تيجان من النار

الشعلة الثامنة عشر

تيجان-من-النار١٨

الكاتبةchra kirkuki

رحمة : جريت نفس اريد انهزم من واقعي  انطاني ظهره جسمي ارتخى بعد تشنجات   كمت من مكاني  نزلت للحمام اغسل اكرهه روحي واكرهه كلشي حواليه  يصير عندي حالة عصبية  شويه شويه ويفك عندي كلما اذب مي على جسمي اريد انسى اللي صار لحد يمتى استحمل لايوم لايومين لفيت شعري وطلعت سويت  جاي   مريت يم غرفه فوزيه اسمع صوت زياد دكيت الباب مرتين وفتحتها يلعب  فوك السرير وفوزيه تصلي شلته وبسته باوعت عليه لخاطركم اتحمل كلشي  ميشبه احد جماله غريب ماكو شخص يشوفه ميحبه

فوزية :شمنزلج من فوك ليش عايفه عبد الملك وحده متبطلين من سوالفج لحد يمتى اعلمج ٦ اشهر متعودتي عليه مقصر بشي

رحمة : تنهدت بألم ممقصر بشي والنعم منه اني ضايجه من روحي

فوزيه : بخوف وقلق عيني على الباب لايجي عبد الملك ويسمع بعدج تحبي لابن خالج مو

رحمة : بضجر من ألحاحها وسؤالها يوميا لنفس الموضوع كتلج نسيته ميهمني بعد اصلا حرام افكر بغير عبد الملك اتصور انتي علمتيني طلعت من غرفتها دخلت للغرفه اللي بصفها عزيز ومحسن نايمين بسلام انتقلو بعد زواجي وطلبي من عبد الملك يصيرون داخل البيت حتى اشوفهم واروحلهم بسهوله نور خفيف تجي من الخارج اوراق على الميز مبعثر شلت وحده صوره بيت اكيد عزيز هوايته يرسم بيوت صاير طويل كبران ومحسن اللي ملابسه نصه بالكاع مبين عليه الصحه سمنان وينج يمه تجين تشوفين اولادج زياد آية من الجمال وعزيز كبر وخط شواربه وصوته تغير ومحسن اللي اضلاعه جانت بارزه هسة مختفيه شقاوته وحركاته ودلعه المفروض انتي تعيشين هالاشياء ويانه بستهم وخليت البطانيه عليهم طلعت لمصيري خطواتي بطيئة رجعت انام عبد الملك اندار عليه

عبد الملك : رحمة لحد يمتى تشيلين هم اخوانج لوحدج شاركيني همومج اني بظهرج ليش تحسسيني اني مو شي بحياتج

رحمة : عرفت مراقبني جاوبته محد يكدر يشيل اي شي عني عبد الملك اني امهم مو اختهم اتمنى انطيهم روحي اخاف عليهم انت متقصر بس متكدر تصير ام ولا اب

عبد الملك : براحتج رحمة كبرتي مديت ايدي على شعرها احجيلج قصه عن ايام زمان واهلنا

رحمة : بضحكة موجوعه لا اريدك تحجيلي اي شي يصير بالسوك وبشغلك اصدقائك

عبد الملك : لايكون ناويه تصيرين مختار المنطقه الفجر ناس نايمه واني اسولفلج عن فلان وعلان نامي

رحمة : اذا تحبني متنام مو تكولي انتي حبيبتي احجيلي كلشي يتعلق بشغلك

عبد الملك : الله منطاني ولد يمكن انتي تصيرين خلفه مالتي بأخر ايام عمري اعرفج متنامين الااحجيلج كلشي