غرام .... منو هذا مالك ؟
كالت نور ماتعرفين مالك منو شنو قاسم مامسولفلج عليه ....
كتلها لا والله منو هذا ؟ ....
كالت مالك يصير اخو محمد الله يرحمه ....
اني فتحت عيوني على كبرهن كتلها شنو اخو محمد ليش محمد مين اله اخوان ....
كالت اخو من الاب بس .....
كتلها وين هذا يمت طلع شو اول مرة ادري بي ...
هي كالت حبي شنو اول مرة اصلا من وراء وفاة محمد كان كل يوم يجي ويزور قاسم بس يمكن زوجج مايكول الج ....
اني ضجت من حجيها لان فعلا كولشي مايكول اليه هذا الحقير صدفه ادري بي ...
كتلها اي بس ليش يزوج عشق ....
كالت مو ياحظي ولد عمج الحقيرين رادوا يزوجها لابو عيسى بس هذا مالك كال لا خطيه اني اعقد عليها سيد .....
كتلها عزززه بعينهم لابو عيسى المخرف لج هذا مو عمره ٥٥ سنه وفوكاها مزوج اثنين ... ( ابو عيسى اقاربهم بس من بعيد وعايش بالكوفه )
كالت اي بس الحقير كال اني ازوجها واخلصكم من عارها وهذولي الجلاب كيفوا يخلصون ويفضون السالفه بس قاسم مااقبل فدوة لقلبه كال مااريد اظلمها وحجى وياه مالك وقنعه حتى يزوج عشق ...
كتلها بنزعاج ماادري شو ماطمئنيت على هذا مالك ....
كالت شوفي راح اكول الج شي صح انتي فتانه بس يله ...
كتلها اني من يمت فتانه اشو صرتي ماتستحين ...
هي طبكت حواجبها وكالت مااراح ارد عليج واخلي عقلي بعقل زعطوطه مثلج بس شويه بعد لا تجين وتتوسلين تعالي فهميني شكو وتعالي فهمني .....
كتلها يعني مااراح تكولين اليه ؟....
كالت لا ماتستاهلين .....
كتلها ولي اني اروح اسئل قاسم ...
هي ضحكت وهزت ايدها وكالت اي من ***** اذا كال الج هو مو مساعه واحد يطفر على الثاني تريدون تتمالخون .....
اني جريت نفس قوي اني انسانه فضوليه بشكل لا يوصف ...
كتلها نور شبيج سولفلي والله مااكول تحجي ......
كالت امممم اوك ...
شوفي محمد الله يرحمه قبل لا يموت كان يتواصل وياه ابو طبعا هذا الشي محد يدري بي لا خاله زينه ولا اي شخص حتى هذا المعرض عمو فهد اشترك وياه بي ...
كتلها شلون هو مو واحد صديقه لمحمد اشترك وياه ...
كالت اي مو هو محمد خطيه ماكان عنده المبلغ المطلوب حتى يفتح المعرض وانتي تدرين كان دائما يحاول يكبر بعيني بابا تذكرين شكد كان يحاول خطيه ....
كتلها اي اذكر وكان بابا قاسي وياه هواي يعني خطيه حتى من صار عمره ١٨ سنه هو كان يمد ايده ويضربه لمحمد .....
كالت اي المهم هو حتى لا يعرف بابا وخاله زينه انو عمو فهد مشاركه كال صديقي شاركني ....
كتلها اي كملي ......
كالت محمد بقى يتوصل وياه عمو فهد ودائما يروح اله لبغداد وصارت علاقتهم كولش قويه وعمو فهد دائما يجي لنجف يشوف محمد .....
كتلها زين ليش محد يدري بهذا الشي حتى ماما ...
كالت انتي غبيه ماما كانت تتخبل من عمو فهد حتى اذكر من حمودي صغير ويسأل عن ابو الحقيقي كانت ماما تتخبل عليه وتكول اله مااعندك ابو هو متوفي ...
كتلها اكلج اني عبالي يعني محمد من كان صغير عباله ابو نفسه ابونا ...
نور ضحكت وكالت شوفي محمد ذكي من كان صغير ابويه الله يرحمه كان قاسي عليه هواي فمحمد كان يجي يكلي احسه ماايحبني احسه مو ابويه ليش هيج يعاملني وانتي يعاملج بحب ويخاف عليج ومايضربج فمن صار عمره ١٠ سنوات عرف منو ابو الحقيقي ...
