النصف الآخر

بارت ٥٢

اسفة عالتأخير بسبب ظروف قاهرة 😩
استمتعو 😁🤭❤

في الفيلا ساعة ٧ باليل ...
وصلو بيت حجي محمود وطبعا لا سلام ولا سما جانو موجودين ....
استقبلوهم بيت سليم بترحيب واسماء باللواكة تحاول تظهر اهتمامهه الزايد بيهم في سبيل تضوج ام ايهم ...
دنيا بتعب وملامح حزينة كاعدة تجهز نفسهه ...
من رجعت من البحيرة وهي تفكر بالكلادة ممصدكة شلون ضيعتهه بعد كل هالسنين ...
بلعت ريكهه بألم وتنهدت ...
ميار دكت الباب ومدت راسهه : احم كملتي ... ترة جوي ...
دنيا بادلتهه النظرات  : هسة نازلة
كامت دنيا وعدلت فستانهه ...
ميار : اخييييرا لبستي فستان ... حهلهل
دنيا : فززتيني شبيج !!
ميار : ههههه  نفسيه ... ردت اتغزل بيج بس مدام هيج كالبة وجهج غيرت رأي ... يلة نزلي بسرعة ماشي .... عافتهه وسدت الباب ...
تنهدت دنيا بحزن واخذت نفس ...* بس تطلع الشمس ارجع لهناك وادورهه ... بلكي واكعة قريب عالجرف *
جانت لابسة فستان نازك ابيض وية الركبة وشعرهه ويفي منسدل على ظهرهه ... مكياج خفيف كالعادة ...
شكل الفستان 👇

نزلت جوة وسلمت على حجي محمود وعائلته ....
بعد ساعة توجهو الكل للحديقة ....
جان العشى مشاوي بأشراف ادهم ومراد ... وبمساعدة عمر ووليد ....
ادهم باوع على حقي : استاذي حوكلك مشاوي بعمرك مماكل مثلهن ...
حقي : الله ويدك ...
سليم وحجي محمود ابتسمو ....
حجي محمود : لعد وينة ايمن ... ماجة وياكم ؟
سليم : لا حجي موجود ... وليد ابني ... شوفلي وينة أيمن ...
وليد : هسة اشوفة عمي ...
أيمن واكف كدام المراية يمشط شعره ...
لبس قميص ابيض وبنطرون جينز ...
تنهد بملامح ممفهومة وباوع على الكلادة الكدامه ...
مد ايدة واخذهه ... بقة ثواني يتأملة  ..
فجأة دك عليه وليد ...
أيمن : ها وليد ... جاي هسة ...
تأملهه لآخر مرة وضمة بجيبه وطلع من غرفته ...

