السيرة النبوية | بقلم إيمان شلبي

إسلام نفر من الجن

#قصص_الأنبياء(٢)
#السيرة_النبوية_إيمان_شلبي
#الحلقة_التاسعة_والعشرون
#إسلام_نفر_من_الجن

كنا واقفين المرة إللي فاتت عند سؤال مهم وهو إزاي ربنا يَأذن لملك الجبال بتدمير مكة والطائف وفيهم ناس لم يؤذوا رسول الله ﷺ،
يعني مش كل الناس آذوا رسول الله ﷺ ، فإيه ذنب الناس الذين لم يؤذوه🤔

ساعات بعض الناس بيعملوا حاجات غلط، وإللي حواليهم راضيين،
أو شجعوهم على كده ، فاللي راضيين وشجعوا بيشاركوا الناس إللي عملت الخطأ في الإثم،
حتى لو في واحد مش موجود واتحكى له ومأنكرش الغلط ورضِي به ، كان له نفس ذنب إللي عمل كده، فربنا يعاقبه زي إللي عمل👌
قال رسول الله ﷺ :
" إذا عُمِلت الخطيئةُ في الأرض كان مَن شَهِدَها فكرهها
– أو أنكرها – كمن غاب عنها، ومن غابَ عنها فَرَضِيَها، كان كمن شَهِدها"

زي مثلا إللي حصل مع ناقة صالح عليه السلام ..فاكرين😁
التسعة إللي كانوا مفسدين شجعوا الرجل إللي قتل الناقة،
والعذاب نزل على القرية كلها، لأنهم كانوا راضيين بقتلها 👌

مثال من أرض الواقع بتاعنا، لو واحد صاحبك راح فرح كله اختلاط وأغاني وقعد يحكيلك ويقولك عملنا وسوينا وحصل وحصل،
فانت لو قلت له ياريتني كنت معاك، أو زعلت إنك مرحتش أو مأنكرتش على صاحبك ورضيت إللي هو عمله وإللي حصل في الفرح من المحرمات دي...هتاخدي نفس ذنب صاحبك مع إنك محضرتش🙊
لو واحدة بتحكيلك عن علاقتها المحرمة مع شاب وإنتِ بتسمعي ومبسوطة وراضية وبتشجعيها على الغلط ده،
هتاخدي نفس ذنبها حتى لو إنتِ عمرك ما كلمتي شاب😶
لو واحدة حكت لك إنها مسكت فلانة ومسحت بكرامتها الأرض ،وفرجت الدنيا عليها وإنتِ قلتي لها جدعة وتستاهل و...و....
هتاخدي نفس ذنب إللي حكت لك مع إنك مكنتيش موجودة😑
قيسوا بقى على كده...إللي يُقتل ظلم مثلا والناس ترضى وتشمت فيه تاخد نفس وزر القاتل، وهكذا...

أي خطيئة تتعمل في أي مكان الأرض والناس ترضى عنها هياخدوا نفس ذنب إللي عملها🙊
شوفتوا إنكار المنكر بالقلب مهم إزاي👌
وده يودينا لنقطة مهمة وهي إن الناس لو تركوا الأمر بالمعروف والنهي عن المنكر ومحاولات الإصلاح ربنا يعذب الجميع، الصالح وغير الصالح😶
ربنا بيقول:
"وَاتَّقُوا فِتْنَةً لا تُصِيبَنَّ الَّذِينَ ظَلَمُوا مِنْكُمْ خَاصَّةً وَاعْلَمُوا أَنَّ اللَّهَ شَدِيدُ الْعِقَابِ"
ورسول الله ﷺ قال:
"إن الناس إذا رأوا الظالم فلم يأخذوا على يديه، أوشك أن يعمهم الله بعقابه"
فأهل الطائف استحقوا كلهم العذاب لأنهم إما وافقوا على أذى رسول الله ﷺ أو شجعوا أو فعلا آذوا رسول الله ﷺ،
وربنا عالم بحال كل واحد فيهم،
فلما يأذن بإهلاكهم جميعا معنى كده إنهم فعلا يستحقوا الهلاك ، وخصوصا إن ربنا لا يظلم مثقال ذرة👌

رجع رسول الله ﷺ لمكة وقبل وصوله وهو في وادي نخلة حصل معاه حادثة،
رسول الله ﷺ كان بيمشي وبعدين يقف يريّح،
وراحته كانت إنه يصلي ركعتين 😊
وقف عشان يصلي، وهو بيصلي كان بيقرأ القرآن بصوت عالي،
فمين إللي كان معدي وسمع رسول الله ﷺ بيقرأ القرآن🙊
سبع أفراد من الجن😮