غرام .....
قاسم انت من كل عقلك وين نروح ....
لزم ايدي حيل وكال كلمه وحدة لا تحجين تروحين هسه تحضرين ملابسج وملابس الجهال والغراض المهم ونولي .....
كتله قاسم امي مريضه وين اعوفها واروح وباجر الجهال عدهم امتحان .....
وين نروح هو بيتنا القديم وانت بعته .....
خلي يخلصون الجهال ام.....
بعدني مااكملت كلامي لزمني من شعري حيل وكال انعل والديج بيت النعال تروحين تلمين غراضج ....
لو هسه اصعد اخذ جهالي وانتي خليج تخدمين امج .....
اني كمت ابجي من وجع راسي حسيت شعري وكع بين ايديه .....
كتله اي اي عوفني .....
عافني راحت راكضت لامي طبيت لغرفه باوعتلي امي ونور بخوف .....
باوعت لامي وكتلها يوم لحكيني ....
كالت بخوف شكو ولج يمه ؟ ....
راحت يمها وكتلها قاسم يريد ياخذني وياخذ الجهال ....
باوعتلي بخوف وكالت وين ياخذكم ؟.....
كتلها ماادري ماادري بس ماايريدنا نعيش اهنا بعد .....
امي راسن لبست حجابها وكالت لا لا اني هسه احجي وياه ....
طلعت امي لصاله خطيه هي مااتكدر تصعد فوك ....
ظلت اصيح على قاسم منا لمن نزل ....
وبيده جنط ولزم الجهال بيده الثانيه .....
نزل بكل جبروت وباوع لامي وكال الها عمه اني راح اطلع اعيش بغداد ....
اذا احتاجتي شي لا يردج غير لسانج .....
كالت اله امي يمه وين طالع ومااخذ الجهال بهل الظهريه .....
خطيه يايمه اي عائله تتعارك وثاني يوم تصالح ....
والشيطان دخل بينا وانت ابني واعتبرك بمعزت محمد الله يرحمه .....
كال الها عمه والله اني شغلي انقل هناك واني هم طلع عليه اشكال الحجي ....
طلعت داخل عليكم على طمع ....
طلعت مو زين ومااكل فلوس الايتام .....
واني سويت كل هذا علمود مصلحتكم ....
يله الحمدالله والشكر على كل حال ....
باوعلي وكال يله غرام روحي بدلي خلي نروح قبل لا يصير الدنيا ليل .....
تمي لزمت ايده وكالت يمه قاسم لخاطري لا تاخذ غرام .....
واني هذني ايامي الاخيرة وكل حلالي اسجله بااسمك بس يايمه عوف بنيتي يمي .....
عوف الجهال خطيه امتحانات عدهم وتبهذلهم هسه ....
لزم ايدها قاسم وكال الها عذريني ام محمد مااكدر ابقى يمكم بعد .....
اخذ الجنط والجهال وقبل لا يطلع باوعلي وكلي خمس دقائق اذا مااطلعتلي اخذ الجهال واروح واعتبري نفسج طالق .......
طلع هو والجهال وعافني بحيرة الجلب الله لا يوفقك ياقاسم .....
اباوع لعيون امي وهي تبجي وايديها يرجفن ....
لزمت امي من ايديها وبستها من راسها ....
شبكتها واني ابجي كتلها ماما سامحيني اني هم ام مااكدر اعوف جهالي مثل ماانتي مااتكدرين تعوفينا اني هم مااكدر .....
سامحيني ياماما ياعمري مجبورة اعوفج .....
كالتلي بصوت يكسر باب القلب روحي يايمه الله يوفقج بكل خطوة تخطيها .....
راحت لبست عباتي وسلمت على نور وكتلها ديري بالج على ماما .....
طلعت من البيت عشت نص حياتي بي ....
هذا البيت شهد على ظلم وعلى حزن ....
هذا البيت على حزنا على العذاب لعشنا ....
حتى على الخيانه شهد .....
بهذا البيت شفت قهر وحزن اكثر الفرح .....
صعدت بالسيارة واني اذكر منظر امي وهي تودعني ...
مااصورت فد يوم اكدر اعوف امي بهذي الحاله ....
مااصدك كدرت اعوف امي وهي مريضه ...
هذي الانسانه لعمري كله مااحسيت اني يتيمه ولا حسيت انها مو امي الحقيقيه ....
