بالله اذا عرف احد عند هذا الحجي بينا اشوفين شي مايعجبج افتهمتي مااريد اقرب الناس يعرفون بهذا الحجي ماشي
كتله اي والله محد يعرف حتى ماما كال لعد كومي نامي وطفي الضوء كتله اريد فراش كال تعالي نامي اليوم على الجربايه منا لمن باجر انزل الج فراش تنامين عليه كتله لعد وانت وين تنام كال وين يعني هم على جربايه وين اروح تعالي مااقتربلج ظليت واكفه وهو خلى ايده على عيونه وكال طفي الضوء راحت طفيت الضوء وكعدت على الكنبه ماكدرت انام بصفه ظليت كاعده وعيوني كامن ينسدن وحدهن من كثر مانعسانه صارت بال٢ ونص طفيت كولش كمت امشي على اطراف اصابعي اشوف قاسم نايم لو لا شفته نايم على بطنه مبين نايم اخذت جنب من الجربايه ونمت ...
كعدت على لمسات على وجهي وصوت اعرفه فتحت عيوني واشوف امي كدامي دموعها على وجها كمزت بوستها كتلها ماما شسوين اهنا هي سولفتلي على كولشي وظلت تعتب عليه لان هيج سويت وتنصح بيه انو اكسب قاسم وكالتها اريد اسلم على بابا بس هي ماقبلت كالت ابوج عصبي عليج عوفي يهدء هذي الفترة واني احجي وياه كتلها عليمن عصبي هي فوك ماضيع حياتي ودمرني كالت كافي يمه غرام بعد مايفيد الحجي مالج غير بيت زوجج بس اذا قاسم ضربج لو خلاج خدمه اله ولخواته ولو اعرف قاسم مايسوي هيج بس اذا سواى خابريني تلكيني اني ومحمد يمج يايمه لا تكولين ماعندي احد تر الله موجود وهو ارحم من البشر واني موجودة انتي وعشق امانه سمر بركبتي اريدج اي شي تحتاجين تخابريني مو تستحين حبيبتي كمت بوست ماما وكتلها لا ماما بس انتي هم ديري بالج على نفسج وعلى عشق خاف ابويه هم يزوجها جرت نفس كالت لا يمه مايسويها اني ستغربت وكتلها ليش وصدك تعالي كوليلي ليش اني زوجني لقاسم ومازوج عشق ...
امي ارتبكت والتوتر واضح على وجها وكالت غير قاسم طلبج من ابوج وبعدين انتي سباعيه مو مثل عشق ..
مااقتنعت بحجي ماما بس سكتت لان مبينه ماما مريضه مو مال الح عليها بالحجي ..
ظلت تحجي وياي ماما وتنصحني شويه وسمعنا بابا يصيح لماما حتى يروحون نزلت ماما واني نزلت وراها شفت بابا واكف وبصفه قاسم اقتربت على بابا اريد اسلم عليه على الرغم من تحذير ماما اليه بهذا الخصوص بس استحيت مااقترب منه واسلم عليه وابوس ايده هو هم ابويه ......
اقترب اله وكتله الله يساعدك يابه هو كلب وجه وكال حرامات ربيت وتعبت على وحدة مثلج لا عدها قدر لابوها ولا حترام اخذ امي وراح كولش استحيت من تصرف ابويه كدام قاسم وخوانه ........
_________________________________________
عشق ..... رجعت ماما من بيت غرام وهي فرحانه لان قاسم ماضارب غرام ولا صاير عليها شي واني طول الوقت اضحك واوزع ابتسامات كل مااذكر كلام محمد احسه الدنيا فتحت ابواب السعادة كدامي وامي كل ساعه شبيج وليش توزعين ابتسامات شكو شصاير واني اكول الها ماكو شي بس هي تحس بينا وتعرفنين كولش زين من حركاتي وتصرفاتي .....
كاعده اسوي زلاطه وماما كاعدة تقرء قراءن واني بالي سرح على كلام محمد ..
شنو اسوي بعد علمود تحبيني لج منا لمن اموت روحي والله خبلتني كان عصبي ويحجي بنفعال ويجر الكلمه جر اني راسن اقتربت منه وكتله لا لا اني احبك والله بس عبالي انت ماتحبني واذا اعترفتلك ترفضني وتفشلني هو لزمني من خصري ولزك جسمه على جسمي وكال ولجج اني محروك جدي عليج انام واكعد احلم بيج وانتي تحجين هذا الحجي لجج اني اسرق النظر الج احسه روحي مثل الحرامي ولجج اروح لدوام تفكيري بيج ماكو شي بدماغي غيرج ..
