ترك بصماته على جسدي

البارت الثالث والعشرون من الجزء الثاني

عشق ...
باوعتله بشك وكتله مالك هذني الملابس مالت منو؟ اذا مالت مرتك ....
حك راسه وكال مالتج مو كتلج اني من زمان احبج فكنت كل مااسافر واتخيل هذني الملابس الج واشتريهن ....
اني ابتسمت وكتله شكرا ....
هو حضني وكلي العفو ياعمري هو اني شعندي غيرج احبج والله لا اشكين ولا لحظه بهذا الشي ....
كتله ان شاء الله مايجي يوم يخليني اشك بيك ...
هو ابتعد عندي وراح لكنتور ظل يبحث بي باوعتله كتله شسوي ؟ .....
طلعلي سيت مالت نوم لونه اسود يجننن بكل معنى الكلمه نازك لدرجه عبالك فستان .....
اخذته منه وراحت طبيت غسلت ....
ماادري اذا اني غلطانه او لا ....
يمكن اني غلطانه بس ردت اعيش حياتي ردت يصير عندي طفل يصيحلي ماما ....
ردت يصير عندي عائله انسان يحبني انام بحضنه واذب كل تعبي وراء ظهري ....
اي يمكن اني انانيه لو خاينه لان ماعفت مالك من عرفه هو اخو زوجي ....
بس اني ردت حياة هادئه .....
غسلت جسمي ونشفت شعري بس لاحظت شعري طولان ....
اني اتعودت دائما اكص شعري كل ماايطول ....
هذا الشي كان نذر بركبتي من يوم مااتوفى محمد كل مااطول شعري ماادام هو ميت تحت التراب ....
محمد دائما كان يتغزل بشعري ويحبه .....
لزمت المكص وكصيته ......
ماادري ليش دموعي كامن ينزلن وحدهن .....
مااجاي اخلص من ضميري احسه هذي الحياة مو اليه .....
انقطعت سلسله افكاري من سمعت صوت موبايل مالك .....
اقتربت من باب الحمام اريد اسمع شنو يحجي ....
كان صوته كولش ناصي ومبين عصبي كولش ....
حاولت اسمع مااكدرت اسمع شي ....
طلعت من الحمام .....
شفته كاعد على الجربايه ويحجي على الموبايل وطابك حواجبه ....
ومايحجي غير الله كريم ....
اجيت كعدت على الجربايه هو نهى المكالمه ...
وكال ارووووح فدوة لمرتي الحلوة يابه شنو هذي القشطه ....
اني ابتسمت بخجل وكتله منو خابرك ؟ ....
هو طبك حواجبه وجرني لحظنه نمت على صدره وكلي الطركاعه زينب ....
اني راسن عدلت كعدتي وكتله ليش شنو تريد ؟ ....
هو ابتسم واقترب مني وهمس يم اذاني وكلي اروح فدوة ليغار ....

اني حسيته يريد يغير الموضوعه وكتله مالك انت مااطلكت زينب ؟ .....
هو نفخ وكلي عوفي هسه هذي الجلبه وتعالي لحظني ....
تر والله محروك ابويه صالي اسبوع محروم من هذا العسل .....
كتله بشك مالك اني مااصار اليه يومين من طارحه خاف مو زين تقتربلي .....
هو كلي عمري اني سئلتها لدكتورة يعني خما أذي روحي ......
اني ظليت ساكته هو كام يتلمس شعري وعو طابك حواجبه كلي ليش كاصه شعرج ؟ ....
اني اتوترت وخفت حسيت قلبي راد يوكف كتله مو مو اني احب الشعر القصير لان الشعر الطويل يختكني .....
هو اقترب عليه وكلي بعد كصي شعرج حتى اكص راسج ....
اني هزيت راسي وكتله اييي مااكصه بعد ....
مااحسيت الا هجم على شفايفي وكام يبوس بيه بقوة ....
خلى ايده وراء راسي وكام يقرب جسمه على جسمي ...
وايده الثانيه كانت تتلمس بجسمي ....
اني حسيت نفسي اختنكت كمت اضرب بظهره حتى يبتعد عني ....
ابتعد عني واني صرت اتنفس بلكوه اقترب عليه ...
وهمس يم اذاني وكلي ....
عشق احبج واحب كل تفاصيلج احب كل شبر بجسمج .....
انتي تحبيني ؟ .....
كان يباوع بعيوني وعبالك يكولي انتي اليه لا تفكيرين بااحد غيري ....
اني ابتسمت وهزيت راسي .....
هو اقترب عليه وباسني من ركبتي وانفاسه الحارة خلت جسمي يرجف .....
وووووووو...
كعدت الصبح شفت نفسي نايمه بحضن مالك ....
ظلت صافنه على ملامحه وحتى وهو نايم مبين عصبي .....
هههه ماادري شجاي يحلم وطابك حواجبه ...
شفت وشم على صدره رسم مالت ذئب فاتح حلكه ماادري شكله يخوف ....
كنت صافنه بالوشم وفزيت على ايده على ظهري ....
هو فتح عيونه وابتسم ...
كلي معقوله مرتي تخاف وهي بحضني ....
