السيرة النبوية | بقلم إيمان شلبي

حد السرقة في الإسلام

اتكلمنا المرة إللي فاتت عن المرأة المخزومية إللي كانت بتستلف حاجة الناس وبعدين تقولهم أنا مخدتش منكم حاجة،
وأضافت للجحود ده بقى إنها سرقت، وحد السرقة في الإسلام للي يثبت عليه السرقة فعلا هو قطع اليد،
ربنا بيقول:
"وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِّنَ اللَّهِ ۗ وَاللَّهُ عَزِيزٌ حَكِيمٌ "

طيب خلّونا الأول كده نفهم موضوع السرقة في الإسلام،
السرقة هي: إن واحد بالغ مُكلّف ياخد مال واحد تاني في الخفاء ،
يعني مينفعش نقيم حد السرقة على المجنون مثلا إللي ملوش عقل يميز بيه😅

فعشان تُقطع يد السارق ده لازم شروط معينة تتحقق،
يعني عشان فعلا نقدر نسمي إللي حصل ده سرقة وبالتالي تُقطع يد السارق، لازم يكون عندنا ستة شروط يتحققوا مع بعض عشان يتم قطع يد السارق:
◇الشرط الأول:
أن يكون أَخذُ الشيء على وجه الخِفْيَةِ ومن غير ما يكون له فيه شبهة حق، فإن لم يكن على وجه الخِفْيَةِ فلا تُقْطَع،
يعني مثلا واحد يدخل مكان وهو متخفّي عشان يسرق إللي فيه من غير ما حد يشوفه،
لكن لو واحد بيسرق على مَرأى ومسمع من الناس في الشارع مثلا زي واحد سرق شنطة وهرب قصاد الناس، ده لا تُقطع يده لأن صاحب المال يمكنه طلب النَّجدة من إللي حواليه ومفيش هنا استخفاء👌
لكن طبعا له عقوبة تانية، لكن مش قطع اليد.
وميكونش له شبهة حق، يعني ممكن واحد بيسترجع ماله إللي اتاخد منه بالغصب أو له حق عند الشخص إللي بياخد  منه المال ده بأي طريقة يعني.

◇ الشرط الثاني:
أن يكون المسروق مالا محترماً؛ لأن ما ليس بمال لا حرمة له ، كآلات اللهو والخمر والخنزير.
يعني الحاجة إللي اتسرقت دي تكون لها قيمة...مال حلال له حُرمة زي مثلا المال المعروف وزي الذهب، مش تكون حاجة مُحرمة زي آلات الموسيقى والخمر ولحم الخنزير مثلا.

◇الشرط الثالث:
أن يكون المسروق نِصاباً ، وهو ثلاثة دراهم إسلامية أو ربع دينار إسلامي ، أو ما يُقابل أحدهما من النقود الأخرى.
يعني لازم الحاجة إللي اتسرقت دي تكون بلغت نصاب السرقة، ونصاب السرقة هو ربع دينار فأكثر،
والدينار الواحد يساوي أربعة جرامات ذهب وربع،
يبقى حد السرقة هو ثمن جرام ذهب بالإضافة إلى ربع الربع الباقي،
يعني مثلا لو هنفترض إن جرام الذهب بمائة جنيه، يبقى الدينار يساوي أربعمائة جنيه وخمسة وعشرين جنيه،
يبقى حد السرقة هنا هيبقى ربع ال 425 يعني هيبقى :
106,25 يعني مائة وستة جنيه وخمسة وعشرين قرش،
طبعا ده مثال للتوضيح بس👆😅
لكن لازم نشوف سعر الذهب كام في الحقيقة عشان نقدر نطلع نِصاب السرقة بالضبط وهل فعلا الحاجة إللي اتسرقت دي بلغت النصاب ولاّ لأ👌

◇رابعا:
أن يُأخُذَ المسروق من حِرْزه ، وحرز المال : ما تَعَوَّدَ الناس على حِفظ أموالهم فيه كالخِزَانَة مثلاً .
يعني يا جماعة الحاجة إللي اتسرقت دي تكون محطوطة في مكان لحفظ الأموال، زي المحفظة أو الخزنة أو أي مكان لحفظ الأموال،
يعني مش واحد سايب فلوسه كده قصاد الناس ممكن أي حد ياخدها، هنا مش هتبقى سرقة لأن الأموال مش موجودة في مكان لحفظ المال.