ترك بصماته على جسدي

البارت الرابع الجزء الثاني

غرام ..... ههههه والله عفيه طلعت على حقيقتك ياسيادة القاضي المحترم صرت تقلد عليه يااستاذ هسه صرت مااعجبك هسه صرت عجوزة وتلعب نفسك مني
دموعي صارن ينزل وحدهن دفعت ايده وكتله انت انت اخذت شبابي وحيلي انت لوصلتني هذي الحاله من قوانينك من تخلفك اي انت متخلف لعد اكو رجال ماايخلي مرته تطلع من البيت فوك السنه انت وصلتني لهذي الحاله بضربك واهانتك اليه خليتني اتخلى عن دراستي ومستقبلي حتى ابقى خدامه الك ولجهالك وشحصلت منك هاااا شخصلت بس الغلط والشتم والضرب ليش قاسم ليش مو انت كلت اصير الج اب واعوضج عن كولشي مو كتلي اصير الج دواء اصير الج سند لو هذا كل حجي ليش تغير قاسم ليششش فهمني
قاسم .. اشششش ولج نصي صوتج لا اركع راسج بالحايط امشي طلعي راسي يوجعني مااناقصني حجيج
غرام .... هسه صرت اوجع راسك ....
بعدني مااكملت حجي لزمني من ايدي وشمرني برى الغرفه وقفل الباب ...
كملت واني افكر بكل كلمه كالها اني يلعب نفسه مني ليش شبيه شو بعدني صغيرة لعد من اكبر والمرض ياكل جسمي شسوي هذا بيه يزوج عليه وذبني هههه والله يسويها مااستغرب ...
كعدت يم الدرج وكعدت ابجي منا لمن عيوني صارن مثل النار يحركني مااكدرت انام ولا نص ساعه احسه راسي يريد ينفجر ...
ليش يصير بيه هيج ليشش حظي هيج ...
راحت وكفت كدام المرايه فتحت شعري الاشقر الطويل ولا مرة بحياتي صبغته اجوز من مرة وحدة من ازوجت ...
كولش طويل شعري بس تعبان ومتقصف منظره مو حلو شكد كنت اعتني روحي بي بس من ازوجت وجهال نسيت نفسي فزيت على صوت عشق
عشق .... شبيج خبله شمكعدج هسه الساعه بال٤ ونص
غرام ... مابيه بس راسي يوجعني ومااكدرت انام
عشق .... شبي صوتج بله باوعيلي
يااا ولج شبيهن عيونج ليش هيج حمر
غرام ... مابيه كتلك راسي يوجعني
عشق ... لا اعرفج شغلتج مو خاليه كومي نطب الغرفه كومي يله
غرام ....
كمت وياه عشق لغرفه واني احاول اضم ادموعي بس ماادري شلون كل ماتسألني شبيج اني دموعي وحدهن ينزلن ....
كتلها واني اشهك عشق اني شكلي مثل العجوزة اني مو حلوة الله عليج كوليلي
كالت شبيج غرام شتحجين انتي
كتلها بس كوليلي الله عليج اني مو حلوة
كالت والله حلوة وتجننين منو كلج هذا الحجي
اني خليت ايدي على وجهي وكعدت ابجي . ....
لزمتني عشق وخلتني بحظنها ومااذكر يمكن غفيت ونمت مااحسيت على شي من الم راسي وعيوني ...
كعدت الصبح حتى مااكدر اشيل راسي من المخدة باوعت الساعه بال١ونص الظهر اففف هذي اول مرة من زواج لهسه انام لهذا الوكت ...
ظليت متمددة على الجربايه واسمع صوت جهالي من جوى اففف شصير لون نرجع نقطه الصفر يعني ماادري شكد حلو لو حياتنا حلوة يعني ابويه حباب امي مامتوفيه لو مكمله دراستي لو عشت قصه حب مثل التراك لو مزوجه انسان احبه ويحبني لو ولو ولو كلها لو بس هذني الاحلام حلوة نعيشها لو بس دقائق
زين ليش احلام ليش مااعوف قاسم وابدأ من جديد اكمل دراستي واعيش بغداد وادخل الجامعه اشو بعدني صغيرة شنو معلقه روحي وياه انسان ماايقدرني ولا يحبني انسان معقد مثله ماعنده لا تفاهم ولا عقل كبر ولا عبالك قاضي بدايه الزواج عبالي ملاك اشو طلع شيطان لو هذا حظي الحمدالله والشكر على كل حال ...
