ترك بصماته على جسدي

البارت السادس من الجزء الثاني

غرام... لزم ايدي حيييل وكام يرص على اسنانه وكال لج ك****** شنو تقصدين
حاولت احرر ايدي منه احسها رادت تنكسر وكمت ابجي واحاول ادفع بيه كتله اخخخ قاسم ايدي اخخخخ ...
اقترب عليه وطبع راشدي على خدي حسيت اذاناتي كامن يصفرن بس مااحسيت بالوجع بكثر وجع ايدي ظليت اضرب بصدره حتى يبتعد عن ايدي بس عبس حسيت عيوني رادن يطلعن من مكانهن من كد الالم ظليت اتوسل بي وابوس بيده حتى يعوف ايدي وهو ولا همه عبالك حايط كدامي بس يضغط على ايدي بالزايد حتى يوجعني ...
منا لمن حسيت بعد مااكدر اوكف على رجليه من كد الالم وكعت بالكاع وايدي بعدها يمه ...
الله لا يشوفكم الالم لشفته ذاك اليوم مااذكر غير وكعت من طولي وظليت اصيح بعلو صوتي من الم ايدي وابجي ....
شفت جهالي اجوي يركضون وعشق وامي اصيح من جوى بعدها مااحسيت بشي ...
غير واني كاعده بالمستشفى وايدي عليها جبيرة شفت عشق كاعده كدامي بس نايمه على الكرسي لكدامي ...
صحت الها بس احسه صوتي رايح بالكوه احجي ..
كتلها عشق عشق ....
هي راسن فزت واجتي يمي باستني وتبجي كتلها شكو كالت ياعمري اسوده عليه ياريت بيه ولا بيج انكسرت ايدج الله ينتقم من السبب ...
كتلها منو جابني لهنا كالت قاسم بس هسه هو راح لماما صاعد ضغطها ...
كتلها اسوده عليه خما بيها شي الله عليج لا اضمين عليه ...
كالت لا ياعمري لا تخافين مابيها شي بس صعد ضغطها وخابرت نور قاسم وهو رجع لبيت هم يجيب فلوس وهم يشوف ماما ...
واحنا جاي نحجي دخل الدكتور باوعلي وبتسم وكال واخيرا الاميرة النائمه كعدت والله اني عبالي تحتاجين تعويذه حتى اكعدين ....
كلت بقلبي اعععع شكد ثكيل دمه يعني ابدا مو وكته هذا الحجي ...
هو طبعا شاب يعني يطلع عمره  بالثلاثين  هيج شي ...
باوعلي وكال شلون انكسرت ايدج يعني تعرضتي لعنف لو شي احجي لا تخافين ..
اني باوعت لعشق وكتله لا وكعت وانكسرت ايدي ...
هو طبك حواجبه وعبالك مامقتنع بحجيه وكال اذا متعرضه لاي عنف او تهديد لا تخافين تر الحكومه والقانون يوكفون وياج ...
اني ضجت وكتلها بنبرة عاليه يااخي كتلك مامتعرضه يعني اي شخص ينكسر ايده معنها متعرض لعنف ...
هو كال لا طبعا بس شفت ايدج بيها اثار ضرب ...
بعدني مااحجيت اجى الغضب طابك حواجبه وكال شكو خير ؟
كال اله الدكتور اجيت اسأل لغرام شكم سؤال ..
شفت وجه قاسم انكلب احمر واجى لزم قميص الدكتور من ركبته وكال ولك شلون اتكول اسم مرتي على لسانك وشمدريك بااسمها ....
الدكتور ارتبك وكال اعتذر مااعبالي زوجتك واني دكتورها لذالك اعرف اسمها اعتذر منك ...
ظل الدكتور يعتذر من قاسم والله شكلهم يموت ضحك قاسم طويل وضخم والقميص يريد ينشك من عضلاته وهذا كصير وناعم بس اشكر وحلو اعوذ بالله استغفر الله عود مريضه درت وجهي شفت عشق كاتمه ضحكتها  .....
طلع الدكتور وقاسم باوعلي وكلي تكدرين اكومين كتله بنبرة حادة شلونها امي هو مسح وجه وكال زينه جبت الها الدورة وان شاء الله مابيها شي  .....
اتوقع ماكو داعي تبقين اهنا كومي نرجع لبيت هم اريح الج ...
عشق كالت اله لا الدكتور ...
بعدها مااكملت كال انعل ابو الدكتور كومي غرام خلي نرجع لبيت  .....
اني درت وجهي وكتله احسه نفسي تعبانه ودايخه اريد ابقى اهنا حتى مااكدر اكوم ...
هو كذب بس اريد اعاند ....
هو كال اي عادي اجيب الج عربانه والسيارة موجوده كدام الباب وبعدين مااتريدين اشوفين امج خطيه مريضه ...
اني راسن فزيت وكمت كتله انت مو كلت ماابيها شي امي ......
كال خفت عليج لان مريضه يله كومي نروح نشوفها ...
لبست عباتي على السريع وظليت اركض اني وعشق على الرغم وجع ايدي يصل عليه صل بس من سمعت باامي خفت صاير بيها شي الافكار السودة ملت راسي ...
