ترك بصماته على جسدي

بارت ٢٥

زينه / مرت اكثر من اربع اشهر هسه سمر بشهرها بس هي كولش تعبانه كل يوم متخربطه تعبت هواي وياها وهي خطيه هم تعبت كولش بس بطنها كانت ماشاء الله كولش جبيرة مااذكر هيج كانت بطني بحملي اجوز لان حامل ببنيه والله ماادري مشت حياتي بين الفرحه والحزن بس ماتمنين تكون حياتي هيج لا طلعه ولا طبه حياتي محصورة بين شغل البيت والتنظيف والطبخ وتدرس الجهال تعبت من حياتي هوواي كبرت خلال هذي السنوات هواي ولا عبالك عمري بال٣٠ ليشوفي يكول بال٤٠ حتى وثاب تغير طبعه هواي اربع وعشرين ساعه عصبي ويصيح يعني نزلته من شغله صارت غذاب بالنسبه النا من كثرة عصبيته كان هواي يضرب محمد لان وكح ويضرب بالجهال يوم وثاني يوم مشكله وهذا وثاب يستحي من الناس وكول اله اموتك اذا مابطلت عرك بس محمد كان يسوي العكس كنت اخاف عليه هوااي اخاف عليه من الدنيا اخاف يتخلى عنا وثاب وماعدنا سند غير الله بس هذا الشي كان يخوفني هواي بس ذبيت همي وراء ظهري وعفته على الله ..
اما نور فكل ماتكبر اصير حلوة بس كانت تقرء بهوس يعني تقرء هواي من ترجع من المدرسه لحد ماتطلع لمدرسه طبعا اني ابدا مااشغلها بالبيت ومن يجي وثاب ويحجي اكول اله لا تشتغل والبيت كله عليها كنت احبها واتمنى الله يوفقها وكمل دراستها وطلع طب الله يوفقها ...
كنت كاعده على الدرج صافنه على البيت تقريبا الساعه بال١١ ونص كنت كاعده من ٦ الصبح جهزت الريوك لجهال ولسمر اني مااتريك الصبح كعدوا ريكتهم وسمر ل٩ هم تريكت ورجعت نامت كانت شويه متخربطه وراها نظفت البيت وغسلته من فوك لجوى وسوي دولمه لغداء لان اليوم يجي وثاب كملت كولش الساعه بال١١ ونص ظليت كاعده واحدي البيت هدوء سمر نايمه وماكو احد غيرنا ظليت افتر انوب كلت خلي اطب اغسل متت من الحر والله صدك طبيت غسلت وكملت طلعت كعدت امشط لشعري اشوف شكلي متغير حيل جفوني سودا هواي وجهي شاحب حتى شعري متقصف وجسمي ضعفان هواي اففففف هي هذا الدنيا اخذت مني اكثر ماانطت يله الحمدالله على كل حال سمعت الباب يندك لميت شعري وخليت الشال على راسي وطلعت فتحت الباب شفت وثاب كلت اله الحمدالله على السلامه كال الله يسلمج طب جوى واني راحت جبت اله ماي شفته ماموجود بالصاله سمعت صوته طالع من غرفه سمر شفت الباب شويه مفتوح باوعت شفته خالها بحضنه ويبوس براسها ويحجي وياها وهي تضحك راحت لمطبخ واني ميته احسه الكلبي يريد يطك اني صالي شكد مااسامعه كلمه حلوة منه وحتى صار هواي مامقترب مني صح سمر حبابه ومثل اختي بس هذي المرة غرت هواي منها يعني معقوله سبب هذي التفرقه لان مااصرت حامل بس هذا امر الله يعني مو بيدي هواي راجعت دكتورات بس مافاد شسوي ياربي
ظليت كاعده وكل ساعه دمعتي تريد توكع واتمسك مااريد يجي حمودي ويشوفني ابجي ظليت الهي نفسي منا لمن اندك الباب شفت الساعه بال١٢ ونص هذي اكيد الجهال اجوي طلعت افتح الباب بعدني مااوصلت لباب وثاب صاح عليه كالي وووين طالعه كتله الباب يندك هذولي الجهال كال ليش ماكو زلمه بالبيت وانتي تروحين تفتحين الباب امشششي طبي جوى ..
