السيرة النبوية | بقلم إيمان شلبي

الحرب الاعلامية على دعوة الاسلام 🌸

#قصص_الأنبياء(٢)
#السيرة_النبوية
#الحلقة_السادسة_عشرة
#الحرب_الإعلامية_على_الدعوة

كنا واقفين المرة إللي فاتت عند عتبة بن ربيعة لما راح لرسول الله ﷺ وعرض عليه شوية عروض في مقابل إنه يسيب الدعوة إلى الإسلام،
لكن رسول الله ﷺ كل إللي عمله إنه قرأ عليه القرآن،
فعتبة بعد ما سمع القرآن من رسول الله ﷺ رجع لسادات مكة إللي كانوا منتظرينه عشان يعرفوا نتيجة الحوار،
فلما شافوه وهو جاي وكان وجهه متغير وسألوه إيه إللي حصل قال لهم:
أنا سمعت كلام عمري ما سمعت مثله أبدا😳
والله ماهو كلام شعر ولا هو كلام سحر ولا كهانة😳
يامعشر قريش اسمعوا كلامي وخذوا نصيحتي 👌
سيبوا الرجل يدعو الناس ومتقفوش في طريقه، فوالله ليكون للكلام إللي سمعته منه ده حاجة عظيمة في المستقبل😮
فلو حصل والعرب قتلوه خلاص يبقى همّ كفوكم شره وخلصنا منه،
ولو ظهر عليهم وانتصر فملكه ملكُكم ..لأنه من قريش وعزه عزكم، وهتكونوا أسعد الناس به👌

☆أظن مفيش كلام منطقي عقلاني أكثر من كده💁‍♂️

فقالوا له: والله محمد سحرك بكلامه يا أبا الوليد😏
فقال لهم : ده رأيي وانتم أحرار اعملوا إللي تعملوه😑

على الرغم من إن عتبة عارف إن رسول الله ﷺ على حق لكنه برده لم يؤمن👌
☆احنا نستفيد من الحوار ده نقطتين مهمين:
◇أولا:
إزاي إن رسول الله ﷺ عرف يكسب عتبة بن ربيعة بأسلوبه وحوّله لداعية يدعو أصحابه بفن الإصغاء👌
يعني عتبة لما جاء لرسول الله ﷺ وقعد يكلمه بكلام يُعتبر إهانة وكله اتهامات باطلة، ومع ذلك رسول الله ﷺ لم يقاطعه ولا مرة لحد ما خلص كلامه،
رسول الله ﷺ عارف إنه لما يقعد يسمع لكلام عتبة من غير ما يقاطعه ده هيديله فرصة إنه يعرف دماغ إللي قصاده بيفكر إزاي ويعرف يرد عليه بالكلام إللي يناسب شخصيته👌
يعني اشمعنى رسول الله ﷺ قرأ على عتبة سورة فُصلت بالذات ومقرأش غيرها؟
لأنه فهم من شخصية عتبة إن آيات سورة فصلت هيكون لها الأثر الأكبر على عقليته😊
وكمان لما رسول الله ﷺ كان بيسمعه ومكنش بيقاطعه، ده خلى عتبة يتجاوب مع رسول الله ﷺ لما قال له اسمع مني،
فكان لازم عتبة يسمع من رسول الله ﷺ بدون مقاطعة زي ما رسول الله ﷺ سمعه بدون مقاطعة 👌
ده غير إن الواحد لما يسمع للي قصاده وخصوصا لو كان غضبان أو متحفز بدون مقاطعة فده بيخليه يهدى ويرجع لعقله،
بعكس لو قعدنا نقاطعه هتلاقيه بيتعصب أكثر وبيزعق أكثر،
فعتبة كان جاي متحفز ومتعصب،
حتى أصحابه قالوا إنه رجع بوجه تاني خالص غير إللي راح لرسول الله ﷺ به😅
فرسول الله ﷺ بيعلمنا إن ممكن مشكلة كبيرة يكون حلها في إننا نسمع الشخص ده بيقول إيه من غير ما نقاطعه،
حتى لو الشخص ده بيعيب فينا وبيتهمنا اتهامات باطلة زي ما عتبة عمل مع رسول الله ﷺ😊
جربوها كده.. فقد كان لكم في رسول الله أسوة حسنة😁