ပေးဆပ်ခြင်းဖြင့်ချစ်ပါမည် [COMPLETED] ေပးဆပ္ျခင္းျဖင့္ခ်စ္ပါမည္

ep 48

Uni + Zaw

Uni

" မင်း ဒီကိုဘာကိစ္စထပ်ရောက်လာပြန်တာလဲ? "

ဆိုင်ထဲဝင်ခါစ ထိုင်ပင်မထိုင်ရသေး အမေးခံလိုက်ရသောကြောင့်တည်စေနိုင်း စိတ်တိုသွားသည်။

" ကျွန်တော်ချိန်းထားတာရှိလို့လာတာ။ခင်ဗျားကိုလာတွေ့တာမဟုတ်လို့ စိတ်မပူနဲ့ "

ထို့နောက်အနီးဆုံးရှိ စားပွဲတစ်ခုတွင်ဝင်ထိုင်လိုက်သည်။

" Coffee တစ်ခွက် "

ဒီလောက်ပြောနေတာတောင် ဂရုမစိုက်ဘဲကော်ဖီတစ်ခွက်ပင်မှာလိုက်ပုံက ဟိုအရင်သိခဲ့တုန်းကအတိုင်းထောင့်မကျိုးအချိုးမပြေဆဲ။ဘာမှပြောမနေတော့ မီးဖိုချောင်ထဲပြန်ဝင်လာပြီး ဖိုးလုံးကိုကော်ဖီတစ်ခွက်သာဖျော်ခိုင်းလိုက်သည်။ခဏအကြာဆိုင်ထဲသို့ လူတစ်ယောက်ဝင်လာပြီးတည်စေနိုင်းရှိသောစားပွဲတွင်ဝင်ထိုင်လိုက်သည်။ဘုန်းပြည့်စုံဦးကြည့်လိုက်တော့ ထိုသူမှာယံလေး ဖြစ်နေသည်။

ကျစ်! ယံလေးကဘာလို့ဒီကောင်နဲ့ထပ်တွေ့ရတာလဲ?ထို့နောက် ယံလေးနှင့်တည်စေနိုင်းသည် ထောင့်စွန်းရှိစားပွဲသို့ ပြောင်းထိုင်ကြသည်။ဘုန်းပြည့်စုံဦး မျက်မှောင်ကုတ်မိသည်။နှစ်ယောက်သား မျက်နှာချင်းဆိုင်ထိုင်ပြီး ဘာတွေပြောနေကြတာလဲ? ယံလေးကလည်းဘာစိတ်ကူးပေါက်သည်မသိ။ဒီနေ့ကျမှအနက်ရောင်လက်ပြတ်တီရှပ်ပွပွတစ်ထည်ကို ဂျင်းဘောင်ဘီအတိုနှင့်တွဲဝတ်ထားသည်။ပုံစံကြည့်ရသည်မှာ Company ကလာဟန်မတူ။အိမ်မှာနေရင်းထလာသည်ထင် ဆံပင်တို့ခပ်ပွပွကျနေပုံက ယံလေးအား တခြားဝိုင်းရှိမိန်းကလေးများကိုမသိမသာလှည့်ကြည့်စေသည်။အရင်လိုပိန်ပိန်သေးသေး ခန္ဓာကိုယ်မဟုတ်တော့ဘဲ အတော်အသင့်ရှိသော ကြွက်သားများနှင့်လက်မောင်းတစ်လျှောက်ဖြူဖွေးဝင်းမွတ်ကာ အနက်ရောင်အင်္ကျီလက်ပြတ်နှင့်ပနံသင့်လှသည်။ယခုလိုပေါ့ပေါ့ပါးပါး လူငယ်ဆန်ဆန်ဝတ်ထားသောအခါ ယံလေး၏သွယ်သောမျက်နှာက ခါတိုင်းထက်ပို၍နုနယ်နေသည်။ခြုံငုံပြောရရင် ယံလေးသည်တကယ်ပင်ကြည့်ကောင်းပါသည်။

"အဟမ်း"

တွေးလက်စအတွေးတို့ကို ကိုယ့်ဘာသာချောင်းတစ်ချက်ဟန့်ပြီးရပ်လိုက်ရသည်။ထို့နောက်တည်စေနိုင်းက ယံလေး၏လက်မောင်းတစ်ဖက်ကိုမျက်နှာချင်းဆိုင်ကနေအသာလှမ်းကိုင်သည်။ဘုန်းပြည့်စုံဦး မျက်လုံးတို့ပြူးကျယ်သွားရသည်။အချိန်အတော်ကြာသည်အထိ ဆုပ်ကိုင်ထားပြီးစကားအချို့လည်းပြောနေသေးသည်။ယံလေးသည်လည်း ခေါင်းတညိတ်ညိတ်နှင့်ဘာမှပြန်မပြော။