طبيت جوى والعبرة خانكتني كل ساعه واريد اطك من البجي شفت الجهال طبوا وهو يسألهم عن احوالهم ودراستهم طب محمد لمطبخ وحضني كتله ها حبيبي شلونك كال اليه الحمدالله واخذت بالرياضيات ١٠ كلت اله عفيه حبيبي يله روح غسل وبدل علما اصب الغداء كلي اي ماما بديت اصب واطلع البن طبت نور سلمت عليه وكالت عمه اساعدج بشي كلت الها اي حبيتي فرشي السفرة رات فرشت السفرة واني انقل الاكل كملنا شفت وثاب جاب سمر من الغرفه ولزم ايدها وكعدها يمنا كعدنا ناكل جذب اذا اكلت لكمه وحده خليتها بحلكي وراحت لغرفه خليت راسي على المخده وعفت دموعي ينزلن بسلام وحدهم حسيت على وثاب دخل الغرفه راسن غمضت عيوني مااريد اشوفه ولا احجي وياه حسيت عليه اقترب نام يمي وخلى ايده على خصري ودفن وجه بركبتي ونفاسه الحارة حركت ركبتي همس يم اذاني كال اليه ادري بيج كاعده اني بقيت مغمضه عيوني كال اليه اسف زينه والله اسف ادري تعبتج وياي بس والله تعبان حيييل ومخنوك احسه الدنيا حاصرتني من كل الجهات فتحت عيوني ونسيت كل زعلي منه وكلت اله وخوف ياكل كلبي ليش شكو كال اففففففففف مااريد ازيد همج كتله كولي وثاب شكو ياعيني غير اكول اليه حتى ترتاح كال اليه خايف على سمر جاي اشوفها تموت كل يوم كدامي احسه ظلمتها وهي يتيمه مالها احد اخاف افقدها ويصير ذنب موتها بركبتي كلت اله انت بشنو ظلمتها ؟ كال ماادري يعني لو مااخذ حتياطي اكثر وياها كان مااصرت حامل كلت اله شوف اولا العمار بيد الله وثانيا سمر هي كامت ماتبلع حب المانع هي رادت طفل رادت اخ او اخت لنور انت مو ذنبك وثاب انت مااقصرت وياه اشخص وان شاء الله تكوم بالسلامه كال اي ان شاء الله والله كل يوم اندعي بصلاتي الله يكومها بالسلامه علمود نور ادري هواي متعلقه باامها كلت اي ان شاء الله وبعد شنو مضايقك كال كمال موتني هو وابنه ولج راح يسوي بيه جلطه هذا النذل كلت ليش شنو مسوي كال ولج كل يوم رايح لابويه متعارك وياي ويكول اله اريد الورث مالتي ولج يطالب بالورث وابويه بعده عايش فوكاها يسمع كلام ابنه السرسري ولج ابنه حتى شرب يشرب ويروح يحث اخواتي عليه وكول الهن وثاب يريد ياكل الورث اني قابل مااخاف الله واكل الورث شو الحمدالله عايشين برغد مامحتاجين بفضل الله انوب اروح اكل ورثهم وتعرفين ابويه شنو يكولي زوج بنتك لابن كمال من تكبر حتى تصلح العلاقه بيناتكم كتله ياااا عززه كلي لا تخافين شبيج لو اموت ماازوجج بنتي لواحد سرسري كتله اي عفيهبس تدري وثاب يعني لو توكف وياه اخوك وساعده ماكان حتاج ورث او شي يعني انت ماشاء الله هواي اساعد ناس وكفت على اخوك هو حباب اجوز صدك محتاج وضعه صعب وهو عائلته هواي المفروض توكف وياه وساعده كلي ولج هو طماع راحت ونطيته وشكد صرفت عليه واخر مرة انطيته اكثر من مليونين وهو حقير ولا غزر بعينه راسن نسى فضلي وراح يطالب بالورث كلت اله والله ماادري ليش هيج يسوي على الرغم قبل مايسوي هيج كلي افف لا هو طول عمره طماع كتله حبيبي نام انت راجع تعبان وان شاء الله الله يحلها باسني من راسي وحضني ونام اني هم غفيت لان كاعده من وكت ...