اني ابتسمت وكتله كنت صافنه على هذا الوشم ....
هو ضحك وكلي هذا اول وشم اليه وشمته بالسادس اعدادي .....
كتله بس شكله يخوف
هو ضحك وكلي عجبني واصدقائي كانوا يصيحولي الذيب لذالك سويته ....
كتله ليش يصيحولك هيج ؟ ....
كال اليه لان اشي شغله اخليها بالي اسويها وهم ماافد يوم دخلت بشغل ومااعرفت شلون ادبره ....
اني رفعت حاجبي وكتله اعتبر هذا الشي غرور ؟ ...
هو ضحك وجرني من ايدي وخلاني بحظنه وكلي انغر وياه العالم كوله بس وياج لا ....
اني ابتسمت وكتله اصلا احسك مو مغرور ....
هو ضحك وحك راسه وكال كومي بدلي خلي نطلع ...
كتله بستغراب وين نطلع الساعه بال١ الظهر ....
كال نطلع نفتر بالمول لان باجر اداوم وانتي تبقين محبوسه خلي شويه نغير جوى .....
اني فرحت وكتله مالك خلي نروح نزور الامام الكاظم عليه السلام ولا مرة راحت زرت ....
كلي ميخالف شكو بيها ....
كومي بدلي ....
كتله اوك ....
راحت راكضت طبيت غسلت وطلعت شفته ماموجود بالغرفه ....
طلعت بنطرون اسود وقميص لونه ماروني ضيك من الصدر وكلوش من تحت ...
كولش حلو ولبست شال اسود ....
شفت اكو علبه مكياج خليت حمرة شويه وشويه محمر خدود ....
وكحله برزت لون عيوني العسلي .....
اخذت جنطه ونزلت كان البيت هدوء لان هم الظهر ينامون .....
ظليت ادور على مالك ماكو ...
طلعت بره بالطرمه شفته مبدل وكاشخ على اخر حبه ...
واكف يم السيارة ...
اقتربت منه ظل يباوعلي من فوك ليجوى ....
طبك حواجبه وكلي ملابسج ضيكه وشنو هذا المكياج رايحه لعرس ؟ ....
كتله ملابسي عريضه وحتى مكياج مو هواي خاله هي بس حمرة وكحله ....
غير مزوجه واخلي مكياج ....
بين عليه ضاج وكلي لا حبيبتي اني مااحب المكياج واحب بنيه تطلع وياه بلبس محترم اني رجال معروف واهل المنطقه كلها تعرفني ....
واني مااحب احد يباوع على مرتي وحبيبتي ....
كتله بضوجه مالك الله يخليك والله مابيه حيل ارجع ابدل وحتى اتاخرنا شوف الساعه صارت بال٢ ونص ....
كلي بعصبيه يلله صعدي .....
اول مااصعدت فرحانه اقترب عليه وكعد يمسح بالمكياج ....
يابه والله حسيت بدل جلد وجهي من كثر المسح ....
ظليت ضايجه منه
بس ظليت ساكته هو هم ظل ساكت وبعدين كسر سكوتنا .....
وشغل اغنيه مالت تامر حسني كولش حلوة ....
ظل يدندن وياها كان صوته رجولي وخشن بمعنى الكلمه .....
ظليت صافنه بالطريق افكر بكولشي جاي يصير وياي يعني معقوله هاهيه حياتي راح تستقر ؟ ....
معقوله راح اخلص من السواد الموجود بحياتي ؟ ....
قطع سلسله افكاري على وكفه السيارة ....
باوعت لمالك كلي حبيبتي نزلي بس اروح اوكف السيارة واجي ....
اني هزيت راسي راحت نزلت وهو حرك السيارة ....
ظليت صافنه على العالم والعوائل والجهال شلون يركضون منا ومنا .....
فزيت على مالك لزم ايدي ....
كلي وين صافن الحلو ؟ ....
اني ابتسمت وكتله على الجهال اكلك مالك انت مااضجت من طرحت ؟ .....
هو صفن شويه وكلي بعد هو قسمه ونصيب شسوي قابل .....
ظلينا نمشي حتى نوصل لضريح الامام كان الطريق حلو صح هواي ناس وشويه هوسه ....
بس حلو عالم اول مرة بحياتي اشوفه ....
كان مالك لزم ايدي حيل اشترالي عبايه ....
لبستها ....
طبعا استغربت اهنا مو الكل لبس عبايه يعني نادرا اشوف وحده لبسه عبايه ...
احنا هناك بالنجف اصلا البنيه من عمرها ٩ سنوات لازم تلبس عبايه .......
ماادري كل محافظه وتقاليدها مختلفه عن الثانيه ....
بس هو الستر ماله دخل اذا لبنيه لبست عبايه او لا ...
عمره البس ماكان مقياس لشرف لو لثقافه ....
بس مع الاسف هذني الايام صاير كولشي بالعكس ...
حتى صرنا نحكم على الانسان من ملابسه لو فلوسه ...
صرنا نحترم الانسان لعنده فلوس ونذل الفقير ....
صح مو الكل الله يرحم بابا على الرغم طبعه القاسي ...
بس اصدقائه كلهم كانوا عمال يشتغلون عنده ...
