Tattoo [Completed]

Chapter - 10

Xiao Ke က တလတိတိ ပို့ပေးမယ်ပြောထားတာ။ သူတကယ်လည်း တလစာ မှာခဲ့တယ်။ နောက်ထပ် ၂ ပတ်ဆက်တိုက် ပန်းတွေ နေ့တိုင်း ပို့ပေးခဲ့တယ်။ အစပိုင်းတော့ ရှေ့ကောင်တာက ကောင်မလေး ဒါမှမဟုတ် Lu Xiaobei က လက်ခံပြီး ယူထားတာ။ နောက်တော့ ပန်းလာပို့တဲ့သူက သူတို့ကို Mr. Zhou ကို တိုက်ရိုက်ပေးဖို့နဲ့ တခြားသူဆီ မပေးခဲ့ဖို့ မှာထားတယ်လို့ ပြောတယ်။ အဲ့ဒါနဲ့ပဲ Zhou Zui က နေ့တိုင်း မတုန်မလှုပ်အမူအရာနဲ့ လက်မှတ်ထိုးပြီး ပန်းစည်းအသေးလေးတွေကို လက်ခံယူနေရတော့တယ်။ ပြီးရင် ဘာခံစားချက်မှ မရှိတဲ့ပုံနဲ့ ပတ်ထားတာတွေ ခွာပြီး ပန်းတွေကို ရေပုံးထဲ ထည့်လိုက်တော့တာပဲ။

ကြည့်ရတာ နည်းနည်းထူးဆန်းနေပေမယ့် တမျိုးတော့ ချစ်စရာကောင်းတယ်။ Xu Lin က Zhou Zui ပန်းတွေ ရေပုံးထဲ ထည့်နေတာကို video အတိုလေး ခိုးရိုက်ထားပြီး Xiao Ke ဆီ ပို့ပေးတယ်။

Xiao Ke က ကောင်မလေးအတွက် 88 RMB ပါတဲ့ ဟုန်ပေါင်းအိတ်ကို တွေဝေမှုမရှိပဲ ချက်ချင်းပို့ပေးလိုက်တယ်။ အပြန်အလှန်အနေနဲ့ Xu Lin က နောက်ထပ် video ၂ ခု ပို့ပေးတယ်။

ဒီရက်ပိုင်းအတွင်း Xiao Ke က ဆိုင်ကို မသွားဘူး။ Zhou Zui က သူ့ကို တွေ့တာနဲ့ ပန်းပို့တာကို ရပ်ခိုင်းမယ်ဆိုတာ သူသိနေတယ်။ အဲ့ဒါကြောင့် ထူးထူးဆန်းဆန်း သူ ဆိုင်ကို ၂ ပတ်တောင် မသွားခဲ့ဘူး။ ကျောင်းက Project က ပြီးသွားပြီမို့ သူတို့အဖွဲ့ကို အပိုဆုကြေးတွေ ပို့ပေးလာတယ်။ ဒါပေမယ့် ဒီတခါက လူအများကြီး ပါတာမို့ ရတာ သိပ်မများဘူး။ ပိုက်ဆံတွေခွဲပြီးတော့ သူရတာက 20000 RMB တောင် မပြည့်ဘူး။ Xiao Ke က ငွေလွှဲလိုက်တဲ့အကြောင်း notification ကို ကြည့်နေရင်းနဲ့ တွေးမိတယ်။

ဒီလောက်ကြာတဲ့ project အတွက် ငါအရမ်းကို ကြိုးစားအလုပ်လုပ်ပြီး အပင်ပန်းခံခဲ့ရတာ။ ဒါပေမယ့် 20000 ပဲ ပြန်ရတယ်။

20000 ဆိုတာ သူ့ idol, ဆရာ Zhou ရဲ့ လက်မောင်းတဖက်စာ Tattoo ထိုးခတောင် မရှိဘူး။

အရင်က Xiao Ke က သူ့ဝင်ငွေနဲ့ ပတ်သတ်ပြီး စိတ်ကျေနပ်မှုရှိခဲ့တယ်။ သူ့မှာ ကားရှိတယ်၊ အိမ်ရှိတယ်၊ စုထားတဲ့ ငွေတချို့လည်း ရှိတယ်။ ဒါပေမယ့် အဲ့ဒါက သူ့ကိုယ်သူ ဘယ်သူနဲ့ ယှဉ်ကြည့်‌တာလဲဆိုတာပေါ် မူတည်တယ်။ Zhou Zui နဲ့ ယှဉ်လိုက်ရင် သူက နည်းနည်းမွဲနေသလို ခံစားရတယ်။ Xiao Ke က ဒီအပေါ်မှာတော့ အကြာကြီး တွေးမနေဘူး။ သူက Zhou Zui ကို လိုက်ဖို့ ပိုက်ဆံအများကြီး သုံးမှာမှ မဟုတ်တာ။ သူက သူ့ရဲ့ သနားစရာကောင်းပေမယ့် စစ်မှန်တဲ့ နှလုံးသားကို သုံးမှာ။