السيرة النبوية | بقلم إيمان شلبي

إسلام عمر بن الخطاب 🌸

#قصص_الأنبياء(٢)
#السيرة_النبوية_إيمان_شلبي
#الحلقة_الحادية_والعشرون
#إسلام_عمر_بن_الخطاب

كنا واقفين المرة إللي فاتت عند إسلام حمزة بن عبد المطلب عم رسول الله ﷺ وأخوه من الرضاعة،
وكان إسلامه في السنة السادسة من البعثة،
قبل ما نعرف إيه إللي حصل بعد إسلامه بثلاثة أيام تقريبا،
هنرجع بالزمن شوية حوالي ثمانية أشهر كده تقريبا أو أكثر🤔
احنا عارفين إن المشركين كانوا بيؤذوا المسلمين سواء المستضعفين أو السادة كل واحد على حسب مكانته،
فكان من إللي قريش آذتهم أبو بكر الصديق صاحب رسول الله ﷺ،
فهو كان من الناس إللي جَهرت بإسلامها بعد رسول الله ﷺ وكان الناس كلهم عارفين،
كانت قريش بتؤذي أبو بكر سواء بالكلام أو حتى ساعات بالضرب،
حتى يُروَى إنه في يوم من الأيام كان بيدعو الناس عند الكعبة، فقام الكفار وقعدوا يضربوه لحد ما وقع في الأرض مُغمى عليه،
ومش يسيبوه بقى 😑
ده قعدوا يدوسوا عليه ومحدش قدر ينقذه منهم إلا عشيرته بنو تميم،
وأخذوه وهو مُغمى عليه وكانوا متأكدين إنه خلاص بيموت لدرجة إن عشيرته هددوا كفار قريش إن لو مات أبو بكر مش هيسيبوهم👌
فأخذوه ورجّعوه لبيته عند أمه😥
تخيلوا لما أم ابنها يرجع لها بالمنظر ده إحساسها هيبقى إيه😶
ومع ذلك أبو بكر مسبش الدعوة إلى الله👌
عارفين لو كان أبو بكر في عصرنا دلوقتي وعمل كده هيطلع لنا كائنات لزجة تقول 🤓:
هو إللي غلطان إيه إللي وداه هناك 🙄
احنا لو مشينا بالمنطق ده لا حد هيأمر بمعروف ولا حد هينهى عن المنكر بسبب إن كل واحد خايف من الناس وخايف على حياته🙆‍♂️
وده الفرق بيننا وبين الصحابة...الصحابة كانوا بيبذلوا أرواحهم في سبيل تبليغ الدعوة ونشر الإسلام مكنش بيهمهم أي حاجة 👌
لما اشتد الأذى على المسلمين ورسول الله ﷺ أمر الصحابة بالهجرة للحبشة خرج أبو بكر مهاجر للحبشة وبعد ما سافر مسافة يوم أو يومين قابل واحد اسمه 《ابن الدَّغِنّة》 من أشراف العرب،
فقال لأبي بكر:
إنت رايح فين 🤔
فقال له أبو بكر: مهاجر للحبشة أعبد ربي .. لأن قومي أخرجني وآذوني 😞

☆مع إن أبو بكر في السنة دي اتولد له بنت صغيرة اسمها عائشة من زوجته أم رومان ومع ذلك برده خرج للهجرة،
مع إن الإنسان بطبيعته هيكون قلقان على زوجته وبنته الصغيرة وهو خارج مش عارف هيرجع امتى 😓

المهم ابن الدغنة قال له: ليه 😳
إنت إللي زيك ميخرجش😤
إنت رجل بتُحسن لأقاربك بالمال أو الخدمة وغيرها،
وإنت صادق في كلامك عمرك ما كنت بتكذب، وكنت بتساعد الضعيف واليتيم وصاحب العيال الفقير،
وكمان كنت بتكرم ضيوفك وأي حاجة فيها خير مكنتش بتتأخر عنها👌
فارجع لمكة وأنا سأجيرك من قريش ، يعني هتبقى تحت حمايتي👌

☆فاكرييييين دي صفات مين 🙊
نفس الصفات إللي خديجة زوجة رسول الله ﷺ قالتها له يوم ما رجع من الغار خايف💁‍♂️
شوفتم الشبه إللي بين أخلاق رسول الله ﷺ  وأخلاق أبي بكر 😊