دائما يكول هذولي صداقتهم حقيقيه مو تخلص من تخلص الفلوس .....
قبل لا ندخل لامام باوعلي مالك وكلي اكولج تعالي قبل لا ندخل لامام اكو صديقي اهنا نشوفه وندخل ....
كتله ميخالف ...
دخلنا لمحل صايغ مالت ذهب والرجل فعلا صديقه لمالك ظل يسلم عليه ....
وراح جاب النا عصير .....
ظلوا يسولفون ماادري عن شنو بس اتوقع عن شراكه ....
صديق مالك كان يحاول يقنع مالك علمود يشاركه بمحل ماادري ايش ....
المهم مالك كله اريد حلقه ومحبس لام اسد .....
اني ظليت اباوع عليه بصدمه هذي منو ام اسد ؟ ....
كله الصايغ عمي بالخير عليك على الاقل اعزمنا كول ازوجت بالصدفه يعني نعرف بيك طاك الثانيه ......
مالك ضحك وكال والله ياخويه هي السالفه صارت بسرعه ....
بس والله احلى عزيمخ لعيونكم .....
كال اله الصايغ والله كفو منك ابو اسد ندري مااتقصر انت ابو الخير ماافد يوم واحد طلب منك شي ومااسويته .....
طلع الرجال انواع المحابس والحلقات يجنن ....
لزمني مالك من ايدي وكلي تعالي ام اسد اختاري شنو يعجبج اخذي ....
اني ابتسمت يعني اني ام اسد .....
ماادري ليش ردت ابجي والله العظيم حسيت دموعي رادت توكع من يعيوني ....
حسيت بفرحه خلت قلبي يرجف ..
شكد مااكانت هذي الكلمه بسيطه وماتسوى بس خلتنا اطير من الفرحه .....
ابتسمت وكتله بكيفك ....
هو اقترب مني وهمس يم اذاني وكال اليه حبيبتي لا تستحين اختاري شنو يعجبج ......
ظليت اباوع على المحابس كلهن حلوات احتاريت شنو اختار .....
هو من شافن حايرة كال اختار الج اني ....
باوعتله وكتله اي ....
اختار اليه محيس يجنن ونازك وحلقه هم حلوة .....
واخذلي اكلادة مالت اية الكرسي ......
دفع اله مالك وطلعنا من المحل دخلنا لامام ...
اني راحت فتشت وياه النسوان وهم راح يسلم الموبايل ....
دخلت الامام الكاظم عليه السلام ظليت اندعلي لامي ولغرام ولنور .....
ظليت ابجي واندعي لامي بالصحه والعافيه ....
واندعيت الله يكعد حظي اني وغرام ونور ....
اندعيت الله كون ينور قبر محمد وينزل عليه الرحمه والمغفرة .....
فزيت على احد خلى ايده على ظهري ....
التفت شفت مالك كتله اتاخرت وينك .....
كلي حبيبتي ازدحام خفت عليج خاف اتهين .....
طلع الحلقه والمحبس ولزم ايدي ولبسهن اليه ....
اني اهنا بهذي الحظه مااسيطرت على دموعي وكمت ابجي ....
هو مسح دموعي وكلي ياروحي لا تبجين هذني اقل شي اقدمهن الج انتي اساوين الدنيا كلها .....
اني مسحت دموعي وكتله مالك اني اشكرك اني طول عمري اتمنى اصير اليه هذي الفرحه ....
بعدني مااكملت كلامي قاطعني ........
وكلي انتي تستحقين كل فرحه بهذي الدنيا ....
اني لو عليه حتى روحي انطيها الج ....
ضربته خفيف على صدره وكتله خاف هذا بس حجي وبعد يومين ترجع مالك العصبي وتضربني ......
هو ضحك ولزمني من ايدي ومشى ....
طبيت زرت ودخلت لمرقد الامام وهناك شكد بجيت ......
طلعت قهر السنين وكعدت اندعي الاهلي ......
صليت وكملت وطلعت شفت مالك يعد يزور .....
كعدت بنفس المكان لتفقنا عليه .....
كاعده اسبح شفت شيخ كاعد والنسوان تسئل بي ....
راحت يمه انتظرت منا لمن النسوان راحن وكتله سيد اني اريد اموت من ضميري لا ليلي ليل ولا نعاري نهار ...
التفكير اكل راسي .....
ظليت ابجي وكتله والله تعبت سيد بلكت اشوفلي حل .....
كال اليه خير بنتي شبيج ؟ ....
باوعت ورايه خاف مالك اجى بس الحمدالله مااجاي ...
كتله سيد اني اتوفى زوجي قبل زواجنا بااسبوع وبقيت بدون زواج ***** .....
ماافكرت ازوج وراء لان احبه بس صارت ظروف خلتني غصب عني ازوج ...
بعدين عرفت انو الزوجته اخو زوجي بس مااكنت اعرف لان مااكانت عدنا علاقه بيهن ...
واني ياسيد مااكدر انام باليل احسه زوجي الاول غاضب عليه لان ازوجت اخو .....
والله ياسيد افكر ليل ونهار بي .....
كلي بابا زواجج مو حرام من اخو زوجج وحرام اتفكرين بغير زوجج يعتبر زنا وهذا الشي يغضب الله ....
