السيرة النبوية | بقلم إيمان شلبي

حكمة الله في ابتلاء المؤمنين 🌸

#قصص_الأنبياء(٢)
#السيرة_النبوية
#الحلقة_التاسعة_عشرة
#حكمة_الله_في_ابتلاء_المؤمنين

وقفنا المرة إللي فاتت عند سؤالين مهمين الأول كان:
¤ليه ربنا يبتلي المؤمنين وعلى رأسهم رسوله وأحب الخلق إليه كده ويسلط عليهم الكفار ؟
ربنا له حكمة في كل حاجة بيعملها فهو من أسمائه الحكيم،
فاحنا مهما حاولنا نستنج الحكمة مش هنقدر نفهم ولا نُحيط  بالحكمة الكاملة، لكن بنحاول نفهم بعض الحكم دي💁‍♂️

في البداية لازم نفهم قاعدة مهمة جدا😁
رسول الله ﷺ هو القدوة إللي يجب علينا كمسلمين على مر العصور إننا نتبعها،
طيب هنتبعه إزاي في موقف حصل لنا في حياتنا ولم يحصل لرسول الله ﷺ🤨
عشان كده كان لازم رسول الله ﷺ يمر بمختلف المواقف عشان نعمل نفس إللي هو عمله،
فهنلاقي حياة رسول الله ﷺ جمعت كل الابتلاءات إللي ممكن تحصل لأي إنسان،
عشان كده السيرة مش مجرد حكاية نسلي بها وقتنا،
السيرة منهج حياة لازم نعرفه ونفهمه ونطلع منه الحكمة والعبرة عشان نقدر نطبقه في حياتنا👌
" لَقَدْ كَانَ لَكُمْ فِي رَسُول اللَّه أُسْوَة حَسَنَة لِمَنْ كَانَ يَرْجُو اللَّهَ وَالْيَوْمَ الْآخِر"

ودي مش حاجة اختيارية😅
لأ..ده واجب على كل مسلم إنه يعرف حياة رسوله عشان يفهم القرآن ويفهم الواقع بتاعه لأن كل الأحداث بتتكرر بالحرف👌
ممكن واحد من المسلمين يموت له ابن، فيشوف رسول الله ﷺ اتصرف إزاي ويتصرف زيه💁‍♂️
ممكن واحد تاني ابتلاؤه إن بناته تطلق، هيلاقي إن رسول الله ﷺ بناته اطلقت فيكون رد فعله زي رد فعل رسول الله ﷺ،
ممكن واحد ثالث يكون ابتلاؤه في أذى الناس له سواء بالشتم أو محاولات القتل،
أو التشهير به أو مقاطعته أو الاعتداء عليه، وكل ده حصل مع رسول الله ﷺ وكان له تصرف مع كل موقف حسب وقته👌
يعني في وقت لما تعرض للإيذاء سكت،
ومرة ثانية رد ودعا على المشركين ومرة ثالثة هيطلب من شاعره بعدين إنه يرد على المشركين بنفس أسلوبهم،
فلازم نعرف امتى نتصرف في المواقف المختلفة في حياتنا  زي رسول الله ﷺ😊

◇يبقى أول سبب من حكمة ربنا في تعرض رسول الله ﷺ للأذى والابتلاءات المختلفة هو إنه قدوة والناس يجب عليها إنها تقلده👌

◇السبب الثاني هو:
رفع درجاته في الجنة فيبتلى المرء على قدر دينه، وأكثر ناس دينهم كامل وإيمانهم قوى هم الأنبياء والرسل ،وأفضلهم أولي العزم وأفضل أولي العزم محمد ﷺ 💁‍♂️

◇السبب الثالث هو :
إن الناس تطمئن إن الابتلاءات حصلت لأكرم الخلق على الله وأحبهم إليه،
يعني لما يحصل لواحد فينا ابتلاء هيطمن إن الابتلاء ده خير له وإنه مش بسبب إن ربنا غضبان عليه وإن الابتلاء علامة حب،
لأن ربنا ابتلى قبله سيد الخلق أجمعين ، فتهدأ وتطمئن نفس المؤمن😊