مااصدكت وصلت لبيت وراحت راكض لغرفتها شفتها كاعده تقرء قرءان ونور كاعده يمها اول مالشافتني دموعها كامن ينزلن وفتحت ايديها اليه راحت راكضت لحظنها وكمت ابجي خفت ذيج الحظه هواي حسيت اغلى شي عندي بالدنيا راح افقده كتلها ماما بيج شي يأذيج شي اصيح قاسم يااخذج لدكتور ...
مسحت على راسي وكالت لا يايوم مابيه شي هو شويه هبوط ماادري صعد ضغطي والحمدالله هسه بلعت دوايه بس خفت عليج يايمه شبيه شلون انكسرت ايدج ...
كتلها وكعت كان الحمام بي ماي وزلكت ...
نور كالت طول عمرج ثوله وماتنتبهين هبطتينا خالي بلاش ...
كتلها والله اعتذر منج ست نور كعدتج بهيج وكت وكطعنا نومج
كالت يوووو شو ولي ماادري انتي واختج صاير ولا ينحجي وياجن ...
امي كالت اشش سكتن راسي يوجعني انتن اخوات المفروض قلب على قلب مو مثل العدوات وانتي يانور المفروض اتكولين لاختج الحمدالله على سلامتها مو هذا الحجي ...
كتلها عوفيها يوم اني هم تعبانه صاعده انام اذا تحتاجين شي صحلي ...
كالت نور ليش اني مو بعينج مو نايمه يمها
اني اجاهلتها وصعدت يعني عبالك ناقصني هذي الكلبه صعدت لغرفه فتحت الباب على قاسم شفته جاي يبدل كتله شنو انت مااتخاف من الله هيج تهبطني على امي ..
هو بتسم وكال لعد شسوي انتي لزكتي بالمستشفى وكلت هذي ماتطلع اذا مااسوي فضيحه ..
باوعت عليه بقرف وعفته وراحت ...
شكد حقير بعمري كلها مااشفت انسان حقير وجلب مثله يعني ماكافي كسر هبطني على امي ياربي شلون بيه اموت وخلص منه استغفر الله ياربي ...
طبيت لغرفه شفت عشق كاعده وفاتحه كتبها ...
راحت كعدت يمها بالي بمكان ثاني ماادري احسه الدنيا كلها مسدودة بوجهي ...
فزيت على صوت عشق وهي تحجي وياي ...
عشق ...هووو غرام وين بالج
غرام ... وياج شكوو
عشق .... شبيج صافيه ومهمومه
غرام.... تعبانه عشق والله تعبت
عشق ... انتي اختارتي هذا ختيارج المفروض تتحملي
غرام  باوعتلها مصدومه
... شنو ختياري شبيج انتي يااختيار يمه مو ابوج جبرني
عشق ...صح الله يرحمه جبرج بس من قاسم انطاج غرصه الاختيار وكلج تكدرين تطلقين انتي رفضتي وفضلتي تعيشين وياه صح لو لا
غرام ... صحيح بس هم كنت مجبورة مو قصه حبيته لو شي بس خفت اذا عفته هم تنسد بوجهي ردت اكمل دراسه ردت اعيش اشوف حياتي يعني اذا طلقته هم يرجع يسجني محمد مااتذكري الله يرحمه هو اصلا خلى بابا يبطلنا لا ازعلين مني سجن محمد مايقل عن ابوج ...
شفت قاسم ملاك انسان مثقف واعي ومايمد ايده على اخواته ولا فد يوم شفته صيح عليهن تعشمت بي وكلت يمكن مااحصل انسان مثله يعوفني حرة اطلع واطب وادرس بس طلع على حقيقته انسان متخلف ومايخاف الله لج حتى بدايه زواجنا انطاني موبايل وفد يوم اجى من الشغل وشافني قافله الباب وجاي اخابر امي وهو تخبل لو اشوفي تخبل منا لمن اخذ الموبايل يبه فك ....
عشق ... عوفي ماامجبورة عليه ومحد يكدر يجبرج
غرام .... والله يالله انتي غبيه شبيج بابا قابل ماافكرت بيها اذا عفته ياخذ جهالي ويحرمني منهم
عشق ... القانون بصفج والحضانه دائما لام
غرام .. شبيج نسيتي هو قاضي يعني القانون بيده
عشق ... اففف زين ليش ماتتقربين منه اشوفين شبي ليش تغير شبيج غرام تر قاسم حباب لا تنسين وكفاته ويانا وتر هو يحبج ويغار عليج مااشفته شلون ضرب الدكتور
غرام.. هههه حبي قاسم مايحبني هو يحب انسانه وحده وبس لا عبالج اني لو ماابويه جبره عليه فلا يزوجني حتى من رفضت الطلاق منه حسيته تغير ميه وثمانين درجه وبلكوه  يقترب مني ...