بابا فكري بحياتج وانسي الماضي وانتي شمدريج انو زوجج الاول الله يرحمه غاضب عليج يمكن فرح انو كملتي حياتج ......
وانتي هم مااقصرتي وراح نص عمرج مخلصه اله ....
اقري اله القراءن صلي اله وان شاء الله ماكو الا الخير ....
كتله تسلم الله ينطيك العافيه ......
اشكرت منه وراحت لمكان كعدت شويه واجى مالك ....
كان طابك حواجبه كتله شبيك ؟ ...
كال ماكو شي بس راسي كام يوجعني من الهوسه ....
كتله تريد نروح ؟ ....
كال يله اذا كملتي امشي نروح ...
شلت غراضي وطلعنا ....
مرينا بالمول اشترينا شكم حاجه وكتله خلي نشتري شي لاهلك مااقبل .....
مرينا بالمطعم كعدنا ناكل .....
وهم راحنا لمكتبه اشترينا ملازم اليه .....
وبعدها صارت الساعه بال١٠ باليل رجعنا ....
راجعنا لبيت شفت اخوان مالك كاعدين بالباب ونركيله وحب وجكاير ......
اني سلمت ودخلت ومالك ظل واكف بره ....
واسمعه يرزل بيهم وانتوا فاشلين نسوان اني اشتغل واجيب الكم مابيكم خير تفووو عليكم وعلى الخلفكم .....
اني دخلت مااسمعت بعد شي ....
رادت اصعد لغرفتي شفت عمتي وبناتها كاعدات بالصاله ....
اني سلمت عليهن ولا وحده ردت وسمعت عمتي كالت الغسل اجتي البومه .....
اني سكتت وصعدت يعني شنو اسوي الها ماادري ليش تكرهني .....
مااهتميت الها ولا راح اخليها تكسر فرحتي اليوم ....
صعدت لغرفتي اتفاجئت مكلوبه كراب الهدوم مطشرة .....
وغراضي مكسرة .....
كمت اعزل بالغرفه واستغفر الله ....
يعني ماادري ليش هيج يسون عبالك اني عدوة الهن ....
يعني والله ماادري اني شنو مسويه الهن حتى هيج يكرهني .....
عزلت الغرفه على السريع وكلت باجر عود انظفها ....
اخذت سيت نوم لونه وردي فاتح ويكون قصير وداخلت اغسل .....
طلعت من الحمام نشفت شعري وكعدت اجهز جنطه مالك لان باجر يرجع لدوام .....
داخل مالك باسني من ظهري وكلي حبي طلعيلي ملابس اريد اغسل ...
كتله ميخالف هسه ...
طلعتله ملابس وجهزت اله الحمام هو طب يغسل ....
واني كمت اعزل شويه بالهوسه مالت الغرف .....
طلع من الحمام لزمني من ايدي وكلي تعوفي الغرفه هسه تعالي نامي بحظن حبيبج ....
جرني بحظنه وحظني قوي وكلي حبيبتي اني حجيت وياه مدرسات يجن يقرنج بالبيت ...
اريدج اشدين حيلج ....
اني فرحت وكتله باجر يجن ؟ .....
كلي اي حبي باجر الساعه بال١ تجي ام العربي ....
كتله بس خاف عمتي ماتقبل ....
هو طبك حواجبه وكال وهي هذي شعليها واني حجيت وياها معليج ......
باوعتله وشكرا مااعرف شلون اشكرج على كل هذا ....
باوعلي بحبث وكلي اني اعرف شلون ....
اقترب على شفايفي وكام يبوس بيه بكل رقه ....
حسسني اني اميرة بين ايده .....
وووووو
كعدت الصبح شفته مكانه فارغ ليش ماكعدني قبل مايروح ....
واني شجاني حتى مااحسيت بي من راح .....
كمت شفت الساعه بال١٢ ونص .....
راحت غسلت وبدلت ونزلت واخذت كتب العربي وياي ...
نص ساعه وصدك اجتي المدرسه مرة جبيرة بالعمر ....
وتدريسها يجننن .....
ظلت اتقريني لحد الساعه بال٤ وراحت ...
كان البيت هدوء لان نايمين اني هم اول مااراحت اخذت غراضي وصعدت .....
ظليت اقرء واراجع المواد القريتهن قبل لحد الساعه بال١٠ باليل ...
متت من الجوع بس مانزلت طلعت جبس ونساتل اكلتهن ....
ظليت ادور على الموبايل مالتي اخابر مالك بس مااكو ....
كعدت ادور بالغرفه ماكو مرتين عزلتها بس ماكو فص ملح وذاب ....
نزلت جوى بالغرفه الكنت بيها ودورته بس هم ماكو ....
بس لكيت الموبايل لطينيا نور من شردت ...
ذاك الموبايل بدايه زواجي من مالك اشترى اليه ....
اخذت موبايلي القديم وصعدت بغرفتي دكيت على مالك مااجاوبني ...
قفله وهو رجع اتصل عليه ....
ظلينا نحجي شويه وبعدين صار عنده واجب وراح ...
مرت الايام واني مشغوله بقرايتي كان الوقت يركض راكض ....