زين وجهالي شنو ذنبهم احرمهم من ابوهم اذا اصلا قبل ينطيني اظفر منهم اعرفه قاسم متعلق هواي بيهم مستحيل يفرط بيهم ولا اني اكدر افرض بيهم
ظل افكر هواي واتخيل منا لمن راسي راد ينفجر اتعوذت من الشيطان وكمت نزلت اول ماشافوني جهالي اجوي يركضون ويحضنون بيه وخايفين عليه عبالك كنت مسافرة ورجعت الهم خليتهم بحظني وابوس بيهم الله لا يحرمني منكم ياماما لو ماانتوا كان من زمان هجيت من البيت ردت عليه عشق .. اذا تهجين اخذيني وياج هههههه وجهال كاموا يطفرون من يمهم اني اخذيني واني هم اخذيني عبالك اني ظليت اضحك الحمدالله والشكر شكد كنت مهمومه بس شفت عائلتي الصغيرة فرحت على صوتهم امي طلعت من الغرفه من شفت وجها حسيت الاطمنئان اجتي كعدت يمي وصارت تمسح على راسي باوعت لعشق وكالت الها يمه اخذي الجهال خلي يلعبون بالحديقه ...
اخذت عشق الجهال وراحت ...
باوعتلي امي وكالتلي يمه غرام لا عبالج اني نايمه هنا وماادري شكو بالدنيا تر يايمه انتي بنيتي وعزيزة قلبي احسه بيج لا عبالك مااعندج سند الله سندج يايمه واني اوكف وياج لاخر يوم بعمري
كتلها اني دموعي كامن يوكعن وحدهن وكتلها يوم اني تعبت من قاسم ضجت منه مااريده
لزمتني خلتني بحضنها كالت حبيبتي غرومه من زوجج ابوج لقاسم اني كنت رافضه والله شاهد عليه شكد حجيت وياه شكد كتله ياوثاب عوف البنيه بعدها صغيرة مو لان قاسم مو خوش ولد لا والله يشهد عليه قاسم ولد حباب وقلبه طيب بس يايمه حسيت انو فرق العمر البينكم هو الحاجز هو جبير يعني عمره بنهايه الاربعين وانتي اصلا مااداخله بال٣٠ هو يخاف عليج وياغار خاف تروحين من ايده وبعدج صغيرة وناعمه مثل الوردة جاي تتفتحين يمه حبيبتي المفروض تتحملين زوجج وتثبتين اله انو حبج اله مراح يتغير مهما صار .....
كتلها يوم هو ماايحبني اصلا ماطايقني شلون اثبت اله اذا عقله طكه ونص
هي ضحكت وكالت ولج يمه عقل قاسم يوزن بلد بس هو عنيد هو قاسم تعرفين يشبه وثاب والله من اشوف حركاته وتصرفاته حجيه نفس وثاب مااطلع على وابوه الله يرحمه ابوه كان هادء حتى صوته مايطلع الله يرحمه اذكر سمر الله يرحمها سولفتلي كالت من راحت مرته كعد يبجي من طيبه قلبه خايف على جهاله من الضياع ...
كتلها يااااا خطيه لعد شكد حباب كان امداه حظي ليش مااطلع قاسم عليه ...
هي ضحكت وكالت يمه قاسم قلبه طيب وحباب بس هو عصبي ويخاف عليج انتي مااشوفين شلون حنين على جهاله مااينام اذا ماايشوفهم ...
كتلها حنين بس على جهاله واني يضربني بالنعال
كالت يمه لا ازعلين مني بس انتي مامهتمه بنفسج يمته اخر مرة صبغتي شعرج اهتميتي بنفسج يمت اخر مرة انتبهتي لجسمج شو يمه انتي تلبسين دشداشه وشعرضها مثل دشداشتي شبيج ياامي غير هذا بيتج محد غريب بي لبسي تراك اهتمي بنفسج ...