كان يهمس يم ركبتي ويحجي بلهفه ونفاسه الحاره حركت ركبتي ...
ظليت ساكته ومتوترة مااعرف شنو ارد لو بالاصح متفاجئه بحجي محمد رفع راسه من ركبتي ودفعني حيل بحيث ردت اوكع كلي امشي طلعي بسسسسرعه اني كولش خفت من صوته وتحوله طلعت من المشتمل اركض وصلت لمطبخ واني الهث وجسمي يرجف طبيت لحمام بدلت ملابسي قبل لا يجي ابويه لان مايقبل هيج نلبس بدلت وجسمي يرجف سمعت ماما وبابا وصلو باوعت لوجهي بالمرايه احممر غززه اذا شافتني امي هيج اجوز اشك بشي بسرعه غسلت وطلعت بس ماسألتني لان كانت فرحانه انو ماصاير شي على غرام ....
فزيت على صوت امي وهي تحاجيني كتلها ها يوم شكو كالت اني لشكو لو انتي صار الج ساعه صافنه وتوزعين بتسامات  احجي ولج شبيج كتلها اووي يمه شبيج يعني حتى من اضحك وافرح اضوجين يعني الا ابجي يله ترتاحين كالت لا اكيد بس اني غير بالي يمج واعرفج وراج شي كتلها لا ماورايه شي كالت يله الخبر اليوم بفلوس باجر بلاش اكولج كويتي الزي مال اخوج اني توترت ورتبكت كتلها لا نسيت هي كامت وكالت ياا ليش يايمه غير تكويها خطيه باجر يداوم كتلها نسيت كالت يله عادي حبيبتي اني اروح اخذها منه اني كمزت وكتلها لا يوم اني اروح انتي ليش اتعبين نفسج كالت لا اني رايحه حتى اشوف اخوج من البارحه ليوم ماشفته وهو مختفي كتلها براحتج ..
راحت ماما واني كملت تحضير السفرة واجى بابا وماما اجتي هي ومحمد اني كمت مااعرف اصرف واهرب من نظرات اهلي احسه الكل يعرف مشاعري
اجى محمد واول مرة بحياته تنازل وصالح بابا وبابا خطيه فرح وحضن محمد وبوسه وماما هم خطيه فرحت هواي ..
كعدنا على السفرة وصار محمد كبالي رفعت راسي شفته يباوعلي يمكن هذي اول مرة بعمرة يباوعلي مااعرفت شنو افسر نظرته معقوله متندم على كلامه وياي ..
مااعرف اكل احسه نفسي متقيدة ومتراقبه اكلت لكمتين وكمت عن الاكل ..
سويت جاي وراها هم كملوا لميت الاكل وصبيت الهم جاي بس بابا ماشرب كال تعبان اريد انام وراح وراحت ماما وراء اني ظليت بالمطبخ اغسل الماعين
لتفتت شفت محمد ورايه رادت الاماعين توكع من ايدي من الخرعه كال على كيفج شبيج نزلت راسي كتله لا مابيه كال اريد احجي وياج شي كتله اي تفضل واني احسه وجهي صار نارر كال تعالي لحديقه عود من اكملين حتى احجي وياج راح بدون ماينتظر  جواب مني غسلت الاماعين بسرعه وراحت بدلت ولبست دشداشه حمرة مخصرة من خصري وكلوش من تحت ولبست شال اسود وظليت واكفه باب المطبخ مترددة اطلع لو لا زين اذا شافنا بابا لو ماما والله عيب ردت ارجع ومااطلع بس قلبي ماقبل يعوف محبوبه منتظرة طلعت بسرعه واني مترددة والخوف يقرأ عندي الف ..