ماما كانت معتمدة عليه بشكل كلي .....
كنت كل يوم الصبح من الساعه بال٥ اروح لماما اكومها من افراشها ....
وادخل وياها اغسل الها ....
امشط شعرها .....
وابدل فراشها وانطيها دواها ....
امي على الرغم حبها لنور وعشق بس كانت تستحي تطلب منهن شي حتى لو كلاس ماي ...
كنت اني اعتني بكل تفاصيل يومها من كعدتها لحد نومها .....
كنت اعتني بيها مثل بنتي ....
ماما كانت مااتكدر حتى توكف على حيلها ....
راح حيلها وياه روحه محمد ....
الحياة ظلمتها من كل ناحيه ....
كنت اني الوحيدة اعرف قصه ماما ...
اعرف كل الوجع والالم العاشته .....
امي انظلمت بحياتها مثل مااحنا انظلمنا ....
مو يكولون نص حظ البنيه على امها ...
احنا هيج هسه صدك صدكت هذا المثل ....
مااحست غير السيارة وكفت ...
شنو معقوله بهذي السرعه وصلنا لبغداد ....
نزل قاسم ونزل الجنط وياه ...
نزلت اني والجهال ...
دخلنا لعمارة صعدنا لطابق اتوقع الرابع ....
وصلنا لشقه وفتح الباب ودخل غراضنا باوعلي وكلي دخلي اروح اجيب مسواك واجي ....
دخلت لشقه كانت هوسه وقذرة بشكل لا يوصف ...
راحت كعدت على التخم وخليت ايديه على راسي ....
اجتي ملك تبجي وكالت ماما اني مااقريه شي وباجر امتحان شلون اروح امتحن خاف ارسب ....
جريت وخليتها بحظني ومسحت دموعها .....
وكتلها هسه حبيبتي نقرء ...
نهى كالت يووووو مااريد اقرء ماايصير ماما مااداوم ...
كتلها شو تعالي كعدي احجي وياج ...
هي ابتعدت وكالت اسفه ماما والله اقرء بس لا اضربيني .....
كتلها تعالي ماما مااضربج احجي وياج ...
اقتربت كعدت يمي وكتلها شوفي ماما وانتي هم ملوكه ...
ماما الحياة مو عادله دائما ويانا دائما اكو فروقات ....
بكل شي بالحياة ...
حتى اكو فرق بين المريه والرجال ....
الرجال اله حق اكبر بالحياة اله الحق يعيش مثل ماايريد محد يخلي عليه علامه اكس ....
اذا درس او لا راح يكدر يعيش يكدر يشتغل اي شي ...
يكدر يبني حياته بكيفه وعلى مزاجه ....
بس البنيه لا مااتكدر كولشي مااتكدر اسوي من هي صغيرة يتحكم بيها ابوها ومن تكبر يتحكم بيها زوجها .....
بس اكو شي واحد يكدر ينقذها شي واحد مثل حبل النجاة .....
تعرفن شنو هو ؟ ....
الدراسه الدراسه هي التنقذكم ..
اني هم من كنت بعمركم اضوج من الدراسه اريد بس اكعد والعب لو انام .....
بس من كبرت عرفت الحياة مو كلها لعب ....
اليوم لعبت باجر ابجي ....
حبيبتي نهى اني هم مثلج اول ماابطلني ابويه فرحت عبالي اظل العب وانام وارتاح من القرايه وشلعان القلب .....
بس هسه والله ابجي دم على كل يوم لعبت بي ومااحسبت لباجر .....
تريدن تعيشن كملن دراسه اسعن وطلعن من الواقع لعايشين بي ....
صيرن مثل خاله نور .....
نور سعت وعاشت حياتها بس شلون عاشتها ؟....
بدراستها .....
خلي نتفق على شي تمام ؟ .....
جاوبن اي ماما على شنو نتفق ؟ .....
كتلهن خلي نتفق على انو الدراسه حياة ...
واذا نريد نتخلى عن الحياة معنها نتخلى عن الدراسه
تمام ابدا لا تتخلن عن حياتجن تمام ؟ ...
كالن اي ماما وعد ماانعوف الدراسه ...
خليت الجهال يقرن واني كعدت انظف البيت كان عبارو عن غرفتين وصاله ....
وملحقات .....
ظليت مل ساعه افتر انظف الشقه وارجع اسمع لجهال ...
