ပေးဆပ်ခြင်းဖြင့်ချစ်ပါမည် [COMPLETED] ေပးဆပ္ျခင္းျဖင့္ခ်စ္ပါမည္

ep 62

Uni+Zaw

Uni

" ကိုကို!!! "

" အထဲဝင်ရအောင်ယံလေး "

ဟုဆိုကာ ကိုကိုသည် ယံလေးလက်ကိုဆွဲပြီး အခန်းထဲဝင်လာလိုက်သည်။

" ဦးဘုန်း ဒီမှာထိုင်ပါဗျ။ ဘာသောက်ဦးမလဲ? Coffee သောက်မလား? "

" မသောက်တော့ဘူး Shine။ အဓိက အရေးကြီးတာပဲပြောကြရအောင် "

ကိုကိုသည်ဘာလို့ သူ့ကို Shine ဆီခေါ်လာလဲ တွေးကြည့်၍မရ။ဒီအချိန်မှာ ကိုကိုရော၊ သူရော Shine ကိုတွေ့ဖို့မပြောနဲ့  နာမည်တောင်မကြားချင်ဘူး မဟုတ်လား။ဧည့်ခန်းရှိဆိုဖာတွင် နှစ်ယောက်အတူထိုင်သည်အထိ ကိုကိုက ယံလေးလက်ကို မလွှတ်တမ်းဆုပ်ကိုင်ပေးထားသည်။အံ့သြမှုများနှင့်အတူ မေးခွန်းများစွာပါသည့် အကြည့်နှင့်ကြည့်တော့ ကိုကိုက ယံလေးလက်ကိုတစ်ချက်ဖျစ်ညှစ်ရင်း စိတ်မပူရန်ဆိုလိုသော မျက်ဝန်းများနှင့် ပြုံးပြလာသည်။

" ဒီမှာ ဦးဘုန်းတောင်းထားတဲ့ အချက်အလက်တွေ "

File တွဲတစ်ချို့နှင့်အတူ USB memory stick နှစ်ခုကို စားပွဲပေါ်တင်ပေးရင်း Shine က မျက်နှာချင်းဆိုင်တွင် ဝင်ထိုင်လိုက်သည်။သို့သော် ယံလေးသည် အရှေ့ကိုလှည့်မလာ ဘုန်းပြည့်စုံဦးကိုသာ မမှိတ်မသုန်ကြည့်နေဆဲဖြစ်သည်။

" အင်း...... အကုန်စုံပါတယ်နော် "

" ဟိုးအရင်ကတည်းက ကျွန်တော်စုဆောင်းထားတဲ့အချက်အလက်တွေရော၊ နောက်ပိုင်း ဦးဘုန်းစုံစမ်းခိုင်းလို့ ရှာထားတာတွေရော ဒါအကုန်ပဲ။ ဦးကျော်ခေါင်ရဲ့ တရားမဝင်လောင်းကစားဝိုင်း ဘယ်မှာရှိလဲ? အဲ့မှာသူတို့လုပ်ကိုင်နေတဲ့ လူကုန်ကူး ပြည့်တန်ဆာဈေးကွက်၊ မူးယစ်ဆေးအရောင်းအဝယ်....... တိကျတဲ့သက်သေတွေအကုန် ဒီထဲမှာပါတယ်။နောက်ပြီး Royal Khant ကနေအလွဲသုံးစားလုပ်ထားတဲ့ ပိုက်ဆံတွေကို နိုင်ငံခြားက သူ့ Bank Account ထဲလွှဲပြောင်းထားတဲ့ သက်သေအထိ ကျွန်တော်စုံစမ်းပေးထားတယ် ဦးဘုန်း "

" ဒီလောက်ဆို လုံလောက်ပါပြီ "

Shine ပြောတဲ့စကားတွေအရ အခြေအနေကို ယံလေးသဘောပေါက်နားလည်လိုက်သည်။ကိုကိုသည် ဦးကျော်ခေါင်ကိုဖြုတ်ချဖို့အတွက် သူမသိအောင်နောက်ကွယ်မှာ စုံစမ်းနေခဲ့တာလား။အေးဆေးတည်ငြိမ်စွာ စားပွဲပေါ်တင်ထားသော File တွဲများကိုကြည့်ရင်း ယံလေးလက်ကိုတင်းကျပ်စွာဆုပ်ကိုင်ပေးထားသော်လည်း ယံလေး အံ့သြဆွံ့အနေမိသည်။