علياء في قبضة الأسد

|14|

👑عـلـيـاء في قبضة الـأسـد 👑
بقلم #رباب نجمة ومروى#
الجزء الرابع عشر:

علياء: نت شنو كدير..

لولا دخول الخادمة علم الله شنو كان وقع.. فتحات الخادمة عينيها وشهقات بخجل من منظرهم..
قلب وجهو ليلها مكشر على أنيابو..
أسد: واش نتي مكتعرفيش دقي قبل مادخلي ماعرفتيني واخد راحتي مع مراتي ماعرفتيني كنبدل حوايجي.. داخلة مدرمة بحال البگرة..
الخادمة اكتافات تنطق كلمة اعتذار وتخرج حانية راسها.. فحين هو شاف فعلياء وتبسم ليها بحب..
أسد: حتى هاد المرة قاطعونا..
ابتاسمات بدون شعور.. فرح حيت حظى بابتسامة منها..
أسد: خليك ديما كتبتاسمي فوجهي..
حك لحيتو وبلل شفايفو بتوتر لأول مرة.. و خرج من البيت مخليها واقفة مصدومة وحشمانة..

أما لتحت فكانت ريتاج أمام الڤيلا وبقربها مراد حادر راسو..
ريتاج: عذبتك معايا..
مراد: عذابك راحة..
ابتاسمات ليه ودخلات للڤيلا بلاما تجاوبو.. دخلات ومن وراها مراد جار الحقيبة ديالها.. طلاقات بخوها هابط فالدروج وكيتبسم غير بوحدو..
ريتاج(بفرحة): خوويااا..
أسد: ريتاج (تقدم عندها وضمها عندو معنقها عناق حار) توحشتك ألغزالة ديالي..
ريتاج: حتا أنا توحشتك (عبسات) بالحق ماسخيتش بدادا..
أسد: ياك نتي لي بغيتي تجي عندي اذن متشكايش بزاف..
ريتاج: وخا صافي المهم غادي نطلع لفوق نرتاح ونقاد حوايجي..
أسد: ولكن قبل خصني ندوي معاك..
ريتاج: ها ؟ فاش ؟

تمشات بجنبو ودخلوا للصالة جلسات مقابلة معاه هو لي كان داير رجل على رجل او واخد راحتو اما هي متشوقة تعرف فاش باغي يدوي معها..
ريتاج: كنسمعك شنو هو الموضوع؟
أسد(بهدوء): أنا تزوجت..
وسعات عينيها فيه مامتيقاش..
ريتاج: شنو قلتي واش داوي بصح..
أسد: اه شنو لي جاك غريب..
ريتاج: ياك نت معقد احم احم بغيت نقول ماعندكش ديك الفكرة ديال الزواج شنو تبدل دبا ؟
أسد: حتا حاجة غير بغيت نجرب..
ريتاج: أويلي على تجرب واش سحابليك الزواح لعبة.. وعلاش ماقلتي لينا والو ... أصلا هادو عوايدك مكانسيقوا حنا الخبار لشي حاجة حتا كتكون درتيها (وقفات) أنا غادي نمشي نشوف عروستك.. فيناهي ؟
أسد: فبيتي..
ريتاج: أوك...
طلعات ريتاج لبيت أسد باغا تعرف البنت لي ختار خوها.. فضولها غاياكلها..دقات وفتحات الباب فاش سمعات الإذن بالدخول..

ريتاج: السلام..
علياء(بخجل): وعليكم السلام..
ريتاج: بلا شك نتي هي مرات خويا أسد..
علياء: اه هي انا..
ريتاج(وسعات ابتسامتها): جمالك كافي يخلي خويا يفكر فالزواج.. غزالة تبارك الله..
علياء(بابتسامة عذبة): الله يبارك فيك أختي شكرا..
ريتاج: أنا ريتاج أخت أسد..
علياء: متشرفين ريتاج أنا علياء..
ريتاج: سميتك مزييونة..
علياء: حتا سميتك ههه..
ريتاج(جلسات على السرير واخدة راحتها): اوا ولفتي شوية..
علياء(جلسات حداها حشمانة): شوية الحمد لله..
ريتاج: مالك أصاحبتي حشامة رخفي النفس فيك.. مكاين لاش تحشمي مني عتابريني ختك..
علياء: شكرا ربي يخليك..
ريتاج: عرفتي عييت بزاف هاد النهار وراسي غايتهرس عليا بلا مراد لي الطريق كاملة وأنا رادة معاه البال..
شافت فيها علياء بعدم فهم فحين ابتاسمات ليها ريتاج وكملات كلامها..
ريتاج: المهم نخليك دبا غادي نمشي ندوش ونضربها بنعسة بيزو..
خرجات وخلات علياء بوحدها كتفكر ومامرتاحاش هاد الجو غريب عليها بزاف لكن كيبقا حسن من العيشة مع راجل مها..
مشا بالها لأسد لي بدا كيزيد اعجابها اتجاهو هو بالنسبة ليها أول راجل فحياتها.. وخايفة تولي تبغيه..
#يتبع.. حبيباتي بغيت نشوف إشهارات وأراء على القصة واش عجباتكم ولا نحبس حيت التفاعل فيها طايح إلا مابنتوش في هاد الجزء ومادرتوش إشهارات غانحبسها ❌♥