تيجان من النار

التاج ٦

#تيجان-من النار ٣٦

الكاتبة chra kirkuki

رحمة

رحمة : هذا الصوت مو غريب دائما اتذكره بس نبرته متغيره اندار عليه لو اكمل طريقي وادخل لمكتبي واقفل الباب

مسعود : صرت كدامها رموشها تتحرك مغمضه عينها حقج متتصورين اشكد تمنيت هاللحظه عرفت بعدج على الوعد شلونج

رحمة : شنو يحجي هذا ياوعد فتحت عيني متغير كبران الشيب باين من شعره تجاعيد تحت عينه شبسرعه كبر اهلا خير جاي على محسن حجيت ويا برسميه

مسعود : لحد الان اعشق مريم فخرالدين لان تشبهج تتذكرين ايام زمان

رحمة : اي اتذكر امك طردتنا وانت واكف مسويت شي

مسعود : جيت اشوفج مشتاق الج

رحمة : باوعت عليه ورجعت باوعت على المعمل وانت تشوف هذا مكان تحجي بي اللي تريده امك ماتت لو بعدها على نفس حركات ايام زمان

مسعود : بعدج تتذكرين رحمة امي اشكد جانت قويه هسه كبرت وحيلها انهد وابويه يلبس مناظر تعبت وياهم تسمحين اعزمج بمكان نكعد نسولف براحتنا

رحمة : مرفضت اخذت حقيبتي ورحت ويا وصل يم سيارته قارنتها بسيارتي اكو فرق بيناتها موديله قديم وارخص قاطعته نروح مشي احسن

مسعود : براحتج تدللين اللي تردي يصير وجوعان ناكل فدمرة اعرف مطاعم اكلها تجنن بس لو نروح بسياره احسن لان بعيد عن هالسوق الشعبي

رحمة : اني اخذك لأحسن مطعم مشينا هو يحجي الوان واشكال اني اسمع بس اقارن حياته اللي عاشها وحياتي اللي عشتها عرفت من خلال كلامه حالتهم المادية مو زينه هذاك المحل

مسعود : تتشاقين اكيد تحبين تاكلين بمطعم شعبي

رحمة : كعدنا ميز صغير وكراسي حديد قديمه كلش سلمت على صاحبه رجال جبير بالعمر هو واولاده يشتغلون بالمحل ماعون بصل وطماطه وعليها المشاوي وخبزه حاره حسيته معاجبه المكان يعني يشوف نفسه مو من مستوى هذا اول مكان اكل بي مشاوي بعد ماتوفى والدي لان نسيت شنو مشاوي ولحم من بعده جابني عبد الملك بدايه زواجنا اكلت اهوايه الرجال اشرت عليه صاحبه كال هاي منين جايبها متلحك تبلع اللقمه تطلب شيش ثاني تعودت اجي ويا

مسعود:وانتي ليش جبتينا لمكان هو جان يجيبج عليه والله بخت هم ميت وانتي تتذكرينه

رحمة : هو مو ميت عايش بداخلي

مسعود : افهمج لان جان بمثابة اب الج شعور عادي اريد نرجع مثل قبل واعوضج عن كلشي