رجع قاسم ذب المسواك يم الباب وكال عندي شغل هسه ارجع ...
فرغت المسواك وسويت اكل لجهال وعصير علمود يتفتح دماغهم ....
حمودي كمل بال ٨ وطببته لغرفه يلعب حتى لا يزعج لبنات .....
بقيت وياه البنات لحد الساعه بال١٠ باليل كملت ملوكه ...
بس بقت نهى ارجع اعيده مرة ثانيه الها ....
ظليت اقريها وعيني على الباب وين صار هذا ليش هيج اتاخر ....
شنو ماايخاف الله اجى ذب مرته واطفاله اهنا لا منطقه نعرفها ....
صار مااصار علينا وحتى موبايل مااعندي ...
ماادري شحجي عليك ياقاسم .....
صارت الساعه بال١٢ ناموا الجهال ....
اني ظليت كاعده ماادري ليش صار بيه ارق ماادري من المشاكل لتوكع على راسي ....
لو من القهر لشوفه .....
اخذت الايباد مالت حمودي ماادري ليش اجى على بالي افتح صفحتي على الفيس ...
نزلت الفيس وفتحت صفحتي مااكذب كان هدفي من فتح الصفحة هو اعرف اخبار حيدر ....
ماادري ليش اليوم بالذات ذكرته على الرغم صار فترة طويله ماامر على بالي .......
بس اليوم من حسيت بالتعب من هذي الدنيا هو اول مااجه على بالي....
دخلت فتحت الحظر ودخلت على صفحته شفت شي حطم الباقي من قلبي .....
ابتسمت بحزن وكل يله هي بقت عليه بالعافيه ...
دخلت على الخاص وكتله مبروك على زواجك الله يوفقك وياها ....
راسن شافها وجاوبني غرام !!!! وينج يمعوده ليش حضرتني خليتي بالي عليج مااعرفت شلون اوصل الج خفت عليج هواي .....
كتله تسلم مبروك على زواجك ....
كال الله يبارك بيج قبل اسبوعين ازوجت كوليلي شلونج شخبارج ؟ شلونه قاسم وياج ؟ ....
جريت نفس قوي وكتله الحمدالله يله عن اذنك قاسم يصيحلي مع السلامه ....
كال هااا اي روحي بس لا تحضريني يعني بكيفج بس اني يظل بالي يمج ....
كتله مااكو داعي يبقى بالك يمي اني مااكو احسن من حياتي الحمدالله ...
عندي زوجي يحبني ويموت عليه مااكدر يعيش دقيقه بدوني ....
وعندي جهالي كل الدنيا اشوفها بعيونهم ....
مااكو احلى من حياتي عايشه ملكه الحمدالله ....
كال اي الحمدالله اني شريد غير سعادتج ياربي دوم تعيشين مرتاحه ....
كتله شكرا وانت هم ...
كال غرام ؟ .....
كتله هااا ...
كال الله يوفقج اتمنى من كل قلبي اخذ كل فرحه موجودة بالعالم وانطيها الج .......
كتله تسلم يله اعذرني اني راح اروح مع السلامه ....
ماانتظرته يرد راسن حضرته ....
مسحت دموعي ...
اي بجيت بجت لان ردت صدك هيج حياتي ردت اصدك كلامي واكون صدك مرتاحه بحياتي ....
مسحت المحادثه والفيس ....
صارت الساعه بال١ ونص باليل دخل قاسم يجر بروحه ....
وكفت كدامه وكتله وين كنت ؟ ....
مااتكول مرتي وجهالي خاف يحتاجون شي واني مااكو ....
مااعندك مسؤاليه تجاهنا .....
كلي وهو يمشي شو ولي من كدامي ....
لزمته من ايده وكتله قاسم انت ليش هيج تصرف وياي اني شنو مسويه حتى استحق هذا التعامل ؟ ....
باوعلي وكلي تدرين انتي فكر من يوم دخلتي حياتي اتندم ارجع لبيت واكابل خلقتج مثل البومه ....
كتله واني اتمالك نفسي حتى دموعي ماتنزل ....
كتله ليش فكر ليش مو من ازوجتني لهسه الخير يجي الك من كل مكان ....
بعدني مااكملت كلامي ضربني راجدي فر وجهي فر ....
لزمني من شعري وكل بنت النعال شقصدج هااا ...
تعيرين بيه ؟...
