علياء في قبضة الأسد

|9|

👑 عـلـيـاء في قبضة الـأسـد 👑
بقلم #رباب نجمة ومروى#
الجزء التاسع:

هزات سنسلة ديالها بنصف قلب كتشوف فيها بنظرات مظلمة وملامح حزينة.. رجعات خباتها فالمجر حتى تصلحها..

دورات عينيها فالغرفة لي كانت كبيرة وآثاتها ثمين بألوان داكنة كتسد النفس.. كتعطي طابع رجولي بإمتياز.. تقدمات من الشرفة باغا تشوف المنطقة لي هي فيها.. فاش جات لهنا ماهتماتش بالتفاصيل بزاف كان كل همها تهرب من زوج ماماها وتواجه مصيرها وتتعرف على هاد الأسد المجهول.. قربات منها ولقات راسها كطل على الجردة.. مساحة خضراء واسعة مغروس فيها شجيرات مقصوصة بإتقان وورود مزهرة ومتنوعة...
ابتاسمات وعينيها لامعين بنجوم خفية.. كان الليل طاح ونجومو لمعو فالسماء... رجعات دخلات للغرفة وهي متعجبة كفاش مكاين حتى واحد من غيرها فهاد الڤيلا الضخمة.. حيدات السروال لي ضايقها وجلسات على السرير متسطحة على ضهرها وشعرها مرمي على الوسادة بحرية.. كتفكر فالبعيد.. وفالقبلة لي كانت  بينها وبين داك الشخص الغريب بالنسبة ليها.. ابتاسمات بسخرية على كلمة غريب لي جات فبالها.. ما هو ولا راجلها أو مابقاش غريب..  وهاد القبلة هي لا شيء قدام زواجهم.. هاد القبلة غادي تجي موراها قبلات و........
سكتات الصوت لي داخلها ماباغاش تزيد تفكر فداكشي لي كيعصبها...
حتى حسات بالباب كيتحل مصدر صوت مزعج بفعل تلامسو مع الأرضية الخشبية...

•في مكان أخر•
وبالظبط فمدينة فاس.. العاصمة العلمية..
فبيت كبير كيطل على الأشجار لي على برى..سرجم مفتوح كيدخل منو هواء نقي ورياح ليلية خفيفة.. ناعسة على حنبها الأيمن مغمضة عينيها وشعرها الأسود اللامع مفرش وراها وطولو فات المساحة لي وراها..
فتحات عينيها السود... أصلا مكانتش ناعسة غير كانت مغمضة عويناتها وكتفكر ... بالها معلق غير مع ضحكتو ونظراتو وغمازاتو وصوتو الرجولي.. بمجرد التفكير فهاد الأشياء كيبقى قلبها كيضرب بسرعة..
فاش تذكرات شكون هي فحياتو وشنو كتعنيلو حسات بنغزة فقلبها.. وشعور الخيبة كيعصر قلبها.. رجعات تقلبات على ظهرها وابتاسمات ابتسامة صادقة مصممة ومصرة على أنها تخليه يبغيها ويبادلها نفس الشعور.. بصح هي مامستاعداش تصارحو بمشاعرها.. خصها حتى تحس بيه باغيها ديك الساعة غاتعتارفليه.. سدات عويناتها مدعية النوم.. فور ماسمعات الباب تفتح وصوت الخطوات باتجاهها من بعدها همسات الأم ديالها فقط لي مسموعة.. كتدوز يديها على شعرها بحنان وتدعي الله يصلح شأنها ويديها فالطريق الصحيح ويسعدها فحياتها...
أما بنتها فكتقول آمين فخاطرها..
#يتبع..