كتلها يوم والله انتي تحجين واحد بالشهر اكلج هو يمت اخر مرة خلاني اطلع اشوف الدنيا راح يصير سنه من اخر مرة طلعت بيها اشو هو يطلع يشتريلي هذني الدشداشات وشمرهن بخلقتي وحتى ماالحك اهتم بنفسي وين الحك اشو اكعد من ٥ ونص الصبح على ما اصلي واسوي ريوك وامشي الجهال لمدارس ونواب انظف البيت اجلف جلف حتى يعجب استاذ قاسم انوب يجون من المدرسه اصب الغداء واغسل الاماعين انوب اغسل المطبخ مرة ثانيه خاف يشتم استاذ قاسم ريحه مو طيبه لو يشوف بقعت دهن ...
وانوب اكعد اقري الجهال هو بس نهى اقريها ٥ ساعات هذي اذا واجبات يوميه واذا امتحان شهري ماانام لصبح اظل نقرء وغير ملك اقرايتها بله محمد مرات تقري عشق مرتاحه منه يله يوم كوليلي يمت افضى اعتني بنفسي هااا
هي جرت نفس وكالت يمه اني اقدر تعبج ياعمري بس الزلم مااعدهم تقدير يريدون المراة كامله من كل جاوانبهامن الطبخ لتنظيف لو لنظافتها حبيبتي ابوج الله يرحمه كان يتخبل من مراة تشتغل باليل كان يكول النا كعدن لا تفترن على راسي كلنا انكمل شغلنا ونعزل ومن المغرب مسوين العشاء وهو من يجي انكعد اني وامج الله يرحمها يمه ونشرب جاي واني اخلي حمودي بحظني ...
امي ذكرت محمد صارت تبجي ودموعها عشره عشرة بلكوه هدئتها باوعتلي وكلتلي يايمه غرام اريد انام بقبري وانتي وعشق مرتاحات مااريد اموت واني ماامرتاحه من جهجن اني بالي يمج انتي وعشق مااكدر انام واني افكر بيجن انتن وامانه سمر الله يرحمها ....
شبكتها وبجيت كتلها يوم لا تحجين هيج احنا مااعدنا غيرج لا تحجين هيج اموت اذا لا سامح الله صار الج شي ...
كالت يمه حبيبتي الاعمار بيد الله اني اتمنى لو هذا عمري اشيله كله وانطي لمحمد ويعيش ويبقى فوك روسجن يحميجن ....
كتلها يوم عفيه لا تحجين هيج يمه ابوس ايدج سكتي منو النا غيرج مااعدنا احد غير يوم
حضنتها وكعدت ابجي الله يطول عمرج النا يالغاليه
________________________________________
عشق ..... ايامنا الحلوة راحت بسرعه بقت ايام عصبه وايام مثل السم س هم لازم نتحملها ونكول هذا قدر الله هو هذا حالنا مااكو انسان سعيد شكد ماالله انطى الحمدالله على كل حال ....
مرت الايام سريعه اني سجلت سادس علمي خارجي جابلي الكتب قاسم وبدأت اقرء بس صعبه كولش صعبه ماادبرتها وردت الزم الكتب اذبهن وابطل بس امي مااقبلت وصارت عصبيه عليه اصلا ماما ضايجه هذا الفترة علمود غرام ودائما متعصبه علمودها وخاصه من اشوف تعامل قاسم وياه غرام ......
المهم امي من شافتني صدك ماادبر المواد وغرام مااعدها واهسه تقريني بلكوه قنعت قاسم حتى اسجل خصوصي وبالغعل راح قاسم وسجلني بكل المواد احياء وكيمياء وفيزياء ورياضيات انكليزي وعربي تقريبا كلهن ....
المعهد كان قريب علينا بعد فرعين لذالك مااسجلت خط طبعا بعد يومين تبدأ المحاظرات واغلبهن الصبح افففف يعني كعده من الصبح واني اكره كعده الصبح على الرغم قبل كنت اكعد من الخمسه الصبح بس تقريبا صار اليه فترة كولش جبيرة ماانام بليل اصلا نسيت شلون انام باليل اظل كاعده باليل وبالنهار انام ....