عمتي وبناتها ابدا مازعجني واصلا مايجن وياي وهذا الشي ريحني هواي ...
وكنت اخذ ثلاث محاضرات باليوم ومرت اربعه وكنت اسهر اليل كوله واقرء .....
اما مالك كنا كل يوم نحجي بس مايطول وياي يكولي روحي اقري ارفعي راسي ...
بس هو اتاخر هواي كل اسبوع اكول هسه يجي ماكو مايرجع منا لمن مر شهر ....
قبل يوم من امتحاناتي كال باجر ارجع ......
اني صح طول هذا الشهر اقرء بس ماكنت مكمله المواد كلهن .....
ذبيت روحي على القرايه بس خايفه لان مو كل الكتب مكملتهن ......
ثاني يوم من الصبح اجى مالك كنت مجهزه اله الحمام وملابسه . ..
اصلا كنت مانايمه لوجه الصبح كنت اقرء هو حتى من اجى وشافني كاعدة اتفاجئ .....
اجى حظني وباسني كلي مشتاقلج عمري ....
اني ابتسمت وكتله اني هم ....
روح طب اغسل على ما اسوي الك ريوك ....
طب غسل واني راحت سويت اله ريوك .....
وصعدته لغرفتنا ....
كان بعده مااطالع من الحمام اخذت جنطته وطلعت منها الملابس الوسخه وباقي ملابسه عزلتهن ...
طلع من الحمام لبس بس البجامه ....
ظليت اباوع على عضلاته ماشاء الله ....
هو انتبه عليه واقترب مني ولزمني من خصري ودحس راسه بركبتي .....
ظل دقائق بهذي الوضعيه حسيته نام كتله بصوت ناصي مالك نمت ؟ ....
هو رفع راسه كلي لا كاعد بس تعبان ....
كتله سلامته تعال اكل ونام ...
لزمني من ايدي وكلي تعالي اكلي وياي ....
كتله لا مااريد مااشتهي ...
كلي ميخالف تعالي يمي مشتاقتلج...
كعدت يمه وهو ياكل باوعلي كلي ليش هيج ضعفانه؟ شبيج خما مريضه حبيبتي ؟ ....
هزيت راسي وكتله لا مو مريضه بس خايفه باجر امتحاناتي واني بعدني ماامكمله الكتب .....
هو ضحك وكال لا تخافين عود اني اوصي المراقبين يساعدوج ......
هزيت راسي بشك ....
كمل اكله اخذت الاماعين غسلتهن وصعدت ردت اخذ كتبي واطلع اقرء حتى لا ازعجه لان تعبان .....
مااقبل كلي تعالي نامي مااشوفين حالج .....
مااقبلت كتله ماالحك اريد اكمل ....
هو مالح عليه ....
طفيت الضوء وطلعت نزلت جوى بغرفتي الكنت كاعده بيها قبل اقرء لحد الساعه بال١١ ونص كعدت عمتي والبنات واما اخوان مالك صار الهم اسبوع من سافروا لاربيل علمود شغل ماادري عن شنو .....
لحد مااسمعت موبايل يدك جزى المخدة شلت المخدة وشفت موبايلي القديم يدك ....
طبكت حواجبي لان موبايلي صار اله شهر او اكثر من مختفي .....
وهذا الرقم غريب يدك عليه ...
فتحت الخط خفت خاف واحد من اهلي .....
اول ماافتحت الخط واسمع صوت رجال ....
كلت منو ؟ ....
هو جاوبني شنو منو حبيبتي اني جاسم حبيبج ....
شبيج شنو اكو احد يمج ....
اني راسن قفلت الجهاز وايدي ترجف ....
فتحت سجل المكالمات كانن كومه مكالمات من هذا الرقم وفوكاها من موبايلي ماكو اتصال وياه .....
كام جسمي يرجف حتى بالكوه صرت اتنفس ...
مااحس غير انسحب الموبايل من ايدي ...
باوعت شفت اخت مالك الجبيرة سهام جرت الموبايل من ايدي ....
اني راسن وكفت رادت اخذ الموبايل من ايدها بس هي رافعت حاجبها وظلت اكلب بالموبايل ....
اني جسمي كام يرجف ....
فتحت عيونها على وسعهن واخذت الموبايل وراحت تركض واصيح يمه تعالي شوفي هذي ال******* شنو مسويه .....
اني طلعت امشي وراها اسحل بروحي كنت اسحل بروحي سحل من الخوف ....
شفت عمتي لزمت الموبايل وظلت اكلب بي وتلطم على صدرها ......
كتلها بصوت يرجف عمه والله مو اني شعليه اصلا مااعرفه هذا الاتصال على الموبايل ولا شايفته ولا اعرفه بحياتي
سهام ... لج كلبه ليش اجذبين اني شفتج اتخابرين بي حتى مرة اني وزينب شفنها لزمته وتخابر بي وتحجي بصوت ناصي وكلنها هي ويامن تحجين هي كامن اصيح علينا وكالت لا تدخلن لا اكول لمالك ويكتلجن واحنا سكتنا مو زينب ؟؟
زينب ... اي والله يوم اكثر من مرة شفتها تخابر بي ونسكت ونكول خطيه بس هسه زاد الامر عن حده واحنا ماانقبل مالك يصير زوج والناس تحجي عليه
عشق .. والله عمه وروح ابويه اني مااحاجيه وياه احد ولا مخابرة احد والله جذابات
ليلى ... لج تكولين على بناتي جذابات خلي يجي مالك وهو يعرف يصرف وياج واحده جاهله ومتخلفه مثلج اجذب بناتي اصلا من اول يوم اجتي بي واني اكول انتي مو راحه مسويه روحج فقيرة والقط ياكل عشاج...
