السيرة النبوية | بقلم إيمان شلبي

الإخلاص و قصة أصحاب الغار

    

السيرة_النبوية

#الحلقة_الثمانون

#الإخلاص_وقصة_أصحاب_الغار_الجزء_الأول

اتكلمنا المرة إللي فاتت عن الأحداث بعد غزوة أحد وشفنا آيات القرآن إللي نزلت وصنّفت المجتمع لمؤمنين ومنافقين وشهداء،

خلصت غزوة أحد ورجع المسلمون لممارسة حياتهم اليومية، إللي عنده جراح محتاجة تخف، وإللي رجع لشغله في زراعة البساتين و....و...

وطبعا المسلمون بيتقابلوا مع رسول الله ﷺ في الصلوات الخمس كل يوم،

قلنا قبل كده إن رسول الله ﷺ كان بيربي الصحابة تربية إيمانية وكان بينوّع في طريقة تربيته لهم، مرة عن طريق القصة ومرة عن طريق مواعظ مباشرة، ومرة كان يقرأ عليهم القرآن فقط،

رسول الله ﷺ كان عايز يعلم الصحابة معنى الإخلاص، فهيحكي لهم قصة عشان يوريهم الإخلاص ممكن يعمل إيه وبالتالي هم نفسهم هيكونوا حريصين إنهم يحققوا الإخلاص ده👌

☆طيب هو رسول الله ﷺ ليه عايز يعلم الصحابة الإخلاص أصلا🤔

لو تفتكروا لما كنا بنتكلم عن رحلة المعراج واتكلمنا عن حوض رسول الله ﷺ ومين الناس إللي هتشرب منه، قلنا إن عشان ربنا يتقبل مننا العمل الصالح لازم نكون محققين شرطين:

الإخلاص والمتابعة،

المتابعة هي اتباع رسول الله ﷺ في كل شيء واتكلمنا بالتفصيل عن النقطة دي في الجزء الرابع والثلاثين عشان لو حبيتم ترجعوا لها تاني😊

ربنا قال:

"فَمَن كَانَ يَرْجُو لِقَاءَ رَبِّهِ فَلْيَعْمَلْ عَمَلًا صَالِحًا وَلَا يُشْرِكْ بِعِبَادَةِ رَبِّهِ أَحَدًا "

فليعمل عملا صالحا يعني موافق للسنة، زي ما رسول الله ﷺ كان بيعمل بالضبط من غير ما يبتدع،

وشرط المتابعة لرسول الله ﷺ يعتبر سهل لو قارناه بالشرط الأول وهو الإخلاص،

"وَلَا يُشْرِكْ بِعِبَادَةِ رَبِّهِ أَحَدًا "

لأن الرياء أو خلينا نقول الشرك زي ما رسول الله ﷺ سمّاه إللي هو عكس الإخلاص أخفى من دبيب النمل،

يعني لو حد فينا قاعد في البيت هيحس بدبة النملة 🐜وهي ماشية في الشقة🤔

طبعا لأ، محدش فينا هيعرف إن في نملة في البيت غير لما نشوفها بعنينا، تخيلوا بقى لما تبقى حاجة أخفى من دبة النملة هل ممكن إننا نحس بيها😶

مستحيل طبعا😅

طيب وإيه المشكلة يعني من الرياء🤨

الرياء سبب لحبوط العمل، وإن ربنا لا يتقبله من الإنسان،