مرن اليومين واستعديت عبالك عندي معركه كعدت من الحمسه الصبح طبيت غسلت ومشطت شعري مااراح اكذب واكول صليت لان من من اتوفى محمد تركت صلاتي ادري حرام بس ماادري شبي بس يعني قبل خطوبتي من محمد هواي صليت وهواي دعيت وختمت القراءن اكثر من ثلاث مرات وكنت اصوم كل خميس والاثنين حتى يصير محمد من قسمتي بس من صار ساعات اتخربطت كل حياتي واحلامي ....
فزيت من افكاري على صوت غرام اصيح اليه لبست بنطرون اسود وكيمونه بيضاء وبيها كتابه بالاسود لبست شالي على السريع واخذت كتبي وملزمتي وعبايتي ونزلت شفت غرام مخبوصه بالجهال هم عدهم دوام واكفت اساعدها بالريوك وهي تنصح وتنطي ارشادات لا تقتربين من احد وانتبهي من الولد واكو بنات مو خوش ابتعدي عنهم وخلي بالج يم المدرس وكعدي اول رحله حتى تستوعبين واذا ماافتهمتي شي سألي المدرس لا اصيرين مثل الثوله وتستحين ولا تتوترين صري طبعيه كعدت اتريك وياه الجهال لحد مااصارت بال٧ ونص كان عندي محاظرة رياضيات طلعت وياه الجهال مدرستهم قريبه عليه اول مااطلعت من الباب شفت واحد واكف وياه قاسم يم الباب بس اني عبالك شايفته قبل اندار عليه قاسم نزلت راسي كلي عشق صعدي بالسيارة خلي اوصلج واوصي عليج اني مااناقشته راسن صعدت لان كنت خجلانه من نظرات هذا الواكف وياه صعدت اشو قاسم صعد وهذا
اني ظليت مركزة على الشباك واففففف حيل صار اليه شكد مالطالعه والله ياحبيبي مايحلى اليه اطلع من البيت واعيش واتنفس وانت ماموجود سامحني ياعمري ....
راسن وصلنا لمعهد نزلت وقاسم نزل وياي طبينا لمعهد وكان كولش ضخم وحلو اول مرة ادخل مكان ضخم وجبير هلكد وبي شكد ناس وشكد بنات وشباب كعد قاسم ينصحني مثل نصائح غرام عبالك طفله كدامه بين كلمه والثانيه يكلي افتهمتي ....
دخلني يم اداره المعهد وحجى وياهم واكو مدرسه اخذتني لقاعة لدرسون بيها شفت المدرس هستوى دخل اني هم سلمت ودخلت شفت مكان يم بنيه كعدت يمها وبدأ المدرس شرح صراحه يخبل شرحه والقاعه على الرغم فوك ال٥٠ شخص بيها بس هادئه وساعد على التركيز واخر شي بالمحاظرة امتحنا بنفس المادة وطلعنا ....
اتعرفت على البنيه الكاعده بصفي اسمها فاتن بنيه كولش حبابه واجتماعيه عرفتني على صديقاتها ظلينا كاعدين نتظر المحاظرة الثانيه بال١٠ تبدأ ....
ظلينا كعدين منا لمن خلصت المحاظرة وطلعنا كان كل يوم مخاظرتين لو ثلاث محاظرت ....
تقريبا بال١١ ونص طلعت اتمشى وكفت يم المحل اشتري شكم حاجه وطلعت لاحظت سيارة سودا تمشي ورايه اني كولش خفت وفوكاها على حظي الشارع فارغ ماكو احد اني لزمت خليتهن بالعلاكه لبيهن غراض ولزمت عباتي حيل واركض خويه عامر والله العظيم لو اشوفوني شلون ركضت مثل باتمان وهذي عباتي طايرة بالهوى وعباس اخرع .......
وصلت البيت بلكوه اتنفس راسن طبيت لبيت حتى بدون مااباوع ورايه ....
اول مااطبيت واتفاجئ .....
يتبع .....
صباحكم عسل حبايبي عساكم بخير وصحه وعافيه طبعا ماكو تفاعل بس حبيت انزل بارت لخاطر بعضكم المهم ماعندي وقت محدد اكتب بي وانشر لذالك بقت لكتب انشر وشكرا عسى صابحكم خير مع السلامه