تقريبا كعدت الساعه بال٤ونص كمت على كيفي خاف وثاب يكعد لان خطيه راجع تعبان وفاتح حلكه وشوخر راحت غسلت وجهي وراحت لغرفه الجهال شفت حمودي نايم لان باجر جمعه عفته خطيه راحت لغرفت نور شفتها كعده تقرء كتلها ليش مانمتي حبيبتي باجر جمعه وتقرين كالت عمه والله مالحك عندي تحضيرات كومه وهم عندي امتحان احياء والمادة هووواي يعني مالحك بيومين كلت الها يله حبيبتي لعد اروح مالهيج واني اقري وشدي حيلج دكتورتنا واذا حتاجيتي شي صحيلي ضحكت وكال مخالف شكرا عمه عفتها وراحت شفت سمر نايمه هم عفتها راحت لمطبخ سويت كنافه خطيه نور تقرء وتعبانه وهي من النوع ماتاكل هواي فد دائما عصريات اسويها شي حلو المهم اخذتلها قطعه وجاي ونطيته الها هي خطيه كولش فرحت اعرفها تحب هيج شغلات وهم حمودي كعد انطيته وكعدنا اني وياه ناكل هو يسولفلي على مدرسته واصدقائه احسه على الرغم صغير بس حجيه حجي كبار ومواقفه رجوليه دائما يدافع عن نور وحتى من يعصب وياب عليه هو يوكف بوجه ويدافع عني على الرغم يعرف ومن وراء هذا الشي ينضرب بس هو مايهتم ل٥ كعدت سمر وثاب هم انطيتهم كنافه وجاي وكعدوا يمدحون بيه وثاب اكل ثلاث قطع ظلينا كاعدين ونسولف ودك موبايل وثاب لغرفه راحت جبته اله اتوقع المتصل كان قاسم لان قريت اسمه اخذ الفون مني وشويه وصار وجه وثاب اصفر كال لقاسم اي هسه اجي وقفل الفون باوعتله كتله شكو شبيك وثاب كال ابويه متخربط سمر راسن لطمت على صدرها كالت يمه شبي عمي كالها على كيفج مابي شي شويه متخربط الضغط مالته صاعد هسه رايح اشوفه زينه كومي جهزي ملابسي على مااغسل راحت جهزت ملابسه هو طب لبسهن على السريع وطلع ظل بالي يم عمي راحت كعدت يم سمر ظلت تبجي سمر هواي متعلقه بعمي حتى اصيحله يابه لان بدايه زواجها كله عاشت يم عمي ومرت عمي دائما اسولف بي تكول نسان حباب وخلوق وطيب هو فعلا هيج يعني من واحد يباوع لوجه عبالك ينور مافد يوم ظلم احد دائما يوكف وياه الحق الله يكومه بالسلامه ظلينا ندعي اله منا لمن صارت الساعه بال٨ ونص وندك على وثاب مايجاوب كمت سويت العشاء لجهال بس اني وسمر مااكلنا ظلينا كل ساعه ندك على وثاب مايجاوب بالاخير قفل الفون ظل القلق ياكل كلبنا وخاصه الوقت اتاخر وصارت بال١٢ سمر كامت نامت لان تقلصات بطنها واني ظليت انتظر وثاب او خبر عن عمي بس ماكو ظل بالي على عمي خاف صار بي شي ظليت افتر بالبيت والكل نايم واني النوم طار من عيني بسبب القلق كمت انظف البيت حتى شويه يمشي الوكت ماافكر ظليت انظف منا لمن انكسر ظهري وحتى راسي كام يوجعني لان اتاخر الوقت ولهسه مانايمه تقريبا صارت الساعه بال٣ ونص الصبح دك الفون شفت رقم وثاب راسن جاوبته ..
