السيرة النبوية | بقلم إيمان شلبي

الحلقة مئة و اربعة عشر 🌚💌

#قصص_الأنبياء(٢)
#السيرة_النبوية
#الحلقة_مائة_وأربعة_عشر
#علامات_الساعة_الصغرى
#الجزء_الأول

كلامنا في الأجزاء الأخيرة إللي فاتت كان عن الغزوات والسرايا والمعاهدة مع قريش،
يعني نقدر نقول إننا كنا مركزين على العلاقات الخارجية للدولة الإسلامية😊
عايزين بقى نعيش شوية مع رسول الله ﷺ والصحابة في المدينة ونشوف رسول الله ﷺ كان بيعلمهم إيه عن الدين،
من الحاجات إللي رسول الله ﷺ كان بيعلمها للصحابة إنهم يؤمنوا بالغيب،
وكان من الغيب ده يوم القيامة ويوم القيامة هو اليوم إللي الناس هتُبعث فيه بعد الموت وتتحاسب على أعمالها،
وهو يوم محدش يعرف وقته امتى غير ربنا عز وجل، لا أنبياء ولا ملائكة، لكن اليوم ده هيأتي أكيد👌
ورسول الله ﷺ لما جاءه واحد من الأعراب يسأله متى الساعة رسول الله ﷺ قال له: ماذا أعددت لها؟
فمش المهم إننا نعرف هي امتى لكن المهم إننا نستعد لها زي المسافر إللي بيستعد للسفر👌

☆ملحوظة :
ميعاد يوم القيامة من الغيبيات الخمسة التي لا يعلمها إلا الله، والغيبيات الخمسة دي هي :
◇يعلم إللي هيحصل للإنسان في حياته،
◇يعلم إللي في الأرحام من ذكر أو أنثى،
◇يعلم متى ينزل المطر ،
◇يعلم متى يموت الإنسان،
◇يعلم وقت الساعة أو يوم القيامة.
قال تعالى:
"إِنَّ اللَّهَ عِندَهُ عِلْمُ السَّاعَةِ وَيُنَزِّلُ الْغَيْثَ وَيَعْلَمُ مَا فِي الْأَرْحَامِ ۖ وَمَا تَدْرِي نَفْسٌ مَّاذَا تَكْسِبُ غَدًا ۖ وَمَا تَدْرِي نَفْسٌ بِأَيِّ أَرْضٍ تَمُوتُ ۚ إِنَّ اللَّهَ عَلِيمٌ خَبِيرٌ "

ومع إننا منعرفش امتى بالضبط ميعاد يوم القيامة لكن ربنا أخبرنا عن علامات لليوم ده،
وده من رحمة ربنا بعباده عشان ينتبهوا من غفلتهم ويستعدوا للقاء الله، ربنا قال:
"فَهَلْ يَنْظُرُونَ إِلَّا السَّاعَةَ أَنْ تَأْتِيَهُمْ بَغْتَةً فَقَدْ جَاءَ أَشْرَاطُهَا "

فالعلامات دي زي بالضبط كده العلامات إللي بتكون على طريق المسافر،
لما نركب أي مواصلة ونشوف علامة مكتوب عليها فاضل كذا كيلو على المكان إللي احنا رايحينه فبنستعد للنزول كل ما نقرب للمكان ده،
يعني لو واحد ركب قطار ومدة سفره ساعتين أكيد هيبقى قاعد وواخد راحته بعكس لما يشوف علامة بتقول له خلاص انت نازل المحطة الجاية بيبدأ يستعد ويلم حاجاته عشان ينزل،
كذلك أشراط الساعة أو علامات الساعة، ربنا جعل لنا علامات عشان نستعد، عشان كل شوية نفتكر إن في يوم قيامة وإننا مهما عشنا فاحنا هنرجع لربنا في يوم من الأيام ونقف بين يديه ونتحاسب على كل صغيرة وكبيرة👌
فالهدف الرئيسي من علامات الساعة هو الاستعداد، مش إننا ننشغل بيها وتكون هي شغلنا الشاغل ونقعد ندور عليها😅

وعلامات الساعة بتنقسم لقسمين:
علامات ساعة صُغرى وعلامات ساعة كُبرى،
◇علامات الساعة الصغرى هى العلامات إللي بيتكرر حدوثها ومستمرة مش بتنقطع وبيكون بينها وبين يوم القيامة زمن،
ومش كل الناس بيحسوا بيها لأنها ممكن تحصل في مكان ومكان تاني لأ.