Love Virus( Completed)

Ch-71

👀uni & zaw👀

အချိန်တွေက တရွေ့ရွေ့ဖြင့်ကုန်ဆုံးလာသည်။ အချစ်တို့လည်း လှလှပပပွင့်ဖူးစပြုနေကြပြီ။ အမုန်းမှအစချီလာရာက အချစ်ဖြစ်သွားသလို၊ အတ္တတွေမှ အစချီလာရာက အချစ်ဖြစ်သွားသလို၊ ရန်စကားတွေမှအစချီလာရာက အချစ်ဖြစ်သွားသလို၊ မလေးနက်တဲ့အတွေးတွေမှ အစချီလာရာက အချစ်ဖြစ်သွားသလို၊ အားလုံးရဲ့အစပြုမှုက မတူညီခဲ့ကြပါဘူး။ သို့ပေသိ နောက်ဆုံးမှာတော့ ချစ်ခြင်းဆိုတဲ့ပန်းတိုင်သို့သာ ဦးတည်ခဲ့သည်။

ဘယ်အရာနဲ့ဘဲစတင်စတင် ချစ်ခြင်းဆီသာ ကူးစက်သွားသည်ဆိုတည်းက အချစ်ဟာ သေချာပေါက် ကူးစက်ရောဂါတစ်မျိုးပင်။ ဘာကာကွယ်ဆေးမှမရှိတဲ့ ကူးစက်တတ်တဲ့ဗိုင်းရပ်စ်လေးပေါ့။

ယနေ့က လျှမ်းဒီပါနဲ့လွန်းစေရာ၏ မင်္ဂလာနေ့လေးပင်။ အပူအပင်မရှိသည့် သူတို့နှစ်ဦးဟာ အခတ်အခဲတွေ အထင်လွဲမှားမှုတွေနဲ့ ကြုံခဲ့ရပါသေးသည်။ နောက်ဆုံးတော့ နှစ်ဦးတည်းကမ္ဘာကို အချစ်တို့နဲ့ဖန်တီးနိုင်ခဲ့ပြီ။

MoonLight လုပ်ငန်းစုပိုင်ရှင် ဦးလျှမ်းဒီပါနဲ့ Silverအထည်ချုပ်စက်ရုံပိုင်ရှင် ဦးလွန်းစေရာတို့၏ မင်္ဂလာဧည့်ခံပွဲဟူသည့် စကားလုံးတို့က စင်မြင့်ထက် ပိတ်ကားမှာ လှပစွာချိတ်ဆွဲထားသည်။ နှစ်ဦးလုံးက လုပ်ငန်းရှင်တွေဘဲမို့ လာရောက်ကြသည့်လူတော်တော်များများကလည်း ဂုဏ်သရေရှိလူကြီးတွေပင်။

တချို့တွေက ယောက်ျားအချင်းချင်းမို့ မသင့်တော်ရာတွေဟုထင်မှတ်ကာ တီးတိုးဆိုနေကြမယ့်သူတွေမှန်းသိပေမယ့် ကာယကံရှင်တွေကဂရုမစိုက်။ သူတို့နှစ်ဦး၏ ဤနေ့ရက်ကအဓိပ္ပါယ်ရှိသည့်နေ့ဘဲမဟုတ်လား။

ကော်ဇော်နီခင်းထားသည့်လျှောက်လမ်းအတိုင်း သတို့သားနှစ်ဦးခပ်ကြွကြွလျှောက်လှမ်းနေကြသည် သတို့သားနှစ်ဦးဟုဆိုသည့်အတိုင်း ဝတ်စားထားသည်က တကယ့်ကိုကြော့ကြော့မော့မော့။ လွန်းစေရာ၏သဘောအတိုင်း wedding suitအဖြူရောင်ကိုသာ ဆင်တူဝတ်ဆင်ထားသည့် သူတို့နှစ်ဦးမှာတကယ့်ကို လှပနေသည်။ သူတို့အရှေ့တွင်ဦးဆောင်သွားသည့် ကလေးငယ်သုံးယောက်ကလည်း သိပ်ကိုချစ်ဖို့ကောင်းနေ၏။ ဂါဝန်ဆင်တူလေးတွေဝတ်ထားပြီး ပန်းကြဲသူကကြဲ လက်စွတ်ဗန်းကိုင်သူကကိုင် ပန်းခြင်းလေးကိုင်ထားသူကကိုင်ဖြင့် မြင်ကွင်းကချစ်ဖို့ကောင်းနေ၏။