ها وثاب وينك يمعود بالي يمك بعدني جاي احجي وسمعت صوت بجي قلبي كام يدك وجسمي صار يرجف سمعت صوت وثاب وهو يكول اليه بنبره تكسر باب القلب زينه ابويه اتوفى اتوفى حزام ظهري التراب اخذه وبعد مااشوفه رااااح بعدني محتاجله سندي مااريده يروح .
اعتقد هذي اول مرة يبجي بيها وثاب وبهذي الطريقه مااعرفت شلون اواسي لو شلون اخفف عنه انعقد لساني سديت الموبايل منه ومااكدر اكول غير البقاء لله كلنا على هذا الطريق كعدت ودموع كامن يوكعن وحدهن حسيت نفسي ختنكت وضاكت بي الدنيا لهسه اذكر هذي اليل ماادري ليش من اتوفى عمو اذكرت ابويه وامي الله يرحمها يعني على الرغم وثاب رجال وعمره بالاربعين ويكول ماعندي سند لعد شكول عليه طول عمري عشت يتيمه على الرغم ابويه عايش مااحسيت ابدا عندي سند بهذي الدنيا دائما حسيت ابويه ضعفي مو قوتي ابويه دمرني بسبه امي ماتت وبسببه ادمرت حياتي لو هو واكف وياي ماكان فهد سوى بيه هيج مااكان كال هذي ضعيفه منو الها خلي اسوي لعجبني بيها وراها اذبها منو يوكف بجهي هه دائما كنت احسه جناحي مكسور صدك الاب لو يكون حياة لو يكون موت واني ابويه كان موت موت طفولتي ومراهقتي وشبابي واخذ اغلى شي عندي هي امي ..
ماادري اذا ابويه هسه عايش لو ميت حتى ماادري ياسجن هسه وعلى الرغم وثاب شكد قريب عليه بس على مايسألني عن اهلي اكول اله ابويه مفقود وامي توفت ولا مرة بحياتي كدرت اكول اله ابويه كتل امي ماادري ليش خفت خفت خاف يعيرني ببويه او خاف ياخذ عليه نظرة ..
عفت تفكيري وكمت اصلي اليه ولامي صالي شكد مااذاكرتها حتى قبرها مااريحتله ماادري ليش بس كل مااذكرها اذكر فهد وحياتي وياه تعبي افف يايمه اتبهذلت من دونج ..صليت لعمي صلاة وحشه القبر وقريت قران واني جاي اقرء سمعت الباب يندك باوعت الساعه بال٥ الصبح طلعت من الطرمه صحت منووو سمعت صوت قاسم كال اني عمه قاسم عمي دزني يريد ملابس سود كتله اي حبيبي هسه اجيبه رحت ركضت لغرفه فتحت الكنتور جبت ملابس وثاب وانطيتهن لقاسم وعزيته وراح اني هم راحت نمت شويه لان راسي نسطر
كعدت بال٩ راسي يوجعني راحت غسلت وطلعت شفت سمر تفتر وجها اصفررر اني اخترعت من شفتها كتلها يمه ولج شبيج كالت وهي تلهث مابيه شي لا تخافين وثاب ماارجع .. اني خفت اكول الها عمي اتوفى وخاصه وضعها صعب انجبرت اجذب عليها كتلها اي رجع البارحه باليل وراح من الصبح عنده شغل كال وعمي خما بي شي كتلها لا مابي شي كلت اله تريكتي كالت لا يمعودة ويني وين الريوك اليوم اريد اموت كتلها اسم الله شبيج اخابر وثاب ناخذج لطبيب كالت لا تعالي احاجيج ..