طلعتي من جوى لجوى ....
عشق ... عمه والله ماادخلني والله هذا الجهاز مو اليه الله يخليج لا تكولين لمالك والله يموتني واني مااليه ذنب ...
دنكت على رجليها واتوسل بيها وابجي وهي ولا كأن هذا الشي اثر بيها دفعتني على رجليها وكفت بنص البيت اصيح حتى اسمعهم كلهم واني فرطت من البجي
_________________________________________
غرام ..... والله ياقاسم اصير خطيتي بركبتك ....
هو ضحك بستهزء وكال شبيج غرام تر حجيج مالت زعاطيط يعني يمت اكبرين كوليلي ؟ ....
اني كمت ابجي بحركه هزيت راسي وكتله قاسم اني شنو مسويه الك وهيج اتعذبني ليش هيج اسوي بيه ليش مااتعةفني بحالي ؟ والله تعبت والله ضاع شبابي وحيلي من وراك ليش هيج اسوي بيه ....
قاسم ابوس ايدك عوفني والله تعبت من ظلمك ...
هو طبك حواجبه وكال ياظلم غرام يااظلم اني شنو مسوي بيج ماتكوليلي ؟ شو الف وحده تتمنى حياتج هذي وانتي مااعاجبج !! ....
كتله اني مو مثل هذني الالف اني مااريد حياتي وياك اني كل يوم يمر عايشة بعذاب ....
والله وصل بيه الحال ادعي على نفسي حتى اموت واخلص ....
كولي ياوحده تتحمل مريه تجي وتكول اني زوجه زوجج ....
وحامل ...
ياوحدة تتحمل ؟؟؟؟
يارتني مقصرة بشي شو اركض من الصبح ليل علمودك وعلمود جهالك وبالاخير تطلع مزوج عليه وحده .....
ليش قاسم اني شنو مسويه الك وهيج اتعذبني ؟ ...
باوعلي وكلي اني مااجاي اعذبج بس انتي عقليتج مو مثل عقليتي ....
اكولج الف اكوليلي باء ....
انتي رضيتي بحياتنا اني ردت اعوفج وردت اطلكج وانتي مااقبلتي تذكرين لو اذكرج من كمتي تتوسلين بيه .....
غرام انتي اختاريتي حياتج اني مااجبرتج ردت اعوفج بس انتي ربطتني بثلاث جهال وهسه تريدين تطلكين !! .....
مااكدر خلي يكون بعلمج مااكدر اعوف جهالي تريدين انتي تطلقين ميخالف اطلكج بس الجهال تحلمين اشوفيهم .....
اني لزمت ايده وكتله قاسم انت جاي اخليني بختيار صعب شلون اعوف جهالي .....
قاسم اني مستعدة انطيك كل فلوسي وحلالي بس انطيني الجهال ....
ابوس ايدك قاسم انت هسه مزوج وراح يصير عندك طفل واني هم مااحرمك منهم كل اسبوع اخذهم وشوفهم .....
كالي لا مستحيل انتي شنو شايفتني ميت على الفلوس لو على حلالج تر جوى حذائي .....
اني هذولي جهالي اغلى من كنوز الدنيا ماايتقارنون بفلوس الدنيا .....
طلع هذا الشي من بالج الجلي تفكرين بي مستحيل يصير افتهمتي ؟ .......
كتله خلاص مثل ماانت مااتقبل بهذا الشي لعد اريد اطلب شي منك واتوقع هذا الشي مو مستحيل عندك ....
رفع حاجبه وكال احجي شنو ؟ ....
كتله بما انو انت ازوجت اني مااريدك بعد بحياتي اني اعيش اهنا اني وجهالي بس مااريد اشوفك بهذي الشقه ابدا وتحرم عليه ليوم الدين ....
هو ضحك بستهزء وكال يله على ساس مشبعتني ليل ونهار .....
وشلون ماادخل الشقه وجهالي؟ .....
كتله معليه تعالي شوفهم من الباب لو اخذهم نهار كامل بس مااطب هنا لو والله العظيم ياقاسم لو احرك روحي هسه لو اخذ جهالي واشرد وماتعرف النا طريق ......
هو ضحك وكال هسه لو جوى الكاع هم اطلعج بس يله ميخالف المهم تبقين كدام عيوني انتي والجهال وقابل اني وين راح اروح بصفكم وبعد شتريدين ست غرام ؟.....
كتله اريد اطلع واطب براحتي ماتتحكم بيه .....
هو رفع حاجبه وكال هلووووو ام الطلعات خوش والله ......
وين اطلعين ؟ .....
