النصف الآخر

بارت ٣٣

ليلة رأس السنة ساعة ١١ ونص بليل في بيت حقي

حقي : اليوم دوختك وليدي ... كل مرة ابوك يكعد هنا بمكانك وأضل اشكيلة وآكل راسة ههههه ...
أيمن : لتكول هيج جدي ... اني القالقني صحتك ... ماريد تضغط على نفسك بتفكير هواية ...
حقي : ليش هو بيدي يا ابني ... متشوف كل فترة تصيرلنة مشكلة .... تنهد ....تدري مرات اكول لو دنيا متزوجة ... لو عندهه رجال تستند عليه ...
هم جان شلت همهه هيج؟ ...
ومرات اكول لا والله ماريدهه تزوج ... وين الكة رجال يقدرهه ويحافظ عليهه ...
أيمن ضل ساكت بملامح ممفهومة يسمع جده ...
حقي : اوف يا دنيا أوف ...
فجأة دكت دنيا على جدهه ...
حقي : بنت حلال ... ابتسم وجاوبه ... الو ها جدو حبيبتي ... اخذت الدوة اي ... ليضل بالج ... ايمن كاعد وياية وميار كلساع تجي عليه ...
اي ... بس حبيبتي جدو لتتأخرين كولش... الوضع يخوف باليل ... اي احسن رجعي وياها ... ماشي ... الله وياج بنيتي ...
حقي : شوف ... هاي ابسط شي ... رايحة لبيت صديقتهه دتغير جو وتحتفل واني كلساع داك عليهه لو هي داكة عليه وابقة بقلق لحد مترجع ... ابتسم حقي بحزن ...
اتمنة رب العالمين ينطيني عمر اكثر ... حتى اضل وية هاليتيمة لحد ما اطمأن عليه ...
أيمن : الله ينطيك طولة العمر جدي ...
نزل عينهه بقلق وباوع على الساعة البأيدة ... حفلتيش حتصير ب١٢ وبعدهه مراجعة صدك تحجي هاي..
حقي قاطع تفكير أيمن : انتة هم ترة مشيلني هم ومعاجبني وضعك ...
أيمن رفع حاجبة بتفاجأ : ليش جدي شبيه!
حقي : شوكت اشوفك متزوج وجهالك يتنططون داير مدايري ... اخ شكول عليك سالفتك هم تعبانة الظاهر ..
شكد ماعرف راس دنيا يابس ... ادري براسك اضرب منهه وماعرف ليش قافلين ثنينكم من الزواج ..

أيمن ضل يباع على جدة ببرود ...

حقي : لا عبالك ساكتلك معناها مهامني الموضوع ....
مو كافي عاد يا ابني؟ ممليت من الوحدة ؟
انتة هم كبرت ولازم تلتفت لمستقبلك ونفسك ....
أيمن : ها جدي ... شو كلامك صاير نفس كلام سليم اركان ...
حقي : ههههه ... دمشي لك سرسري ... هو سليم اركان يكدرلك هالمكرود ... كاعد بس يشكي شبيدة عليك ...
أيمن ضحك شوية ورجع يلعب شطرنج لزم الجندي وحركة وكمل لعبتة محاولة منه يغير الموضوع...
حقي مهتم للعبه جان مصر يكمل كلامة وية أيمن :
اسمع لك اني مربيك واعرفك كولش زين ... انتة ممرتاح بوضعك هذا ادري بيك... مثل الطير المهاجر ... لا بالسما ولا بالكاع ... ضايع انت يا ابني وهالضياع نهايتة مو حلوة ترة ...داكولك ها ...
أيمن : ليش ضايع ! ... لان ممتزوج يعني ؟!
حقي باوعلهه صفح وهز راسة
أيمن تحولت ملامحة بأنزعاج : هممم ... شوف جدي اني صارلي اكثر من ١٠ سنوات عايش بهطريقة ومرتاح بحياتي و ماعندي مشكلة ابقة عايش هيج لآخر يوم بعمري ... والأهم من هالحجي كولة اني ماتحمل مسؤولية ولا احب الالتزام ... والزواج يحتاجله هالشرطرين ... فشلون تريدون اتزوج واظلم بنات الناس وياية ...
حقي : هذا كولة حجي وليدي ... متدري ربك شكاتبلك
يجوز فديوم تلكة بنت الاصول التغيرك وتخليك تلتزم وتتحمل مسؤولية ... بعدين تعال اكولك ... وين اكو برجولتك وشخصيتك وسباعيتك ... بالعكس اصلا هنيالهه التاخذك ...