Her Gangster Attitude

Chapter 8: Bunch of New Friends

IYA

Hindi ko alam kung anong nangyari pero nang umalis si Mam, nanahimik ang buong klase at lahat sila ay parang mga timang habang nakatingin sa akin.

"May problema ba?" Medyo nawiwirduhan kong tanong.

Nanatili lang silang tahimik. Huminga ako ng malalim saka humalukipkip. At naisip ko, kagagandang tao nitong mga nasa City X mga abnormal naman. Habang pinagmamasdan nila ako ay pinagmamasdan ko rin sila. Mahirap na, mamaya bigla na lang akong kuyugin ng mga ito kapag hindi ako nakatingin.

Matapos ang mahaba-habang titigan at pakiramdaman ay isang bakla ang dahan-dahang lumapit sa akin. Kulang na lang ay tumilapon sa magkabilang direksyon ang magkabilang balakang n'ya dahil sa paraan ng lakad n'yang parang kumikembot na ewan.

"Ahm, H-hello. Ako nga pala si Mark Jose. Pero mas gugustuhin ko kung tatawagin mo akong Josiah, alam mo kase...dyosa talaga ako. Na-trap lang ako sa uhm, sa body na 'to oh," sabi ng baklang nagkanulo sa akin kanina. Nakasuot s'ya ng school uniform na panglalaki pero kakaiba ang way ng pagsusuot n'ya. Feminine and sexy ang dating. Tipikal na boses ng bakla ang tinig n'ya.

"Alam mo kase...si Iker de Ayala...ahm...hindi talaga s'ya tao, monster s'ya. Kaya sorry I have to sumbong you kanina or else kami ang pagbabalingan n'ya,"

Nag-make face pa s'ya pagkatapos at hindi pa nakontento sa pagkakatayo sa harapan ko, lumipat s'ya sa bakanteng upuan na nasa tabi ko.

"Peace na tayo ha. Diba sabi ni Mam family dapat tayong lahat dito? Trash ang tingin sa ating mga taga-section C ng mga nasa section A and B. Pero beshy, iba ka. Nailampaso mo si Iker baby. As long as kaya mo s'yang hawakan sa leeg, kaya mong kontrolin ang lahat. Iba ka besh, panalo,"

Iker baby?

Kaya kong kontrolin ang lahat?

Anong pinagsasasabi ng baklitang 'to?

Tiningnan ko s'ya ng napakatagal. Sa totoo lang wala akong naging kaklaseng bakla noong nag-aaral pa ako sa Katahimikan Elementary School maging sa High School. May nakikita ako at nakilala pero hindi naman nagtagal ang interaksyon ko sa kanila kaya hindi ako masyadong sanay makihalubilo sa mga gay or tomboy.

"Bestfriend na tayo ha. Let's love and support each other,"

Halos tumayo lahat ng mga balahibo ko sa katawan ng bigla n'ya akong yakapin. At ang malala pa dun, ikinikiskis n'ya ang ulo n'ya sa balikat ko na parang pusa.

"Ako naman si Ayana Vine Frado. You can call me, Yana. Ang astig ng ginawa mo kanina ha. Alam mo bang isa ako sa kinakatakutan ng lahat sa school na 'to pero takot ako kay de Ayala?" Nagniningning pa ang mga mata habang nagsasalita ang isang babae na lumalapit din sa kinaoupwestuhan namin. "Pero ikaw iba ka idol!"

Naningkit ang mga mata ko habang pinagmamasdan ang bagong nilalang na papalapit sa akin. Panay ang salita n'ya habang naglalakad. Although pumasok naman lahat sa ulo ko ang mga sinabi n'ya, hindi ko maiwasang inspeksyunin ang itsura n'ya.

Wagas na wagas ang pagkakalagay ng eyeliner sa mga mata n'ya. Maganda at makinis ang kanyang mukha. Kung ang labi ni bakla ay saganang-sagana sa mala-makopang kulay, ang labi naman ng isang 'to ay maputla. Ano nga bang tawag sa ganoong kulay ng lipstick? Nude? Ewan basta feeling ko iyon ang inilagay n'ya. Ang kaunting parte ng buhok n'ya ay pula habang ang ibang parte naman ay puro itim. Ang astig ng dating nun. May suot-suot pa s'ya sa leeg na parang dog collar. At 'yang mga nakasuot sa kamay n'ya na mukha ring dog collar pero ginawa n'yang bracelets, hand collar bang tawag sa mga 'yan?

"Let's be friends,"

Hindi n'ya inalok ang kamay n'ya para kamayan ko. Bagkus ay kinuha n'ya ang kamay ko at s'ya na mismo ang nag-initiate nang handshake. Ayos 'tong mga taong 'to ah. So I have to be their friends whether I like it or not?