كتله بنرفزة اطلع اي مكان يعجبني ماتتحكم بيه عندك ذيج مرتك عود اتحكم بيها .....
كلي شوفي غرام لا عبالج تلزميني من ايدي التوجعني ولا عبالج راح اوافق لان خايف منج ....
لا اني اوافق لان اريد احافظ على جهالي ومااريدهم يشتتون .....
اطلعين ميخالف بس بمزاجي بوقت مايعجبني افتهمتي يعني مااتمشين كلامج عليه .....
اني سكتت ودرت وجهي بغضب ......
كلي تريدين شي بعد ست غرام ؟ .....
كتله اخذ غراضك مااريد اشوفهن وها اريد ٥٠٠ الف بالشهر مصرف اليه ولجهالك وكل اسبوع اريد مسواك يوصل لباب بيتي .....
هو ضحك وكلي ٥٠٠ !!! يابه شسوين بيهن ؟؟
كتله معليك مصرف اليه والجهالك ....
كلي ميخالف وبعد ؟؟.....
واريد اسجل هذي الشقه بااسمي
كلي شنووو؟ ...
كتله مثل مااسمعت واتوقع هذا الشي مو صعب عليك عندك فلوس ماياكلها النار انطيني هذي الشقه ضمان اليه ولجهالي ....
اقترب عليه وكلي هسه صاروا جهالج صار الج ساعه اصيحين جهالك وجهالك .....
وانتي لو بيج خير تاخذين فلوسج من نور لو بس كادرة عليه ادورين ضمان .....
كتله نور اختي ومااتاكل فلوسي .....
هو ضحك بستهزء وكلي اي مو انتي نايمه ورجليج بالشمس مااتدرين نور باعت البيت وهسه هي وعمتي راحن كعدن بغير بيت بمنطقه ******* .......
اني ظليت بصدمه يمت !!!؟
كال قبل اسبوع .....
سويت نفسي مامهتمه وكتله اي عادي واذا اختي وتحفظ حقي لو هسه اعوف روحي يمها هم تحافظ عليها .....
هو رفع حاجبه وكال عمي والله لو حاجيه هذا الحجي لغيري كان صدكت بس اني اعرفج بويه مااتقشمرين بس يله راح اعديها بمزاجي ....
اني سكتت وبعدين كتله يله يمت اتحول الشقه بااسمي .....
هو ضحك وكال هو اصلا هذي الشقه باسم محمد ....
كتله ها زين ....
كال يله اخرتني وبعد شتريدين ؟؟؟.....
كتله اريد موبايل ....
اندار لبس ساعته وكلي شسوين بي ؟ ....
كتله اخابر اهلي يعني شسوي بي ابنك عمره سبع سنوات وعنده ايباد بكد راسه واني مرة شكبرني مااعندي ....
كلي عود ميخالف اشتريلج خلي انشوف اخرتها وياج ......
اخذ غراضه وطلع واني طلعت جنطه كولش جبيرة وكعدت انزل غراضه من الكنتور واعزلهن بالجنطه ....
مااتحملت وذبيت الملابس بالكاع وكعدت ابجي انقهرت على حالي وعلى حياتي .....
كاعدة اعزل ملابس زوجي حتى يروح يعيش يم مرته الثانيه ...
كرهت نفسي لاني ضعيفه لان مااوكفت بوجه ابويه وكتله لا مااريده ...
ولو شفيد وياه الحجي كان ظالم ....
مااكدرت اعوف جهالي قطعه من روحي شلون اعوفهم ......
طول حياتي اتحملت قاسم علمودهم .....
طول حياتي اركض وراهم واراقبهم خطوة لخطوة حتى يكبرون واشوفهم كام عيني شباب يرفعون راسي .....
اني اتحمل علمودهم حتى بعد يومين من يكبرون ماايحجون عليه ويكولون امي عافتنا وقصرت بحقنا ....
مااريد اعيش طول حياتي بهذا الذنب ...
مستحيل افضل اعيش حياتي على حساب حياة جهالي ...
مستحيل اصير انانيه ....
اتعودت على خيانه قاسم اتعودت على الخذلان والذل منه .....
على الاقل يبقى بعد عني واخلص من شره ...
ماانكر اني جنت مقهورة الف سؤال بالي ...
ليش سواء بيه هيج ؟ ليش ازوج عليه ؟ ....
اني بشنو مقصرة وياه ؟ صح كنا نمر بمشاكل بس ولا يوم قصرت وياه بشي ....
معقوله سهر احسن مني !!
بشنو شنو فرقها عني ؟ ....
هواي اسئله ادور بالي ازيد بقهري اضعاف واضعاف ....
لميت غراضه كلهن من الغرفه عطورة ملابسه ساعاته كولشي ....
مااعفت شي اله ....
الاغلب يكول ليش مااحاربت علموده ليش سلمته لذيج طبق من فضه ....
السبب اني طابت نفسي منه حياتي وشبابي ضاعن كلهن بخدمته ....
وبالاخير يكافئني بخيانته وزواجه من غيري ....
هو اني اصلا مو بعينه ولا شايلني من ارضي ...
ليش اضل اركض وراء ....
يعني شنو يتوقع مني اظل اتعارك عليه ليش هو منو ؟ ....
