السيرة النبوية | بقلم إيمان شلبي

إسلام هوازن

وقفنا المرة إللي فاتت عند المفاجأة الضخمة الغير متوقعة إللي حصلت بعد توزيع الغنائم،
المفاجأة كانت : مَجيء وفْد من هوازن لمقابلة رسول الله ﷺ في وادي الجُعرانة،
والوفد ده كان من بطون بني نصر وبني سعد وكل بطون هوازن الأخرى باستثناء قبيلة ثقيف،
يعني قبيلة ثقيف الوحيدة هي إللي مبعتتش حد يمثلها في الوفد ده،
وكان الوفد ده مكون من أربعة عشر نفراً،
والمفاجأة الأكبر إن الوفد ده جاء عشان يعلن إسلامه وإسلام هوازن😮
لقوا نفسهم خسروا كل شيء،
خسروا نساءهم وأبناءهم وأموالهم وأنعامهم،
خسروا حاضرهم وهيخسروا مستقبلهم كمان لو هم بقيوا على الشرك،
فموقفهم كان صعب، ففكروا إنهم لو رجعوا لرسول الله ﷺ فهو ممكن يقبل منهم إسلامهم ويرجع لهم بعض الممتلكات،
هو واضح جداً إنهم لم يأتوا حباً في الإسلام لكن عشان مصلحتهم😅
لكن معظم الناس إللي بيدخلوا الإسلام ساعتها عشان شيء دنيوي بيحبوا الإسلام  بعد فترة من الزمن،
فهمّ في النهاية هيحسوا بقيمة الإسلام بعد ما يعيشوا فيه👌
المهم،
وفد هوازن قعد مع رسول الله ﷺ وأعلنوا إسلامهم وبعدين قالوا لرسول الله ﷺ:
"يَا رَسُولَ اللَّهِ، إِنَّا أَصْلٌ وَعَشِيرَةٌ، وَقَدْ أَصَابَنَا مِنَ الْبَلَاءِ مَا لَمْ يَخْفَ عَلَيْكَ، فَامْنُنْ عَلَيْنَا مَنَّ اللَّهُ عَلَيْكَ"
وقام الخطيب بتاعهم وبدأ يتكلم فقال:
" يَا رَسُولَ اللَّهِ، إِنَّ مَا فِي الْحَظَائِرِ مِنِ السَّبَايَا خَالَاتُكَ وَعَمَّاتُكَ وَحَوَاضِنُكَ اللَّاتِي كُنَّ يَكْفُلْنَكَ،
وَلَوْ أَنَّا مَلَحْنَا لِابْنِ أَبِي شَمِرٍ أَوِ النُّعْمَانِ بْنِ الْمُنْذِرِ، ثُمَّ أَصَابَنَا مِنْهُمَا مِثْلُ الَّذِي أَصَابَنَا مِنْكَ، رَجَوْنَا عَائِدَتَهُمَا وَعَطْفَهُمَا،
وَأَنْتَ يَا رَسُولَ اللَّهِ خَيْرُ الْمَكْفُولِينَ.
ثُمَّ أَنْشَأَ يَقُولُ:
امْنُنْ عَلَيْنَا رَسُولَ اللَّهِ فِي كَرَمٍ ... فَإِنَّكَ الْمَرْءُ نَرْجُوهُ وَنَدَّخِرُ

يعني بيقولوا لرسول الله ﷺ إن في بينهم رحم، وأصلهم واحد،
واحنا كنا قلنا قبل كده في الجزء المائة واحد وسبعون لو تفتكروا إن هوزان جاية من فرع عَيْلاَن وقريش من فرع إِليَاس، يعني يُعتبروا أبناء عم،
فهمّ بيذكّروا رسول الله ﷺ بأصولهم وإن إللي موجودين في السبي دول خالاتك وعماتك من الرضاعة،
لأن حليمة السعدية إللي أرضعت رسول الله ﷺ وهو صغير كانت من بني سعد من هوازن.

☆بالمناسبة صحيح😁
احنا منعرفش هل حليمة السعدية وزوجها الحارث أسلموا ولّا لأ، يعني مفيش روايات واضحة وصحيحة بتتكلم عن إسلامهم،
،لكن كلها اجتهادات العلماء،
في فريق قالوا إنهم أسلموا وفريق تاني متوقف في المسألة وقالوا منعرفش،
أما بالنسبة للشيماء أخت رسول الله ﷺ ففي أحاديث بتقول إن رسول الله ﷺ قابلها بعد غزوة حنين وكانت من السبي فأعتقها رسول الله ﷺ وأسلمت،
لكن كل الأحاديث إللي ذكرت القصة دي أحاديث غير صحيحة🙅‍♂️❌
يعني الشيماء لم تقابل رسول الله ﷺ أصلا👌
لكن هل أسلمت ولّا لأ، برده منعرفش🤷‍♂️
وطبعا للي مهتم بعلم الحديث هتلاقوا في التعليقات👇 رابط فيه تفصيل المسألة من موقع أهل الحديث،
هتلاقوهم موضحين الأحاديث إللي جاءت فيها القصة وشارحين ليه الأحاديث دي لا تصح😊