السيرة النبوية | بقلم إيمان شلبي

مقدمات غزوة أحد 🔰

#قصص_الأنبياء(٢)
#السيرة_النبوية
#الحلقة_السبعون
#سبب_تعدد_زوجات_رسول_الله
#مقدمات_غزوة_أحد

كنا واقفين المرة إللي فاتت عند القصة إللي حصلت مع عمر بن الخطاب رضي الله عنه،
بعد غزوة بدر وانتصار المسلمين فيها، كان في مصابين من المسلمين في غزوة بدر منهم عُبيدة بن الحارث بن عبد المطلب إللي أصيب في المبارزة يوم بدر،
ومات بعدها في أواخر شهر رمضان بسبب جراحه، من الناس إللي أُصيبت يوم بدر صحابي اسمه خُنَيْس بن حُذافة السهمي، وكان من السابقين إلى الإسلام هو وزوجته، وكان من الذين هاجروا إلى الحبشة في الهجرة الثانية،
وهاجر إلى المدينة وحضر غزوة بدر ومات بعد غزوة بدر بسبب جراحه وترك زوجته إللي كان عمرها في الوقت ده حوالي واحد وعشرين عام،
فأصبحت زوجته أرملة في سن صغير ومكنش عندها أولاد، زوجته دي كان اسمها حفصة بنت عمر بن الخطاب 😊
لما مات زوجها أراد أبوها عمر بن الخطاب رضي الله عنه إنه يبحث لها عن زوج صالح،
وبطبيعة الحال الأب دايما بيكون عايز لبنته أحسن زوج، فبدأ يشوف مين من أصحابه ممكن يكون زوج لبنته،
أول واحد فكر فيه عثمان بن عفان رضي الله عنه، واحد من العشرة المبشرين بالجنة،
رسول الله ﷺ شهد له بالجنة، وهو إللي اشترى بئر رومة مقابل الجنة، ورسول الله ﷺ زوجه من ابنته،
ورسول الله ﷺ مش هيزوج بنته لأي حد 👌
وهو دلوقتي معندوش زوجة لأن رقية بنت رسول الله ﷺ ماتت، فهل في أحس من كده زوج💁‍♂️
راح عمر بن الخطاب لعثمان بن عفان وقال له :
لو عايز ممكن أزوجك حفصة بنت عمر😊
فقال له عثمان بن عفان رضي الله عنه: طيب خليني أفكر وأرد عليك🤔
وبعد كم يوم جاءه عثمان وقال له:
أنا مش عايز أتزوج في الوقت الحالي!
ففكر عمر بن الخطاب مين تاني ينفع يكون زوج لحفصة🤔
بس مفيش غيره برده واحد من العشرة المبشرين بالجنة،
صاحب رسول الله ﷺ،
أحب الناس إلى رسول الله ﷺ ورسول الله  متزوج من بنته، وطبعا رسول الله ﷺ مش هيتزوج أي حد كده 🤷‍♂️
يعني من الآخر رجل مفيش عليه أي غبار👌

☆يعني إيه عشرة مبشرين بالجنة🤨

يعني عشرة من الصحابة بشرهم رسول الله ﷺ أنهم من أهل الجنة، واتسموا عشرة مبشرين بالجنة مع إن رسول الله ﷺ بشّر ناس كثير غيرهم رجال ونساء بالجنة؛
لأن العشرة ذُكروا في حديث واحد في نفس الوقت وراء بعض، وهم أفضل أمة محمد ﷺ من بعده وهم:
♡أبو بكر الصديق ♡عمر بن الخطاب ♡عثمان بن عفان ♡
علي بن أبي طالب ♡طلحة بن عبيد الله♡الزبير بن العوام ♡عبد الرحمن بن عوف♡سعد بن أبي وقاص♡سعيد بن زيد بن عمرو بن نفيل♡أبو عبيدة عامر بن الجراح♡

ذهب عمر بن الخطاب لأبي بكر الصديق رضي الله عنه وقال له:
لو عايز، ممكن أزوجك حفصة بنت عمر😊
فأبو بكر الصديق مردش عليه خالص، سكت🙊
فعمر بن الخطاب زعل وغضب من أبي بكر الصديق رضي الله عنه إنه مردش عليه،
يعني عثمان رد ورفض وخلاص، لكن أبو بكر مقلهوش حاجة خالص، وغضب عمر من أبي بكر لأن كان في بينهم مودة وعلاقة قوية، غير أي حد تاني😅