قررت التفت لحياتي ولجهالي وانسى هو موجود بحياتي .....
طلعت الجنطه شفت الجهال لزمين الايباد ويلعبون ....
خليت الجنطه يم الباب وباوعتلهم كتلهم ليش ماانايمين ؟؟ .....
يله انطوني الاجهزة وناموا اليل كوله كاعدين تقرون ناموا هسه بما انو خلصت الامتحانات .....
كانوا تعبانين ونعسانين راسن سمعوا الكلام وراحوا ناموا .....
اني هم ارتاحيت من هوستهم عزلت البيت .....
وكعدت على التلفزيون ......
كعدت افكر يعني معقوله نور باعت البيت شو مااكالت اليه .....
زين امي شلون اقتنعت وطلعت من البيت اذكر اكثر من مرة كال الها قاسم خلي نبيع البيت وهي مااقبلت تطلع من البيت ....
ماادري بعد ....
نمت ساعه كعدت تقريبا الساعه بال٤ ونص .....
راحت لغرفه الجهال شفتهم نايمين ......
كلت خطيه خلي اسوي الهم كيكه وفطائر صار الهم هواي يلحون عليه اسويهن الهم ...
التهت بالمطبخ لحد الساعه بال٧ كمت وصار الدنيا مغرب غسلت وصليت وراحت كعدت الجهال ....
كعدنا نتعشى وياعمري شكد فرحوا بالكيكه عبالك عدهم عيد ....
على الرغم قاسم دائما يشتري الهم ماامقصر وياهم بشي بس هم يحبون مالت البيت واني دائما مشغوله مااسوي الهم ....
كملنا عشاء وكفت نهى وملك يغسلن الاماعين .....
وفدوة محمد واكف يساعدهن ويمسح الكاونتر ....
اني دائما اعلمهم على التعاون ومااسوي تفرقه بينهم ....
وقاسم اغلب الوقت بره البيت ماايعرف عنهم شي ....
كمت مسحت الشقه وسويت بوشار وكعدنا على فلم ...
شويه واندك الباب عرفت من الدكه هذا قاسم ...
باوعت لحمودي وكتله كوم ماما افتح الباب هذا ابوك ....
كام يركض لباب اني لبست شالي لان عرفه راح يدخل ....
وفعلا جره حمودي ويسولف اله ماما هيج سوت ماما سوتنا شاميه وكيكه ......
هو من دخل وشافني لبسه شال رافع حاجبه بنزعاج ....
سلم وكعد كدامي قدملي كارتونه مالت موبايل ...
اخذتها منه ....
باوعلي وكلي هذني ٦٠٠ الف خليهن مصرف الكم الان احتمال باجر الصبح اسافر واطول اهناك اسبوعين ....
واذا تريدين اطلعين اكو رقم بالموبايل مالت بأسم ابو عيسى رجال جبير واثق منه ...
هو يجي ياخذج ويرجعج واي شي تحتاجين خابريني لو خابري .....
اني هزيت راسي بمعنى اي ...
هو جر نفس قوي وكال غرام لا اكسرين الثقه انطيتها الج .....
قسم بالله لو اشتمين خبر انو طالعه بدون ماتكولين اليه اذبحج والله ....
كتله مااكو داعي لهذا الحجي وهذي الجنطه بيها غراضك .....
ودع الجهال وانطى كل واحد ١٠ الف واخذ الجنطه وطلع .....
خليت الموبايل على الشحن كنت طايرة بي يخبل وجديد ....
ضميت الفلوس وراحت اني والجهال انشوف فلم بقينا لوجه الصبح مساهرين .......
لحد الساعه بال١ نمنا .......
اللله يمكن هذي احلى نومه نمتها محد يزعجني محد يكعدني .....
بقيت نايمه لحد الساعه بال١٢ .....
كعدت شبعانه نوم اول مرة بحياتي انام لهذا الوكت ....
كنت قبل عطله لو مو عطله لازم اكعد من ٦ علمود اجهز الغداء والريوك لقاسم ولازم انظف البيت واسوي كولشي على احسن وجه ....
وحتى كلمه شكرا مااكو ......
طلعت غسلت وجهي ومريت لغرفه الجهال شفتهم نايمين بس حمودي ...
كاعد يلعب بالايباد ......
طبعا محمد مثل طبع ابو لازم يكعد من وكت حتى لو ساهر .....
راحت بسته من راسه ولزمته من ايده واخذته لمطبخ ....
كتله ها ياعمري جوعان ؟؟ ...
كلي ماما خفت عليج
كتله ليش حبيبي ؟
كال ماما ظليتي نايمه هوايه وخفت عليج ...
اني ضحكت وكتله حبيبي غير نعسانه تريد اسوي الك اكل ؟ ...
هز راسه بمعنى اي ....
كنت واكفه اسوي ريوك لحمودي واسمع صوت عياط سهر .....
طبعا انقلت قاسم وسهر بصف شقتنا فصوتهم وكلامهم مرات يوصل يمنا ....
كان صوتها مخيف واصيح بعلو صوتها ....
يتبع ...
السلام عليكم شلونكم حبايبي عساكم بخير وصحه وعافيه ...