عشق .... شوفي طلعي هذا التفكير من راسج عبالج يحب نور
غرام ... اي حبي مااشفتي شلون تغير من شاف نور على ضحك وتحشيش لج الله عليج صار شكم سنه اخر مرة شفتي كعد يمنا ويضحك لج يحبها اني اشوف نظراته كلها حب عمري مااشفته هيج يباوعلي
عشق .... والله ماادري زين بهذي الحاله شنو راح اسوين فهميني يعني تبقين انتي وياه على هذا الصراع تر ماايصير ...
غرام ... ماادري الله كريم خلي ابلع دوايه وانام لان ايدي كامت توجعني
عشق ... اني هم انام لان اتاخر الوقت
_________________________________________
عشق ... كعدت الصبح بلكوه راسي يوجعني لان البارحه تاخرت بالنوم شفت غرام نايمه اخذت غراضي وطلعت ..
نزلت شفت ماما ونور كاعدات يتريكن صبحت عليهن وامي سألتني على غرام كتلها زينه ..
هم لبست عباتي وطلعت لان كعدت متاخرة طلعت وكان اشوف نفس السياره اففففف ياربي والله مااناقصني راسي يوجعني ...
كمت امشي سرع والشارع يخوف عبالك الدنيا الفجر لان ضباب وماكو شمس ..
السيارة صارت قريبه عليه واني بعد لو اذبحوني نقطه دم مابيه ...
نزل جام السيارة باوعتله شاب ..
خفت بالزايد وراح تفكيري بعيد كمت امشي سرع منا لمن وكعت على وجهي بس مااهتميت لوكعتي كثر خوفي من وكف السيارة ونزل اجى قريب عليه ومد ايده وكلي بصوت خشن الله الله شبيج كومي ...
اني كتله بصوت يرجف شتريد الله يخليج عوفني
هو رفع حاجبه وكال اني شنو مسويلج غير وكعتي وردت اساعدج ....
اني وكفت وكتله شكرا مااحتاج مساعده منك مشيت عنده مسافه ولتفتت شفته واكف بنفس المكان ويباوعلي ويبتسم كتله بصوت مسموع ياريت تبطل تلحكني عيب عليك هذا الحركات تر انت مو مراهق واسوي هيج ...
هو ضحك بصوت عالي وكال أحبك جداً وأعرف أن الطريق إلى المستحيل طويـل وأعرف أنك ست النساء وليس لدي بديـل وأعرف أن زمان الحنيـن انتهى ومات الكلام الجميل لست النساء ماذا نقول أحبك جدا... أحبك جداً وأعرف أني أعيش بمنفى وأنتِ بمنفى وبيني وبينك ريحٌ وغيمٌ وبرقٌ ورعدٌ وثلجٌ ونـار وأعرف أن الوصول لعينيك وهمٌ وأعرف أن الوصول إليك انتحـار
( بقلم الشاعر نزار قباني )
اني ظليت صافنه عليه ومستغربه وهو ركب سيارته وراح بس هو شمدري شعرفه هذي القصيدة مالت نزار القباني احبها بدأ الخوف يوصل لقلبي ...
راحت على السريع لمعهد دخلت محاظرات بس اكذب اذا كلت ركزت وياهم لو افتهمت منهم شي كان تفكري كوله بهذا الشخص انسان يخوف ضخم كولش وعنده لحيه بس خفيفه شكله مو غريب عليه بس شمدري اني احب هذي القصيدة يعني معقوله صدفه لو ...
لا عيني اكيد صدفه مبين انسان تافه ومراهق ومسونجي ...
طلعت من المعهد وكل ساعه التفت ورايه مااشفته الحمدالله ...
طبيت البيت شفت الجهال راجعين قبلي اصلا اليوم رجعت بال١ ونص اتاخرت على الفاضي اصلا ماافتهمت شي   ....
دخلت راسن لغرفتي غسلت وبدلت نزلت شفت غرام بغرفه ماما هي ونور كاعدين استغربت شعجب اليوم كوله صدمه يعني ماافد يوم كعدت غرام ونور ومااتعاركن ...
كعدت يمهن وامي بدأت تسألني على دراستي وفدوة مهى جابت غدى اليه والها وكالت خاله مااكلت وانتظرتج منا لمن تجين كعدت اكلت وياها ونور تحجي على حياتها برا وشكد حلوة متحررين باوعت بعيون غرام شفت تشتهي الحياة الكانت عايشتها نور كل انسان اله احلامه يمكن البعض يشوفها تافه بس يبقى هذا الشي بنفسه ويتمنى يحقق ...
المهم كملت غداء غسلت المواعين وصعدت اقرء كلت بلكت اكدر افهم شنو شرحوا ...
اخذت كتبي وصعدت فوك حاولت افهم قدر المستطاع وكلت هم باجر اخلي وحدة من صديقاتي تشرحلي ...
جمعت كتبي وطبيت لغرفه بعدما متت من البرد ماادري ليش احب اقرء بالسطح ..يمكن لان مساحه مفتوحه واكدر اشوف السماء وهدوء مااكو احد ...
فتحت فوني وكان اشوف شي صدك فاجئني خلاني بحاله صدمه حسيت جسمي جمد بمكانه....
يتبع ....
السلام عليكم شلونكم حبايبي عساكم بخير