اما النسوان جانو كاعدين بالحديقة وية الزلم ...
اسماء حاولت تتجاهل ام ايهم وزينب قصدني ...
وتسولف وية منى وسرى بأهتمام ...
زينب وام ايهم يباعولهم صفح بابتسامة متصنعة بدون ميشاركوهم الحديث...
دنيا هم كاعدة وياهم بس صافنه بحزن بالهه كوله وية كلادتهه و فاصلة عن الحواليهه ...
ميار وزينة ملتهين بسيلين وحسنين يلعبوهم بالحديقة ...
منى : ههههه ... والله كتلة لأبو سلام لو ناخذ فيلا هنا السليمانية احلى واهدئ من اربيل ودهوك ...
أسماء : اي فعلا ام سلام ... يحتاج والله تاخذولكم هنا وكون قريبه علينه حتى نجي سوة بالعطل ....
منى : يمعودة ام هشام لتخليني احجي ... باوعت على بنتهه سرى صفح.... اصلا مدري شعجب قبلو يجون هالمرة وياية ووية ابوهم نغير جو ... كل مرة بس اني والحجي ... حتى لتركيا ميقبلون يرحون ويانه شفتي بلة ...
اسماء: هههههه بعد احسن يمعودة اخذي الحجي وسافرو لوحدكم  ....
سرى بعدم اهتمام لازمة موبايلهه وتكلب بي ...
فجاة تقربت اسماء من منى وهمستلهه :
اجة ايمن ...
منى ابتسمت رأسا بأنبهار من لمحته واكف يم الزلم ويسولف وية حجي محمود ...
باوعت على بنتهه سرى الجانت مو يمهه السالفة اصلا وممهتمة وهمستلهه : لج ... ذبي هالموبايل عاد ...
شوية سولفي ضحكي ابتسمي ...
سرى حولت عينهه بأنزعتج وبقت تكلب بموبايلهه ...
منى باوعتلهه صفح : الولد جاي علينه ديسلم عود ماوصيج لتسلمين عليه ....
فجأة تقرب عليهم ايمن وابتسم بخفة :
مرحبة ... شلونج خالة ....
منى بأبتسامة عريضة وترحيب مو طبيعي :
هلاو حبيبي شلونك خاله ؟ شلون صحتك ؟
أيمن : الحمد لله ... بخير ....نورتونة اليوم ...
منى : تسلم ابني نوركم هذا ... باوعت على بنتهه صفح ودغتهه ...
سرى انتبهت على أيمن وابتسمت شوية :
هلاو شلونك ...
أيمن ابتسملهه شوية : اهلا الحمد لله  ...
راح رأسا و باوع بنظرة سريعة على دنيا اللي جانت صافنة بعدم اهتمام على ميار وزينة وهمة ديلعبون الجهال ...
دار عينه بملامح ممفهومة ورجع كعد يم الزلم ....
أسماء ابتسمت بدهاء : بقالنة بس أيمن ... لازم نزوجه ...
منى بادلتهه الابتسامة : ان شاء الله تزوجو ام هشام وتفرحون بي ... أيمن بعد ... هنيالهه التاخذه  .... 
زينب همست لام ايهم : الظاهر هاللمة بيهه غاية...
ام ايهم : هممم مبين يريدن يزوجن هاي البومة لأيمن ...
زينب : صبري بلة خلي افهم الموضوع ...
ابتسمت زينب لمنى : سلام شلونة ان شاء الله بخير ...
منى : والله يعني الحمد لله ... تعبان خطية المشرف على رسالتة جر وعر هواية ويا وهو بس يريد يكمل ويرجع لهنا تعب من الغربة ...
زينب : خطية الله يوفقه ان شاء الله ويكمل بسرعة ويرجعلكم ... هانت ...
منى ابتسمت : آمين ...
زينب باوعت على سرى : لعد الحلوة شمكملة هم مثل اخوهه محامية ؟
منى باوعت لسرى وبتسمت : لا ههههه ... سرى طبيبة ...
زينب باوعت لام ايهم بأندهاش : همممم ... طبيبة .. ماشاء الله ...
ام ايهم ابتسمت وباوعت لسرى : يا مواليد شكلهه بعمر دنيا ...
سرى باوعتلهه من فوك ليجوة وسكتت ...
منى ابتسمت بأحراج : لا هي الجبيرة مواليد ٩١ ...
ام ايهم ابتسمت بتصنع : ماشاء الله ...الله يحفظهه الج وتفرحين بيهه ...
منى : آمين الله يسمع منكم ... والله جيل هالوكت معاناة ... بلة الولد مكدور عليه وخيرة يتزوج ...
بس البنية شلون اذا قافلة والعمر يركض ...
سرى باوعت لأمهه صفح وكامت بأنزعاج ...
دنيا انتبهت عليهه شلون انزعجت * الظاهر هالبنية عايشه نفس معاناتي *
زينب باوعت لدنيا صفح : اي والله ام سلام انتي تكوليلي... هاج باعي هاي الكاعدة كدامج مثال حي ...
دنيا * اجة سراية الظاهر *
ابتسمت دنيا ببرود وسكتت ...
منى ابتسمت : لاااااه دنيا !!! ... هسة تزوج متبقالكم لتخافون ... سباعيه و شخصية وجمال ودم خفيف من كلشي والله ...
دنيا ابتسمت لمنى : حبيبتي خاله هذا من ذوقج ...
اسماء باوعتلهم صفح : اي ام سلام سرى هم مقاصرة جمال وشخصية راقية واخلاق وشهادة واهل ونسب ...
الكل يتمناها واني اولهم ...
شفايتلي لو تقتنع ونزوجهه لأيمن ...
دنيا فتحت عينهه بصدمة وبلعت ريكهه من سمعت كلام اسماء ...
منى : هههههه ... والله بصراحة اتمنى ام هشام اتمنى يصير عالشي أيمن ماكو مثلة ... هيبة وجمال واخلاق وسبع ... والحجي كولش يحبة ويحترمة و بيناتنة ... يتمنى لبنتة هم ...
اسماء : والله حتى ابو أيمن امنيتة يناسبكم وتصير هالقسمة ...
زينب همست لأم ايهم : هاهية ... زوجوهم ...
ام ايهم ابتسمت بأستهزاء ....
دنيا تسمع كلامهم بقهر ممصدكة ... ابتسمت بصعوبة وهي تصارع الالم الدتحسة بداخلهه ... كامت من مكانهه مرتبكة واستأذنتهم : خالة ... حكوم اساعد عمو ...
زينب هزت راسهه وراقبت دنيا وهي دتروح ...
منى : الله يكتب بي الخير ... خلي نفرح بوليد وعروستة الحلوة هسة ....
ام ايهم ابتسمت : ان شاء الله...
اسماء باوعت بأنزعاج وسكتت ...