كتلها زين ومالك سولفيلي عليه ...
كالت شوفي مالك مااعرف عنه هواي بس ارعرف انو عمو فهد وراء زواجه من خاله زينه ازوج مرة ثانيه واتوقع صارت عنده بنيه مريضه ومن صار عمرها سنه اتوفت وراها صار عنده مالك ومن صار عمره ثلاث سنوات اتوفت امه من الحركه صارت بيها جلطه وماتت لان عمو فهد ازوج عليها ....
كتلها يااا عزه خطيه عزه بعينه ليش ازوج عليها ....
كالت شمدريني ....
كتلها زين انتي شمدريج بكل هذا ....
هي ضحكت بضحكه مغرورة وكالت حبيبتي محمد مااكان بس اخويه لا عيني نصفي الثاني كل اسراري يمه وكل اسراره يمي كل صغيرة وجبيرة كان يجي يكول اليه ...
كتلها امممممم اكلج هسه عشق شنو يقنعها تزوج هذا مالك وخاصه هو اخو محمد ...
كالت ماادري بس تدرين غرام اني مامرتاحه ولا مقتنعه بزواج عشق ومالك ....
كتلها ليش ...
كالت ماادري بس محمد كان يكولي انو مالك كولش عصبي ومايتحمل كلمه وحده ....
واختج فقيرة هذا يلعب بيها طوبه سمعي مني وخلي نشردها وتخلص من هذي الحياة وترتاح تروح بتركيا لو اي مكان ترتاح تعيش تدرس تبدأ من جديد حياة جديدة ....
كتلها ماادري بس احسه عشق ماادبرها تعيش وحدها ...
كالت شوفي غرام تر عشق مو صغيرة تكدر تعيش وادبر نفسها واحنا مااعوفها وحدها انساعدها وندز الها فلوس احسن من حياتها اهنا تر هي اتعذبت وتعبت وراحت حياتها وشبابها ....
كتلها ماادري نور اني خايفه عليها ....
كالت انتي معليج اني انطيها فلوس والله كريم اني اصرف .....
كتلها ماادري بس اذا لزمها يموتوها ...
كالت لا ان شاء الله محد يلزمها لا تخافين ...
اني مااكنت مقتنعه بفكرة نور كنت خايفه على اختي لان اعرف العالم عبارة عن غابه وبس القوي يعيش بيها وعشق ضعيفه مااتكدر تخطي خطوه وحده بدونا شلون تكدر تطلع وتشرد فوكاها.......
اففف ياربي عديها هذي السالفه على خير ....
بدأت نور تحظر فلوس لعشق واني انطيتها الذهب مالتي كوله يفيدها حتى الذهب مالت بناتي اخذته وانطيته لنور ......
اخذت الجنسيه مالت عشق وكل غراضها والجواز السفر وشكم لبسه بدأت تخطط حتى تهرب عشق اني كانت ايدي على قلبي كان جسمي يرجف وخايفه على عشق ماادري مين اجتي هذي المصيبه على راسنا ......
صعدت هم بكت المفتاح من قاسم شكد غبي دائما يضمه بنفس المكان ....
المهم انطيته لنور ...
انتظرنا لحد الساعه بال٤ نزلنا اني ونور لعشق .....
اني مااكدرت ادخل لعشق ولا كدرت احجي وياها لان راح ابجي ومن اشوفني ابجي متاكدة راح تخاف ....
ظليت واكفه وراء الباب واسمع حجيها هو ونور وابجي ...
نور كانت تخوف بعشق من مالك حتى تشرد على الرغم نور مااكانت تعرف لي شي عن مالك غير انو امه متوفيه بس هي استخدمت هذي النقطه حتى تأثر عليها ماادري مااحبيت تصرفها بهذي الحظه يمكن هي تعرف شي ماجاي مااكالت اليه ماادري ......
أنت تقرأ
ترك بصماته على جسدي
Romansaعوفني تعبت من وراك الى متى هاا .. الى متى تبقى بظلمك هذا الى متى تبقى بجبروتك شوفي ربي شلون راح يكسرك على كل مرة لمستني على كل مرة جرحتني ... انت ماتخاف الله شوف جسمي شنو سويت بي شلون .... روايه حقيقيه