راحت وشفته كاعد  يم الشجرة شافني ونفخ قوي وستغفر الله وكال تعالي كعدي كعدت يمه كال شوفي الحجي الصبح لحجيته اريدج تنسيت لانج مو انتي المقصودة بي فتحت عيوني على وسعهن وكتله بدون وعي يعني انت ماتحبني عندك وحدة تحبها هو مسح وجه وكال اي هذا الكلام مو الج كتله لعد ليش هيج حجيت وياي كنت احجي ودموعي تسابق احسه مثل الخنجر ودخل لقلبي
جر نفس وكال كنت سكران شهكت حيل وكتله يعني انت تشرب كال لا بس مرتين شربت بيهن بس يعني هو هواي يعني ماافقد وعي كمت من مكاني واني اشهك ودموعي مااسيطر عليهن يعني صدمه وراء صدمه ردت اروح هو لزمني من ايدي وكال ليش تبجين شبيج ردت ماابين اله شي اريد ابقي شويه من كرامتي كتله لانك تشرب اكيد ماما من تعرف خاف اضوج وتتمرض من وراك جر نفس وكال لا تخافين ان شاء الله مايصير الها شي واصلا بعد مااشرب باوعت عليه وكتله انت شربت علمودها مسح وجه وكال اي علمودها كتله واني احسه الكلمه بعد ماتطلع من عندي ..
الله يجمعكم راحت وعفته واني ابجي واشهك راحت لغرفه واني ابجي يعني اني شلون غبيه طلع يحب وحدة واني واكعه على وجهي بحبه حبست نفسي بغرفه طول اليوم وسويت نفسي مريضه وماما كل ساعه تجي اشوفني حتى بابا ..
مااكدرت انام طول اليل واني افكر بله بشون احسن مني هذي حتى يحبها محمد شنو البيها واني ماعندي ويعني معقوله رافضته وماتقبل بي لذالك صاير بي هيج وزين محمد شنو جابه على شرب يعني طول عمره يخاف الله ويصلي حتى مافديوم شفنا منه تصرف مو حلو ..
كعدت الصبح واني ولا نايمه ولا دقيقه باليل عيوني وراسي يوجعني وجسمي مكسر شفت الساعه بال١٠ اكيد هسه محمد التحق لعسكريه افففف ليش افكر بي بعد ماكسر قلبي لازم انسى شنو تفكيري بس محصور على محمد شو عمري هسه ١٦ سنه وراح ادخل ال١٧ واني ماسويت شي بحياتي غير التفكير بمحمد حتى دراستي راحت من ايدي وكولش بحياتي مخربط لازم اصلحه لازم اصلح كولشي بايدي حتى قلبي اني اصلحه واجمع حطام نفسي من جديد ...
كمت غسلت وصليت وقررت اغير نفسي وشخصيتي اتمنيت من الله يقويني حتى انسى حب محمد ..
طبيت لمطبخ شفت بابا وماما كاعدين استغربت هيج وكت بابا بالشغل شعنده بالبيت ..
صبحت عليهم وماما بوستني وكالت البيت وحشه بدونج وبابا كال اذا مريضه كولي اوديج لدكتور كتله لا بابا بس اريد اطلب منج شي بمعزه ماما وبمعزه ماما سمر الله يرحمها اريدك اسوي اليه عقد حواجبه وباوعلي وكال كولي اذا اكدر اسوي الج قويت نفسي وكتله رجعني لدراسه خلي يكون عندي ضمان لمستقبلي باوعت لماما ارتسمت البسمه على شفايفها عكس بابا لنتفض وعصب وكال صرت مرة وينج وين الدراسه كتله يابه لا تكسر بيه خلي اكمل دراستي خلي يكون اليه ضمان لمستقبلي خلين اعيش مثل البنات واني بعدني صغيرة كال لا لا هز راسه وطلع اني كعدت على الكرسي وخليت ايدي على راسي وكمت ابجي كل ماتحاول اصلح شي يخرب ..
اجتي ماما وحضنتي وكالت ياعمري لا تبجين اني احجي وياه ابوج بلكت الله يقنع ...
حبست نفسي بالغرفه طول الاسبوع مااطلع الا ابويه يروح لشغل ماادري ليش اسوي هيج يعني علمود يحس بيه ويحن عليه او ردت اشوف وجودي يفرق عنده لو لا ..
مرن اسبوعين بالملل والضوجه كاعدين اني وماما واصلا ابويه من اسبوع راح لايران عنده شغل واليوم المفروض ينزل محمد من العسكريه وماما مخبوصه بي كل الاكل ليحبه تسوي هي دائما من ينزل محمد هيج اسوي بس هذا المرة اني تغيرة مو نفس الحماس اشتغل علمود محمد ولا رتبت نفسي حتى يشوفني حلوة لا تغيرت عبالك كاعده احاول بتصرفاتي هذي اطلع حب محمد من قلبي او اثبت اله اني مااحبه ....
يتبع