لزمت خدي ودموعي ينزلت وكتله لا لا والله مو قصدي شي ....
عاف شعري وكلي الغسل حتى حجي مااتعرف تحجي ...
راح لغرفه وسمعته يقفل الباب ...
لزمت جدي وكعدت بالكاع ابجي على للصامت حتى مو من حقي ارفع صوتي وابجي ....
ظليت كاعده لصبح دقيقه مااكدرت انام ....
صارت بال٦ كعدت الجهال راجعت دروسهم وحضرت الجدول الهم ...
وهم بدلوا وكعدوا ياكلون ...
كعد قاسم اهم اكل واخذ الجهال وطلع ...
اني ظليت وحدي افكر بماما اسوده عليه ....
حتى مااعندي موبايل اخابرها .....
كعدت انظف البيت وسويت الغداء ....
سمعت الباب يندك استغربت منو يجي هسه ....
فتحت الباب شفت مريه واكفه كدامي اني ابتسمت الها .....
هي اقتربت مني وكامت تبوسني كلتلي شلونج دادة
كتلها الحمدالله ...
كالت اني جيرانكم بيت بالطابق الثالث البارحه شفتكم اجيتوا بس عذريني مااكدرت اجي اسم عليكم ....
كتلها عادي حبيبتي اصلا البارحه اجينا متاخرين ...
كالت هذي دولمه سويت خلي اجيب الك اضوكون طبخي ....
اخذت الماعون من ايدها وكتلها تسلمين حبيبتي عاشت ايدج تفضلي دخلي مااكو احد....
دخلت هي وكعدت بالصاله اني راحت لمطبخ حميت الجاي مالت الصبح ....
وصبيت اليه والها ....
راحت قدمت الها ...
وهي ظلت تسألني على الجهال وعن حياتي ....
اني ظليت صافنه عليها كانت سمرة يعني حنطاويه وضخمه طويله بس جسمها مليانه بس بشكل حلو ....
كانت عيونها صغار وماعدها شفايف يعني صغار مامبينات ...
وخاله مكياج اوفر .....
انتبهت عليها هي هم مركزة بيه وتباوعلي ....
بقت شويه وراحت ....
تقريبا كانت تجي كل يوم تبقى وياي شويه وتروح ...
مر اسبوع واني مااعرف عن امي شي وكلي ابجي اكول لقاسم انطيني اخابر امي هو ماايقبل الجلب .....
كانت حياتي جحيم وياه كل يوم يطلع ماايرجع غير نص اليل ....
ومن يرجع واسأله يضربني ويهين بيه ....
حتى اخذ ذهبي كوله وتعاركت وياه ولزمني ضربني لحد الموت ....
والله اذكر هذا اليوم وكولش زين الضرب مالته بدون رحمه ...
حسيت نفسي وصلت لموت عيني رادت تروح من ضربني بوكس ....
الله ينتقم منه ظليت يومين مااكدر اكوم على حيلي ....
الى اني اجى يوم صدمني وغير كل حياتي ...
_________________________________________
عشق ..ماكو انسان مااعنده احلام موو؟ .....
كلنا عدنا احلام بعضنا يحلم بفلوس ... وبعضنا الاخر يحلم بستقرار ....
واخرون يحلمون بمستقبل ناجح ....
بس اكو ناس قليلين يحلمون بالحب ....
لا مو اي حب الحب الصادق يحسسنا طايرين بالسماء ....
احنا النساء رقيقات القلب لدرجه نحب اي شخص مهما كان شكله ....
او د يوصل لحاله التعب عدم القدرة على المحاوله مرة ثانيه ....
هذي حياتي يوم حلوة وعشرة مر .....
كانت حياتي مالك اشبه بالحلم ....
حلم دائما اتمنيته يتحلقق وياي ....
كان مالك حلم كل فتاة برمانسيته وحساسه .....
بطيبته ....
مااكو انو هو انسان مثالي ...
لا بس لكيت الشي الناقص عندي حسيت قلبي رجع ينبض من جديد...
أنت تقرأ
ترك بصماته على جسدي
Romanceعوفني تعبت من وراك الى متى هاا .. الى متى تبقى بظلمك هذا الى متى تبقى بجبروتك شوفي ربي شلون راح يكسرك على كل مرة لمستني على كل مرة جرحتني ... انت ماتخاف الله شوف جسمي شنو سويت بي شلون .... روايه حقيقيه
