السيرة النبوية | بقلم إيمان شلبي

رسائل النبي ﷺ إلى الملوك (1)

#قصص_الأنبياء(٢)
#السيرة_النبوية
#الحلقة_مائة_وواحد_وثلاثون
#أحداث_السنة_السابعة_من_الهجرة
#رسائل_رسول_الله_إلى_الملوك_الجزء_الأول

كنا قلنا إن بعد صلح الحديبية إللي ربنا سمّاه فتح هتبدأ مرحلة جديدة من الدعوة إلى الإسلام وهي عالمية الدعوة،
يعني رسول الله ﷺ هيبدأ يخرج بدعوة الإسلام من جزيرة العرب إلى باقي الأرض، فالدعوة هتبقى عالمية،
لأن رسول الله ﷺ أُرسل إلى الثّقلين الإنس والجن، فالدعوة لازم توصل لكل أهل الأرض،
وربنا قال:
"وَمَا أَرْسَلْنَاكَ إِلَّا رَحْمَةً لِّلْعَالَمِينَ"
وزي ما قيل : الناس على دين ملوكهم، يعني على حسب اهتمامات الحاكم الناس هتتبعه، فرسول الله ﷺ قرر إنه يرسل رسائل لرؤساء وزعماء وملوك الأرض:
《كِسْرَى وقَيْصَر والنّجاشي والمُقَوْقِس》وغيرهم يدعوهم فيها للإسلام،

☆ممكن حد يسأل:
طيب ليه رسول الله ﷺ لم يرسل لملوك الأرض من أول يوم في الدعوة مادام هو كده كده هيدعوهم🤔
لسبب بسيط جدا وهو إن رسول الله ﷺ واقعي💁‍♂️
تخيلوا كده معايا واحد طالع في قرية صغيرة غير معروفة أصلا بيطلب من كل زعماء العالم إنهم يتبعوه ويغيّروا دينهم لدين محدش سمع بيه قبل كده،
ولو سمعوا، هيسمعوا إيه؟
هيسمعوا عن التشريد والاضطهاد والتعذيب لأتباع الدين ده،
فمين بقى إللي هياخد خطوة كبيرة جدا زي دي ويبدل عقيدته عشان مجموعة من الضعفاء في قرية صغيرة من قرى العالم🤷‍♂️
وهتشوفوا موقف كسرى ملك الفرس بعد شوية هيبقى عامل إزاي،
فرسول الله ﷺ بيعلمنا واقعية المنهج، يعني بعد ما ثبّت أقدامه وبقى له دولة وبقى في معاهدة صُلح مع قريش العدو الأول للإسلام كده بقى في اعتراف رسمي بدولة المسلمين، فهنا بقى يقدر رسول الله ﷺ ياخد خطوة جديدة في الدعوة للإسلام👌
وكمان نقطة مهمة، لو رسول الله ﷺ أرسل رسائل لملوك الأرض كان ممكن يلفت الانتباه له وللمجموعة الصغيرة إللي معاه فيُبادوا كلهم وتضيع رسالة الإسلام،
ومحدش يقول إن ممكن ربنا سبحانه وتعالى يفتح قلوب الزعماء ويضحوا بملكهم وسلطانهم عشان خاطر دعوة الإسلام😅
هو فعلا ربنا قادر على كده وده رسوله ﷺ لكن زي ما قلنا قبل كده رسول الله ﷺ قدوة واحنا بنتعلم منه، فلازم ياخد بالأسباب المنطقية في الدعوة عشان يعلم كل الأجيال إللي هتيجي بعده،
ربنا بيفتح قلوب العباد للداعي لما هو يبذل الأسباب الصحيحة إللي يقدر عليها الأول، وهو ده إللي رسول الله ﷺ عمله،
فعشان دعوته تكون على الأقل مقبولة والناس تبدأ تسمع لها كان لازم يحل مشكلته مع قريش، لأنه في نظر الناس هو وإللي معاه مجرد جماعة غير شرعية خرجت عن منهج الدولة الأم إللي هي قريش،
وقريش القبيلة العربية العزيزة كانت معروفة لكل الناس حتى خارج الجزيرة العربية، وكان لها علاقات اقتصادية وسياسية مع معظم القوى الموجودة في العالم ساعتها حتى لو مكنتش في قوة فارس والروم، لكنها معروفة ومعترف بيها،
فلما قريش تعمل معاهدة مع رسول الله ﷺ وإللي معاه؛ ده اعتراف منهم إن رسول الله ﷺ وأتباعه مش مجرد مجموعة متمردة، لأ، دول ناس لهم دولة وكيان مُعترف بيهم،
وده هيخلي الزعماء يستقبلوا فكرة المراسلة بينهم وبين رسول الله ﷺ ويبدأوا يفكروا:
هل الدين الجديد دين ده يستحق الاتباع، ولاّ صاحبه بيكذب علينا، ويبدأوا يدوروا على حقيقة الإسلام زي ما هرقل ملك الروم عمل وهنشوف موقفه إيه بعدين،
ومتنسوش إن كل ما كان المُرسل قوي كل ما الناس أخذت كلامه بجدية👌