راحنا كعدنا اني وياها وكالت شوفي زينه انتي من دخلتي لهذا البيت ماعتبرتج ضرتي لا والله اعتبرتج اختي واعز تدري كل ماتتعلق بيج نور اني اطمئن حتى مااخايفه من ولدتي اذا متت لو عشت ادري انتي راح تعامليهم مثل جهالج شوفي زينه اذا الله اخذ عمري مااريدج تحسسين جهالي انو هم ايتام اريدج اصيرين امهم وعديني زينه ..
كلت الها شبيج هيج تحجي يمعوده اسم الله عليج ان شاء الله مايصير شي وبعدين شكو اجمعين نور بنتي وانتي تدرين شكد احبها وان شاء الله بنتج هم مثل بنتي وانتي تربيهن وزوجيهن وتفرحين بجهالهن
باوعتلي وكالت مو ابنيه وحده اثنين
كتلها شنو اثنين ..كالت اني حامل بتوم بنات بس محد يدري توسل بالدكتورة ماتكول لوثاب وهو هسه مايدري
اني فتحت عيوني على وسعهن كلت الها صدك تحجي حامل بتوم ولجججج
كالت اي
اني ظليت مصدومه واني اكول بطنها جبيرة ماشاء الله مو طبعيه طلعت حامل بتوم ياربي سهل الها وكومها بالسلامه ماعندنا غير الدعاء ..
عفتها وراحت عصرت عصير برتقال وانطيته الها جبرتها تشربه بال١٠ كعدوا الجهال هم سويت الهم ريوك وكملوا محمد راح يقرء ونور وكفت اساعدني بغسل الماعين واكفين ونغسل الماعين ونسمع صوت صياح سمر راحنا نركض شفتها واكعه بالصاله ولزمه بطنها وتبجي حييل وتصيح لزمتها بلكوه وكعدتها وهي اصيح يمممه لحكي راح اجيب راحت ركضت لفون دكيت على وثاب بس مايجاوب وسمر خبصت البيت خليت العبايه على راسي وكلت لنور ديري بالج على امج واني رايحه اجيب ابوج اشوف بعيون نور الخوف والقلق طلعت اركض لبيت عمي البيت مو بعيد بس فرعين البعد بس حسيت المسافه كواش بعيدة ظليت اركض والناس تباوع عليه وصلت لفرع عمي شفت الجوادر على طول الفرع وكومه زلم ظليت ادور بعيوني على وثاب مااااكو شفت قاسم راحت اركض اله مثل المخبله هو شافني فتح عيونه على وسعهن قبل لا اوصل يمه اجى يركض عليه عمه شجابج بنص الزلم كلت اله الحك عليه عمتك جاي تولد هو راسن كلي تعالي وياي راحت وياه هو يركض قبلي صعدت بسيارته هو كان يسوق بسرعه جنونيه ويخابر وصلنا على البيت شفت منظر سمر يفجع القلب مغطايه بالدم وجها ازررك شالها قاسم وخلها بالسيارة اني راحت جبت الجنطه وركبت يم سمر بس هي كانت فاقدة الوعي ومنظرها يخوف من الدم
كان يسوق قاسم ودك موبايله اتوقع وثاب لان كال اله عمي مرتك جاي تولد ....
يتبع
السلام عليكم ورحمة الله وبركاته والله اسفه عن التاخير بس والله العظيم هذا البارت اكثر من خمس مرات اكتبه وينمسح ماادري ليش والله ردت اتخبل من وحده ينمسح وارجع اكتبه وهم ينمسح ماادري وارجع اعتذر الكم مرة ثانيه وشكرا باي